أتجوز ؟؟؟؟ ولا أشطب الشقة الاول...........

[hOuSsAm]

انا بقالى شهر بكلم بنفسى ..... اجيبها يمين شمال مش راضية تظبط

قولت لنفسى ياعم انت مغلب نفسك ليه ........... (اسال & استشير) حبايبك المحاوراتية وهما هيقولولك المفيد لانهم اكتر منك معرفة وخبرة وكمان ناس كتيرة ممكن تكون مرت بالتجربة دى

الاول للمعلومة انا مقيم فى السعودية ومعنديش اى تخطيط للسنتين الجايين شكلهم ايه لحد دلوقتى :blink: (ودى حاجة غيظانى لانى مش بعرف اعيش من غير تخطيط)

الفكرة انى عندى شقة فى احدى المدن الجديدة (ولسه عليها اقساط)

عشان اشطبها محتاج 21 شهر ابتداء من الشهر الجاى يعنى اخلصها كدة على ابريل 2012 (طبعا من غير الاثاث والاجهزة والحجات دى)

عشان اجيب اثاث واجهزة ولزوم الفرح والدوشة دى محتاج حوالى من 7 لـحد 9 شهور تانيين

وعشان اجهز شقة فى السعودية يبقى هقفل السنة

يعنى كله كله بالحسابات وشيتات الاكسيل يخلص نهاية 2013 يعنى بعد 3 سنين ونص

وكل الدوشة دى وفعليا مش هعيش فيها يعنى اخرى شهر فى السنة (وياريت اقعد فيها الشهر كمان)

مشكلة كمان انها محتاج عربية ولازم تكون جديدة عشان تقدر تعيش وتتعايش مع القاهرة (انا اصلا معنديش عربية)

مشكلة كمان عرفتها من ناس كتيرة ان الخشب والاثاث بيبوظ لان الشقة طبعا مش بتتهوى ومش عارف النقاشة بيحصلها ايه كمان

يعنى ممكن لما اقرر استقر فيها الاقيها محتاجة شغل تانى

-----------

من ناحية تانية لو من غير تشطيب شقة فممكن اتجوز باذن الله بعد من 6 لـحد 8 شهور

بس فى الحالة دى مش هيبقى عندى شقة

وانتوا عارفين ان الحاجة اللى تتعمل قبل الجواز بسنة بتتعمل بعد الجواز فى 5 سنين

وكمان عارفين ان طبيعة العمل فى الخليج مفهاش امان

يعنى وانت عايش فى الحاضر لازم عينك تبقى باصة عالمستقبل وعالاقل عامل خطة بديلة

فى الحالة دى لو حصل حاجة هلاقينى انا وبنت الناس فى الشارع

طب انا لو لواحدى مش مشكلة هتصرف وهتتحل .............. طب بنت الناس دى مينفعش تتبهدل معايا عشان انا مخططتش كويس

------------

بصراحة انا بين نارين وعايز حد عاقل يفهمنى هى المفروض تيجى ازاى

--------

سؤال كدة على جنب

هو لازم اللى يتجوز يكون مخلص شقتة كامله حتى لو مش هيعيش فيها؟

طيب هو ايه الفرق بين الشقة التمليك والايجار ؟ وايه الفرق بين الشقة المتاسسة والشقة اللى عالغافق؟

طيب لو فيه ابهات وامهات هنا او حتى شباب فى بداية الحياة ترضوا تجوزوا بناتكوا وولادكوا من غير شقة او ترضوا تتجوزوا من غير شقة؟ طالما طالما انتوا رضيتوا ... انتوا عملتوا تخطيط لاى مشكلة ممكن تحصل فى المستقبل؟

وهل فى الحالة دى هيبقى الواحد حاسس بامان ولا هيبقى عايش قلقان؟

أشكركم جدا عالاهتمام

معلهش تاعبكوا معايا....... بس الانسان ايه غير شوية مواقف وسلوكيات وحبة خطط كتيرة متكومة فوق بعضها

[Howayda Ismail]

معظم الشباب فى مصر يتزوج فى شقق قانون جديد لانه ليس لديه امكانيات شراء شقة تمليك ولا هو مسافر برة

التخطيط كويس لكن التدبير على ربنا لو امامك 3 سنوات عشان كله يبقى تمام يبقى توكل على الله تزوج فى شقة ايجار جديد

او مفروش فى الشهر اللى حتكون موجود فيه فى مصر وبعد كده تاخد زوجتك معاك وارسل لاهلك المال اللازم لتوضيب شقتك

على مدار هذه الفترة ترجع تلاقى كلى شئ تمام وده طبعا ببعد موافقة العروس واهلها بعد اطلاعهم على ظروفك

وفقك ربنا ويسهل لشباب وشابات مصر

[herohero]

شوف ا اخ حسام كلنا هذا الفتى ومش عاوزاقولك اننا ف محاورات المصريين فهتلاقي الاراء واتمنى الاقي عكسها وهي

1- بنتي ماتتبهدلش لا ياعم وايش ضمنا بنتنا تتجوز ف شقه واللي مش هتعمله ف الاول مش هتعمله تاني 2- وشقة بنتيتبقى كامله من مجاميعه

3- طب انا شغلي بره مصر هجهز شقتين عادي باني ماهو الجواز مشقة

ع فكرة نفس هذا السيناريو حصل مع كثير فلاتتعجب ومش عاوز اقولك من ناس عقليات ممتازة بس ده طبيعه الفكر بتاعنا اللي نفسه بيتناقش ف القايمة وما سيحدث ف حاله الطلاق واحنا لسه بنقول ياهادي

كلام العقل والناس العاقلة لا باني واحده واحده وشقه مصر تبدا باي حاجه بما ان حياتك مش ف مصر بس مين اللي يفكر كده ياحبيبنا لازم يطلع عينك عشان تحس بقيمة الشيئ ده برده وجهة النظر اللي ف المجتمع واتمنى نلاقي حلول منطقيه تراعي ظروف الشباب وتكون عملية

واللي هيحصل تشطب الشقة الاول وتتجوز

[ذهبية]

انا راى

انك تتجوز

لانك بتشتغل علشان هدف انك تكون نفسك علشان .....تتجوز

لو قضيت عمرك بقى يضيع فى العفش و الدهان هيعدى منك راس مالك مع سنين ملهاش لزمة و النتيجة واحدة برضة انك عايز تتجوز

يبقى هات من الاخر ووفر على نفسك و اتجوز علشان تعدى الهدف دة من حياتك على هدف تانى

ماهى الحياة شوية اهداف على بعض نحقق واحد تلاقى التانى بيهف فى دماغك و الىل وراة والى وراة

حتة بقى واحدة هترضى ومش هترضى

انت يا ابن الحلال دور وهتلاقى الى هترضى و تفرح بيك كمان هنا ازمة جواز بجد و بعدين فكرة ان الشقة موجودة و تحت ايدك

دة عنصر امان فى حد ذاتة

واللى مترضاش شوف غيرها يرضى

العقل بيقول طالما انت مش جاى فى مصر الا شهر واحد فى السنة طيب تشطب و تصرف لية

مش يمكن ربنا يفتحها فى وشك و تبيع الشقة دى بحالتها دى و تجيب شقة اكبر او تجيب واحدة تانية وتخلى دى معاك و تبقى استثمار

ليك طالما فى مدينة جديدة يعنى مستقبلها جاى

وانت نفسك قولت هتعوز عربية يعنى تكلفة اكتر و اكتر .... لا يبقى سيب الشقة دى للزمن و اهى سعرها بيزيد لوحدها

انت هات شقة فى مكان عملك و سيبها لله مووضع رزقك ينقطع و لا يوصل انت مالكش دعوة بالمووضع دة لانة فى يد الله

انت بس اعمل الى عليك و سيبها على الله

[mekkawy]

شوف يابا الحاج حسام .. اسمع مني و شوف حصل ايه :lol: .. اسمع من أخوك مكاوي برنس الزواج المبكر و نعم نعم للزواج و لا لا للعزوبية

ابتداءاً كدة يا ابن الناس الكويسين انت تتجوز و بدون تفكير و قولي ليه؟ أقولك

أولاً إنت شكلك حاسم أمرك و أديك شايف كمية العقبات و الزمن الطووووويل اللي قدامك عشان تشطب الشقة و تجهز نفسك و تجيب العربية عشان تروح بيها الشقة و اللذي منه .. 3 سنين و نص يا ابن الحلال يكون معاك عيلين إن شاء الله أو ع الأقل عيل بيقولك يا بابا و بيديك بالألم أول ما تصحي كل يوم الصبح.

3 سنين و نص من أجمل سنين عمرك (العشرينات) و عمر عروستك هتضيعهم في هم و تشطيب و قرف و شغل و صنايعية و تحويش و لازم أكمل المبلغ و الحق هات الدهانات .. يووووووو .. يا عم باة دي سنين تضيع في كدة .. و هتيجي تقولي مهي كدة مش بتضيع يا مكاوي .. هأقولك لأ بتضيع .. لما تقارن متعة و لذة و فرحة الجواز بمتعة شقة .. إخس .. مفيش مقارنة .. يبا بتضيع أهو.

انت ليه يا عمي مستقل بنفسك أو بإمكانيات و الناس ترضي و الناس ما ترضاش .. يا ابني في ناس كويسة أوي و مبسوطين جداً على فكرة مش فقراء يعني ولا مستواهم الاجتماعي واقع .. بس الدين عندهم الأول .. تصدق بالله يا حوس ... حمايا جوزني من غير ميكون معايا ولا مليم .. و المصحف الكريم مكنش معايا غير نص تمن الشبكة يا عم .. و اتضحلي بعد كدة إنه الله يرحمه يعتبر من الأثرياء .. عادي يا حوس .. خلي عندك ثقة في نفسك.

عندك شقة .. ما شاء الله لا قوة إلا بالله .. بلباقة و شياكة و أخلاق و ثقة الفارس .. هتتقدم و هتعرف الناس إن عندك شقة بس إنت مش هتقعد فيها لأنك بتسافر و بتروح و بتيجي و مش هتصرف عليها و تجمد فيها فلوس دلوقتي .. دي حياتك إنت و قراراتك إنت و إختيارتاك إنت محدش له دخل فيها ما دمت هتأمن للبنت عيشة كريمة لا تقل عن مستوى بيت والدها .. حاول تفصل بين قراراتك لمصلحتك و مصلحة بيتك فيما بعد و بين رضا نسايبك أو خطيبتك .. خطط لنفسك و متخليش حد يأثر عليك.

زي ما الفاضلة ذهبية قالتلك .. ظروفك كويسة أوي و حلوة جداً على فكرة فلو لقيت حد هيتأنتك عليك .. إديله ضهرك و شوف غيره .. بنات الناس الطيبين كتير .. اللي بيتنك في الجواز هيقرفك بعد كدة .. و انت عاوز تعيش مش عاوز تحارب.

اتجوز يا ابني و احمي نفسك و اتبسط و عيش اجمل أيام عمرك صدقني و الله .. أنا مجرب .. أيام لو ضيعتها في نقاشة و نجارة و حدادة هتندم عليها .. و يوم ما تيجي تتجوز هتلاقي الدنيا زادت و الطلبات زادت ... اسمع كلام أبو الحاج مكاوى.

و بعدين يا عم إنت حليوة و عسول و شرح و برح و أربع مطارح :lol: و سي إم ايه و جيم و محاسب و شوكلاتة .. اجمد كدة و اقعد و انجعص في الصالون .. بس أهم حاجة تختار صح .. تختار الدين قبل أي حاجة تانية .. و أدخل البيت اللي الأب فيه هو البوس مش الأم .. و ادخل البيت اللي الإخوات كلهم ملتزمين و محترمين .. متقولش أنا ليا البنت .. لا إنت بتتجوز الأهل قبل البنت .. و البنت كمان بتتجوز أهلك قبل منك .. هي على بعضيها كدة يا حوس .. بلك ما بيتقسمش و أهم ما فيه الأب.

موضوع باة اللي قبل الجواز في سنة و اللي بعد الجواز في خمسة ... نظرية خااااااطئة 100% و عن تجربة .. لا بأقول كلام فتي ولا بأقول كلام شعارات و فردة صدر ع الفاضي .. أنا قبل الجواز لامؤاخذة كنت كحيان ... شغل تعبان و كل حاجة كانت تعبانة .. أول ما اتجوزت يا ابني الرزق ما بقتش عارف أشيله منين .. شغل و فلوس و عربية و سفر و يا سلام بأة لما تجيلك بنوتة .. أوبااااا .. هتغرف و تعبي يا معلم من الخير .. و اللي عمرك ما كنت هتقدر تعمله قبل الجاوز هتلاقيه أيزي موت بعد الجواز

توكل على الله يا حوس و اتجوز و كلنا معاك يا عم خطوة بخطوة .. و إن شاء الله ما تنساش الحمام و البط

مكاوى ... سوشيال

[mokhtarelmalahy]

اتكل على الله واتجوز وان شاء الله ربنا هيرزقك

على فكره انا ظروفى مشابهه لظروفك عندى 23 سنه وبشتغل فى دبى وعندى شقه فى احدى المدن الجديده بس متشطبه او شبه متشطبه عايزه شغل بسيط وفى خلال سنه ونص بالكتير ان شاء الله ممكن ابقى متجوز

بس بصراحه انا متعقد وخايف من الناس ومن الل بشوفه وبسمعه ناس كتير بتستعبط لو دخل عليهم واحد على قده يقفلوا فى وشه ولو دخل واحد حالته الماديه كويسه وتمام وربنا كرمه واخلاق والخ الخ يطلعوا القطط الفطسانه عشان هما عايزين شوال فلوس وهات وهات وهات مش مهم الشخصيه ولا الاخلاق ولا الدين ولا الاهل ولا اى حاجه المهم دفتر شيكات مفتوح لا ولا لقوا واحد مرتاح وماشاء الله ربنا فاتح عليه يمصوا لحمه وعضموا يعنى من الاخر الغلبان والمتوسط والمرتاح التلاته بالصلى على النبى بيتقصقصوا وياريت عاجب فى الاخر

هتقولولى مش كل الناس مش عارف فين الناس الل مش كده والله مش بشوفهم لو لسه فى ناس كويسه كده وبتقدر يبقى لسه الدنيا بخير

والاغرب ان ناس كتير فى الاول بتبقى بييييييس وتعالى يا حبيبى دانت ابننا ولما يتمكنوا ياخدوا الواحد غسيل ومكوه

ال ايه احنا بنديك بنتنا اغلى ما عندنا يعنى هو انا اللى جاى من الشارع ولا مش بن ناس اكون بن تييييييييت وانا مش واخد بالى

ده غير حوارات القايمه والمؤخر والكلام الفاضى وبيحسبوا حساب الطلاق قبل الجواز اعوذ بالله قمه الجشع للاسف فى اباء بناتهم بالنسيه لهم بقوا تجاره او سلعه حتى لو مش مربحه ليه

انا عن نفسى اللى بحبها وهاتجوزها ان شاء الله نفسى ربنا يقدرنى اجيبلها الدنيا كلها وعشانها مستعد اتعب اكتر منا بتعب بس هل كل ده فى الاخر هيتقدر مش عارف ؟؟؟

والحمد لله الواحد سافر وبدا الطريق بس برضه خايف وعندى حاجز من الموضوع ده

استرها معانا يارب

[لماضة مصرية جدا]

السلام عليكم و رحمة الله و بركاته

استاذي الفاضل جدا.....فعلا فاضلي شعراية و اعور حضرتك....ده بعد اذنك لو سمحت يعني

اصل حضرتك لابخ نفسك في اسئلة متزعلشي مني مش وقتها خالص....ليه بقي لان اصلا حضرتك لسه ملقتشي الجثة....قصدي العروسة

طب فرضنا ان فيه عروسة موجودة يبقي ببساطة طبعا تتجوز و تتوكل علي الله و خصوصا حضرتك يعني مش عايش في مصر...يبقي ايه لزمة لخمة الشقة اصلا.....لان حضرتك هتعمل زي اخواتنا المتغربين ...(هااااارش..... :lol: ) هتنزل كدهون و تعمل زيارات مكوكية ع الصالونات و بعدين تختار بنوتة حلوة و كده و تجيبها معاك في الشنطة....قصدي يعني تجيبها تعيش معاك منين ما حضرتك تكون

يبقي الشقة بقي اصلا دي هتنزلوها في الاجازات....و من واقع خبرتي الفزيعة في تنفيض و تهوية و تسيييأ شقة أخويا اللي هو برضه بره مصر و متجوز براها...لما بيجي الاجازة حضرتك مبيعتبشي شقته اصلا....يا بيبقي في البيت الكبير اللي هو بيت بابا او بيت ام الزوجة.....او لو ربنا فرجها نبقي بنصيف

افتكرت حاجة كان قالهالي الشيخ بتاعنا زمان ان الشاب لما بينوي الزواج و بيخلص النية ربنا سبحانه و تعالي بيبقي حق عليه سبحان الله ان يعينه....يعني بيفتح لك باب رزق جديد

و ربنا يقر عينك بزوجة صالحة يارب في الدنيا و الاخرة

ع جنب

بعتذر لو كانت مداخلتي فيها كلام مكرر للافاضل اللي سبقوني بس ملحقتش ااقراهم

مسااااكم توكل علي الله لابعد الحدود

فوتك بعافية

[عبير يونس]

أنا موافقة جدا على كلام البروفيسور مكاوي

البنات الطيبين كتير

ربنا يكرمك بواحدة منهم يارب

و نصيحة مش كل حاجة في الدنيا بالتخطيط و بس

في حاجة اسمها تدابير ربنا

اللي حساباتها مختلفة تماما عن حساباتنا

وفعلا زي ما الإخوة و الأخوات قالوا

مش حتستفيد حاجة من توضيب شقة و تسيبها

على فكرة ده حصل معايا

وضبنا و بعدين سافرنا

و ادينا اهو بعيد عنها و لا مستفيدين بيها و زمان التوضيب باظ

و محتاج توضيب من اول و جديد

:lol:

بس احنا كان لازم نوضب لأننا عشنا فيها بالفعل 3 سنين

اتجوز و خد عروستك و سافر

و كون نفسك مضبوط بأمر الله

و ارجع وضب لما تستقر

و ساعتها متعرفش ايه اللي حيحصل

زي ما ذهبية قالت

و عليك طبعا بالاستخارة

اللي مش بس بيقدرك لك بيها ربنا الخير

لا ده بييسره

و يبارك لك فيه كمان

[صافى]

اتوكل على اللة يا حسام واتجوز واكيد هتلاقى بنت الحلال الى تشاركك ويكون اهلها كويسين وطبعا عشان تعمل شقة دلوقتى عشان تتجوز شهر وتسيبها فا دة حرام مدام هترجع تانى بس دا فى حالت انك هتجيب مراتك ان شاء اللة معاك

اما بقا لو هتتجوز وتسيبها فى مصر ممكن ميردوش انك تسيب الشقة كدة وربنا يوفقك ولو مش عندك العروسة احنا نجيبهالك بس انت اعقد النية وربنا يوفق

مع انى برجح المثل الى بيقول امشى فى جنازة ولا تمشيش فى جوازة بس عشان ما ندعيش على بعض ربنا معاك

[ساره احمد]

حضرتك كدة يعتبر جاهز بمعنى اصح لان الشقة موجودة ولوان يعنى الحاجات دى مش بتفرق اهم حاجة الاخلاق والتدين والعيلة المحترمة

خطيبي لما اتقدملي مكانش معاه شقة بس هو بيشتغل شغل حلو اوى بس سنة ادى تقريبا فارق 8 شهور (كنا مع بعض في نفس الكلية)

وبابا كمان مسالوش عن المرتب بتاعة والكلام دة كلة بس بيكفي انة محترم وعيلتة كويسة وساعد كمان في العفش وتوضيب الشقة

مراعاه لان سنة صغيروعلشان يعمل الحاجات دى كلها يبقي هنتجوز بعد 15 سنة تقريبا

حضرتك الناس دلوقتى بتراعي ظروف الشباب وبيقولو اهم حاجة الاخلاق مش الماديات

اتوكل علي الله ودور بقي علي العروسة الحلوة وربنا يوفقك

[اغابي]

انت مستعجل ليه على الجواز !!!

انت خاطب او فى لاف ستورى او حد متكلم عليك mil: من الاخر محجوز ولا فري ؟؟

- لو كنت خاطب طبعا لازم تتجوز لان شكلها مش ظريف ان مدة الخطوبة تبقى طويلة - داه ممكن يعمل مشاكل كتير

لكن لو ما كنتش خاطب ولا اى حاجة - يبقي نصيحة منى - خلص كل حاجة بالراحة وبتركيز وبعدين ابقى اخطب واتجوز

على الاقل تبقى ضامن ان كل شيء تمام لان كمان بعد الجواز الخطط بتتغير واهمها اهتمامك مش حيكون بالشقة اد ما حيكون بالمستقبل بشكل عام

وخاصة بعد ما يشرف اول مولود بتتغير جميع الخطط ...........

وللحـــــديث بقيـــــــة

اغابي

[sarmar]

الاخوة الكرام السلام عليكم

بداية لايمكن تكون مداخلة خاصة من الاستاذ حسام وامر عليها من غير ادخل واشرب معاة فنجان قهوة بالشيكولاتة لانك غالى جدا واخويا الحبيب

ياحسام باشا الاخوة فيهم البركة اعطوك المفيد فيما سبق وخاصة الحاج مكاوى وباقى الاخوة بس انا لى ملاحظة وهى انك بتخطط فى امور بتكون خارجة عن حيز التخطيط لانها بتكون من قدرة الله وماتدرى نفس ماذا تكسب غدا

نعم فى الزمن دة الناس كلها مش مادية وبس لا اصبحت عندها سعار مادة وخاصة فى امور الجواز لكن لاتقلق ابدا ولاتشيل هم لان زوجتك اللى ربنا كاتبهالك سوف توضع فى طريق حياتك بدون ان تشعر واطمنك بردة ان الطيبين للطيبات وانت اصلا انسان متعلم ومتربى وابن حلال جدا جدا ان شاء اللة ربنا بيرزقك بواحدة مثلك ويمكن احسن واعتبر ان الشقة موضوع اللى فى احدى مدن القمر الجديدة مش موجودة من الاساس

واوعى تنسى اللى اخواتنا سبق وقالوة ليك هنا كلامهم من دهب وربنا يوفقك يارب ولا تنسى تعزمنا بس ماتستعجلش وتأنى فى اتخاذ القرار

[Mr MAGED]

شوف يا عم حسام انا هاقولك انا عملت ايه لما كنت في موقفك ده

اولا انا مكنش عندي شقة ... كنت مسافر صحيح بس كانت لسة الشقة مجتش

طبعا خدت شقة ايجار جديد ... وجهزت العفش او بمعني اصح مراتي هي اللي جهزته

انا كنت الممول ... وهيا بتختار علي ذوقها .... وطبعا كلفني العفش مبلغ وقدره

نزلت يا عم ع الجاهز قعدت عشر ايام واتجوزت ... قعدت اجازة تقريبا شهر ونص

سافرت وهيا جاتلي بعدها .... بعد كده يا سيدي مكنتش باشوف الشقة دي غير تقريبا ثلاث او اربع ايام في السنة

صاحب البيت كان عاملني قدوة لكل السكان ... بيقول يا ريت السكان كلهم زيك ... يدفعوا من غير ما نشوفهم ولا نسمع صوتهم

ما هي الاجازة بتكون شهر .. لما تاخد اسبوع في شرم .. واسبوع في اسكندرية ... ويومين تلاتة كده في راس البر

والباقي طبعا شوية عند اهلك وشوية عند اهلها ... يبقي مافيش وقت اصلا تشوف شقتك

ربنا كرمني بعدها بسنتين وخدت شقة ونقلت فيها الحمد لله .. ومش عايز اقولك اني لحد الوقتي لسة باشطب فيها

او كل شوية مراتي تفكر في فكيرة جديدة نعملها فيها .... اللي اهم من كده بقي .. ان زوجتي المصونة عايزة تغير العفش

اللي انا ماعرفش شكله ايه اصلا لأني ماستخدمتوش .... ماهو انا باشوفه تلات اربع ايام في السنة يبقي اعرفه ازاي

توكل علي الله واتجوز ... وخد بالك العفش والتشطيبات موضتهم بتتغير كل سنة ... ومهما صرفت عليهم الوقتي هتيجي زوجتك بعد كام سنة وتطلب منك تغير

بس الاهم من ده كله .. زي ما قالت الاخت لماضة ... فين الجثة !!! .. هو ده المهم يا معلم

توكل علي الله واستخير ربنا ... وصدقني الناس الطيبين في مصر كتير ... والبنات الطيبين اكتر

ربنا يوفقك ان شاء الله ... واحنا في الخدمة يا باشا

تحياتي

[mekkawy]

يا ابني اسمع الكلام باة وجعت قلوبنا معاك :happy:

و متسمعش كلام أغابي :P

شكلها يا واد منشنة عليك لما تجيب بنوتة عشان الشقة بأة اللي في المدينة الجديدة و الحاجات دي

فاهمك أنا smk:

مكاوى .. في حاجة ؟

[بركة]

نصف الستات اللي مع زوجها هنا وموضبين شققهم في مصر وسايبين فيها شقى عمرهم قصدي عفشهم

بيقعدوا يعيطوا ......اه والله بيعيطوا على عفشهم اللي ما اتهنوش بيه وراحت عليه و في الخباثة كده

الكلمة المأثورة على لسانهن واخدلي بالك من لسانهن مش لسانهم دي " دا انا متغربة معاه وسايبه عفشي في مصر ياكله التراب "

والنصف الاولاني مع النص التاني شغلهن الشاغل اشتري ايه لشقة مصر smk:

وبالنسبة لأي بنت حلمها تختار هي وعريسها كل قشايه

اتوكل على الله واستخير وشوف عرايس وربنا هيكرمك

ودي حاجة عادية جدا ان ناس يجوزوا بنتهم في اي حاجة عشان مسافرة مع جوزها

وربنا يبارك لك انا اعرف ناس محترمة هنا كتير اتقبلوا من اهل الزوجة ومن غير شقة والله ..

ربنا يرزقك بأقاهن مهرا أكثرهن بركة ..امين :happy:

[aimen]

مع احترامى لكل الأراء بس انا معارض ومع اغابى فى رأيها

عارف ان هناك احاديث ومقولات دينية بان الخير مع الزواج والأولاد بس ....اروح اتجوز وادين نفسى فى شقة وفرح وعفش واستقدام وشقة هنا وشقة هناك واقول ربنا حيسد عنى ...طيب ازاى ؟؟؟ معرفش انا بحسبها كده ...

هو سؤال واحد جاوبه بنفسك ؟؟؟

هل ستقبل كتابة شيك على نفسك كما يحدث - طبعا لعدم وجود شقة ؟؟

ماهو لازم يكون هناك ما يحمى حق الزوجة ( طبعا دا التفكير وكأن الشقة والعفش او المؤخر هو ما يحمى الفتاة وليس اخلاق الشاب وحسن الأختيار والتوفيق من عند ربنا )

من النهاية رأيى - اجل الموضوع شوية وضبط كل امورك ...

استقر ماديا بحيث لا تكتب شيكات وتبدأ حياتك الزوجية بدون اى ديون و كمان ما يكون هناك اى ضغط عليك ...ايه يعنى سنة ...مش مشكلة ...

ا

[مغتربة]

والله يا استاذ حسام عن نفسى انا اتجوت زوجى و سافرت معاه من غير شقه و من غير حتى العفش

و انا الى صممت على كده

لان ايه معنى انى اجيب عفش احنطه فى شقه مقفوله تاكله الرطوبه و العته و لا منى فرحت بيه و لا منى استنفدت بتمنه

دا غير على بال ما ارجع هتكون موضته راحت و عايزه اغيره بحاجه ستايل اكتر

انا متاكده انك ان شاء الله لو دورت كويس هتلاقى بنات كتيره بنفس التفكير و ان شاء الله ربنا هيوفقك لواحد منهم

اما لو كنت اوردى خاطب ففاتحها فى الامر و شوف رده فعلها و اهلها ايه

و ان شاء الله ربنا ييسرلك الحال

بس على فكره كلامى دا كله مبنى على انك هتاخدها معاك لكن لو ناوى تسيبها فى مصر يبقى الافضل انك تفرش بس ممكن شقه ايجار جديد على بال ما تشطب براحتك

تحياتى

[waaaf]

:happy: smk: :P

إتجوز

وزي ماقال أحد المحاواتية ياسلام لما ربنا يرزقك ببنوتة يبقى ربنا هايفتح عليك أوي

[mekkawy]

مع احترامى لكل الأراء بس انا معارض ومع اغابى فى رأيها

أيمن باشا يا مدير

مهو ده يا عمدة اللي إحنا بنقوله .. هي مش مسألة حسابات .. الزواج مش زي كل حاجة بتتحسب بالورقة و القلم .. و يا ترى هتقول ربنا هيسد عني ؟ أيووووون يا فندم .. هيسد عنك .. اسمع الحديث ده و شوف حصل ايه :lol: (ثلاثة حق على الله أن يعينهم: المجاهد في سبيل الله، والناكح يريد أن يستعف، والمكاتب يريد الأداء) .. هيسد باة عنك ولا لأ يا باشا .. تأكد .. هي مش حسابات.

حسام .. متسمعش كلام أغابي و أيمن :P

:happy: smk: :P

إتجوز

وزي ماقال أحد المحاواتية ياسلام لما ربنا يرزقك ببنوتة يبقى ربنا هايفتح عليك أوي

اه سمعته الجدع ده smk: بيقولك هيطبعوله جنيه باسمه قريب

مكاوى ... حد له شوق في حاجة (يا أغابي)

تم تعديل 21 يونيو 2010 بواسطة mekkawy

[ابوهنا]

اعمل كل حاجه الاول وبعد ماتخلص كل حاجه

شطب الشقه

جهز فلوس الشبكه

جهز فلوس العفش

مصاريف الفرح

وبعد ماتعمل ده كله

اقعد سنتين كمان فى السعوديه

اخر حاجه تعملها هى الزواج

لان البنات مش هيخلصوا ومافيش بنت فرصه

اسمع كلامى الله يكرمك

الاراء اللى بتقولك اتجوز وارجع السعوديه مع احترامى ليهم هيدخلوك فى مشكله كبيره

هتلاقى نفسك اتجوزت وتكتبت عليك قايمه تقطم الوسط لان اهل المدام عايزين يضمنوا حق بنتهم وهتبقى جميله عليك طول العمر

طبعا هتنزل تتجوز فى مصر وهترجع مفلس ومديون وهتقعد فى فندق او تترجع تتدخل هنا فى السعوديه ومافيش شهر عسل ومرات هتقعد تعايرك طول العمر بشهر العسل

وترجع ياحلو ووراك فى مصر حوالى 30 الف جنيه ديون غير قسط الشقه

وبعد 9 شهور ياتى ولى العه وياسلام لو مراتك ولدت قيصيريه او هترضع صناعى يبقى خير

لو مراتك نزلت تولد فى مصر طبعا هتبقى عند اهلها وحضرتك مش هتنزل لان مافيش شقه

ولاقدر الله فى وسط ديلمة ال30 الف الديون وقسط الشقه ومصاريف الولادة واللبن والبامبرز تقوم دابب خناقه مع السيد الكفيل وينزلك مصر

ساعتها ربنا يكون فى عونك لانك امام طريقين يا اما السجن او العباسيه

والله انا انصحك لوجه الله وكل السيناريوهات ديه مطروحه وحصلت مع واحد زميلنا وعمل نفس القصه وكان شغال فى بنك هنا فى السعوديه ولامور ميه ميه وفى ثانيه مشوه علشان السعوده....والله كان بيبكى لانه مش عارف ينزل مصر يعمل ايه...وفعلا مانزلشى وبعد ماكان راتبه حوالى 3500 ريال اشتغل فى مستودع على الف ريال

اوعى تتجوز