الإدارية العليا تؤيد إسقاط الجنسية المصرية عن المتزوجين بإسرائيليات شريطة نظر كل حالة على حدا

[herohero]

قضت المحكمة المحكمة الإدارية العليا بمجلس الدولة فى جلستها المنعقدة السبت بتأييد الحكم الذي أصدرته محكمة القضاء الإدارى بدرجتها الأولى بإسقاط الجنسية المصرية عن المصريين المتزوجين باسرائيليات.

كما قضت بضرورة عرض كل حالة على حدا على مجلس الوزراء من أجل الفصل فيها، وإلزام وزارة الداخلية بعرض طلب إسقاط الجنسية المصرية فى هذا الشأن على المجلس.

وكان المحامي نبيه الوحش قد أقام الدعوى ضد كل من وزير الداخلية والخارجية بصفتيهما يطالبهما بسحب وإسقاط الجنسية المصرية من جميع الشباب الذين تزوجوا من إسرائيليات لمخالفة ذلك نص المادة 2 من الدستور وقانون الهجرة والجنسية وكذلك مخالفة جميع مصادر التشريع الإسلامى من كتاب وسنة.

هذا اخبر ورد ف موقع مصراوي

وما اريد اناطرحه هنا لماذا لم يتم من الاول ذكر هذا هم طبعامش اسرائيليات فعليا يعني معظمهم ان لم يكن جميعهم من عرب 48

ياترى هل نحن ف متناقضة من ضمن المتناقضات التي نعيش فيها مش قولتوا سلام وبنبيع لهم غازنا بمملاليم

وحبايبنا ف شرم الشيخ وطابا بيتمشوا كانها بلد ابوهم

ولا هو احنا نتشطر على عيالنا ماشي محدش بيقول ان تصرفهم صح بس الزواج حرية شخصية يا جماعه وبعدين لو عاوزين الحق فيه مصريين كتير لازم تتسحب منه اجنسية لانه اضر مصر بجد

يعني هم دول عملوا وضروا مصر زي اللي دخل مبيدات وغيره وغيره

معرفش انا بتكلم بحياديه بس شايف انه متشدد يمكن اللي كويس فيه نقطة النظر ف كل قضية ع حدة

وبعدين ما الي متجوز من امريكية ماهو ممكن تكون عميلة يعني اشمعنا الاسرائلية صحيح مووع مش مقبول عاطفيا لكن فعليا ما ممكن مصري متجوز من بريطانية يهوديه متصهينه يعني هيفرق

[se_ Elsyed]

إسقاط الجنسية إجراء لا يُرضيني شخصياً

لكن كان نفسي الحكم يصل الى اننا نضرب كل واحد فيهم 100 قفا

يا هيرو باشا حسب القوانين الصهيونية فإن الطفل بياخد جنسية أمه

وبالتالي الدولة لو سكتت على ازدواج جنسية هؤلاء

يبقى بكره تلاقي جيل جايلك مصر وبيطالب بحقوقه السياسية والاجتماعية وهو حضرتك خدم في الجيش الصهيوني وانت عارف التجنيد اجباري عندهم .. يعني داخل داخل

ازاي الحال ساعتها سيادتك ؟

عرب48 بقى ولا حرب 520 مالناش دعوه

سمعت ناس من العيال دي بيقولك البلد ضاقت بينا وروحنا اشتغلنا في بلد في بنا وبينها اتفاقية سلام وناس رايحه وناس جايه

شوفت القذارة ؟

الجواز حريه ... ماشي .. يبقى يستحمل نتيجة ممارسة هذه الحرية

وفوق ده كله الحكم النهاردة قال ان الحالات هايتم دراستها كل حاله على حده

خد دي بقى

الامين العام لمنظمة الأمم المتحده ووزير الخارجية المصري السابق " بطرس غالي " متجوز يهودية بس مولوده في مصر وهي من عائلة كبيرة "عائلة نادلر اللي كان عندهم اكبر مصانع حلويات " ...مش بس كده .. ده عديل اسحاق رابين ( متجوزين اختين )

[herohero]

خد دي بقى

الامين العام لمنظمة الأمم المتحده ووزير الخارجية المصري السابق " بطرس غالي " متجوز يهودية بس مولوده في مصر وهي من عائلة كبيرة "عائلة نادلر اللي كان عندهم اكبر مصانع حلويات " ...مش بس كده .. ده عديل اسحاق رابين ( متجوزين اختين )

انت اول مره تعرف كده ده معروفة واللي اسمعه ان الغالي الوالي متجوز يهوديه

انا متنع بكلامك يا سي السيد بس انا اعتراضي ما من الاول عارف واحد بيقول ايه انا ذهابي لاسرائيل اسهل من العمل ف السعوديه باركب الاتوبيس او احجز تذكرة ع طيران سيناء

ولو بنتكلم ع موضوع الجيش ايه الفرق بين المصري الامريكي اللي ف الجيش الامريكي وبيضرب ف العراق وايه الفرق بينه وبين الوزير مزدوج الجنسية

عارف انا معاك ف الكلام ده بس لو نظرنا بتعمق مش بذمتك شايف ان فيه ناس منتفعه كويس جدا وتستحق سحب الجنسية منهم

يعني حضرتك ماتسمعش عن حسين سالم "ابقى اعمل سيرش عنه" وقولي ايه رايك

ماهو ده اللي باع الغاز لاسرائيل وده صديق مقرب للحلو ابو 82 زمايل

وغيره وغيره واللي دخل مبيدات مسرطنة

انا مقتنع ان الخطورة مع الجيل التاني بس من جوايا عاوز ناس كتير تتسحب منها الجنسية لانها ضررتنا حاليا وشايفين ضررها

ولا انت ايه رايك اللي بيبع الغاز ببلاش يبقى وطني ومخلص

[se_ Elsyed]

يا عزيزي هيرو

لإننا لسنا أصحاب البلد ... فهناك أمور كثيرة لا نعلم عنها شيئاً ..

ومنها موضوع الغاز ..

تخيل إن تصدير الغاز لإسرائيل منصوص عليه في إتفاقية السلام ولم يُفعل إلا في العصر الإسود لمبارك .. وفي أخر أيامه كمان ؟

شوفت بقى ... يبقى المفروض كنا نسحب الجنسية من السادات ومبارك - على حسب كلامك .... ماليش دعوه هيرو هو اللي قال كده مش إنا -

موقف أمريكا مختلف تماماً عن إسرائيل

إسرائيل عدو مباشر لنا وإحنا معاهم في صراع ...

وبعدين أمريكا مش محتاجه تتجسس علينا

لكن إسرائيل قارفانا في عيشتنا والواحد بيعد صوابعه وراهم ..

[اغابي]

عاوز تقول يا هيرو انك مصدق انت وس س ان الجنسية حتتسحب - مفيش حاجة من الكلام داه حتحصل

اشك فى كدا -

اولا عددهم مش واحد ولا اتنين ولا الف - دووول عددهم 36 الف مصري انا لسة سمعاها فى الراديو اف ام - نهارده

و ما سالناش نفسنا - كدا سؤال على الماشي - كام مصري منهم فى وظيفة مهمة او وصل لمنصب عسكرى فى اسرائيل . .

يعنى القائد اللى اعطى الامر بضرب اسطول الحرية حتى شكله انا ما كنتش مصدقة انه اسرائيلي وفاكراه صيني طلع انه اسرائيلي من اصل صينى

بس واخد الجنسية الاسرائيلية وترقى فى المناصب العسكرية فى اسرائيل .

هو انتم تشكوا ان ممكن مصرى واحد وان ما كنش اكتر طبعا - فالنفرض انه مصرى واحد من ال 36 الف مصري واصل لوظيفة مهمة او منصب عسكرى فى اسرائيلي مميز

واحنا ما نعرفش - يبقي ازاى القانو ن حيقدر يسقط عنه الجنسية المصرية - مفيش واسطة له كدا او كدا او ضغط على مصر باى شكل

اكيد كل داه كلام كالمعتاد للتثبيت ومش حيتنفذ - ما تقلقوش من حاجة

كلام المحكمة مدهون بزبدة بكرة يصبح عليه الصبح ويسيح

اغابي

[herohero]

انا لم اقصد بحديثي تاييد او معارضة للموقف لكن كنت افكر بصوت عالي دون التحيز ودون اعتبار ان مصري

هو الجواز مش حق مشروع اتجوز من اي حته ايه علاقة ده بولائك

ماحانا عارفين ان الولاء مش بالمكان لان كل اللي قرفونا ف مصر كانوا مصريين ابا عن جد

وماكنوش عايشين بره

بل بالعكس اللي خدم مصر وساب ذكرى حتى الان بنستفيد منها هو محمد على ومكنش مصري روحوا شوفوا الكباري اللي ف القناطر حتى الان عايشة وشغاله زي الفل

اما حبايبنا اللي بيتغنوا بحب البلد عملوا ايه

وعن التجسس كان زمان لما كان مصر عندها شيئ اسرائيل ماتعرفهوش يعني فيه اقمار تجسس وغيره وفيه جواسيس مالهومش دعوة ولا اتولدو ف اسرائيل ولاغيره الخيانة والولاء ليست بالمكان

وبعدين مادام الجواز او الذهاب لاسرلاائيل وحش سامحين ليه وقارفينا باتفاقية سلام ليه

ومعلش يا سي السيد بيع الغاز ع الورق لم يتم لاسرائيل بل تم لشركة غازات المتوسط ويمتلكها حسين سالم

واعمل سيرش كده وانت تعرف مين حسين سالم يكفيك ان تعلم ان الريس بينزل ف شرم الشيخ عنده البيه عامله قصر هدية هناك

وبنى مسجد السلام هدية عشان الريس كان هيعيد وقتها ف شرم الشيخ فبني له المسجد عشان يصلي فيه

سيدي العزيز لو ان الجنسية تسحب وتعطى بالولاء صدقني كان عددنا قل جدا كمصريين

انا ارى ان من فرط ف حقوق وثروات هذا الشعب هو اخطر من اي جاسوس ولا من اي مصري يتزوج من اسارئيلية

والدليل هؤلاء المصريين المتزوجون من اسرائيليات فين الضرر بتاعهم ماسمعناش ان حد منهم تجسس لصالح اسرائيل يعني

وع فكرة من زمان والقصه ده موجوده وبعدين تجسس ايه

ياسي السيد احنا بناخد راي الشقيقة المدللة ف كل شيئ يبقى هتجسس علينا ف ايه

اشك ان زواج المصريين من عرب 48 هيضرنا ويمكن وده احتمال ضعيف يوصل حد من اللي ابوهم مصري يوصل لمنصب ف اسرائيل مهم

ويمكن يحن فيفيدنا ف قضايانا انا بقول يمكن

[ابو محمد بن مصطفي]

انا حاسس ان نبية الوحش قصدي الجحش ده عنده تخلف عقلي وغاوي شهرة

بس نشوف الموضوع ان هناك شروط لسحب الجنسية

فمش معقول واحد مصري مسلم متجوز واحدة فلسطينية من عرب 48 ومسلمة تسقط عنه الجنسية

او واحد مصري مسيحي متجوز واحدة فلسطينية من عرب 48 مسيحية تسقط عنه الجنسية

ثم ان الاسلام احل الزواج من الكتابية

انا مع سحب الجنسية من كل واحد بيبيع البلد

[hanzalah]

كلامك رائع يابو محمد

انا مع سحب الجنسية من كل واحد بيبيع البلد

بس لاحظ

لو طبقنا هذا المبدأ .. بكره الصبح .. راح تلاقي نص الحكومات السابقة ملط .. بدون جنسية !!!

وكما قال س س على لسان هيروهيتو .. ممكن المفرمة تطول رؤساء كمان ..

انا مقلتش

هو اللي قال ..

لكني لو عدت لأصل تساؤل اخونا هيرو

فعلا التناقض قائم وواضح

الحكومة الحالية والحكومات السابقة .. والرئيس نفسه يقول : .. احنا وقعنا معاهدة سلام

وفريق التطبيع لايزال يسلخنا ليل نهار بالتطبيع .. واشهرهم علي سالم .. ناقص يكتب كل يوم في الجرنال (صباح الخير - طبعت ولا لسه !!)

ومن جانب آخر .. يقولون لنا نفس الفريق السابق .. لا تتزوج .. هتروح ف داهية ويسحبوا منك الجنسية ويسحلوك انت واهلك !!

يعني نفتح الشباك ولا نقفل الشباك

فلقتونا .. مليتوا البلد ..

احتراماتي