خالد محمد سعيد "شهيد الطوارئ

[لولا]

كتبت ام على الفيس بوك ..

القصيدة مهداه لابني ولكل ام بتكلم ابنها ...

اوعى يا بني لما هتكبر

تبقى ف دول تلبس بدلة

اشوفك بكرة عايش الدور

...تضرب دولا وتضرب دول

اوعاك يابني القاك مرة

ماشي ف حالك ولا ف مرة

مطاطي دماغك للي ف بالك

اوعاك يابني تقول يا سكوت

او ف الدنيا قليل الصوت

اصرخ يابني وفك الطوق

قبل ما يجي عليك الدور

اوعاك يابني حرص منهم

اعلي مافيهم اغبي ما بينهم

خلص تارك افتح نارك

خاف على حقك اوعى تجور

قبل ما يجي عليك الدور

[Ahmed Anwer]

أول خبر عن نتيجة تقرير الطب الشرعي الجديد

تقرير الطب الشرعي يؤكد موت خالد نتيجة كسر في الجمجمة من الضرب

13

06

2010

حصلنا من مصار خاصةعلى تقرير الطب الشرعي لحالةخالد سعيد الذي تم قتله بان موته كان نتيجة ضرب وكسر في الجمجمة كما عرفنا منمصادر موثوق بها ان التقرير الاول كان تقرير الاسعاف في الاسكندرية وقد حصلت شباب 6 ابريل على صورة من ذلك التقرير

وذلك بعد ان كشف ادعاءات الداخلية بشان تهرب خالد سعيد رحمه الله من الخدمة العسكرية وذلك بحصولناعلى صورة شهادة نهاية الخدمة العسكرية له

المصدر

http://shabab6april.wordpress.com/2010/06/...C%D8%A9-%D9%83/

__________________

[لولا]

فيديو من وقفة الاسكندرية...

http://qik.com/video/7812866

[لولا]

أول خبر عن نتيجة تقرير الطب الشرعي الجديد

تقرير الطب الشرعي يؤكد موت خالد نتيجة كسر في الجمجمة من الضرب

13

06

2010

حصلنا من مصار خاصةعلى تقرير الطب الشرعي لحالةخالد سعيد الذي تم قتله بان موته كان نتيجة ضرب وكسر في الجمجمة كما عرفنا منمصادر موثوق بها ان التقرير الاول كان تقرير الاسعاف في الاسكندرية وقد حصلت شباب 6 ابريل على صورة من ذلك التقرير

وذلك بعد ان كشف ادعاءات الداخلية بشان تهرب خالد سعيد رحمه الله من الخدمة العسكرية وذلك بحصولناعلى صورة شهادة نهاية الخدمة العسكرية له

المصدر

http://shabab6april.wordpress.com/2010/06/...C%D8%A9-%D9%83/

__________________

:rolleyes:

[لولا]

فيديو من وقفة الاسكندرية...

http://qik.com/video/7812866

مظاهره رااااااااااااااااااااااااائعه بحق ..

هؤلاء هم فعلا اهالى الإسكندرية الذين لن يدعوا دم ابنهم وابن مصر يضيع هباء .. ولن يرتضوا المهانه والذل بعد الآن..

مات خالد .. لكن موته ايقظ الكثيرووووووووووووون من غفلتهم ..

ارجوكم استمعوا للهتافات جيدا..

اسمعوها بقلوبكم لأنها ستنتفض معهم ..

اللهم اغفر له وارحمه .

[لولا]

هذا المقال ربما يكون مفيد لهؤلاء الذين يسخرون من دور النشطاء والمشاركين على النت بكافه الوسائل والإستخفاف بدوره فى تحويل القضايا لقضايا رأى عام

وكشف الكثير من مستور الفساد.

مع تمنياتى لهم بصحوة قريبه لفهم متغيرات العصر ومواكبتها !

--------------------------------------------------------------------------------

درس خالد سعيد...!

بقلم أحمد الصاوى ١٦/ ٦/ ٢٠١٠

عندما تنظر بعمق إلى قضية مصرع الشاب السكندرى خالد سعيد، ستجد عدة مستجدات تتكرس لتصنع ما يمكن أن تسميه توازن القوى بين أجهزة الأمن وبين الشارع.

دعك من الاتهامات المتبادلة بين الجانبين.. طرف رسمى يركز على اغتيال سمعة القتيل ونفى التهمة عن رجاله، وطرف شعبى يسعى حثيثاً لتوثيق الجريمة بشهودها ورواياتها المعلنة، ويمارس ضغوطاً واضحة للحصول على ضمانات فى التحقيقات التى تجريها النيابة العامة، تحققت بإحالة القضية لنيابة جديدة غير تلك التى عاينت جثة القتيل فى البداية، إلى جانب قرار النائب العام بإعادة استخراج الجثة وتشريحها لبيان سبب الوفاة والإصابات فى جسد ووجه الضحية.

ما يحدث هو توازن فى القوى، فإذا كانت أجهزة الأمن، بكل جبروتها وصلاحياتها، تملك النفاذ إلى كل الشىء، وتملك دفاتر الأحوال، ومحاضر التحريات، وكمبيوتر المسجلين والمطلوبين والمتهمين، وإدارات الأحوال المدنية بما يجعلها تعرف كل كبيرة وصغيرة عن كل مواطن فى مصر، وتملك القوة والزنازين وقوانين الاشتباه، لإرهاب الشهود والضغط على الجميع، فإن الشارع اليوم أصبح يمتلك «تويتر» و«فيس بوك» كما امتلك المدونات وأجهزة المحمول وكاميراتها من قبل، واستخدمها فى فضح جرائم التعذيب فى أماكن الاحتجاز، التى نجحت فى الوصول بضباط إلى قفص الاتهام وختم ملفات خدمتهم بأحكام الإدانة.

ما فعله النشطاء وأصدقاء خالد، خلال الأيام الماضية، هو محاولة ناجحة جداً لإحداث توازن فى القوى، وقدر كبير جداً من الندية فى المواجهة مع المؤسسة الأمنية بكل جبروتها، خاصة أنك تعرف أن الشرطة تتمسك بالدفاع عن رجالها حتى الرمق الأخير، أو على الأقل حتى اللحظة التى لا ينفع معها، قانوناً، الاستمرار فى الدفاع عنه.

هذا درس واضح لابد أن تفهمه المؤسسة الأمنية قبل غيرها، حتى لو أظهرت التحقيقات الجارية، بإشراف النائب العام حالياً، براءتها الكاملة من دم خالد سعيد، ولو كنت مسؤولاً أمنياً لرفعت لرؤسائى ما يفيد هذا المعنى، وما يرصد ما جرى، وما يشجع على انتهاج سياسة جديدة فى مواجهة مثل هذه الأحداث، تجعل الداخلية دائماً تمتلك الخطوة الأولى، وبدلاً من أن تخرج ببيان بعد ثلاثة أيام من الحادث لتقول إن القتيل له سجل إجرامى كبير، تتحرك فوراً، وبعد لحظات من إبلاغها بالواقعة، لتعلن وقف رجالها المتهمين فوراً عن العمل، حتى لا يستخدموا نفوذهم فى التأثير على مسار القضية، وتكليف لجنة للتحقيق الداخلى، إلى جانب تحقيقات النيابة.

البيان الأول للداخلية لابد أن يتضمن انزعاجاً مما حدث، وتأكيداً على أن القانون سيأخذ مجراه، وعزاءً واضحاً لأسرة المرحوم، دون انحياز مسبق لرجالها، واتهام جاهز للضحية، وكما تطالبك الداخلية وتطالب الجميع بانتظار نتائج التحقيقات النهائية، لابد أن تنتظر هى الأخرى نتائج هذه التحقيقات قبل أن تقطع بأن رجالها أبرياء، وأن الضحية مجرم ومنتحر، ولن يضيرها شىء لو قالت إن رجالى متهمون يخضعون للتحقيق وأثق فى براءتهم.

لم يعد هذا زمن إخفاء المعلومات والحقائق، أو ترهيب الخصوم وتوعدهم، فكما تمتلك الرصاص والعصى الكهربية والغازات المسيلة للدموع، يمتلك الآخرون حسابات «تويتر» و«فيس بوك»، وكما تتساهل فى تلويث سمعة الخصوم، انظر إلى ما فعلته «الإنترنت» بسمعتك ومصداقيتك واعتبارك...!

[لولا]

لو كان خالد ابن وزير كانت فيها رقاب هتطير !!

اهل اسكندريه .. فعلا فعلا مظاهره مهوله مهوله..

انا بشوفها وحاسه برهبه رهيبه امال كم الأمن اللى كان هناك والضباط كان حاسس بإيه وكل الغضب الشعبى المهول جدا ده ضده !

شيء بجد مرعب ..

الهتافات كانت بتعبر عن اشد مراحل الغضب للشعب ..بجد عمرى ما سمعت هتافات بالشكل ده .

http://qik.com/video/7812866

لولا

[لولا]

لسه محدش عرف الحكايه ..لسه الحكايه مش مهمه قوى ؟؟

الحكايه كان اسمها "خالد " ..

وخالد ده هو انا..

هو انت..

هو اى حد فينا..

ببساطه كان ممكن تكون مكانه.. لما يسود قانون الغاب خليك واثق انك فى اى لحظة ممكن تكون خالد جاى فى السكه ..

---------------------

مظاهره الإسكندريه اليوم

كان اجمل ما تم الهتاف به .. لو مش عايزين تحترموا نفسكم خليكم عارفين اننا هتقتص منكم من اول حبيب العدلى لأصغر عسكرى !!

خالد محمد سعيد

شاب مصري في ال28 من عمره

شاب عادي وبسيط زيه زي اغلب المصريين .. شاب في حاله ومش بتاع سياسه ولا هو معارض ولا حتى حزب وطني ،، شاب ماشي جنب الحيط بالأصح

في يوم خالد كان نازل سايبر النت اللي قصاد بيتهم في منطقة سيدي جابر – محافظة الاسكندريه

ويادوبك دخل السايبر ودخل وراه اتنين مخبرين كتفوه من ورا ونزلوا ضرب فيه وتخبيط في دماغه .. راح صاحب السايبر افتكرهم جايين يقبضوا عليه لأي سبب فخرجهم من السايبر ،، راحوا ساحبين خالد لمدخل العماره اللي قصاد السايبر ولأكتر من 20 دقيقه نزلوا ضرب فيه بالشلاليت والأقلام لغاية لما اغمى عليه .. وبعدين واحد فيهم مسك دماغ خالد ونزل رزع فيها في سلام العماره الرخام والدرابزين لغاية لما اتهشمت تماما

وراحوا شايلين خالد – زي الدبيحه – ولا حول ولا قوة الا بالله وراحوا رموه في البوكس وطلعوا بيه على قسم الشرطه وسط ذهول ورعب من المواطنين اللي شافوا الجريمه البشعه دي وماقدروش ينجدوه حتى ..

وبعد ما يقرب من 8 لـ 10 دقايق رجع البوكس ورموا جثة خالد في مدخل العماره ..

جات عربية اسعاف ماحدش يعرف مين اللي جابها وأمُر المسعفين بكتابة تقرير ان خالد مات مختنقا نتيجه ابتلاعه للفافتين حشيش وقفوا في قصبته الهوائيه ..

وجاء رجالات مباحث قسم شرطة سيدي بشر الى المنطقه ليس من أجل التحقيق وانما من اجل ممارسة كل انواع الضغط والارهاب على شهود الواقعه وأهل المنطقه لثنيهم عن الشهاده على الواقعه ..

[pink rose]

ما شاء الله دا شارع بورسعيد مقفول خالص

الله ينور عليهم و الله

ربنا يحفظهم كلهم و يبارك فيهم

[Howayda Ismail]

لعل يكون حادث خالد أخر مسمار يدق فى نعش الداخلية والمضاهرات دى نتيجة تراكمات الناس فى اسكندرية بتتكلم فى كل مكان

فى الشوارع ووسائل الموصلات الشارع السكنرى بيغلى بسبب الحضّانة (سجن المحافظة الخصوصى لسيارات الاهالى بالجور

طبعا)وعلى فكرة اسكندرية المحافظة الوحيدة اللى فيها الاختراع ده .

الناس ملحقتش تنسى الضابط اللى ولع فى شاب صاحب تك تك عليه اقساط فى الشارع امام الناس وادعى ان الولد ولع فى نفسه

وماتت القضية انزلوا اسكندرية وشوفوا شرطة المرافق عاملة ايه فى الغلابة سرقة علنى لبضاعة الاف البسطاء بحجة اشغال

طريق( ملابس واطعمة ومفروشات وغيرو وغيره) فى حين القهاوى فارشين عرض الرصيف يجبرك تنزل بابنك تحت الرصيف

وسط السيارات مين اولى انه يخلى الطريق دول ولا السريحة الغلابة .

ومع ان بتوع المخدرات منتشرين فى كل مكان ومعروفين للضباط قبل المخبرين لكن لايجرؤ احد منهم التعرض لهم

مش بيتعرضوا الا للغلابة اللى عاوزين ياكلوا عيش واللى يقع تحت ايدهم تبقى سنته سودة بيضرب فى الشاع قبل مايختفوا به

المرجل لما يغلى ومافيش منفس بينفجر وده اللى حصل اسكندرية

[لولا]

ما شاء الله دا شارع بورسعيد مقفول خالص

الله ينور عليهم و الله

ربنا يحفظهم كلهم و يبارك فيهم

الأعداد فعلا كانت مهوله جدا لدرجه انها سدت كل الشارع والمنافذ..

فى رساله النهارده وصلت كويس قوى قوى يا ريمو ..

رساله بتقول ان الشعب مش هيرضى بغير العدل.. العدل ثم العدل ثم العدل..

الشعب مش هيتفرج على ولاده بيتقتلوا ويتسحلو ويترمو زى الكلاب وتطلع الدخليه تدافع عنهم وتحميهم فى سيناريو شديد الإستفزاز وغبى

ولا يصدقه طفل فى الخامسه..

الشعب فاهم وعارف انه ليه حقوق والحقوق دى مش هيسكت ان حد ينتهكها بعد كده

الشعب فاهم ان مش منحق حد ايا كان انه يعامله كأنه كلب لمجرد انه بينتمى لجهاز فاسد بدل ما يقوم بدوره الحقيقى شغال بلطجه فى الناس

الشعب مش هيسكت على الظلم اللى حصل

الشعب محدش يقدر يسكته

الشغب خلاص خليتوه يوصل لآخره فعلا .. الشعب خلاص وصل لآخره منكم وكل واحد يحترم نفسه بقى!

المظاهره دى كانت رساله.. والرساله دى وصلت بنجاح..

واى تجاهل مستقبلى للرساله حتى لو اعتقد اى كان انه لا امل هيفضل فى امل والشعب هو اللى هيفرض احترامه فى النهايه طول ما هو مؤمن بحقوقه

الآدميه الإنسانيه على ارض مصر وحقوقه كمواطن مصرى يضمنها له الدستور وينتهكها كلاب النظام بأستخدام قانون الطوارىء الهمجى اللى بيستخبوا وراه..

صدقينى يا ريمو فى امل طول ما فى ايمان ..

طول ما احنا بنرفض الذل والخضوع والخنوع ونبطل خوف .

صوت الحق مش مفروض ابدا يخاف

الحق مش لازم يخاف.

لولا

[Howayda Ismail]

فى برنامج سيذاع الساعة الثامنة او الثامنة والنصف على قناة الجزيرة يوم السبت القادم عن مماراسات الشرطة المصرية والخلل الموجود فى وزارة الداخلية المصرية ياريت تشوفوه مدعم بافلام عن التجاوزات

[herohero]

ربنا يسهل مايكونش برنامج بتاع هويدا طه "وراء الشمس " ده عمل مشكلة زمان وبصراحه برنامج يخليك تزهق من تجاوزات الشرطة المصرية

عارفين معرفش ليه كده الموقف ده ، واللي بيحصل من الشرطة خلاني افترك اغنية تتر المقدمة بتاع مسلسل العائلة ان بجد عاوزين نترمي ف حضن بلدنا وتضمنا لها لاننا زعلنا وتعبنا قوي من عيالها اللي ظلمونا

تتر مسلسل العائلة

[om marawan]

شوفتوا القاهرة اليوم امبارح؟؟

عمر اديب سأل الناس عالتليفون لو بيان الداخلية طلع صحيح هتصدق ولا مش هتصدق؟؟ معظم الناس قالت مش هنصدق الداخلية حتى لو شرحه الجثة عالهوا ادا عينينا وناس قالت والقليل جداااا اللى قال مصدقين الداخلية

اتفرجوا عاليوتيوب.....فعلا والله وطن بلا ثقة

أنا اثق فى نزاهة النائب العام واثق فى نتيجة التحقيقات أيا كان ماتصدر عنه

ليس بالضرورة انه تكون كما ذكرها شباب الفيس بوك ولكن الاهم ان تكون الحقيقة

اثق ان النائب العام لن ينكر كما جاء فى التحقيقات الاولية تعرض خالد رحمه الله للضرب المبرح حتى وان لم يكن سببا فى وفاته

أثق ايضا فى ان الفساد يمكن ان يصل الى " بعض " عناصر الشرطة وليس الجميع أثق فى ان منهم الكثرين من يخاطرون بحياتهم من اجل الامن

ياتوتة انا اعرف اتنين اتقتلوا فى مطاردات من اللصوص

واحد منهم لا تتخيلى كان زهرة شباب عيلته فعلا ومات فى تانى عملية طلعها

ممكن تقوليلى بقا احساس امه ايه وهى بتسمع كلام الناس اللى بتقول بتوع شرطة فاشلين ومعقدين نفسيا

والتانى اتقتل مع الظباط اللى بعض الزملا بيفخروا جدا ان ارهاب الصعيد و تجار السلاح والمهربين هناك هم اللى قتلوه

مش عاوزة اتطرق لقصة القتل اللى كانت فى الصعيد واللى فيه ناس فخورة اوى بيها

يعنى بجد حرام والله

الواحد مش عارف يقول ايه على الكلام المرسل اللى بيتقال ده

دول كمان كانوا ولاد ناس اتعلموا واتخرجوا وطلعوا فى دوريات لمطاردة حرامية بيهددوا الناس بقتل او بسرقة او بلطجة عشان يكون مصيرهم رصاصة فى قلب كل منهم وكمان افترا على الجهاز كله

انا عارقة ومقدر ان الناس موجوعة على اللى حصل لخالد الله يرحمه وان فاجئتهم الصورة اللى يعنى لو دققوا شوية هيشوفوا ان اللى ضحكوا علينا هم اللى نشروا الصورة مش الداخلية واللى تعمدوا يخبوا انها صورة مابعد التشريح على الرغم من ان خياطة التشريح واضحة جداا

وهاقول تانى معلش عشان ماحدش يفهم من كلامى ان اللى فى وشه ده اثر تشريح بس لكن برضه فيه تضليل متعمد

زى كده ما حاولوا يقنعونا انه قضا الخدمة العسكرية

مع ان اى حد دخل الجيش او حتى له معرفة راح الجيش عارف ان مافيش حاجة اسمها حد ياخد رفت وشهادة رديئة الا فى حالتين

اما انه اتهرب من اكمال الخدمة وصدر ضده حكم

واما انه سلوكه فى الجيش كان سلوك اشقياء

فاذا كنا مقتنعين ان خالد رحمه الله لا اتهرب ولا خالف مخالفات جسيمة ولا تعاطى بانجو امال اخد رفت ليه

ماهو يعنى نفكر شوية انه مش ممكن ""الجيش والقضاء العسكرى "" اللى هو مالوش دعوة بالشرطة ولا حتى بالنيابة - اللى هى برضه غير الشرطة - ادوه الشهادة دى اللى بالمناسبة كانت فى بيت والدته يعنى عشان ماحدش يقول ان دى كمان العسركية ضربتها

ارجوكم ارجعوا لمداخلة استاذ Mohammed فى الموضوع ده عشان بس يبقا فيه ولو ذرة ثقة فى البيانات اللى بتصدر

ياجماعة ياللى خايفين تيجوا مصر انا سبت مصر من سنتين تلاتة و اخواتى هناك وعشت فيها 33 سنة وكل قرايبى فى مصر ماحدش مهدد ولا حد كان جنب الحيط منهم على الاقل والشرطة اخدته

المخالفات اللى انتو شفتوها دى اصحابها اخدوا جزاءهم وماينفعش املى بيها دماغى ودماغ اولادى واعتقد انها امر واقع ولا متعارف عليه وياريت اللى يعرف حد قريبه او يعرفه بشكل شخصى يعنى مش خبر فى جرنال حصل له حاجة من دى يقول لنا

محتاجين نرجع نثق فى بلدنا تانى مهما كنا شايفين فساد

محتاجين نشوف فيها لسه خير والا على الدنيا السلام وهنسمع كل يوم زى ماقلت كره اكتر وعدم ولاء اكتر لغاية مانصحا نلاقى ولادنا بقوا جواسيس عليها وذنبهم فى رقبتنا

هل عندك أمل فى تقرير الطب الشرعى؟؟

متوقعين ايه؟؟ هيبقى تقرير نزيه وهيقول الحقيقة ولا هيطرمخ عالموضوع وخلاص؟؟؟

الاول محتاجين نسأل نفسنا ايه هو التقرير النزيه اللى هيقول اللى احنا مستنيينه وخلاص ولا اللى فعلا هيقول الحقيقة مهما كانت فى صف مين ؟؟؟؟؟

مفروض تبقى فيه ثقه طبعا فى اللجنه الثلاثيه اللى طلعت من القاهره لإعاده التشريح وكتابه التقرير..

لكن ..

تخيلى .. انا مش واثقه فى حد فى القضيه دى لأن فيها فساد كبير جدا جدا وتصريحات فجه متناقضه ركيكه كلها ثغرات واكاذيب من الداخليه توجد ادله علي كذبها زى مسأله التجنيد دى

ده بيان صدر من الداخليه يا ناس كدب شوفى الداخليه ممكن تعمل ايه عشان متطلعش كدابه..

انا اسفة يالولا اقولك ان الفساد مش كبير زى مانتى متخيلة وانه على الاقل لا يصل ابدا الى النائب العام اللى مش هيشوه اسمه عشان حتة اتنين مخبرين وكام ظابط

وعشان اوضح حاجة يمكن تطمنك شوية

النائب العام والنيابة اللى بتحقق فى القضية لا يشينهم ولا يضرهم فى شىء انها تكدب بيان الداخلية

بالعكس اى تجاوزات فى البيان هيتم كشفها لانها زى ماتقولى كده نقطة لصالح نزاهة النائب العام

لو الفساد زى مانتى متخيلة ماكنتش لا انا ولا انتى ولا الشباب اللى على الفيس بوك دول هيتكلموا بحرية كده

وانا اسفة اقولك برضه انى لو فقدت الثقة فى حد فهيكونوا هم اللى عملوا صفحة خالد رحمه الله على الفيس بوك لانهم ضروه اكتر

ضروه لما قالوا انه كان ماشى جنب الحيط وان اللى حصل كان تفتيش روتينى ولما هو اعترض ضربوه ودى كانت اول كدبة قالوها

لانه ثبت انه عليه حكم قضائى وعشان برضه اوضح :

حكم قضائى ده يعنى قضية اترفعت و محامى ونيابة وقاضى كل دول مر عليهم القضية لحد ما اخدت حكم يعنى حاجة ماينفعش تتلفق وارجوكم ماحدش يقولى لاء ممكن لانهم من الاخر لو الفساد زى ماتنوا متخيلين ابسط حاجة يحدفوه على امن الدولة

وضروه لما قالو انه خلص الجيش ومن فضلك ارجعى لمداخلة الفاضل Mohammed هتوضح لحضرتك هو ليه شهادته مكتوب فيها انهاء خدمته بقرار من لجنة الرفت العسكرية

وضروه لما أوردوا نسخة من التقرير الطبى واستغلوا ان الخط وحش وان الناس مش هتقرا وكتبوا تحت الصورة ان التقرير فيه تحطم الجمجمة والفك واللى الحقيقة مش وارد فى التقرير حاجة عنهم يعنى كانوا قالوا ان التقرير لم يذكر ذلك وانه تقرير مزور كنت وثقت فيهم لكن هم زى مابيقولوا دلوقتى وبينشروا ان نتايج التقرير الجديد فيها تحطم فى الجمجمة

والحقيقة انا مش قادرة استوعب ازاى عرفوا كده والتشريح النهائى مابدأش اصلا واذا كان بدأ فاعتقد انه من السرية اللى مش من المفروض انها توصلهم بالسرعة دى !!!!!!!!1 مش غريبة شوية

لكن عارفة ليه بيعملوا كده ؟؟؟؟؟؟

عشان لو حصل وفى حالة مااثبت التقير الاخير الوفاة بسبب اسفكسيا الخنق وان الاصابات اللى حدثت لما تكن هى سبب الوفاة فيكونوا هم سبقوا باثارة الشك فى نفوس الناس

ربنا وحده اللى أعلم هم بيعملوا كده بقصد او بدون

يمكن تخيلوا ان الافضل رسم الصورة بهذا الشكل عشان تعاطف الناس ولو كانوا قالوا الحقيقة كانت الناس برضه كانت فى صف خالد الله يرحمه لانه مهما كان لا يمكن السكوت على التعدى عليه بهذا الشكل

لكن الاهم اننا محتاجين نراجع اللى بيتقال من كل المصادر لانه الى الان ماحدش منهم صادق مية فى المية وفى كل اللى قاله

الى الان الجانب الجدير بالثقة هو النائب العام

فى الاخر كل اللى باقوله ده مالوش اى علاقة بالقضية نفسها قد ما له دعوة بقضية الثقة المطروحة

ملحوظة اخيرة على تعليق لعزيزتى مغتربة اللى قالت ازاى ممكن اى واحد " ومش هاقول خالد رحمه الله " ازاى يفكر يبلع كيس البانجو او الحشيش ومايرمهوش

مبدئيا ده زى ماتقولى كده عرف عندهم لانه لو رمى الكيس فى اى حتة الشرطة هتدور عليه وتجيبه

فقدامه حاجة من اتنين اما انه يشيل الكيس ويبلعه ودى ماتنفعش طبعا لانه ممكن يتسمم وبالمناسبة دى حصلت لبعضهم

او انه يبلعه زى ماهو ومن المستحيل على فكرة انه النيابة تحوله لمستشفى عشان تفتح بطنه وتطلعه فاحل اللى قدامه انه يبلعه ومش هيعرفوا يطولوه منه والا يتمسسك بيه وياخد قضية بقا كام سنة سجن

[pink rose]

فى برنامج سيذاع الساعة الثامنة او الثامنة والنصف على قناة الجزيرة يوم السبت القادم عن مماراسات الشرطة المصرية والخلل الموجود فى وزارة الداخلية المصرية ياريت تشوفوه مدعم بافلام عن التجاوزات

الجزيرة الاخبارية و لا الوثائقية؟

[لولا]

العزيزه ام مروان..

تختلف الآراء والأحكام ويظل الإحترام هو ما يجمعنا .

ردى على كل ما ورد فى مداخلتك سيكون مجرد اعاده فقط لما كتب هنا من تفنيد لكل ما ذكرتيه وتم الرد عليه فى مقالات متعدده كثيره وفى تصريحات من اهل المتوفى ومحاميه وشهادات الشهود الحيه والبرامج التلفزيونيه ورد ابراهيم عيسى على مسأله التجنيد .

نقطه واحده فقط لفتت نظرى هى الحديث ان كل ما هو موجود على اليوتيوب من توثيقات للتعذيب والسحق والإنتهاك للأعراض قد تمت محاكمة من قاموا بها ونالوا عقابهم !

لا تعليق .

تحياتى لك

لولا

[Howayda Ismail]

الجزيرة الاخبارية

[fatfouta]

انا فرحانه جدااااااااااا بالمظاهرة بتاعة اسكندرية دى وكان نفسى يبقى فيه واحدة ذيها كده فى القاهرة وكمان فى باقى المحافظات

ربنا يحميكم وينصركم ان شاء الله

تم تعديل 16 يونيو 2010 بواسطة fatfouta

[لولا]

من مظاهره الإسكندريه اليوم 16 يونيو 2010

[لولا]

فتفوته دى تانى مره ننزل نفس الحاجه فى نفس الثانيه :rolleyes: