أتجوز ؟؟؟؟ ولا أشطب الشقة الاول...........

[mekkawy]

يا عالم يا ناس

شوية توكل على جرامين استخارة يا عم حسام

توكل مش تواكل عشان بس نتفهم صح

إنتوا بتحسبوا لسنييييين قدام .. ايه يا باشا طول الأمل ده ؟؟

توكل

مكاوى

[the consultant]

شوف يا معلم لو حتعد تحسبها بالقلم و البراية مش حتخلص و لا حتجوز ، انا اخذت قرار الزواج و شقتي لسة رسمة على ورق (يعني العمارة ما طلعتشي اصلا و انا في الدور ال 13 اصلي بتفاءل) و اتجوزت و اعدنا نتنطط من هنا لهنا لحد ما ربنا كرم و رحنا شقتنا و هي مش كاملة الفرش و اعدنا فيها لحد الحمد لله ماكملنا الفرش كله، رحنا مسافرين السعودية smk:

خلص و اتجوز و بعدين السعودية لا تجوز بدون زواج ده حتى يبقى حرام ، و على فكرة انا خطبت في سنة رابعة و اتجوزت مجرد ما اخدت تاجيلة الجيش و كان عندي 23 سنة. إنجز يا ريس تربية العيال رخمة خدها و انت صغير و عندك قدرة على التحمل قبل ما تكبر و تتخنق بسرعة.

ملحوظة تانية اللي قال ان العيل بييجي برزقه و الله بيفهم ، حاول تجبلك كدة اد 7 ، 8 عيال و كل ما تجيب واحد اطلب " سالاري ريز" بسبب انك خلفت و عايز رزق العيل :happy: انا قصدي انك ماتحاولش تقضيها محاسبة و إكسل و شيتات رايحة و شيتات جاية في قرار الزواج بالذات خليها على ربنا و رووووووووح بقلب جامد. :P

يالا الف مبرووك يا معلم و عقبال الجوازة التانية إن شاء الله.

[mekkawy]

ملحوظة تانية اللي قال ان العيل بييجي برزقه و الله بيفهم ،

يالا الف مبرووك يا معلم و عقبال الجوازة التانية إن شاء الله.

:happy:

مهو ده نفس اللي هيطبعوله الجنيه فوق ده

حبيب قلبي يا مستشارنا الغالي يا رافع رايتنا و مبكر بالجواز .. هو ده الكلام

ربي عيالك دلوقتي يا حوس بدري بدري عشان تلحق تصاحبهم

مكاوى

[بركة]

الحكاية طويلة بدايتها ببساطة دعاء دعيته أنا لربنا أنه يرزقني بإنسان

طيب و أخلاق مالوش في الصحوبية واللعب ببنات الناس يعني من بيت أبوه

على المدرسة على الجامعة عليا بس خلاص smk:

وربنا رزقني ما تمنيت ........

كنت مخلصة سنة أولى جامعة وبزور واحدة صاحبتي وبعدين نزلنا

عشان ندي واحد هي ماتعرفوش حاجة مامتها عايزة تديهالو

فنزلت عشان ما أسيبهاش لوحدها ونزل من سيارة هو وواحد معاه

اتنين شباب واحد منهم عادي زي اللي في الكلية عندنا والتاني مؤدب وخجول جدا

أنا بقى قلت بس هو ده سبحان الله كأني لقيت اللي بحلم بيه

وبعدها هو اتصل بصاحبتي عشان يقابلنا بدون ابداء أسباب

وقلبي حس ان ربنا مرتب ليا الخير إستخرت وبعدها قاللي إنه حاسس ان ربنا رزقه

بهديه ودي أحلى كلمة حب سمعتها في حياتي وان نفسه يكلم أهله عليا

بس قبل مايكلم باباه هو بيحب ياخد رأي صديق للعائلة لأنه بيحب ياخد رأيه

في كل أموره وبمجرد ماقاللي اسمه قلتله الراجل ده يبقى زي أبويا

وصاحب بابا وكان بالنسبة ليا بدل بابا اللي مسافر

وعرضنا عيه الموضوع فرح جدا وخاف جدا لأن زوجي كان لسه متخرج

ومافيش امكانيات للزواج لا شقة ولا مهر ولا الهوا وساعتها قلت له

انا هشتغل معاه ولو قدامنا 5 سنين فإن شاء الله هيبقوا سنه

واشتغلنا في مشروع مع بعض بعلم الجميع وتحدي للجميع وبعد سنة ونص

كانت الخطوبة وهي دبلتين و فستان بسيط وحفله بسيطة في بيتنا

وعزمنا فيها كل اللي بنحبهم واختصرنا الشبكة والتفاصيل وكل اللي أهلي

عايزينه منه لما أخلص السنة الاخيرة في الكليه وخصوصا اني كان عندي شقة

ممكن نتجوز فيها مؤقتا لحد ما نرتب حياتنا ...

ووقف صاحب بابايا وقال ياجماعة أنا عايز أقول حاجة ل...... ول......... أنا فخور بيهم

جدا وكنت ماعرفش إن هم هيكونوا قد المسؤلية ويكملوا ربنا يوفقهم وربنا يباركلهم

وبعد ما ظهرت النتيجة واتخرجت جهزنا كل شئ والفلوس ماكانش لها عدد

وماعملتش فرح وماعملتش فستان غالي والشبكة بسيطة وكتبنا الكتاب

وزفة بسيطة على سلم عمارتنا لزوم اشهار الزواج للناس لأني شفت هو تعب في الفلوس دي إزاي

وحرام أصرفها في ليلة وربنا ما يرضاش علينا لو عملنا كده ....

ربنا يكرمك ياباشمهندس ياسر باللي يبقى قلبها عليك وتحبك وتبقى أنت كل دنيتها

ويرزقك منها بأولاد يكملوا سعادتكم ........ :happy:

دي حكاية رزق الزواج الواسع يا اللي بتخوفوا الراجل الطيب

دي كانت مداخلة قديمة ليا في موضوع اتعرفت بشريك حياتك ازاي لاخونا الباشمهندس ياسر ..

[mekkawy]

الفاضلة بركة

بركة

خلص الكلام

مكاوى .. اسمع يا حسام

[hOuSsAm]

الاخوة الافاضل والفاضلات :cry1:

بجد مش عارف اشكركم ازاى

ربنا يجزيكم عنى كل خير

هوضح حاجة فى الاول ان المشكلة قدامى مش فى اقناع الطرف الاخر او نسايبى المشكلة انى عايز اكون ذات نفسى مقتنع وضميرى مستريح اما الطرف الاخر فهو هيوافق عاللى انا عايز اعمله سواء ان كنت هجهز شقة ام لا.

طالما هو اقتنع بشخصيتى وبفكرى يبقى سهل اوى اقنعه باى حاجة انا عايزها وباى شكل انا شايفه فى صالح مستقبلى

انا لاحظت ان فيه فريقين

الفريق الثانى وده الى حد ما المتشائم او اللى بيقولك متاخدش RISK على نفسك ظبط نفسك ماديا وبعد كدة اعمل اللى انت عايزه

وده بقيادة اغابى وايمن وابوهنا وهيحصلهم العنبى

بس يا جماعة مش حرام يطلع عين اهلى فى شقة وطبعا هعملها احسن حاجة لانى بطبعى مش برضى بالقليل وبعد كدة اسيبها واعيش فى الخليج يعنى اعمل زى الواحدة اللى عملت تورتة من اجمل مايكون وحطت عليها من خيرات الله كل ما لذ وطاب وبعدين حطتها فى التلاجة وقالت هنحلى بيها ليلة راس السنة الجديدة

بجد هبقى اهبل اوى يوم مظبط شقتى وافرشها احسن حاجة واسيبها واروح اعيش فى الشقق الغريبة بتاعتهم دى (حتى مفهاش بلكونات) ده اكرم لى انزل مصر واعيش فيها عالاقل احس انى عملت حاجة لنفسى واتبسط بحاجتى

بجد والامثلة دى كتيرة شفت ناس ضيعت سنين حياتها عشان تعمل عمارات او شقق او او او وفى الاخر ماتت وبحسرتها قبل متشوفها بعنيها واهى ضيعت احسن سنين عمرها والورثة هما اللى فرحوا بالشقق والعمارات

فحاسس انى هاجى على نفسى اوى وهضغط عليها فى سبيل تحقيق حلم وهمى الا هو بتفرش شقة عشان مش هتعيش فيها

انتوا عارفين لو هتقولولى فى الـ 3 سنين دول اعمل دكتوراة او ادرس حاجة او قدم على بعثة كنت قلت ماشى اهو ببنى فى مستقبلى لكن موصلتش انى ابنى فى شوية خشب مش هستفيد بيهم

الفريق الاول وده الى حد ما متفائل وبيقولك توكل على الله وواحدة واحدة هتظبط معاك المهم تلاقى بنت الحلال المناسبة

وده بقيادة هند وهيرو وذهبية وميكاوى ومختار ولماضة ومصرية متغربة وصافى و سارة وسارمار وانفيزتور وبركة ومغتربة وواف والمستشار

الكلام جميل اوى وبيقنع اى واحد

بس بطبيعة شغلى اتعلمت انى ماخدش مخاطرة على نفسى (RISK) (فى شغلى استحالة اعرض الشركة لمخاطرة وبعمل كل الاحتياطات اللى تخلى الشركة فى السيف سايد مهما كانت الظروف ومهما كان المبلغ صغير او كبير)

انتوا دلوقتى هتخلونى عملت مخاطرة كبيرة اوى على نفسى وعلى بنت الناس ( فى اى وقت الانسان معرض ان تحصله ازمات فى حياته وعشان كدة لازم يبقى مخطط لو اى مشكلة حصلت هيواجها ازاى)

حاجة كمان يا جماعة فيه اهالى بنات كتير اتساهلوا وقالوا اهو نيسر عالشباب بس الشباب طلعوا فى الاخر عيال وبهدلوا ولاد الناس معاهم وحجات من دى كتيرة شفتها بعينى

طيب الاعمار بيد الله وحصلى حاجة (الولية وعيالها يروحوا فين) مش بعيدة والله لحد دلوقتى اتعرضت لحدثتين فى السعودية غير كنت هغرق اكتر من مرة لولا رحمت ربنا وقدره

------------------

طب ممكن تديونى الميكرفون

انا هفكر بطريقة مختلفة شوية

1- انا صعبان عليا تشطيب الشقة من غير معيش فيها (حاسس انها حاجة حرام) بصرف النظر معايا الفلوس ولا معييش وهفضل عايش بره متحسر على حاجتى وكل مهنزل اجازة هبصلها بحسرة كدة وهقارن بينها وبين اللى عايش فيها الـ 11 شهر

2- صعبان عليا اتجوز وحاطط نفسى فى موقف يقلق يعنى هتبقى عايش وانت مش مستقر اى مشكلة تحصلك ممكن توقعك ممكن اصل تترعش وانت ماشى فى الشارع يعنى من الاخر مش هتعرف تاخد قرار جرئ فى حياتك اى قرار هتيجى تاخده هتعمله الف حساب والقرار اللى كنت بتاخده زمان فى ايوم هتاخده فى الحالة دى فى شهرين

1+2 = القرار ( وده من وجهة نظرى يعنى ممكن يكون صح او غلط)

اعمل تقدير لمصاريف سنة فى مصر من ايجار شقة وتاثيثها فى حدود المعقول لواحد وزوجته وطفلة واشوف المبلغ يعمل كام واحوشه بدل مستنى الـ 3 سنين ونص هيبقوا سنة مثلا واعينه على جنب فى اى صورة سواء بنكية او غيره تحسبا لاى ظروف

وبعد كدة اتجوز عالطول واعملها الاتسقدام والتامين الصحى (احنا معندناش حريم تعيش بعيدة عن ردالتها :cry1: )

انا كدة جبت اخرى ومسكت العصاية من النص او يمكن مسكتها من التلتين اللى ناحية مكاوى والفريق بتاعه

كلامكوا طبعا كله عين العقل بلا اسثناء بس مش كل ما يتمناه الواحد يقدر يطوله

شوفوا كدة الاقتراح الاخير ده ولو وافقتوا عليه انا من عنيا الاتنين هعمل اللى انتوا عايزينه

[hOuSsAm]

مع احترامى لكل الأراء بس انا معارض ومع اغابى فى رأيها

عارف ان هناك احاديث ومقولات دينية بان الخير مع الزواج والأولاد بس ....اروح اتجوز وادين نفسى فى شقة وفرح وعفش واستقدام وشقة هنا وشقة هناك واقول ربنا حيسد عنى ...طيب ازاى ؟؟؟ معرفش انا بحسبها كده ...

هو سؤال واحد جاوبه بنفسك ؟؟؟

هل ستقبل كتابة شيك على نفسك كما يحدث - طبعا لعدم وجود شقة ؟؟

ماهو لازم يكون هناك ما يحمى حق الزوجة ( طبعا دا التفكير وكأن الشقة والعفش او المؤخر هو ما يحمى الفتاة وليس اخلاق الشاب وحسن الأختيار والتوفيق من عند ربنا )

من النهاية رأيى - اجل الموضوع شوية وضبط كل امورك ...

استقر ماديا بحيث لا تكتب شيكات وتبدأ حياتك الزوجية بدون اى ديون و كمان ما يكون هناك اى ضغط عليك ...ايه يعنى سنة ...مش مشكلة ...

ا

اخويا ايمن

انت قولت حاجة مهمة اوى وهو لو مفيش شقة واثاث يبقى ايه اللى هيحمى حق الزوجة (منا لازم احميها وانا عايش ......... معرفش ايه هيحصلها لو مت)

وشيكات

انت بتقول شيكات لاء يعم انا مش لاعب ............... مبكتبش على نفسى الحجات دى ولا حتى لابويا (مش لحاجة بس ده مبدأ)

يا جماعة افهمونى وبالراحة كدة

انا مش عايز اظلم حد او اكون ماشى وحاسس ان الدنيا مش مظبوطة

مش عايز يبقى مبدا انه انسان كويس او مبدا انه عنده شقة يدى الحق لاستغلال البنت عشان تتنازل عن حقوقها (عالالقل اللى تضمنلها حياة كريمة باختلاف الظروف)

مهو عشان انا شفت كل المآسى دى بعينى سواء من ناس عايشة فى الخليج او مصر وسواء من ناس محترمة او غير محترمة

مش عايز اوقع الناس فى غلطات النوايا الصالحة اللى وقعوا فيها غيرهم

:cry1:

وفـ نفس الوقت مش عايز اعمل حاجة مش مقتنع بيها

[بركة]

طب انا كده :cry1:

عروستي :cry1:

[لماضة مصرية جدا]

السلام عليكم و رحمة الله و بركاته

بص يا استاذ حسام

كلامك.....جميل جدا

كمنطق

كسطور تحت بعضها

ربنا يوفقك....و ييسرلك امورك

بس عندي احساس غريب يا جدع

حاسة انك هتنزل مصر......"و خصوصا انا عارفة بتوع المنطق والاكسل شيت دول كويس جدا"........هتبقي ماشي لا ليك و لا عليك

و هووووووووووووووووووب

هتلاقي نفسك خبطت في حيطة.......قصدي.....اتكب عليك جردل ميه ساقعة بس حلو....

هتحس ان كل السيستم بتاع الويندز محتاج يتفرمت تماما

دي لحظة قدرية

فوض امرك لله...و افتح قلبك عشان تبصر اللحظة القدرية دي

هترجع تقرا اللي كل اللي اتكتب...و اللي احنا قولناه و اللي لسه هنقوله......و هتقول ماما لماضة قالت....(ايييييه دنيا وش فردوس محمد)

ربنا يسعد قلبك...و ييسرلك حالك

ع جنب بقي

ااقولك علي حاجة احسن من ده كله

انت ادعي ربنا اوي

مش بالزوجة....و لا بالشقة

"اسأل الله من فضله العظيم"

بس خلاص

تروح و تيجي بالسلامة و متنساشي توقع في دفتر الغياب بتاع المحاورات

في امان الله

[بركة]

اتجوز عشان تروق وتحلى

الرابط

[hOuSsAm]

طب انا كده :lol:

عروستي :cry1:

انا كمان عروستى :cry1:

[mekkawy]

انت يا جدع إنت

ايه يا عم اللوغارتمات الحسابية دي

اسمع يا ابني كلام طنطك لماضة و سيبها على الله

يا عم حسام ... الموضوع و الله أسهل من كدة بكتـــــــــــــــــــــــير .... يا أخويا لما الرزق في الزواج بيحل .. خلاص .. فلا مرد له ... بيكون أحلى رزق و أجمل رزق و أكثر رزق فيه بركة .. و أقصد بالرزق يعني إنك تلاقي الزوجة الصالحة .. هتلاقي ربك ميسر تيسير غير عادي ... إنما نمسك العصايا من النص و من الحرف و كدة .. مش عارف .. مش مستريح أنا للنظرة دي ... خلي نظرتك في أمر الزواج مع ربنا أكتر ما تكون مع الحسابات ... و الله يا حسام لو أحكيلك بالتفصيل على زواجي و زواج ناس كتير أعرفهم بشكل شخصي مش هتصدق .. هتقول الناس دي أولياء الله الصالحين و ليهم كرامات .. بس الموضوع مش موضوع أولياء .. الموضوع موضوع تيسير من الله سبحانه و تعالى على كل من يريد العفاف ... يا ابني يا حبيبي يا ضونايا الزواج و الله أبسط من كدة خالص .. أنا شايف إنك حاسس إنك داخل معركة .. لا يا باشا مفيش أي معارك .. الأمر و ما فيه إنك بتدعي و تستخير و ربك اللي بيدبر و يسهل و يمشي الحال .. بأقولك ايه .. متيجي أجيبلك عروسة ؟

مكاوى

[رضوي]

السلام عليكم ورحمة الله وبركاته

وبين مؤيد ومعارض

يامسهل

اقولك حاجة

( خير متاع الدنيا الزوجة الصالحة )

و

( يامعشر الشباب من استطاع منكم الباءة فليتزوج )

* الباءة = تكاليف الزواج

طيب احنا هنصعبها علي نفسنا ليه

انت عندك شقة ........ بس مش متشطبة

مش هتقعد فيها

خايف م المستقبل

الا قولي ........... هو انت لو كنت في مصر يعني ....ضامن المستقبل دة ؟؟؟؟

ضامن انك لو عندك شقة ومفروشة وحساب ف البنك ........ ومظبط امورك ......... ضامن ان مايحصلش حاجة تهد كل دة ( لاقدر الله )

طيب مانسيبنا م الكلام النظري .......... والحسابات والتخطيط

( أنا ماقولتش ماتخططش ............ بس ماتضيعش حياتك بسبب التخطيط )

ازاي تخطط لمستقبلك صح

ماينفعش تحسبها كدة بالورقة والقلم وعدد السنوات اللي محتاج تبني نفسك فيهم

لا ماتجيش كدة

انا احسبها بمهاراتي ......... بقدراتي

يعني انا هعمل ايه لو لاقدر الله واجهتني اي ظروف اضطريتني اسيب الخليج وانزل مصر

أعتقد اللي يجاوب علي السؤال دة هو : شهاداتي ... امكانياتي العلمية ...... قدراتي

بس خلاص

احب اضيف حكاية واقعية يمكن تفيدك

من اسبوعين او اكتر شوية بسيطة

احدي صديقاتي المقربات جداً ...... بتتصل بيا علشان تدردش معايا في عريس متقدم لها ..... جاهز من مجاميعه ...... برده بيشتغل في السعودية وجايب كل حاجة ..... هي اول مرة تشوفه او تكلمه اصلاً

بعدها بيومين : الو رضوي انا نازلة اجيب الشبكة دلوقتي

- نعم !!!!!!!!!!

انا طبعا مندهشة اخر حاجة ....... يابنتي انتي مش لسة لما تعرفيه وتعرفي اخلاقه ودماغه .........الخ

لا مافيش وقت بابا سأل علي اهله وهما ناس محترمين

بعد يومين تانيين كانو بيشترو الموبيليا

يوم الاربع اللي فات كان الفرح !!!!!!!!!

بالظبط حوالي اسبوعين او اكتر شوية بسيطة وكانو متجوزين

خلاص العريس جاهز وكامل والعروسة جاهزة وخلصنا

عارف ليه ؟؟؟

لأنه برده بيحسبها بالورقة والقلم ونسي عناصر تانية مهمة جداً ماتتحسبش بالطريقة دي اصلاً

نزل لم الموضوع كله واختصره في اسبوعين وخلصنا

أعتقد انك عارف طبعاً زواج بالطريقة دي ممكن يحصل فيه ايه

لأنه خلاص جهزكل الامكانات المادية اللي تضمن له المستقبل ونازل يدور علي اي بنت والسلام ....... خلاص ضيع وقته كله في تجهيز الامكانات المادية .......... وهي كمان بتدور علي واحد جاهز مادياً ويوفر لها كل اللي هي عايزاه وخلصنا علي كدة ....... مشروع او مقاولة ....... بيحسبوها بالورقة والقلم وخلصنا

أخي الفاضل

اللي عايزة اقوله ......... اختر الرفيق قبل الطريق

بلاش الحسابات المادية البحتة

ماتحسبهاش كدة

احسبها ببنت الناس اللي هتقف جنبك وتساعدك علي بناء مستقبلك ............. تفهم ظروفك وتقدر امكانتك وماتكونش ثقل زيادة عليك

لأنها هي اللي ممكن تساعدك علي البناء .......... وهي اللي ممكن تكون السبب في هدم كل شيء

( اظفر بذات الدين تربت يداك )

تحياتي

[mekkawy]

طيب مانسيبنا م الكلام النظري .......... والحسابات والتخطيط

( أنا ماقولتش ماتخططش ............ بس ماتضيعش حياتك بسبب التخطيط )

( اظفر بذات الدين تربت يداك )

تحياتي

مونـــــــــــتـــــااااااااااااااااااز

:lol:

[لماضة مصرية جدا]

السلام عليكم و رحمة الله و بركاته

بص هما بوقين هخش اقولهم و اتكل علي الله

بجد جزاك الله كل خير

عارف ليه

عشان معرفشي جالي احساس كده ان احنا اخوات في بعض و قاعدين سهرانين بعيد عن عيون بابا و ماما و قاعدين نفكر في المستقبل

احساس اللمة

احساس.....نعمة

ربنا يجمعنا في خير و طاعة

و دول بقي حطهم ع الهامش...حطهم ع الونج اليمين....ع الونج الشمال.....بس حطهم في اي حتة

كملوا انتو بقي مع بعض

و انا هقوم و بكرة ان شاء الله اتابع معاكم

يا رب يا حسام نقوم الصبح....نلاقيك بتقول خلاااااااااااص....وجدتها....(وش اينشتاين...مع اني مش عارفة سحنته لما وقعت عليه الافوكادو....ايون عشان الريجيم بقي و كده)

مساااااااكم طبلية.....و لمة......وونس...حتي لو كان ع الحروف

في أمان الله

[صافى]

اه سمعته الجدع ده بيقولك هيطبعوله جنيه باسمه قريب

مكاوى ... حد له شوق في حاجة

اة انا كمان سمعت الجدع دة يا مكاااوى وبلامارة اسمة بردوة مكاااوى يا محاسن الصدف بس ميتهياليش انةهيطبعو لة جنية باسمة دى اشاعة :lol: بلامارة الى بيقولة جيب عيل يديك بلالم كل يوم الصبح يسلام يا ولاد ونعم الاب

[ساره احمد]

يااااااااااااااااااااااااه لأ انت فعلا محاسب اية دة حاسبها بالورقة والقلم وعدد السنين كمان؟ انت عقبال ماتخلص حساباتك دى هيكون عندك خمسين سنة

لو انت بتتكلم عن الشقة وانك مش هتقعد فيها خليها كدة تشطيب خفيف مش لازم تروح تجيب سيراميك المتر ب 60 جنية وباب شقة 3000 جنية واسلاك ب 4000 ومقابض ابواب الواحد ب 300 (علي فكرة دة اخو خطيبي وهو بيصوت دلوقتى علشان زنقت معاه في الحاجات التانية ومش عارف يتجوز دلوقتى واديلة سنتين خاطب)خليك في المعقول وخصوصا انك هتسيبها مفيش احلي من البساطة وبعدين لو اهلها ناس كويسين هيبصو علي شخصك مش علي مديات فارغة

شفت رضوى قالت اية (اظفر بذات الدين تربت يداك)

خد الخطوة دى وان شاء الله مش هتندم

[بركة]

سيبوه سيبوه اهو بيفكرني بزوجي ايام ما اتعرفنا كانت دي احدى افكاره وحساباته

و بعدها كل حاجة بقت بحسابات ربنا وبس اللي من أسماؤه الكريم سبحانه ..

[pocy]

ربنا يوفقك اتجوز واعمل اللى انت عايزه بعد كده

والف مبروووووووووووووووووك مقدما

ولا عايز تستنى لما تجهز عمر ابنى معاك ولالالالالالالالالالالا ايه ؟

[kazabaza]

خير الامور الوسط

شطب الشقه و خلي الدهان على المعجون يعني خلص السباكه و الكهربا و السيراميك و النجارة

بحيث يكون كل الي فاضل فيها وشين دهان و تبقي قابله للسكن

و كده اذا في اي ظروف لا قدرالله تدهن و تفرش الي تقدر عليه

اتكل على الله بعد كده و اتجوز