أسرار البنات والمدينه الجامعيه

[ساره احمد]

عارفة يابوسي تصدقي بالله انى كنت حاسة انة رهان مش عرفة لية

انا اديلي كام يوم كدة مكنتش موجودة ولما قريت ال 3 حلقات دول عجبونى اوى

برافو يابوسي بس طلب ممكن تكبري الحلقة شوية

[om marawan]

أهلا ام مروان

احنا عملنا ديليفري وجبنا لب وترمس ولقمة القاضي

أما نشوف شيري هتعمل ايه في اللي أنا والكل عارفين أنه هيحصل :unsure:

اكتشفت انى لو دوست ريبلاى هيرد عليكى على طول من غير ماقول اقتباس وبعدين ارجع ادوس اضافة رد

الظهار امورنا هتحلو مع الاصدار الجديد بس يارب الخط يكبر

احلى ديلفرى يا داموووو ويدوم العز ياباشاااااا

انا هاشبرلكم بقا ازازتين سفن اب وكوباية تمرهندى معايا

[pocy]

الحلقه 18

فى الحلقه الماضيه شيري ضربت احمد بالقلم ورجعت المدينه مع منى بعد ان اغمي عليها عندما علمت بان موضوع احمد وناديه ده كان مجرد رهان وهى اكدت انها لازم ترد له الصاع صاعين لان بنات الناس مش لعبه لشان يترهنوا عليها وبعد ان عادت شيري للمدينه اتفقت مع ياسمين ان تعاونها على ابعاد ناديه عن احمد كما انها قالت لناديه ان احمد كان يقف مع واحده ورا الورش والمكان ده زمان كان معروف بطريق العشاق وحاولت منع ناديه من الاتصال به وفى ذلك الحين اتصلت منى وطلبت من شيري ان تتصل بها بعد ساعه

وفى هذا الوقت كان احمد قد رجع الى بيته ليس له اى نفس للاكل وقال لوالدته لو اى حد اتصل انا نايم او مش موجود ودخل حجرته واغلق عليه الباب و رمى نفسه ع السرير ووضع يده على خده واخذ يفكر فى هذا الوجه الملائكى الجميل والبرئ وتذكر اغنيه عبد الحليم حافظ ودارت الاغنيه فى ذاكرته

بحياتك يا ولدي امرأة عيناها سبحان المعبود

فمها مرسوم كالعنقود

ضحكتها أنغام وورود

والشعر الغجري المجنون يسافر في كل الدنيا

قد تغدو امرأة يا ولدي يهواها القلب هي الدنيا

وهنا تحدث عقل احمد معه قائلا : ايه يا بنتى مكنتش حته بت هى اللى تعمل كده فيك

احمد : لالالا دى مش اى واحده انت شفت وشها جميل ازاى وهى نايمه (مغمى عليها )

عقل احمد : طب مانت شوفت الاجمل منها فاكر شاهي كليه التجاره

أحمد : شاهي مين بس البنت شريين دى حاجه تانيه خالص وشها فى جمال وبراءه فظيعه انا لسه حاسس باناملها على وشي اد ايه كانت ايديها رقيقه وجميله

عقل احمد : انت اكيد بتهرج واحده ضربت على وشك وقدام جمع غفير من الناس وانت اللى همك ايدها على وشك ملمسها كان ايه

احمد : مش عارف بس انا اللى مضايقنى انها بعد ما ضربتنى بالقلم ولا اهتمت حتى انها تعتذر انا هتصل بالواد محمود واعرف حكايتها ايه

يتصل احمد بمحمود فى البيت فلم يجده فيتصل بيه ع الموبيل ويكون كان بيوصل منى لمحطه السفر

وكان يتصل بيه ليسأل عن شيري وهل قالت ليه ضربته بالقلم ودار هذا الحوار بينهم

احمد : ازيك يا هندسه اخبارك ايه ؟

محمود مستغرب : الحمد لله خير بتتصل على الموبيل ليه انا دقايق وهاكون فى البيت

احمد : ابدا انا كنت عايزه اسالك على البنت اللى ضربتنى دى ؟؟؟

محمود : قصدك شيري

وهنا انتبهت منى للكلام وانتظرت لتسمع ما يقال

احمد : ااه تقريبا شريين باين انتم بتقوللها شيري

محمود : اهه بس ايه داخله فيها

احمد : ايه ياعم يعنى معرفش مين اللى ضربنى وعملت كده ليه وهل قالتك تعتذرلي ولا لا ؟؟؟

محمود : لالالالا هى مش قالتلى انى اعتذرلك ولا حاجه ومش جابت سيره الموضوع ده

احمد : هى مرتبطه البنت دى ولا ايه النظام ؟؟؟؟

محمود : ايه ياعم انت ناوى تعمل نظام ولا ايه ؟؟؟؟

احمد : ولا نظام ولا حاجه بس اصلي مش بشوفها كتير

محمود : على العموم انسي ياعم الامور شيري مش اى حد توافق عليه لان اللى يستاهلها دكتور جامعه مش واحد زيك

احمد : ياعم هو انا قلتلك هتجوزها انا بسالك مرتبطه ولالا ؟؟؟

محمود: لا مش مرتبطه

احمد : وانت ايه الى مخليك متاكد قوى كده

محمود : لانها صاحبه منى وتعرف عنها كل حاجه ولو مرتبطه كنا عرفنا

احمد : طيب انت هتوصل البيت ع امتى

محمود: يعنى بالكتير 10 دقايق ليه ؟

احمد : عايزه فى موضوع كده ..........

محمود : بخصوص ايه ؟؟؟ شيري ؟

احمد : تقريبا

محمود :اول ما اوصل هتصل بيك

احمد : طيب سلام

محمود : سلام

قفل محمود الخط ومنى هريته اساله وبمجرد ركوبها الباص اتصلت بشيري وقالتلها عايزه اكلمك بخصوص احمد وانا هوصل كمان ساعه ابقي اتصلي على فى البيت

وفي حجره احمد وبعد ان اغلق التليفون مع محمود وجد نفسه بيتنطط وقلبه هينط من الفرحه

عقل احمد : ايه فى ايه وليه الفرحه دى كلها

احمد : مش عارف بس انا فرحان انها طلعت مش مرتبطه

عقل احمد : وبعد ما عرفت ؟؟؟؟

احمد : ايه يعنى اعمل ايه ؟؟؟

عقل احمد انا اللى بسالك : بعد ما عرفت يعنى ايه اللى هيحصل وهتكلم محمود فى ايه

احمد بتنهيده كبيره : مش عارف بس انا حاسست ان البنت دى فيها حاجه بتجذبنى ليها مش قادر انسي وشها وهى بين ايدي وببصلها

عقل احمد : لالالا عند هنا وقف الموضوع شكله داخل على تقيل

احمد : انا حاسس احساس جميل ومش عايزه يروح حاسس ان روحى كانت بعيد عنى وفجأه جاتلى

عقل احمد : فوق بيقولك مش هترتبط الا بدكتور جامعه

احمد : سيب الموضوع ده لى انا وانا هظبته

ورمى احمد نفسه ع السرير مره اخرى وسرح فى عالم جميل ليس به الا هو والوجه الملائكى

وهو فى هذا العالم الجميل رن جرس التليفون لترد والدته وتقول انه غير موجود

وجرى ع امه : مين اللى بيتصل دى واحده اسمها ناديه وقلتلها انك مش موجود

احمد : طب لو محمود اتصل نادينى غير كده انامش موجود

وبعد دقيقه واحده اتصل محمود

محمود: ازيك يا بنى خير في ايه ؟؟

احمد : مش عارف والله يا محمود بس البنت دى مضايقانى

محمود : مضايقاك ليه ؟؟؟

احمد : حاسس انها ولا كانها ضربتنى ووسط الناس مش مفروض انها تعتذر

محمود : لا الكل عارف انها كانت لسه مش فايقه ثم هى تعرفك منين ولو فى حاجه كانت قالت لمنى

احمد : طب هى تعبانه كده على طول ولا دى اول مره

محمود : لا دى اول مره هى بس ضغطها وطى فجأه مش اكتر

احمد : انت بتقول انها مش مرتبطه ؟؟؟؟

محمود : اهه مش مرتبطه

احمد : ليه ؟؟؟؟

محمود : انتى مالك

احمد : لا بجد بتكلم بجد اصلها غريبه بنت اموره ومهذبه وانيقه

محمود : هو انت اساسا شوفتها دى اجمل من كده كمان بس انت شوفتها وهى تعبانه

احمد : هى من فين فى بورسعيد ؟؟؟

محمود : لا شيري من القاهره وقاعده فى المدينه الجامعيه

أحمد : اصلى اول مره اخد بالى منها

محمود: لا اصلها بين المحاضرات بتروح لزمايلها او بترووح المدينه

احمد : طب متعرفنى عليها ينوبك ثواب

محمود : مش عارف بس انت مش التيب بتاعها خالص

احمد : ياعم نشوف ونجرب مش هنخسر حاجه

محمود: طيب بس هسال منى الاول وارد عليك

احمد : طب انا مستنى ع السماعه

محمود : بتهرج هسالها بكره

احمد : لالالالالا وحياه الصداقه يا شيخ اللى بنا اسألها الان

محمود : طيب لما نشوف اخرتها معاك

يتصل محمود بمنى ويقولها وهى تقوله هاشوف وابقي ارد عليك لما اوصل البيت

محمود : ايوه يا سيدى هتبقي تتصل بيها وترد على

احمد : طب يعنى اتصل بيك الساعه كام ؟؟؟

محمود : ايه يابنتى اصبر شويه لبكره ولو اتصلت وقالت حاجه مفيده هاتصل انا بيك

احمد : طب كلمنى عنها اكتر نظامها ايه ومن فين فى القاهره واخواتها وباباها

محمود : بص انا معرفش الكتير انا اللى اعرفه عنا انها مولوده فى الامارات وكانت عايشه هناك وجت ع الجامعه على طول وليها اختها متزوجه فى القاهره وبتنزل عليها فى الاجازات وبس ووالدها مهندسه بترول شغال هناك فى ابوظبي وامها كمان دكتوره وشغاله فى هناك وعنده اخ صغير معاهم وهى بتسافر الامارات فى الاجازه الصغيره واههلها بينزلوا القاهره فى الاجازه الكبيره وبس وهى انسانه محترمه جدا جدا ومرحه جدا جدا وبجد لذيذه ولو مكنتش عرفت منى الاول فى اعدادى كنت ممكن اكون ارتبط بيها لانها نسخه من منى

احمد : اممممممممممممممممم كلامك عنها ممتاز

محمود : يابنى دى اكتر من كده المهم انت ناوى على ايه

احمد : مش عارف بس البنت دى فيها حاجه

محمود : طيب اسيبك انا بقي علشان اروح اتغدى وانام عندى مشروه هيتسلم يوم الاحد ومش فاضيلك

احمد : يا عم مشروع ايه بس سيبك من الكلام ده قولى بقي هى شيري تعرفنى ولالا ؟؟؟

محمود : اعتقد لالالالا ويالا بقي انا عايزه اكل سلام

احمد : طيب مش تنسي تتصل بي بعد ما خطيبتك تتصل بيك

محمود : طيب سلام بقي

احمد : سلام

اغلق احمد التليفون وحاول ان ينام ولكن صوره شيري محفوره فى خياله وهو يراقب ملامحها ويتخيلها تحدثه

وبعد فتره من الوقت ذهب فى نوم عميق

واليكم فى الحلقه القادمه حوار منى وشيري وكيف سيكون رد فعل شيري عندما تعلم بشعور احمد

تم تعديل 18 يوليو 2010 بواسطة pocy

[pocy]

انا تايهة خالص بقالى كام يوم فى النسخة الجديدة للموقع بس اخييييرا شفت من بعيد الفرشة بتاعة دامو ولماضة عرفت انهم قاعدين مستربعين وايدهم على خدهم بيسمعوا حدودوت بسبوسة

يااااااه الحمد لله انى تهت وجيت على المفاجاة لما اتعرفت بس الظاهر الاحداث لسه فيها تشويق كتير

على فكرة ممكن نكون كنا حاسين انه فيه لعبة بتحصل وان احمد ده غريب بس السرد نفسه جميل وحكاوى البنات ودردشاتهم وشخصياتهم وخوفهم على بعض بجد جميل جداا

مستنيين الباقى يابوسى يا جميلة ومعلش والله ماشفتش مداخلتك غير دلوقتى انا اريحة على "النون" المدينة الجامعية بتاعة المحاوراتيات :) ولو انى اتأخرت اوى واكيد البنات ردوا

الا صحيح انا معاهم على الفرشه دى ولالالا لالالالالالالالالالالالالالا

بجد بتوحشنى انا القعده واللمه مع حبايبى الحلوين وحاسه انى ابله فضيله وهى بتحكى قصه ههههههههههه

لمضمض انا من هنا هابدأ اكتب اللى فى عيل احمد وايه اللى بيدور فى دماغ اى شاب وازاى ان تفكير البنت غير تفكير الولد وازاى يأقلموا بعض بس انتى ايه رأيك بمأنك أديبه كبيره هنا فى المنتدى ههههههههههه ربنا يوفقك يارب اللهم امين

أم مروان بجد كلامك يبعث ويحس جدا على التشجيع وان شاء الله الى الامام

أهلا ام مروان

احنا عملنا ديليفري وجبنا لب وترمس ولقمة القاضي

أما نشوف شيري هتعمل ايه في اللي أنا والكل عارفين أنه هيحصل :unsure:

مش تتوقعى قوى ياقمر لان اللى هيحصل حاجه غير متوقعه نهائي

بــــــــــاك

أولاً: بأحييك يا أم عمر على الآداء الرائع و السرد المميز و التشويق اللي هيموتنا كلنا

ميرسي جدا جدا ع كلامك الجميل ده

ثانياً: الواد أحمد ده واد سيس

ثالثاً: ام أحمد باة ما عجبتنيش و ده يديني مؤشر على تربية سي السيد .. أقصد سي أحمد اللي فاكر نفسه هارون الرشيد و كل حاجة مجابة و كل اللي يشاور عليه موجود و ده راجع للتربية السيس من الأم السيس و دول شكلهم عيلة سيس أساساً. :closedeyes:

رابعاً: نادية لازم حد يديها بالألم الشديد و أنا مش مع شيري و ياسمين في أسلوبهم خالص ... يا بخت من بكاني و بكى عليا ولا ضحكني و ضحك الناس عليا .. لازم يخبطوها في وشها كدة .. هيستنوا ايه ؟؟ لما تعمل حاجة غلط الواد الخسيس ده يسجلها و تتفضح؟

خامساً: حسي الأدبي بيقولي حاجات كدة بس مش هأتنبأ بيها ولا هأحرقها عشان الإخوة الزملاء و عشان حقوق النشر .. بس لو حصل .. شيري كمان بت سيس يلا هاااا md2:

هو انا اللى قدرت افهمه ان كلمه سيس دى كلمه وحشه هههههههههههههههههههه

سادساً: البت شيري دي مية مية على الألم الموجه المرسل لوجه سي أحمد بيه خازندار .. جدعــــــــة

الجيات كتير وكلها اقلام بس يا ترى فين ؟؟؟؟

سابعاً: مع السلام عليكم

وعليكم السلام ورحمه الله وبركاته

مكاوى .. كريتيسيزم

عارفة يابوسي تصدقي بالله انى كنت حاسة انة رهان مش عرفة لية

انا اديلي كام يوم كدة مكنتش موجودة ولما قريت ال 3 حلقات دول عجبونى اوى

برافو يابوسي بس طلب ممكن تكبري الحلقة شوية

انا هكبرلك الحلقه وهحطلك ان شاء الله حلقتين فى اليوم اللى كان شغلنى خلاص ياقمر وربنا يوفقك يارب فى دراستك ويكرمك بزوجك (خطيبك حاليا)

وبجد ميرسي جدا على تشجيعك يا ساره يا قمر تعالى بقي معانا على فرشه دامووووووووو والديلفرى النهارده على ان شالله ما عن حد حوش

تم تعديل 18 يوليو 2010 بواسطة pocy

[pocy]

فينكم يا شباب ودى الحلقه الى وراها علشان خاطر الحبايب

[pocy]

الحلقه ال 19

فى الحلقه القادمه عرفنا ان احمد بدأ يتعلق بشيري وانه طلب من محمود ان يتعرف عليها و منى هى اللى تسالها وكان منتظر الرد وعرفنا ايضا ان منى اتصلت بشيري وقالتلها اتصلي بي بعد ساعه وعندما انتهت الساعه اتصلت شيري بمنى لتعرف ماا حدث فلم تكن تتوقع ان يكون احمد متعلق بعا ويريد ان يتعرف عليها لكنها كانت متوقعه انه الموضوع خاص بناديه واحمد المهم دار هذا الحوار بين منى وشيري على التليفون

شيري : خير قولى قلقتينى فى حاجه ؟؟؟؟؟؟؟

منى : فى حاجات ..........

شيري : ايه سجل لناديه ولا حاجه ؟؟؟

منى :لالالالا انتى انسي موضوع ناديه ده هو نسيه المشكله فى حاجه اكبر

شيري : يا غلسه متقولى بقي ؟؟؟؟؟؟؟؟

منى : انا غلسه برضه بس علشان شاندوتشتات الشاورما هتنزل المره دى

شيري : طب يا ستى هعزمك بكره بس قولى

منى : احمد شكله وقع على بوزه

شيري : مش فاهمه

منى : يعنى من ساعه ما شافك وهو هارى محمود تليفونات وعمال يسال عليكى وفى الاخر طلب من محمود انه عايز يتعرف عليكى

شيري : يتعرف على انا ومحمود قاله ايه ؟؟؟؟؟؟؟؟

منى : ابدا محمود قاله هخلى منى تسالها وارد عليك وهو مستنى ع احر من الجمر ردك يا قمر

شيري : خليه يستنى طول عمره هو انا هررم ولا ايه

منى : ليه يا بنتى احمد ابن ناس كويسين جدا ومن عيله كبير هنا

شيري : خليهموله انا مش عايزاه انا لو طول اجيب شبشب معفن وقديم واضربه بيه كنت ضربته ثم اظزاى بتطلبي منى طلب زى ده انتى مفروض كنتى اديتى محمود على دماغه ازاى

تسالونى مفروض تردوا عليه وانتى اكتر واحده عارفه ليه

منى : يا غبيه ماهو علشانا انا عارفه ليه بقولك استغلى الموقف وعزبيه يعنى ابعديه عن ناديه وازبليه بعد كده

شيري : يا سلام والوث اسمى وسمعتى بكلام الواد الملزق ده انسي

منى: على راحتك عايزانى اقول ايه

شيري : قولى لمحمود لما تشوفك شيري بكره

منى : طب هتعملى ايه فى الغلبان ده حرام عليكى سبوهولى

شيري : هتشوفى قوليله الكلمتين دول وبس وخلى اخينا يستنى على نار هاديــــــــــــــــــــــــــــــــه على الاخر

منى : على راحتك يا قمر يالا بقي سلام

شيري : سلام

اتصلت منى بمحمود وقالت له شيري هترد عليك بكره فقام بدوره واتصل باحمد والذي كان قلق جدا من ردها وقال مش مهم استنى بس مش تقول لالالالالالالالا وانتهى اليوم على هذا

وفى صباح اليوم التالى وكان يوم الخميس وكان يوم السفر بالنسبه للبنات استيقظت كل من ناديه وشيري وياسمين وكانت ياسمين حارس امين على الامانه التى استودعتها من قبل

شيري فلم تجعل امامها اى فرصه للتلاقي او للكلام مع اخينا الذي كان بدوره غير متواجد لانه كان ينتظر شيري وردها من قبل محمود

محمود : صباح الخير شيري وكان فرحان ومتوقع انها يمكن تكون فكرت بالامر

شيري : صباح النور انا زعلانه منك على فكره وانا اللى كنت بحسبك اخويا الكبير

محمود: ليه بس هو انا عملت ايه ؟؟؟

شيري : مش عارف عملت ايه مش قلت لمنى تيالنى على الولد زميلك انتى عارف عنى انى بتاعه كلام فاضي من ده

وكمان بتقلي واحد سئ السمعه زى ما عرفت من البنات

محمود : بصي انا هقولك حاجه يا شيري والله انا قلت لاحمد كده انك مش بتاعه الكلام ده وانك تستاهلى ع الاقل دكتور جامعه بس هو قالى انه تاب وهيفتح صفحه جديده وهيكون دكتور

جامعه بس علشانك فحسيت بصراحه صدق نواياه وده صحبي وانا عارفه كويس

شيري : برضه مكنتش متوقعه منك كده على العموم انت طبعا عارف ردى ومش محتاج اقوله وارجوك بلاش شغل الخاطبه ده معايا وميرسي جدا على سؤء الاختيار

محمود : خلاص بقي مش تزعلى احنا منقدرش على كده

شيري : من موقعى هذا انا الملكه فينسيا عفونا عنك

محمود يضحك : طب الحمد لله انا هقوله ردك واول واخر مره

شيري : المهم سيبك من الموضوع ده قلى عملت ايه فى المشروع خلصته ولا لسه ؟؟؟؟؟

محمود : طبعا يا بنتى بس بحط لمساتى النهائي ه

شيري : طب ومشروع منى ؟؟؟؟؟؟

محمود : لا لسه مش خلصته هسهر عليه جمعه وسبت ان شاء الله

شيري : طيب ع العموم انا خلصته وهسيبه فى المدينه لانى مسافره الاسبوع ده مش عايزه حاجه حلوه من هناك

محمود : لا ترجعيلنا بالف سلامه

شيري : هى منى اتاخرت ولا انا بيتهيألى ؟؟؟؟

محمود : اتصدقي انا هتصل بيها اشوفها فين

شيري : طيب ابقي طمنى عليها

محمود : اوك

خرج محمود وكان يتحدث مع منى فى هذا الوقت دخل الى القاعه احمد ويبحث بعينه عن محمود ولم يجده ولكنه وجد شيري : فوقف وسرح فى جمالها وفجأه نظرت شيري في اتجاهه

فوجدته ينظر فى عينيها مباشرته وقالت فى نفسي الواد ده بيعمل ايه هنا لا يجي ويكلمنى تبقي مصيبه هحرجه ازاى انا هفتكر اللى عمله فى ناديه وانا هعرف ارد و اتجهت

بنظرها الى كشكول محاضرتها وجلست ترسم وفجأه وجدته يقترب منها ويقول ليها

احمد : مهندسه شيريين اخبارك ايه النهارده اتمنى صحتك تبقي افضل

شيري: الحمد لله عن إذنك

وخرجت شيري لتبحث عن محمود حتى تتخلص من احمد ولكنها لم تجده موجدا وكان احمد قد تبعها الى خارج القاعه والتفتت لتدخل القاعه اذا بها تخبط فيه ويمسكها حتى لا

تقع ونظرت له نظره احتقار ودخلت الى القاعه فاتحرج يدخل وراها وانتظر محمود فى الخارج ولكن محمود لم يأتى فلقد كانت منى تركب بايجو وتعطل فى الطريق ولم تجد موصلات

فذهب محمود ليجلب سيارته ويحضرها واتصل بشيري ليقول لها ان تعتذر للدكتور وتقول له سبب التاخير فقالت اوك واتصلت على منى حتى تطمئن عليها ثم بدأت المحاضره

ولكن طول المحاضره وهى فى ذهنها نظره احمد لها كانت نظره مختلفه إذن فهو يحبها بجد ولكنها تراجعت عن الفكره وراحت تتابع يومها الى ان اتى محمود ومنى وحدث ما لا

يحمد عقباه ولم تتوقعه شيري

وهذا ما سنراه فى الحلقه القادمه

انتظرونى

[pocy]

تفتكروا ايه اللى حصل ؟؟؟؟؟؟؟؟؟؟؟؟؟؟؟؟؟؟؟

[Damo]

مشعرفة :unsure:

[mekkawy]

انا لسة عند كلامي

لو حصل و شيري وقعت تبا بت سيــــــــــس و هزعل منها اوي أوي ...لأنك حطتيها عندنا في مكانة كويسة و عالية شوية و عاقلة شويتين فمش معقول تقع في حفرة زي دي .. كبيرها تقوله لما تبا دكتور جامعة ده عنوان بيتنا .. لو عاوز يبا مظبوط .. اكتر من كدة دي عالم سيس .. ثم اللي هيحصل إن هم أحمد هيتهطل و هيكلم شيري بشكل مباشر و هتيجي نادية و تشوفهم و تدب الفرقة بين نادية و شيري على أساس إن شيري كرهتها في أحمد علشان تستفرد بيه بردو على أساس إن أحمد ده آخر ذكر في الجامعة .. بس بلاش نسبق الأحداث

ع جنب بأة

سيس للي مش عارف .. هي كلمة دارجة تطلق على العيال السيس اللي مش مظابيط كدة و دماغهم فارغة و نظرتهم خاوية زي أحمد كدة .. و مالهمش أهداف في الدنيا غير الهيافات و الجري ورا البنات لو كانوا ولاد و التفكير في الولاد لو كانوا بنات .. إذن سيس تطلق على الولد و البنت سواء .. و تطلق على الآباء و الأمهات اذا كانت تربيتهم تربية سيس يعني تربية خايبة زي الست والدة أحمد كدة .. حد فهم ولا ...

مكاوى .. مش سيس :closedeyes:

[لماضة مصرية جدا]

الحلقه ال 19

شيري : خليهموله انا مش عايزاه انا لو طول اجيب شبشب معفن وقديم واضربه بيه كنت ضربته ثم اظزاى بتطلبي منى طلب زى ده انتى مفروض كنتى اديتى محمود على دماغه ازاى

تسالونى مفروض تردوا عليه وانتى اكتر واحده عارفه ليه

منى : يا غبيه ماهو علشانا انا عارفه ليه بقولك استغلى الموقف وعزبيه يعنى ابعديه عن ناديه وازبليه بعد كده

شيري : يا سلام والوث اسمى وسمعتى بكلام الواد الملزق ده انسي

منى: على راحتك عايزانى اقول ايه

السلام عليكم و رحمة الله و بركاته

ع فكرة بقي "فكرة الشبشب المعفن"...عجبتني اوي....ايون....و انا كنت نوهت عليها قبل كده

اللي مش عاجبني بقي

"مني"....عشان بتفكرني بكتير من البنات اللي بتبقي فاكرة نفسها ناصحة وواعية و قال ايه عارفة تتعامل مع الاولادد....بلا خيبة....معلشي انا اصلا شايفة ان الصداقة بين شيري و نادية و مني...توليفة غريبة و فيها كتير من المتناقضات...بس ده اللي بيحصل فعلا في الحياة الحقيقية....بس طالما البنت اتحطت في الدايرة دي بحكم تواجدهم في المدينة الجامعية...بجد البت الراجل...او الجدعة يعني...المفروض تحمي نفسها اكتر من كده

انا قولتلك اني بحس اني بشبه شيري...و و لو عندي صاحبتي مني....هنفضها ع طول...عشان دماغها مش عاجبني....بالنوسبة لنادية...انا همسكها كده و احط راسها تحت الحنفية السائعة في شهر يناير....عشان تفوق بس خلاص

توقعاتي اللي هيحصل ان ببساطة "حزنبول" او احمد اللي عايش الدور...بيحب بنتنا "شيري"...و انا رايي هيتتحب...بس مش من ده...لانه بس حب رفضها ليه...و ع راي ابننا عكاوي العيال الفيس دول...كل ما الواحدة تديهم ع دماغهم كل ما يتمسك بيها اكتر...

شيري تستحق ارتباط نضيف....و الواد ده مشواااااااااره طويل...من التاديب و التهذيب و الاصلاح...بس عايز طولة بال

[pocy]

مشعرفة :unsure:

افادتى واوجزتى ههههههههههههههه شويه وهتعرفي ياقمر

انا لسة عند كلامي

لو حصل و شيري وقعت تبا بت سيــــــــــس و هزعل منها اوي أوي ...لأنك حطتيها عندنا في مكانة كويسة و عالية شوية و عاقلة شويتين فمش معقول تقع في حفرة زي دي .. كبيرها تقوله لما تبا دكتور جامعة ده عنوان بيتنا .. لو عاوز يبا مظبوط .. اكتر من كدة دي عالم سيس .. ثم اللي هيحصل إن هم أحمد هيتهطل و هيكلم شيري بشكل مباشر و هتيجي نادية و تشوفهم و تدب الفرقة بين نادية و شيري على أساس إن شيري كرهتها في أحمد علشان تستفرد بيه بردو على أساس إن أحمد ده آخر ذكر في الجامعة .. بس بلاش نسبق الأحداث

ع جنب بأة

سيس للي مش عارف .. هي كلمة دارجة تطلق على العيال السيس اللي مش مظابيط كدة و دماغهم فارغة و نظرتهم خاوية زي أحمد كدة .. و مالهمش أهداف في الدنيا غير الهيافات و الجري ورا البنات لو كانوا ولاد و التفكير في الولاد لو كانوا بنات .. إذن سيس تطلق على الولد و البنت سواء .. و تطلق على الآباء و الأمهات اذا كانت تربيتهم تربية سيس يعني تربية خايبة زي الست والدة أحمد كدة .. حد فهم ولا ...

مكاوى .. مش سيس :closedeyes:

نورت المحكمه فعلا بس واضح ع شيري انها عاقله جدا ويمكن فى حاجه لسه محدش يعرفها عنها وده اللى مخليها تقول انها تستاهل دكتور مش اى حاجه تانيه علشان تبعد الناس عنها

مش ممكن برضه ولا ايه ؟؟؟؟؟؟؟؟؟؟؟؟

الحلقه ال 19

شيري : خليهموله انا مش عايزاه انا لو طول اجيب شبشب معفن وقديم واضربه بيه كنت ضربته ثم اظزاى بتطلبي منى طلب زى ده انتى مفروض كنتى اديتى محمود على دماغه ازاى

تسالونى مفروض تردوا عليه وانتى اكتر واحده عارفه ليه

منى : يا غبيه ماهو علشانا انا عارفه ليه بقولك استغلى الموقف وعزبيه يعنى ابعديه عن ناديه وازبليه بعد كده

شيري : يا سلام والوث اسمى وسمعتى بكلام الواد الملزق ده انسي

منى: على راحتك عايزانى اقول ايه

السلام عليكم و رحمة الله و بركاته

ع فكرة بقي "فكرة الشبشب المعفن"...عجبتني اوي....ايون....و انا كنت نوهت عليها قبل كده

اللي مش عاجبني بقي

"مني"....عشان بتفكرني بكتير من البنات اللي بتبقي فاكرة نفسها ناصحة وواعية و قال ايه عارفة تتعامل مع الاولادد....بلا خيبة....معلشي انا اصلا شايفة ان الصداقة بين شيري و نادية و مني...توليفة غريبة و فيها كتير من المتناقضات...بس ده اللي بيحصل فعلا في الحياة الحقيقية....بس طالما البنت اتحطت في الدايرة دي بحكم تواجدهم في المدينة الجامعية...بجد البت الراجل...او الجدعة يعني...المفروض تحمي نفسها اكتر من كده

انا قولتلك اني بحس اني بشبه شيري...و و لو عندي صاحبتي مني....هنفضها ع طول...عشان دماغها مش عاجبني....بالنوسبة لنادية...انا همسكها كده و احط راسها تحت الحنفية السائعة في شهر يناير....عشان تفوق بس خلاص

توقعاتي اللي هيحصل ان ببساطة "حزنبول" او احمد اللي عايش الدور...بيحب بنتنا "شيري"...و انا رايي هيتتحب...بس مش من ده...لانه بس حب رفضها ليه...و ع راي ابننا عكاوي العيال الفيس دول...كل ما الواحدة تديهم ع دماغهم كل ما يتمسك بيها اكتر...

شيري تستحق ارتباط نضيف....و الواد ده مشواااااااااره طويل...من التاديب و التهذيب و الاصلاح...بس عايز طولة بال

يا عزيزتى ومرات ابنى عمورى الامورى اللى مبقاش خرع وبقي بيلطش فى اى حد يشوفه او يقرب جنبه ماعدا لمضمض طبعا لانها حبيبه القلب من جوه يتعطيش الجيم

البنت دايما جواها تناقضات فتخيلي دول كذا واحده بيتعاملوا مع بعض والله وانا فىالمدينه كنت بشوف نماذج كتيره ومختلفه وتستغربي ع كميه التاناقضات دى بس صدقينى كل واحده فيهم بتكمل التانيه فى حاجه ده لو لاحظتى يعنى منى مش بتقدر تاخد قرارتها لوحدها وكمان بتستغل كل اللى حواليها وده هتتاكدى منه بعدين حتى خطيبها مستغلياه اسوء استغلال وهيبان بعدين ومعتمده فى الدراسه عاتماد كلى وجزئي على محمود وشيري ده يعملها شغل المشاريع والتانيه تشرحلها المواد التانيه ودى جزئيه لسه مش قلتها على شخصيه منى واللى فى وقت من الاوقات شخصيه هتقع من القصه تماما والسبب هيتعرف بعدين

اما بالنسبه لاحمد فاحمد حب شيري بجد بس زى ما تقولى حب فيها البراءه والوداعه ولما اتكلم مع محمود عنها حس بمدىاحترامها لزاتها وقال هى دى البنت اللى الواحد ينسي اى حاجه علشانه دى البنت اللى اديها اسمى وانا مرتاح وحاطط فى بطنى بطيخه صيفي حس فيها الاحترام والخوف ع الاصدقاء بس خلونى افوق شويه واقلوكم ايه اللى حصل وتبعيات هذا الامر وازاى احمد حالته هتسوء جدا وكأنه ده كان الجزاء بتاعه والجزاء هنا من جنس العمل

استنونونى شويه وبجد انا فرحانه جدا بكلامكم الجميل ده وانكم بدأتم تفكروا معايا وده معناه ان فى جذب للقصه

طب معلش سؤال رخم كده تقيمكم ليه ايه فى القصه دى ؟؟؟؟

الاسلوب ...........

التشويق ............

من الناحيه الادبيه .........

ومن حيث الخيال الخصب ..........

وطب تختاروا بين حاجتين يا ممتاز يا ممتاز جدا هههههههههههههههههه

[pocy]

الحلقه ال20

فى الحلقه الماضيه عرفنا ان شيري رفضت احمد وتحدثت مع محمود ولكن محمود لم يقول لاحمد بعد وتابعت منى يومها عادى الى

ان حضر كلا من منى ومحمود وعلى وجههم شئ يخفونه فلقد حكت منى لمحمود ع الرغم من تنبيهات شيري ان لا تقول له شئ عن

موضوع ناديه وعلم محمود سبب رفضها الفظيع لاحمد وكان احمد يحاول الاتصال على محمود كثيرا ولكنه لم يرد عليه وفى النهايه رد

عليه وقال له قابلنى فى نادى الجامعه بعد عشر دقايق وتقابل معه احمد وقال له انها رفضت وكان من الواضح جدا الضيق على احمد

ولكنه يريد ان يعرف السبب ودار هذا الحوار

محمود : طيب يا عم عشر دقايق وهكون عندك

احمد : طب قالتلك ايه ؟؟؟؟ موافقه ولا ايه ؟؟؟؟؟

محمود : متصبر بقي لما اجي ابقي احكيلك

واحمد على مضض يقول : طيب بسرعه انا هستناك فى نادى الجامعه

محمود : طيب سلام

احمد : سلام

وبعد 10 دقائق كان محمود مع احمد ومعهم منى واستغرب احمد وجود منى وقال لنفسه هى جايه ليه المهم

احمد : ها ايه الاخبار ؟؟؟؟

محمود ينظر الى منى ثم يلتفت لاحمد ويقول

محمود : للاسف مش موافقه

احمد : انا كنت متاكد نظرتها فوق مكنتش مريحانى بس ممكن اعرف بقي ليه الهان رفضانى

محمود : هو بصراحه عندها حق

احمد: ليه يعنى وكمان انت اللى بتقول كده

محمود : دانا كمان وشي منها فى الارض ومش عارف اكلمها تانى ازاى

احمد : ليه في ايه ؟؟؟

محمود : مضطر اقول يا منى انت فاكر البنت اللى احنا اتراهنا عليها

احمد : ناديه اهه مالها بالموضوع ده

محمود : طلعت زميلتها اللى فى الاوضه فى المدينه الجامعيه وسمعت الكلام واحنا وقفين جنبها واغمى عليها وبعدين سرسبت الكلام

من منى وعرفت القصه كلها منى لانى كنت قايل لمنى وساعه ما لطشتك القلم كان للسبب ده

احمد يمسك راسه بشده ويمسح على شعره رايح جاى وكأنه يريد ان يخبط راسه فى الحيطه

احمد : يارربي ....... طب وبعدين ؟؟؟؟؟؟؟؟؟؟؟؟ قولولى اعمل ايه دلوقتى انا

منى : للاسف الموضوع ده ملوش حل

محمود ينظر لمنى بنظره تقول اسكتى انتى

احمد : ازاى ملوش حل اكيد ليه حل طبعا

وفجأه نظر اليهم وقال : سلام

محمود : انت رايح فين

احمد : هتعرف كمان شويه

اتجه احمد الى القسم بتاعه وهناك طلب من ناديه ان يحدثها بمفردها ولكن ياسمين ظلت معها فستاذن احمد من ياسمين انه يريد

ان يقول حاجه مهمه لناديه لوحدها فتحرجت ياسمين وانتظرت ان تقول ناديه شئ ولكنها صمتت وابتعدت عنها ودار هذا الحوار

ناديه : خير يا احمد فى حاجه مالك شكلك كان فى مصيبه حصلت

احمد : ناديه انا عايز اعتذرلك وارجوكى ارجوكى تسمحينى

ناديه : تعتذرلي عن ايه

احمد : انا حاسس انى اخطات فى حقك قوى ومش عارف اصلح الموضوع ده ازاى

ناديه مستغربه وقلبها يدق بشده وتحدث نفسها عمل ايه ربنا يستر انا خايفه ليكون عمل حاجه تضيعنى

ناديه : طب ما تقول في ايه؟

احمد : انا قلتلك انى بحبك صح بس انا مش بحبك انا بحب واحده تانيه ومش هقدر اقولك اكتر من كده

وقع قلب ناديه فى رجليها واحست ان الدنيا تلف بها فاستندت على عمود نور بجوارها ولم تستطيع ان ترد عليه

احمد : ناديه ارجوكى مش تزعلى انا فعلا مش استاهلك انتى انسانه محترمه وتستاهلى اللى احسن منى

ناديه كانت تسير ناحيه المدرج

فاوقفها احمد قائلا

احمد : ناديه انا عارف انى اخطأت فى حقك بس ارجوكى انا عايزك تساعدينى

ناديه : اساعدك ....؟؟؟؟ اساعدك فى ايه ......؟؟؟ فى انك تضربنى ضربه تانيه بس التانيه تكون قاضيه

احمد : انا عندى مشكله كبيره وانتى اللى هتحلهالى

ناديه : وانا مالى حل مشاكلك بعيد عنى ولو سمحت لسانك مش يخاطب لسانى تانى يا بشمهندس

وتمشي ناديه بعيدا عن احمد الذي بدل ان يكحلها عماها ورجع الى محمود ومنى وقال لهم ما حدث

منى : يا ربي ليه عملت كده شيري هتعرف انى قلت لمحمود وهو قالك وهتزعل منى وتخاصمنى استغفر الله العظيم

محمود : اهدى انتى بس طيب وانت كده حلتها انت عقدتها اكتر شيري كانت عايزه تفوق ناديه وتخليها تبعد عنك بدون مشاكل

احمد : انا حاسس انى تعبان ومصدع وراسي هتنفجر ازاى يحصل ده كله مع بعضه بجد مش قادر افكر اتصرف ازاى

محمود : طب انت قلت لناديه مين اللى انت بتحبها ؟؟؟؟؟؟؟؟؟؟؟

احمد : لالالالالالالالا مرضتش تسمعنى ومشيت

محمود : طب كويس كده شيري هتعرف من ناديه ايه اللى حصل وهتعرف انك تقصدها هى وخلاص

احمد : انا مكنتش عايز كده انا كنت عايز اعترف لناديه بالحقيقه وبعدين احاول اخليها تكون الوسيط بينى وبين شيري

محمود : يا حلاوتك يعنى تروح تقول لواحده معلش انا بكذب عليكى وكنت بلعب بيكى علشان اثبت رجولتى وبعدين تروح تقلى

معلش انا طلب منك مساعده تعرفينى على البنت اللى معاكى فى الاوضه انت بتحلم

احمد : معرفش بقي انا ماشي

محمود : لا رايح فين

احمد : مروح مش طايق الكليه باللى فيها

محمود يقول لمنى بعد ما يمشي احمد : ايه رايك هتعملى ايه هتقولى لشيري على اللى حصل ولا بلاش

منى : انت ايه رأيك ؟؟؟؟؟

محمود : انا رائي تقوليلها بدل ما تعرف من بره وتزعل منك

منى : وهى هتزعل منى انا بس انت اللى قلتله انا بحكى معاك انت علشان انت خطيبي

محمود : مانت كنتى شايفه حالته وكمان علشان يعرف انه سبب قوى

منى : تعالى ونقولها احنا الاتنين ولو اتكلمت نلحق عليها ونحاول نجمل الموضوع علشان مش تزعل مننا ايه رأيك

محمود : طيب

فى هذه اللحظات رجعت ناديه للمدرج واخدت حاجتها وكان واضح جدا انها كانت مخنوقه وعايزه تعيط قامت ياسمين لمت حاجتها

وجريت وراها وقالت لايمان احضري انتى المحاضره وانا هشوف ناديه

ياسمين : ناديه استنى يا بنتى رايحه فين مالك وايه اللى حصل

ناديه : مفيش وتنهار

ياسمين : ازاى مفيش تعالى نقعد فى الجنينه ونحكى براحتنا

ناديه تذهب معها وتحكى لياسمين وياسمين كانها لم تعرف شيئا

ياسمين : سبحان الله كنت حاسه والله وسالتك وانتى مش رديتى على المهم قدر الله وماشاء فعل

ناديه : انا عايزه اروح المدينه اخد الشنطه واسافر

ياسمين : ليه بس ده الجو جميل هنا وكمان انا مش هسيبك تسافري بالحاله دى وكمان لازم نستنى ايمان ومرفت وزينب علشان نسافر

سوا والا هيزعلوا ويقولوا ان في ان

ناديه : طب تعالى نروح لشيري القسم

ياسمين : شيري عندها محاضره تخلص كمان نص ساعه استنى وبعدين نروحلها سوا

ناديه : طيب

ياسمين : تعرفي يا ناديه ان ربنا بيحبك والله ان كشف الموضوع بدرى بدرى علشان مش تضرري منه قوى

وبصراحه احمد ده مش يستاهلك اللى يستاهلك واحد يعرف يقدرك ويصونك ثم ده انسان رمرام وكل شويه مع بنت تلاقيه لاقي واحده

تانيه بتجاريه وقال انا هضايق نفسي معاكى ليه هم كده الصنف ده وفى الاخر هياخد واحده تطلعهم على عنيه ستات فى سبعات

هههههههههه وهتبقي تقولى ياسمينا قالت ايوه كده يا شيخه اضحكى محدش اخد منها حاجه

ناديه : بس تفتكرى هو كان عايز منى اساعده فى ايه وايه هى مشكلته

ياسمين : هى مشكلتنا ولا مشكلته مشكلته يبقي يحلها هو بقي وابقي اسمعى كلامى وابعدى عن الشر وغنيله

وفى هذا الوقت انتهت محاضره شيري وهى خارجه التقت بمنة ومحمود والذي كان واضحا جدا انهم يخفون عنها شيئا

وقامت منى بفتح الحوار وهذا ما سنعرفه فى الحلقه القادمه وماذا رد فعل شيري على ما حدث وماذا سيكون الحل

ها ايه رايكم فى الحلقه دى حد كان متوقع كده ؟؟؟؟؟؟؟؟؟؟؟؟؟؟؟؟

[pocy]

عايزه رايكم بسرعه هل كنت متوقعين ان احمد يعترف لناديه الاعتراف ده وكمان ايه اللى متوقعينه لما شيري تعرف باللى حصل هتتصرف ازاى وهتعمل ايه وياترى علاقتها بمحمود ومنى هتبقي عامله ازا ى بعد كده ؟؟؟؟؟؟؟؟؟؟؟؟؟؟؟؟؟؟؟؟؟؟؟

[Damo]

بصراحة لأ خالص !!!!

أنا كنت متوقعة شيري اللي تحكيلها..

[mekkawy]

نادية ---> 100% و دي أكتر حاجة عجبتني

أحمد ---> يولع بجاز

شيري ---> تديله على دماغه و تركز أحسن مع المعيد ولا الدكتور اللي يستاهلها ;)

ياسمين ---> أحلى حاجة إنها بعيد بنفسها عن الوش ده

محمود و منى ---> خطوبة سيس و مش عجباني و مبحبش نظام الخاطبة و المطيباتية ده

أم عمر ---> اكسلنت يا فندم منتـــــــــــاز

مكاوى ---> ده برنس القصة باة

[pocy]

الحلقه ال21 والاخيره

توقفنا فى الحلقه الماضيه عند منى وهى كانت بتحكى لشيري ع اللى حصل وكان هذا الحوار

شيري : ايه مالكم كده زى الى مضروبين كده ع دماغكم

منى : لا ابدا بس في حاجه عايزين نقولهالك بس اوعدينا مش تزعلى

شيري : عملتوا ايه اعترفوا وهحاول اعفةو عنكم

بس شيري قال اكيد حاجه بخصوص اللى افندى احمد طالما هو الاتنين وشكم كده بس قال تخليها معاكم للاخر

منى : لا اوعدينا الاول

شيري : مش لما اعرف حاجه تستاهل ولا لا ؟؟؟؟؟؟؟؟

محمود : قال هو تستاهل بصير يا شيري منى حكتلى واحنا فى الطريق انتى ليه رافضه احمد بس بعد مانا ضغطت عليها علشان

اعــرف وبالتالى قابلنا احمد وقلناله انك انتى رافضاه وبالتالى ضغط علينا وعرف السبب

شيري : عرف عرف ايه بالضبط ؟؟؟

وهى قلقانه على ناديه ليقولها حاجه الغبي ده

منى : عرف انك رفضتيه لانك سمعتيه وهو بيقول على الرهان بتاع ناديه وووووووووو

وفجأه جأت ناديه وياسمين من وراهم وباين جدا على ناديه ان فى حاجه

ياسمين : شيري ممكن ثوانى ازيك يا منى عامله ايه

منى : الحمد لله بخير

شيري : خير نتم مش عندكم محاضره دلوقتى سبتوها ليه ومالك يا ناديه شكلك زى اللى اخده علقه

شيري وتنظر لياسمين وياسمين تهز راسها

شيري : ماتردى يابنتى ؟؟؟مالك فى ايه ؟؟؟؟

ناديه تنهمر عيونها بكاء على ما حدث

ناديه تعالى نتكلم فى الجنينه تحت وتنزل نشيري مع ياسمين وناديه دون ان تنظر حتى لمنى ومحمود

وفى الجنينه تعرف ناديه ما حدث وبالتفصي ولم تكن تعرف كيف ترد على ناديه هل تحكى لها الحقيقه ام تسكت على ذلك ولكنها فى

النهايه قالت لناديع عن ما حدث منذ امس وانها لم ترد ان تأذى مشاعرها بل انها ارادت ان ترد الصاع صاعين لهذا الشاب الهايف

الذي لا يعرف فى حياته غير الموبيل والعربيه والبنات واخيرا تنظرت ناديه الى ياسمين وشيري وقالت لهم اتعلمون انى تذكرت اول

لحظه لنا فى المدينه الجامعي ه وكيف التقينا وكيف كنا فى غرفه واحده ونحن سبعه تجمعنا اربع حيطان ياااااااااه ايام جميله جدا

فاكرين يا بنات لما كنت هقع من ع الشباك وان بركب الزينه وانتم لحقتونى فاكره ياشيري لما ضغطنا عليكى انك تدخلى تسلقي

بيض وكانت اول مره تدخلى فيها المطبخ وسلقتيه من غير ما تحطى الميه وكلنا كنا بنسأل اي اللى بيطرقع ده وعرفنا لما واحده نادت

فى الدور وقالت مين اللى حاطه بيض على النار من غير ميه وكلنا فطسنا عليكى من الضحك وانتى ساعتها قعدتى تعيطى فاكره يا

شيري اول اسبوع ليكى فى المدينه ساعه ما جالك امساك من قرفك انك تدخلى الحمام ولما اخيرا اتعطفتى على نفسك ودخلتى الحمام

كان فى صرصار كبير طار وجه على البجاما بتاعتك وصوتى وخليتى المشرفات وكل اللى فى الدو ريجوا يهدوكى فاكره ياسمين لما

كنا بناكل فى مطعم المدينه ياعه ما لقيتى صرصار فى طبق فضلات الاسبوع ومن ساعتها قررنا مش هناكل فى المطبخ تانى

فاكره برضه البنت الضخمه قوى بتاعه تمريض لما اديتك كوغ فى بطنك علشان تسبقك وتاخد هى الصدر ولا فاكره ساعه ما كنا

مسافرين فى القطر وكان فى الشله بتاعه خدمه اجتماعيه وشالوا الجزره بتاعه القطر عملتى ايه كان منظرك يفطس من الضحك

ولا فاكره شيري ساعه ما ركبت معانا القطر ووقال هتروح معانا وترجع على القاهره ورجعت باتوبيس وحرمت تركب القطر من

اللى حصلها من المهربين فى جمرك بوورسعيد ولما لما واحده فى الجمرك قالتلها هاتى البنطلون الجينز اللى انتى لبساه ده بتاعى

ههههههههههههههه وفطسوا كلهم من الضحك وقررورا ان مفيش حاجه تقدر تبعدهم عن بعض وخصوصا بوجود شخص تافه زى احمد

اما بالنسبه لمنى ومحمود فشيري ريحت دماغها منهم نهائي وعلى اخر السنه كانت خطوبتهم مفسوخه وكمان نزلت السنه ومحمود

مستواه تقدم وخصوصا ان ه فى الاساس كان الاول ع الدفعه من يومه اما بالنسبه لاحمد فاتجه اتجاه تانى خالص وكان يصعب عليكم

بعد ما نول السنه دى رغم محاولاته المتعدده لنسيل رضا شيري واللى بلغت الامن فى اخر الامر انه بيضايقها وعلشان والدته فى

الجامعه محصلوش حاجه والبنات تابعوا حياتهم فى المدينه الجامعيه وعلى فكره ده كان اسبوع واحد بس من اللى بيحصل في المدينه

والجامعه

اشكركم على حسن متابعتكم معى واليكم فى الايام القليله القادمه ان شاء الله القصه الاخرى وهى من منظور سبع بناات فى اولى

ايامهم فى المدينه الجامعيه وكيف كانت الحياه فى السنه الاولى ومن تابعت طريقها ومن تعثرت وما هو الاساس فى تكمله الطريق او

التعثر

الى اللقاء فى القصه القادمه ان شاء الله

مع تحياتى

بوسي

[Damo]

تصفييييق حاااااد

معنديش كلام يوصف قد إيه النهاية كانت جميلة يا بوسي

احيكي احيكي احيكي bv:-

جميييييلة :roseop: :roseop: :roseop:

[pocy]

ميرسي جدا يا دامووووووووووووووووا بجد وميرسي جدا جدا جدا على تشجيعك المستمر انى اكمل والحمل لله انتظرونى ان شاء الله فى القصه التانيه ويارب اصلح عيوب الكتابه اللى ظاهره جدا بس ده بسبب السرعه وعدم المراجعه وطبعا الفضل يرجع لعمر هههههههههههههههه

ها فين بقيه ارائكم يا شباب ويا صبايا المحاورات

[Mr MAGED]

الفاضلة بوسي

تحياتي ليكي بجد ... قصة ممتازة ولو انك خلصتيها بسرعة

كنا اتعودنا ندخل كل يوم نتابع الأحداث

انزلي بقي باللي وراها علي طول عشان منحسش بفراغ

تحياتي وتقديري

[لماضة مصرية جدا]

السلام عليكم و رحمة الله و بركاته

مش عارفة انا حسيت انك كروتي النهاية....انا داخلة و هستمخ بقي....لقيتك لميت الليلة...(وش عيل مذبهل)

عارفة ليه عشان الخيوط معظمها انا قاعدة المها في دماغي...و انا مش عايزة المها بدماغي الصراحة

يعني نادية.....ايه اللي اتغير فيها.....

أحمد.....مش عارفة....كنا عايزين حبة شحتفة اكتر.....

مش عارفة يا بوسي....بس دي وجهة نظري

اوعي تضربي

مستنينين التانية...

صباحك بلونك المفضل....مش عارفة ليه حاسة لافندر او بينك