ف لتحيا الحرية

[Abouhemeed]

بسم الله الرحمن الرحيم

يا أمة العرب يا من نسيتم معنى الغضب ؟

الظلم طال و أنتم ... في انتظار الفرج

علية القوم عنكم ح يبحثوا سبب الهرج

كأنكم ... موش عارفين السبب !

***

راحوا يتكلموا و يدافعوا عنكم

لما الأغراب قالوا سيبوا المكان للي بعدكم

يمكن يكون حد ثاني مش من نسلكم

في الخدمة لينا أحسن منكم كلكم

***

ح يتقابلوا يبوسوا بعضهم

و يتصوروا كممثلين لكم

و الخوف باين في وشهم

و كلهم عاملين نفسهم

بالمحبة عامر قلبهم

و الحكمة تغير منهم

***

في حلقة كبيرة يقعدوا و تقفل الأبواب

و الجلسة سرية و تحرس الأعتاب

و يبدأ كلام و عتاب ينتهي بسباب

و يخرجوا ماسكين بعضهم كأنهم أحباب

و البيان يتلوه المتحدث و كلامه هباب

الكاميرا تصوره من قدام و الجناب

***

نشجب من يريق الدم في كؤوس و أكواب

مستوردة ما هي الأرض مفروشة تراب

و التراب غالي علينا و هو ثرى الأحباب

اطمئنوا و على نفسكم غلقوا الأبواب

القضية في أيدي أمينة لهذه الأسباب

أمينة طائحة فينا بتحارب الإرهاب

***

الحرية دي أصلها من عندنا

الناس هناك استلفوها لجل يبقوا زينا

و لما بالسلامة ترجع و يردوها لنا

ابقوا البسوها و اشكروا ربنا

إن حكامكم ناس من شكلنا

موش من هناك إنما من هنا

***

شوفوا إيه حصل لما تخلوا عنهم

أخواتنا المستحلة دمائهم

بقوا أشلاء و لا أحد لمهم

نفسكم تبقوا زيهم ؟

و يأكلوا لحمكم و يمصمصوا عظمكم ؟

ما إحنا أولي بحبكم و عطفكم !

***

ودي بقى الديمقراطية

ما هي إلا خدعة محشية

موثقة معكم باتفاقية

تجعل بلادكم دائما مكفية

و على القفا تبقى التحية

لعلمنا و الراية أمريكية

اهتفوا معايا لتحيا الحرية

و الموت للأمة العربية !

أبو حميد المصري ‏20‏‏/‏05‏‏/‏2004‏

[Salwa]

اخونا الفاضل ابو حميد ......

ساعات بحس ان صرخاتك لو سمعها الصخر ....ممكن ينطق.

لكن ؟؟

اسمح لى اعلق على كلماتك ....بسؤال ؟؟؟

ماذا تنتظر من شعب ....كشعب ال....الشقيق ؟؟؟

وانا اقلب فى القنوات العربية كعادتى ....رأيت ..الملك ..كيف يودعوه فى المطار وهو يستعد لركوب طائرته الملكية ......والكل بلا استثناء ينحنى ويقبل يده !!!!!!!!!!!....

وهو يسير فى طريقه رافع الرأس ....ويمد يده حتى تقبلها الرعية

اللى لابس ملكى واللى لابس عسكرى ....الكل ينحنى .

بما اننا محاورات المصريين للبحث فى شئون مصر والمصريين لن اعلق ......ولن اذكر اسماء ........لكن ؟؟؟

ماذا تنتظر من ملك يجبر رعيته على الانحناء ؟؟؟ صباح مساء ؟؟

ماذا تنتظر من قوم يستعبدوا الشعوب ؟؟

تحت اى مسمى ؟؟ لا يهمنى ....هو استعباد .....

غيره ايضا .....يقال انه من نسل النبى عليه افضل الصلاة والسلام .........ولم نرى الرعية تقبل يده ......

يعنى واحد منهم احسن الوحشين ....!!!!!

لا تصرخ ....اخى ...

لا تتوقع شئ .....لأنه لن يحدث شئ ......لا حلو ولا وحش ..

يبقى الحال على ماهو عليه وعلى المتضرر اللجوء...للصلاة....

والدعاء عليهم ....

حسبى الله ونعم الوكيل....

[Abouhemeed]

لما يبوسوا ايده قلنا دا شأنهم و إحترام واجب

طيب اللي اتباست ايده بيبوس ايد مين ؟

[ragab2]

العرب

نسوا الغضب

وحتى الشجب

الله ينور يا أبو حميد

استمر

[Abouhemeed]

يصعب علي الإستمرار في ظل هذا العته القومي

و لكن سأستمر ان شاء المولى لآخر يوم في عمري

يمكن بعد الرحيل يفوق ناس يمشون على دربي

فيا من وجدت الطريق ممهدا لا تزل للطريق قبري