نفسك تقول لمين .... "واحشنى"

[لولا]

واحشنى ناس كتير ..

واحشانى قلوب كان وجودها حوليا بيدفينى

وحشانى مصر ..

وحشانى قوى

واحشنى الدفا اللى بيملا قلبى هناك حتى وانا فى عز الشتا..

واحشنى صوت ورق الشجر بالليل ,, ياااااااه قد ايه كان بيسحرنى

واحشنى الهوا نفسه هناك .. ستاير الأوضه اللى بتطير لما افتح الشبابيك

وحشنى صوت اذان الفجر ..

اذان الفجر فى مصر معرفش ليه مش شبه اى صوت بسمعه فى اى بلد ..

وحشتنى الوشوش .. ايوه الوشوش .. وشوش مصريه فى كل حته حوليا ,, فرحانه او زعلانه ..طايره او شايله كل هموم الدنيا .. المهم انهم وحشونى ..

وحشتنى الركنه ع الكورنيش .. باللللللللللللللللليل خالص .. النيل بيقى منور قوى .. وبتلاقى نفسك بتسرح والوقت ياخدك من غير ما تحس

وحشتنى حاجات هايفه قوى فى مصر .. لكن بجد وحشتنى

وحشنى اسمع صوت دوشه الشارع الصبح ..

روبابيكا .. وغيره وغيره

كنت وانا وسط الأصوات دى بسميها صوت الدوشه !!

حاليا بسميها صوت الحياة !!

وحشونى اصحابى .. قرايبى .. اهلى .. وحتى بواب العماره وصاحب الكشك اللى ع الناصيه !!

وحشتنى صوت المزيكا .. جنان الشباب ,,ضحكهم .. والسهر فى الصيف لحد الفجر ..

وحشتنى المصايف وريحة البحر واللمة والضحك اللى من القلب

وحشتنى خالتو

وحشتنى ماما

وحشنى بابا واخواتى

ووحشنى بيتنا

وحشتنى كراكيبى فى اوضتى القديمه

وحشتنى البنت الشغالة اللى كنت مش طايقه رخامتها ولا كلامها الكتير ,, بس وحشتنى

وحشتنى حاجات كتير

وحشتنى انا !! ايوه انا وسط كل ده ..

وحشتنى طاقة الرغى اللى كانت عندى والتهريج .. مش عارفه ساعات بتضيع منى ليه هنا !!

وحشتنى السينما ............... يااااااااااااااااااااه وحشنى العالم اللى كنت بنفصل جواه عن العالم لمده ساعتين ..

وحشتنى الحالة نفسها

الإنبهار

الخيال

واحساس كل جماليات الصوره والإخراج والأداء والتفاصيل الصغيره ..

واحشنى ايه ؟؟

واحشنى كتير

واحشنى كتير جدا ومهما قلت مش هخلص

لولا

يااااااااااااااه يا لولا تسلم إيدك اللى كتبت الكلام ده

كإنك بتقولى كل اللى جوايا وخصوصا آذان الفجر فعلا صوت الآذان فى مصر ليه طلعم تانى خالص غير اى بلد تانيه معاكى حق

انتظرى بقى الجزء التانى من مسلسل تقول لمين وحشتنى ..

ده لسه فى كلام ياما يا فتافيتو :rolleyes:

فكرتينى بموضوع لذيذ فضلنا الصيف اللى فات نتكلم فيه عن مصر .. والكلام مخلصش بجد لأن الشوق عمره ماخلص .

لولا

[doudy]

اقول وحشتنى لزوجى الحبيب سافر من 4 شهور

و ربنا يجمعنا على خير باذن الله :D

[مدى]

وحشتني البنوتة اللي كانت جوايا من يجي سنتين ثلاثة..

كانت طيبة اووي..بريئة اووي..هادية اووي..

كانت شايفة الدنيا حلوة كثيير..والناس الطيبين ماليين حياتها..

كانت شايفة الحياة غير شكل..ملونة ومليانة فرح وسعادة..

وحشتيني يا انا اللي من زماان..

[Nassarlink]

واحشني طبق سلطه خضراء طعمه حلو

بدون مبيدات

الخيار طعمه خيار

و الطماطم طعمها طماطم

والفلفل طعمه فلفل

زهقت من طبق السلطه البلاستك

وكمان كله سموم

[الباشمهندس ياسر]

وحشوني المضيفات

[اغابي]

بابا وماما

وحشتونى اووووى اوى -

وما كنتش اعرف ان حيجي يوم وكل الليالى اللى كانت بتجمعنا

حتصبح ذكرى اعيش عليها فى انتظار لقاء تاني يجمعنا

اتمنى لكم طولة العمر والصحة

:blink:

[pink rose]

جدو وحشني اوي

بس للاسف ما ينفعش اقابله في الدنيا تاني

اتمنى اني اقابله في الجنة ان شاء الله

[se_ Elsyed]

وحشتني حتة الفسيخ اللي اكلها زهيري .. أصلي كان نفسي فيها وهو مدي إيده الأول ولهفها

[fatfouta]

شخص ما......وحشنى جدااااااااااااااا

:blush2: :blink:

[Alrefaey]

مفتقد نفسى (بفتح النون) كثيرا ونفسى (بكسر النون ) ولو ساعة من ايام زمان

[shiko]

...وحشتنى ايها الطفل الذى لا طالما ربيته ...

احتضنته بين ذراعى ...دفست رأسه فى حضنى ...

حملته ...على كتفى ...لاعبته ...

والان صرت رجل ....على اعتاب الدنيا

تناهضنى ...تراجعنى ...

عفوا فلقد خفتت قواى ...واختفى حنينى لك رويدا رويدا ..

فصبرا جميلا ....

تم تعديل 13 مارس 2010 بواسطة shiko

[crossfield]

أقولها لبابا الله يرحمه ....

لزمايلى فى الكلية (أيام الدراسة يعنى)

لابنى اللى نايم دلوقتى وحارمنى من زنه :blush2:

[shiko]

....ساعات بياخدنى الحنين ...وبيبقى نفسى اقولك

*** :lol: وحشتينى يا صاحبتى ***

بس حقيقى ماتستاهليش ....

[لماضة مصرية جدا]

ماما واحشاني اوي....فوق حدود الكلمات

لو كلمتها بتخنق و بعيط.....لو مكلمتهاش هي بتعيط

انا وحشني احساسي اني اقوم الصبح و الاقيها في المطبخ و اخش احكي في اي حاجة لغاية العيش ما يجي من بره و نفطر مع بعض

واحشااااااااااااااااااااااااااني فوق الوصف

واحشاني جدا.......انتي مش هتقري الكلام ده

و انا مش هعرف اقوله لما اقابلك......بس لما نتقابل سيبيني ارمي نفسي جواكي

سيبيني و متسالنيش مالي لو بكيت

سيبيني ابكي

عايزة اتغسل

و مش هعرف اتغسل الا لو بكيت في حضنك

تعبت

وحشتيني

وحشتيني

وحشتيني

[pink rose]

لابني

عاوزة اقوله واحشني

مامي كان نفسها تشوفك يا حبيبي

[الباشمهندس ياسر]

وحشتني اللمة الحلوة هنا

ازيكم كلكم

اتوحشناكم

[Guest عضو قديم]

أنا عضو قديم   قديم جدا   و كلكم وحشتوني جدا

الفيسبوك ما يغنيش و لا يتساوى مع محاورات المصريين إزاى أنا مش عارف

هنا خاصة الأيام دي محتاجين  الحضن الحنين و النصيحة الصادقة

ربنا يخليكوا و يبارك فيكم

[الباشمهندس ياسر]

السلام عليكم 

ازيكم جميعا

اتوحشناكم يا الاكارم