ضيف ثقيل

[amir]

أميركية تلجأ لغاز المطبخ للتخلص من ضيوف ثقيلين

كاليفورنيا ـ ا.ب: لم تجد امرأة أميركية وسيلة للتخلص من ضيوف غير مرغوب فيهم سوى اللجوء إلى استخدام غاز المطبخ، بيد أن الحيلة لم تجد نفعاً سوى أن قادتها منتحبة إلى المستشفى.

وقالت الضحية،51 عاماً، والتي لم يكشف عن اسمها، إنها وافقت على استضافة ك. فراي وأ. كينغ لقضاء الليلة في شقتها، إلا أن الضيافة امتدت حتى ستة أسابيع، أستغلها الضيفان في الإتجار بالمخدرات، حسب ما اورده موقع تلفزيون «سي.إن.إن» الالكتروني نقلا عن وكالة اسوشييتد برس.

وتفتق ذهن المضيفة باللجوء إلى فتح خط الغاز في المطبخ للتخلص من الضيفين الثقيلين، لكن الرياح لم تجر كما تشتهي، اذ بدأت هي تشعر بـ«الدوخة» والغثيان من رائحة الغاز القوية التي ملأت المكان.

وسارع رجال الاسعاف بنقل المضيفة، التي كانت تبكي بحرقة طول الطريق إلى المستشفى، فيما لم يتزحزح الضيفان من مكانهما.

وقال شريف من مقاطعة بيرناردينو إن اليأس والخوف دفع بالمضيفة وصديقها، 59 عاماً، باللجوء إلى الخطة الفاشلة.

واعتقلت الشرطة الضيفين فراي، 27 عاماً، وكينغ 29 عاماً، للتحقيق حول ادعاءات بيعهما للكوكايين، حيث تم العثور على عبوات من المخدر وأموال نقدية عند تفتيش الشقة

عجبتنى الفكره الجهنميه التى لجأت اليها هذه المرأه الامريكيه للتخلص من الضيوف الغير مرغوب فيهم !

يا ترى لو زارك ضيف ثقيل الظل حتتصرف معاه ازاى ؟

عايزين حكايات و ذكريات

[Farah]

يا ترى لو زارك ضيف ثقيل الظل حتتصرف معاه ازاى ؟

كنت باسمع زمان يقولوا تضع ابره في المقشه(الفاكيوم حاليا)

[فــيــروز]

ده سؤال صعب كتير يا امير prt:

الحقيقه فيه تصرفات عديده يعنى

زمان اما كنا صغيرين كان لى صديقه بتزورنا كتير

ممكن اكتر من مره فى اليوم

والموضوع ده كان بيجننى الحقيقه لانها بتحب تتكلم معايا وانا مش كل الاوقات باحب اتكلم و احيان باحب اسكت خالص

المهم يعنى اما كانت تزورنا و نظرا لانها كان ممكن تيجى الصبح ايام الاجازه "ساعة ما كنا فى المدرسه يعنى" ماكناش نفتح الباب .. الحقيقه انا دلوقت وانا باعترف بالموضوع ده باحس بتانيب ضمير جامد جدا وانى فعلا كنت فى منتهى قلة الذوق والسخافه .. ولو عندى بنت او ابن وحد من اصدقائهم عمل معاهم كده يمكن انصحه ينهى الصداقه دى

بس الحمد لله باقى الضيوف و لله الحمد مش تقال .. ده يمكن احنا اللى بنتقل عليهم عشان يستنوا عندنا lo:: خصوصا لو قضوا مده طويله و حبوا يمشوا نتضايق بسبب الفراغ اللى هيسيبوه ha)

تم تعديل 20 مايو 2004 بواسطة فــيــروز

[se_ Elsyed]

يا ترى لو زارك ضيف ثقيل الظل حتتصرف معاه ازاى ؟

كنت باسمع زمان يقولوا تضع ابره في المقشه(الفاكيوم حاليا)

دي من الموروثات الشعبية التى ليس لها أصل ..

وبعدين في ناس أساساً لما تغرزي الإبر في جسمهم مش في المقشة عمرهم ما هايمشوا .

[se_ Elsyed]

هناك موقف حدث امام عيني بصراحة ولم أستطع ان أُبدي فيه أي رأي ...

- واحد صديقي معه أولاده ( زوجه وطفلين ) وشقته واسعه أي نعم لكنها عبارة عن غرفتين واحده نوم والتانية للمعيشة وصالة صغيرة .. المهم واحد قريبه ( زوجته تبقى بنت خالة زوجته وبنت خالته برضوا في نفس الوقت ) كان منقول لمدينة الرياض للعمل في فرع الشركة ومعه زوجته وطفلين برضوا .. فكلمه أنه ينتظره في المطار لأنه مايعرفش الرياض .. صاحبنا راح لقى المعلم جايب شنطه ووشنط العيال وركب معاه العربيه على أساس إنهم رايحين البيت .. فصديقي قال له بيت إيه ؟!!! معليش انا البيت عندي صغير وماقدرش أستقبلكم أنا ممكن أوديك دلوقت أي فندق او شقة مفروشة .. فالتاني قال له طب نقعد عندكم ولو لحد مانلاقي شقة .. فأعتذر لله مرة ثانية وراح مودية فندق وسايبه وماشي ..

الموقف ده حصل من حوالي 3 سنوات ومن ساعتها قاطعوا بعض وصديقي إتعملوا سياحة في العيلة والكل لسه شايلها له لحد دلوقت .. لدرجة إنه ساعات يبقى نازل سوق او مركز تجاري هنا ويشوفوا بعض وكل واحد يعمل عبدو العبيط وكأنه ماشافش التاني...

فجه بيحيكلي الموضوع .. أنا بصراحة مالقيتش رد .. طب أقول له دي جليطة منك .. طب على الأقل هاتهم يستريحوا شوية ... طب ماهو هايقولي هما لو دخلوا البيت مش هايطلعوا تاني وحلني مش أقل من شهر لما يلاقي شقة ويفرشها .

والتاني برضوا ماعندوش ذوق .. لإنه بالتأكيد معاه فلوس وواخد بدل سكن من شركته .. يبقى ليه يذل نفسه ويتاقل على الناس .

- وفي نفس الوقت الشقة ضيقة ولا في سراير لهم ولا مكان يحطوا فيه سراير .

يعني الموضوع هنا هجوم بتباتة وهجوم مضاد بإحراج ....

أما حكاية إن الضيف له 3 أيام وبعدها لازم يتوكل على الله .. ففي رأيي الشخصي إن ده كان زمان لما البيوت كانت واسعة ومعظمها فيها مكان مجهز ومنفصل للضيوف .. أما الأن البيوت غالبيتها شقق ولو فيها مكان يبقى صاحب البيت يقوم الشغل يروح الشغل ويسيب الضيوف مع أولاده في البيت ؟!! ده طبعاً حرام ومخالف للشرع ( لو كان مش من المحارم ) .

الخلاصة .. إن لازم يبقى البني أدم حساس ويوزن الأمور بعقله ولا يُشعر الأخرين بإنه متطفل .

وإلا أنبوبة الغاز موجودة وعود كبريت وتخلص العملية وتتقيد ضد مجهول وهو اللي جابه لنفسه .

[Salwa]

انا قرأت الموضوع ده وفضلت اضحك لوحدى ..

تذكرت ان لما كان عندى حوالى 11 سنة وكنت اقضى اغلب الايام فى منزل جدتى ...وكانت لها صديقة دائما تزورها كل يوم

وتيجى الساعة 1ونصف الظهر يوميا وتظل لبعد صلاة العشاء ..

وانا كنت اشعر انها تأخذ منى جدتى وانها تشاركنا فى كل شئ بل بالعكس تفرض علينا بهذه الطريقة ان نطهى لها انواع الطعام التى تحبها ....بيت جدى من اكرم البيوت ...

فى يوم حضرت قبل الميعاد .حضرت فى الحادية عشر ظهرا وكانت جدتى تستعد لتناول القهوة ....وعندما رأتها قالت جدتى بفرحة ........اهلالالالالالالا جيتى فى وقتك ..وردت السيدة .

ليه ؟؟ خير ..فيه ايه ؟؟

ورديت انا بمنتهى العصبية فيه محشى ورقاق وبط ....

وكان يوم ....

شعرت السيدة بالحرج ......طبعا داروا الموقف ...لكن جدى وجدتى انبونى كثيرا وتعلمت فى هذا اليوم درسا لن انساه ..

اما بقى اللى بيحصل دلوقت ......

لازم افتح لكم موضوع مخصوص ......بيتهيألى مكانه باب الابتسام ولو انه موضوع جد جدا ....لكن مواقفه مضحكة ..

ربنا وعدنى باسرة مصرية ....موسرة جدا جدا ....وبخيلة جدا جدا جدا جدا ......حاجة صعب قوى قوى ..

رب الاسرة يعرف زوجى من ايام الدراسة ...

والمهم يقضوا شهرين هنا وشهرين فى مصر ....وهم 8 افراد غير الاحفاد .....

والمهم انا قمت بواجب الضيافة فى اول ايامهم هنا .ثم فوجئت بشئ غريب ......

حصلت لى حالة غريبة .......اكيد الأطباء ممكن يحتاروا فيها ..

اكثر لعنة من الاكتئاب ........

بقيت طباخة .......!!!!...دى نمرة واحد .

طول الصبح اطبخ ...هم...اكثر من فريق الكرة ...واحنا ماشاء الله 6...وبعد الغدا ........وبعد الظهر يفضلوا هنا او ينزل جزء منهم والباقى يفضل .وانا مقدرش انزل ./ واجب الضيافة /.والاقى نفسى جه على العشاء ......ومرة تانية فى المطبخ ...

على فكرة احنا مش بنحب نتعزم عند حد لأننا 6 اشخاص ..

ونفضل نعزم احنا فى بيتنا ..

بقيت محاسب قانونى ......!!!..دى نمرة اتنين .

اى مشكلة مع التحويلات واللى بيعملوه لاقامة مشروع هنا ....لازم نراجع عليه لانهم لايثقوا فى اى شخص آخر ..

بقيت مترجم قانونى ....!!!..دى نمرة ثلاثة ..

كل ورقة لازم اترجمها واقول لهم ده ليه وعلشان ايه .

مسئولة عن تخليص اوراق .....!!!..دى نمرة اربعة ..

تعالى معانا علشان ضريبة المبيعات وعاوزين نستردها ..

بقيت مرشد سياحى ......!!!..دى نمرة خامسة ..

لازم اقول لهم مفروض يروحوا فين وافضل انصحهم افضل شئ ايه ..

بقيت انزل معهم للشراء بصحبة اطفال ..وانا ليس لى طول بال لهذا ....!!!..دى نمرة 6 ..

وفجاة .........حصل ايه .....؟؟؟

زوجى اصبح سريع الانفعال والغضب بلا سبب وهو اساسا شخص هادئ جدا ..

سألت زوجى عن رأيه فى صاحبه .........وحدث ما لم اتوقعه ..

انفجر هائجا .....

مش عارف ايه اللى بيحصل ؟؟ حياتنا اتكعبلت كدة ليه ؟؟ هو انا مربية اطفال ؟؟؟ انا سايب شغلى ولغيت سفرياتى وبس وقتى كله اسمع مشاكل مليش دخل بيها ......

قلت له لازم نغير كل ده .......قاللى ....لا...دول ملهمش هنا غير ربنا واحنا .

قلت له ......بحبك وروحى فيك .....نازلة اعيش فى مصر ..

الضغط زاد عندى .......اولادك الاثنين اللى لسة فى الجامعة بيروحوا يذاكروا فى المكتبة علشان مش عارفين يذاكروا فى بيتهم ....انا مش فاضية لك ولا انت فاضى لى ......بقينا كأننا ترسين بيلفوا فى عجلة لصالح ناس تانية ...

اى كلمة نتكلمها مع بعض ...كل واحد فينا منتظر للتانى اى هفوة

انت متوقع انى حعترض وانا متوقعة انك حاتدافع .....

قاللى آخر حاجة كنت اتخيلها انك تقولى كلمة زى دى ..عاوزة تسيبينا ؟؟؟

قلت له الحقيقة ......قلت له ..انا كلمت اختى فى مصر لمدة نصف ساعة ابكى بحرقة ....

حاسة ان الناس دى بتستغلنى وتستغل طيبتك لأقصى درجة ..واختى قالت لى ان لم يتصرف هو تصرفى انتى ......

قاللى سيبينى افكر ونتكلم بكرة ......

فى نفس اليوم ....حضرت السيدة وابنتاها كالعادة ......تناولنا القهوة ..

قلت لها ممكن اكلمك فى موضوع ؟؟...قالت ..ايوة طبعا احنا اخوات .....قلت لها لأ لأ ..احنا مش اخوات ..احنا اصحاب..

ممكن قبل ما تيجوا ...تبقوا تتصلوا بى تليفونيا ؟؟ اصل اولادى بيذاكروا ......وانا بصراحة اصبحت لا اذهب لمكتبى واظل اغلب الايام فى المنزل علشانكم ......وهذا جعل اشياء كثيرة تتراكم وحياتى اتلخبطت ...

طبعا كلمة ذهول ..شوية ..بالنسبة للتعبيرات اللى كانت على وجهها ...

لكنها قالت لى انها تتفهم الوضع ...وقالت بصراحة عندك حق احنا زودناها قوى ..بس بصراحة كمان انتى اللى نسيتى طبع المصريين ......

قلت لها ليه .؟؟ هو انا اهلى مش عايشين فى مصر ؟؟والا هى كل الناس مش بتشتغل ؟؟

مازالوا يحضروا عندى .....بس مرة فى الاسبوع ..

وكل ما يتكلموا يقولوا ......على فكرة سلوى جريئة قوى ..

ده حقى ......فعلا بيتى كان حايتخرب.....كنا حانضيع كلنا ..حتى ولادى كانوا يقضوا كل اليوم فى الخارج ...هروبا ..

تعليق زوجى ؟؟

رغم انه اعترض على جراتى ..وقال كان مفروض آخد رايه ..لكنى اعلم انه فى داخله ..شكر لى كثيرا هذا التصرف خصوصا انه لاينسى انى بكيت وطلبت منه ..اما انا او صاحبك وعائلته ....

معذرة للاطالة ....لكن كان لازم احكى لكم تجربتى مع الضيوف الثقلاء ..وكيف انهم كان من الممكن يكونوا السبب فى دمار بيتى .....

[فــيــروز]

فعلا يا مدام سلوى حضرتك جريئه جدا ما شاء الله lo::

لكنها جراه فى الحق ha) اتمنى اقدر اتوصل اليها

بعض الناس قد يدفعوا الآخرين للخروج عما اعتادوا عليه من ذوق و ادب فى التعامل مع الآخرين اما يصدروا العبيطه prt:

[amir]

يا ترى لو زارك ضيف ثقيل الظل حتتصرف معاه ازاى ؟

كنت باسمع زمان يقولوا تضع ابره في المقشه(الفاكيوم حاليا)

طيب و دلوقتى نحط الابره فى الفاكيوم ازاى ؟؟

مفييش غير الحل ده prt:

[Farah]

حكاية الابره في المقشه دي هزار

اما انا فحكايتي حكايه مرت علي نهايه هذه القصه سنه

انا وزوجي بنحب يكون عندنا ضيوف(طبعا غلطنين وعرفنا غلطنا)

ففكرنا نبعت نجيب بنت اخي من مصر

جت البنت ودفعت انا جميع المصريف (محدش غصبني انا اللي عملت كده بمزاجي)

البنت كانت متخرجه من الجامعه وبتشتغل مدرسه ومرتبها في هذا الوقت كان حوالي 110 جنيه

جت البنت شاركت بنتي في حجرتها( بنتي في هذا الوقت 11 وهي 23 كل يوم الصبح وبليل خناقه ما بين البنتين وانا مش عارفه اعمل ايه حاجات عبيطه بيتخنقوا عليها (دي عايزه تنام علي طرف السرير ودي مش بتحب تنام جانب الحيطه ) اشياء من هذا القبيل

في الاول كنت باجي علي بنتي وبعدين كنت باجي علي الاثنين وبعدين قلتلهم قطعوا بعض مفيش عندي حل

نيجي للتصرفات العاديه انا لازم اسيب اللي في ايدي واروح ادور علي مدرسه لتعليم اللغه واودي الصبح واخدها بعد المدرسه طب ياحببتي متاخدي الاتوبيس النهارده لا ياطنط انا بتعب من الاتوبيس

ماشي عدت المدرسه لازم ندور علي شغل كل يوم اسيب اللي في ايدي واروح ادور علي شغل لغاية منلاقي شغل

لازم انا اوصل للشغل واجيب من الشغل معلش الناس لبعضيها ودي مهما كان بنت اخويا زي اولادي مع العلم ان اولادي بيعتمدوا علي انفسهم

كل يوم والثاني واحده جيبلها عريس ماشي حلو قوي نقابل العريس وصنيه رايحه وصنيه جيه وفي الاخر مينفعش مهو كل شي نصيب

في الفتره دي والتي طالت لمدة 5 سنوات انا تعبت البنت اخر دلع مفيش تعاون بالعكس تعاملها مع الكل حتي زوجي كأن البيت بيت عمتها وهم ضيوف عندها(بعشمها برده)

اشتغلت وطبعا والله كل فلوسها بالكامل في البنك

بدأ زوجي يشتكي وانا ارد دي بنت اخويا حرميها يسكت

بدأ الاولاد يشتكو عيب يبنت عيب يولد دا مهما كان بنت خالكو

انا بدأ اتعب لاني كنت حاسه انها حمل كبير علي وفي يوم من الايام المفترجه قلت لها بمنتها الصراحه قدامك ست اشهر من اليوم لتنزلي مصر لتتجوزي لتروحي تسكني مع اي واحده صحبتك

الدنيا اتقلبت علي

الستة اشهر بقوا سنه بس في الاخر نزلت مصر

العلاقه بيني وبينهم شابها بعض المشاكل

ولكن الحمد الله قدرت اتغلب عليها

المشكله الكبري ان اخت هذه البنت اخدت الفيزا وجيه في خلال شهر وانا مش عارفه اعمل ايه

[Lighthouse]

ياعيني يافرح

خمس سنين بحالهم mf)

وكمان اختها جاية

ومين بقى اللى قال لها تيجي tth:

:) f((:

[ragab2]

ضيوف مرابون

............

تربيت فى حى شعبى فى شبرا

وكانت توجد فى الحى امرأة فقيرة مسنة وابنتها الأرمل مع ابنائها الصغار من الغجر

وكانوا يسلفوا بعض العائلات التى تتعرض لأزمات مادية بسبب تربية أبنائهم فى مراحل التعليم المختلفة بعض من المال

فى نظير أن يفرضوا أنفسهم على هذه العائلات ويبتزوهم ماديا ويزوروهم يوميا وفى مواعيد تناول الوجبات ليفطروا ويتغدوا ويتعشوا عند تلك العائلات مع طلب ملابس لأبناء بنتها ولا مانع من أن تطلب قطعة من التى يلبسها أبناء العائلة بالاسم وبالتحديد والا غضبت وممكن أن يطلبوا الطعام فى غير أوقات الوجبات وهذا كان كل استثمارهم للقرض

أى فوائد القرض عينية

وكانت بعض هذه العائلات تتهرب منهم أو يرسلوا أولادهم لبعض للتحذير من أنهم قادمون

وكانوا أثقل ضيوف على وجه الأرض على هذه العائلات

الى

أن تتخلص العائلة منهم بدفع هذا المبلغ لهم الذى تم اقتراضه منهم حتى لا يروا وجوههم مرة أخرى وكسر قلة ورائهم

مع غضب هذه العائلة المرابية وصب اللعنات على أهل المنزل الذى سدد القرض

هل

رأيتم أثقل من هؤلاء ضيوف مفروضون ومبتزون

[Farah]

ومين بقى اللى قال لها تيجي

محدش قالها تيجي ولا عزم عليهم انا خلاص تبت مبعزمش ولكنها

قدمت في القرعه وخدت الفيزا

وانا قعاده اغني ظلموه

تم تعديل 20 مايو 2004 بواسطة Farah

[amir]

وانا قعاده اغني ظلموه

مدام فرح

بأختصار شديد

احجزى شقه صغيره لمده شهر واحد , و فهميها أن الحياه فى الغربه مختلفه عن مصر و انها لازم تعتمد على نفسها من اول يوم خصوصا انها اصبحت مهاجره شرعيه و عليها تحمل مسئوليه نفسها .

[Scorpion]

ازاي يا أمير... هي جايه من أوربا.. و الا أهلها من السويد.. دول من مصر... انا نفسي كأب هقاطع أختي لو أجرت شقة لبنتي تعيش فيها لوحديها في الغربة... و أعتقد أنك انت نفسك حتعمل نفس الحاجة...تستضيفها آه.. لكن زي ما انت قلت تفهمها انها لازم تعتمد علي نفسها.. يعني مافيش دلع و لا هجص... بس أشك ان مدام فرح حيجيلها قلب علي كده...

و بعدين هو ايه اللي بيحصل .. البنات هي اللي بتسافر لوحدها دلوقتي... هي اللي بتتعين في السلوم.. و احنا بنعمل ايه.. بنأزأز فجل ؟؟؟

[se_ Elsyed]

شيء عجيب جداً ان يأتي الزمن الذي يتحول فيه الحق إلى باطل والباطل إلى حق ...

يعني أبقى انا صاحب البيت وأتحول إلى الشخص المكسوف المحرج اللي خايف يأذي مشاعر الضيف التبيت بكلمة وأي تباته من شخص لازق 5 سنين عند الناس ... وياريته فقير او محتاج ( لا مؤخذه يا مدام فرح أنا باتكلم والله بشكل عام ) ولكن كل فلوسه بيحولها ويكنزها في حسابه وواكل نايم شارب على حساب صاحب المحل .

بصي بقى يا مدام فرح ، الحل موجود في الوش الأبلكاش ... يعني حضرتك تستضيفي الأخت اللي جايه دي فترة إنتي اللي تحدديها لحد ما تترستق في الشغل اللي بالتأكيد هايوفر لها سكن او هايدفع لها بدل سكن .. وبما إن حضرتك عايشه في الكويت يبقى لازم ولابد ان عمل بيفور السكن للعاملين بطريقة ما .. يبقى تنتهي الفترة دي وتكلميها بكل صراحة أنها لازم تعتمد على نفسها وتستقل بحياتها وطالما هي أرتضت إنها تتغرب وهي بنت بطولها كده يبقى تستحمل بقى .

ده إيه اللي إحنا فيه ده ياربي ....

[حشيش]

الحقيقة أنا مااخدش راحتى فى البيت فى وجود مثل هذه النوعية من الضيوف...يعنى عندما يزورنى أصدقاء تكون الزيارة ساعتين تلاتة أربعة وبعد كده ياإما ننزل كلنا إلى مكان عام لتمضية باقى اليوم أو يروحوا همه بالرغم من أنى أعزب وأقيم بمفردى فما بالك لو كنت متزوج وعندى أولاد...الزيارة لها أداب يجب مراعاتها...يعنى مثلاً لو عندى شغل بدرى الصبح ما ينفعش أسهر أضايف فى ناس ما وراهمش حاجة...

[amir]

ازاي يا أمير... هي جايه من أوربا.. و الا أهلها من السويد.. دول من مصر...

الحقيقه يا استاذ Scorpion

احنا مش من السويد و طبعا مشكلتنا هى الكسوف من الضيوف خصوصا لما يكونوا قرايب , يعنى انا حصل معايا نفس السيناريو اللى حصل مع مدام / Farah بس لحسن حظى لم يستمر للمده الطويله زيها و لكن لمدة 6 شهور بس , بس كانت كافيه لتعلم الواحد انه لازم يكون حازم فى بعض الاحيان بس للأسف أنا معرفتش كده الا دلوقتى اما ساعة وجود هذا الشخص عندى فكنت بتحمل على اعصابى و قلت الحمدلله أن البلد هنا بتعمل تأشيرة الزياره لمدة 3 شهور بس مع انى جددتها لمدة 3 شهور تانيين لحد ما ربنا كرمنا و حصل على عمل و كنت صممت فى نهاية المده على أن يمنحه العمل سكن مجانى أو مفيش داعى للعمل من اساسه .

و اظن افتكر فى مثل بيقول " يا بخت من زار... و خف "