يابا علمني الخيابه ... قال له تعالى عند إحتراف عماد متعب وأتصدر

[se_ Elsyed]

ليس دفاعاً عن عماد متعب لاعب كرة القدم

ولكن إقراراً لهيافة بعض المتمكنين في مهنهم كالمحامي أو عضو مجلس الشعب مثلاً

اللي سايبين الدنيا اللي مولعه في البلد .. وكل واحد فيهم عاوز يكسب بونطه على جثث الناس ..

مش لاقي كلمة اقولها غير

جاتكو القرف فيكو وفي مناصبكم

إليكم صلب الموضوع

" المحامي نبيه الوحشي يرفع قضية على اللاعب عماد متعب لسحب الجنسية المصرية منه لقيامه بالإحتراف في نادي ستاندرد ليج البلجيكي الذي يلعب له من العام الماضي لاعب إسرائيلي في خط الدفاع على سبيل الإعارة

النائب بالبرلمان جمال زهران يتقم بطلب إحاطة لمجلس الشعب لشطب إسم عماد متعب من سجلات إحتاد الكرة "

طبعاً يتحرق الصهاينه على أشكالهم العكره

لكن

أصل

يعني ما هم بيدخلوا عندنا كسياح وبيدنسوا كل شبر في البلد وكل يوم ريسنا بيقابل بقف فيهم وبيسلم عليه وبياخده بالأحضان كمان

وبعدين ما أحنا بنشترك في بطولات دولية وممكن تصادف إن في إسرائيليين بيشتركوا فيها وغصب عنك لازم تلاعبهم

إذن التطبيع والمقاطعة والضرب عالقفا ما يبقاش بالهيافه دي ...

وإذا كنت يا سي نبيه يا وحش ياللي رافع قضايا على نص سكان مصر .. إذا كنت عاوز تسقط الجنسية عنه ... ما تهبد لنا الريس كمان محضر ظُلم حتى يمكن ربنا يجعل على إيدك الشفا ومستعدين نمدك بالادلة المدينة له .

حتى الأخ جمال زهران ياللي ممثل للشعب ... إتقي الله وشوف البلاوي المتلتله اللي ماليه البلد

[ابو محمد بن مصطفي]

انا بقي مصمم علي رفع قضية لسحب الجنسية عن نبية الوحش لانه انسان مثير للاشمئزاز

وانه يختار اوقات مدروسه لاثارة البلبله في الشارع المصري لصالح اطراف معينة

جاتكو القرف فيكو وفي مناصبكم

وده اقل واجب

[mekkawy]

و الله يا سي السيد الموضوع عنوانع لفت نظري و قولت من الجرئ اللي كاتب ع الكورة في الهم اللي إحنا فيه ده و كنت داخل أشوط .. كورة باة

إنما فعلاً مفيش أهيف من كدة .. و بعدين إنت مالك يا عم (مش إنت يا س س ) ما يلعب ولا يحترف ولا يقلي بيض حتى .. متخليك في حالك و تتشطر على حاجة عدلة بم إنك راجل عندك إمكانيات .. حاجة .. تيــــــــــــت

مكاوى

[Alattar]

نبيه الوحش رافع تقريبا قضايا دلوقتي علي مصر بحالها

مش عارف ليه بيفكرني بمرتضي منصور

نبيه الحش يرفع القضايا...و مرتضي يملك الملفات.

ده ايه الحلاوة دي!!

أنا خايف أرجع مصر ألاقيه رافع علي قضية سحب جنسية..عشان سافرت السعودية

و ما شجعتش المنتخب في التصفيات..من الاستاد.

[Howayda Ismail]

نبيل الوحش هيج الدنيا على المصريين المتزوجين من اسرائيليات او من عرب 48 وطالب باسقاط الجنسية عنهم

وكان عنده حق واكثرنا سعدنا بهذا القرار لكن ايه اللى يعيب ان انسان ان اضطرته الظروف يلتحق بمكان فيه نيلة يهود

طيب ماطول عمر اليهود موجودين فى مصر حتى ان فى حوارى باسم اليهود موجودة حتى الان دون تغيير اسمها

اكثر الممثلين كانوا يهود وابو حصيرة المزعوم بيعملوا له احتفالات مساخر

وشرب خمر ومعظم الشركات اللى اتباعت خصخصة لاسم متعددى الجنسيات اكبر جنسية مساهمة هم اليهود

كارفور اكبر مراكز تجارية موجودة فى مصر يهودى وشركة الاسمنت اول ماتباعت كان ليهود

المعبد اليهودى اللى فى النبى دنيال منعوا هيئة الاثار المصرية من دخوله ولايجرؤ مصرى على دخوله الا ضباط

ضباط وعساكر الحراسة وشوف كم الاسرائيليين اللى بيدخلوه ولاتعرف الحكومة ايه اللى بيحصل داخله

الكلام ده نحاسب عماد اوغيره لو احترف فى نادى اسرائيلى ارحموا الناس ربنا يرحمكم كفاية تشكيك فى وطنية الشرفاء

نفسى يتكلم على حاجة من اللى ذكرتها لكن احنا مش بنقدر على الحمار ............. مع الاعتذار لعماد متعب

[tarek hassan]

بصرف النظر عن حب البعض لعماد متعب

بصرف النظر عن الانتماءات الكروية

بصرف النظر عن التطبيع الحكومي وليس الشعبي

بصرف النظر عن شخصية المحامي

بصرف النظر عن أشياء كثيرة جدا تشغلنا وعن كل ما ليس له علاقة بالموضوع

دا كأننا بنقول لكل لاعب مشهور افعل ما شئت فلا لوم عليك

يا جماعة اللاعب المشهور كل أفعاله المفروض تكون محسوبة وليس فيها شبهة

لأن دول الناس أحبتهم والمفروض إن الشباب عاملهم قدوته وكفانا تقديس للأشخاص

بس فيه حقيقة أنا متأكد منها مائة بالمائة لو كان عماد متعب رفض الاحتراف بحجة وجود إسرائيلي لكنا اليوم عاملينة بطل قومي وقلنا إنه أوصل رسالة مفادها الرفض الكامل لممارسات إسرائيل وآخرها هجوما البربري على أسطول الحرية مش عارف دلوقتي احنا بندافع عن إيه

هل لأن الرئيس بيقابل إسرائيلين وبيتعامل معاهم هل يكون حقنا كشعب نعمل كده

احنا ليه مدخلين الأمور في بعضها

وكل ما حد يتكلم يقولوا مش كفايه اللي احنا فيه وكأن اللي احنا فيه مبرر للسكوت عن وضع هو من وجهة نظري خطأ

يا أخ سين سين الراجل مقدم للقضاء قضية سيب القضاء يتكلم فيها بدل ما تحكم على كلامه قبل الفضاء بأنه قرف

عفوا لوجهة النظر المخالفة لجميع المشاركات

تحياتي

احنا سينا المضمون كالعادة واشتغلنا في شخصية المحامي يا ريت نرجع للموضوع ونشوف بعيدا عن الانتماءات الرياضية التصرف صح ولا غلط

تم تعديل 20 يونيو 2010 بواسطة tarek hassan

[Alattar]

بصرف النظر عن حبنا لعماد متعب

بصرف النظر عن الانتماءات الكروية

بصرف النظر التطبيع الحكومي وليس الشعبي

بصرف النظر عن شخصية المحامي

بصرف النظر عن أشياء كثيرة جدا تشغلنا

دا كأننا بنقول لكل لاعب مشهور افعل ما شئت فلا لوم عليك

يا جماعة اللاعب المشهور كل أفعاله المفروض تكون محسوبة وليس فيها شبهة

لأن دول الناس أحبتهم والمفروض إن الشباب عاملهم قدوته

بس فيه حقيقة أنا متأكد منها مائة بالمائة لو كان عماد متعب رفض الاحتراف بحجة وجود إسرائيلي لكنا اليوم عاملينة بطل قومي وقلنا إنه أوصل رسالة مفادها الرفض الكامل لممارسات إسرائيل وآخرها هجوما البربري على أسطول الحرية

هل لأن الرئيس بيقابل إسرائيلين وبيتعامل معاهم هل يكون حقنا كمصريين نعمل كده احنا ليه مدخلين الأمور في بعضها

وكل ما حد يتكلم يقول مش كفايه اللي احنا فيه وكأن اللي احنا فيه مبرر للسكوت عن وضع هو من وجهة نظري خطأ

يا أخ سين سين الراجل مقدم للقضاء قضية سيب القضاء يتكلم فيها بدل ما تحكم على كلامه قبل الفضاء بأنه قرف

احنا سينا المضمون كالعادة واشتغلنا في شخصية المحامي يا ريت نرجع للموضوع ونشوف بعيدا عن الانتماءات الرياضية التصرف صح ولا غلط

عندك حق.. بس لما عملوا لقاء مع عماد متعب نفسه..قال ان الاعب الاسرائيلي ده

كان معار و اعارته انتهت خلاص..يعني اللاعب مش موجود دلوقتي .

حبيت بس أوضح الصورة..و المفروض برضه المحامي المحترم كان يتحري كل حاجة في الموضوع ده

قبل ما يقول أنا هارفع قضية و الكلام الفاضي ده..

و بعدين رفع قضية..يعني لازم أدلة قوية

مش شوية كلام جرايد و لا مواقع..اتضح ان لا أساس له من الصحة.

[hanzalah]

عزيزي الاستاذ طارق

السلام عليكم

يا ريت نرجع للموضوع ونشوف بعيدا عن الانتماءات الرياضية التصرف صح ولا غلط

عندك حق

نرجع لاصل الموضوع

والحقيقة اني شايف ان المحامي السيد الوحش جانبه التوفيق هنا ايضا

اذ كيف اسحب الجنسية من لاعب محترف - اكل عيشه انه يتباع لنادي هنا وهناك بسعر عالي -

وكل ذنبه .. ان فيه احتمال يكون زميله في الملعب اسرائيلي !!

يا اخي الكريم .. انت نفسك ممكن شركتك ترسلك الصبح الى اي دوله في العالم بصفتك موظف كفء و ناجح

وترسلك في مأمورية لحل اشكالية في فرع لها في اي مكان على الارض .. وتفاجأ ان زميلك هناك اسرائيلي !!

بلاش

انت لو هاجرت أو ذهبت للعمل في اي دوله من دول العالم .. مايضيرك ان يكون زميلك في العمل اسرائيلي

اسرائيلي و فرنسي وانت تعمل في فرنسان في شركة فرنسية

او اسرائيلي ايرلندي وانت تعمل في ايرلندا في شركة ايرلندية

هل انت - استاذ طارق- لك ذنب في كل هذا وذاك

وهل قيامك بمهام عملك ووظيفتك على اكمل وجه وقتها

يعتبر

من وجهة نظر البعض

خيانه لبلدك الاصلي مصر!!

هل هذه وجهة نظر صائبة !!

تم تعديل 20 يونيو 2010 بواسطة hanzalah

[tarek hassan]

عليكم السلام ورحمة الله وبركاته أستاذنا الفاضل : حنظلة

هل هذه وجهة نظر صائبة !!

نعم لا ضير عليك وأنت مضطر

عندك حق نرجع لاصل الموضوع

- أصل الموضوع عندي ليس فيما فعله المحامي وليس شخص اللاعب ولكنه في مبدأ التطيبع الشعبي بحجة أن الحكومة تتعامل مع الكيان الصهيوني ولها نظريتها في ذلك ؟

- وفي أن لاعبا نسميه القديس لأنه رفع شعارا إيجابيا لغزة وآخر بدا وكأنه في الاتجاه المعاكس ندافع عنه

- الذي لفت نظري هو أن المشاركات هنا جمعيها تناولت الشخص القائل لا قول الشخص

اسرائيلي و فرنسي وانت تعمل في فرنسان في شركة فرنسية

او اسرائيلي ايرلندي وانت تعمل في ايرلندا في شركة ايرلندية

ما فهمته من الموضوع إن اللاعب إسرائيلي إسرائيلي وليس مجرد يهودي فرنسي أو يهودي إيرلندي ربما تكون هناك فرق

تحياتي أستاذنا حنظلة

تم تعديل 20 يونيو 2010 بواسطة tarek hassan

[لولا]

مش لاقي كلمة اقولها غير

جاتكو القرف فيكو وفي مناصبكم

آمييييييييين :lol:

بالنسبه للقضيه محل النقاش .. اتفق تماما مع رؤية الفاضل حنضلة .

تحياتى

لولا

[se_ Elsyed]

فرق كبير قوي أن يؤمن إنسان بقضية ويدافع عنها بإخلاص ..

وبين ان يدافع عن قضية لمجرد الشهرة والمنظرة

وهذا ما يفعله هذا الوحش

وإلا

ما موقفه من الأفلام التسجيلية الموثقة التي يُذيعها الصهاينة - موجودة بكثرة على النت بالمناسبة يعني - عن عمليات القتل الجماعي لأسرانا في حرب 67 ؟

ما يورونا شطارتهم ويرفعوا عليهم قضايا في المحاكم الدولية ؟

من كام سنة كده كان نفسي أمسك محامي مش فاكر إسمه .. وأقعد أضربة بالبوكس في مناخيره لحد ما أبططها له وأخليها بسوا وشه ...

البيه راح رفع قضية ما أعرفش في دايرة شبرا ولا فين ... يطالب فيها اليهود بتعويض عن الذهب اللي سرقوه من أهل مصر قبل أن يهاجروا إلى سيناء مع سيدنا موسى ...

لا تعليق غير موضوع البوكس ده .... وأفيدكم بأنني أقبل الشراكة .. يعني ممكن حد يشترك معايا بحيث أضرب أنا بالبوكس وممكن اللي يشترك يديله 50 شلوت على سهوا

[Howayda Ismail]

البوكس والشلاليت دى لها ناسها ولا ناوى تشتغل مخبر

ما هو الشعار الجديد بدل الشرطة فى خدمة الشعب اصبح شلوت لكل مواطن او مخبر لكل مواطن ايهم اقرب للمعنى!

[شمس العروبة]

طيب يعنى أنا عايز أقول لللاستاذ نبيه الوحش فكر معايا كده

لو عماد متعب راح فريق أوربى مفيهوش جنس لاعب اسرائيلى وقت التحاقة به ساعتها مكنش هيحصل اللى حصل ده ،طيب بعدها التحق لاعب اسرائيلى ساعتها برضه رد الفعل بتاعك هيكون ايه ؟

هل مطلوب منه ساعتها إنه يلم عزاله ويرجع على مصر ؟!!!!!!!!!!!!

يعنى الموضوع بالعقل وبعدين دى لعبة كرة فى الأول والأخر ومش مطلوب من كل لاعب يدرس تاريخ كل نادى أوربى هيروحله إذا كان فيه لاعيبة اسرائيلين بيلعبوا هناك وقتها ولا قبلها ولا بعدها ههههههههه

[Mr MAGED]

بغض النظر عن التخاريف اللي بيعملها الوحش

عماد متعب طلع وصرح ان فعلا ً كان فيه لاعب اسرائيلي معار للفريق الموسم الماضي

وانتهت اعارته ومشي خلاص .... لازمتها ايه الشوشرة ووجع القلب

الهي يرفع عليه قضية رد شرف