خالد محمد سعيد "شهيد الطوارئ

[محمد عبدالعزيز]

يا جماعة شهادة الخدمة العسكرية بتقول كلام كتير

ده الشهيد الله يرحمه كان مجند فى قوات أمن اسكندرية, يعنى تبع وزارة الداخلية, ووزارة الداخلية بتدعى إنه لم يؤدى الخدمة العسكرية وعليه حكم, شوفتوا إزاى؟!!!

ده غير كمان إنه ممكن يكون الله يرحمه عنده معلومات فعلاً عن فساد كبير فى المكان اللى كان بيخدم فيه, والفساد ده متورط فيه رتب كبيرة عشان كده فى مقاومة شديدة من وزارة الداخلية, وعشان كده كل اللى اتعامل معاه من مخبرين لظباط قلبهم جامد وعارفين إن ماحدش حيقدر يعمل لهم حاجة بالقانون.

وكمان الشهيد قضى ست سنوات فى الخدمة, مع إن مدة الخدمة زى ما الشهادة بتقول سنتين بس, طب باقى ال 6 سنوات كان فين؟

احتمال كان مسجون وعشان كده درجة الأخلاق فى الشهادة رديئة وخارج بقرار من لجنة الرفت الانضباطى!!!

طيب ياترى لو كان مسجون يبقى ليه اتسجن الفترة دى كلها؟

الحادثة لسه فيها تفاصيل كتير مش واضحة.

وأنا دلوقتى باعتقد إن الداخلية هى اللى سربت الفيديو اللى بيتقال عليه إنه هو السبب, عشان تطلع تقول بعد كده إن الفيديو ده صحيح فعلاً وإنه كان بعد ضبطية مخدرات وحاجة تفتخر بيها الداخلية مش حاجة مشينة, عشان تبعد النظر خالص عن أى فيديو تانى مقصود وماحدش حتى يدور عليه.

ومش بعيد يكون الفيديو ده لسه متصور قريب بعد الحادثة بغرض الاستخدام ده.

[fatfouta]

انا نفسى أسال سؤال

هما كانوا فين الاخوان والاحزاب والمستقلين امبارح من الوقفة الاحتجاجية؟

بصراحة احترمت ايمن نور

[pocy]

الله أكبر فوق كل ظالم

فضح الكدابين الكلاب بالصور

التلفزيون المصرى الكداااااااااااااااااااااااااااااااااااااااااااااا اااب

فى نشرة الساعة 9 بيوقولوا هارب من التجنيد

يا كلاب يا ظالمة صورة شهادة تأدية الخدمة العسكرية أهى

فى جرايد الحكومة

الكلاب الكدابين

قالوا هارب من التجنيد ... وصورة تأدية الخدمة العسكرية اهى

قالوا عاطل ... وصورة جواز سفره .. والوظيفة إستيراد و تصدير

[the consultant]

محامى شهيد الطوارئ : تقريـر الداخليـة (مفبـرك)

آخر تحديث: الاثنين 14 يونيو 2010 9:39 ص بتوقيت القاهرة

هشام الميانى ومصطفى فتحى -

اطبع الصفحة اكتشف دفاع أسرة خالد سعيد «قتيل الإسكندرية» لدى مطالعته لقيد واقعة الوفاة فى دفتر قسم سيدى جابر أن الشرطة لم تقيد الواقعة «جنحة أو جناية» وإنما قيدتها باعتبارها «إثبات حالة»، رغم التشوه الظاهر على وجه المجنى عليه.

وقال إسلام العبيسى، محامى الأسرة إنه فوجئ بالقضية مقيدة فى محضر إدارى، «ما يوحى بأن محررى المحضر فى قسم الشرطة يريدون التهرب من أى مسئولية وإبعاد القضية عن الشق الجنائى».

وطلب القاضى ياسر الرفاعى، المحامى العام الأول لنيابات الإسكندرية نسخة من ملف التحقيق فى قضية مقتل خالد، الذى قال شهود عيان إنه «تعرض للتعذيب حتى الموت على يد مخبرين من قوة القسم»، فيما استمعت نيابة سيدى جابر فى التحقيقات التى باشرها محمد درويش، لثلاثة شهود من أفراد القسم، أكدوا أنه «لم يتم تعذيب المجنى عليه ولكن حاولنا إنقاذه حينما ابتلع لفافة بانجو كانت بحوزته وتسببت فى اختناقه».

وطلبت النيابة تحريات المباحث الجنائية بمديرية أمن الإسكندرية عن الواقعة لمقارنتها بأقوال شهود قسم سيدى جابر، كما طلبت النيابة من الشرطة تفسيرا للتشوه الموجود فى وجه المتهم وجثته ــ حسبما جاء فى معاينة النيابة وتقرير الطب الشرعى ــ ولم تشر أقوال شهود «الداخلية» من قريب أو بعيد لسبب هذا التشوه. وقال إسلام العبيسى محامى أسرة القتيل إنه سيقدم إلى النيابة «شهودا كثيرين يؤكدون ضرب الشرطة وتعذيبها لخالد».

وأكد محمد عبدالعزيز، المحامى بمركز النديم لعلاج ضحايا التعذيب والموكل من المركز لحضور التحقيقات أن النيابة العامة لم تتلق تقرير الطب الشرعى حتى الآن.

وقال عبدالعزيز لـ«الشروق» أمس: النيابة أكدت لى عدم تلقيها التقرير، وهو ما يكذب ادعاء وزارة الداخلية، فكبير الأطباء الشرعيين، الدكتور كرم شحاتة لم يقدم أية تقارير، وهو ما يعنى أن بيان وزارة الداخلية مفبرك ومتسرع، فما سيفصح عنه تقرير الطب الشرعى هو الحقيقة، ومن المنتظر أن يصدر التقرير خلال يومين».

وأضاف: «ما قيل عن أن الصورة التى تم نشرها للمجنى عليه خالد تم أخذها بعد تشريح الجثة بمعرفة الطبيب الشرعى، كذب وافتراء لأن واقعة الضرب المبرح تمت على مسمع ومرأى من الجميع، كما أن الطبيب الشرعى لن يقوم بخلع أسنان خالد من أجل تشريح الجثة وغيرها من الآثار الأخرى التى شملت جميع أنحاء جسده».

وتابع عبدالعزيز: «هيئة الدفاع قدمت (سى دى) يحوى مقطع فيديو، يبين اعتداء ضباط ومخبرى قسم سيدى جابر على النشطاء، وسحلهم على الرصيف المقابل للقسم، ومن بينهم حسن مصطفى، والذى مزقت ملابسه وتعرض للضرب مع باقى النشطاء».

[pocy]

حسبي الله ونعم الوكيل

[لونا]

دي صور لمظاهرة الأمس أمام وزارة الداخلية

و واضح إن عدد الأمن المركزي و القوات الخاصة كان يفوق عدد المتظاهرين بكثير

[لماضة مصرية جدا]

لو واحد صاحبى بيتخانق... انا ولا اعرفه ....

الموضوع مش خناقة ولا عركة فى خمارة... علشان نقول هنجيب كام واحد... الموضوع اكبر من كده حبتين...

اولا هو فين الوعى؟ هل المصريين عندهم الوعى الكافى بحقوقهم, و كيفية المطالبة بيها؟

فيه كلمة عجبتنى قوى لاحمد حلمى فى فيلمه الاخير... لما بيقول للظابط فى القسم: انا مواطن مصرى و عندى حقوق مصرية!!

لازم الناس يكون عندهم وعى اكبر من كده... سواء وعى بالاحداث نفسها... او وعى بكيفية المطالبة بحقوقهم.... و ان ده حقهم فعلا..

فيه ناس كتير متعلمين... بس معندهمش اى و عى من اى نوع... و تحس كده انهم جايين من كوكب تانى..

يعنى لغاية دلوقتى فيه ناس كتير بيصدقوا كلام الحكومة و كلام الاعلام الفاشل!! اه والله..

تانى نقطة و دى الاخطر... يا أيها اللذين آمنوا لم تقولون ما لا تفعلون؟

مينفعش انى اقول انتوا ليه مابتتحركوش... و انا اصلا متحركتش... الكلام من عالنت حاجة... و انى اروح المظاهرة حاجة تانية خالص..

يعنى على سبيل المثال... انا بزعل جد لما حد يبقى عايش برة مصر... و يقعد يقول مصر هى الامان و المفروض ماتسيبوش مصر.. و هو اصلا اول واحد سايبها و قاعد بعيد و مكبر دماغه من اللى بيحصل فيها... او بمعنى أدق... ميعرفش ايه اللى بيحصل فيها غير من عالنت و التليفزيون... لكن لا بيركب اتوبيس و لا بيتبهدل فى مترو... و لا حتى بيعدى تحت السمس فى عز الحر...

تالت نقطة.. و بصراحة هى الدعامة الاساسية لكلامى كله... هنعمل كل ده علشان مين؟؟!!ربنا بيقول: و اللذين جاهدوا فينا لنهدينهم سبلنا... اذا انا معنديش شك اطلاقا انى لو عملت حاجة و تعبت شوية... هشوف نتيجة للى بعمله... سواء آجلا او عاجلا..

لكن يظل السؤال... هعمل علشان مين؟ و ليه؟ و على اساس ايه؟؟ و ازاى اروح اتعب علشان ناس هما اصلا بايعين القضية و سابوا البلد من زمان.. و مبيجوش غير فى الاجازات علشان يتفسحوا فى شرم الشيخ و الغردقة... او علشان ناس معندهمش الوعى الكافى للى بيحصل فى البلد؟

كان فيه واحد محترم جدا اسمه دكتور هشام ابراهيم... كان معانا فى باب الهجرة لكندا... قال كلمة عظيمة جدا... مصر دلوقتى بتمر بعصر الاضمحلال... و فى عصور الاضمحلال مهما عملت... الوضع مش هيتغير... لانه لازم ياخد دورة وقت معينة على ما يتغير.... و علشان كده الحل الامثل هو انك تتقبل و تعيش... او انك تسيب البلد و تروح كندا

لكن طبعا فيه ناس عايزين الاتنين.... انى اعيش فى بلد تانية... و فى نفس الوقت انى افرح بانى بعمل حاجة لبلدى...

مينفعش انك تنول الاتنين مع بعض... ما هو اما النصر لاما الشهادة... لكن مينفعش الاتنين مع بعض ابدا... و المشكلة بقى ان فيه ناس عايزين الاتنين... لا و كمان من برة... يعنى ديليفرى :P

السلام عليكم و رحمة الله و بركاته

استاذي الفاضل تسمحلي افضفض كده شوية....و لا هي عنتريات وطنية و لا مزايدات...بس هفكر مع حضرتك شوية

اخويا شاب زي حضرتك...و دايما بيقولي .....لو صاحبي في خناقة...اسحب الفرمنش بتاعي (الفرمنش ده البتاعة اللي فيها حتتين خشب و بيهم سلسلة حديد...و بيستخدموها بتوع الكونغ فو....هو اصلا مالوشي في اي رياضة بس بيحب الفرمنش عشان بيوجع لو لبس في وش حد)....بيقولي اسحب الفرمنش و اخش اضرب و احامي لصاحبي

و لماحصلت لنا مشكلة متعسفة جدا من حتة عيل وكيل نيابةمن اللي بيتحامي في ابوه اللي هو رجال السلطة الجامدين اوي....في لمح البصر كان كل شباب المنطقة متجمعين وواقفين حواليه......لدرجة ان العيل اصلا معرفشي يطلع من الحتة بتاعتنا....و ع فكرة لا هما ضربوه...و لا عملوله حاجة...هما بس حوطوا عليه...هوشوه بس...لغاية ما البوليس وصل

في الحادثة بتاعت خالد...انا استغربت...ليه الشباب معملوش كده...ليه محدش اتحرك....ليه محدش حوط علي خالد....ليه محدش حاشه منهم

مقدرشي اتفلسلف و ااقول خوف و عجز و حاجات تانية كتير....بس اللي ااقدر ااقوله...ان فيه شباب عمل حاجات عكس كده...و الشباب دول انا اعرفهم و اعرفهم كويس اوي...منهم اخويا و اصحابه....و حضرتك.... ايوة متاكدة ان حضرتك كمان كده لانك لما بتتحط في الموقف....فعلا الحسابات بتبقي غير...اصلا مبيبقاش فيه حسابات...فيه نخوة...فيه عرق كده بيفط من رقبتك و بيخليك تعمل كده..من غير اي حسابات

===============================

حضرتك لما سالت انا هعمل ده لمين...و انا اصلا مش هلحق اشوف ثمرة ده...الاجابة البسيطة حضرتك ذكرتها

انت بتتكلم عن تشكيل وعي....و تغيير مفاهيم....الحاجات دي...مش بتحصل في يوم و ليلة.....دي بتبقي زي قطرات الميه

عارف قطرات المية

ضعيفة جدا جدا

لكن بتفضل تنقط علي الصخرة الجامدة جدا جدا لغاية ما تفتتها

ارجع لاي قصة فيه ايمان بمبدا او حرية أو قضية...غاندي....نيلسون مانديلا

عمرها ما اتحلت في مظاهرة...عمرها ما اتحلت في بيان....او التوقيع عليه... و ده مش معناه ان ده مش مهم بالعكس

لا دي كانت منظومة متكاملة....كانت إيمان لا يتزعزع جوه البني آدم....انا مؤمن ان ده حقي.....هناضل عشانه...مهما كانت طريقتي بسيطة جدا....و هموت و هيجي غيري....و حتي لو حصل التغيير في عهد غيري...انا عارف ان اسمي مش هيكتب في ركن الابطال...مش هيمهني...لان جزاتي الحقيقية اني آمنت بمبدأ و فضلت ثابت عليه...و دي العطية الحقيقية في حد ذاتها

================

حضرتك ذكرت الناس اللي عايشين في بلد تانية

ايون حضرتك شاورت عليا....انا هتكلم عن نفسي مش حد تاني

صحيح انا عايشة جسمانيا في بلد تانية....و عشت فترة طويلة من حياتي في بلد تالتة .....

بس الحبل السري بيني و بين بلدي منقطعشي...بكامل ارادتي...انا عايزة اعيش ملتصقة بيها و بهمومها...متوحدة مع مشاكل...ابسط حاجة ااقول لحضرتك انا في غربة و يكفيني جدا اللي بتطرحه الغربة دي من هموم

مش عشان فيها اهلي

و لا عشان انا هنزل اجازة.....(و الله ما بروح شرم و لا الغردقة...انتو بتجيبوا الحاجات دي منين....انا كبيري اروح عند اهل بابا في البلد...و دول ناس صعايدة اوي بيفضلوا ياكلوني ملوخية و بط...لما بقول جاااااااي....ع فكرة انا عندي ده بالدنيا اصلا)

و لا عشان انا هقعد ااقول لحضرتك كل حد فينا آخد جرعة المرمطة بشكل او بآخر لما كان جوه و لما طلع براها كمان

عشان

ارجع ااقول لحضرتك.....

انا عندي حلم....

عندي ايمان.....

عندي يقين....

عندي رهان عايزة اكسبه قدام نفسي...مش قدام حد تاني.....

ان الارض دي طيبة...ان الارض دي عفية

ان الست ام خلف اللي بتبيع جرجير و كرات و بصل اخضر....من حقها انها متسالشي الناس...من حقها انها تعيش في آدمية.....

و من حقي....و حق ولادي....انهم يطلعوا في مكان بيخاف عليهم ...بيحميهم....بينورلهم طاقة نور جواهم

عايزة لما يبقي عندي ولد و بنت...احكيلهم حكايات عن ال3 حروف دول "م...ص...ر".....مش اللي هي في افريقيا و لا اللي اي مكان ع الخريطة

هي الحلم اللي جوايا...اللي انا اخدت تفاصيله في ملامحي من غير ارادتي...بس لما كبرت...منسلختش من التفاصيل دي....شيلتها جوايا منين ما بروح

و عشان نكون عمليين برضه......

تسمحلي ااقول لحضرتك علي حاجة صغنتتة ان شاء الله ابتدينا ننفذها انا و اصحابي (طبعا انا اللي بره وهما اللي جوه...هاااااااارش.... :wub: )

انا اتدربت علي برنامج اسمه "التربية علي حقوق الانسان" و ده كان تبع الاتحاد الاوربي....

في الصيف ان شاء الله هنظم برنامج تدريبي للشباب الصغير اللي في سن المراهقة علي نفس الموضوع....و ده مش هيكون في شكل مواعظ و حكم و مصمصمة شفايف....احنا بنعمل ده في شكل مشكلات يومية حياتية جدا جدا...من نوع.....(ركبت المترو.....و اتحشرت...و دفعت التذكرةو جه حد آخد حقك المشروع جدا...تتصرف ازاي...و تعمل ايه؟؟)

دي مش قوالب جاهزة....و لا اجابات مسبقة

دي فكرة فكرنا فيها انا و اصدقائي و لله الحمد في الاولي و الاخرة....عشان نخلي الشباب الصغير..يبتدي بس يفكر.....بلاش ياخد مشاهد يومية مسلمات....و يعدي و يقول...و انا مالي.....يا عم نفض....و لا يعني ده هيغير بايه

معلشي رغيت كتير

يا رب تكون معانا في الصيف باذن الله...لو تحب

تحياتي

فوتك بعافية

[om marawan]

ياجماعة بعد اذنكم

وارد انه يؤدى جزء من الخدمة العسكرية ويعتبر متهرب فعلاااا لانه ماقضاش المدة كاملة مش ممكن هنعتبر كل اجهزة الدولة من شرطة لجيش لقضاة لطب شرعى كمان كذابين وفاسدين بلا استثناء

الناس دى فيه منهم اهلنا ومعارفنا كلنا كتير ومش عشان فيه شريحة فاسدة نعتبر الناس كلهم فاسدين وان خالد رحمه الله عارف فضايحهم ومتستر عليهم

يعنى فيه ظلم وقع ده اكيد لكن مش معقول هيلفقوله كل حاجة بما فيها حكم قضائى يعنى محضر ماشى لكن حكم قضائى

مش معنى كده ان اللى عملوه مش افترا وظلم لكن لا نلقى اتهامات تؤدى بالناس الى حالة من الاحباط و الكره لجهاز كامل فيه الكويس والوحش ده مش بس كده الكره تحول للبلد كلها وبقا فيه اتجاه ونعمل اصلا حاجة للبلد ليه ماهى ماتستاهلش مش للدرجادى يعنى

مخالفات الشرطة اللى وردت قبل كده فى مداخلة سابقة اللى قالتها جريدة الشروق كلها تتضمن احكام ضد الظباط المتهمين بالتعذيب ومنهم اللى اخد حكم بسجن فعلا

ارجوكم ماحدش يعتقد ان كلامى ده معناه انى شايفة انى مش شايفة الظلم لكن مش من مصلحتنا نصدق وقائع قد تكون خاطئة

اخوه نفسه لما سألوه اذا كانت الاتهامات صحيحة قال حتى لو كانت صحيحة مش دى الطريقة اللى يتعامل بيها وانا معاه مليون فى المية

قليل من الثقة فى النائب العام اللى اعتقد انه لن يطيح بسمعته عشان حتى قسم سيدى جابر كله

والثقة الاكبر واليقين فى رب العزة العدل الذى لا يغفل ولا ينام

[ذهبية]

لا يضيع حق وراءة مطالب

[لولا]

تهمتنا عايزين حريه تهمتنا بنحبك يا مصر

----

اضربوا اضربوا ......وبتعيبوا على اليهود ده انتم احسن أساتذة في العالم تدرسوا فن الاجرام والسفالة......

----

ربنا يرحمنا من الهمج دول يا رب برحمتك بنستغيث

يعني كل الناس مصايبهم سبت وحد واحنا مصيبتنا موردتش على حد

التعذيب مجاش من اليهود ولا الامركان ولا الكفرة

دة جي من مصري لمصري

---

هؤلاء كلاب ينهشون جسد انسان والله حرااااام

---

لسه ساكتين خلينا ساكتين

خلاص اليوم جه

وقفة مصريه ياشعب

---

ايه دا ايه دا

عار عليكم ياشرطة مصر

بجد ربنا يرحمنا ويهدييييييييييييكم

---

موتنى وانا آسف على تعب حضرتك!!!!!!!!!!!!

---

ولا تحسبن الله بغافل عما يفعل الظالمون

عندما يصل الشعب لهذه الدرجة من الإحتقار والكراهيه والغضب من الأجهزه الأمنيه فلا يخبرنى احد ان ذلك حدث فجأه

او خلقته حادثه او مواقف عابره !

الغضب وصل مداااااااااااااااااااااااه لأن الفساد والطغيان تجاوز المدى.. تجاوز المدى.. تجاوز المدى

الآن ابحث عن دورك ليكون لك صوت غاضب ويكون لك صوت غاضب..

ارجوك /ارجوكى

لا تلتفتوا لأصوات الخنوغ والضحكات الساخره والدعاوى التى تجعل مما يمكن ان تفعله حسب استطاعتك عبث ولعب عيال لقضيه لا امل فيها !!

توقف/ توقفى واسأل نفسك بصدق ان تكون مواطن يحمل وعيا يمارسه بالطريقه التى تتيحها الظروف افضل ام ان تتحول لكائن اخرس

سلبى لاتؤثر فيه قضيه ولا تؤثر فيه دماء بريئه تهدر ولم يعد يحمل اى مبدأ ؟؟

افعل ما تستطيع وكن على يقين ان التغير سيحدث عندما يقدم كل شخص ما يستطيع..كل شخص

لكن المسلسل يستمر عندما يردد الكل يعنى اللى هعمله فايده ايه! جات عليا ده شعب نايم !!

وانت مين ؟؟

انتى مين ؟؟

انتوا الشعب .. الشعب احنا .. الشعب افراد .. التغير بيصنعه افراد يكونوا مجموعات والمجموعات تكبر وتكون مجموعات تانيه وهكذا

تفتكروا الداخليه اصدرت بيانتها المتخبطه البلهاء الغبيه بشكلها اللى صدر ليه ؟؟

عشان كان فيه تخبط مصاحب لحاله غضب شديده جدااااااااااااااااا

طب الغضب الشديد جدااااااا ده جيه منين ؟؟

من رده الفعل الشعبى ؟؟ من النشاط الخرافى للنشطاء على النت ... من الحقيقه اللى نشرتها الشبكه العنكبوتيه وفضحت الكذب والخداع والعفونه اللى يرتعون فيها

من الوعى الذى ينتشر بهذه السرعه

من الرفض الذى اصبح له صوت ولم يعد اخرس

من اشياء كثيره كثيره

المهم ان كل واحد يعرف ان عليه واجب وانه صوت يملك انه يعبر بيه عن رفض ويملك انه يخرسه للأبد

وزى ما قالت لماضه التغيير مش هيحصل عشان مظاهره ولا التوقيع بس على بيان

التغيير هيجى لما الحاجات دى تتجمع على بعض نقطه نقطه..

النقطه دى هى انا وانت وانت وانتى.. النقطه دى احنا اللى بنعملها

ليه حتى تستخسر فى نفسك وبلدك النقطه دى ؟؟ ليه ؟؟

لولا

[doha]

لولا ..

من امبارح ومن بعد ماحسيت بحماسك الواضح من كتاباتك في الموضوع ده وانا عاوزه اكتب لك ومش هاين علي اقولك الي عاوزه اقوله .. مش عاوزه احبطك .. بس بصراحه وبعد ماشفت الصورة دي

مش هقدر اسكت .. سامحيني يالولا لو كلامي معجبكيش او كان صادم بس للاسف الي هقوله لك هو واقع ملوش علاقه بالشعارات ..

يابنتي موضوع خالد ده موجود بكثافة على النت والنت فقط .. ممكن في ناس الى حد ما مهتمه بيه برا النت بس دول كام من كام ؟

شفت تعليق ان عدد الامن المركزي في المظاهره اكبر من عدد المتظاهرين .. صحيح وده واضح .. بس على فكره مش عشان الحكومه مفترية ومنزلة امن كتير وانما لان فعلا الموضوع ده حجمه بالنسبة لبقية اهتمامات المصريين ..

متنفعليش ومتتضايقيش .. فدي الحقيقة .. لما اسعار الزيت والسكر ارتفعت من سنتين كده خرجت مظاهرة حاشده فيها يجي الف ولا الفين سدت الشارع وتحاوطت بالامن برضه .. بس لو حسبتيها يالولا صحيح الفين خرجوا بس ده عشان فوق الستين مليون انضروا من ارتفاع الاسعار فالي حصل ده اقل واجب . .

هتقولي علينا شعب خانع هتقولي اننا شعب نستاهل الي يجرى له هقولك هوني على نفسك القصة مش كده ..

عن نفسي تألمت لما حدث لخالد الله يرحمه ويرحمنا جميعا .. عن نفسي برضه مجرد ماحس ان في ايدي شيء اعمله لقضيته مش هتردد اني اعمله بس اكون واثقة انه هيفيد بجد مش مجرد كلام .. وعن نفسي برضه لو المظاهره بتاعت خالد مشيت تحت بيتنا مش هنزل امشي فيها تماما كما فعلت في مظاهرة العدس الي مشتركتش فيها ..

مش كل الناس يالولا ينفع تمشي في مظاهرات كذلك مش كل القضايا حلها المظاهرات .

شوفي منظر الصورة الي فوق .. دققي في الصورة .. تحديدا في وضع البنات .. شوفي البنت الي واقفة امام الراجل ابو قميص وردي ولا التانية ام تيشرت بنفسجي والمفعوصه في حضن ابو نظارة وشعر كيرلي ..

انا حتى مش قادره ارجع للصورة عشان اوصف اكتر ..

البنات دي محترمه واشرف من الشرف انا متاكده من ده .. لكن ايه المنظر الي حصل ده .. ايه هتك العرض العلني الواقع عليهن ده ..

متقوليش لي الامن الي عمل فيهم كده .. هم عملوا في نفسهم كده

مهو انا مروحش عشان اطالب بحق خالد الي راح فاسلب حقي انا واقول شجاعه واقول مرجله او اقول زمن الرجاله خلص ..

ايوه قضية الحقوق الانسانية تمسنا كلنا .. وايوه الي حصل لخالد ممكن يحصل لاي حد فينا .. لكن مروحش انزل في مظاهرة اهتك عرضي وعرض الي معايا واقول اصلي بطالب بحقوق .. ان مكانش في طريقة تانيه لاسترداد حق خالد وحقنا الي راح معاه غير هتك العرض يبقى خلاص نقولها صراحه .. مفيش فايده .. مفيش طريقة وانتهينا ..

بقيت نقطة اخيرة احب اؤكد عليها .. الي حصل في قصة خالد ادانة صارخه لعدد من المنتمين لسلك الشرطه .. مش هقول انهم بعض من كل ومنعممش بس هقول ياجماعه لو كرهنا الشرطه اوي كده زي ماهو حاصل دلوقت .. ولو كرهنا القضاء اوي وفقدنا الثقة فيه نتيجه حادث المحامين في طنطا او اي قضية راي عام من الي انتشروا مؤخرا .. لو الناس دي الي هي ظهرنا ودرعنا الي بنتحامى فيه وقت اللزوم طلعوا كلهم عملاء وخونه وبايعينا من زمان .. ظهرنا هيبقى مين ومين هيحمينا من قانون الغاب والبلطجية الي هياكلونا صاحيين لو الناس دي خرجت من حياتنا ..

محدش يقولي انهم فعلا فاسدين او انهم فعلا وحشين .. بقالنا سنين طويلة عايشين متحاميين فيهم .. ايوه كان فيهم فساد وايوه كان فيهم استبداد بس في النهايه كانوا حاميينا وكنا عايشين كويسين .. ليه فجأه الناس دي بقت كخه وبقت هي عدو الشعب الي لازم الشعب يثور عليه ؟

متزعليش يالولا او تغضبي مني .. اقري كلامي بهدوء عشان تعرفي .. انا مبقولش انهم ملائكه ولا بقول ان دم خالد مفروض يروح هدر ولكن بقول بشويش يالولا .. تقريبا كده انتي الوحيده الي واخده الموضوع بحماسك ده . . هو خطير وكبير ..بس مش للدرجه دي ياعزيزتي ..

[عاشق الترحال]

ياجماعة بعد اذنكم

وارد انه يؤدى جزء من الخدمة العسكرية ويعتبر متهرب فعلاااا لانه ماقضاش المدة كاملة مش ممكن هنعتبر كل اجهزة الدولة من شرطة لجيش لقضاة لطب شرعى كمان كذابين وفاسدين بلا استثناء

في أحد البرامج أمس في السهره على قناه Otv عرضوا صوره من شهادة تأدية الخدمه العسكريه لشهيد الطوارئ خالد وكمان صوره من جواز السفر بتاعه مختوم له على الباسبور الختم البيضاوي اللي معناه انه غير مطلوب للتجنيد .

بالإضافه أن أحد الصحفيين أشار إلى أنه يملك أدله دامغه على براءة خالد وأظن أنه لمح أن معاه مستند صحيفة الحاله الجنائيه ( الفيش والتشبيه ) الصادر طبعا من وزارة الداخليه واللي كان عمله خالد قبل ما يقتلوه بفتره قليله .

وده في حد ذاته دليل دامغ على برائته من أي تهمه تنسب إليه ظلما وبهتانا .

الحكومه مبتغلبش بس المشكله أن تبريراتها المره دي عبيطه وساذجه وأنا في رأيي أنهم هيضحوا بكبش فداء اليومين الجايين علشان يهدوا الرأي العام وبعد ما الموضوع ينام يبقى يخرجوهم تاني ويرجعوهم شغلهم ومش بعيد يعطوهم أوسمه ونياشين كمان .

ولو حد يفتكر اللي حصل مع المواطن عماد الكبير والدنيا إتقلبت وبعد كده حكموا على المتهمين بالحبس 3 سنوات وأفرج عنهم بعد قضاء تلات أرباع المده إعادة المتهمين في قضة عماد الكبير إلى خدمتهم

[hanzalah]

كلام الاستاذ محمد في نقطة شهادة تأدية الخدمة العسكرية مضبوط

على فكرة الشهادة دى بتؤكد على انه كان له مشاكل فى الخدمة العسكرية ، ابسطها هو الهروب من الخدمة العسكرية ، وانهاء خدمته كما هو موضح بالشهادة ( قرار لجنة الرفت الانضباطى ) يعنى انه قد تم تقديمه الى محكمة عسكرية ، والمحكمة العسكرية ترفت الهاربين من الخدمة العسكرية لو كان هروبهم لمدد طويلة ربما عام او اكثر فتحكم عليهم بالسجن مدد تتراوح مابين 6 اشهر الى اكثر من سنة والرفت من الخدمة ، وهذا هو السبب فى ان تقدير درجة اخلاقه اثناء الخدمة ( رديئة ).

طبعا القتل بهذه الطريقة الهمجية لا يبرره أية دوافع أو خلفيات للموضوع

وخاصة أن يأتي الارهاب من اشخاص دورهم الطبيعي ان يحموا المجتمع من الارهاب !!

لكن لو سألت نفسي سؤال ..

من هو المحرض لهؤلاء الكلاب الذي يعطيهم دافع لسحل الشباب الناشطين بهذه الطريقة الهمجية

سأجد ان روزاليوسف من أكبر المحرضين

ويكفي هذه الصورة التي نشرتها اليوم في الجريدة ص 5

تسخر فيه من البنات الناشطين

ياترى كم جهة تحرض هؤلاء الكلاب على الناشطين !!

تم تعديل 14 يونيو 2010 بواسطة hanzalah

[Alrefaey]

اختلف معكى وبشدة عزيزتى ضحى هذه المرة

ماذا بعد حياة الانسان ,هل اضع حياة بنى ادم فى مقارنة مع زيت وسكر

عزيزتى مافعلته اسرائيل بغزة وقتلت ودمرت كان عشان روح واحدة وهو الجندى الاسرائيلى جلعاد شليط

(من قتل نفسا فكأنما قتل الناس جميعا ) ليس بعد القتل ذنب فما بالك بالقتل ببرود اعصاب والتنكيل بشاب مسكين فى مقتبل عمره مثل خالد

هضع نفسى اخو خالد وضعى نفسك كذلك لو حدث لنا مثل هذا الموقف هنفكر فى زيت وسكر وخبز او اى قضايا فساد

دور الشرطة عزيزتى هى تأمين حياتى وحياتك وهذا الجهاز موضوع بالاساس لتأمين حياة البشر , وليس قتلهم وارهابهم

تلومين السيدات الشرفاء الاتى اشتركن فى المظاهرة فمن باب اولى ان تلومى رجال انتزعت منهم النخوة واستباحو دماء الشعب

للاسف ما اهون الانسانية فى بلادنا , انها بداية النهاية

[مغتربة]

ردا على بيان الداخلية: لن نتراجع طالما لن تتراجعوا

في الثاني عشر من يونيو أصدرت الإدارة العامة للإعلام والعلاقات بوزارة الداخلية المصرية بيانا تنفي فيه ما ورد في شهادات الشهود وبيانات منظمات حقوق الإنسان بشأن مقتل خالد سعيد بالإسكندرية متهمة تلك البيانات بالمخالفة للحقائق والمغالطة الصارخة وبالتمادي في الترويج للكذب والتضليل الخ. وهذا ردنا

يقول بيان الداخلية:

تمادت بعض العناصر ودوائر بعينها

لسنا “عناصر” أو “دوائر بعينها” نحن منظمات حقوق الإنسان التي لن تتوقف عن مراقبة ومتابعة وفضح كل ما تؤتيه وزارة الداخلية من جرائم وانتهاكات للحقوق وخرق للقانون والدستور والمواثيق الدولية التي وقعت عليها الحكومة المصرية لتفاخر بها الأمم في ذات الوقت الذي تذيق فيه أبناء وبنات الشعب المصري ذل الهوان والقهر في كل يوم في كل قسم شرطة ومكتب أمن ومركز اعتقال.. أسماؤنا معروفة وعناويننا معروفة وبياناتنا علنية لمن يريد.

فردى شرطة من قوة وحدة مباحث قسم سيدي جابر بالإسكندرية خلال ملاحظتهما للحالة الأمنية تاريخ 7 الجاري بأحد شوارع منطقة كليوباترا التابعة للقسم..قد شاهدا المحكوم عليه/خالد محمد سعيد صبحي يرافقه أحد أصدقائه ولدى توجههما لضبطه

لماذا توجه مخبري سيدي جابر لضبط خالد سعيد. هل كان معهما أذن ضبط وإحضار.. ولو صدقت الداخلية في أن على خالد أحكام لماذا لم تتوجه قوة رسمية من الشرطة إلى عنوان منزل خالد وإحضاره من منزله بعد إظهار أمر القبض والأحكام التي تدعي الداخلية أنها صادرة ضده.

لماذا لم يتمكن خالد سعيد من ابتلاع لفافة المادة المخدرة التي وجدت في حلقه وتدعي الداخلية أنها تسببت في موته اختناقا: هل يمكن أن يكون السبب أن اللفافة قد وضعت قسرا في حلقه بعد أن مات ففشل في ابتلاعها حيث أن المتوفى، كما يعلم الجميع، غير قادر على البلع؟ هل هذا ما فعلته الداخلية في العشر دقائق التي أخذت فيها جثة خالد بعيدا عن مدخل العمارة التي ضرب حتى الموت أمامها؟ وكيف تمكن خالد وحلقه مسدود بلفافة مخدر أن يصرخ استنجادا “هأموت” على حين كان المخبران يدقان رأسه في رخام السلم؟

وأسئلة أخرى:

ماذا كان رئيس مباحث قسم سيدي جابر ومدير مباحث مديرية الإسكندرية يفعلان في النيابة بالأمس، يدخلان ويخرجان من مكتب وكيل النيابة ثم مدير النيابة على حين وقف أحد شهود الإثبات أربع ساعات متواصلة أمام باب النيابة ينتظر أن تسمع أقواله دون جدوى لأن وكل النيابة “مش فاضي”؟

بأي مؤهل يدعي وكيل النيابة، وهو خريج القانون ولم يمر يوما على كلية الطب، بأن ما بخالد من كسور وتشويه هو نتيجة التشريح؟ ما الذي كانت مصلحة الطب الشرعي تبحث عنه واستدعى كسر الجمجمة وخلع الفك ونزف الدماء، التي لا تسيل سوى والإنسان على قيد الحياة. هل كانوا يبحثون عن اللفافة في جمجمته رغم ادعاء الداخلية بأنها قد انحشرت في القصبة الهوائية؟

لماذا اصدر النائب العام كتابا دوريا يمنع فيه المحامين من تصوير ملف القضية؟

وكيف تشير النيابة والداخلية إلى تقرير طب شرعي لم يصدر بعد ولم يجده المحامون في الملف أثناء اطلاعهم عليه؟

يؤكد بيان الداخلية على “التزام أجهزة الشرطة بالقانون وبمبادئ حقوق الإنسان في إطار سياسة الدولة” .. ونحن نؤكد أننا ملتزمين بتغيير سياسة الدولة التي رفضت أمام المجلس الدولي لحقوق الإنسان أن تصدق على البروتوكول الاختياري لاتفاقية مناهضة التعذيب الذي يسمح بالتفتيش على أماكن الاحتجاز,, ورفضت قبول آلية الشكاوى الفردية في قضايا التعذيب اطمئنانا منها إلى أداء النيابة العامة الذي يحرص على حماية الجلادين.

يقول بيان الداخلية “أنه لا تراجع مهما تمادت الادعاءات” ونحن نقول أننا أيضا لن نتراجع مهما تماديتم في الكذب والترهيب.. سنستمر في الكشف عن جرائم التعذيب.. والبحث عن الضحايا.. وتقديم الدعم القانوني والنفسي والإعلامي وكافة أشكال الدعم إلى أن يمثل الجلادون أمام المحاكم وتأخذ العدالة مجراها.. طالما لم تعتذروا.. طالما لن تتنحوا.. طالما لم تتوقفوا عن ممارسة التعذيب.. طالما لم تحاكموا.. لن نتوقف نحن عن ملاحقتكم

مركز النديم للعلاج والتأهيل النفسي لضحايا العنف

[لولا]

عن نفسي تألمت لما حدث لخالد الله يرحمه ويرحمنا جميعا .. عن نفسي برضه مجرد ماحس ان في ايدي شيء اعمله لقضيته مش هتردد اني اعمله بس اكون واثقة انه هيفيد بجد مش مجرد كلام .. وعن نفسي برضه لو المظاهره بتاعت خالد مشيت تحت بيتنا مش هنزل امشي فيها تماما كما فعلت في مظاهرة العدس الي مشتركتش فيها ..

مش كل الناس يالولا ينفع تمشي في مظاهرات كذلك مش كل القضايا حلها المظاهرات .

ميرسي يا ضحى على كلامك .. مش عارفه ليه متوقعه انه ممكن يزعلنى ..هو لو زعلنى ابقى عايشه فى صورة وهميه غير موتبطه بالواقع

كل البوينت يا ضحى انى عايزه اركز فى الوقت ده على حاجه عمرها ما خدت حقها من التركيز والإهتمام زى ما المساحات الشاسعه بتتفرد عشان نقول

احنا غلابه والعيش بقى غالى والسكر مش عارفين نجيبه واللحمه مش بنعرف ندوقها..

الغضب طريقته الوحيده مش المظاهره لكل شخص مش قادر ينزل فيها او خاف ينزل او منعه اى سبب انه ينزل ..لكن اللى نزل دول فعلا امل مصر

دول اللى راجل والنت منهم بألاف مننا ومن كل حد باع القضيه ومنزلش من غير اى سبب لكن عموما ..

وانا قلت كتير كتير كتير هنا لو حد كان بيركز كل واحد يشوف ممكن يقدم ايه يقدمه

كل واحد يعبر عن غضبه بحدود المتاح ليه حاليا.

لما ابقى فى ملتقى ثقافى فيه مثقفين مصر وناس متعلمه زى هنا وبتقضى وقت كبير جدا جدا جدا على النت يبقى انا متوقعه ان يحصل وعى بأهميه النت

بأهميه دور كل ناشط عن طريق النت بيقدم شيء

اضعف الإيمان ان ابص حوليا الاقى ناس اشتركت فى طلب تغير الدستور

ناس دخلت صفحه البرادعى

ناس بتبعت وقائع حوادث زى دى حقوق الإنسان مثلا وتشترك فى جروبات النشطاء وده مش بياخد اى وقت يذكر قصاد الوقت الرهيب اللى الكل بيصرفه فى قعدته على النت

ولما الكل هيعمل اللى عارف انه ممكن يعمله ايا كانت الطريقه وايا كان الشيء اللى بيقدمه صغير جداااااااااااااااااااااااااااااااا

ممكن فى يوم نبص نلاقى حاجه بتتغير.. ومش لازم اليوم ده يكون بكره ولا الأسبوع الجاى ولا السنه الجايه لكن هو دور ومسؤليه مفروض الكل يساهم فيها

ده ابسط شيء على الأقل ..على الأقل لملاين ..ملاين من المغتربين ..

ان حد يشوف ده كلام فاضى او شيء هايف تافه هو حر لكن انا مش شايفه كده وعندى ايمان لا يمكن يهزه جبل ان ده اقل شيء مفروض يتقدم وانه بشكل او بآخر مؤثر

ولو دخلتى وقريتى فى صفحه البرادعى هتلاقيه بيأكد على كده وعلى ان المهم تبقى ايجابى..

شوف ممكن تعمل ايه .. الإيجابيه ممكن تكون حتى فى انك تمتنع عن المشاركه فى الإنتخابات.. تخيلى لما يبقى الإمتناع فعل .. صوت بتعبر بيه عن الرفض

تفتكرى ايه احسن افكر كده واجرب اعمل حاجه ولا ابطل افكر وابطل اعمل عشان فعلا مفيش فايده .

تحياتى ضحى :wub:

لولا

[محمد عبدالعزيز]

على فكرة...

البنات اللى فى الصورة محشورين فى وسط زمايلهم ووسط عساكر الأمن المركزى مش هما اللى راحوا حشروا نفسهم فى المنطقة الضيقة دى عشان يتم هتك عرضهم, وزمايلهم الشباب مش محاوطين عليهم كده عشان يحتكوا بيهم أو يهتكوا عرضهم.

الحكاية كلها إن دى طريقة معروفة للأمن فى تفريق المظاهرات اللى عددها قليل بالشكل ده, وبيسموها عملية العصر, وهى إنهم يحاوطوا المتظاهرين بالعساكر فى شكل حلقة, والحلقة تفضل تضيق تضيق تضيق, لحد ما المتظاهرين يبقوا مش قادرين ياخدوا نفسهم ويستسلموا, وفى الحالة دى الأمن شترط عليهم يخرجوا فى طابور واحد ورا واحد, ويفتح لهم فتحة فى الحلقة ماتخرجش غير واحد بس, وبالتالى يبقى سهل عليهم يقبضوا على المتظاهرين من غير ما يجروا وراهم ويدوخوهم هنا وهناك.

شفتوا الأمن بتاعنا ذكى إزاى؟

[مغتربة]

على مدار عشرين صفحه هى حجم الموضوع لغايه دلوقتى

اتكرر كلام عن ان يعنى هى المظاهرات هتعمل ايه و لا لما اشارك فى جروب او اصرخ على الانترنت دا يعنى هيفرق فيه و لا يعنى لما اكون متاكده ميه فى الميه من الى بعمله هيجيب نتيجه ابقى اعمله و ..............و.................

ليه كلنا مش واخدين بالنا من حاجه

و هى ان لولا الجهود الفرديه بتاعتنا دى و على قلتها كان الموضوع و عفوا فى اللفظ اطرمخ عليه من ساعتها

لو مكانش العشرات الى اتظاهروا يوم الحادثه بليل و لا الشخص الى فتح الجروب على الفيس بوك

كان ممكن ما يوصلناش الموضوع اساسا

لولا الصوره الى اتخدت لخالد بعد الوفاه كان ممكن كتير منا يصدق روايه الداخليه او حتى لو كذبها هيكون عارف انه معندوش دليل يكذب بيه

يا ساده الجهود ديه و الى كلنا اشتركنا فيها و لو بقلتها المظاهرات الى خرجت و لا على ضعف عدد المشاركين مجرد فقط انتسابنا لصفحه خالد على الفيس بوك

مجرد تناقلنا لاخبار الموضوع اول باول و تعريف الناس بيه

شكل قوه راى عام ضاغط و محرك للموضوع

و الى يفتكر غير كده يبقى غلطان

اضطرار الداخليه نفسها باخراج بيان حتى و ان كانت فبركته رديئه بيبن ان كل الجهود الفرديه دى بتجيب نتيجه

تحويل التحقيق من نيابه الاسكندريه كمان نتيجه لهذا الضغط

احنا الى عملنا الضغط دا بفرديتنا و قله خبرتنا و عدم تناسق جهودنا و قلتها

فما بالك لو كل دا اتغير

واتعلمنا ننظم نفسنا اكتر و نشارك اكتر و مانخفش

تحيه لكل واحد شارك فى تكوين قوه الراى العام الضاغطه دى حتى و لو بمجرد الانتساب للجروب

علشان كده متستصغرش اى نشاط تقوم بيه و لا اى راى تدلى بيه

صدقونى هما الى دلوقتى مرعوبين بيحاولوا يدورا لنفسهم عن مخرج من المازق دا

يمكن جهودنا تنجح لاخر مرحله و نعرف نجيب حقه

و يمكن لا

بس اكيد الموضوع علمنا اد ايه اننا لما بس نصرخ دا بيربك حسابتهم

و ان الموضوع مبيكنش بالسهوله الى هما متصورنها

متستقلش باى خطوه و تقول يعنى هتعمل ايه

لان الحادث اماممنا انها فعلا عملت

و حتى لو موصلتناش للنتيجه النهائيه الى عيزنها

فى برضه اتحركت بينا بعيد عن تسهيل المهمه على زبانيتهم

[tarek nokia]

http://www.youtube.com/watch?v=QmWS7XxLxe0...feature=related

الي بيحصل في مصر ده طبيعي

[بركة]

" وَكَتَبْنَا عَلَيْهِمْ فِيهَا أَنَّ النَّفْسَ بِالنَّفْسِ وَالْعَيْنَ بِالْعَيْنِ وَالْأَنْفَ بِالْأَنْفِ وَالْأُذُنَ بِالْأُذُنِ وَالسِّنَّ بِالسِّنِّ

وَالْجُرُوحَ قِصَاصٌ فَمَنْ تَصَدَّقَ بِهِ فَهُوَ كَفَّارَةٌ لَهُ وَمَنْ لَمْ يَحْكُمْ بِمَا أَنْزَلَ اللَّهُ فَأُولَئِكَ هُمُ الظَّالِمُونَ" [المائدة:45].