انا وشادي ..

[لولا]

فيروز .. تلك الرائعة

تغنى بصوت ملائكى تخرج فيه الكلمات فتصيب أقاصى النبض !

أنا وشادى ..

حكاية تشدو بها فى أغنية لتذكرنا بحكايات الطفولة وصداقاتها البريئة الملائكية

لسبب ما كانت تدور احداث الأغنية فى مخيلتى بصداقه تربط اخوين ولد وبنت.

عادة تكون الصداقه القويه فى غالبيه الأسر العربية بين الفتاة وشقيقتها قويه ولكن هل تجمع صداقه مماثلة أخ واخت ؟؟

بتعتبر أختك صاحبتك ؟؟

بتعتبرى اخوكى صاحبك ؟؟

عمرك عزمت اختك على اى مطعم لوحدكم عشان تتكلموا وتقضوا وقت سوا ؟؟

عمرك عزمتى اخوك على اى مطعم لوحدكم عشان تتكلموا وتقضوا وقت سوا ؟؟

بينكم اسرار مشتركه ؟؟

خطر فى بالك فى اى وقت ان اختك محتاجه انك تكون انت الشخص اللى بيقرب منها ويسمعها ويشاركها؟؟

خطر فى بالك انتى كمان نفس الحاجه ؟؟

الأخوه عندنا فى مجتمعنا = صداقة ؟؟؟

وياترى الصداقه دى مسؤول عنها التربيه ولا احنا ؟؟

لى عودة ان شاء الله ..

لولا

[mekkawy]

السلام عليكم و سهرة سعيدة

الفاضلة لولا

الصراحة موضوع جميل و مهم أوي و معرفش ازاي مفيش ولا حد فكر يقول فيه .. الجميل فيه إنه في الآخر بيصب في مصلحة الأسرة و بالتالي صلاح المجتمع كله

و بعيدن عن فيروز و شادي mil: فأحب أقول

كوني ولد وحيد هلى بنتين أكبر مني فإحنا التلاتة كنا أصحاب أوي .. أصحاب بجد .. أسرار بأة و خروجات و عزومات و كل الحاجات الجميلة اللي حضرتك ذكرتيها دي .. علاقة بفضل الله متميزة جداً صعب توجد بين الاخوات البنات .. فضلاً عن أولاد و بنات .. الصراحة ما حسيناش خالص بفرق النوع ده .. و يمكن كوني الصغير فده ساعد شوية .

الأ:تر أوي لما أختي الكبيرة تزوجت و فضلت أنا و أختي الوسطى - أكبر مني بردو - بقينا نروح الجامعة سوا .. كانت هي بكالوريوس و أنا في أولى .. بقيت أساعدها في دراستها بالترجمة و الحاجات دي و هي كانت بتدفع كويس الصراحة .. بقينا نخرج كتير سوا .. نطلع رحلات مع بعض .. نشتري لبس مع بعض كدة يعني.

لما أختي التانية دي بقى اتجوزت كانت مناحة .. البيت كان كئييييييييييييب و كانت حاجة رخمة آخر حاجة

موضوع جميل و بأحييكي عليه و إن شاء الله لنا عودة بردو

مكاوى

[Howayda Ismail]

الاخت الفاضلة لولا :

موضوع حضرتك جميل جدا والمفروض كل واحد يبقى حريص على علاقته باخوته كى يزيد الترابط الاسرى ولاتتفكك الروابط

بمجرد زواج الاخوة او بوفاة الوالدين لاقدرالله

عن نفسى كنت ومازلت مرتبطة باخواتى وانا اللى بجمعهم دلوقت رغم انى الوسطى .قبل زواجى كانت صداقتى بأخى الكبير

اكتر من اخواتى البنات كنا نتفسح سوا وكان بياخد راى فى حاجات كتير وتزوجت قبله واستمرت صدقاتنا وبعد زواجه

اصبحت الصديقة المقربة لزوجته كذلك ابنائى اصبحوا اصدقاء ابناءه وبنخرج سويا فى معظم الرحلات وكذلك اختى الكبيرة

ابنائنا اصدقاء وبنخرج انا وهى فى كثير من الاوقات مع بعض و ارتباطنا باختنا الصغير جيد لكن تجمعها بنا قليل

لبعد سكنها عننا ولديها اطفال صغيرة صعب التنقل بهم فنزورها انا واختى كلما سمحت الظروف لكن الاتصال الهاتفى مستمر

عاوزة اقولك ان هم بالنسبة لى كل حاجة اغلى عندى من ولادى باشكى لهم كل اللى يضايقنى وممكن اعيط قدامهم

واخد رايهم وهم حقيقى بيحبونى وبياخدوا راى فى كتير من امورهم كلنا بنجمع عند اخويا اسبوعيا كل اللى باطلبه من ربنا

انه يديم المودة والحب بينا وميفرقناش عن بعض وارجو ده لكل الاخوة والاخوات

[اغابي]

اتكلم بصدق -

بينى وبين نفسي - احرجت جدا من الموضوع داه يا لولا

لان معايا هنا فى الكويت اخويا - وافتكر من حوالى 5 سنين عزمته فى سهرة على العشا بمناسبة حضوره للكويت جديد

وكنوع من الامور اللى بيحتمها عليك الواجب وان كنت اعتبرته ضيفى فى اول فترة ليه فى الكويت

عزمته على العشا فى فندق كراون بلازا - هوليدي ان - والمطعم كان فخم جدا ومشرف

وكانت اد ايه ليلة جميلة - وفرقة موسيقية مصرية اطربتنا ليلتها المطربة باروع اغاني لام كلثوم

حتى اخويا نفسه مش ناسي السهرة دى ومازالت فى ذاكرته وحكينا عن وقتها اخبار مصر

وايه خططنا لشغله فى الكويت واستقراره وكل الكلام داه وانا فاكرة انى كنت باسمع

الاخبار بلهفة واشتياق للحبايب اللى فى مصر

ومين سافر ومين اتجوز ومين هاجر ومين مات ......

احرجت من نفسي

لانى ولا مرة من 5 سنين اتكررت العزومة بره البيت واخدتنا احنا الاتنين مشاكل الشغل ويوميات الحياه رغم اننا فى بلد واحدة

واحيانا بيعدى اسبوع مش باشوف اخويا لانى مع مذاكرة اولادى وامتحاناتهم وبيتى وشغلى وهو مع شغله ليل ونهار ..

لكن علشان اوفيله حقه هو بيعزمنا جو البيت لو كان مرة مقضي اليوم عندى يفاجأنى انه يطلب الغدا دليفرى ويعتبرها انها عزومة

وما انكرش اد ايه متعلقين بيه اولادى لاخلاقه ومحبته الفوق الوصف واللى انا نفسي باعتبره اب ثانى لى وللاولادى ..

لكن هل شرط اننا نخرج فى مطعم بره البيت - علشان نتبادل الحوار بيننا

وان كانت بيننا الكثير من الاسرار والقصص والحكايات المشتركة

وبنحكيها سوا عادى - اثناء زياراته عندى فى البيت

لكن برضوه ارجع واقول انا احرجت من نفسي

مش عارفة ليه حاسة انه هو مهتم بامور وتفاصيل معينة معايا - انا مش مهتمة بيها معاه . ..

او يمكن علشان كلامك يا لولا . . حسسنى .... ان فعلا اخدتنى الدنيا اوى مش بس عن اخويا اللى معايا فى نفس البلد لكن عن

ناس تانى كتير مقربين منى - المفروض انهم اصدقاء واقارب ...

اغابي

[Howayda Ismail]

نست اقول لك عن اخوات تانيين غير اشقائى لكن فى نفس المنزلة ثلاث صديقات اكتر واحدة من اولى ابتدائى وكانت جارتى

فى نفس الوقت ودى المراية اللى بابص فيها وتقريبا اتربيت فى بيتهم برضه لها اخ واحد كبير وهى كانت اصغر واحدة فى اخواته

والتانية من الصف الثالث الابتدئى وتقطن محافظة تانية بعد الزواج ولكننا والحمد لله نتزاور والتالتة من الاعدادية والحمد لله علاقتى

بالثلاثة حتى هذه الحظة وفعلا (رب اخ لم تلده امى) .

اشكرك جدا انك اتحت لى الفرصة انا اعبر عن شكرى وامتنانى لربنا بعلاقتى باخواتى واصحابى .

لكن فى شئ ملح على لازم اقوله انا فقدت احب واحسن صديق لى فى حياتى ومش بيغيب عن بالى ابدا ويمكن ده من

اسباب حزنى وخنقتى من الدنيا الصديق ده ابويا كان نعم الاب والصديق

[se_ Elsyed]

طب عشان نطري القاعده الحلوه دي اللي لولا عماله تدلدق علينا فيها بأحاسيس جميلة وأنا شخصياً حاسس إني أخدت شلوت في قلبي :happy: ..

ادي شادي بمونتاج أكتر من رائع

[se_ Elsyed]

دوري أنا بقى

بسم الله الرحمن الرحيم

الإجابه ..

أيوه

أنا عندي 3 بنات .. وعيلين

وأنا الوسطاني

وكلنا متجوزين ومتستتين ..

ما علينا ..

من بين كل أخواتي ... وبالرغم من أن بيني وبين أخويا الكبير سنتين .. لكن أختي الأصغر مني بسنتين هي صديقتي .. بكل ما تحمل معاني الصداقة من كلمة ... وتقريباً من زمان أسرارنا كلها مع بعض ...

ولحد دلوقت وبالرغم إني في السعودية وهي بأوروبا ... لكن نكاد نكون مع بعض كل يوم

يمكن عشان كنا بنروح المدرسة سوا ..

ويمكن كمان عشان هي عقليتها كويسة وقريبة من عقليتي

لكن فعلاً لما تكون العلاقة أخويه فقط .. اهو ممكن نقول إن الأخوة بيكون مفروضين على بعض والواحد بيقول أهو جه الدنيا لقى الناس دي أخواته وغصب عنه لازم يحبهم ..

تماماً مثلما تتحول العلاقة الأنسانية بين الزوج وزوجته إلى صداقة فالموضوع بيفرق كتير والعلاقة بتكون أمتن وابقى

[mekkawy]

الفاضلة لولا

أنا عاوز شير و نسبة في عدد المشاهدات و الردود اللي انهالت على الموضوع الجميل ده :happy:

أصل الصراحة مواضيع الأسرة بتشدني شد كدة و ما أقدرش أمر عليها مرور الكرام

أخويا سي السيد

تفتكر إيه أحسن حاجة لما تكوم الواحد أخته الأصغر منه هي صاحبته؟ smk:

مكاوى .. جونيور

[لماضة مصرية جدا]

السلام عليكم و رحمة الله و بركاته

انا و شادي....بس هو مش اسمه شادي خالص....هو اسمه..... smk:

اكتر نعمة بحمد ربنا عليها اني مطلعتش بني آدم وحيد....احب العزوة و احب اللمة و الناس و من فضل ربنا عندي اخين رجالة اكبر مني و اخت اصغر مني

ناس كتير هتفتكر اني انا و اختي ايه بقي توائم سيامي ملتصق.....ابتا ابتا ابتا.....ع

لاقتنا متوترة جدا.....لانها بتحس اني بشكل او بآخر بعمل "ماما عليها".....اللي هي مش قادرة تستوعبه اني

اعمل ماما ازاي و انا اصلا لسه دماغي فيها صامولتين بايظين... :happy:

لكن اللي ااقدر ااقوله اني علاقتي باخواتي الرجالة.....غيرت في ملامحي كبني آدم جدا

لما جيت الدنيا هما طبعا مكنوشي رجالة.....بس كانوا ولدين و حتة كائن آد البلية محشور معاهم في كل حاجة....

اخويا الكبير يمكن آخد ركن لوحده بطبع شخصيته.....

لكن اخويا اللي فوق مني لزم....ده بقي مش اخويا....لا ده صاحبي....و حبيبي....و خطيبي....

و شادد شعري....و مطلع عيني.....و حمي زوجي....

و احنا صغيرين كنا مسمينا...."ناقر و نقير"...

اسم عاطشفي جدا بيختصر كل العلاقة اللي بينا....مع ان احنا كنا تشكيل عصابي منظم جدا...و محدد الهدف..."الجيران"

اكتر حاجة بتعجبني في علاقتي باخويا انه بيفهمني اكتر من نفسي....و بيحطني في مواجهة دايما مع كل مخاوفي اللي بحاول اهرب منها

لانه خابزني و عاجني كويس اوي

ده كان حلو اوي في مرحلة الطفولة....لما كانت اقصي مغامراتنا ان احنا نرن الجرس ع الجيران و هما نايمين و نطلع نجري....او لما كنا نرش ميه من الشباك علي حد ماشي في الشارع و نستخبي ورا الستارة مع ان صوت ضحكنا فاضحنا

لما كبرت....يبدو انا اخويا مكنشي شايف ده.....إني كبرت

مش يعني بقيت شحطة.....لا بقي ليا دماغي....او ع الاقل عايزة يبقي ليا دماغي

اتحول دور الاخ و الصديق الي دور الاب....و الواعظ

و طبعا ده قوبل برفض شديد جدا.......مكنشي رفض ظاهر يعني يقولي الحاجة مثلا و اهز راسي و اعملها....لا كان رفض في صورة اني دايما بعمل كل الحاجات اللي هو مش متوقعها.....و بكون مقتنعة بيها جدا....و ده اللي بيغيظه اكتر

لما ابتديت استقل...في قرارات عمل.....ارتباط

مخبيش عليكم.....ابتدينا نبعد عن بعض اكتر

مش عشان مختلفين....ابدا....بس عشان لما حد بيحب حد اوي.....بيبقي متهياله انه نفسه يحميه حتي من نفسه

انا اخويا بيعمل معايا كده...بيتهياله انه عايز يحميني من نفسي.....و بالتالي بياخد قرارات نيابة عني

و ده خلي بينا شوية صدام....و تصالح.....و مش انتي ريهام صاحبتي اللي انا اعرفها....و جمل كتير من اللي بتوجع دي

زمان لما كنا في التشكيل العصابي الطفولي بتاعنا.....كان هو المخ و هو برضه العضلات...و انا كنت العيل العبيط اللي بيقلد....لاني لسه كنت بشوف الدنيا بعينيه هو.....بطريقته هو.....بدماغه هو

لما كبرنا مبقاش ينفع نلعب نفس الادوار....مش عشان دماغه مش عجباني بالعكس بحس دايما انه سابق سنه.....

لكن لاني محتاجة اشوف الدنيا بطريقتي انا....مش عشان برضه ابقي عملت اللي في نفسي...لا عشان في يوم انا هخرج الدنيا دي لوحدي.....و هآخد قرارات كتير مهما كانت صغيرة او مصيرية...هآخدها لوحدي ...و هتحمل مسئوليتها لوحدي...و مش هقبل اني الوم غيري عنها

ساعتها هحتاج اكون انا بدماغي و بتفكيري

نفسي يفهم كده

بس لانه لسه بيلعب دور الاب......مش قادر يستوعب ان احنا اصدقاء....و اصدقاء يربطنا علاقة دم.....

نفسي يستوعب انه حلو أوي اني اكبر بيه و معاه و قدام عينيه

بس الاحلي انه يسيب الفراشة لما جناحاتها تتلون.....تطير و تكتشف الدنيا من حواليها

يمكن تروح علي بستان مليان ورد حلو و جميل

و يمكن تروح علي بستان تاني اه فيه ورد و جميل بس مسقي لمؤاخذة بمية مجاري

نفسي يسيب الفراشة دي تطير......هتبعد صحيح....بس هترجع لنفس الايديدن اللي علمتها الطيران....و اكيد هترجع فراشة احلي...هتعرف تحمي نفسها اكتر

ارجع و ااقول محدش بيتربي انه يبقي اخ او اخت

احنا بنصحي الصبح....و بنلاقي كائنات بتشاركنا الغرفة....و بتشاركنا كوباية اللبن.....و بتشكاركنا الاسم....و احيانا الملامح

لكن مشاركاتهم لينا كل التفاصيل الصغيرة دي...مش هتمنع ان كل واحد فينا ليه ملامح من جواه بتميزه يمكن تختلف او تتشابه مع ملامح وشه

و انا بكتب دلوقتي...افتكرت حاجة حلوة اوي

اول ما دخلت الجامعة كنت لسه راجعة من السعودية.....و طبعا هناك معندناش اختلاط و الحركات دي...و بعدين بقي ايه نازلة ع الجامعة....يعني اختلاط...لقيت اخويا الكبير...واخدني علي جنب و موقفني في الشباك...(ده كان مكاننا المفضل لما يبقي فيه موعظة الثلاثاء)...و قالي كتير من التكاتيك اللي بيعملوها الشباب و خصوصا مع البنات يا حرام بتوع سنة اولي

كلامه طلع مظبوط كتير جدا في الجامعة.....و حماني من حاجات تافهة كتير.....

بس الحاجة اللي نسيها ان خوفه عليا....اللي صدرهولي في الشباك فضل ملازمني في الجامعة و برااها.....نفس الخوف....نفس حالة الترقب...نفس حالة الاستنفار

نسي يقولي ان فيه مشاعر تانية جميلة ممكن تتولد في النور....خليها قدام عينيا.....خليني افرح بيكي فيها

هو نسي....لانه هو نفسه كان صغير.....كان لسه بيكتشف الدنيا زيي

بس انا كنت شايفاه هو كتابي المقدس اللي همشي علي صفحاته

مش بلوم عليه

هو كان عايز يحميني من انكسارات متوقعة....او انتصارات مزيفة.....بس الحماية الزايدة احيانا بتخلي الواحد يتمرد....و يوم مايتمرد ممكن يكون صادم جدا

اخواتي هم اول كائنات انا بتعامل معاها في الدنيا.....هم البيئة الآمنة جدا......اللي بتربي فيها ان فيه في الدنيا حاجات حلوة و جميلة و ممكن آخد حاجاتك و لا البس فانلاتك او اطمع في التي شيرت بتاعك....البيئة الآمنة جدا اللي بتحمينا و بتقوينا و بتبقي في ضهرنا و احنا طالعين للدنيا

بس يا تري البيئة الامنة دي.....ممكن تكون بتضغط علينا....ممكن تكون بتحملنا فوق طاقتنا.....ممكن تكون حاطة لينا سقف توقعات بنفضل طول الوقت نعافر عشان نثبتلهم ان احنا نقدر نوصله.....مع ان احنا ربنا خلقنا قصار القامة....مش هنقدر نلمس السقف ده....بس محتاجين مساعدتهم.... يا وطوا سقف توقعاتهم.....يا يرفعونا علي اكتافهم عشان نقدر نوصله؟؟؟

توبيك.........غريب......لانه بيفكرني باخويا اللي محتاجة اصالحه...انا مش ناسية....بس بتناسي في وقت كتير انه قدر للحظة يزعل مني

مساكم...سمااااح

[mekkawy]

لماضة يا بنتي

الدمعة فرت من عيني (وش القصري)

:cry1:

لا بجد .. فرت من عيني

مكاوى

[لماضة مصرية جدا]

السلام عليكم و رحمة الله و بركاته

معلشي انا تاني

بس بيلفت نظري لما حد بيوصف حد من اصحابه انه يا سلام ده اخويا او دي اختي

معلشي يمكن انا مبعرفشي اعمل كده

و نفس الحكاية برضه لما بلاقي بنات بتقول لحماتها "يا ماما"

برضه انا مبعرفشي اعمل كده

عمر الاخوات او الام...هيتقارنوا بناس تانية مهما جمعتنا بيهم ظروف الحياة و مهما اثبتوا بتحديات مختلفة انهم جدعان او طيبين...او....او ....او

كل واحد ليه دواير بيحط فيها الناس....و انت بتقف في مركز الدايرة....الدايرة الاقرب منك اللي بتكاد تلتصق بيك هي قطعا دايرة....علاقة الدم....و في الدواير اللي بتبعد عن المركز حط فيها بقي اللي انت عايزه.... اصحاب.....زوج...زوجة....قرايب

و هكذا

كانت دايما ماما تقولي....."أخ" يعني لما يبقي صوبعام مدوحس....و حد يجي يغلش و مسكك منه...بتوقلي....آآآآآآخ

صح

يعني الدنيا لما تقفل اوي في وشك.....و اللي كان غالي عندك بقي رخيص و رخيص اوي.....هتلاقي نفسك بتروح عليهم و بتعيط....اينعم هيضحكوا شوية علي غبائك.....و هيبستفوك حبتين علي دماغك اللي عاملة زي الزلطة....بس في الاخر هيسامحوا.....لان وجودي في حياتهم كاخت....او كأخ ده مش اختيار....من متعدد

ده حالة قدرية

ااقدر انفصل بسهولة جدا عن صديقة.....و بصعوبة عن زوج.....و بتحامل عن قريب.....لكن عن اخ.....مفكرشي انه احتمال اصلا وارد في قائمة الاختيارات

عشان نحلي القعدة بقي خدوا عنكم لوكشة الاسئلة دي:

1- لو اختك جت و قالتلك فولان متقدملي...و بعدين ضحكت ضحكة سهتانة كده (يعني موافقة ضمنيا)ليه دايما بتحبوا تعملوا دور الاب....متخليكوا اصحاب احلي؟؟

2- لو اخويا اختلف مع زوجي......و انا واقفة زي عامل السويتش في سنترال البدرشين....لا انا مع الكابينة دي و لا الكابينة دي.....ارجع الحرارة ازاي؟؟؟

3- فيه علاقة غيرة بين الاخوات....؟؟؟ يمكن مش غيرة يعني ان حد يتمني التاني حاجة مش كويسة...زيعني ممكن تكون المقارنة بين الاخوات...مثلا بتعجز طرف عن طرف تاني؟؟؟

4- لو عندي طفلين......اربيهم يبقوا اخوات ازاي........تفاصيل صغيرة.....اعلمهم يخافوا علي بعض ازاي....يحبوا بعض ازاي.....يكبروا مع بعض ازاي....الحقيقة امي عملت ده فينا...بس لاني كنت فار التجارب مش عارفة هي عملت كده ازاي....؟؟

ايه ده انا هقعد ارغي لوحدي

شدوا حيلكم بقي

و ابعتوا الاجابات علي ماسبيرو

فوتكم بعافية

[لماضة مصرية جدا]

لماضة يا بنتي

الدمعة فرت من عيني (وش القصري)

:cry1:

لا بجد .. فرت من عيني

مكاوى

ايه ده....القصري عمره ما عيط... :P

و بعدين انت بتتريق عليا يا عكاوي.....

طب انا كده هعيط.....(وش زينب في مسلسل الشهد و الدموع....الحلقة اللي دخل عليها حافظ و قالها الدمعة هتفر من عيني لما عرفت ان شوقي مات..... :cry1: )

متتريقشي عليا يا مطاوي

احسن انا عندي حالة تجلي....اتجلي عليك فيها..... :lol:

مساااك تواصل...بس من غير قناة النيل للدراما...ممكن مولتي.... :lol:

[بركة]

معلش يا لمضة

دايما ردود فعل الاخرين مش بتبقى نتيجة لتصرفاتنا قدامهم بس بتبقى حاجات كتير معاها

بتبقى اسقاطات ساعات لحاجات وجعتهم في ناس تانية

بتبقى احساس بيحبوا يعيشوه معانا دايما ..اننا محتاجينلهم دايما ولسه مش عارفين حاجة من غيرهم

بتبقى رغبة منهم في الحماية من الوقوع في نفس أخطائهم اللي مش راضيين يحكوا لسه عليها

كلام كتير جوايا عشانك ........بس انا حاسه بيكي

بجد ربنا يحميكي و بصي على الدنيا براحتك وطلعي راسك من شباكك بس اتعلمي من اللي بتشوفيه كويس

عشان تفضلي مرتاحة لأطول فترة ممكنة في الفرجه على العالم اللي بره

عالم مهما شفتيه كبنت مش زي ما ولد بيشوفه

[mekkawy]

لماضة يا بنتي

الدمعة فرت من عيني (وش القصري)

لا بجد .. فرت من عيني

مكاوى

ايه ده....القصري عمره ما عيط... :P

و بعدين انت بتتريق عليا يا عكاوي.....

طب انا كده هعيط.....(وش زينب في مسلسل الشهد و الدموع....الحلقة اللي دخل عليها حافظ و قالها الدمعة هتفر من عيني لما عرفت ان شوقي مات..... :lol: )

متتريقشي عليا يا مطاوي

احسن انا عندي حالة تجلي....اتجلي عليك فيها..... bsh:)

مساااك تواصل...بس من غير قناة النيل للدراما...ممكن مولتي.... :lol:

و الله ما بأتريق

أنا بجد عشت كلامك جداً آخر حاجة

و اللي قلته كان بجد يا مس لماضة بدون أي هزار

اتجلي يا أخويا اتجلي :lol:

مكاوى

[Howayda Ismail]

العزيزة لماضة:

بداية الكلام لاتسوفى فى المبادرة بالاتصال باخوك .

ناس كتير بتتولد تلاقى ده اخوها دى اخته وكذلك ابوه وامه وممكن مايعرفش يلاقى نفسه وسطيهم انا قصدى ان الاهل مش

اختيار وفى نماذج لكده كتير لكن اصحابك اختيارك انت وحبذا لو الاثنين كانوا وفق اختيارك تبقى نعمة كبيرة من ربنا.

يعنى فى اسرار ممكن مانقدرش تقوليها لاخوك لكنن ممكن اختك ولو مش ممكن الاثنين لازم يبقى فى صديقة وفية تشيل عنك

مافيش حد يقدر يعيش من غير اصدقاء حتى لو ارتباطه باخواته كبير .

وبالنسبة للاسئلة :

(1)موضوع الارتباط ده رأيك انت مع وضع نصيحة اخوك فى الاعتبار .

(2)لو اخويا اختلف مع زوجى وماقدرتش اقرب وجهات النظر هما احرار فى علاقتهم مع بعض المهم لاتؤثر على علاقتى انا بيهم

يعنى علاقتى تبقى كويسة بالاثنين مش واحد على حساب الثانى.

(3)عمر ما حيكون فيه غيرة طول مالاب والام مش بيعملوا مقارنة بينهم ولابيمدحوا واحد عن التانى لكا طفل قدراته واحد

ضعيف فى نقطة اخوه متفوق عنه فيها حتلاقى الضعيف متميز فى حاجة تانية عن اخوه وهكذا.

(4)لو عندك طفلين عوزاهم اخوات صح اعدلى بينهم فى الحب فى الحنية فى العطية يعنى مافيش تفرقة ولو بالنظرة

ودلوقت احنا اللى بنتعلم من ولادنا مش زى زمان المهم(الصحوبية معع اولادك) اسفة انى طولت عليك

[ابو حودة]

برضه انا مبعرفشي اعمل كده

عمر الاخوات او الام...هيتقارنوا بناس تانية مهما جمعتنا بيهم ظروف الحياة و مهما اثبتوا بتحديات مختلفة انهم جدعان او طيبين...او....او ....او

لماضة احييكي على هذا الكلام

واتفق معك تماما فيه