بمناسبة زواج الاخت نورا ---- بعد كام شهر

[lالمطحون]

اولا أقول لكل شاب وشابة مقبلين على الزواج ألف مبروك مقدما ؛ شايف الاخت اللى هناك ديه مبسوطة قوى ومكلبشة فى ايد خطيبها وكأنه فأر ووقع فى المصيدة ؛ وشايف كمان الاخ اللى هناك مبسوط قوى واسنانه بتلمع ؛ ربنا يفرحك ياسيدى طبعا هتكمل نصف دينك ؛ بس نصيحة من أخ اقعد مع حد كبير قبل ما تقدم على موضوع الجواز ؛ النصيحة واجبة فى المواضيع ديه ؟؛ ولو لسة مصمم ربنا معاك ؛؛ وطبعا كلكم عارفين الطبع بيختلف من راجل لراجل ومن ست لست ؛ مثلا فيه زوجة شكاية وكمان فيه رجالة تموت فى الشكوى من زوجاتها ؛ والمشكلة لو تدخلت أطراف خارجية ؛ أم الزوج تمصمص بفمها و تقوله خلاص ياحبيبى بتشتكى من أيه -- السهم خلاص نفذ ؛؛أنا عارفة كانت فين عنيك لما أخترتها ؛ وطبعا أم الزوجة مش هتسكت لازم هى كمان تقول لبنتها هى كانت فين عنيكى يا يمامة لما دورتى بأديكى على الندامة ؛ اللى ؛ اللى-- وطبعا كل قصائد الشعر تطلع على الزوج ؛ --- المهم حدث الزواج والحياة جميلة هادئة لحد لما المدام تطلع حامل

شعور جميل جدا أن راجل يعرف أن زوجته حامل بيكون سعيد وكذلك هى فى منتهى السعادة ؛ لكن فيه زوجات بتحب تدلع على جوزها شوية وفيه زوجات بتتقل العيار شوية فى الدلع لدرجة تجنن الراجل ؛ لكن هى طبعا عايزة تعرف غلاوتها عند جوزها ؛؛ مثلا تقول له وهو مرهق وداخل السرير علشان يرتاح شوية

أنتى هتنام

أيوه ياحبيبتى علشان عندى شغل الصبح

ياسلالالام --تعرف نفسى فى أيه

نفسك فى ايه ياحبيبتى وهو يغالبه النوم

نفسى هفتنى على المانجو

بس ده مش الموسم بتاعها ؛نامى ربنا يهديكى لما تطلع هأجيبها

أنت واخد الموضوع ببساطة ليه انتى مش عارف أن البيبى ممكن تطلع واحمة فى دماغه لو مأكلتش مانجو

حاضر ياستى الصباح رباح بكرة لما أخرج من الشغل هابحث لكى فى كل السوبر ماركت عن المانجو

الصبح أيه أنتى عايزنى أنام وانا نفسى فى المانجو

ياستى حرام عليكى تلاقى كل المحلات قفلت دلوقتى ؛ وأنا كمان نفسى أنام

المهم ياجماعة الخير لازم تزززززن على دماغه ذى النحلة لحد لما يتحقق لها اللى عايزاه ؛؛ وطبعا الوحمة بتختلف من يوم للتانى النهاردة عايزة مانجو بكرة عايزة أبو فاروة وبعده عايزه بطيخ ؛ وكل يوم واحمة جديدة ؛ لحد لما توضع بالسلامة وطبعا الزوج المسكين عليه أنه يتحمل علشان خاطر عيون البيبى ؛ وتمر الشهور وربنا يكرمه بحمل تانى ؛ وطبعا هو فرحان لكن قلقان شوية من اللى هيحصل ودماغه تشتغل ؛ طبعا زوجته مش هتسيبه ولازم يشاركها فى شغل البيت وياويله وياظلام ليله لو فكر أنه يعترض ؛؛؛

ومن أشد الأسلحة التى تستعملها الزوجات فتكا سلاح الأولاد

وهى تبدأ باستعمال هذا السلاح منذ البشائر الأولى لقدوم طفل سعيد

ومن العجيب أن الزوج يكون متلهفا جدا وينتظر هذه البشارة على أحر من الجمر

المسكين لا يعرف أنه فى اللحظة التى يظهر فيها ذلك التحليل إيجابيا ، تكون بداية النهاية لأيامه كملك متوج على عرش قلب زوجته ليصبح باقى العمر تحت أقدامها هى والأولاد

أذكر ذلك اليوم جيدا وبسذاجة اكتسبتها من مشاهدة أبطال الأفلام العبيطة قلت لها

….. ارتاحى تماما ولا تقومى بأى مجهود (آآآآآآآه كم ندمت على هذه الكلمة )

…. لا أريد أن أتعبك يا ((حبيبى )) ( هذه أخر حبيبى يسمعها أى زوج )

مرت الأيام وأنا سعيد جدا بالوقوف فى المطبخ مصطحبا كتاب الطبخ لأعد الطعام بينما زوجتى جالسة فى السرير وبيدها الريموت كنترول تقلب القنوات التلفزيونية وتأكل الفول السودانى ( أكلت حوالى نصف طن منه حتى موعد الوضع ) وتصرخ من وقت لآخر طالبة منى إغلاق باب المطبخ لأنها لا تطيق رائحة الطبيخ

ثم تصرخ كل نصف ساعة

…….أنا عايزه شاى

أعد الشاى بسرعة وأهرول لكى أعطيه لها وعندما أحاول دخول الغرفة تصرخ

خليك بره لا أطيق رائحتك بصل إفففففف

بعد الوضع يتواصل انهيار المركز الاجتماعى للزوج ويصبح كما مهملا تماما

وحتى لا أكون متجنيا فإن هذا يكون وضعا مؤقتا ينتهى بعد ثلاثين عاما فقط كما أخبرنى جدى رحمه الله

كم من الليالى قضيتها نائما فى الصالة لأن المحروس نومه خفيف ويزعجه صوت شخيرى

تعللت بالصبر على أساس أن النوم فى الصالة لن يدوم أكثر من سنة ونصف فقط

تنازلت تماما عن فكرة المطالبة بأى خدمات فى هذا البيت حيث أن هناك رسالة مسجلة على لسان زوجتى ( يمكن سماعها لعدد لا نهائى من المرات ) عندما أطالبها بأى شئ

….. أنا سهرانة طول الليل بابنك

للأمر مميزات أيضا فلقد اكتشفت موهبتى فى الطبخ وكذلك مقدرتى الرائعة على كى 3 قمصان خلال 10 دقائق فقط

كما أصبحت أستطيع إدخال الخيط فى الإبرة من ثانى أو ثالث محاولة فقط

عندما يصل الطفل إلى مرحلة الإدراك تبدأ الزوجة فى تدريبه على مبدأ مهم هو ( الولاء والاستهزاء )

حيث يكون الولاء من نصيبها وطبعا لا يبقى للأب سوى الاستهزاء

علاقة الطفل مع الآخرين تُبنى على أساس احتياجه لهم فالطفل يحس بأن من يلبى احتياجاته هو الأهم والأفضل

لذا تحرص زوجتى على أن تكون هى الحكم الفصل فى جميع مطالب الأولاد

لا زلت أذكر ذلك اليوم عندما عدت بالحلوى من الخارج كى أعطيها لأبنى عندما كان فى الثانية من عمره ، دخلت من الباب فجرى الولد وتعلق بى ، أخرجت له الحلوى فأخذها فرحا وقطع المشهد الجميل صوت النذير صائحا

….. من قال لك تعطيه حلويات

….. وما المشكلة

…. طبعا لا توجد مشكله ألست أنا التى أجرى ورائه بالطعام طول اليوم كيف سيأكل وجبته الآن هذا الحلويات سوف تسد نفسه عن الطعام

…… لم أكن أعرف أنه لم يأكل

…… هات هذه الحلويات

ونزعت الحلوى من يده ، بكى الطفل ونظر إلى مستجيرا بى فوجدنى أطأطأ رأسى مهزوما

فى مثل هذه اللحظة يدرك الطفل أن سلطات أبيه تقل عن سلطاته هو شخصيا ويتجه إلى إرضاء أمه فقط

أذكر المرة الأولى التى طلبت منى زوجتى إطعام الولد

…. أنا تعبانه أكِل الولد

…. حاضر

حاولت أن أقنع الولد لكنه رفض تماما ، اكتشفت أن زوجتى لا تطلب منى إطعام الولد إلا وهى متأكدة تماما أنه شبعان ولا يمكن أن يأكل أى شئ

وهذا يحقق للزوجة عدة أهداف

- حرق دم الزوج

- تدريب الولد على رفض أى شئ من والده

- معايرة الزوج بأنه ( حتى لا يستطيع إطعام طفل )

- تقديم مشهد ترفيهى لنفسها وهى ترانى أتقافز مثل الكنغر الأسترالى وأتكلف الإتيان بحركات قردية لعل هذا يُرضى الولد ويجعله يأكل

وقد حللت هذه المشكلة سريعا بشكل أذهل زوجتى ولم تستطع أن تجد له تفسيرا أبدا ، حيث كنت أدعى دائما أن الولد لا يأكل طالما هى موجودة فكانت تغادر الغرفة وبعد 5 دقائق أخرج إليها بالطبق فارغا وأنا والولد نضحك فى سعادة وحبور

وانتهز هذه الفرصة لشكر العاملين بشركة سيريلاك على منتجهم الجديد (سيريلاك فواكه) الذى خلصنى من ( سيريلاك قمح ) الذى لم أكن أطيق طعمه !!!!!!!!

أقول لكل شاب مقبل على الزواج - حياة سعيدة مقدما

ياترى أنا من الازواج اللى بيشتكوا؟؟؟

[Lighthouse]

اخي المطحون

موضوع جميل ربنا يجعلك ذخر لكل الاخوات في محاورات المصريين حيث انك تعطي القدوة لكل الرجال بالتعاون مع زوجاتهم

واعجبني جدا جدا نظرتك التفاؤلية لنصف الكوب المملوء

وروح التعاون الصادق بدون من او شكوي وتذمر او محاولة تحريض الغير على التمرد :D

ياترى المدام بتاعتك بتدخل محاورات المصريين علشان نرحب بيها ونوريها الموضوع ده :unsure:

:blink: bk:

[سقراط المصري]

طحن- يطحن- مطحوناً

سقراط

[BenNeal]

صحيح اللى يشوف مراتات الناس تهون عليه مراته.

انا الحمد لله جاهل تماما فى امور المطبخ و استسهل الأكل خارج البيت و مراتى غاوية فستق و برتسل.

بس بصراحة انا لا احن الى ايام العزوبيه اطلاقا و احمد الله على نعمة الزواج و الذرية.

[فــيــروز]

عندما يصل الطفل إلى مرحلة الإدراك تبدأ الزوجة فى تدريبه على مبدأ مهم هو ( الولاء والاستهزاء )

ايه العظمه دى يا استاذ مطحون :P

يا ريت نورا كانت اتجوزت من زمان عشان نشوف الحاجات الجميله ده :)

[se_ Elsyed]

صحيح اللى يشوف مراتات الناس تهون عليه مراته.

ومين سمعك يابن النيل ياخويا ..

ده انا يا جدع إتضح لي إني عايش في الجنة ..

الله يسامحك يا مطحون قلبت علينا المواجع ، قال وبيقولوا عليهم الجنس الناعم .. اومال إحنا نبقى إيه ؟

انا أطالب بوضع آليات محددة لإستعادة حقوق الرجال المسلوبة ولو أضطر الأمر لإستخدام القوة الجبرية أو اللجوء لجمعية حقوق الأزواج .

وأنا من هنا ومن هذا المكان المُبارك ( إنت تاني ) أوجه رسالة لأعضاء جمعية " يا رجال العالم إتحدوا " بضرورة عقد قمة رجالية لنتباحث سوياً في هذه التطورات الخطيرة .

أنا حذرت وماليش دعوة .