نزيف الأسفلت - 2

[se_ Elsyed]

وغرضي من هذه المشاركة أنه في موضوع المرور بالذات يوجد الكثير من اللوم على المواطنين زيهم زي الحكومة، إما بسلبيتهم أو برعونتهم. بصراحة من الصعب جدا على أي حكومة السيطرة على المرور في الشارع المصري ولا أعتقد أن أي تشريع سوف يجدي ما لم يلتزم به أمثال سائقي المكروباص، ليس خوفا من الحكومة ولكن لقناعتهم به. بس الحكومة مش بتحاول على أي حال...

يا أستاذ عبدوس اتفق معاك تماماً ..

ولكن دعني أوضح لك عدة نقاط :

1- من بداية الخلق وربنا قال على البني آدم بإنه جهول وظلوم لنفسه .. وبالتالي بعث له الأنبياء والرسل على مر العصور ليهدوه إلى سواء السبيل .. ومش بس كده ، ده ربنا نفسه سبحانه وتعالى جعل هناك عقوبات لمخالفة تعليماته ..

2- طب تصور معي كده حضرتك وجود ألاف التشريعات والقوانين موضوعة لتنظيم المرور ولكن القائمين عليها إما مهملين أو مرتشين ( زي ما حضرتك شوفت بالتأكيد ظباط محترمين بيمدوا إيدهم للسائقين عشان ياخدوا رشوة لغض الطرف عن المخالفات الجسيمة التي يتركبونها)

3- بعد ده كله متوقع إيه من المواطن العادي او السائق ؟ .. إنه يبقى ملاك وينزل ينظم المرور ويُعبد الطرق ويغطي البلاعة اللي بقى لها سنين بنفس المنظر أو يقول لسائقي النقل المجرمين ما تمشوش في أقصى اليسار .. أو يقول عيب او كُخ لسائق الميكروباص الطفل اللي عنده 16 سنة وسايق من غير نمر ومن غير رُخص بجميع انواعها ويقتل طفله صغيرة كانت ماشيه بجانب والدها .. وفين ؟

سيادتك ده قدام المحكة اللي في العباسية وطلع الولد زي الوحش بسيارته المتهالكة وخطفها من جنب أبوها وسحبها أمام عربيته وفتتها حتت وساب العربية و هرب وبعدها بيومين النيابة تفرج عنه بكفالة وتقول أبوها هو اللي غلطان .. وأي نعم سائق ماشي بالوصف اللي قولت لحضرتك عليه ولكن أفرجوا عنه وقيدت القضية ضد مجهول وكويس إن أبوها ما تحكمش عليه بتعويض لإنه بوظ أعصاب الواد السواق المسكين

4- المهزلة اللي حصلت في طريق المحور العالمي الفخم أبو ملايين ... دي مين السبب فيها ؟ هل المواطنين السُمان اللي وزنهم ثقيل ووقفوا على الطريق جابوا له هبوط ؟ ولا أصحاب الضمائر الميته من المسئولين والوزراء ؟

5- هل قمت حضرتك بزيارة أي دولة عربية وشفت عسكري مرور غلبان جاهل وواقف بيشم أول أكسيد الكربون طول اليوم وعمال يشاور للعربيات ... وجنبه بلاعة مفتوحة ... او واحد سواق تاكس بيكسر قدامه الإشارة الحمرا وبيسب له الدين ( شوفتها عششششششششششششششششششششرات المرات بعيني ) وبيقوله لو كنت جدع خد نمرتي .. لإنه عارف ومتأكد إن بـ 5 جنيه ممكن يُسقط تلك المخالفة في نيابة المرور اللي عنده فيها واسطة جامدة ( وهو بتاع الشاي اللي في النيابة ) ، او إن العسكري بعد ما يكتب المخالفة يقوم الزبون غمزوا ببريزة يروم عامل الصفر خمسه والواحد اتنين وملزقه المخالف لواحد تاني ممكن يكون بقى له 20 سنة بره مصر وراكن عربيته في الجراج ؟

- الحل موجود وفي منتهى البساطة .. قوانين موضوعة .. ويقوم على تنفيذها ناس عندهم ضمير .. وتكون هناك جهات رقابية تقوم بعمل كنترول على جميع تلك الأطراف المشتركة في عملية المرور .. وتُشعر السائقين واصحاب السيارات بإنها ممكن أن تعاقبهم في أي وقت يرتكبوا فيه مخالفات .. زي كده ما بأبقى ماشي هنا الفجر وانا لوحدي في الأربع إشارات كلها والإشارة بتبقى حمرا ومع ذلك بأقف لإن الجميع هنا محترم فلابد ان اكون مثلهم ولا اخرج عن المنظومة .... فهل السعودية تقوم بالإنفاق على هذا النظام أكثر من مصر ؟

أبداً ولكن هناك إدارة محترمة وقوانين تُحترم وتثطبق على الكل ( طبعاً لا مانع من وجود اخطاء او إستثناءات .. إحنا مش ملايكه )

ومش هاقول بقى بنية أساسية وشوارع حرير ...

لو اتوجدت تلك المنظمة .. أقسم بالله لو عندك شوارع كلها جبال وعره ومطبات فسينصلح حال المرور وبعد كده أبقى صلح الطرق براحتك ..

[عبدوس الوزير]

أفهم وجهة نظرك وأتفق معاك في معظم ما قلت

بس أنا قصدي أنه لازم الالتزام بقواعد المرور يكون نابع من اقتناع الواحد بأهمية الالتزام، على الأقل حرصا على حياته، بدلا من الخوف من العقاب. حتى بالفرض جدلا أن الحكومة قامت بالالتزام حرفيا بكل ما قلت وبقت ذمم رجال المرور أشرف من الشرف، ما اعتقدش حيكفي انهم يسيطروا على كل الهيصة اللي في الشارع دي لأنه بكل بساطة لازم يكون هناك عسكري لكل قائد سيارة.

وده يرجعنا تاني لموضوع إن التغيير لازم يكون جذري و "على مستوى القاعدة" ونابع من الناس أنفسهم بحيث يعين كل واحد رقيب على نفسه ومايكسرش الإشارة ولو الساعة واحدة بالليل ومفيش جنس مخلوق في الشارع زي مابنشوف "في أوروبا والدول المتقدمة". ولو إني عارف أن الكلام ده نظري ومش واقعي بس هو الحل الوحيد لحل المشكلة حلا نهائيا وليس مسكنا

[أسد]

مصرع وإصابة 31 تلميذاً في تصادمين بسوهاج!!

شهدت الطرق السريعة - والفرعية - بمحافظة سوهاج حوادث مروعة راح ضحيتها تلميذتان وأصيب 29 آخرون بإصابات متفرقة.

.. تلقي اللواء جمال الجوهري مساعد الوزير لأمن سوهاج إشارة بوقوع تصادم بين سيارة أجرة سوهاج بسيارة أخري وكانت تقل 22 تلميذا في رحلة من طما لسوهاج وأمام قرية شطورة اختلت عجلة القيادة وأسفر الحادث عن مصرع طالبتين هما ثناء السيد هريدي 12 سنة وأزهار عبدالحميد أبوعوف 11 سنة وإصابة ثمانية آخرين.

وعلي طريق سوهاج - الكوثر وعند قرية الحواويش وقع تصادم مروع بسبب السرعة الجنونية أسفر عن إصابة 21 طالبا وطالبة انتقل إلي مسرح الحادث العميد عزت أبوالقاسم مدير المباحث والعقيد عصام الحمل رئيس فرع الشرق حيث تبين وقوع التصادم بين السيارتين 50580 أجرة سوهاج قيادة طارق فوزي و51503 أجرة قيادة الخطيب رفعت خضيري تم نقل 21 مصابا لمستشفيات أخميم المركزي وسوهاج العام.

.. انتقل اللواء سعيد البلتاجي محافظ سوهاج للمستشفيات التي يتلقي بها المصابون العلاج وأمر بصرف 200 جنيه لكل مصاب وقرر مخاطبة الدكتورة أمينة الجندي وزيرة التأمينات والشئون الاجتماعية لصرف مبلغ ألف جنيه لكل متهم.

الجمهورية 24 فبراير 2005

أهم الأسباب لزيادة حوادث المرور .. السرعة .. رعونة السائقين .. سوء أحوال الطرق .. إستهتار الناس بشكل عام بأرواحهم وأرواح الآخرين.

وهذا يؤكد الرأي القائل بأن من أمن العقوبة أساء الأدب ..

فالمطلوب في مصر كخطوة أولى للإقلال من مسببات حوادث الطرق هو تطبيق القانون بمنتهى الصرامة ..

فهناك بنود في القانون تنص على معاقبة السائق في حالة زيادة السرعة عما هو مقرر .. ونصوص تنص علىمعاقبة وحبس وتغريم من يقود سيارته وهو في حالة غير طبيعية تحت تأثير المخدر أو المسكر ..

ونصوص تنص على معاقبة المستهترين في صيانة سياراتهم .. وتنص على معاقبة من يقود سيارته وهي في حالة تخل بالأمن والسلامة.

المطلوب .. أمر بسيط ...

تطبيق وتفعيل القانون ..

وبصرامة .. وبدون تهاون ...

ولكن لأن الأمر في مصر (حوادث الطرق) لا تهز كرسي العرش ... فإنهم لا يهتمون بها .. ولكن إذا كان هناك من يتحدث عن التجديد أو التوريث فيتم ملاحقته ...

تم تعديل 24 فبراير 2005 بواسطة أسد