خالد محمد سعيد "شهيد الطوارئ

[زعلان]

خالد سعيد اصبح رمزا للنضال الوطني في مصر و"يالي حاكمنا بالمباحث كل الشعب بظلمك حاسس"

[fatfouta]

[se_ Elsyed]

سمعت بالإمس شهادة الراجل صاحب السايبر اللي إتمسك فيه خالد ..

والراجل كده نقدر نقول راح في داهيه ... لإنه قال الحقيقة ..

فبيان وزارة الداخلية بيقول إن أثناء تفقد المخبرين لحالة الأمن في الشارع ... أشتبهوا في المرحوم خالد

وده كذب كالمعتاد منهم ..

لإن الراجل قال بالحرف الواحد إن خالد كان قاعد في السايبر ودخل التتار اللي ما عندهمش دين ولا قلب ولا رحمه .. دخلوا عليه مباشرةً وهاتك يا يضرب وكانوا عمالين يخبطوه في الرخام .. وبعدين سحبوه خارج السايبر وسحلوه في الشارع طبعاً لحد ما موتوه ...

أعتقد يا جماعة إن موضوع خالد لابد أن يكون القشة التي تقطم ظهر البعير اللي مستحمل سخافات هؤلاء الأوباش لمدة أكثر من 60 سنة ..

منذ قيام الثورة المشئومة اللي قلبت موازين البلد .. وجعلت من تفهاء الشرطة باشاوات ..

يقدر حد ينده على عسكري شرطة معفن من غير ما يقول له يا باشا ؟

وجعلت لهم سُلطة مُطلقه مغلفة بقانون لا يوجد عند الكفره .. إسمه قانون الطواريء ..

وأستباحوا أعراض الناس ومالهم ودماءهم ..

واللي مختلط شويه بأقسام الشرطة او له قرايب ظباط مباحث .. ممكن يعرف بعض ما يحدث في أقسام الشرطة من إنتهاكات يندى لها الجبين ..

وإذا كنا بنقول أين رجال الدين ...

أليس الأولى أن نقول : أين رجال القانون اللي عاملين مظاهرات في طول البلاد وعرضها عشان واحد زميلهم أتحبس لأنه ضرب رئيس نيابة ..

فما بالنا بإنسان بريء قُتل بدم بارد ؟ ...

وإنسان حتى لو كان مجرم عتيد الإجرام تم سحله وقتله بدون محاكمة ولا دفاع ...

----------

آه قبل ما أنسى ....

شوفوا كل كلامنا ده ..

وبرضوا إنتخابات مجلس الشعب كمان 3 شهور هاتتقفل ويكتسحها الحزب الواطي .. كما أكتسح إنتخابات الشورى الأسبوع الماضي وفاز بـ 80 مقعد من 88

[لولا]

حتى لا يكون الغضب مجرد كلام وفعل آخر من افعال السلبيه التى اوصلتنا لما نحن عليه

ارجوا ان يستوعب الجميع انه قد حان للغضب ان يكون ايجابى

حان للغضب ان يكون له صوت..

اليوم وقفه الإحتجاج امام وزاره الداخليه الساعه خمسه عصرا سيشارك فيها عدد يفوق الخمسه آلاف

هتنزل ؟؟ هتنزلى ؟؟

غضبك المرادى هتعمل بيه حاجه اكتر من شتم البلد وشتم الظروف وانك فى عز الجرح والوجع تدخل تكتبلنا كلمتين عن ان البلد الوضيعه دى متستاهلش

اقعد فيها دقيقه من عمرى ؟؟

كلام مناسب فى الوقت المناسب بصراحه !

دخلت قريته هنا وحسيت قد ايه اللى كتبه محروق قوى على البلد ..

ماعلينا .. استغفر الله العظيم .

خالد اللى مات ده لو اخو حد فينا كان هيفكر على الأقل يعمل حاجه عشانه قبل ما يجرى على الجنه اللى بره..

خالد لو كان اخوكى كنتى اكيد هتعملى عشانه حاجه..

هناك حمله لمقاضاه قتله خالد سعيد

هل ستبخل بدقائق لتشارك فيها ؟؟

ضميرك وضميرك هيرتاح لما تعدى من هنا من غير ما تدخل وتشارك فى الحمله ؟؟

هتودى وشك الناحيه التانيه عشان الصور بشعه وتقول مشاركتى مش هتزود حاجه ؟؟؟

خالد كان ممكن يكون انت/انتِ/ابنك/بنتك/جارك/صديقك/قريبك..

خالد هو احنا تحب دمك يبقى رخيص قوى كده ضمن سلسله الرخص لدماء ولادك يا بلد ؟؟؟

الرابط اهو وكل واحد وضميره

http://www.facebook.com/group.php?gid=100709643313478

لولا

[doha]

كنت منتظره الموضوع ده من فترة قريبة وعشان كده مستغربتش لما حصل .. ومتستغربوش كلامي ..

من فترة قريبه اوي حوالي اسبوعين او تلاته كان لقاء مع منى الحسيني على مااذكر مع احد كتبة النظام صلاح عيسى ..

وللغرابة كان بيحكي عن ( قصة تعذيبه ) في احد العصور الماضية لما دخل ( المعتقل ) .. الجزء الي شفته من الحوار مكانش بيتكلم عن قصة دخوله او اسبابها وانما عن ( تفاصيل ) عمليات التعذيب الي حصلت له وكانوا بيعملوا معاه ايه وشعوره وقتها كان ايه ..

ثاني يوم مباشرة وكنت بقلب في القنوات لقيت البرنامج اياه بتاع هناء السمري وكان زميلها بيقول عندنا لكم بكرا باين ولا آخر الحلقة تقرير مفصل عن احدث ( وسائل التعذيب ) الي بيعملوها في المعتقلين تابعوا معانا ..

طبعا مش معقول اني اقلب في القنوات بدون تعمد ليومين متتابعين والاقي الكلام عن نفسي الشيء ويكون كل ده صدفه ..

اذا ربطنا ده كله باقتراب الانتخابات المصيريه في مصر سواء مجلس شعب او رئاسه لعرفنا ان في ( حملة ) ( توعية ) للمواطنين ان الي هيتكلم ولا يفتح بقه هيحصل له ايه ..

موضوع خالد ده مجرد ( اصطباحه ) والا فبرأيكم ليه تم القاء الجثة عشان الي رايح والي جاي يشوفها بل وتتصور وتنتشر صورتها في النت ؟

الحكايه دي بالظبط زي لما يعلقوا راس واحد على باب زويله عشان يبقى عبرة لمن لايعتبر مش لانه عمل جريمه وانما تحسبا لان مستقبلا ممكن حد يعمل .

لما الفضائيات تتكلم ولما الحملات تتعمل ولما الدنيا تقوم عشان خالد هيبقى في المولد ده صنفين ناس زعلانه عليه بجد وناس تانيه زيهم زي الي ضربوه ميهمهمش غير يقوموا بالدور المنوط بيهم ( في التوعيه ) ..

مش هقول الا الله يرحمك ياخالد انت وكل الي زيك وحسبنا الله ونعم الوكيل في الي عمل فيك كده .

[لولا]

يا جماعه ما ينفعش نلوم عملاء النظام احنا لازم نلوم نفسنا و نبدأ نتحرك خلاص حنخسر ايه اكثر من كده لو كلنا اتحركنا مش حيقدروا علينا ولا حنبقى نستاهل كل الي يجرالنا و بدل لفافات البانجو حنلع جزم

فعلا يا زعلان ..

نلوم نفسنا شويه ..

نبطل اسطوانه مفيش امل ويعنى هعمل ايه وصوتى هو اللى هيفرق ووقفتى قصاد الداخليه هتنقص بيا لو مرحتش

شويه صدق مع النفس

شويه وزاع دينى طيب

شويه انسانيه يا ناس

شويه اى حاجه تيجى عندك على الجرح وتحرك فيك وفيكى حاجه

قررت تعمل حاجه يامصرى؟؟

فكرتى تعملى ايه يا بنت مصر ؟؟

فكرت ان ممكن النهارده تتعمل اكبر وقفه احتجاج تشهدها مصر ؟؟؟؟؟؟؟؟؟؟؟؟؟

فكرت ان وقفه مليون مش زى وقفه الف ؟؟

فكرت ان مشاركه مليون على جروب حمله مشاركه خالد مش مشاركه كام الف ؟؟

فكرت ان كل عدد هو عناصر بيكونها فرد فرد وان صوتك اللى بتضحك على نفسك بضعفك وسلبيتك وتقولها هو اللى بيزود العدد ده هبقى انا

لو كل واحد قرر يبقى سلبى يبقى استنى دورك بكره..

استنى اخوك وابنك وبنتك يتسحلو فى الشوراع..

حاسب نفسك عملت وعملتى ايه

شوف كده وقعت بيان التغيير ؟؟

شوف كده اكتر من الشتيمه على الوضع ولا التأثر العاطفى عملت ايه / عملتى ايه ؟؟؟

لو كنت فى مصر مستوعب اهميه انك انت وهى وهما تنزلوا ؟؟؟

كفايه سلبيه بقى !

لولا

تم تعديل 13 يونيو 2010 بواسطة لولا

[hOuSsAm]

من 12 سنة كنت فى الاعدادى وكنا فى عيد مش فاكر الفطر ولا الاضحى (كان بعد صلاة العصر بقليل)

وكنت بلعب مع صحبى فوق سطح البيت واذا به مظاهرات كثيرة وقنابل مسيلة للدموع فى كل مكان وامن مركزى وعربيات مصفحة ومطافى حسيت انى فى حرب

وكل مغسل وشى من الغاز المسيل للدموع ارجع اعيط تانى وزغللة فى العنين وفلفل وشطة فى انفى

نزلت شقتى بسرعة اسال بابا هو فيه ايه

ساعتها اعلنوا حظر تجوال وقطعوا الكهربا عن المدينة كلها وكانت الهتافات فى كل مكان واظن ان فيه ضرب نار حصل بس رصاصات مطاطية

(القضية ساعتها تتعلق بمثل ما حدث مع خالد واحد تاجر خضار اتسرق منه قفص طماطم وبالتحريات شكوا فى واحد خدوه وبداوا يستجوبوه فانكر قام سيادة الباشا الظابط مكهربه فى مناطق حساسة لحد ممات حطوه فى شوال وعربية البوكس رميته قدام بيته فامه سالتهم ماله قالولها شوية كدة وهيفوق وللاسف اكتشفت ان ابنها ضناها اتقتل

اهله واصحابه اتجننوا من الموقف وحطوه على عربية ولفوا بيه البلد كلها عشان يفضحوا البيه الظابط واظن ان الموقف ده كان يوم وقفة العيد)

حتى الساعات الاخيرة من الليل كانت المظاهرات شغالة ومناوشات مع عساكر الامن المركزى والحرامية استغلوا الحاجة دى وبداو يكسروا فى مجلس المدينة واقتحموه وسرقوه بالاضافة لبعض المدارس

اللى شفته بعينى انهم حاولوا اقتحام الضرايب العامة بس عشان كانت قدام بيتنا وكنا على شارع عمومى عربية مصفحة رمت عليهم شوية قنابل مسيلة للدموع

وكمان حاولوا يولعوا فى معظم الكبارى باستخدام كاوتش العربيات الكبيرة والبنزين عشان يقطعوا الطرق عالامن المركزى

بصراحة البلد كان فيها فوضى جامدة بس الامن المركز يقدر يحدد اماكن المظاهرات ويحاصر اى حد يمشى فى الشارع وياخدوه يرموه فى قسم الشرطة عالطول

الساعة 2 بعد منتصف الليل قدرنا نتحرك فى الشوارع بين الظلام الدامس عشان نجيب والدتى من عند خالتى

تانى يوم فى الصباح كان معظم الميادين والشوارع الكبيرة بها لا يقل عن ثلاث عربيات امن مركزى بالاضافة لعربية مصفحة واتنين بوكس وعربية اسعاف (استمر الوضع ده حوالى 3 اسابيع) مع وجود تعتيم اعلامى تام

بس للاسف الناس كانت هديت ولا اكن حاجة حصلت

للاسف معظمنا عنده ثورة وقتية وبعد كدة كله بيتنسى والامور بتهدى وكل واحد بيشوف اكل عيشه

وللاسف الظابط اللى عمل كدة محصلوش حاجة اظن انه اتنقل مكان تانى وخلاص خلصت القضية على كدة (اصل اللى اتقتل مكنش ليه ضهر )

ياجماعة كل يوم فيه مليون خالد كل يوم بيحصل ده (بصراحة حالة خالد مش جديدة علينا)

اتمنى ان يفوق الجميع من الغفلة

[لماضة مصرية جدا]

السلام عليكم و رحمة الله و بركاته

فو وقت قولت لنفسي خلص الكلام...لان الكلام مبقاش موازي و لا مكفي يعبر عن اللي جوي الواحد

انا قاعدة بتابع الموضوع من التلفزيون للجرنان للمنتدي

بس سالت نفسي سؤالين...مش عارفة هل هما هيفهموني حاجة و لا هيزودوا الوجع:

1- كلنا حاسين ان خالد هو شهيد الطواريء...كلنا حاسين ان خالد ده ان و انت و حد نعرفه اوي...حد ملامحه لازم بتحفر جواك حاجة.....سؤالي....هو فيه كام خالد احنا منعرفشي عنهم حاجة....فيه كام شاب زي خالد و يمكن اضغر منه بكتير مرمين في معتقلات و محدش يعرف ليهم طريق...فيه كام خالد....حتي بعد ما طلع من المعتقل بعد ما اجمل سنين عمره راحت ورا قانون الطواريء....خرج م المعتقل مبقاش ماشي جنب الحيطة...لا بيقولي انا شيلت الحيطة و بقيت مكانها

الغضب لو هيقف عند خالد بس....هيبقي مبتور....هيبقي مؤلم جدا....الغضب لازم يبقي لكل "خالد"

2- كل غضبنا ده رايح في سكة واحدة سكة اعتداءات و تجاوزات الشرطة....بس انا لقيت ان كلنا مشاركين....اولنا انا اللي قاعدة ورا شاشة لاب توب و قاعدة و فاكرة نفسي قال يعني هغير حاجة.....بس اللي تاعبني مش الشرطة بس

اللي تاعبني ان خالد انضرب و اتسحل في الشارع........عارفين يعني ايه شارع.....يعني ايه سايبر.....يعني ايه قعدة شباب

هما المخبرين اللي اتلموا عليه دول مش كانوا اتنين...يعني مكنشي ينفع حد يروح رافع ترابيزة و لا طوبة و لا رجل كورسي و يضرب...طب بلاش يضرب...مكنشي ينفع يحوش؟؟؟

الغضب مش بس ضد الشرطة.....الغضب و الوجع...ان فيه خوف جوانا اصابنا بالشلل...

انا كنت فاكرة ان حمايتي هي الشارع.....بناسه.....انا حمايتي فين بقي دلوقتي؟؟؟

ايه حالة التعود علي المذلة...ايه حالة قبول الخطا....ايه حالة شلل الاطراف انها متهبش لنجدة اي بني ىدم في الشارع

خالد الله يرحمه متاخدشي في خرابة و اتقتل....الجريمة الافظع انه اتقتل قدام الناس...لمدة 20 دقيقة....20 دقيقة.....محدش عمل حاجة؟؟؟؟

ليه

ليه

ليه؟؟؟

[لولا]

أنا مش فاهم هوا إحنا للدرجة دي مالناش لازمة ؟؟؟

للدرجة دي مالناش قيمة ؟؟؟؟

أنا افهم الكذب و القوة عشان يحموا الريس مثلا ؟

يحموا نظام الحكم ،،، يحموا العائلة المالكة ؟؟؟

لكن شوية مخبرين أو ضابط فاسد أو وكيل نيابة من أبو مقبول

فيها ايه حتي لمجرد تهدئة الرأي العام فيها لو ياخدوا منهم أي موقف ؟؟؟

ممكن حد يفسرلي

القيمه احنا اللى نعملها لنفسنا لما يكون لينا صوت..

لما نتعلم نكون ايجابين حتى فى ابسط واسهل الطرق واتفهها..

كل واحد يفكر ويبدأ من النهارده طيب يسأل نفسه عمل ايه عشان شعبك يا مصر بتنداس كرامته كده ويتقتل شبابه كده فى وسط الشوارع عينى عينك

وتطلع تصريحات قمه فى الإجرام والإستهتار بالعقل البشرى من وزاره الداخليه ..؟

لولا

[لماضة مصرية جدا]

معلشي سؤال تاني

فين البرادعي

فين حمدين صباحي

طب فين علاء و جمال مبارك اللي طلعوا في التلفزيون لما البعثة المصرية بتاعت الكووووووووورة اتحدفت بطوبتين تلاتة في السودان

طب فين اي حد يقولنا ان حتي في مشاعر الغضب احنا مش عشوائيين؟؟؟؟؟

احنا عندنا قائد ينفع نتجمع حواليه؟؟؟ فيه حد نزل وسط الناس.....قالهم حتي لو بالكلام احنا مش موافقين ع اللي حصل....او هنضرب بيد من حديد....مش ع الشعب علي ايد الظلمة.....حتي كلام......جملة واحدة

محدش قالها

يبقي اي نوع من القيادات احنا ماشيين و راه

و لا بقي الحاجة الوحيدة اللي بتجمعنا هي الوجع....المرارة؟؟؟

اكيد لو نزلت الانتخابات...هتفوز باكتساااااااااااااااح

[مغتربة]

معلشي سؤال تاني

فين البرادعي

فين حمدين صباحي

كتير من الى خرجوا فى المظاهرات يا لماضه هما من شباب جمعيه التغير بتاعه دكتور برادعى

من اول مظاهره خالص الى كانت بليل و اتقبض على ناس منهم فيها

و البرادعى على صفحه تويتر بتاعته ادان الحادث

كمان حمدين صباحى قدم استجواب فى مجلس الشعب عن الحادث

انا مش بقول ان الاجراءات دى كافيه و لا لا

بس فعلا الراجلين اتحركوا فى وقت غيرهم خرس فيه تماما

[Morial]

ولسه ياما هتشوفوا

هو انتم لسه شوفتوا حاجة

تمانين مليون أخرس من كام سنه

عايزين تنطقوا دلوقتي

يــــــــــا رب أنفد بجلدي أنا وأبني

وعمار يا مصر كمان وكمان

وقال إيه ؟

إنتماء

ده أنا بس أخرج منها

وهمسحها من ذاكرتي بأستيكه

بلد العــــفن والــــــــــذل والقهر

وعلي رأي عمرو أبن العاص

وهم عبيد لمن غلب

للأسف

سيتم وضع مداخلات حضرتك تحت الرقابة لمدة 10 أيام لحد ما تهدي شويه .. أو لحد ما تنفدي منها وتسيبي لنا بلد العفن اللي سيادتك منها وكنتي مشاركة في هذا العفن بشكل أو بأخر .

جربت تنام علي البورش علشان شاركت في مظاهرة سلمية ؟

جربت تشوف دموع والدك لأول مرة في حياتك وهو بيقولك أحنا ناس غلابة وماشيين جنب الحيط متبهدلناش معاك

جربت تتشد من شعرك وتسمع شتيمتك بودانك وتضطر تسكت ؟

جربت تتكلم مع زملائك وجيرانك علشان توعيهم بحقوقهم يقوموا يبتسموا لبعض أبتسامة ذات مغزي معناها شوفوا المجنون بيقول أيه

هو ده العفن اللي انا كنت مشاركة فيه أيام الجامعة من 12 سنه

من بدري قوي وأنا عارفة أن مفيش أمل

ومن دلوقتي وأنا عارفة أن كلها كام يوم والموضوع يتنسي

ذيه ذي غيره

وان كنت نادمة علي شيء الان فهو اني شاركت بالرأي وعبرت عن غضبي في وضع اصبح لا يعنيني الأن في كثير أو قليل

وأسفة اني تدخلت في خصوصياتكم

لكن صورة المقتول استفذتني انسانيا

بصرف النظر عن هويته أو هويتي

وللعلم ذنبه في رقبة الكل

[pocy]

حسبي الله ونعم الوكيل

[hebapharm]

الحزن والأسى اصبح اكبر من طاقتنا كبشر والله ..الواحد مش قادر يلاحق على الوجع ..ومش عارفين هنلاقيها من مين ولا مين

من اسرائيل ..ولا من الحزب الحاكم؟؟؟...في نظري اجرامهم مش فارق كتير

ااااااااااه ..لنا الله وحسبنا الله ..وانا لله وانا اليه راجعون

[pocy]

استغفر الله العظيم من كل ذنب عظيم

سبحان الله وبحمده سبحان الله العظيم

يا جماعه الخير الكلام مش جايب همه كلنا هذا الرجل.......................

مين فينا مش اتفقع من الحكومه ...............

من فينا مش قدم رشوه علشان مصلحته تمشي ........................

مين فينا شاف ناس بتنضرب وقالي خلينى فى حالى لاتاخد فى الرجلين انا ورايا كوم لحم .......................

مين فينا شاف الحق وسكت عنه واتخرس ......................

مين فينا شاف اطفال بتنتفخ ولا حد اعتبر .........................

مين فينا ...................... ولا اهتم

ياربي انا قلت مش هتابع الحاجات دى تانى لانها كتير وبتوجع القلب والاعصاب وبتخلى الواحد يقرف انه يرجع بلده تانى او حتى يفتكر الخير اللى فيها

مصر فيها سلبيات كتير بس احنا السبب فى السلبيات دى اللى سمح لنفسه انه يمشي اموره بالرشوه ده اول واحد سمح بالفساد الوظيفي

واللى سمح لنفسه انه يعين حد مش بالواسطه ومؤهلاته لا تسمح ده اول من كتر البطاله فى مصر

واللى سمح لنفسه انه ..................................

كلنا سمحنا بحاجات كتير ودى نتيجه اللى بنعمله المفروض مننا اما نغيره ياما نستحمل ومش نشتكى

انا هروح اعالج الاكتئاب اللى جالى من ساعه ما سمعت الخبر

استغفر الله العظيم استغفر الله العظيم

[لولا]

الحزن والأسى اصبح اكبر من طاقتنا كبشر والله ..الواحد مش قادر يلاحق على الوجع ..ومش عارفين هنلاقيها من مين ولا مين

من اسرائيل ..ولا من الحزب الحاكم؟؟؟...في نظري اجرامهم مش فارق كتير

ااااااااااه ..لنا الله وحسبنا الله ..وانا لله وانا اليه راجعون

ومن اجل ان يكون وجع له قيمه يجب ان ننفض غبار السلبيه والتباكى..

ادخلى على موقع البرادعى..شاركى فى طلب تغيير الدستور..

شاركى فى الحمله لمحاسبه قتلة خالد سعيد ..مش كقضيه شخصيه لخالد كفرد لكن لأنه رمز لسلسله من الطغيان والبلطجه لتعامل الشرطه مع المواطن

وامتهانه ..

شاركى لو كنتى فى مصر فى الوقفه الإجتجاجيه ..

ابعثى مقالات وصور الحادث لإيميلات حقوق الإنسان ..

الحزن الضعيف المتخاذل هو سبب كل ما نحن فيه..

كل فرد ..

كل فرد..

كل فرد..

يملك ان يفعل شيء..

يكذب على نفسه من يدعى انه ضعيف وانه لا يملك سوى الحزن والسلبيه .

ممكن كل واحد يتحرك .

لولا

[fatfouta]

هو ده اللى قدر عليه التليفزيون المصرى هو ده اللى قدرته عليه؟؟؟؟؟؟ يا حسرة قلب امك عليك يا خالد يا حسرة قلب امك

موتت وشافت صورتك متشوه ومتعذب وبعدين مطلعين فاسد وعليك قضايا وبتاع مخدرات وبانجو وحشيش

لا ومكذبينك يا ام خالد ويقولوا انها بتقول ان ابنها كان متعود انه يشرب مخدرات

يا نااااااااااس هو فيه ام حتى لو ابنها كده هتعترف عليه؟؟؟؟؟؟؟؟؟ مش بعيد يجيبولها فيديو بتقول الكلام ده

مش بعيد يعملوا اى حاااااااااااااااجة

يا حسرة قلبك على ابنك..........ياحسرة قلبك........ربنا يصبرك

ماتدفنوه بقى ماتدفنوه بقى حارم عليكوا مخليينه عالدنيا ليه حراااااااااااام ادفنوه يا ناس كفاية عاوزين منه ايه يا طب يا لا شرعى لسه هتشوهه فيه ايه تانى مابقاش فيه خلاص

هتروحوا من ربنا فين ده انتوا تحت سمائه......وما ربك بغافل.........إدفنوه يا طلمة ادفنوووووووووه

اتفضلوا التلفيق

اكد ان المتوفى ابتلع مادة مخدرة سببت له اختناق

مصدر أمني ينفي تسبب رجال الشرطة في وفاة مواطن بالإسكندرية

تعليق علي الموضوع إرسال لصديق طباعة الصفحة

مدينة الاسكندرية شاهد الفيديو

مدينة الاسكندرية

شاهد الفيديو

القاهرة - أ ش أ

نفى مصدر أمنى السبت ما نشرته بعض وسائل الاعلام بأن رجال شرطة سريين قد تعدوا على المواطن خالد صبحى بمدينة الاسكندرية وتسببوا فى وفاته.

وقال المصدر "عن قصد واضح تمادى هذا الادعاء، تغافلا عن ان حقيقة الواقعة تمثلت فى ان فردى شرطة من قوة وحدة مباحث قسم سيدى جابر بالاسكندرية خلال ملاحظتهما للحالة الامنية تاريخ 7 يونيو/حزيران الجارى بأحد شوارع منطقة كيلوباترا التابعة للقسم، شاهدوا المحكوم عليه خالد سعيد صبحى يرافقه احد اصدقائه ولدى توجههما لضبطه بادر المذكور بابتلاع لفافة تبين بعد ذلك انها تحوى مادة مخدرة مما ترتب عليه حدوث اختناق اسفر عن وفاته وهو الامر الذى أكده الشهود الخمسة ومنهم صديقه الذى كان يرافقه المواطن محمد رضوان عبدالحميد ورجل الاسعاف الذى حاول اسعافه قبل نقله من الطريق العام بسيارة الاسعاف الى المستشفى.

كما اكدته على نحو قاطع تحقيقات النيابة فى الواقعة والتى توافقت مع نتيجة التقرير المبدئى للطب الشرعى الذى تضمن ان الوفاة نتيجة اسفكسيا الخنق نتيجة انسداد القصبة الهوائية باللفافة التى حاول ابتلاعها".

وأوضح المصدر الامنى أن المذكور كان مطلوبا لتنفيذ حكمين بالحبس صادرين فى القضيتين 7439 جنح سرقات 2009 واخرى لحيازة سلاح ابيض وانه سبق ضبطه فى أربع قضايا سرقات وحيازة سلاح وتعرض لانثى كما انه مطلوب فى القضية 2008/333 للهروب من الخدمة العسكرية، فضلا عما تضمنته اقوال والدته فى التحقيقات من انه معتاد تعاطى المواد المخدرة.

وأكد المصدر الأمني أن تلك الادعاءات المغرضة قد تغافلت عن عمد كافة الحقائق وتمادت فى الترويج للكذب والتضليل، فى محاولة للاساءة لجهاز وطنى يضطلع بمهامه رجال الشرطة بكل مثابرة ودأب التزاما بواجبهم بالاسهام فى انفاذ القانون وحماية المصالح العامة والخاصة.

وقال المصدر "بل وذهب الامر الى حد ابعد يستهدف الاساءة لاوضاع حقوق الانسان بالبلاد بتنظيم وقفات احتجاجية والدعوى للتظاهر وتوجيه رسائل الكترونية لدوائر رسمية وغير حكومية أجنبية تطالب بوقف التعاون مع مصر لانتهاكها حقوق المواطنين".

واعتبر المصدر الامنى أنه من الملفت للنظر ان تتبنى بعض وكالات الانباء والقنوات الفضائية الاجنبية هذه التأويلات وعلى نحو مبكر دون تدقيق أو ترقب لمسار التحقيق وقرارات النيابة خاصة وان الامر اصبح فى اطار متابعة وتوجيه مباشر من السيد النائب العام بناء على بلاغات تقدم بها البعض.

وأكد المصدر الأمني في ختام تصريحه على التزام أجهزة الشرطة بالقانون وبمبادىء حقوق الانسان فى إطار سياسة الدولة وعلى أنه لا مجال لاخفاء الحقائق، كما أكد أنه لا تراجع مهما تمادت الادعاءات والحملات المغرضة عن التزام رجال الامن بواجبهم بكل حزم وفق ما تمليه احكام الدستور والقانون.

يا لهوى عالكذب شوفتوا كلمة مصدر امنى اتكررت كام مرة؟؟؟

هو مين المصدر الامنى ده؟؟؟؟؟؟؟

امنى ولا امنك ولا امن مين؟؟؟؟؟؟؟؟

حسبى الله ونعم الوكيل فيكم وفيك يا مصدر يا امنى.......قال امنى قال هو فين الامن يا ظلمة

[لولا]

معلشي سؤال تاني

فين البرادعي

فين حمدين صباحي

كتير من الى خرجوا فى المظاهرات يا لماضه هما من شباب جمعيه التغير بتاعه دكتور برادعى

من اول مظاهره خالص الى كانت بليل و اتقبض على ناس منهم فيها

و البرادعى على صفحه تويتر بتاعته ادان الحادث

كمان حمدين صباحى قدم استجواب فى مجلس الشعب عن الحادث

انا مش بقول ان الاجراءات دى كافيه و لا لا

بس فعلا الراجلين اتحركوا فى وقت غيرهم خرس فيه تماما

فعلا مغتربه ..

متابعه موقع البرادعى يمكن الإستدلال منها على ذلك..

الرجلين كان لهم تحرك افضل ممن سواهم وافضل من رجال القانون ورجال الدين !!

يأتى السؤال حركه هذين الرجلين يفترض ان يحركها غضب شعبى هائل ..

هل يؤمن الجميع أنه مسؤول ؟؟

كام واحد فيكى يا مصر هينزل النهارده الوقفه الإحتجاجيه ؟؟

كام واحد قرر يبدأ يبقى ايجابى ؟؟

كام واحد خرج نفسه من عباءه الخدعه النفسيه والعقليه الل بيقنع بيها نفسه واولاده واللى حوليه ليل نهار وهو بيقول حسبى الله طب هنعمل ايه ؟؟

الإيجابيه لما تبقى موجوده هتلاقى مين يوجهها لكن السلبيه لما تقى بتنخر فى العظم ومستنين شعب تانى يغضب عنننا ويبقى ايجابى

يبقى سيبقى الحال على ماهو عليه .

كل واحد بقى يسأل نفسه انا عملت ايه غير السلبيه .

لولا

[se_ Elsyed]

للاٍسف ممكن أزود همومكم واقول لكم ..

إنزلوا الشارع دلوقت .. واسألوا الناس عن الشهيد خالد محمد سعيد واللي حصل له ....

واتحدى لو كان في 10 % عارفين الدنيا فيها إيه

لإن الناس معذوره ومعجونه في هموم الحياة وغلاء الأسعار والمصايب اللي حكومة الظلم تسببت فيها ..

يكفي هم الأمس وهو الثانوية العامة ..

تخيلوا إن كثير من المراقبين عملوا إضراب عن العمل لتعسف الوزير ضدهم وإن كثير من اللجان بالامس كانت بدون مراقبين ؟

[fatfouta]

صحيح مين دول يا ريس؟؟؟؟؟؟؟؟؟؟

مين دى؟؟؟؟؟ مروة اللى اطعنت 18 طعنه ادام عينين الناس ووقفوا يتفرجوا عليها والخيوان اللى بيطعن فيها بيديها طعنة ورا التانية؟؟

ولا اللى اندبح فى لبنان واتسحل واتعلق ووقفوا يتفرجوا عليه ويلفقوله التهم

ولا الشاب بتاع ايطاليا اللى اتقتل

لا نسيتوا بتاع الكويت والاتنين بتوع دارفور

مين دول ياريس؟؟؟؟؟؟؟؟؟؟

حمايه رعاياك فى الخارج مسئوليتكم؟؟؟؟؟؟؟ طب احمى اللى جوا الاول!!!!!!!!

هو انت فين نايم ولا مش شايف ولا فين؟؟؟؟؟؟؟؟؟

بيقولولك اللى بيجرى ولا مخبيين عليك ؟؟؟؟؟؟؟ وعدتنا تحمينا ووعدتنا كتير انك تعمل وتعمل فين وعودك؟؟؟؟؟؟؟؟

بيبنولك قبر رخام جمب ابن ابنك وانت مش دريان ولا دريان

بيبنولك القبر وانت عايش على حياة عينك ولسه هتموت ويروحوا يرموك فى القبر الرخام

وهيقفوا يقسموا الثروة ويتخانقوا عليها ده غير عذاب ربنا اللى هتشوفه

قبر من الرخام بيتبنى؟؟؟؟؟؟؟ ليه مش هتدود يا أخى يارب يوريلك ذى ماورتنا

لو ابنك يا مبارك كنت سكتت؟؟؟؟؟؟؟

لو ابنك يا سوزان كنتى سكتتى؟؟؟؟؟؟؟؟

منكم لله........منـــــــــــــــــــــــــــكم للــــــــــــــــــــــه

هتشوفوا ان شاء الله وهيورينا فيكم عشان دم حالد والابرياء اللى ذيه

حسبى الله ونعم الوكيل

تم تعديل 13 يونيو 2010 بواسطة fatfouta