فطائر منزلية بلمسة احترافية كل الي هيذوقها هيقولك اشتريتيها منين

[doha]

النهرده عملت فطائر بنفس مقادير عجينة العشر دقائق تقريبا بس مع بعض التعديل .. النتيجه طلعت اكثر من ممتازه ويقال والعهده على الراوي انها طلعت زي فطائر المخابز بالظبط

العجينة الي هقولكم عليها دي بتنفع فطائر وكذلك بتنفع بيتزا وممكن اوي تمشي خبز سندويتشات مميزه .. التركيب واحد هتفرق بس في التشكيل

معليش بقى مصورتش لكم خطوات العمل بالتفصيل لان ايدي كانت مشغوله بالعجن واكتفيت بتصوير النتيجه النهائيه .. بس يمكن فيما بعد ابقى اخلي حد يساعدني في التصوير وحتى ذلك الوقت خليني اشرح لكم بالتفصيل الممل من داخل الاستاد وكأنكم في قلب الحدث ..

ونبدأ باسم الله ..

هنحتاج دقيق ـ خميرة ـ ملح ـ سكر ـ زبده ـ ماء .. واي حشوة نحبها وقليل من الحليب او البيض لدهن الوجه

الطريقة ..

قبل البدأ في العمل هنجهز الخميرة ..

هنحتاج قطعه خميرة بيرة في حجم الاصبع تقريبا ( الخميرة البيرة للي ميعرفهاش نوع من الخميرة بتكون زي العجينة كده وبتتباع في المحلات او المخابز ) هي بتدي طعم افضل من الخميرة الفورية الحبيبات لكن لو مش موجوده عادي ممكن نستخدم الفورية وفي الحاله دي هنحتاج حوالي ملعقتين صغيرين

هنحط الخميرة في كوبايه كبيرة او صحن عميق وعليها ملعقة صغيره سكر ثم نخلطهم على بعض مع الضغط بالملعقة بعدين هنضيف لهم نصف كوب ماء دافي .. مهم اوي ان الماء يكون دافيء لا هو بارد ولا ساخن

هنترك الكوب ده عشر دقائق تقريبا

وفي اثناء ذلك هننخل الدقيق الاول بعدين نكيل خمس اكواب منه

بالمناسبة ممكن تستخدمي مصفاه سلك في نخل الدقيق هتعطي نفس نتيجه المنخل واسهل في الاستخدام

هنحط الدقيق في صحن عميق وعليه رشة ملح وفنجان قهوة صغير سكر ( يفضل ننقص من الفنجان ملعقة صغيرة عشان سبق وحطيناها على الخميرة )

هنسيح الزبده وناخذ منها حوالي من ثلاثه ارباع الى كوب كامل .. لو هنستخدم زيت يبقى نصف كوب زيت فقط .. الزيت طبعا اقل في الدسامه لكن الزبده بتعطي طعم غني اكثر كذلك طراوة اضافية للعجين ..

طبعا ننتبه منسخنش الزبده اوي عشان العجين اجمالا يبقى دافيء مش ساخن والا هيموت الخميرة ..

بعد مرور العشر دقائق على وضع الخميرة في الكوب مفروض تكون ارتفعت كتير وتكونت رغوة على سطحها .. هنقلب الخميرة في الكوب ثم نضيفها للخليط السابق ونبدأ نعجن

بعد تكون عجينة ( تلتصق باليد وحالتها حالة )

هنشيل العجينة دي ونحطها على رخامه المطبخ ونبدأ نكمل عجن فيها .. هنلت العجينة بمعنى نرفع العجينة لفوق ونرجع نخبطها على بعضها تاني ونستمر في تكرار العملية دي .. في البدايه هتكون العجينة بتلصق وتتمزق من بعضها بعد فترة هتبدأ تبقى مطاطة ومتجانسة

العملية دي مهمه جدا ودي احد الاشياء الي بتخلي المخبوزات هشة وطرية وفيها مسامات زي خبز السندويتشات كده ..

بعد مرور حوالي خمس الى عشر دقائق من العجن المستمر الي يخلع الايد هتلاحظي ان العجينة بقت طيعة جدا ومعادتش بتلصق في الرخامة وبقت كتلة واحده طرية . .وصلنا للمرحلة دي يبقى العجينة جاهزه للدخول في مرحلة التخمير ..

هتجهزي صحن كبير اوي وعميق لو مفيش يبقى حلة كبيرة .. هتدهني الصحن زيت خفيف اوي بعدين تكوري العجينة كورة كبيرة وتقلبيها في الصحن ثم تقلبيها على وشها بحيث الجزء المدهون زيت يبقى لاعلى . .. هتغطي الصحن ده اما بفوطه ندية او ببلاستيك التغليف .. هتحطي العجينة تخمر في مكان دافيء اما في داخل الفرن وهو مطفي او جوا دولاب المطبخ المهم اي مكان بعيد عن تيارات الهوا لمده ساعتين تقريبا لو خميرة بيرة وخمسة واربعين دقيقة لو خميرة فورية .. خلي بالك يكون الصحن كبير كفايه عشان هي بتتضاعف في الحجم وفي نفس الوقت ميكونش كبير اوي اوي عشان يديلها فرصة تمسك في اجنابه وبالتالي ترتفع بدون مايتمزق نسيج العجين فيها .. يعني بصي للعجينة قدامك واختاري وعاء يكون حجمه ضعفها مرة ونص تقريبا ..

طبعا كل ماتتركي العجينة تخمر يكون افضل بس مهم اوي انك متسيبيهاش تخمر كتير يعني مش اكتر ابدا من اربع ساعات والا مش هتبقى مظبوطه . لو لقيتي نفسك مش هتقدري تخبزيها في وقتها لاي سبب حطيها في الثلاجه بس متتركيهاش تخمر اكتر من ساعتين ثلاثه بالكتير ..

بعد ماتخمر العجينة وهتعرفي ده بتضاعف حجمها هتطلعيها وتلكميها من المنتصف بقبضه ايدك عشان تشيلي منها كل الهواء الي دخلها .. هتعجنيها تاني عجنة خفيفة جدا بعدين تقطعيها لكور متجانسة في الحجم وتتركيها دقيقتين كده ترتاح بعدين تبدئي تشتغلي ..

هتشكليها بالطريقة الي عوزاها

لو هتعملي فطائر اقماع هتكوني مجهزه اقماع معدنية ( بتتباع في محلات ابو ريالين ولو معندكيش عادي شفت وحده في احد المنتديات عارضه لها طريقة حلوة اوي بتجيب ورق مجلات او الورق الملون الي بيبقى عليه اعلانات وجاي مع الجرايد ده وتلفه شكل قمع .. بعدين تغلف القمع بالورق الفويل ومشي الحال معاها وطلعت اقماع ولا الجاهزه )

وده شكل القمع المستخدم ..

هتفردي العجينة شكل مستطيل وسماكتها اقل شيء يعني اقل من نصف سانتي .. هتقطعي المستطيل ده لشرائح طويلة عرض الشريط حوالي ثلاثه او اربعه سانتي ..

هندهن القمع بالزيت بواسطة فرشاة ..

هتلفي الشريط على القمع المعدني بشكل حلزوني .. بعدين تحطيه على الصاج المدهون زيت ( ممكن تفرشي في قاع الصاج ورق زبده وده اسهل واحسن في التنظيف وبيدي نتيجه هايلة في الخبز لانه مبيحرقش اسفل المخبوزات بسرعه )

لو هتعملي العجينة شكل مثلث ودي شائعه في فطائر السبانخ ..

هتفردي العجينة شكل قرص او دائرة برضه لسماكة بسيطه بعدين تكوني محضرة صحن صغير فيه قليل من الحليب او بيضه مخفوقه مع ملعقة ماء .. هندهن بالفرشاه اطراف العجينة بس بعدين نحط الحشوة في النصف ثم نبدأ نغلق الاطراف المتقابلة هينتج لنا شكل مثلث ..

ممكن نعمل منها اي اشكال تانيه تعجبنا انا المرة دي عملت الشكلين دول بس لكن قبل كده جربت اشكال اخرى وبتطلع كويسه برضه . طبعا على حسب الحشوة بيكون الشكل ..

لو هتعمليها باكتر من حشوة يبقى غيري شكلها وفقا لنوع الحشو او ممكن تستعيني بحبة البركه او الكمون الحصى او السمسم لتمييز مابداخل الفطيرة بحيث ترشي على الوجه قليل جدا من اي من السابق ويبقى معروف ان الي فيها جبنة مثلا مرشوشه على الوجه بحبة البركه وهكذا ..

ولو حابه تعملي منها بيتزا فافرديها على شكل قرص رقيق برضه نصف سانتي تقريبا وحطيه في الصينية ثم خرميه كويس بالشوكه عشان مينفش في الفرن .. ادهني بصلصه البيتزا او الكتشب بعدين حطي المكونات الي تحبيها .. برضه ممكن تخبزي نفس القرص ده بدون اي اضافات وترجعي تحطي عليه الاضافات الي تحبيها بعد ماينخبز في حاله لو هتحفظيه في الفريزر .. وتبقي تخبزيها في اي وقت تحبي تاكليها فيه ..

طيب خلصنا تشكيل كل الوحدات ورصيناها في الصينية نتركها عشر دقائق تقريبا تخمر تاني .. حجمها هيزيد شويه وتاخذ شكلها كمان هتكون قشرة صلبة قليلا على السطح بتبقى اجمل بعد الخبز ..

هنشغل الفرن بحيث تكون درجه حرارته عاليه .. عن نفسي بظبطه على 200 ودي نفس الدرجه الي بستخدمها في اي وصفة يقولوا مطلوب فيها حرارة 180 ..

على كل حال لو انتي عارفه درجه الحرارة للمخبوزات في الفرن بتاعك ظبطيها زي الي انتي عرفاه .. .. بتكوني مشغله الفرن من تحت بس يعني مش هنشغل الشواية دلوقت

قبل ادخال الفطائر للفرن مباشرة ندهن سطحها بخليط البيض او الحليب بواسطه فرشاه .. هنحط كمية بسيطه طبعا يادوب تعطي لمعه للوجه ..

هندخلها الفرن حوالي ثلث ساعه ولو اقماع بتاخذ وقت اقل

عامه بعرف ان الاكل في الفرن استوى لما تطلع رائحته .. فانتي في اول مرة ولو لسه مش متاكده من الوقت ودرجه الحرارة خليكي قريبة وشيكي على الفرن بعد عشر دقائق من البدايه ثم بعد خمس دقائق تانيين لكن بعد كده لو مستخدمه الحرارة المظبوطه مش عاليه اوي بحيث تنضج الحاجه في وقتها بدون ماتنحرق ولا منخفضه اوي بحيث تنشف الفطائر منك فانتي و من رائحه المخبوزات هتعرفي انها استوت ..

مش شرط ان وجه الفطائر يحمر ومتعتمديش على كده في تقدير نضجها .. انتي ارفعي واحده منها وانظري للقاع فلو لقيتيه تلون وبقى ذهبي يبقى خلاص كده هي استوت . هتولعي الشواية وتتركيها خمس دقائق تحتها عشان تحمري الوجه ..

هتطلعيها وتحطيها على شبك سلك عشان تبرد

وده الشكل بعد النضج ..

طعمها قريب جدا من الكرواسون بالزبده وفيها طراوة خبز السندويتشات مع زياده الطعم الغنى المشهور في الفطائر ..

وده شكل الفطيرة من الداخل ..

لو فطائر عاديه بتقدميها على طول ولو اقماع طبعا لا زم نحشيها الاول .. ممكن جبنة فيتا مخلوطه بقطع زيتون قليل الملح .. ممكن لبنة بزيتون ودي انا بحبها اكتر من الجبنة .. بتزيني الوجه بقليل من الزعتر .. او ممكن تحطي لها قطعه خس فيبقى شكلها كأنها جزرة

باذن الله انزل لكم حشوات مختلفة في رد تالي ..

ممكن تعملي كمية كبيرة من الفطائر دي وتحطيها في علبه محكمه وتحفظيها في الفريزر .. وطبعا فطائر الاقماع بتحفظ في الفريزر بدون حشو بتحشيها قبل التقديم على طول ..

حطيها في الفريزر بقى وانسي اي وقت تحتاجي وجبه سريعه ولا عندك طفل زنان بيتأمر على الاكل ولا جاء لك ضيف فجأه هتطلعيها تفك او فورا من الفريزر للميكروويف في دقيقة هتكون ساخنة وطالع منها بخار كأنها لسه مخبوزه حالا .. والطعم طبعا مقلقوش .. رهيبة بجد .. هي دي الفطاير ولا بلاش ..

وفي التقديم حاجه تشرف والطعم يستاهل

[pink rose]

اولا طبعا تسلم الايادي اللي عملت و اللي صورت :blush2:

بصي يا بنتي يا ضحى انا بادعيلك انتي و زهرة و الله على العجينة دي

باعمل منها البيتزا ايه دا جبااااااااااااااااااارة بجد :lol:

هاجرب حوار الاقماع دا بس في مصر بقى و عليكي خير عشان اقعد افن انا و مامتي

[بركة]

تسلم ايدك يا ضحى يابنتي

ربنا يبارك لك وتعيشي وتبدعي

شكلها حلو قوي بإذن الله هجربها و اقول لك الاخبار :blush2: :lol:

[doha]

ونسيتي ياريم الايادي الي رفعت الصور ودي اهم ايد لانها كانت المرحلة الاصعب بلا منازع

عجينة العشر دقائق ممتازه لسه عملاها اول امبارح بس دي اروع منها وبمراحل مع انها نفس المقادير لكن الاختلاف في الخميرة والزبده وطبعا طريقة التحضير كل ده عامل فرق جامد في الطعم

بالمناسبة لو ناوية تجربيها في مصر باذن الله ياريت تجيبي الاقماع معاكي من السعوديه زي مانا عملت لاني مش عارفه هي بتتباع هنا ولا لاه .. هتلاقيها في محلات الاواني المنزلية السته بريالين .. او في حل اسهل مش لازم تعملي اقماع وشكليها اي شكل تاني تحبيه وان كانت الاقماع اجمل في التقديم واسهل كمان في انك بتعملي كمية كبيرة وتحشيها حشوات مختلفة وقت ماتحبي ده غير انها على طلب الست الخانم ميار الي عوزاها بالاسم ..

بركه ..

تسلمي على المرور مش عارفه عندي احساس قاتل انك ماشاء الله تبارك الله طباخه كويسه .. ياريت بقى تجربي الوصفة دي وتقولي رايك بالتفصيل متاكده هتعرفي تظبطيها باذن الله ..

تم تعديل 28 يونيو 2010 بواسطة doha

[زهره]

تسلم ايدك يا ضحى ان شاء الله نجربها

حلوه فكره الاقماع

:blush2:

[اغابي]

تسلم الايادي يا ضحى

نسيت اعرفكم بنفسي واوصف شخصيتي . .

انــــا اكـــــــــبر - مجنـــــــونة بيتـــــزااا وفطـــــــــــايررررر فى العـــــــالم ...

عاوزة اوصفلك مدى حبى للبتزا وعشقى للفطاير بس اخاف ما تصدقونيش . .

ومع ذلك بشتريهاا جاهزة لانها فعلا بجد بتفشل منى كل ما اجرب تفشل . . لغــــاية لـــما نفسيتـــى تعبت

فقررت انى اشترى طول حياتى و لان فى كل الاحوال الامر مكلف حتى لو عملتيها فى البيت بتبقى مكلفة - دا . . غير المجهود

وتسلم الايادي - الصور روعة وشهية جدا

تحياتى للجميع

اغابي

:lol:

تم تعديل 29 يونيو 2010 بواسطة اغابي

[doha]

تسلم الايادي يا ضحى

نسيت اعرفكم بنفسي واوصف شخصيتي . .

انــــا اكـــــــــبر - مجنـــــــونة بيتـــــزااا وفطـــــــــــايررررر فى العـــــــالم ...

عاوزة اوصفلك مدى حبى للبتزا وعشقى للفطاير بس اخاف ما تصدقونيش . .

ومع ذلك بشتريهاا جاهزة لانها فعلا بجد بتفشل منى كل ما اجرب تفشل . . لغــــاية لـــما نفسيتـــى تعبت

فقررت انى اشترى طول حياتى و لان فى كل الاحوال الامر مكلف حتى لو عملتيها فى البيت بتبقى مكلفة - دا . . غير المجهود

وتسلم الايادي - الصور روعة وشهية جدا

تحياتى للجميع

اغابي

:ninja:

فعلا البيتزا في البيت بتكون مكلفة جدا بس ده لو لسه مبتدئة في عملها او بتعمليها كل سنة مرة .. وهقولك ليه

احنا لما بنعمل البيتزا في البيت ( بنمونها ) كويس .. بنعملها على طريقة المكرونة بشاميل .. طبقة مكرونة وطبقة لحمه وطبقة بشاميل .. البيتزا مش كده خالص .. الاساس في البيتزا مش طبقات ولا كميات كبيرة وانما هي عجينة تضم ( بقايا المائده ) بحيث تطلع وجبة مستقلة بذاتها

نفس عجينة البيتزا مبتكونش ( مخدومه ) يعني مش شرط ابدا تحطي فيها بيض ولا حليب ولا اي شيء مكلف .. يادوب دقيق وخميرة وشويه زيت ..

السر في عجينة البيتزا هو العجن ثم العجن ثم العجن .. لو عجنتيها كتير لمده خمس دقائق على الاقل هتطلع لك باذن الله مظبوطه عن نفسي احيانا لما تكون المكونات عندي ومفيش عجين بفتح سندويتش خبز كبير وارص عليه المكونات كأنه بيتزا وادخله الفرن .. في كمان ممكن تجيبي مكرونة اسباجيتي مسلوقة ومطبوخه عادي وترصيها في صينية وتعمليها بدال عجينة البيتزا وبتطلع بيتزا بجد وبتتقطع كمان زي اي عجينة عاديه ..

ممكن برضه تشتري عجينة بيتزا جاهزه او توصي الخباز لو جنبكم مخبز انه يديلك عجينة خبز سندويتشات لسه طرية واخبزيها انتي هتطلع بيتزا

هتفردي العجينة وتحطي عليها صلصة ببيتزا ولو مش عاوزه توجعي دماغك ادهني كمية وافرة من الكتشب ودي هتلاقي عندك منها كتير اكيد طالما مدمنة اكل مطاعم مفيش في الدلفري اكتر من اكياس الكاتشب

هتحطي كمية كويسه من الجبنة الموتزريلا ودي هي المكون الغالي الوحيد في البيتزا .. لو مش متوافرة حطي جبنة رومي او شيدر ومش لازم كمية كبيرة يادوب المقدار المعقول

هتحطي زيتونتين تلاته .. نصف طماطماية بالكتير .. تنتوفة بصل .. اقل من نصف حبة فلفل اخضر .. والببروني والسجق واللحمه والكلام ده هتحطي منه مفيش ملعقة ولا اثنين من كل صنف ده لو هتشكليها او صنف واحد بس وهيمشي حاله لوحده ببساطه لان البيتزا ماهي الا صلصة وجبنة والباقي كله يمكن الاستغناء عنه

البيتزا مش بتاخذ سوا يعني يادوب الجبنة تسيح والقاع يحمر من تحت شوهي يبقى خلاص استوت .. وطبعا متحطيهاش في فرن حامي اوي عشان متتحرقش من تحت وهي لسه نية من جوا ( مازلت اذكر اول بيتزا عملتها وكانت بقاعده بيتزا جاهزه وحصل لها المذكور اعلاه )

في على فكرة ملاحظه مهمه اوي في الخبز وهي اننا منحطش في قاع الصاج ورق فويل او المونيوم لانه بيرفع درجه الحراره جامد فهتلاقي قاع المخبوزات انحرق وهي لسه مستوتش

جربي تعمليها كده وفقا للقواعد السابقة ومش هتلاقيها مكلفة ابدا وباذن الله مش هتبوظ منك خالص ..

=======

زهرة ..

شكرا على المرور ياجميل ويارب تطبقيها وتطلع احلى

[doha]

احد الحشوات الي بحبها اوي في السندويتشات وبتنفع برضه لفطائر الاقماع هي حشوة التونه

نخلي بالنا الحشوة دي مش بتدخل الفرن مع الفطيرة لان الاساس فيها تتاكل بارده فالافضل نعملها مع الاقماع فقط على اساس اننا بنحشيها بعد النضج مش قبله

هنجيب علبة تونه قطع او مفتته مش فارقه من اي ماركه نكون بنحبها ومتعودين عليها

هنصفيها كويس من الزيت

هنجهز سلطه طحينة كالتالي ( طحينة + قليل من الخل + قليل من الليمون + فص ثوم مهروس كويس + ملح + فلفل+ شطه +ماء بارد ))

هنقلب الجميع كويس اوي ولو بدأت تجمد مننا نزود مية بارده شويه بشويه لغايه مانوصل للقوام المطلوب .. نظبط الملح والفلفل

هنحتاج مايونيز ..

طماطم مقطعه صغير اوي ..يفضل ناخذ الجزء الخارجي بس من الطماطم بدون اللب المحتوي على العصارة نخليه لاي وجبة تانيه

كمان فلفل اخضر مقطع صغير اوي

زيتون سلطه الي هو الخالي من الملح ونقطعه

هنخلط المكونات السابقة كلها ونحط شويه ملح بسيط لو احتاج الامر .

هنحشي بيها الاقماع ونحطها في الثلاجه فترة قبل التقديم لانها لازم تقدم بارده

بالمناسبة الخلطه دي ممتازه للسندويتشات لو هنحشي بيها توست اسمر ونحطه في الشواية خمس دقائق يتحمص بعدين يبرد قبل مايقطع مثلثات ويقدم .. ملوش حل

[اغابي]

فعلا البيتزا في البيت بتكون مكلفة جدا بس ده لو لسه مبتدئة في عملها او بتعمليها كل سنة مرة .. وهقولك ليه

احنا لما بنعمل البيتزا في البيت ( بنمونها ) كويس .. بنعملها على طريقة المكرونة بشاميل .. طبقة مكرونة وطبقة لحمه وطبقة بشاميل .. البيتزا مش كده خالص .. الاساس في البيتزا مش طبقات ولا كميات كبيرة وانما هي عجينة تضم ( بقايا المائده ) بحيث تطلع وجبة مستقلة بذاتها

نفس عجينة البيتزا مبتكونش ( مخدومه ) يعني مش شرط ابدا تحطي فيها بيض ولا حليب ولا اي شيء مكلف .. يادوب دقيق وخميرة وشويه زيت ..

السر في عجينة البيتزا هو العجن ثم العجن ثم العجن .. لو عجنتيها كتير لمده خمس دقائق على الاقل هتطلع لك باذن الله مظبوطه عن نفسي احيانا لما تكون المكونات عندي ومفيش عجين بفتح سندويتش خبز كبير وارص عليه المكونات كأنه بيتزا وادخله الفرن .. في كمان ممكن تجيبي مكرونة اسباجيتي مسلوقة ومطبوخه عادي وترصيها في صينية وتعمليها بدال عجينة البيتزا وبتطلع بيتزا بجد وبتتقطع كمان زي اي عجينة عاديه ..

ممكن برضه تشتري عجينة بيتزا جاهزه او توصي الخباز لو جنبكم مخبز انه يديلك عجينة خبز سندويتشات لسه طرية واخبزيها انتي هتطلع بيتزا

هتفردي العجينة وتحطي عليها صلصة ببيتزا ولو مش عاوزه توجعي دماغك ادهني كمية وافرة من الكتشب ودي هتلاقي عندك منها كتير اكيد طالما مدمنة اكل مطاعم مفيش في الدلفري اكتر من اكياس الكاتشب

هتحطي كمية كويسه من الجبنة الموتزريلا ودي هي المكون الغالي الوحيد في البيتزا .. لو مش متوافرة حطي جبنة رومي او شيدر ومش لازم كمية كبيرة يادوب المقدار المعقول

هتحطي زيتونتين تلاته .. نصف طماطماية بالكتير .. تنتوفة بصل .. اقل من نصف حبة فلفل اخضر .. والببروني والسجق واللحمه والكلام ده هتحطي منه مفيش ملعقة ولا اثنين من كل صنف ده لو هتشكليها او صنف واحد بس وهيمشي حاله لوحده ببساطه لان البيتزا ماهي الا صلصة وجبنة والباقي كله يمكن الاستغناء عنه

البيتزا مش بتاخذ سوا يعني يادوب الجبنة تسيح والقاع يحمر من تحت شوهي يبقى خلاص استوت .. وطبعا متحطيهاش في فرن حامي اوي عشان متتحرقش من تحت وهي لسه نية من جوا ( مازلت اذكر اول بيتزا عملتها وكانت بقاعده بيتزا جاهزه وحصل لها المذكور اعلاه )

في على فكرة ملاحظه مهمه اوي في الخبز وهي اننا منحطش في قاع الصاج ورق فويل او المونيوم لانه بيرفع درجه الحراره جامد فهتلاقي قاع المخبوزات انحرق وهي لسه مستوتش

جربي تعمليها كده وفقا للقواعد السابقة ومش هتلاقيها مكلفة ابدا وباذن الله مش هتبوظ منك خالص ..

طلعت فى دماغى

خلينى بكره اجربها . . لان بكرة الخميس عندى نص يوم دوام وبروح البيت بدرى . .

بس بصراحة مش حاعجن والكلام داه ما عنديش دماغ

انا حاشترى من المخبر اللى جنب البيت عجينة جاهزة لعيش فينو

- دماغك بقى وانا اصلا عندى زيتون فى البيت وفلفل رومى وكاتشب وماشروم وسجق مجمد فى الفريزر وطبعا بصل وطماطم

- بس باقى الجبنة الشيدر او الموتزريلا.. ماعنديش . الجبنة اللى فى البيت عندى جبنة كاسات ..

حاجربها واحكيلك يا ضحى . . ليه بس تطلعيها فى دماغى . . ليه ما انا كنت كافية خيري شري وعايشة على الجاهز وخلاص . .

انتظرو الاخبار عن البيتزا الى حاعملها

يارب استر . . يارب ما تفشل :rolleyes:

اغابي

:blush:

تم تعديل 30 يونيو 2010 بواسطة اغابي

[doha]

خلاص يااغابي منتظرين نتيجه التجربة بس خلي بالك الجبن الكاسات والمثلثات مينفعوش ابدا في البيتزا

ممكن رومي او شيدر بس حاولي وانتي راجعه من الشغل تعدي على السوبر ماركت وتجيبي موتزريلا مبشوره .. انتي داخله على منعطف تاريخي لو لاقدر الله فشلتي في البيتزاية دي هتاثري على مستقبل اجيال كتير فلازم نضيق احتمالات الخطأ لاضيق مجال ممكن .. توكلي على الله وخليها موتزريلا وبلاش كاسات المرة دي

ملاحظه مهمه .. لما تفردي العجينة على شكل قرص لازم تخرميها كويس بالشوكه عشان متنفش لانها بيتزا في الاول والآخر مش سندويتش

[اغابي]

خلاص يااغابي منتظرين نتيجه التجربة بس خلي بالك الجبن الكاسات والمثلثات مينفعوش ابدا في البيتزا

ممكن رومي او شيدر بس حاولي وانتي راجعه من الشغل تعدي على السوبر ماركت وتجيبي موتزريلا مبشوره .. انتي داخله على منعطف تاريخي لو لاقدر الله فشلتي في البيتزاية دي هتاثري على مستقبل اجيال كتير فلازم نضيق احتمالات الخطأ لاضيق مجال ممكن .. توكلي على الله وخليها موتزريلا وبلاش كاسات المرة دي

لاء - طبعا انا عارفة - بس يمكن كنت بفكر بصوت عالى وبحسب الحاجات اللى موجودة عندى فى التلاجة فمنها الجبنة الكاسات

لكن انا حاشترى موتزريلا وامرى لله - كدا كدا - لسة قدامى وقت من هنا لبكرة اخطط بقى براحتى حاعمل ايه . .

انا صحيح قلقانة لكن ما فيش مشكلة خاصة ان عملت كيكة يوم السبت اللى فات داه - وباظت منى مش عارفة السبب . .

مع ان كنت عملتها كتير قبل كدا نفس المقادير ونجحت - لكن المرة دى فشلت منى . .

على فكرة البوتاجاز عندى جديد - لسة مشترياه من شهر ونص

- والفرن بتاعته روعة جدا - ممتازة - وبعد ما اشتريته فى اول اسبوع عملت كيكة طلعت روووووووعة وبعد اسبوعين عملت كيكة تانية طلعت ممتازة برضوه

لكن كيكة يوم السبت دى باظت - بس مش عارفة الاسباب ايه . .

ولو نجحت البيتزا ودى اول مرة حاجرب فيها البوتاجاز الجديد فى البيتزا . . بعد نجاح 2 كيكة وفشل كيكة

نجرب اول بيتزا يا ترى حتبقى ايه . .

انا ممكن اصورها - بس مش باعرف ازاى اصورها وانزل الصور فى المنتدى . .

خلينى احاول

اغابي

:rolleyes:

[عبير يونس]

طبعا مش حاضيف ع اللي قالوه البنات

بجد تسلم ايديكي

دايما فاتحة نفسي

:sad:

[om marawan]

الفطاير ماشاء الله شكلها حلو اوى وشهية بالف هنا ...بجد تسلم ايدك وياستى الواحد يعجن لحد مايخلع ايده مش مشكلة اهى كلها تمارين :blink:

نفس عجينة البيتزا مبتكونش ( مخدومه ) يعني مش شرط ابدا تحطي فيها بيض ولا حليب ولا اي شيء مكلف .. يادوب دقيق وخميرة وشويه زيت ..

السر في عجينة البيتزا هو العجن ثم العجن ثم العجن

ايوه فعلا احنا كنا نحط بيض وحليب لكن لقيت واحدة قريبتنا بقالها سنين فى ايطاليا وكانت عزمتنا على بيتزا حلوة جداااااااا والعجينة غييييير

فقالتلى ان جيرانها قالولها تجرب تعجنها بزبدة بدل الزيت مع باقى المقادير من غير بيض ولا حليب يعنى نفس طريقة الفطاير بس الزبدة اعتقد اقل كتير بس وتكون رفيعة جداااااا ( البيتزا يعنى مش الزيدة )

بجد كانت جميلة وعملت منها كمية صوانى كتيرة منها السادة يعنى شوية زيت زيتون وزعتر ومنها اللى بالبطاطس البيوريه وحلقات بصل اخضر !! يعنى حتى منها انواع من غير موتزاريللا ولا حاجة بس بجد كلهم كانوا ماشاء الله حلوين جدا لان العجيبنة حلوة

وطبعا اسااااااااسى صلصة الطماطم فى اى نوع منهم ماعدا السادة

بس تصدقى ياضحى والله العجن ده ساعات يعى الواحد يعتبره علاج نفسى :sad:

[kitkat]

ايه الفن ده ؟

تسلم ايديكي

والله أول مادخلت الموضوع افتكرتها جاهزة من لوزين !

لسه واكل ملوخية النهارده في مطعم كده في شارع خالد بن الوليد انما جامد

وحشني أكل مصر جدااااااااااااا

[doha]

ام مروان ..

تسلمي على المرور وكلامك صحيح فعلا الايطاليين بيعملوها بطريقة مختلفة عننا لان الاصل في البيتزا هي البساطه المتناهية زي ماقلت هي ( بقايا المائده ) متجمعه في وجبة جديده

بس كلامك عن بيتزا البيوريه لفت انتباهي اول مرة اسمع عنها وفي نفس الوقت حاسه انها هتكون حاجه تستحق التجربة ياريت لو فاكره الوصفة تحطيها لنا هنا او في موضوع مستقل لو حبيتي ومعاها اي معلومات اضافية عن حشوات مختلفة للبيتزا والفطاير تكوني تعرفيها ..

مصرية مغتربة ..

مرورك يعزز الموضوع بكل تاكيد ويخدمه زي الزبادي في العجين كده

مينفعش المرور القرديحي حطي لنا فكرة او اثنين لخلطات نحطها في الفطاير ومتاكده عندك ماشاء الله كتير ..

كيت كات

جيت لي على الوجيعه .. لوزين ده عشق عندي من اول البانكيك ومرورا بالكوكيز وانتهاء بالكرواسون .. هقول ايه ولا ايه بس .. عزائي الوحيد ان عجينة السمبوسه بتاعتهم مش قد كده والا مكنش سبت السعوديه من حبي في منتجات لوزين الله يمسيها بالخير

[om marawan]

هى بصراحة ياضحى عملت عجينة عادية دقيق وزبدة وملح خميرو وسكر بس زبدة اقل بس مش فاكرة كام والله لكن قولى 200 جرام وعجنتها كويس وفردت منها صوانى كتير منها واحدة عملت بطاطس بيوريه عادية مسلوقة ومهروسة وملح وفلفل و لبن شوية صغيرة وزبدة او كريمة

وبعدها فردت الصلصة اللى عاملينها فى البيت بالتوم الصحيح قالت عشان نشيله ومايبقاش قطع على البيتزا وطبعا طماطم وصلصة وملح وفلفل ومتسبكة وممكن شوية خل صغيرة وممكن اوريجانو لو موجود

شوية صلصة بسيطة وبعدين فردت البطاطس البيوريه طبقة صغيرة وممكن على طول من غير صلصة ..هى لما انا عملتها كانت صعبة فى الفرد شوية معايا يعنى بتشد البيتزا مش عارفة ليه :closedeyes:

بس هى فى الاخر كان طعمها لطيف وحلوة والله وخصوصا الاطفال بيحبوها لانهم عندى مش بيحبوا البيتزا المشكلة

هى قالتلى حطى اى حاجة عندك يعنى عاملت واحدة مثلا مش فاكرة بايه وكسرت على وشها بيضة وبس تفردى الصفار واستوت فى الفرن عادى جداا وواحدة تانية قطعت على الوش كوسة بالمقشرة شرايح رفيعة :unsure:

ان شاء الله لما انزل اجازة اكلمها واعرف منها افكار جديدة بس بشكل عام قالتلى خليها رفيعة وحطى لكل واحدة او نص واحدة تشكيلة من نوعين تلاتة من الاضافات وخلاص

بس وتسلم ايدك برضه :rolleyes:

[اغابي]

احكيلكم يا ضحى فى خطوات سريعة اللى حصل و نتيجة البيتزااااا

اول حاجة انا حضرت قبل اى حاجة خلطة البصل والزيتون وهى عبارة عن

( 3 بصلات مقطعين شرايح مع 3 ملاعق زيت زيتون على نار عالية لمدة 10 دقايق بعدين اضيف ليهم شرايح الزيتون الاسود وسبتهم على النار شوية لغاية ما شميت ريحة الزيتون فاحت - اقفل النار علطول ) وجهزتهم على جنب . .

يوم الخميس بعد الشغل - عديت الساعة 2.5 على مخبر الفينو جنب البيت و اشتريت 5 رغيف فينو ( عجين )

ادهملى البياع خمس كور عجين منفصلين لانهم كانو عيش متخمر

روحت البيت حطيت عليهم شوية مية وشوية دقيق وعجنتهم من تانى مع بعض وسبت العجينة تستريح شوية .

بعد نص ساعة فردتهم على صينيتين حجم كبير بعد طبعا مادهنت كل صينية

حطيت اول حاجة الكاتشب على كل بيتزا

وبعدين رشيت طبقة البصل مع الزيتون اللى كنت مجهزاها من الاول . . قسمت بالتساوى على الصينيتن

وبعدين شرايح السجق والفلفل الاخضر الرومى والطماطم وكان عندى لانشون قطعتهم زى شرايح بالطول وحطيتهم معاهم

بس كل بيتزا كانت متكلفة تمام بجد

بس بصراحة ما لحقتش اعدى اجيب موتزريلا - يعنى البيتزا كانت بدون موتزريلا او اى نوع جبن

وقولت اجرب البوتاجاز الجديد فى البيتزا ايه اخباره :blink:

وطبعا اشتخدمت الشوكة زى ما قولتيلى على العجينة خرمتها وشكشكتها - علشان ما تبقاش زى الرغيف العيش

وحطيتهم فى الفرن فى الوسط و بعد 35 دقيقة بالظبط وبعد ما انتشرت فى الشقة ريحة اليتزا - طلعتهم من الفرن

كل البيت قالى رووووعة وممتازة واكلو فيهم وعجبتهم جدا حتى بابا عجبته بما ان بابا عندى زيارة فى الكويت

فحبيت اظبطه وارحب بيه - لكن انا الوحيدة يا ضحى اللى ما كنتش راضية عنها رغم انهم طلبوا انى اعملها تانى حتى الاولاد

وقالولى ياريت لمدة اسبوع - كله يبقى بيتزا وقولتهم طب ادعو لضحى علشان هى صاحبة الفكرة الاساسية

لكن انا ما حسيتهاش زى اللى باشتريها من بره ب 3 دينار :lol:

- ايه الفرق فيه حاجة هى ممتازة وطعمها روعة والعجينة مظبوطة تمام سوا ومقادير وكل حاجة لكن بيتزاا - بره بتفرق مش عارفة ليه - - يمكن غياب الجبنة الموتزريلا عمل فرق - خاصة ان مفيش اى نوع جبنة اصلا فى البيتزا . . بس هى نجحت برضوه . .

انا بعتبر انها نجحت بدرجه 95 % - شجعتينى يا ضحى يارب يخليكي - هى بداية مفرحة وامل جديد . .

ومش عارفة اوصف الاحساس لما الواحد يتعب فى الحاجة وبتنجح وكل اللى حواليه يقولوه اعملنا تانى . .

اغابي

:wub:

تم تعديل 3 يوليو 2010 بواسطة اغابي

[doha]

ربنا يكرمك يااغابي ده انتي الي شجعتيني موت خاصه وانا كنت حاطه ايدي على قلبي بعد ماقريت انك عجنتيها بمية ودقيق تاني خفت تكون باظت منك بس الحمد لله انها ظبطت ده دليل انك متمكنه في الاساس وعشان كده اضافتك على العجينة كانت في محلها

بصي بالنسبة للطعم وانه عجب الكل ماعدا انتي فانا فاهمه الي حصل ده بالظبط لانه بيحصل لي كتير جدا خاصه لما اكون انا الي طابخه خاصه اكتر وانا مبقتنعش نهائيا باي وصفة غير لو كانت زي بتاعت المحترفين بالظبط مبحبش الحاجه الي تشبه او تدي على وانما الي زيها بالملي .. انا متاكده انك زيي في الحته دي

البيتزا الجاهزه عجينتها بيكون فيها زبده وبتكون رقيقه مهما كان عجينتك في الاول والآخر كانت سندويتش فاكيد في فرق ولو طفيف مابين الاثنين ..

ثاني حاجه الموتزريلا دي اساس في البيتزا وسبق واكدت ان البيتزا ماهي الا جبنة وصلصه واي حاجه تانيه مش مهمه بنفس الدرجه

صلصة البيتزا المحترفة لازم يكون فيها اوريجانوا او زعتر بري وده على فكره مختلف عن الزعتر العادي وبتحطي منه شويه صغيرين بس وهو الي بيدي الطعم المميز اوي للبيتزا الايطالي المحترفة

صلصة البيتزا الممتازه بتبقى مشروم +ثوم + بصل ويتشوح مع طماطم ثم نضيف الملح والفلفل والاوريجانوا ومكعب ماجي ونسيبها تغلي وتتسبك بهدوء .. هنرجع نضربها في الخلاط كويس لما تبقى صلصه ونستخدمها بعد كده او يفضل نتركها يوم في الثلاجه فطعمها يركز اكتر

قبل ماتحطي الصلصة في البيتزا هتذوقيها لو عجبتك يبقى هتطلع حلوة لو كان فيها طعم غريب او حسيتي انها مش مظبوطه متستخدميهاش لان هتخلي نفس الحاجه الي مش مظبوطه دي في البيتزا .. كذلك هتعملي في كل مكونات البيتزا من جبنة ولحوم لو فيها حاجه طعمها مبتحبيهوش متحطيهوش

الزيتون المستخدم في البيتزا هو الي مفيهوش ملح خالص الي بيبقى في علب معدن ده ( اليسا او كوبوليفا على سبيل المثال ) وافضل شيء اشتري الزيتون المقطع شرائح عشان تبقي ضامنه انه هو ده بتاع البيتزا

الزيتون الاسباني العادي بيبوظ البيتزا خلي بالك وعلى فكره الزيتون مش مكون اساسي ممكن تستغني عنه

ممكن تشتري على فكره الصلصه جاهزه من السوبر ماركت هتعجبك برضه وممكن جدا اكتر تحطي كتشب بس والله بتطلع روعه

البيتزا بتكون رقيقه يعني يادوب طبقة العجينة وفوقها طبقه واحده من كل المكونات مع بعض يعني على مسافات متباعده هترشي كل مكون على الوجه فيشكلوا مع بعض طبقه مش كل واحد بكمية كبيرة كانه طبقه لوحده

البيتزا متتاكلش غير سخنة ولو بردت طعمها بيتغير كتير جدا خاصه لو الجبنة الي فيها اي كلام

ملاحظه اخيرة خلط اكتر من نوع جبنة في البيتزا بيحسنها اكتر كمان

جربي كده بكل النصائح السابقة وباذن الله هتطلع معاكي مظبوطه وان شاء الله لما اعمل البيتزا قريب هنزل لكم موضوع عنها بالصور

حمد لله على سلامة الوالد وبجد دعواتك اسعدتني ومش عاوزه منكم جميعا غير كده اي حد يحس انه استفاد مينسانيش من دعوة حلوة بظهر الغيب بس ابوس ايديكم اي حد تبوظ منه حاجه اوعى يدعي علي

[عبير يونس]

مصرية مغتربة ..

مرورك يعزز الموضوع بكل تاكيد ويخدمه زي الزبادي في العجين كده

مينفعش المرور القرديحي حطي لنا فكرة او اثنين لخلطات نحطها في الفطاير ومتاكده عندك ماشاء الله كتير ..

الله يخليكي يا قمر

الحمد لله اني زبادي عشان الدسم يعني و كده

:lol:

تأمريني يا جميل

و لو ان شكل الفطائر ما شاء الله يتاكل حاف و من غير حشوة

خدي عندك كام حاجة ع الماشي

حشوات اللحوم و الفراخ

أهم حاجة في الحشوة التخديعة أو الفرشة بتاعتها

يعني البصل و البهارات و الخضرة

بالنسبة للحم المفروم

بأحط بهارات هندية

في بهارات خاصة باللحم بتبقى تحفة

بالنسبة للفراخ

بأحب اضافة القرفة و الزنجبيل

أو الكاري بس

يعني يا ده يا ده

التخديعة

:lol:

زيت (يفضل زيت زيتون) أو أي زيت نباتي

بصل مفروم

فصين توم حسب الرغبة

بتبقى تحفة مع الفراخ

البهارات

اللحم طبعا بيبقى مفروم و بيتعصج عادي مع التخديعة

احيانا بأحط همبورجر متقطع مكعبات

الفراخ بأستخدم قطع دجاج مخللي و متقطع اما مكعبات صغيرة

أو شرائح رفيعة (فاهيتا)

و بأشوحه في زيت زيتون الأول قبل اضافته على التخديعة

(الأفخاد قبل الصدور عشان بتستوي في وقت أطول

و بعدين لما لونها يبقى ذهبي كده باحط ميه تغطيها

لحد ما تستوي

انا بحبها مهرية

و في ناس بتحبها بتشد شوية

كل واحد طبعا و الحاجة اللي بيحبها

طبعا في الآخر و بعد ما تستوي ممكن نضيف بقدونس مفروم و شبت

بتبقى ريحتها تجنن

حشوة السبانخ

باستخدام سبانخ مجمدة

لكن طبعا ممكن تستخدموا سبانخ طازة و تشوحوها في زيت زيتون قبل اضافتها للتخديعة

طبعا السبانخ آخر حاجة لأنها بتستوي بسرعة

حشوات ع البارد

الجبن بالزعتر

الجبن والزيتون

سوسيز معمول و يتقطع حلقات

لانشون

جبنة رومي

جبنة كاسات *

تونة مضاف ليها شطة ( زجاجات الشطة)

بيض مسلوق و مبشور مع بقدونس

حشوات حلوة

مهلبية (جربوا تعملوها بصفار بيض وادعوا لي :sad: ) أو كاسترد

اي نوع مربى

شيكولاتة (لبن بودرة +كاكاو بودرة+ ماء قليل يمسكهم في بعض)

تمر (عجوة)

كانت أختنا الفاضلة بركة قالت لي على طريقة عمل الجبنة الكاسات و أنا غيرّت فيها حاجة

حأقول لكم الطريقتين

طريقة بركة

علبة حليب مكثف غير محلى

3 ليمونات

ثلاثة أرباع كوب زيت نباتي

ملعقة ملح

بهارات حسب الرغبة

نضع علبة الحليب المكثف في الخلاط

و نضيف الليمون

و الملح

و الفلفل مثلا أو الزعتر

أو سادة

و بعدين زي طريقة المايونيز حنضيف الزيت سنة سنة

طريقتي

:ninja:

لأن ساعتها مكانش عندي حليب مكثف

و طبعا الجيش بيقولك اتصرف

حطيت 2 كوب لبن بودرة مع كوب مية

الكوب=5 ملاعق كبيرة لبن بودرة

و معاهم 3 ليمونات و ملعقة ملح

ما ضيفتش حاجة كنت عايزاها سادة

و بعدين ضيفت الزيت

مقاديري عملت كيلو الا ربع جبنة

و الحقيقة طلعت خرافة

و جوزي كان مبسوط بيها اوي

((جوزي للعلم يعني من الصعب جدا ان يظهر ثناء wst::

لدرجة انه اتباهى بيا و دوّقها لواحد صاحبه كان عندنا

:lol:

المهم طقت في دماغي فكرة اني اجرب نفس المقادير مع استبدال الملح بالسكر عشان اعملها صنف حلو

و قد كان

بس ملحوظة

ضيفوا السكر قبل الليمون

انا اضفت 5 ملاعق

بس كان سكر خفيف

طبعا

دوقوا من الخليط و ضيفوا المقدار اللي تحبوه من السكر

المهم المقدار ده عمللي صينية مستطيلة مقاس 3

مع بسكوت مفروم وزبدة

و الخليط ده ع الوش

و بعدين حطيتها في الفرن حوالي 10 دقائق او لحد ما تمسك في بعضها

بالنسبة للخلطات بتاعتنا

ممكن تحطيها كحشوة حلوة

او حادقة

جربوا وادعوا لبركة وادعوا لي

و بألف هنا و شفا

:FN:

[عبير يونس]

نسيت اقول حاجة مهمة اوي

دايما الحشوات عشان متفتفتش من الولاد وهمة بياكلوها

يستحسن تمزج الحشوة بأي مادة قابضة

جبنة كاسات

مايونيز

طحينة

باشميل

طبعا حسب الرغبة

تحياتي

:ninja: