كلاكيت ... برضوا للمره المليون " الثانوية العامية "

[se_ Elsyed]

إيه اللي بيحصل ده ؟

إيه اللي أنا شايفه ده ؟

بالله عليكم .. ده منظر تعليم وأمتحانات بتقيس درجة إستعاب الطالب مش تعجزه وتخليه ينهار كده

ده منظر مدبحه مش أمتحان ده أبداً

طبعاً مش جايبين منظر صبيان .. لأن ما كناش بنعمل كده ... ولأن العيال بتوع اليومين دول لهاليب في النت .. فداخلين المواقع الألكترونية يشتموا في الوزير واللي جابوه

"صراخ" و"إغماءات" و"سيارات إسعاف" أمام لجان الثانوية العامة بسبب صعوبة امتحان "الإنجليزية".. والطلاب يصفونه بـ "المجزرة".. و"التعليم" تُعِّد لجنة "عاجلة" لتقييم لمستوى الأسئلة

خاض طلاب المرحلة الأولى من الثانوية العامة، وعددهم 400 ألف طالب اليوم، الاثنين، امتحانا فى مادة اللغة الإنجليزية وصفوه بـ "التعجيزى"، فبمجرد انتهاء الوقت المحدد للامتحان بدأ الطلاب والطالبات فى الصراخ والبكاء والعويل أمام اللجان التى شهدت بعضها إغماءات وانهيارات استلزمت تواجد سيارات الإسعاف أمامها، مثلما حدث فى لجنة "المنيرة الإعدادية بنين" المجاورة لوزارة التربية والتعليم التى يؤدى فيها طالبات مدرسة "السنية الثانوية بنات" امتحاناتهن.

وصف الطلاب والطالبات الامتحان بأنه تعجيزى وغير مباشر وغير متوقع، ولا يمكن لأى طالب حله كاملا حتى المتفوقين، وأكدوا أن أسئلة "القصة" و"الاختيار من متعدد" و"الترجمة إلى الإنجليزية" و"القطعة" كانت الأصعب فى الورقة الامتحانية، لأنها احتوت على جزئيات لم يدرسوها أما باقى الأسئلة فلم تخل من تعقيدات، وأضافوا أنهم بدءوا فى الإجابة عن الأسئلة بعد مرور 30 دقيقة على الأقل بسبب اكتشافهم صعوبة 80 % من الورقة الامتحانية.

وسيطرت حالة من الغضب الشديد على أولياء الأمور المتواجدين أمام لجنة "المنيرة الإعدادية بنين"، وانهار بعضهم بسبب رؤيتهم لأبنائهم، وهم يبكون من شدة صعوبة الامتحان، ودعا أولياء الأمور على الدكتور أحمد زكى بدر، وزير التربية والتعليم، ووصفوا ما حدث بـ "المجزرة"، وأكدوا أن "بدر" بتغييره لمستوى الورقة الامتحانية، وفق رأيهم، سيتسبب فى ضياع مستقبل الطلاب، وقالت ولية أمر "حرام على الوزير اللى بيعمله فى ولادنا.. يا ريت يحل الامتحان بنفسه قبل ما الطلبة تحله"، قال ولى أمر الوزير: "منك لله يا زكى يا بدر .. دى مش وزارة الداخلية عشان يعمل فى الطلاب كده".

فيما أفاد عدد من الممتحنات من مدرسة السنية الثانوية بنات بأن زميلة لهن أصيبت بإغماءة مع بدء الامتحان، وأضفن أن سيارة إسعاف وصلت إلى اللجنة لنقلها إلى إحدى المستشفيات، فيما أوضح عدد من معلمى الإنجليزية أن الامتحان ملىء بالجزئيات الغامضة وغير المباشرة، وأكدن أن الزمن المحدد لحل الأسئلة لا يتناسب مع مستوى الورقة الامتحانية.

من جهته صرح مصدر مسئول بوزارة التربية والتعليم بأن المركز القومى للامتحانات والتقويم التربوى، التابع للوزارة، أعد لجنة من خبرائه لتقييم مستوى امتحان اللغة الإنجليزية بشكل عاجل وفورى، لبيان مدى صحة شكاوى الطلاب من الورقة الامتحانية.

[se_ Elsyed]

اللي فوق كان موقع اليوم السابع

وده موقع مصراوي ..

مصراوي - خاص- شهدت لجان امتحان اللغة الانجليزية للمرحلة الأول للثانوية العامة حالات إغماء وبكاء هستيري بعد مرور دقائق من استلام الطلبة لورقة الأسئلة.

وانتقلت سيارات الإسعاف إلى لجان الامتحان لنقل الطلبة المغمى عليهم إلى المستشفى

وقال الطلبة إن الامتحان به فوق مستوى الطالب المتوسط بكثير، وبه أسئلة من خارج المنهج الدراسي.

تمثلت صعوبة الامتحان في احتواءه على أسئلة غامضة لم يتدرب الطلبة عليها أو يدرسوها خاصة سؤال الترجمة والاختيار والقصة.

وسادت حالة من الغضب بين أولياء الأمور الذين تجمعوا أمام المدارس منددين بسياسة وأحمد زكي بدر وزير التربية والتعليم في إدارة الوزارة والعملية التعليمية.

ومن جانبه أمر وزير التعليم أحمد زكي بدر بتشكيل لجنة لإعادة تقييم الامتحان.

وقال: "إنه لو ثبت أن هناك اسئلة من خارج المنهج أو أن الوقت كان غير كافيا فسيتم اتخاذ قرار بإنصاف الطلبة" دون -أن يحدد هذا القرار-

وتفاعل الصحفيين والإعلاميين الذين كانوا يقومون بتغطية الامتحانات مع الطلبة حيث بكى بعضهم عندما رأوا حالة الانهيار التي كان عليها الطلبة.

وكانت تقارير صحفية نشرت الأحد قد أكدت ان غرفة العمليات الخاصة بامتحانات الثانوية العامة تلقت عددا كبيرا من الشكاوي الخاصة بامتحان اللغة العربية السبت .

وقالت صحيفة الدستور نقلا عن ما أسمته "مصدر من وزارة التربية والتعليم" انه تم التعتيم علي تلك الشكاوى ولم تعلن الوزارة عنها.

وقد نفى عبد المنعم معوض مدير العلاقات العامة بوزارة التعليم تلقى شكاوي وقال أن هذا الكلام غير صحيح، بل إن الطلاب اتصلوا بالوزارة ليشكروننا علي الامتحان.

[doha]

وهتفرق صعوبه الامتحان في ايه ان كانت الحكايه ( على الكل ) ..

يعني لو جاء الامتحان سهل موت اكتر من نصف الطلبة هتجيب الدرجه النهائيه والاكثر من النص دول عاوزين كليات قمة طبعا

لو جاء الامتحان صعب موت يادوب خمسين ستين واحد هيجيبوا الدرجه النهائيه واكتر من نصف الطلبة هتجاوب على سبعين تمانين في المية من الامتحان اهو نفس الاكتر من النص دول برضه هيعوزوا كليات القمه ..

طول عمرنا لما حد ينجح في الثانوية العامه ونسأله جبت كام ان كان جايب درجه كبيرة في التسعينات بنبارك له ونقوله ممتاز فيرد يقول بس ربنا يستر اصل ( المجاميع السنة دي عاليه ) .. وان كان العكس وسالناه جاب كام وكان في الثمانينات مثلا وزعلان بنقوله معليش ميهمكش اصل بيقولوا المجاميع السنة دي نازله .. وفي كل الاحوال بيكون الكلام صح .. هي بتبقى سنوات مليانه ناس جايبه فوق التسعين وفي الحاله دي بتفرق معاهم على ثمن درجه والاوائل بس هم الي بيدخلوا كليات قمه وسنوات تانيه الكل جايب تحت التسعين وبرضه المعيار هو نفسه والاوائل بس الي بتدخل كليات القمه ..

هي نفسها فنوجع دماغنا ليه ؟؟

مشكلتنا مش في الامتحانات وصعوبتها ابدا .. مشكلتنا ان فعلا العيال دي معظمها مش عارف حاجه في اي حاجه .. وده موضوع تاني اكيد مش وقته دلوقت ..

ملاحظه : ايام الكلية كانت بتبقى اسعد الاوقات في الامتحانات الصعبه لما بنت تعيط اويغمى عليها او ولد يرمي الورقة ويطلع من غير مايكمل .. ساعتها بنطلع نحكي ونقول الامتحان كان صعب موت حتى بالاماره حصل كذا .. من الآخر يعني الامتحان بكده بيكون اخذ الايزو ..

[se_ Elsyed]

هذه حقيقة فعلاً

بعض واضعي الأمتحانات وخصوصاً في الثانوية العامة بيبقى عندهم مشاكل نفسية .. ضعف جنسي مثلاً .. تبول لا إرادي ... حد كان بيخوفه بأبو رجل مسلوخه وهو صغير ... تاه من أهله في مولد وناس خدوه يشغلوه في التسول ... كده يعني

فبييجي بقى يطلع كل الكلاكيع والعُقد دي على العيال يا عيني ولسان حاله بيقول " إن ما وريتكو يا أوباش وعرفتكو مين زكي بشتيكها ؟ "

وهكذا ... حاجات حصلت في الماضي لزكي ... يطلعها على جتت العيال الغلابه واللي أهاليهم أغلب .. واللي باعوا مولت السرير عشان يصرفوا على الدروس الخصوصية بتاعت هيثم ورشا واللي بدأوها من الصيف الماضي قبل الدراسة ...

ويدخل الواد من دول الأمتحان يحس إن الدنيا سودا في وشه من الأسئلة الهُلاميه اللي شايفها

وياريتها تيجي على كده .. ده حاجه زي النهاردة كده تعتبر تاني امتحان ... يعني لسه قدامه شوط طويل ... وهايدخل أعصابه منهارة ومتوقع أي مقلب حرامية تاني من زكي بشتيكها ..

بس بأمانة ده بيحصل ... ومش بيبقى العيب في الطلبة ..

طبعاً دفعة ثانوية 89 .. هايعرفوا أنا باتكلم عن إيه ..

بعون الله إحنا من الدفعة اللي عبرت سنة 89 .. يعني أنا من ابطال العبور وساكن في مدينة العبور وبأروح سوق العبور .... ... واللي مسيو زكي بشتيكها رزعنا أمتحان فرنساوي طلع من نخاشيشنا ..

فتصوروا كل اللي درسناه كان 3 سنين بس وقشور و4 أو 5 فيربات avoir , aller , etre و faire وأخواتهم ... ومتعودين على أختار من بين الأقواس وصح ولا غلط ورتب وحاجات من دي وخلافه ..

يجيلك سؤال وعليه درجة كبيرة يقول لك تخيل نفسك ريشة وطايره وبتشوف معالم مصر ( على ما أتذكر ) أو إنت حنطور وبتلف في مدينة الأقصر فأوصف لنا شعورك

حنطور ؟

إحنا بصراحة كنا حنطور من الفرحه والله ساعتها

وكتاب الله اللجنة كلها قعدت بتاع نص ساعة كل واحد شاكك في نفسة ...

وكل واحد فاكر إن دي أسئلة الثانوية العامة بتاعت مدارسة ( شارل ديجول الثانوية المشتركة بإدارة شرق باريس التعليمية ) ووصلت لنا بالغلط وقلبت مع بعضنا بضحك هيستيري ... خصوصاً أنا .. لأني عُمري ما ركبت حنطور ... طب أعمل إيه ... واساساً حنطور يعني إيه عشان أتحنطر أنا ؟

ههههههههههههههههه

المهم عدت الساعات السودا على خير .. خرجت لقيت نفس المنظر اللي فوق بس على رجالي ....

ولأن كان في جنبنا مدرسة بنات ( أأأأأأأأه .. الا ليت الشباب يعود يوماً ) ... وكان بيننا تعاون ثقافي تعليمي متبادل ... فقلت أعدي أخد بخاطرهم وأشوف إيه الوضع ...

لقيت الوضع لا يسر عدو ولا حبيب وشحتفه ونهنشه ( يعني إيه دي ) وكان يوم أسود

روحت البيت لقيتهم عمالين يعيطوا ..

أه والله ... ماما وأخواتي .. لان صوت الصويت والعويل وصل عندهم .. وأول ما دخلت ماما خدتني بالحُضن وقالت لي : تغور الثانوية وسنينها السودا .. أهم حاجه صحتك ...

الغريب بقى .. من كام يوم الوزير بيقول إن لا الوزير ولا الغفير يقدر يتدخل في نتيجة أمتحان ويعدل درجات وكده

أقسم بالله كذاب ... عفواً يعني

لأن في الحنطور ده اللي ما عرفناش نضرب في الورقة حتى كرباج ورا يا أسطى .. لقيت نفسي جايب 36 من 40

which is unbelievable

قلت ماشي عديها .. يمكن الحنطور صدف معايا

ألاقي نفسي بقى في الأنجليزي جايب 44/60

يعني ما أتنحطرتش في الفرنساوي .. وأتقنطرت في الأنجليزي اللي كنت الحمد لله طلقه فيه وأساساً دخلت فريق أوائل الطلبة بتاع الراديو عن الإدارة التعليمية اللي أنا فيها وكنا بنروح مسابقات وأنا عامل فيها الخواجه بيجو اللي ما حدش يقف قصاده في الأنجليزي و

i have 2 eyes and i can see .. وناقص أحلم بالانجليزي كمان

ومش أنا بس .. لقيت زمايلي كتير من فريق البيتلز المحب للغة الأنكليزية متبهدلين زيي كده ..

والحمد لله إتأكدت إني كنت حالل كويس ... لكن حلقوا لي !!!

ويقول لي الوزير نفسه ما بيتدخلش في النتيجة !!!

تكرر معي الموقف في سنة تالتة جامعة ... ( بتوع تجارة ييجوا على جنب هنا )

وأخدت واحد حنطور محترم برضوا

فأتهبشنا أمتحان " محاسبة تكاليف " لكن خزعبلي .. ويمكن حكيت لكم قبل كده ... إن لأول مره في تاريخ الجامعات يمكن من ايام جامعة الملك فؤاد الأول بالأستانه .. يمروا الدكاترة ويقولوا " نظراً لصعوبة الأمتحان قررنا مد الوقت نص ساعة زيادة "

وكتاب الله كان معايا عيال ناقص يعملوا بيبي على نفسهم من صعوبة الأمتحان

لأن الامتحان كان تقريباً مسأله تكاليف واحده .. ومترتب عليها باقي الأسئلة ... يعني لو فشلت في خطوة وده وارد ... يبقى تعيش إنت يا حاج

وحدث أمامي إن عيال جالها هيستريا في اللجنة وأصيبوا بهياج شديد وقاموا قطعوا الورقة حتت ومشيوا كل ده حصل قدام عنينا ...

أقوم بعد ده كله ألاقي نفسي جايب جيد جداً ..

طب إزاي ؟

وبعدين إيه نظام الحناطير اللي ملازمنا ده ؟

يا سيدي ما تجيبش امتحان ميه وسهل جداً ويتحل بصباع رجلنا الصغير

لكن جيب إمتحانات يقيس قدرات الطلبة ما بين فهم وحفظ وعبقرية يعني حته كده للعيال بتوع 90 % وإنت طالع

وبعدين ليه الراجل يطلع من كام يوم يقول : هاستقبل في مكتبي وهاسلم على كل طالب يجيب فوق 85 %

يا سلام ؟

يعني إبقوا مثلاً لو حد عدا الـ 85 ولا إيه بالظبط ؟

[om marawan]

فعلا ده العادى فى امتحانات الثانوية العامة ويمكن كلنا عدى علينا مادة بالشكل ده فى سنتنا احنا كان الجبر وبعدين ده شوية العياط ده يعنى جزء لا يتجزأ من جو الثانوية العامة

هو انا الحمد لله مش من الناس اللى تعيط فى الشارع.. احم احم ...بس بنات كتير كانت منهارة

و المفاجاة بقا ان ناس كتير حلت فعلا كويس جداا وجابت الدرجة النهائية وحللولنا الامتحان كله بعد ماخلصنا ومش هاقولك ان الامتحان اتصحح بشكل مختلف لا ابدا لان بقيتنا وانا منهم اخد فى حدود 16 و 18 من 25

يعنى حتى امتحان الانجليزية ده هتلاقى طلبة حلته كويس لكن طبعا عمرهم ماهيقولوا كده

وزى ماضحى قالت الموضوع نسبى يعنى على حسب الامتحانات بتكون النتايج وطالما على الكل فمستوى الدرجات هيكون متقارب

بس نيجى بقا لمربط الفرس اللى عاوزة اقوله وهو اللى حصل اول يوم لما 20 % من المدرسين مربيين الاجيال اختفوا فى ظروف غامضة وصبحاو الصبح لقوا عدد من المراقبين قرر مايجيش ..... ااااااااه كده طلعت فى دماغه يعترض على الوزير ويحرق دم العيال واهاليهم اللى طلع عينهم طول السنة ويعمل اضراب اول يوم امتحان الثانوية العامة

اسميه ايه ده بقا تعبير " مشروع " عن الرأى ولا مطالبة بالحقوق بدون اضرار المصالح العامة ولا اعتراض ولا وقفة سلمية ولا ابتزاز وتهريج وعدم احساس بالمسئولية

[ذهبية]

حركة صح ......فى توقيت رائع .....

كما عودتنا الحكومة المصرية بتعرف تتعاون مع بعض فى الخير طبعاااا.....

يعنى وزارة التعليم لقت الضغط اليومين دول على الداخلية .......و الشعب نازل فيها سلخ

تقوم الحكومة تتعاون ..... و تلهى الشعب ..... بقضية تانية خالص و هى الثانوية العامة

فيحصل اية ؟؟؟؟؟؟

الشعب كلة يتلهى على عينة و يسيب فساد الداخلية لحد ما الداخلية تشم نفسها على راحتها

و تعرف تفبرك قصة خالد اللى اتقتل على ايد الداخلية على مزاج كدة و اهو الشعب يتهلى على عينة شوية و يلاعبة زكى بدر

على الشناكل

بجد برافو عليكم يا حكومة و ياترى هيحصل اية الايام الجاية علشان نتلهى اكتر و اكتر و اكتر ؟؟؟؟؟؟

[fatfouta]

فكرتونى بامتحان الجبر على السنة اللى كنت فيها فى ثانوية عامة وللاسف كنت علمى وانا دماغى مش علمى خااااالص بصراحة

الجبر كان صعب جدااا وماحدش عرف يحل حاجة وفيه بنت ولعت فى الورقة قولولى بقى جابت الكبريت منين؟؟؟

واللجنه اتقلبت وانا كان عندى تسسم اصلا وطالعة من المستشفى عاللجنة وكلنا ماعرفناش نحل حاجة

بس قدعوا يقولوا برضو هنعيد النظر ومش عارف ايه وبرضوا..........صقتت فى الجبر ساعتها :blink:

وهى دى المادة اللى خلتنى حولت ادبى السنة اللى بعدها والله الامتحان ماكنش يتحل مع انى كنت مميزة وشاطرة جدااا فى المادة دى وبشهادة المدرسين

فكرتونى ليه بس :roseop:

مش عارفة ليه حاسة انهم بيعملو اكده عشان يشغلوا الناس......احساس :lol:

تم تعديل 14 يونيو 2010 بواسطة fatfouta

[doha]

بس نيجى بقا لمربط الفرس اللى عاوزة اقوله وهو اللى حصل اول يوم لما 20 % من المدرسين مربيين الاجيال اختفوا فى ظروف غامضة وصبحاو الصبح لقوا عدد من المراقبين قرر مايجيش ..... ااااااااه كده طلعت فى دماغه يعترض على الوزير ويحرق دم العيال واهاليهم اللى طلع عينهم طول السنة ويعمل اضراب اول يوم امتحان الثانوية العامة

اسميه ايه ده بقا تعبير " مشروع " عن الرأى ولا مطالبة بالحقوق بدون اضرار المصالح العامة ولا اعتراض ولا وقفة سلمية ولا ابتزاز وتهريج وعدم احساس بالمسئولية

يااه ياام مروان .. متتخيليش الي حصل ده كان حلم كام مليون الف طالب على مدار سنوات الدراسه من اول ماخترعوا المدارس النظامية الى الآن .. تخيلي طالب مش مذاكر وعمال يقول اما لو يتلغي الامتحان بكرا ويروح اللجنه عشان يكتشف ان امنيته المستحيلة تحققت ..

تسميه ايه ؟

حظ عوالم طبعا ..

[engmido]

لااااااااااااااااااااا يا اخواننا مع انى ما شفتش الامتحان الا انه مش كل امتحان يخشوا يعيطوا فيه يبقى صعب وتبقى الدنيا سودا

ونلعن سلسفيل جدود الوزير......... ده مش تعليم

المشكلة ان العيال اتعودت على مستوى معين من الامتحانات واسئلة بعينها ....يعنى مش فاهمين حاجة...اذا اتنغيرت يقولوا الامتحان صعب

فى السنة بتاعتى امتحان الفيزياء كان كالعادة صعب ...عادى انا كنت طالع بقول سهل

الامتحانات تقيس الفهم وليس الحفظ يا اخواننا........

وللعلم

الامتحانات سهلة........يبقى المجاميع عالية ......... يبقى التنسيق عالى

الامتحانات صعبة ........يبقى المجاميع منخفضة .........التنسيق ينزل

مش كميا ..... وده الل حصل السنة اللى فاتت العيال بتوع 3 جالهم امتحانات تانية سهلة جداااااااااااااا

جم فى 3 عموهم بقى اللى جايب مجموع فى 2 وفرحان بنفسه بيقول واء

وفى الاخر التنسيق نزل

وخلصنا

انما كل امتحان نطلع نعيط........يا اخواننا نفسى الامتحانات تبقى عادى زى زمان تقيس الفهم

زى زمان كان اللى يجيب 80% يخش هندسة

شكرااااااااااا

[مغتربة]

بعون الله إحنا من الدفعة اللي عبرت سنة 89 .. يعني أنا من ابطال العبور وساكن في مدينة العبور وبأروح سوق العبور .... ... واللي مسيو زكي بشتيكها رزعنا أمتحان فرنساوي طلع من نخاشيشنا ..

فتصوروا كل اللي درسناه كان 3 سنين بس وقشور و4 أو 5 فيربات avoir , aller , etre و faire وأخواتهم ... ومتعودين على أختار من بين الأقواس وصح ولا غلط ورتب وحاجات من دي وخلافه ..

يجيلك سؤال وعليه درجة كبيرة يقول لك تخيل نفسك ريشة وطايره وبتشوف معالم مصر ( على ما أتذكر ) أو إنت حنطور وبتلف في مدينة الأقصر فأوصف لنا شعورك

حنطور ؟

إحنا بصراحة كنا حنطور من الفرحه والله ساعتها

وكتاب الله اللجنة كلها قعدت بتاع نص ساعة كل واحد شاكك في نفسة ...

وكل واحد فاكر إن دي أسئلة الثانوية العامة بتاعت مدارسة ( شارل ديجول الثانوية المشتركة بإدارة شرق باريس التعليمية ) ووصلت لنا بالغلط وقلبت مع بعضنا بضحك هيستيري ... خصوصاً أنا .. لأني عُمري ما ركبت حنطور ... طب أعمل إيه ... واساساً حنطور يعني إيه عشان أتحنطر أنا ؟

طبعا عرفاه يا سين سين

لان اختى كانت من نفس الدفعه المحظوظه

بس هى عملت حاجه حلوه بصراحه

قطعت ورقه الامتحان فى اللجنه

و المراقب علشان كان شايف حالتها و حاله الى فى اللجنه عامله ازاى صرف لها واحده جديده ( ده ممنوع اصلا )

و لسه محتفظين بورقه الامتحان دى للذكرى الغابره قصدى الخالده

و كان من اختيارات التخيل الاخرى انك ورقه نقود قديمه او قطعه روبابيكيا :sad: :sad:

[herohero]

ولو جتىالامتحانات سهلة جدا ايه اللي هيحصل ولا حاجه هنقول سهلة المجاميع هتعلى هنلاقي 99 يادوب يدخل طب هل منطقي مثلا انك تجيب 99.5 يعني كلام مش منطقي

الامتحانات صعبه ولا سهلة النمهم ف الخيبة الكبيرة بعد ماتتخرج من هندسة ولا تجارة ولا طب

يافرحتى واظن هنا منتدانا مليان ويقدر يقول لنا بيني وبينكم شايفينها فرقت بتطلع من الكلية محتاج تذاكر تاني وتطور نفسك يعني مش فاااااااااااااااااارقه انا ندمان اني حرقت دمي زمان لانها مش فاااااااااااااااااااارقه

[bentmasria]

من مصادر موثوق بها (منزل اختى الكبرى) ابنتها المتفوقة طوال عمرها قالت بهدوء شديد

الانجليزى العادى طويل وصعب وفيه مصطلحات عمرنا ما شفناها واحنا لغات اومال الباقى يعملوا ايه

أما العربى فأنا حقولكم سؤال

ما مضاد كلمة ظعنوا (انتشروا - تفرقوا - تجمعوا) يمكن موش فاكرة تحديدا الثالثة السؤال هنا ايه الفرق بين انتشروا وتفرقوا وياترى الطالب يعمل حادى بادى مثلا ده غير موضوعات التعبير عن الهجرة الغير شرعية عربى ولغات والترجمة عن الصيد الجائر هههههههههههه انا يمكن كنت حليتهم بس موش متأكدة من جيل 2010 وربك يسترها ع الباقى

حزن الطلبة على مجهودهم فادح اللغات بالنسبة ليهم المفروض بتحقق نمر ومجموع موش بتطيرها

خير يا معالى الوزير هى الهندسة راجعة 76 % زى 1985 ولا ايه؟؟؟؟

[صافى]

وبعدين انا عاوزة افهم حاجة ولادنا مالهم ومال البركان الى حصل فى ايسلنداااا والمصطلحات المكلكعة الى على حد قولهم ما خدوهاش خليهم

فى الى بيحصل فى مصرر

هو ذكى دة عاوز يفرد الوعوة وخلاص والضحية تبقى العيال الغلابة واهاليهم الى صرفو دم قلبهم

طب لما نشوف هيعمل اية فى الى قالة

بس يارب وما تتفبركش حكاية التصحيح دى وينصف العيال زى ما قال وما يضيعش تعبهم طول السنةعلى الفاضى اللهم ما امين

تم تعديل 15 يونيو 2010 بواسطة صافى

[Alattar]

لجنة تقييم امتحان الإنجليزي: شكاوي الطلاب كاذبة!

نقلا عن جريدة الجمهورية :

تحدت اللجنة الفنية لتقييم اسئلة امتحان اللغة الانجليزية للصف الثاني الثانوي مشاعر أولياء الأمور والطلاب.. ورفعت تقريرها إلي الدكتور أحمد زكي بدر وزير التربية والتعليم بما يؤكد أن شكاوي الطلاب من صعوبة الاسئلة لا أساس لها.

قالت اللجنة حسب مصادر حضرت الاجتماع الذي تم عقده برئاسة نبيل الدمرداش نائب رئيس عام الامتحانات إن الاسئلة جاءت من المنهج المقرر ولم يكن بها أية اخطاء فنية أو مطبعية وكان من بينها 15% للطالب المتميز ومثلها للفهم والتحليل والاجتهاد الشخصي و70% للطالب العادي.

اجمع اعضاء اللجنة علي أن الامتحان يقيس قدرات الطلاب المختلفة ومطابق للمواصفات والمعايير.. وانه لا داع لادخال أية تعديلات علي نماذج الإجابة أو إعادة توزيع الدرجات.

من جانبهم اعلن المسئولون بالوزارة رفضهم التام التعليق علي شكاوي الطلاب مؤكدين أن التعليمات صريحة لديهم بعدم الرد علي اسئلة واستفسارات الصحفيين.

رفضوا الرد علي تليفونات الصحفيين التي أنهالت عليهم منذ الصباح للحصول علي أية تصريحات تطمئن أولياء الأمور والطلاب.. ولم يصدر أي بيان رسمي من الوزارة بشأن هذا الامتحان.

ورغم ذلك اكتفي الدكتور احمد زكي بدر وزير التربية والتعليم بارسال بيان بالفاكس إلي الصحف يؤكد فيه رفضه التام عودة المدرسين المتغيبين عن أعمال المراقبة في امتحانات الثانوية العامة قائلا إنه لا تراجع عن قرار وقفهم عن العمل لحين انتهاء التحقيقات معهم في واقعة التغيب بدون عذر عن عمل رئيسي مثل المراقبة علي لجان الثانوية العامة. أكد الوزير في البيان ان كل حالة تغيب سيتم التحقيق معها علي حدة وان الحالات المرضية والخاصة سوف توضع في الاعتبار عند التحقيق.

الطريف ان البيان الذي وصل بالفاكس.. يؤكد التعامل الانساني من جانب الوزير مع القائمين علي أعمال التصحيح في مدينة مبارك حيث أمر باعفاء احدي المدرسات من أعمال التصحيح تقديرا لظروفها بعد أن اشتكت له بان لها ابنا معاقا. وايضا استبعاد مدرس آخر اكتشف الوزير من خلال مناقشته ان ابنته من طلاب الثانوية العامة هذا العام بالمخالفة للضوابط الموضوعة في اختيار المراقبين

شفتوا .. العيال طلعوا بيتدلعوا..و المسئولين طلعوا مش مسئولين.

و الامتحان طلع سهل و في مستوي الطالب الحمار كمان.

[hakeem]

انا هتكلم عن الانجليزى بتاع 2 ثاثوى..الامتحان بصراحه كان غريب جدا وخاصه قطعه الفهم بتاعت الايماءات دى ..والله استغربت جدا لما ترجمتها طبعا على الجوجل ترجمه كنت حاسس ان بعد ما اكتبهاله هيقولى ايه يا ابنى اللى انت كاتبه ده...!

بصراحه امتحان تعجيزى جدا جدا وبتوع اللغات بيشتكوا امال الغلابه بتوع المدارس العاديه اللى زينا يعملوا ايه...؟احنا كل وزير يهبط علينا من السما يعكنن علينا عيشتنا ماهو مش حاسس الناس بيجرلها ايه طيب مش كان من باب اولى انه يهتم بالعمليه التعليميه اللى معدومه فى مدارسنا اصلا وبعد كده يتفنن فى وضع الامتحانات ..حاطط ايده فى ميه بارده..لا وبعد كده بيتحدى الطلبه وانه مستعد ان يقعد فى بيتهم ويروح لحد بيت اللى هيجيب 85%ويسلم عليه ..لا يا سيدى متشكرين الله الغنى عن سلاماتك..وطبعا هتكمل بوزاره التعليم العالى اللى طبعا مش هينزلوا تنسيق الكليات علشان العيال تتوكل على الله ويبيعوا اللى وراهم واللى قدامهم علشان يروحوا جامعه خاصه ..سيناريو واخراج ممتاز..يعنى طبعا الطب لو كان من 98%مش هينزل مثلا ل 85% ..يقفلوا الكليات دى ويحولوها لمستشفيات للامراض النفسيه العصبيه لخريجى الثانويه العام دفعه احمد زكى بدر

انا بقترح ومش عارف اقتراحى ده لمين ان الساده الوزراء يتعمل عليهم فحوصات نفسيه وعصبيه قبل ما يبلونا بيه.مش عارف الحكومه عايزه مننا ايه نسيب البلد ونمشى ..وانا عن نفسى اتمنى الحل ده لانه يناسبنى اوى..بدل ما اتجنن

كفايه حرام عليكوا كرهتونا فى بلدنا..

[hazemtara]

هذه حقيقة فعلاً

بعض واضعي الأمتحانات وخصوصاً في الثانوية العامة بيبقى عندهم مشاكل نفسية .. ضعف جنسي مثلاً .. تبول لا إرادي ... حد كان بيخوفه بأبو رجل مسلوخه وهو صغير ... تاه من أهله في مولد وناس خدوه يشغلوه في التسول ... كده يعني

مُدخلتك ذيذة يا سى السيد & وطلعت من دفعة الحنطور دة إنت غلبان يا راجل :) :unsure: .

زُمل يعنى

[صافى]

الجديد بقا يا جماعة انلجنة امتحان الانجليزية للصف التانى الثانوى تتحدى مشاعر اولياء الامور والطلاب وترفع تقرير الى وزير التربية والتعليم يؤكد ان شكاوى الطلاب من صعوبة الاسئلة لا اساس لها

بمعنى اصح ضربنى وبكااا وسابقنى واشتكى هى دى مصررر :)

[se_ Elsyed]

الجديد بقا يا جماعة انلجنة امتحان الانجليزية للصف التانى الثانوى تتحدى مشاعر اولياء الامور والطلاب وترفع تقرير الى وزير التربية والتعليم يؤكد ان شكاوى الطلاب من صعوبة الاسئلة لا اساس لها

بمعنى اصح ضربنى وبكااا وسابقنى واشتكى هى دى مصررر :)

لأ يا صافي هانم .. ولا تحدي ولا حاجه

هي عادتهم ولا هايشتروها

حتى لما يكون السؤال يحتوي على خطأ .. لا يعترفون بذلك

وأنا دايماً بأقول إن المسئولين بتوع الامتحانات عندهم تصريحين تلاته شايلينهم في الدرج ..

وكل سنة في الأمتحانات يفتحوا الدرج ويدرمغوا الدنيا بالتصريحات المحفوظة دي .... زي

الأمتحان في مستوى الطالب المتوسط ( 105 % وإنتي طالعه كده يعني )

الأمتحان من الكتاب المدرسي وليخسأ مؤلفي الكتب الخارجية ( الكتب المدرسية اللي من أول السنة بتتباع للتابعي الدمياطي عشان يقرطس فيها طعميه )

الامتحان فضح مراكز التقوية والدروس الخاصة ( هههههههههه وكأن كفتجية اللي شغالين في المراكز دي ومش هما هما المدرسين بس بيروحوا البيت يركبوا دقن ويسعوا على أكل عيشهم .. عيش مين .. قول أكل البغاشة والمربى اللي بالقطشة )

------

كان نفسي أحمد زكي بدر يفاجئنا بأصطحابه لقوات من مكافحة المخدرات ويهاجم اوكار الدروس الخاصة ومراكز التقوية اللي على عينك يا تاجر ومبهدلينا اعلانات عن صاروخ الكيميا وامبراطور الرياصة وفيلسوف اللغة الأنكليزية وراقصة مصر الأولى في الأحياء

لكنها سبابيب وكل واحد بياكل عيش

[Howayda Ismail]

الجديد بقا يا جماعة انلجنة امتحان الانجليزية للصف التانى الثانوى تتحدى مشاعر اولياء الامور والطلاب وترفع تقرير الى وزير التربية والتعليم يؤكد ان شكاوى الطلاب من صعوبة الاسئلة لا اساس لها

بمعنى اصح ضربنى وبكااا وسابقنى واشتكى هى دى مصررر :)

الحكومة اصدق ياناس اسهل حاجة التقارير وعندكم التقرير الطبى لخالد

[Alattar]

خد عندك دي كمان

اغماءات وبكاء هستيري في امتحان التفاضل .. وشكوى من السؤالين الرابع والخامس

مصراوي - خاص - شهدت لجان الامتحانات بالثانوية العامة حالات انهيار وبكاء واغماءات عقب امتحانات مادة التفاضل والتكامل بسبب صعوبة الامتحان.

واشتكى الطلاب من السؤالين الرابع والخامس ووصفوهما بأنهما معقدين وخارج المنهج وغير مسبوقين وغامضين.

وطالب الطلاب وزير التربية والتعليم بالتدخل لإعادة توزيع درجات الامتحان.

ومن جانبه نفى محمد مرعي وكيل وزارة التربية والتعليم بالمحافظة في تصريحات خاصة لمصراوي ورود أية شكاوى حول الامتحان إلى غرفة المتابعة.

وقال إنه سمع عن صعوبة السؤال الخامس من بعض أولياء الأمور لكن أحدا لم يتقدم بشكوى رسمية حول الامتحان حتى الآن

و اللي أنا متأكد منه ان الامتحان سهل..رغم اني ما أعرفش حاجة في التفاضل ده..

بس هو كده و خلاص..

ماليش دعوة.