خالد محمد سعيد "شهيد الطوارئ

[لولا]

اخبار ان مصطفى شربي نائب الوفد ومذيع القاهرة حاضر في بورسعيد

الامن كان بيطلب من الشباب على ٦ اكتوبر يسيبوا الكوبري مفيش اي مشاكل حاصلة وهما فعلا بيمشوا بس ببطء

[لولا]

بقى عملوا مهرجان بسمعات واغانى وصوت عااااالى!

بس برضوا الناس وقفت

فى جيل جديد .. اكيد عنييييد حالف يجيب دم الشهيد

[لولا]

بجد بجد النهارده بداية صحوة حقيقية ضد الظلم والتعذيب وضد الفساد والإفساد ، لما كل شباب مصر يخرجوا عشان خالد سعيد، سواء في وقفة حاشدة أمام المسجد إلي كان بيصلي فيه خالد سعيد ، أو في وقفة صامته علي طول الكورنيش في كل محافظات مصر ومدنها وقراها ، يبقي بجد إحنا قدرنا إننا نغير ما بأنفسنا، ودي بداية تغيير النفس إلي هيتطور إنه يكون تغيير في كل مكان في مصر

[محمد عبدالعزيز]

الحمد لله كان ليا الشرف إنى حضرت الوقفة بتاعة جامع سيدى جابر, وقد إيه حسيت إن الشباب واعى وفاهم هو عاوز إيه بالظبط من اللى بيعمله.

يا جماعة الجيل الجديد ده فيه أمل كبير جداً, الشباب النهارده هما اللى كانوا بيقودوا المسيرة, وهما اللى بيقودوا الهتافات وهما اللى بيوجهوا, وعاملين تنظيم ماشاء الله عليه.

لم يعكر صفو اليوم إلا إطالة الإمام فى الخطبة بصورة مبالغ فيها واعتراض الناس عليه, كان نفسى الناس تصبر لغاية ماينتهى ومش حتفرق يعنى حتى لو نصف ساعة زيادة. ورغم إن كان فى جنازة بعد صلاة الجمعة إلا إن الإمام كان مصمم على إطالة الخطبة بشكل غريب.

فرحت جداً لما شفت كل القيادات اللى كانت مشاركة فى الوقفة وحسيت بأمل كبير جداً فى بكره, وبصراحة الناس دى بتتعب وبتشتغل بجد مش بتهزر, واحنا المفروض نعاونهم بصورة أكبر من كده.

التواجد الأمنى على حسب ما رأيت فى طريقى قبل وبعد الوقفة كان حوالى 50 عربية أمن مركزى, ولم ألاحظ أى اشتباكات مع المتظاهرين, وكان فى تواجد مكثف من الصحفيين والمصورين مصريين وأجانب.

فى نهاية الوقفة فى محامى من مركز النديم قال إن فى أخبار كويسة, وهى إن تقرير الطب الشرعى استشارى, يعنى ممكن وكيل النيابة ياخد بيه أو لا, وإن فى 13 شاهد عيان أكدوا إن خالد مات من التعذيب, غير إن شهادات أفراد الشرطة اللى تم استجوابهم فيها تناقضات تثبت عدم صحة تقرير الطب الشرعى.

دعوة لكل من يستطيع أن يشارك فى أى فاعلية إنه يشارك, عشان مصر ترجع لينا تانى.

[لولا]

من وقفه القاهرة اليوم ..

هما دول فعلا امل مصر

هما ول اللى مصر هتتغير بيهم ..بعزمهم.. بارادتهم..باتحادهم

وبصوتهم..

دول اللى مش هيسكتوا تانى

ومحدش هيعيش تانى حنب الحيط

دول اللى مات خالد وصحاهم

دول اللى قرروا ينزلوا ويبطلوا سلبيه وتواكل وانتظار المعجزات

دول

هما المستقبل

دول هما الأمل

[aimen]

متابعه مميزة جدا لأحداث اليوم -

لكن باللغة الأنجليزية

مدونة زنوبيا

[لولا]

وقفه شباب الإسماعليه

اللى قرروا يتحدو مع شباب القاهره واسكندريه وباقى المحافظات

اول مره احس بمعنى التضامن على شيء واحد بصوت واحد يك يا مصر

انا فعلا حاسه بامل كبير

تم تعديل 25 يونيو 2010 بواسطة لولا

[لولا]

شباب المنصورة اتعرض لمضايقات امنيه شديده

ورغم ذلك شارك

لأن

ده جديد

اكيد عنيييييييييد

حالف يجيب حق الشهيد

ده جيل قرر انه مش هيبقى سلبى

مش هيعمل مش شايف ومش سامع

مش هيقول ان كل حاجه بخير طالما انا بخير

جيل هيغير كتير

خالد مات

لكن

ملايييين صحيت من غيبوبه

[لولا]

صورة من المنصورة وتوضح المضايقات الأمنيه للوقفه

[Howayda Ismail]

الحزب

الوطني يحاول إحباط الوقفة الصامته علي كوبري ستانلي في الإسكندرية ، الذي

يتواجد عليه الدكتور البرادعي ودكتور أيمن نور ، وينظم مسيرة بها مايقرب

من1000 طفل تحت شعار مهرجان القرأه للجميع ومشغلين سماعات شديدة وأغاني

وطنية - (تحديث) المسيرة والشباب فوق الكوبري عادوا تنظيم صفوفهم ووبيقفوا جنب بعض وبيقروا في القرآن والإنجيل

عاشت ماما سوزان راعيه مهرجانات القراءة للجميع !!

والله ياختى لولا :

انت بتوضحى لى حاجت حصلت قدامى لكنى ماكنتش عارفة لها تفسير

وانا بابنى صباحا اثناء تدريبه فوجئت بعدد كبير على غير العادة من طلاب المدارس متواجدين وفى انتظارهم بالخارج

اكثر من 15 اتوبيس فلما استفسرنا عما يحدث اخبرونا انه هناك يوم رياضى بنادى الاتحاد السكندرى

ولم اقتنع لان اليوم الرياضى له وقت محدد من السنة الدراسية وتقريبا كان فى شهر 4 الماضى وكان بجميع المدارس

والان حضرتك بتقولى ان اكثر من 1000طفل استغلوهم للتشويش على المسيرة اه من الحزب والوطنى والاعيبه

اللى مش حتنتهى

[لماضة مصرية جدا]

السلام عليكم و رحمة الله و بركاته

و الله و انا بقرا كل الكلام من الصبح....بتقطع من جوايا...لاني حاسة اني ماليش لازمة في اي حاجة

بس دلوقتي احساسي غير

بجد هنقدر نعمل حاجة......هيجمعنا احساس وااااحد مهما كنا ع البعد

دي صورة لمجموعة من دبي.....الامارات

يمكن العدد قليل....وفي ابو ظبي كمان....و عارفة ان أصدقاء لينا في الشارقة برضه.....اتجمعنا كلنا بتوقيت مصر

معلشي بنحاول.....علي أدم ما بنقدر

و لما حد كان بيسالنا.......حكيناله

احنا معاكم مش بعيد......و الله عايزين نبقي بجد معاكم...بس بنحاول

بس خلاص

[لماضة مصرية جدا]

متابعه مميزة جدا لأحداث اليوم -

لكن باللغة الأنجليزية

مدونة زنوبيا

السلام عليكم و رحمة الله و بركاته

شكرا استاذي.....انا شفت النهاردة تغطية من السي ان ان برضه....للوقفة الاعتصامية بتاعت الاسكندرية...بس معرفتش الاقيها ع السايت

لو عترت فيها يا ريت تبعتها....و ممكن نحطها ع السايت بتاع خالد او نبعتها لمنظمات حقوقية في الاتحاد الاوربي

تحياتي

[mekkawy]

يا بتوع الرياض ... ايه النظام ... حد له شوق في حاجة ؟؟

مكاوى

[aimen]

مولد سيدى العريان ومحاولة خايبة من الحزن الوثنى

يا رووووووحييييي.. ايه العسل ده.. الحزب الوطني عمل مسيرة موازية وواخد معاه عربية اسعاف

والنبي والنبي تتفرجوا.. حلوة قوي، وجايبين معاهم عربية عروسة مزوقينها ببوكيه ورد عثل عثل عثل جميلة ياختي

مولد سيدى العريان على اليوتيوب

المصدر

جبهة التهييس الوطنية

تم تعديل 25 يونيو 2010 بواسطة aimen

[Amr Radwan]

كان فيه مضايقات امنية للجروبات الصغيرة في القاهرة علي كورنيش النيل وصلت لدرجة سحب البطاقات من الشباب

تذكرت موقف من مواقف سيدنا عمر بن الخطاب رضي الله عنه انه كان بيلف بنفسه بليل علي البيوت عشان يتفقد حال الرعية .. و احنا الان ك"رعيه" مش عارفين نوصل صوتنا لفوق ازاي .. هل فعلا المشكلة مننا اننا ما بنعرفش نوصل صوتنا ؟

اتوقع بعد اللي حصل يوم الجمعة ده تكون الرسالة وصلت ..

كفاية تعذيب في اقسام الشرطة ..

كفاية اهدار لكرامة المواطن المصري برا و جوة ..

[mezo]

والله مش عارف اقول ايه على الجريدة الصفراء الى اسمها الجمهورية لا وايه منزلين الخبر مانشيت رئيسى فى الصفحة الاولى وكأن الناس مشافتش صور الالاف الى فى المظاهرات والوقفات الصامته وكأن بتوع الجمهورية دول فاكرين اننا لسة عايشيين من ايام العصر الحجرى وان الناس بتعتمد على المعلومة من الجرائد فقط ونسيوا ان فيه انترنت وقنوات فضائية بتنقل المعلومة ده حتى السى ان ان نقلت المظاهرات صح ومصورين الاف البشر قدام سيدى جابر على الرغم من الكردون الامنى الى منع الناس تخش وتزود عدد المتظاهرين والله مش عارف اقول ايه على الجريدة دى

درس قاس من الإسكندرانية لجمعية التغيير

مسرح عرائس البرادعي سقط بالثلاثة

فتيات جميلة وبثينة أفسدن صلاة الجمعة

مدير الوكالة السابق ونافعة ونور تركوا أنصارهم في الحر لتناول الغداء في مطعم فاخر

الإخوان هربوا من المهزلة.. وحقائق مفزعة حول أسرة القتيل

الاسكندرية - كريم صلاح:

أعطي السكندريون درسا قاسيا للبرادعي وأنصاره من جمعية التغيير بغيابهم عن المسرحية السياسية التي أعدها مع رفاقه بمسجد سيدي جابر حيث كان يروج أن الملايين سوف يكونون في انتظاره ولم يزد عدد من انتظره علي 400 شخص.

كما كشف غياب الإخوان عن ساحة المسجد وحضور عدد لا يزيد علي 100 منهم عن الموقف الحقيقي للبرادعي في الشارع ولم يتجاوز عدد الذين تجمعوا لاستقباله 400 نصفهم من حركة 6 أبريل والغد الذين حضروا من القاهرة مع أيمن نور والبرادعي للتغطية علي خفوت الاستقبال. وقد تحولت صلاة الجمعة إلي هرج ومرج بفعل أنصار الجمعية الوطنية للتغيير حيث تجمعت فتيات جميلة اسماعيل وبثينة كامل بمدخل المسجد ومنعن المصلين من الدخول ووزعن منشورات الحركة وطالبن بعقد لقاءات تليفزيونية للحديث عن خالد سعيد.

اعتلي شباب الحركة سور المسجد مطالبين بسرعة انهاء الصلاة.. وفي داخل المسجد لم يكن الأمر مختلفا حيث فوجيء المصلون بأحد أنصار الحركة يحاول أن يصعد المنبر لولا أن المصلين تصدوا له.

وبعد الصلاة انطلقت الهتافات التحريضية لأنصار جمعية التغيير والغد و6 أبريل ولم يستمعوا لنداء إمام المسجد بتأجيل الهتافات لدقائق احتراما لجنازة كانت بالمسجد ورفض أعضاء الحركة طلبه وانطلقوا في هتافهم حتي خرج من المسجد أبطال مسرحية العرائس السياسية أيمن نور وحسن نافعة وأسامة الغزالي حرب وحمدين صباحي وصابر أبو الفتوح يرفعون أيديهم لأعلي في حركة مسرحية يؤديها الممثلون عند تحية الجمهور وعلي مسافة قريبة كان في انتظارهم أبو العز الحريري الذي حرص علي الظهور علي خشبة المسرح بالهتاف ضد النظام ولم تستمر الوقفة أكثر من نصف ساعة ولم يتصد الأمن للمتظاهرين وتركهم في حرية كاملة. ووسط التزاحم من أعضاء الحركة حول أبطال المسرحية خرج الدكتور البرادعي من المسجد بسرعة ليخترق الكردون الأمني دون أن يرد التحية علي أنصاره وتوجه إلي مطعم جانجل بسيارته المرسيدس الفارهة ليتناول غداءه مع أبطال المسرح العبثي.

تاركين شباب الحركة تحت حرارة الشمس الشديدة يطلقون الهتافات المدربين عليها وهم يرفعون صور قتيل البانجو خالد سعيد.

ووسط الزحام ظهرت جميلة اسماعيل التي أعلنت أمام كاميرات التليفزيون ان تقرير اللجنة الثلاثية التي شكلها النائب العام لاعادة تشريح جثة خالد سعيد وانتهي إلي أن الوفاة بسبب ابتلاعه لفافة بانجو لا يخصهم وانهم سيضعونه في سلة المهملات في تحد غريب لسلطة القانون واجراءاته مدعية انهم يشكلون لجنة ثلاثية أخري من أطباء من خارج مصلحة الطب الشرعي لتشريح الجثة.

أعلن أيمن نور لعدد من أنصاره علي كافتيريا بمنطقة استانلي انه يقوم بتجميع مبلغ 120 ألف جنيه لاعطائها لأحد الأطباء الشرعيين الذين خرجوا للمعاش لاعداد تقرير مغاير لتقرير الدكتور السباعي.

كان البرادعي قد توجه لمنزل أسرة خالد سعيد بكليوباترا حيث قدم تعازيه وكشفت تلك الخطوة منه والاهتمام الأمريكي بالقضية معلومات جديدة حول أسرة خالد سعيد وهي ان شقيقه أحمد الذي سافر إلي أمريكا منذ سنوات كان قد تنازل عن جنسيته المصرية ليحصل علي الجنسية الأمريكية وأصبح اسمه اليكسندر ستيفان وعندما حاول خالد سعيد السفر له غير اسمه أيضا إلي خالد استيفان وسجله في ادارة الهجرة الأمريكية. الغريب ان أعضاء الجماعة المحظورة وقفوا خلف تلك القضية الكاذبة الخاصة بوفاة خالد سعيد برغم علمهم بجنسية شقيقه وتنازله عن الجنسية المصرية.

http://www.algomhuria.net.eg/algomhuria/to...ge/detail00.asp

[بركة]

دا ايه المقالة دي

يا الله على شهادة الزور

قال صلى الله عليه وسلم :

"ألا أنبئكم بأكبر الكبائر؟" ثلاثاً، قالوا: بلى يا رسول الله، قال: "الإشراك بالله، وعقوق الوالدين"، وجلس وكان متكئاً فقال: "ألا وقول الزور، ألا وقول الزور، ألا وقول الزور"، قال: فما زال يكررها حتى قلنا ليته سكت، إشفاقا عليه صلى الله عليه وسلم.

باع نفسه وباع الحق الذي هو من اسماء الله سبحانه

الحق

[محمد عبدالعزيز]

مقال الجمهورية متهافت جداً ولا يستدعى حتى الالتفات إليه, وأعتقد لا يستحق عناء الرد عليه كمان.

[ذهبية]

والله انا سعيدة جدااا

طول ما اللهجة تزداد دة دليل الخوف و الغيظ

استخدام الفظ رنانة و الكذب البين دليل للضعف البين

اشتمى كمان و كمان يا جمهورية و اى جرائد واطية تبع الحزب الواطى دة يدل على قلة الحيلة

مش عارفين بغبائهم ان دة يقوم الشباب اكتر بيحفزهم اكتر بيفتح عيونا اكتر

[Howayda Ismail]

من حقهم يقولوا كل اللى عايزينه ومن حقنا ان احنا منصدقاهمش