فزت .........في القرعة العشوائية للهجرة لامريكا

[jamalpody]

اخواني الاعزاء اعضاء المنتدي الحبيب الي قلبي

وصلني خطاب رسمي من كنتاكي بفوزي في قرعة 2011 للهجرة العشوائية لامريكا اريد نصيحة الاخوة وخاصة في المغتربين في امريكا .......هل اكمل الاجراءات ام ان الوضع في امريكا الان كما نسمع لا يشجع وغير ملائم اقتصاديا علي وجه العموم وايضا للمسلمين علي وجه الخصوص ...

انا اعمل في السعودية مدير مالي ووضعي جيد وعندي ثلاثة اطفال .

في انتظار نصائحكم القيمة ............................

[MZohairy]

عندي صديق مصري امريكي فهمني ان الوضع في امريكا للعمل في نفس المجال يتطلب عمل معادلة للشهادات الدراسيه (زي اللي بيحصل في كندا)

و الشغل الكاجوال متوفر طبعا

لكن اسوء ما في الموضوع هو عدم وجود تأمين صحي زي كندا مع العلم بأن تكاليف العلاج في امركا باهظة جدا جدا

ربنا يوفقك

[مغتربة]

سافر استاذى

سافر

لو مش هتكسب من الموضوع غير الجنسيه

يبقى اكيد كسبت كتير

خد الباسبور الحلم و ارجع مصر حطه فى عين اتخن واحد من بهوات ال50%

خد جنسيه تحمى اولادك بيها من شر الى حاكمين بلدهم

و ناهبين خيرها

و بيدوسوا على ادميت ولادها

[hOuSsAm]

توكل على الله يا ريس

حتى لو مش عايز تعيش هناك فخد الجنسية

وممكن متسبش شغلك فى السعودية الاول اللى لما تستقر هناك

ممكن تقضيها اجازات

خد التجربة والشغل فى الخليج مش هيطير لكن الجنسية ممكن تطير

اتمنى لك التوفيق

[myusername]

ههههههه يعنى الناس بتموت نفسها علشان تروح أمريكا بتأشيرة سياحة و تكسرها... و ناس عايشة عالوهم بقالهم 20 سنة مستنيين جواب الهجرة العشوائية زى اللى جالك... و انتا الجواب جايلك لغاية عندك و متردد؟

اتوكل على الله يا عم و روح.... و الشغل هناك كتير... بس اعمل حسابك فى شوية فلوس.. و عموما الاجرائات بتاخد سنة تقريبا على ما تسافر... يعنى تكون ظبطت وضعك.

و بعد 5 سنين... ترجع لنا بالباسبور الامريكانى المتين

بالتوفيق باذن الله... توكل على الله و متضيعش فرصة عمرك من ايدك.. لو مش علشان خاطرك يبقى علشان خاطر عيالك..

[myusername]

عندي صديق مصري امريكي فهمني ان الوضع في امريكا للعمل في نفس المجال يتطلب عمل معادلة للشهادات الدراسيه (زي اللي بيحصل في كندا)

و الشغل الكاجوال متوفر طبعا

لكن اسوء ما في الموضوع هو عدم وجود تأمين صحي زي كندا مع العلم بأن تكاليف العلاج في امركا باهظة جدا جداربنا يوفقك

يا افندم الوضع ده هيتغير تماما قريب جدا... لان اوباما خلاص اخد موافقة الكونجرس على الhealth care bill من كذا شهر.. و بالتالى... البشر كلها هتدخل فى التامين الصحى.. و الامور هتتحسن بالنسبة للموضوع ده.. و الله أعلم..

[hOuSsAm]

سؤال كدة بيراودنى من الصبح

هو ايه جواب الهجرة العشوائى ده؟ وبيتقدمله ازاى

وهل هو فى امريكا بس ولا كندا واستراليا ليها بردوا؟

وبعد الاختيار العشوائى بيبقى فيه اختبارات وامتحانات ولا كدة خلاص بتدخل امريكا عالطول؟

تحياتى

[myusername]

سؤال كدة بيراودنى من الصبح

هو ايه جواب الهجرة العشوائى ده؟ وبيتقدمله ازاى

وهل هو فى امريكا بس ولا كندا واستراليا ليها بردوا؟

وبعد الاختيار العشوائى بيبقى فيه اختبارات وامتحانات ولا كدة خلاص بتدخل امريكا عالطول؟

تحياتى

شوف يا سيدى... أمريكا غير كندا و استراليا... فى كندا و استراليا يوجد نظام هجرة واضح و محدد و مضمون... بمجرد ما تقدم و تتقبل, تبقى ضمنت انك هتاخد الاقامة... على عكس الهجرة لامريكا... هجرة عشوائية غير مضمونة... بتقدم عن طريقها انك تبعت بياناتك... و بيستخدموا برنامج زى اللوترى علشان يختار بشكل عشوائى اليكترونى 55 الف شخص فقط من مجمل حوالى 2 مليون بيقدموا سنويا..

التقديم بيكون فى خلال فترة محددة فى السنة... تقريبا فى شهر اكتوبر.. و بتقدم عن طريق الانترنت من خلال موقع الdv lottery بتاع الحكومة الامريكية (وزارة الهجرة)...

لو انتا محظوظ... هيجيلك جواب الهجرة الاول زى صاحب الموضوع... و بمجرد ما بيجيلك الجواب.. يبقى انتا كده اتقبلت و ان شاء الله هتسافر طالما ان مفيش اى اعتراضات امنية عليك... و بغض النظر عن عملك و مؤهلك و امكانياتك اللغوية و المادية..

المشكلة ان الموضوع كله ضربة حظ بشكل بحت... يعنى مش زى نظام الهجرة لكندا.. نظام معروف... يا تكسب يا ماكتسبش..

طبعا للاسف فيه ناس بتفضل تقدم ل10 و 15 سنة و الحظ مايجيلهومش...

[shawshank]

القرعة ليست متاحة لكل بلدان العالم في كل السنين ، بهدف عمل توازن في الجنسيات المهاجرة . وتصدر كل سنة قائمة ببلدان العالم المقبول والغير مقبول الهجرة منها إلى أمريكا بنظام القرعة . فمثلا الهند والصين والمكسيك لن يقبل منها مهاجرون في هذا النظام هذا العام . أعتقد كذلك أنه عليك الإقامة في أمريكا لمدة خمس سنوات (بحد أقصى معلوم مسبقًا للخروج والدخول أثناء تلك الفترة) لكي تستطيع التقدم للحصول على الجنسية بعد ذلك .

myusername ... معلش اسمح لي بكام ملحوظة رخمة ...

... موقع الdv lottery بتاع الحكومة الامريكية (وزارة الهجرة)...

هي وزارة الخارجية ، ويتبعها مكتب الشئون القنصلية .

... يختار بشكل عشوائى اليكترونى 55 الف شخص فقط ... و بمجرد ما بيجيلك الجواب.. يبقى انتا كده اتقبلت و ان شاء الله هتسافر ...

من سنة 2000 العدد بقى 50 ألف بس (أظن اتقبل من مصر حوالي 4000 السنة اللي فاتت) . وبيرسلوا خطابات القبول لضعف هذا الرقم تقريبًا ويتم قبول أول 50 ألف يتقدموا لاستكمال الإجراءات .

... و بغض النظر عن عملك و مؤهلك ...

يشترط أن يكون المتقدم حاصلاً على الثانوية العامة أو ما يعادلها ، أو يكون عمل لمدة سنتين من آخر 5 سنين في مهنة تتطلب سنتين من التدريب أو الخبرة .

[تقوى الله]

السلام عليكم

انا اجيب على سؤالك من واقع عشته فعلا

امريكا مش الحلم الجميل اللى فى اذهان كل المصريين امريكا night mare

حقيقى لك ولاسرتك لو ملقتش شغل شهرين على بعض الايجارات فيها نار وشراء البيوت ربا والناس اللى بتضحك على روحها وتحلله فهو حرام

عشان كده عايز تيجى أمريكا

1- قبل ما تيجى لازم متخسرش شغلك المحترم فى السغودية على الاقل لحد ما تشوف شكل الحياة هنا

2- لازم تيجى لوحدك من غير الاسرة فى البداية لأن الموضوع يلزمه شويه لف على سكن وشغل وحرام تبهدلهم معاك

3-فعلا الوظائف هنا لازم لها شهادات معادلة بس بتمشى وبتلاقى

4- الفايدة الوحيدة والفرق الوحيد بين السعودية وأمريكا هى الجنسية اللى للأسف هتستعملها بس فى بلدك كحماية لك ولاسرتك

أما فى أمريكا نفسها مافيش أى فرق بين المواطن والغير الا فى بعض الخدمات فقط أما المعاملة واحدة تقريبا بس مش فى كل حتة

5-اه فى شوية تمييز للحجاب بس ده من أفراد عاديين مش قوانين

استخير ربنا أولا وخد بالك الفرق الوحيد هو الجنسية وهى الحلم للملايين من البشر

[jamalpody]

كنت قد كتبت هذا الموضوع من 15 شهر..وانا شاكر جدا لكل هذه الردود التي قرأتها اكثر من مره

واليوم فقط وصلتني الجوازات وعليها التأشيرات

وبدأت الحيره الفعليه ....لكن المفيد اني اصبحت خبرة في جميع الاجراءات الخاصة بهذا البرنامج

وانا تحت امركم في اي سؤال