هزلية الكشف الطبى للمقبلين على الزواج

[عادل أبوزيد]

من الناحية القانونية أصبح الكشف الطبى على المقبلين على الزواج أمرا ملزما قانونا - نظريا - و لكن الواقع أنه فى الأغلب لا يتم الكشف الطبى و يقوم المأذون بإحضار شهادة الكشف الطبى.

ما سبق كان إستهلالا لابد منه

سمعت عن عدد من الزيجات تمت بشهادات طبية صورية ...تماما مثل الشهادات الطبية لزوم إستخراج ترخيص قيادة سيارة.

الواضح أن القانون تم إصداره على عجل هذا ما يمكننى قوله !!

قرأت اليوم أن المجمع المقدس فى الكنيسة الأرثوذوكسية أرجأ الإلزام بالكشف الطبى على المقبلين على الزواج من المسيحيين.

الخبر فى جريدة "المصرى اليوم" فى الصفحة الثالثة و نصه

"و قرر المجمع المقدس تأجيل قرار ضرورة الفحص الطبى الشامل قبل الزواج نظرا لعدم إكتمال المشروع و وجود بعض الثغرات به و التى تحتاج للدراسة و الإيضاح"

تصورى أن نفس الأمر ينطبق على المسلمين إلا أن "المآذين" - جمع مأذون - وجدوا طريقا أسهل لتغطية تلك الثغرات

[لماضة مصرية جدا]

السلام عليكم و رحمة الله و بركاته

اسمحلي استاذي اشارك بوجهة نظر متواضعة

الهزلية اللي حضرتك ذكرتها مش محتاجة نص قانون...او مشروع يتداوله الناس تحت القبة...بمقدار ما هي محتاجة نشر الوعي و تغيير مفاهيم اترسخت عند الناس

ايوة يا استاذي

من ضمن المفاهيم دي....ان هناك مناطق محرمة لا يمكن الحديث فيها و من ضمنها "الفحص الطبي قبل الزواج"....وبقول منطقة محرمة و مش عارفة ليه الناس غلفتها بالسرية التي تصل للتحريم....و زد علي ذلك انهم دايما بيفكروا في السينارو الاكثر سوءا...و كأن الفحص الطبي قبل الزواج هو القشة اللي هتبوظ الجوازة...مع انه حق مشروع جدا جدا لكل من الشاب و الفتاة

مررت بتجربة مؤلمة جد الصيف الماضي مع اخد فتيات العائلة.....الشاب مناسب جدا و ىتمت الخطبة....و استكمالا للاوراق المطلوبة تم تحديد موعد للفحص الطبي...الشاب في بادئة الموضوع تطوع و ابدي تفتحا منقطع النظير.....لكنه في الموعد المحدد لم يظهر

الحت الفتاة في عدم استكمال الزواج بدون الفحص الطبي....فما كان منه الا انه اقنعها انه اتم الفحص و لكن في عيادة خاله الطبيب الشهير بتلك المدينة....و بالفعل احضر التقرير

لما تشككت الفتاة...و اخبرت عائلتها انه قام بمسرحية هزلية عشان يحصل ع التقرير ...تخيل رد فعل الاسرة.....انهم كلهم نهروها انها تتكلم في موضوع زي ده....و ان ده عيب...و ان دي مجرد اجراءات شكلية لا اكتر و لا اقل

تمت الجوازة

بعد شهر واحد من الزواج......هو مصاب بمرض و تم نقله للزوجة....و التي بدأت رحلة العلاج

كان من حق البنت دي وقتها انها تطلب الطلاق....لكن عيلتها برضه رفضت فاذا كانوا اصلا مش مستوعبين مفهوم "االفحص الطبي"....هيتقبلوا ازاي التعايش مع مفهوم آخر و هو "مطلقة"

بكرر....المووضع محتاج بس صدق نوايا...محتاج اننا نغير مفاهيمنا.......و نؤمن ان لكل واحد له الحق في الاختيار الكامل....و الاختيار بياتي بالمعرفة الكاملة لظروف اللي قدامي من غير أقنعة

تحياتي

[doha]

اذكر ايام خطوبتي في بدايتها سألت طبيبه صديقة عن الفحوصات الي مفروض اعملها انا وزوجي الي كان خطيبي وقتها قبل الزواج . . مكانش لسه الموضوع ده مفروض ولكن ولقناعتي انه حاجه ( مهمه ) فسألت عشان اقدر اقوم بيه ..

سالتني الدكتوره هو انتم اقارب ؟ قلت لها لاه ؟ في في عيلتكم او عائلته تواريخ مرضيه ؟ برضه الحمد لله لاه ..

قالت ياستي اعملي بس فحص هيموجلوبين لكي ولا تقولي له يعمل فحص ولا شيء اصل التحليل الوحيد المطلوب منه تحليل الانجاب هتقدري تطلبي منه وتقولي له روح حلل ( كذا ) قلت لها لاه طبعا . . قالت لي يبقى خلاص كبري دماغك ومتسأليش ..

ده كان راي الطبيبه الي سألتها بصفتها طبيبه نساء وولاده يعني ده شغلها المفروض وهي ست متعلمه وفاهمه ومع ذلك ده كان كلامها ..

اجمل مافي الموضوع اني لم آخذ بيه رحت معمل البرج وقلت لهم عاوزه اعمل تحاليل ماقبل الزواج .. برضه سالوني نفس السؤال انتم اقارب او في تواريخ لامراض عقليه او ماشابه قلت لاه قالي خلاص يبقى في كام تحليل كده مش هتعمليهم ونعمل الباقي .. اخذوا مني عينتين دم وكبشه فلوس وسلموني بعد يومين كومه ورق في مظاريف صفر ..

الحمد لله الفحوص كلها طلعت سليمه .. خدتها بقى وانا فرحانه ورحت طلبت من زوجي يعمل تحاليله قالي طيب .. المهم مرت الايام والشهور وقبل الفرح بحاجه بسيطه لا اذكر مناسبة الحديث لكني فوجئت بيه بيقول انه نسي يعمل التحاليل .. قلت له يانهارك ابيض انت لسه معملتهاش قالي لاه باذن الله اروح الاسبوع ده اعملها ..

بعد ثواني من التفكير قلت له لاه خلاص متعملش حاجه .. قالي ليه ؟

قلت له عشان لاقدر الله لو طلع فيها شيء مبقاش مخيرة بين اني استمر معاك او ننفصل .. خلينا كده عشان ميكونش في سبب يدعوني للاختيار ..

تحاليل الزواج حاجه كويسه ( نظريا ) لكن فعليا الشخص اذا اختار وقرر خلاص مبيكونش في مبرر اني احط له عقبات في طريقه ..

ملاحظة : قبل مااحمل طلبت من اثنين من الاطباء يكتبوا لي على حقنة الحصبة الالمانية واحد منهم ضحك والتانية قالت معندناش الكلام ده .. وبالمناسبة برضه حقنة التيتانوس الي بتتاخذ في الحمل كاجراء روتيني في كل الدول اخذتها بالعافيه وبعد الحاح مني على الدكتورة في اول حمل وفي الثاني ( كنت اتودكت بقى وبقيت مصرية مية مية ) كبرت دماغي اخذا برأي الدكتورة الي قالت لي ان دي بتاعت الناس الي هتولد في اماكن ملوثه مش زي عندنا مستشفيات وكده فملوش لزوم التحبيك والتعقيد ده ..

صحيح في مصر احنا محتاجين توعية جامده وبعدها سيبوا كل واحد متفرضوش عليه حاجه بالقانون .. سيبوه يختار وهو هيعرف بنفسه صالح نفسه ..

[بركة]

ذكرني هذا الموضوع بالفحص الطبي المطلوب من الزوجة لالحاقها بزوجها الذي يعمل في السعودية

وكان هناك نوعان من الفحص : واحد تبع وزارةالصحة لفيروس سي وكان للامانة دقيق

والثاني في مستشفى في شارع مصدق في الدقي "أقسم بالله " لاتحليل ولا كشف ولا الهوا

والتقرير طلع مسافة طباعة الورق وبرشمة الظرف بالشمع الاحمر ودمتم ..

للاسف فين الرقابة على اي حد بيعمل اي حاجة في اي حته ..كل واحد بيعمل اللي هو عاوزه ..

[عبيد الله]

حتى وقت قريب كنت غير مستوعب لأهمية الكشف الطبي.. بصراحة كنت أرى طريقة فحص "الإنجاب".. شيء غير لائق ومستفز.. كنت أتمنى لو أن التكنولوجيا الحديثة قد توصلت إلى وسيلة تحدد القدرة على الإنجاب من خلال تحليل الدم فقط، وليس..

[عبيد الله]

ما لفت انتباهي إلى أهمية هذا الكشف هو هذا الموقف:

صديق لي، ينتمي إلى إحدى محافظات الدلتا، نزل مصر تزوج وقضى فترة أقل من عام هناك.. اتصلت به ففاجأني بشيء ما كنت ألقي له بالاً..

قال يا أخي إياك أن تخطأ نفس خطأي.. قلت له خير؟ قال: فوجئت بطلب الكشف الطبي قبل الزواج فذهبت و"ضربت فحص بخمسمية جنيه" وأعطيته للمأذون.. بعد عدة أشهر تأخر الإنجاب فذهبت للطبيب وكشفت هذه المرة بجد..

فاكتشفت عندي شيء في السائل المنوي يؤخر الإنجاب.. سيحتاج لوقت كبير في العلاج.. يقول: حالتي النفسية أصبحت صعبة، وعلاقته بزوجته تأثرت سلباً، وخصوصا أنهم يعيشان في قرية.. وأهل زوجته ليلا ونهارا يسألونها: ها، مفيش أخبار؟؟.. وأهله كذلك..

قال لي: لو كنت أخذت الموضوع بجدية واهتمام من البداية كانت الأمور اختلفت عن وضعها الحالي كثيرا..

الله أسأل أن ييسر لهما أمرهما ويرزقهما الذرية الصالحة، وكل محروم يارب..

[herohero]

والله انا متنع بيه جدا بس هل هو مقبول على مستوى العيله من الطرفين خاصة بالنسبة للرجل يعني ممك يكون بينظر له انه غير مناسب لكن عمليا

تعالى نقول انه اكتشف شيئ يؤثرع الانجاب او ان غيرمنجب مثلا اليس هذا افضلمن ان يتماكتشافه بعد الزواج

اتنين اتخطبوا وحبوا بعض قوي لكن جاءتنتيجه التحليل بما لايشتهوا هناك فرصة للعلاج انعم واكرم ولنفترض ليسهناك علاج والحاله مفقودالامل فيها ساعتها هتكون الحكاية واضحه وكل له اختياره ولا اجد ان فيه شيئ ينقص من قيمةالرجل عادي ما فيه واحد بيترفضعشان رفيع ولا تخين ولا قصير ولا طويل ولا شقته ف حته مش تمام

يعني لما نقول ما قدرتش تكمل معاه عشان هو مش هينجب فانا شايف انه حق مشروع لها

بصراحه وجهة نظري ان لا ياخذ الطرفين هذا الموضوع بحساسية من دلوقتي وهم مخطوبين احسن يتعالج ويبقى كويس او لا فيه مشكلة خلاص كل واحد راح لنصيبه

ناس بترد وتقولك افرض جاله مرض بعد الجواز واثر عليه ماهي هتكون نفس النتيجه كلام جميل وخليها ع الله ياعم

لكن انا بتكلم من قبل الزواج نعمل واللي ربنا كاتبه هيكون صحيح فيه اثر وضرر ع الطرفين لكن اهون بكتيييييير من بعد الزواج بقت هي مطلقه وهو مطلق ويعني انا شايف الطرفين خسروا

انما قبل الزواج عادي فسخت خطوبتها ليس الا وكل واحد يشوف نصيبه

[ذهبية]

هو الكلام نظرى حلو جدااا و كلنا عارفين فعلا انة و مهم و ضرورى و مش موضوع الجواز وبس طبيا لازم الشخص يعمل فحص على نفسة كل 6شهور

يعنى مسالة مش مرتبطة فقط بالزواج لكن مرتبطة اكتر بالثقافة الصحية للانسان

ياترى بقى الثقافة دى موجود عموما فى مجتعنا دى المشكلة

للاسف احنا عندنا عادة سيئة جدا

و هى خلط الامور دائما بالدين

يعنى لو جيت سالت اى حد مش بتروح لية تعمل تحليل يقولك ماهو لو ربنا كاتبة عليا هيجيلى هيجيلى من غير ما اروح

طيب ما تعرف و تاخد حرصك يرد يقولك يعنى الحرص هيغير المكتوب

لو البنت فتحت بقها و قالت لازم العريس يعمل تحليل يرد الاهل عيب ما يصحش

ممكن تتاخد كانها شتيمة

للاسف احنا مش بنروح نحلل الا فى حلتين

الاولى مضطرين لتكملة الاوراق الناقصة

التانية من فرط المرض و بيكون خلاص تفشى و انتشر

و بعدين فية نقطة مهمة انا باعانى منها و هو اختلاف وجهو نظر الاطباء فى الحالات مما يجعل هناك بلبلة للشخص

يعنى انا لازم اعمل تشيك اب على نفسى كل فترة لانتشار السرطان عندنا

لو روحت للدكتورة تقولى لالا انتى لازم تيجى ليا كل 4 شهور انتى حالتك حرجة اروح لدكتور تانى يقولى لالا دى بتستهبل عليكى علشان الفلوس

دة الاشعة الى انتى بتتعرضى لها عندها دى الى ممكن تجيبة دى بتعمل كدة علشان تكسب من وراكى

يعنى الواحد يصدق مين .....؟؟؟؟؟ بجد احنا عندنا مشكلة فى التعامل مع اى شىء

[اغابي]

استاذى الفاضل

اذا كان التحايل على القانون من الجنسين مستمر بزواج القاصرين والقاصرات باوراق تسنين لثبوتية اعمارهم انها قانونية

فما بالك بالكشف الطبي !!!!

وان كنت اريد ان اضيف معلومة -

مثلا هنا فى الكويت يتم الكشف الطبي اجبارى كمحاولة من الدولة جاهدة فى الا يكون هناك مجالا للمحايلة على القانون وخاصة بعد وجود اعداد كبيرة من الاطفال المعاقين ذهنيا بسبب اصرار العائلات الكويتية على تزويج الاقارب خوافا على الارث او التفكك العائلى او دخول شخص غريب للعائلة

ومن هنا كان اصرار الدولة على الكشف الطبي

وكانت النتيجة حسب احصائية 2009 / ان تم توقيع الكشف الطبي على 1395 حالة - لم ينجح منها للزواج الا 246 حالة كشف طبي - والتى تثبت خلوها من امراض ورائية تنتقل الى الابناء مما اثار حفيظة الجميع وبدأت الاعتراضات -

ولجأت الدولة نتيجة الحالة المستمرة فى التزايد بشكل سريع وخطير لانتشار امراض التخلف العقلى والتوحد وغيرها من الامراض الوراثية المختلفة التى تصيب الاطفال من عمر 1 الى 6 سنوات - ورغم كل ذلك ومجهودات الدولة فى التوعية - الا انها لم تستطيع تطبيق ذلك القانون فعليا لاصرار الجميع على الزواج - وحجتهم ان ذلك الامر يرفع من بنسبة العنوسة التى هى منتشرة فى المجتمع الكويتيى وان الحذر لا يمنع قدر . .

انا فقط اردت ان الاقى الضوء الى ان المواطن فى اى دولة يحايل القانون بشتى الطرق ومن وجهة نظره الخاصة بان ذلك يصب فى مصلحته الشخصية ودون التفكير فى العواقب التى سوف تكون فى المستقبل وتاثير ذلك على ابناؤه . .

اغابي

تم تعديل 8 يونيو 2010 بواسطة اغابي

[jasmin hamed]

هيه المشكله ان المجتمع بياخد موضوع التحليل ده كانه تشكيك فى القدرات العنتريه للراجل و تشكيك فى القوه الارنبيه للخلفه للست

مشكله اصلا ان تقيم الشخص و معايرة تكون لاصابته بالامراض و النتيجه اطفال عندهم امراض كان ممكن تلافيها لو عملنا التحليل

واحده قريبتى عندها ابن تنقل له دم كل شهر من عمر سنه و مهدد بفشل كبدى و يقال ان المصاب بالمرض ده لا يعيش ليتعدى 15 عام

واى طفل هتخلفه هيكون عنده نفس المرض ببساطه لو كانت عملت الكشف الطبى السليم كانت هتعرف انها و زوجها بالذات لا يمكن ان يخلفوا اطفال اسوياء

موقف محزن و مؤلم انك تشوف طفل بيعانى عشان جهل الاب و الام و عشان نعره كدابه اسمها مايصحش

و الحمدلله بعد الماساه ديه قبل ماتزوج عملت بدل الكشف مسح كامل و زوجى كان متفاهم جدا و سبقنى لعمل كل انواع الفحوصات الممكن تسبب لاى امراض للاطفال

بيقولوا الى يتلسع من الشوربه

[hOuSsAm]

استاذى الفاضل

انت عارف بعتبر الكشف الطبى ده ايه ........ بعتيره الحق فى الحياة

ومش عايز اتكلم فيه عشان ضرورة قبل الزواج لكن بتكلم بضرورة الكشف الدورى كل ست شهور عالاقل الواحد يتطمن على نفسه وصحته

بس بعيب عالدكاترة انهم بياخدوا الموضوع بتريقة

يعنى واحد يبصلى كدة ويقولى ماشاء الله واحد طويل عريض هيكون عندك ايه

واحد يبص على شفايفى من جوه يقولى صحتك كويسة

واحد تانى يقولى انت موسوس ليه متسبها لله (اقوله ياعم منا سايبها لله بس هو لازم استنى تحصلى مصيبة عشان اتطمن على نفسى)

اخر مرة رحت عملت فحص شامل على نفسى كان من حوالى 8 شهور

روحت للدكتور قولتله بحجة انى مرهق ومش مركز فى الشغل وتعبان عشان يرضى يشوفنى

عملى كل الفحوصات وقالى انت كويس معندكش مشاكل بس وزنك عايز يقل شوية (وبكدة عرفت انى عندى مشكلة فى الوزن وبالتالى اخدت القرار ان اقلله)

ماهو مش عيب ان الواحد يتطمن على نفسه

مش عشان زواج ولا عيلة ولا اى حد ................ لاء عشان نفسك وشخصك وذاتك

مشكلة الناس فى مصر ويمكن المجتمع العربى كله بيبصوا للموضوع من مدياته

تلاقى العريس مقبل عالزواج اول كلام بيبقى عالمهر والشبكة والشقة وبينسوا التدين والاخلاق وانهم يتطمنوا على صحة الراجل اللى هيعيش مع بنتهم

وكمان الشاب بيهتم باسرة البنت وحالتهم الاجتماعية وجمالها ويتناسى صحة البنت اللى هتعيش معاه طول عمره

بجد فيه مشكلة فى ترتيب الاولويات

وده من الجهل المترسخ فى عقول ناس كتيرة

ولو تلاحظ معظم المداخلات السابقة ان الناس معرفتش اهمية الموضوع ده اللى لما شافوا حد من العيلة مر بقصة قاسية بسبب الموضوع ده

الحل فى رايي

زيادة التوعية فى المساجد والكنائس والجامعات

دور الاعلام فى توعية المواطنين

دور وزارة الصحة والاوقاف فى توعية الماذون بالنسبة للمسلمين و مسئول الكنيسة بالنسبة للمسيحين

وبعد كل ده نقدر نعمل قانون حازم ورادع

اتمنى التوفيق للجميع

[اغابي]

انا ولفترة قريبة كانت معلوماتى ان زواج الاقارب فقط هو الذي يحمل جينات وراثية تهدد مستقبل المقبلين على الزواج . .

الا انى اكتشفت قريبا وعن طريق الصدفة حيث تعرفت على صديقة هنا مصرية وزوجها مصري - رزقها الله ببنت عندها مرض تخلف عقلى وانا رايت ابنتهم وكنت حزينة جدا لاجلها وتمنيت لها الشفاء ولكن ارادة الله نفذت -

بل وايضا حذرها الاطباء من احتمال وليس اكيد ان يكون المولود الثاني بنفس المرض - وعندما استفسرت اذ كانت هى وزوجها اقارب اكدت لى ان زوجها ليس قريب لها

وكل منها من بلد مختلفة والصدفة هى السبب فى الزواج . .

وقد توفيت ابنتها هنا منذ شهرين - وعمرها 4 سنوات -

وكانت لها تجارب منذ عامين كما حكت لى ان المولود الثاني لسبب ما فقدته بعد فترة حمل 7 اشهر والمولود الثالث فى الشهر الخامس والى الان لم تنجب بسبب تنوع الامراض عند كل اطفالها كما اكد الاطباء - حيث اطلق اسم على الطفل الثالث - اجمعو الاطباء انه اسمه الحمل المنسي

( اى الحمل عمره - 5 او 6 - اشهر ولكن حجم الجنين لا يتعدى حجم جنين عمره شهرين فقط ) . . يسمى الحمل المنسي . .

وان كانت النسبة الاكبر بين الاقارب الا انه لا يمنع من ان احتمال ذلك بين الغرباء ايضا . .

اغابي

تم تعديل 8 يونيو 2010 بواسطة اغابي

[لماضة مصرية جدا]

السلام عليكم و رحمة الله و بركاته

قريت مداخلاتكم و حسيت آد إيه فيه وعي.....طب اومال الناس اللي بتعترض او مش بتجهض الفكرة من اولها....بيبقوا فين

الواقع بيفرض علينا اختيارات مش بالسهولة اللي احنا متخيلنها نظريا..و خصوصا في قرار زي الزواج....لانه مش بس بني ادم مع بني آدم...ده هيجي منهم اطفال باذن الله بعد كده

كل واحد فينا حالة فردية جدا...و ممكن فيه ظروف تغير قناعاتنا السابقة.....بس حتي لو قناعتنا اتغيرت هتكون بمليء إرادتنا من غير ما نحس بخديعة طرف للآخر

مثال سريع كده

كنت اعرف بنت....اتخطبت.....خطيبها في مرحلة الخطوبة......ابلغها خبر اصابته بالسرطان......كملت...معاه

هو قال....و آداها حقها في الاختيار

و هي اختارت

بس خلاص

فوتكم بعافية

[مهندس ابو يوسف]

استاذى الفاضل

انت عارف بعتبر الكشف الطبى ده ايه ........ بعتيره الحق فى الحياة

ومش عايز اتكلم فيه عشان ضرورة قبل الزواج لكن بتكلم بضرورة الكشف الدورى كل ست شهور عالاقل الواحد يتطمن على نفسه وصحته

بس بعيب عالدكاترة انهم بياخدوا الموضوع بتريقة

يعنى واحد يبصلى كدة ويقولى ماشاء الله واحد طويل عريض هيكون عندك ايه

واحد يبص على شفايفى من جوه يقولى صحتك كويسة

واحد تانى يقولى انت موسوس ليه متسبها لله (اقوله ياعم منا سايبها لله بس هو لازم استنى تحصلى مصيبة عشان اتطمن على نفسى)

اخر مرة رحت عملت فحص شامل على نفسى كان من حوالى 8 شهور

روحت للدكتور قولتله بحجة انى مرهق ومش مركز فى الشغل وتعبان عشان يرضى يشوفنى

عملى كل الفحوصات وقالى انت كويس معندكش مشاكل بس وزنك عايز يقل شوية (وبكدة عرفت انى عندى مشكلة فى الوزن وبالتالى اخدت القرار ان اقلله)

ماهو مش عيب ان الواحد يتطمن على نفسه

مش عشان زواج ولا عيلة ولا اى حد ................ لاء عشان نفسك وشخصك وذاتك

مشكلة الناس فى مصر ويمكن المجتمع العربى كله بيبصوا للموضوع من مدياته

تلاقى العريس مقبل عالزواج اول كلام بيبقى عالمهر والشبكة والشقة وبينسوا التدين والاخلاق وانهم يتطمنوا على صحة الراجل اللى هيعيش مع بنتهم

وكمان الشاب بيهتم باسرة البنت وحالتهم الاجتماعية وجمالها ويتناسى صحة البنت اللى هتعيش معاه طول عمره

بجد فيه مشكلة فى ترتيب الاولويات

وده من الجهل المترسخ فى عقول ناس كتيرة

ولو تلاحظ معظم المداخلات السابقة ان الناس معرفتش اهمية الموضوع ده اللى لما شافوا حد من العيلة مر بقصة قاسية بسبب الموضوع ده

الحل فى رايي

زيادة التوعية فى المساجد والكنائس والجامعات

دور الاعلام فى توعية المواطنين

دور وزارة الصحة والاوقاف فى توعية الماذون بالنسبة للمسلمين و مسئول الكنيسة بالنسبة للمسيحين

وبعد كل ده نقدر نعمل قانون حازم ورادع

اتمنى التوفيق للجميع :closedeyes:

سيدي الفاضل :

حضرتك تعرف ان في اوروبا والدول المتقدمه ان الكشف الدوري اجباري كل سته اشهر

لان هناك في وعي عارفيين ان علاج اي مشكله في بدايتها يكون بدواء بسيط

لكن مع الاهمال تتفاقم المشكله ممكن ان تصل لاقدر الله الى عمليه ( تتدخلات جراحيه )

فهذا ناتج عن وعيهم واهتمامهم بصحتهم

وكذلك ثقتهم باطبائهم

المشكله هنا ياسيدي الفاضل ان معظم الناس فقدت ثقتها بالاطباء

لان كثيرا منهم الا من رحم ربي

يستغلون مهنتهم لتحقيق مكاسب او شهرات على حساب مرضاهم

عفانا الله واياكم جميعا

تحياتي

م/ابو يوسف

[doha]

في نقطه بس احب اضيفها بدى لي ان بعض المتحاورين مش على علم بيها

الكشف الطبي قبل الزواج مبيكونش على كل الامراض الوراثية زي مالبعض فاهم وانما وعلى حد علمي فهو بيكشف عن امراض محدده زي الداون سندروم مثلا انما اي حاجه تانيه ممكن تحصل نتيجه زواج الاقارب الي كتير جدا بيأتي باطفال عندهم امراض مش معروفه اصلا بشكل طبي فكل ده لايمكن الكشف عنه قبل الزواج وحتى الامراض التانيه الي ممكن تحصل نتيجه زواج غير الاقارب برضه مش شرط تطلع في ( الكشف ) ده غير انه بيكون تحليلات فقط مفيهوش ( فحص سريري ) .

الكشف الطبي قبل الزواج عندنا في مصر مش هيكون الا عقبه جديده امام المتزوجين الي البعض بتكون جوازتهم ( واقفة )على شويه فكه فمش هنيجي نزودها بثمن التحاليل كمان ..

اعتقد ان اسلم حل هو رفع التوعيه ثم ترك الامر للاختيار وكل واحد حر يتحمل نتائج اختياراته خاصه والدولة لا تدعم الاطفال ولا هيشكل وجودهم كمرضى او مصابين بعاهات عبء عليها لانها اصلا مش متكفلة بيهم حتى لو كانوا سلام ..

تم تعديل 10 يونيو 2010 بواسطة doha

[Howayda Ismail]

من الواضح ان الدولة تضع عوائق تعجيزية امام راغبى الزواج بدءا من البطالة لرفع سن الزواج ورفع رسوم الزواج نهاية باكذوبة التحاليل

التى تذكرنا ب portfolio المدارس المطلوب فيه ان كل طالب يعمل ابحاث لكل مادة ويطبعها من النت ويعمل ملف فكل اللى بيعمله

الطالب انه يذهب لاقرب نت كافيه او سيبر ويحصل على الملف خلال دقائق دون اى مجهود منه مقابل مبالغ مالية مكلفة كل اللى

عارفه عنوان البحث دون مضمونه والمدرس يضعه فى ملف الطلب دون مناقشته فيضيع الغرض من عمل البحث وحمل عبأ جديد على

و لي الامر كذلك التحاليل ادفع واستلم شهادة ومختومة للضمان دون اجراء اى تحاليل بتدفع مقابل ورقة والدليل ناس تسافر الخارج

بشهادة تفيد خلوه من فيرس الكبد الوبائى فى وقت انه حامل للمرض .

لاننكر اهمية فحوصات ماقبل الزواج ولكن يجب ان تتم بصورة جدية فى مراكز موثوق فيها وتكون مجانية اوحتى مدعمة من قبل الدولة

كتطعيمات الاطفال حتى يقبل عليها الشباب حتى نسد باب الزواج العرفى الذى انتشر بحجة انه غير مكلف مثل الزواج الرسمى