عندي أعراض غريبه

[حماده عبده]

بعد السلام عليكم أنا بعاني من مشكله بالمعده منذ 8سنوات وهي جرثومة المعده وعملالي مشاكل كتير ومش عايزه تسيبني في حالي وأخدت مضادات حيويه كتير أوي لكن دلوقتي بدأت أحس بأرهاق مستمر وجع في الظهر وجع بكعب رجلي لما بمشي أو أقف لفتره بسيطه وجع بخلف القفص الصدري مع الشهيق مع وجع الظهر مش قادر أقوم دايما من السرير مش عارف دي أعراض أيه بالضبط من الجرثومه ولا حاجه تانيه وحشه أنا ذهبت للدكتور وقالي أعمل تحليل براز ميكروب حلزوني ومش عارف أيه تاني كده بردو في البراز بعد ماقولتله الأعراض دي كلها ربنا يستر

[pocy]

والله يا اخى الفاضل انا معرفش بس حبيت ادخل وادعيلك ربنا يشفيك يارب شفاء تاما ياربالعالمين فهو الشافي والقادر على كل شئ

ومره تانيه شفاك الله وعفاك اخى فى الله

[doha]

ساعات الاكتآب لوحده بس بيجيب كل الاعراض دي مع بعض

وممكن يكون حاجه هايفه جدا الي تعباك كمثال يكون عندك نقرس .. اعمل تحليل يوريك اسيد

كمان حلل هيموجلوبين

وتاكد ان مفيش اعراض تانيه زي شحوب او اصفرار في العين ..

بالمناسبه وعلى حد علمي جرثومه المعده لها علاج فعال وبتخف بسرعه مش عارفه هي ليه مطوله معاك كده ..

[fatfouta]

الظروف اللى انت بتمر بيها بتاعة الغربة وعدم احساسك انك بتعمل حاجة وكل ده ممكن يجيبلك الاعراض دى

كان عندى نفس الاعراض لانى انا عندى ارتجاع فى المرئ اساسا وكان بيجيلى وجع فى الظهر جاااااااامد وكنت احس ان حد مكتف ظهرى ومش قادرة حتى اقف ولما روحت لدكتور هنا (فى الرياض يعنى) قاللى دى اعراض ذبحة صدرية.....أه والله وانا انزعجت جداا وخوفت

وبعدين الاعراض زادت تانى ولما نزلت اجازة روحت لدكتور باطنة كبير فى مصر وقاللى ولا ذبحة صدرية ولا حاجة هو الضيق مع ارتجاع المرئ وحموضة المعدة يعملوا كل ده وادانى ادوية المعدة والوجع راح بس مش هقولك مش بيرجع لا بيرجع لما يكون فى ضيق

ان شاء الله يبقى خير ماتخافش بس انت حاول تبطل انفعالات وتفكير وهتبقى كويس لان المعدة ممكن تبقى حساسة جدا وحضرتك لما بتزعل بيحصلك كل الاعراض اللى قلتها

وصدقنى انا مجربة ده كله وماتخافش مش هيطلع حاجة مش كويسة ولا حاجة واستبشر فى ربك خير

ربنا يشفيك ويشفى كل مريض....اللهم آمين

[Alrefaey]

اخى العزيز شفاك الله وعفاك

مبدئيا اعرض نفسك على دكتور باطنة وجهاز هضمى شاطر

عايزك تضع نقطة فى اعتبارك ان مريض المعدة ديما بيكون عرضة لبعض المؤثرات التى سرعان ما تعاود الاعراض على الظهور مجددا بين الحين والاخر

مفيش مريض معدة بياخد علاج وبيخف وبعدها ما يتعبش بالبلدى كدة ,هتخف وبعد فترة نتيجة لعدة عوامل هتتعبك شوية وهتتعايش معاها وهتعرف ايه اللى بيتعبك وهتتجنبه

جرثومة المعدة او الهيليكوبكتر بيلورى مشهورة بالخليج وهى جرسومة رخمة وعلاجها بيكون ثلاثى هقوله لك لاحقا

اهم شىء انك تعرف انك ممنوع من الاتى لانه بيعاود عليك الام المعدة

المياة الغازية بكافة انواعها

الادوية المسكنة للالم

التوابل (الفلل - الشطة ...)

لو فصيلة دمك O خلى بالك معدتك ديما حساسة وتعامل معها بحرص

وصفة لعلاج جرثومة المعدة والتأم قرحة المعدة

omeprazole 20 mg cap حبة كل 12 ساعة

amoxciylline 500 mg cap حبة كل 8 ساعات

flagyle 500 mg t حبة كل 8 ساعات بعد الاكل

لو عندك غثيان او بتحس بإرتجاع خد مع العلاج السابق motillium tab حبة قبل الاكل بربع ساعة

اما بخصوص الم كعب قدمك فحلل uric acid serum

معلوماتى اللى فوق يا اخى من واقع انى صيدلى وعندى خبرة فى حالات مشابه لحالاتك واعتبر كلامى فوق نصيحة

ولو انه افضل انه يفحصك طبيب متخصص

سلامتك wst::

[مهندس ابو يوسف]

بعد السلام عليكم أنا بعاني من مشكله بالمعده منذ 8سنوات وهي جرثومة المعده وعملالي مشاكل كتير ومش عايزه تسيبني في حالي وأخدت مضادات حيويه كتير أوي لكن دلوقتي بدأت أحس بأرهاق مستمر وجع في الظهر وجع بكعب رجلي لما بمشي أو أقف لفتره بسيطه وجع بخلف القفص الصدري مع الشهيق مع وجع الظهر مش قادر أقوم دايما من السرير مش عارف دي أعراض أيه بالضبط من الجرثومه ولا حاجه تانيه وحشه أنا ذهبت للدكتور وقالي أعمل تحليل براز ميكروب حلزوني ومش عارف أيه تاني كده بردو في البراز بعد ماقولتله الأعراض دي كلها ربنا يستر

اخي الفاضل:

شفاك الله وعافاك

بس لابد من البعد عن التوترات مافي حاجه تستاهل صحتك اهم

والف سلامه

تحياتي

م/ابو يوسف