تنظيم " زغاليل الحق "

[se_ Elsyed]

المكان : مقهى الضوء الخافت في منطقة الثمامة ... حيث يجلس الرفيق محمد زهيري مع نفسه يضرب أنفاس الشيشة على أنغام أغنية أم كلثوم " إنت عُمري "

زهيري مُحدثاُ نفسه : ياااااااااااااااااه .. 6 سنين عدوا عليه في المحاورات وأنا زي مانا ... 6 سنين قايد لهم صوابعي العشره شمع واللي ما حد عبر أهلي وقال لي تعالى أمسك مشُرف شباك حتى مش باب ... 6 سنين وأنا شغال مسخناتي ومطيباتي ومهدئاتي لكن كل ده في الضل .....

لأ لأ .. أنا لازم أحط حدد للمهزلة المنتدياتية دي .. أنا لازم أبقى نجم يشار إليه بالبنان ... ولازم أعرف الجميع مين زهيري .. ويقدر يعمل إيه

جرسون المقهى : في حاجه يا زهيري باشا ؟

زهيري : مالكش دعوه يا بني أدم ورص حجر زغلول تاني من سُكات وغور من وشي

الجرسون : لا حول ولا قوة إلا بالله ... والله الناس من غلبها بقت تمشي تكلم نفسها .. ربنا يشفيك يا زهيري باشا ..

زهيري مسترسلاً في الحديث مع عقله الباطل : .. بسسسسسسسسسسسسسسس وجددددددددددتها .... أنا مش هاستنى طول عُمري إني أبقى مُشرف بالإنتخاب .. لأ ... لأ .. أنا هابقى مشرف بالإنقلاب وهاوريهم كلهههههههههم

ويندفع زهيري مسرعاً إلى بيته ويفتح لابتوبه ويُرسل برسائل خاصة إلى أشخاص أختارهم بعناية .. وهم

أبو عُمر ..... عاشق الترحال ... مكاوي .... فتفوته ... كيت كات .... لماضه ...

وكان نص الرسالة " الزملاء الأفاضل ... مبادرة مني .. وتعبيراً عن تقديري العظيم لكم ... أرجو قبول دعوتي على عشاء فاخر في أحد مطاعم الكبسة بوسط الرياض ... وعلى من خارج السعودية مراعاة فروق التوقيت .. وأيضاً تدبير تذاكر السفر والإقامة إلى أخره ... الموعد .. الساعة 413 .. مساء الخميس .. الموافق السابع من أيلول .. بعد صلاة المغرب .... المُخلص .. زُهيري "

وبالفعل لبى الجميع الدعوة .. وكان الإجتماع

زهيري : بسم الله الرحمن الرحيم .. وبه نستعين .. والصلاة والسلام على أشرف المُرسلين ... أما بعد ..

انا عارف إن في زملاء أفاضل منكم بيكرهوني عمى .. وعاوزين المنتدى ينشق ويبلعني ... وينظر متجهاً إلى ابو عُمر ومكاوي وعاشق الترحال ... لكن .. أنا قلبي كله محبه وحنان للجميع ... ونفسي أفتح معاكو صفحة جديدة من أول السطر

عاشق الترحال : أدخل في الموضوع يا أخ زهيري ... ودعك من هذا الكلام المعسول ..

أبو عُمر : المهم ... أين الكبسة يا أخ زهيري ... دعنا نأكل ونشرب أولاً ثم نتحدث فيما دعوتنا إليه .

زهيري : حاضر يا أبا عُمر هاتاكل وتزقطط وتاخد أكل للعيال كمان وإنت مروح ..

فتفوته : أيوه يعني حضرتك مسيبنا بيوتنا وودلانا عشان ناكل كبسه ؟ ما كنت أكلت في بيتنا بلا شحططه !!!!!!!

زهيري : صبرك بالله يا أخت فتفوته .. أنا جايلكوا في الكلام أهو ... صلوا عالنبي

المجاميع : عليه الصلاة والسلام

زهيري : أنا فكرت في وضعنا كلنا في المحاورات .. ولقيت إننا أصحاب نشاط جامد .. وتقريباً شايلين المنتدى على أكتفانا .. ومع ذلك لا شكر ولا حمد من الإدارة .. ولا حتى بعتوا لحد فينا حباية بونبوني ... فأنا فكرت إننا ننتزع حقنا منهم بالقوة

لماضة : وإيه هو حقنا يا كبير ؟

زهيري : حقنا يا لماضه إننا نبقى من أصحاب السلطة والكراسي ... وإننا ندوق حلاوة الإشراف ... مش كده ولا إيه ؟

مكاوي : أي والله .. صدقت ورب الكعبه ... لكن كيف السبيل إلى ذلك يا رفيق زُهيري ؟

زهيري :الحل في التغيير .............. التغيير والثورة يا ميكو ..

كيت كات : هييه هيييه .. أنا باحب الحاجات المثيرة والمغامرات دي .. قول قول يا كبير

أبو عُمر : إنتظر .... حنانيك يا رفيق زهيري ... نريد مزيداً من المعلومات وماذا سيكون دور كل واحد منا ؟

فتفوته : حيلك حيلك ...قبل ما تكمل أنا ضد العنف والحاجات دي .. أنا مش معاكو ولا هاشترك في حاجه من دي ... وهاقوم أمشي دلوقت

زهيري : أنا غلطان إني ما عملتش إختبار ذكاء أنفعالي لكل واحد قبل ما أختاره ... الله يمسيكي بالخير يا مونريال ... لكن يعني إيه يا أخت فتفوته ... بعد ما وثقت فيكي .. وافشيت أمامك أسرار التنظيم . تقومي تسيبينا وتمشي ؟

فتفوته : يا عم انا لا هاتكلم عن تنظيم ولا حساب مثلثات وسايبالك كمان الكبسه بتاعتك .. سلامممممممممممم

زهيري : تفتكروا ممكن فتفوته تفتن علينا ؟

لماضه : لأ لأ .. ما أعتقدتش ... فتفوته جدعه وما تعملهاش ...

عاشق الترحال : إدخل في الموضوع يا رفيق زهيري وأنجز .

زهيري : أنا قررت أقوم بثورة إنقلابية ...

أبو عمر : وطبعاً نصبت نفسك زعيماً للثورة ؟

زهيري : طبعاً يا أبو عُمر .. إنت شايف حد أحق مني في ذلك ؟

عاشق الترحال : ولماذا لا يكون واحد منا هو الامير ؟

مكاوي : أينعم ... نحن أحق بالخلافة .. لإننا ورثنا الحكم كابراً عن كابر ..

زهيري : أنهي حكم اللي ورثتوه يا أخ مكاوي ؟ وإنت عشان كان في واحد قريبكو من بعيد كان شيخ بلد . يبقى خلاص بقيت من العيلة الحاكمة ؟؟؟ ..

لماضه : يا جماعة صلو عالنبي وإهدوا ... فهمنا بس يا زهيري وأشرح لها . قصدي إشرح لنا كل واحد دوره إيه .

زهيري : لأ معليش من الأول يا لماضه .. أنا الزعيم . وأنا راسم على دور الأدمن كمان .. ومش عاوز مناقشة

أبو عُمر : طب أكمل يا أخ زهيري .. أنا عن نفسي موافق على زعامتك ... لكن نريد أن نعرف أدورانا بالتحديد ( أبو عُمر هامساً لعاشق الترحال ومكاوي : اللي يشوفه في المعركه منكم يقتله ويخصلنا منه )

زهيري : يا جماعة والله أنا هاروشكو .. والمنتدى كله هايبقى بتاعنا .... والقاشية هاتبقى معدن ... إنتو عارفين المنتدى بيصفي له كام في اليوم ؟

كيت كات : كام ها كام كام ؟

زهيري : بالميت يا كيت كات حوالي 300 ج ...

كيت كات : طب أنا لسه جديد وما معييش إقامه ... ينفع أشترك معاكو ؟

زهيري : ده عز الطلب يا كوتكوت ... على الأقل ما حدش عارف عنك حاجه .. وإنت كرت مش محروق عند حكومة المحاورات ...

عاشق الترحال : لكن كيف ستكون صبغة المنتدى يا رفيق زهيري بعد الإنقلاب ... هل هي إسلامية عقائدية على المحجة البيضاء ؟ أم والعياذ بالله علمانية ليبرالية برجماتيه ؟

لماضه : هههههههههههههه .... زنقك يا زهيري ... رد يا فالح

زهيري : يا جماعة أنا قلبي مفتوح للجميع ... وأوعدكم إن منتدانا هايضم جميع الأطياف .... إسلامي .. علماني .. ليبرالي .. .. والكل هايبقى على قدم المساواة وله نفس الحقوق وعليه نفس الواجبات

أبو عُمر : أهم حاجه عندي .... التنظيم بتاعنا ده هايبقى إسمه إيه ؟

زهيري : بعد إذنكم . أنا سميته " تنظيم المحاوراتين الأحرار "

عاشق الترحال : كلا والله ... لن يكون .... هذا إسم يدل على العلمانية المقيته

زهيري : يا فتاح يا عليم يا رزاق يا كريم ... الصبر من عندك يارب ... هو إعتراض من اجل الأعتراض بس يا عاشق ... في إيه يا عم فين العلمانية دي ؟

عاشق الترحال : إذا كنا وافقنا على تنصيبك أميراً للجماعة .. فلن نوافق على مثل هذا الأسم ...

زهيري : طب عاوز تسميه إيه يا عم الحاج ؟

عاشق الترحال : كنا قد أتفقنا أنا والأخوة أبا عمر ومكاوي على أن نسمي هذا التنظيم " زغاليل الحق "

لماضه : الله .. أنا باحب الحمام بالفريك قوي .. خصوصاً لما تكون زغاليل صغيره ما بتاخدش سوا ويادوب تتحمر بس .. وبالهنا والشفا

مكاوي : بارك الله فيك يا أخ عاشق ... ونعم الإسم ...

أبا عُمر : مرحا مرحا أيها الزغاليل

زهيري : إنتو هاتغنوا وتردوا على بعض ؟ زغاليل إيه وبط إيه ؟ يعني واحد طولة 185 سم .. ووزنه 120 ك قايم .. يبقى زغلول إزاي ؟ يعني حتى اللي ما حصلت جوز حمام ؟

عاشق ( محتداً في حديثه إلى زهيري ) : لا تجادل يا أخ زهيري .. وأفسح لنا بعض المجال لإتخاذ قرارت مصيرية تخص التنظيم .. وحاول أن تكسبنا في صفك ... وإلا

زهيري ( مستسلماً ) : زغاليل زغاليل .. موافق ... ومش هانختلف على الإسم ده يا سيدي وأمري لله

أبو عُمر .. عاشق .. مكاوي ( بصوت واحد ) : النصر لنا .. النصر لنا ...

زهيري : أستريحتوا ... ندخل في الموضوع بقى

... الخطه هاتبقى كالتالي ...

دور كيت كات .... أنا عارف إنه جامد في برامج الأوفيس والوندوز .. عشان كده هو اللي هايقوم بأختراق برمجيات المنتدى ووضع شعارنا الجديد عليه

مكاوي ( مقاطعاً ) : الا بالحق .. شعار المنتدى هايكون إيه ؟

زهيري : يييييييييييييه .. أنا اللي جيبته لنفسي ... يا سيدي هانبقى نتفق عليه بعدين ..

عاشق : لأ لأ ... دعنا نحسمها الأن ... لا تؤجل شعار اليوم إلى الغد

لماضه : إسمحوا لي أقترح عليكم شعار ظريف وحلو .. إيه رأيكم في صورة جردل ميه وجنبه وردا حمرا ؟

زهيري : حضرتك ده على أساس إيه ؟؟؟؟؟

لماضه : جردل الميه .. بيرمز إلى الرخاء والطراوة ... والوردا الحمرا رمز للغيره والمحبه

أبو عمر : جردل وورد .... هزُلت ؟

لماضه : لو سمحت يا أستاذ أبو عمر ما تتريقش على إقتراحي ...

عاشق : أنا أقترح أن رمزنا يتكون من ( سيف بتار ... وجنبه مخ جبار ) .. السيف يرمز لقوة الحق التي هي منهجنا .. والمخ لمنهج التفكير الذي يتبعه الرفيق زهيري

زهيري : موافق .. قشطه كده ... نكمل الأدوار

دور عاشق الترحال وأبو عُمر ومكاوي : إنتو تتسللوا بعد صلاة افجر بخيولكم وسيوفكم إلى باب هدي الإسلام وتحتلوه ... وفي نفس الوقت تأمنوا بقية الأبواب وما تخلوش حد يدخل ولا يخرج ....

أبو عُمر : الله أكبر ... وسأكون أنا بعون الله في الطليعة .. على أن يحمي عاشق الترحال الميمنة ... ومكاوي الميسرة ... فإذا قضيتُ نحبي .. فليتولى القيادة من بعدي عاشق الترحال .. فإذا سقط ... فليتولاها مكاوي .. فإذا سقط .. فربنا يتولانا بقى . ..

كيت كات : ايوه بالنسبة لي أنا .. أنا قلت لحضرتك إني لسه ما طلعتش إلإقامه ..

زهيري : يا عم ما تخافش ... هاديلك خطاب تعريف تمشي بيه ...

أما أنتي يا لماضه فعاوزك تندسي وسط نساء المنتدى لتأتي لنا بالأخبار أولاً بأول وكمان تستقطبيهم لنا وتبشريهم بعهد جديد نسائي وبنظام جديد من التمكين .. واول مكافأة ليكي هاتبقى هي توليكي باب الأسرة والطفل .. مبدئياً يعني .

لماضه : فُريره يا كبير .... ده أنا هاوريكو أحلى شغل ... بس يعني .. اصل .. أنا كان نفسي كمان في باب الشعر والفن والحاجات داهيه .. مونكن ؟

زهيري : أه قوي قوي ... والله ما يغلوا عليكي .

أبو عمر : ما شاء الله عليك يا رفيق زهيري ... عمال توزع في التركه يمنةً ويساراً ... ولم تذكر أمر جماعة الزغاليل !!!!!

زهيري : يا عم فاكركو والله وكنت لسه جايلك في الطريق .

أبو عمر : نحن بعون الله لا نقبل أقل من 3 أرباع أبواب المنتدى .... كحد أدنى ..

زهيري ( متبرماً ) : حاضر يا سيدي حاضر حاضر – وكتاب الله لأوريكو بس بعد ما أبقى أدمن –

مكاوي : وماذا عن دورك أنت في تلك الثورة يا رفيق زهيري ؟

زهيري : أنا يا سي مكاوي هاهجم على باب شئون المحاورات واحتله لوحدي وأذيع بيان الثورة ... وخلوا بالكو ... أول ما أبعت لكم رسالة فيها كلمة السر .. الكل يتحرك وينفذ .

كيت كات : وكلمة السر إيه يا كبير ؟

زهيري : أول ما توصل لكم رسالة مكتوب فيها " ماما زمانها جايه " ... تنطلقوا على طول ..

--------------------------

في تلك الأثناء أسرع سي السيد إلى لقاء الأدفايزر بشكل عاجل ..

أدفايزر : خير يا سين سين .... في إيه ؟

س س : كنت عاوز حضرتك في حاجه مهمه

أدفايزر : إنت مش لسه واخد زيادة مرتب الشهر اللي فات .. عاوز إيه تاني ؟

س س : لأ يا بوس ... الموضوع مش كده ... انا جاي لحضرتك في أمر خطير ...

أدفايزر : طب أدخل في الموضوع

س س : حضرتك أنا وصلتني رسالة من فاعلة خير مجهولة .. رمزت لنفسها بـ ف ف ... بتحذرنا فيها من محاولة إنقلابية يقودها العضو زهيري

أدفايزر : فاعلة خير ومجهولة وأول حرف من إسمها فاء فاء .... ودي عاوزه نباههه يا ناصح .. ف ف يعني فت فوته ....

س س : أه صح والله .. المهم بتقول في رسالتها إن زهيري بيحضر لإنقلاب محاوراتي وإنه بيسعى للأستيلاء على الحكم وعاوز يبقى أدمن كمان ...

أدفايزر : أممممممممممم .... طب والعمل ؟

س س : أنا رأيي حضرتك إننا نعمل ضربة أستباقية ونتغدا بيه قبل ما يتعشى بنا ... ولا حضرتك بتحب تنام خفيف ؟

أدفايزر : إيه نظام الطبيخ ده .. غدا وعشا وفطار !!!!!!

س س : أنا قصدي إننا ما نستناش لما يهاجمنا .. ونكري إحنا واحد عليه ويطخه طلقة بخمسه صاغ ويريحنا منه..

ادفايزر : لأ لأ أنا ما باحبش الدم ... لكن عندي فكره أحسن لأجهاض مثل تلك المحاولات ..

س س : إيه هي يا كبير ؟

أدفايزر : الإحتواء .. سياسة الأحتواء يا سين سين .. عارفها ؟

س س : أيوه ... يعني نجوزه ونخلص منه .. صح ؟

أدفايزر : يا أخي جواز إيه .... بُص قوم حضر لي رسالة خاصه نبعتها له وقول له عاوزينك ضروري في المقر السري بتاعنا في شارع مظهر بالزمالك .

س س : وجب يا ريس

وبالفعل يأتي زهيري مهرولاً إلى المقر السري ويتقابل مع الأدفايزر

أدفايزر : يا أخي زهيري أنا هادخل في الموضوع على طول ... إحنا تقديراً منا لمجهوداتك طوال 6 سنوات .. قررنا إننا نعينك مشرفاً على باب الفنون .. بدرجة " ظابط إيقاع "

زهيري : يا منت كريم يارب .. أخيراً هادخل كلية الشرطة وابقى ظابط ... يا سيادة جناب الأدفايزر .. أنا رقبتي للمنتدى .. ومستعد أحيي لكم كمية حفلات زي مانت عاوز وأقلبها لكم درمغه هنا ولا أضواء المدينة ....

أدفايزر : ده عشمنى فيك .. بس عاوزك تقدم فن نضيف

زهيري : وكتاب الله لأغسل وشي قبل كل حفلة وهاتشوف مني فن مستحمي بالمية والصابون أبو ريحه كمان .. بس أنا حضرتك كان في كلمتين واقفين في حلقي وقولت لازم أقولهم لحضرتك..

أدفايزر : خير يا أخ زهيري ... أه على فكره .. من ناحية المرتب .. إحنا هانشغلك بالنسبة ... يعني مبدئياً هاعينك بمرتب 300 ج ... والنقطة اللي هاتيجي لك في الحفلات .. لك فيها التلت ... مرضي يابا كده ؟

زهيري : لأ حضرتك الفلوس دي أخر حاجه أفكر فيها ... أنا كنت عاوز أبلغ سيادتك عن مؤامرة تُدبر ضد المنتدى

أدفايزر : مؤامرة ؟؟؟؟ .. يا ساتر يارب ... قول يا زهيري أنا سامعك ...

زهيري : حضرتك ... في ناس معينيين أعفيني أقول على أساميهم عشان ما يؤذونيش عاوزين يعملوا إنقلاب ويستولوا على حكم المنتدى ..

أدفايزر : أمممممم .... اقدر أعرف أساميهم ؟...

زهيري : قوي يا باشا ..هما . مكاوي .. أبو عمر .. عاشق الترحال .. ولماضه .. ومعاهم وحد إسمه جالاكسي ...شيكوبون .. لأ لأ إفتكرت .. إسمه كيت كات حتى بالأمارة لسه ما طلعش إقامة حضرتك ... ، وحاولوا يستقطبوني للأنضمام لهذا التننيظم التأمري اللي مسميينه حضرتك " تنظيم زغاليل الحق "

أدفايزر : زغاليل الحق !!!!!!!!!!!!! .. ماشي ماشي . إن ما قصقصت لهم ريشهم ورقدتهم في العشه ...

زهيري : وكمان حضرتك كانوا واعدينني بـ 500 ج .. ومروحه ... وإني أبقى مشرف باب السياسة الداخلية ..

ادفايزر : بارك الله فيك يا أخ زهيري .. وإحنا متأكدين من أخلاصك للمنتدى .

زهيري : يا باشا حضرتك حط بس خطه للقضاء عليهم وهاتلاقيني أول واحد في الصفوف الأمامية شاهراً سيفي وممتطياً جوادي .... ودمي فداءاً للمنتدى .. وبعد إذن حضرتك .. هما كانوا باعتين لي خطة الهجوم وساعة الصفر . وكلمة السر اللي هي " ماما زمانها جايه .. جايه بعد شويه .. جايبه لعب وحاجات وكدهوت " .. فأنا بأقترح إني أسايرهم في الموضوع لحد الهجوم ... وتكون حضرتك محضر رجاله عتاوله بالشوم والنبابيت .. ينقضوا عليهم أول ما ينفذوا خطتهم ...... هذا وبالله التوفيق .

تمت .

[jasmin hamed]

انا لو ماكنتش مستقيله و بقالى اسبوع واحد و امشى من الشركة كانوا اكيد رفدونى

انا ضحكت لما عيناياه دمعت الله يسمحك يا استاذ سي السيد

بجد موهبه فذه

[عاشق الترحال]

ههههههههههههههههههههههههههههههههههه

أيه يا عم سين سين الجمال ده

أنا بقيت عضو في تنظيم :lol: شكلك عاوز تحبسني :lol:

بالصلاه على النبي ( زغرطي يا أما ) mfb:

بس هنبقى صحبه ومعانا أمير التنظيم ( أبا عمر ) ومكاوي وهتبقى لمه

شفت يا زهيري باشا آخر المخمخه وشرب المعسل مع السحلب هتودينا فين md2:

خلاص هنفضها الوقتي للمداوله وبعد التشاور مع الأخوه أعضاء التنظيم سوف نقوم بتنصيب أمير جماعه ( زغاليل الحق )

ألا بالمناسبه هي تقرب لجماعة ( زغاليلي يا أما .... وأنا مالي ليه :P )

مرحبا بكل ( زغلول يدخل يحو حوالين العب بتاعنا ) المفروض نعمل خلفية المجموعه دي برج حمام وأغنية ( فاكرك يا ناسيني ) لمحمد فؤاد .

والشرط الأساسي اللي يجب توافره في اعضاء الجماعه هو تعلم ( التصفير بالبق ) علشان تلاغي باقى الزغاليل وكده :blink:

زهيري أنا أعترض لمجرد الإعتراض أنك تكون مشرف :P

:D :wub:

[hakeem]

لا بصراحه جمده التاليفه دى..اول مره موضوع اقراه من الاول للاخر

[hakeem]

انا لو ماكنتش مستقيله و بقالى اسبوع واحد و امشى من الشركة كانوا اكيد رفدونى

انا ضحكت لما عيناياه دمعت الله يسمحك يا استاذ سي السيد

بجد موهبه فذه

استقاله ورفد....؟.احنا بنقول زقه لاقدام..يمكن خير

[mekkawy]

رهــــــــيـــــــــــــب

و لي عودة

مكاوى

أبطل ضحك بس و أجي

[ابو محمد بن مصطفي]

يا ناس كفاية كدة انا هموت علي نفسي من الضحك

اصحابي في الشغل شيفني بضحك من غير سبب

شوف انت التكملة تبقي ايه

ربنا يرحمنا جميعا يا سي السيد يا كبيييييييييييييييييييير والله

زغاليل الحق ممكن نحشيهم بالفريك ونحطهم يشرفوا علي قسم المطبخ

ولو فشلوا نبقي نكلهم

[ابو محمد بن مصطفي]

بعد الضحك والذي منه

الموضوع ده ضربة موجة في صورة كوميدية من المشرفين لكل المحاورين الشبان

لكل واحد حاسس جواه بابتسامة امل وبيفكر يبقي من المشرفين

دي الرد انسو

اللي يفكر مصيرة هيبقي ذي مصير الزغاليل

بس ان بقول لزغاليل الحق احنا معاكم والي الامام

والله اكبر فوق كيد الادارة

زغلول زغلول يحيا زغلول

امضاء واحد من الزغاليل

[Alattar]

ههههههههههههههههههههههههههههههههههه

المفروض نعمل خلفية المجموعه دي برج حمام وأغنية ( فاكرك يا ناسيني ) لمحمد فؤاد .

يعني أمير و جماعة و مش عارف ايه..و تيجي في الآخر عاوز تحط أغنية!!

شكلهم كده هيقلبوا عليك من أولها.

وبالنسبةلسي السيد : مش عارف ليه و انت بتتكلم عن أدفيزور...فكرتني بجمال مروان..و هو بيقول..لحمزاوي..قصدي لزوهيري

"أنا عاوز فن نضيف"

تم تعديل 8 يونيو 2010 بواسطة Alattar

[لماضة مصرية جدا]

السلام عليكم و رحمة الله و بركاته

يا دي الفاضيحة أم حناجل.... يادي الجرسة أم جلاجل...(وش عادل امام ...فين مش عارفة)

....و بقيتي زغلول يا لماضة...مكنشي العشم يا كابير الهوارة...يعني انا قاعدة "أحس" في التوبيك بتاع فراشة الاحساس ده لما الاحساس خلاص زهق مني...و آخرتها تقولي.....تنظيم....و زغلول.....

طب و كتاب الله المجيد...اللي يقولي روحي يا زغلول....و لا تعالي.....تعالي يا بت يا زغلول لاكون عاملة زي العيل العبيط دهوت

بس اتصدق استمخيت انا من فكرة الجردل و الكنكة....قصدي الجردل و الوردة.....ده سيم ده و لا ايه.....(ضحكة شريرة موووووت.... :closedeyes: )

فوتكم بجردل...قصدي بوردة.....بس الاكيد بضحكة رايقة

[الغريب]

منك لله يا سي السيد :closedeyes:

يا صاحب الدماغ العالية :closedeyes:

أحلى ما في الموضوع أسم التنظيم :rolleyes: "زغاليل الحق"

[MZohairy]

:closedeyes: :closedeyes: :rolleyes:

ربنا ينتقم منك بحق جاه النبي و الصحابه

[ساره احمد]

:rolleyes: :happy: :happy: :lol: موضوع حلو اوى ياسي السيد بجد بجد هموت من الضحك

[MZohairy]

انا عايز باب الفنون و باب هدى الإسلام بس يا سي سو

بشرط اكون مشرف وحيد و لا يملك اي مشرف آخر فيهما أي صلاحية :rolleyes: لأني حعمل فيهم نظام جدييييد انكوروايابل خالص

و بكده اكون مش عايز حاجه تانيه من الدنيا

[عاشق الترحال]

انا عايز باب الفنون و باب هدى الإسلام بس يا سي سو

بشرط اكون مشرف وحيد و لا يملك اي مشرف آخر فيهما أي صلاحية لأني حعمل فيهم نظام جدييييد انكوروايابل خالص

و بكده اكون مش عايز حاجه تانيه من الدنيا

إنسى يا عمرو :lol:

أقصد ( لن نبايعك على الخلافه قصدي الإشراف يا رجل ) :rolleyes:

ويحك أتريد أن تختار باب هدى الإسلام وتكون مشرف وحيد ولا يملك غيرك أي صلاحيه فيهما :wub: ومن ثم تروج لأفكارك وتكمم أفواهنا لا وألف لا وليكن ما يكون

إن كان لا بد فخذ باب الفنون بدرجة ضابط إيقاع زي ما سين سين بيقول ونرقيك كمان ( نخليك بيج باشي ) ( وتفن بقى يا عمنا براحتك وتمخمخ هناك بمزااااااج .. :happy: ) هذا وإلا ........... :lol:

وعلى رأي المثل بلاها ناديه وخد سوسو ......... ولا ايه :happy:

لكن بعد خيانتك دي يا زهيري وتروحي تشي بنا عند الأدفايزر لا هتشوف ناديه ولا سوسو ولا فنون ولا يحزنون وتقدر تعلق الأعلام البنفسجي حداد لأننا هنخلصوا عليك كده برضوا يا راجل تخون الكبسه اللي لسه متهضمتش علشان 300 جنيه .

أما بخصوص ( ف ف ) فحسابها معانا عسير لأنها باعت التنظيم شر بيعه وسوف نتفاوض في أمرها بعد أن نتفرغ من تصفيه باقي العملاء . wst::

الله يسامحك بقى يا جمال يا مروان gra:-

تم تعديل 9 يونيو 2010 بواسطة عاشق الترحال

[عاشق الترحال]

ههههههههههههههههههههههههههههههههههه

المفروض نعمل خلفية المجموعه دي برج حمام وأغنية ( فاكرك يا ناسيني ) لمحمد فؤاد .

يعني أمير و جماعة و مش عارف ايه..و تيجي في الآخر عاوز تحط أغنية!!

شكلهم كده هيقلبوا عليك من أولها.

إحترم الإجرام اللي إحنا فيه يا أبو موته :rolleyes:

[mekkawy]

بعد أن نتفرغ من تصفيه باقي العملاء . :rolleyes:

خلي عنك يا أخويا عاشق

و إن شاء الله هنرتب الموضوع ده و إحنا بنستجم ع البحر بكرة كدة إن شاء الله .. و أنا بأجهز القمصان المتفجرة و أسلحة الإرهاب بكل انواعها :happy:

جهزلي إنت بس إتنين بروست بدون رز معاهم برتقال فرويش و موية .. موية ها .. قال موية قال

وتأكد أيها الرفيق الغالي إن هدى الإسلام لن يخرج عن التنظيم

و بصفتي زغلول من الزغاليل بأعلن التشاور مع اعضاء التنظيم على تأميم الباب و قفله لحين إشعار آخر

مكاوى

[عنبو]

محاورات المصريين بجده يبايعون اخوانهم فى تنظيم زغاليل الحق

[اغابي]

محاورات المصريين بجده يبايعون اخوانهم فى تنظيم زغاليل الحق

لاء - خليك محضر خير يا عنبو - الله يخليك - مش كل الزغاليل نبايعهم -

- لان فيهم زغلول واحد بصراحة يعنى بصراحة

لو مسك الخلافة - حيعلق يافطة ممنوع دخول المسيحيين الى المحاورات واى مسيحي حاشوف خلقته - سيتم تفجيروه فورا :happy:

اكيد انتم عرفتوه هع هع هع :lol: وحيحكم بالاعدام شنقا عليا انا - مش حيدينى فرصة اروح اسلم على اومى :happy:

اغابي

:rolleyes:

تم تعديل 9 يونيو 2010 بواسطة اغابي

[اغابي]

أما بخصوص ( ف ف ) فحسابها معانا عسير لأنها باعت التنظيم شر بيعه وسوف نتفاوض في أمرها بعد أن نتفرغ من تصفيه باقي العملاء . :lol:

الله يسامحك بقى يا جمال يا مروان :wub:

انا ابايعك يا عاشق يا خليفة انك تكون امير الزغاليل

ان ما قصقصت جوانيحك :happy: - ما ابقاش انا :happy: خطة شريرة gra:-

- احم قصدى - احنا كلنا معاك وربنا معاك

الا قولى مين اللى حتصفيهم وانا من الليثتة - ولا لسة ما قررتش يا امير

الله يسامحك فعلا يا جمال يا مروان - يا حنان الام wst::

اغابي :rolleyes: