هو صحيح المصريين مكروهين؟ ولا احنا اللى بنكره الناس التانية؟ومين السبب....

[hOuSsAm]

الاسبوع اللى فات كنت بصلح موبيل فى شارع فلسطين (اللى فى جدة)

الراجل بدا حوار معايا وبدا يتعرف انت عايش فين فى جدة ومنين وكلمته عن المنصورة وازاى هى مدينة تاريخية وولادة للعلماء زى فاروق الباز والشعراوى و الدكتور محمد غنيم وانيس منصور و محمد حسين هيكل وجاد الحق شيخ الازهر ونصر الدين طوبار وغيرهم كتير وانها حالية تعتبر اكبر مدينة طبية وفيها اكبر المراكز على مستوى الشرق الاوسط وحكيتله على المواقف التاريخية ليها وموقعها الجميل

المهم

جه دوره وقولتله انت منين يا معلم؟

قالى لو انت عرفت هتكرهنى اوى ................. :rolleyes:

دماغى يروح ويودى ........ وافكار غريبة وعايز اقوله ايه ياعم هو انت اسرائيلى؟؟؟؟؟؟ بس هو عربى

متقول يعم انت منين وخلصنى متخليش الشيطان يلعب فى دماغى :closedeyes:

قالى انا من غزة

كنت عايز اخلع اللى فى رجلى واديله فوق دماغه .................. انت يابن ستين فى سبعين هكرهك ليه

صدرت له الوش البلاستيك وقولته بجد ببقى هاكرهك ليه؟

اعد يقول فى كلام كتير وان المشكلة مش فى اسرائيل دى المشكلة فى مبارك واعد يلف ويدور وحوارات مفهمتش منها حاجة الا حاجة واحدة ................ انه معندوش اسباب عشان يكرهنى بيها هو بيكهرنى كدة وخلاص

دى مش اول مرة اقابل النموذج ده ............. انا شفته كذا مرة ................ واظن ان فيه اخوة هنا شافوه

بعيد عن الحوار ده هو احنا فعلا مكروهين من بقيت الدول العربية

طيب ايه الاسباب؟

طب لو عايزين نعالج ....... هل فيه علاج يرجع العلاقة والثقة بينا وبينهم تانى زى الاول؟

انا حاسس ان الناس دى كانت حاطة المصرى فى مقام عالى اوى .............. وفجاة المقام ده اتكسر؟

كتير بحس ان البساط اتسحب اوى من تحتينا وده باين من العلاقات الدبلوماسية بين مصر وباقى الدول العربية وواضح كمان من قلة العمالة المصرية فى باقى الدول العربية ومحاولتهم تقليل وضع العمالة المصرية؟

انا يا جماعة بدور على حلول حقيقة مش عايز حد يدخل يشتم فى حكومتنا ولا يشتم فى دول عربية تانية

عايز حلول احس بيها ان المصرى والفلسطين والقطرى والجزايرى بيحبوا بعض وبيخافوا على مصلحة بعض ويتعاملوا على اساس ان القضية واحدة ..................... وان الدم عمره مهيبقى مية

بجد مش عايزين نركز عالمشاكل ................ عايزين حلول لان الواحد بدا يكره فى نفسه

[من بعيد]

انا يا جماعة بدور على حلول حقيقة مش عايز حد يدخل يشتم فى حكومتنا ولا يشتم فى دول عربية تانية

عايز حلول احس بيها ان المصرى والفلسطين والقطرى والجزايرى بيحبوا بعض وبيخافوا على مصلحة بعض ويتعاملوا على اساس ان القضية واحدة ..................... وان الدم عمره مهيبقى مية

فى هذه المجال بالتحديد الحكومه ملهاش دعوه

العيب فينا احنا

عندنا طريقه مستفزه بنثير حفيظه اللى حوالينا

حتى بيننا كمصريين بتلاقى ناس تقولك انت مش عارف بتكلم مين؟

وايه يعنى ياسيدى هكون بكلم مين يعنى ؟

بنى ادم زى بقيه البنى ادمين اللى ماشيين فى الشارع ولا زى اللى قاعدين فى البيت ولا زى اللى قاعدين على القهوه

بتاكل وبتشرب وبتعيش وفى النهايه بتروح زى اللى قبلنا

التواضع

مفيش عندنا تواضع

وبعدين فى نقطه تانيه فى مقوله غريبه جدا اول مانروح فى اى بلد لازم نفهمهم ان احنا اللى علمنا العالم الزراعه والمدنيه والى اخره من هذا الكلام اللى لا بيودى ولا بيجيب

فى ايطاليا مثلا

المصريين بيحبوا يشتغلوا فى البيتسا

شغله مرهقه بس مرتبها عالى وعدد ساعتها قليل

وفى ناس كتير برعوا فى المهنه دى وامنوا مستقبلهم من خلال هذه المهنه

شئ عادى وجميل فى نفس الوقت ان تتقن مهنه لم يمارسها احد من ابناء جلدتك وشئ اجمل ان تمتلك ما كنت تحلم بامتلاكه بسبب امتهانك لمهنه انت لم تكن فى الاصل مهيأ لامتهانها

الغير عادى فى المثل ده ان المصريين باسلوبهم المستفز اقنعوا او حاولوا اقناع الطليانه ان البيتسا دى اختراع مصرى فرعونى

قولى بالله عليك بماذا ترد لوا انت او اى كان الا ان تتهكم على شعب باكمله بسبب حماقه قله قليله مننا

تم تعديل 1 يوليو 2010 بواسطة من بعيد

[عبير يونس]

بحكم الغربة تعرضت للكثير من عينة مصريين و الكلام ده

الموضوع مش تعميم ابدا

اللي بيعمم ده شخص تفكيره غير ناضج

الحكاية ان ممكن اللي بيكلمك بيكون تعرض لموقف ما مع واحد مصري غالبا بيبني عليه راي في المصريين خصوصا لو تكررت نفس السلوكيات مع اتين تلاتة كمان

و طبعا المواقف دي ممكن تكون ايجابية او سلبية

و على حسب

اللي يشوف ايجابيات اكتر حيحب المصريين و العكس بالعكس

اضف الى ذلك اعلامنا اللذيذ اوي و اللي فعلا بيصور المصريين بشخصية الكحيت بتاعة احمد رجب

و سلوكياته مع عزيز بيه الاليت

لحد ما العالم كله ضحك علينا

[عنبو]

انا عندى فى الشركه مافيش الا انا الوحيد اللى مصرى والباقى بقى من فلسطين ومن الجزائر تخيل دى مكتوبه لك يا عنبو

بس من خلال تجربتى معاهم لقيت ان الانسان لما يتعامل مع اى واحد سواء مصرى او اى جنسه تانيه ميعملش غير الا الصح وبس

وميقلش الا الصح وبس وانت تفرض على الكل انه يحترمك

ولابد ان تشيل من دماغك شوية حاجات

1- الحساسيه فى التعامل مع الاخرين يعنى شيل من دماغك ده مصرى وده لبنانى وده نبوت الغفير عامل الكل على حسب الكارير بتاعه

2- شيل من دماغك ان المصرى بيطير فى الجو وبطل كلام عن نفسك وخلى شغلك هو اللى يتكلم عليك

3- لما تلاقى واحد من جنسيه تانيه عمل حاجه حلوه شكر فيها واثنى عليه مش تقعد بقى تقول وايه يعنى داحنا فى مصر كنا بنعمل

وكنا بنسوى لان الكلام ده غلط كبير قوووووووووووى

4- ادى لغيرك فرصه انه يتكلم ويعبر عن نفسه مش تقعد تملى الاوضه كلام ولما حد يجيى يتكلم تسيبه وتمشى او مش تسمع له

5- لما تتعامل مع واحد فى الشغل وتلاقى مستواه ضعيف مش تزم فيه عند المدير وتقول ده مش فاهم والكلام ده

طبعاً الكلام اللى فوق ده مش خاص بالمصرى بس لا ده خاص بالكل

اى واحد بيعامل بالاسلوب ده مع الناس لازم يحبوا ولازم يتعاملوا معاه كويس بصرف النظر عن جنسيته ايه

طيب نيجى بقى للخلافات السياسيه

الخلافات السياسيه دى موضوع كبير قوى لان احنا بنتكلم عن الجزء الظاهر لينا لكن فيه حاجات كتير قوى احنا منعرفش عنها حاجه

او بمعنى اصح بواطن الامور فالكلام فى السياسه لازم كل واحد يعرض وجهة نظره اللى مقتنع هو بيها بأدب واحترام

ونتناقش مع بعض بس متحولش وانت يتناقشه انك تفرض عليه رأيك قوله والله انا شايف ان الموضوع ممكن يكون حاجه تانيه خالص

واقول وجهة نظرك بس لازم انك اللى تبقى ماسك الحوار يعنى وتتنقل منه زى ما انت عاوز

الحاجات اللى فوق دى شفت ناس مصريين بيعلموها وناجحين جداً ولبنانين وفلسطنين وسعودين .........الخ

وتحياتى عنبو الفقى

لا قصدى عنبو بس

[عبير يونس]

انا عندى فى الشركه مافيش الا انا الوحيد اللى مصرى والباقى بقى من فلسطين ومن الجزائر تخيل دى مكتوبه لك يا عنبو

بس من خلال تجربتى معاهم لقيت ان الانسان لما يتعامل مع اى واحد سواء مصرى او اى جنسه تانيه ميعملش غير الا الصح وبس

وميقلش الا الصح وبس وانت تفرض على الكل انه يحترمك

ولابد ان تشيل من دماغك شوية حاجات

1- الحساسيه فى التعامل مع الاخرين يعنى شيل من دماغك ده مصرى وده لبنانى وده نبوت الغفير عامل الكل على حسب الكارير بتاعه

2- شيل من دماغك ان المصرى بيطير فى الجو وبطل كلام عن نفسك وخلى شغلك هو اللى يتكلم عليك

3- لما تلاقى واحد من جنسيه تانيه عمل حاجه حلوه شكر فيها واثنى عليه مش تقعد بقى تقول وايه يعنى داحنا فى مصر كنا بنعمل

وكنا بنسوى لان الكلام ده غلط كبير قوووووووووووى

4- ادى لغيرك فرصه انه يتكلم ويعبر عن نفسه مش تقعد تملى الاوضه كلام ولما حد يجيى يتكلم تسيبه وتمشى او مش تسمع له

5- لما تتعامل مع واحد فى الشغل وتلاقى مستواه ضعيف مش تزم فيه عند المدير وتقول ده مش فاهم والكلام ده

طبعاً الكلام اللى فوق ده مش خاص بالمصرى بس لا ده خاص بالكل

اى واحد بيعامل بالاسلوب ده مع الناس لازم يحبوا ولازم يتعاملوا معاه كويس بصرف النظر عن جنسيته ايه

طيب نيجى بقى للخلافات السياسيه

الخلافات السياسيه دى موضوع كبير قوى لان احنا بنتكلم عن الجزء الظاهر لينا لكن فيه حاجات كتير قوى احنا منعرفش عنها حاجه

او بمعنى اصح بواطن الامور فالكلام فى السياسه لازم كل واحد يعرض وجهة نظره اللى مقتنع هو بيها بأدب واحترام

ونتناقش مع بعض بس متحولش وانت يتناقشه انك تفرض عليه رأيك قوله والله انا شايف ان الموضوع ممكن يكون حاجه تانيه خالص

واقول وجهة نظرك بس لازم انك اللى تبقى ماسك الحوار يعنى وتتنقل منه زى ما انت عاوز

الحاجات اللى فوق دى شفت ناس مصريين بيعلموها وناجحين جداً ولبنانين وفلسطنين وسعودين .........الخ

وتحياتى عنبو الفقى

لا قصدى عنبو بس

[hOuSsAm]

مفيش عندنا تواضع

وبعدين فى نقطه تانيه فى مقوله غريبه جدا اول مانروح فى اى بلد لازم نفهمهم ان احنا اللى علمنا العالم الزراعه والمدنيه والى اخره من هذا الكلام اللى لا بيودى ولا بيجيب

من بعيد

انت آثرت نقطة مهمة اوى وهى عدم التواضع

فعلا ماهو اى حد هيتنك عليا هعطيه فوق دماغه

فيه حاجة كمان ان لسه ناس كتيرة عندها انطباع ان الشعب المصرى هو الشعب العربى الوحيد اللى بيفهم بالرغم من انى اشتغلت مع ناس اردنين ويمنين وسعوديين بيفهموا حلو اوى ودارسين كويس

وشخصيا انا اتعلمت منهم كتير جدا

يبقى كدة اول نقطة هناخدها فى الموضوع هى التواضع ......... انا هتواضع للناس و مش هتكبر عليهم عشان يحترمونى

أشكرك جدا يا من بعيد ومستنى بقية الافكار

[hOuSsAm]

اضف الى ذلك اعلامنا اللذيذ اوي و اللي فعلا بيصور المصريين بشخصية الكحيت بتاعة احمد رجب

و سلوكياته مع عزيز بيه الاليت

لحد ما العالم كله ضحك علينا

مصرية

الله ينور عليكى

انتى جبتى لب الموضوع الاعلام بتاعنا وحسبى الله ونعم الوكيل

مش عايز اقولك ان الناس فاكرة اول متنزل مطار القاهرة هتلاقى الكباريهات والكازينوهات عاليمين والشمال

حتى في بعض الناس قبل منزل الاجازة بتقولى ايوة يا حس نازل عالطول على شارع الهرم وهتسهر وهتشرب وكدة

فاكرين هى دى مصر

غير ناس تانية مغرمة بعادل امام وكل افشاته وتعبيراته والافيهات اللى بيقولها بيطبقوها بالحرف

وفاكرين بنات مصر هما البنات اللى بيطلعوا مع عادل امام وحسن يوسف فى الافلام (انا طبعا مش بعمم بس ده الوضع بالنسبة لناس كتيرة)

اقولكوا على موقف وحصلى شخصيا

كنت رايح اصلى الجمعة واذا به امام المسجد بيخطب ويقول ويا معشر الشباب لاتذهبوا فى الصيف لمصر حيث بلاد الفسق والفاحشة وفساد الاخلاق (يعنى قمة الخنقة مع انى حاسس ان الراجل ده عمره مطلع بره السعودية)

يبقى التركيز بقى يا مصرية عالاعلام

بس عشان ده مش فايدينا فاحنا ممكن نعرفهم ان اعلامنا ده مش بيدل علينا يعنى الوضع مختلف تماما ومصر والمصريين ليها شكل تانى

ربنا لا يسامح الاعلام بتاعنا وتشويه الصورة المصرية وربنا يهديهم

[hOuSsAm]

العنبى

انت استاذ

كلامك كله افكار حلوة

ربنا يحميك يبنى لمصر ولشبابك ويجوا اخوانا المصريين ياخدوك قدوة

[herohero]

الاعلام اولا واخيرا عارفين المشكلة ان اعلامنا بالعربي ومعمول بعقلية الاوروبي

يعني الغربي هيفهم ان ده شغل سيما وان ده لا يدل ان المجتمع كده لكن هل الغربي يشاهد اعلامنا لا طبعا والف لا اعلامنا يشاهده العربي فقط

والنتيجه هل نحن نتوقع ان لبنان بلد محترم والناس اللي فيها كويسة وملتزمة لا طبعا متصورين ا لبنان كلها نانسي واليسا وهيفاء لكن مالبنان فيها حزب الله

وكذلك مصر هل مصر هي الراقصين والراقصات لا طبعا بس هنلوم غير المصري ليه

يا جماعه الشعرواي ما بقاش يجي يوم الجمعه زي مااتربينا ف التليفزيون المصري ياجماعه فين حرص الاعلام المصري ع الرمز الصح والقدوه

اعلامنا يستحق لقب افشل اعلام بجدارة وانجح اعلام ف تشويه صورة بلده وفي نظرهم هذا فن وياريت يكون بهذا وصلنا للعالمية للاسف السينيما الايرانية اكثر عالمية مننا وياسيدي خلينا ننجح ف كله ونفشل ف السينيما حتى نكسب ثواب خلي القنوات الفضائية ماتلاقيش افلام ولا مسلسلات بدل ما احنا واخدين ذنب اللناس ف رمضان بمسلسلاتنا ودراما الرياده

انا لن الوم اي شخص غير مصري يسئ النظر لمصر لاننا السبب

اما خارجيتنا فحدث ولا حرج لم تحسن ان تظهر سياسة مصر بالمرة بجد كرهت الناس فينا

اما نحن كمصريين فيجب ان نركز ع ابداعنا ونجاحاتنا ف الشغل ونبطل كلمه احنا حضارة 70000000000 سنة عاوزين نركز عندنا ماضي جميل وحضارة مسحناها بفساد الحاضر

كفايه نقعد نقول كل شوية احنا علمناكم وطوناكم لان الرد واحنا بنصرف عليكم دلوقتي امال جايين عندنا ليه ماتقعدو ف بلادكم

فياريت نلغي هذه الفكرة خلينا ف شغلنا ونطور اسلوب شغلنا ونطور بلدنا ونمحي صورة الفهلوة اللي بقت سائده عن الموظف المصري

[kitkat]

انا حاسس ان الناس دى كانت حاطة المصرى فى مقام عالى اوى .............. وفجاة المقام ده اتكسر؟

جمعة مباركة يا حس

بص يا عم الدقهلاوي B) (احتليتوا السعودية ولا ايه ؟ )

كلامك الي فوق ده كلام راجل مفكر لا وبرنس كمان

عارف لما تبقي متعشم في أخوك الكبير وشايفه قدوة وحامي ليك وفجأة تلاقيه بيقلك ماعرفكش يا معلم شيل نفسك

ويقف يتفرج عليك وانت بتتعارك (حتة اسكندراني) !

هاتبصله بعدها ازاي ؟ من فوق لتحت طبعا !

1-هو ده الي حصل معانا كمصريين والسبب فيه حكومتنا

الحل مش عندي والله عند حكومتنا !

2-علي فكرة احنا فينا حتة نرجسية واحساس اننا شعب الله المختار برده وده مخلينا نتعب في التعامل مع باقي الجنسيات

الحل : لازم نفوق ونصحي ونشوف معهد النانو تكنولوجي الي عملته السعودية ونشوف السيارة الي صنعوها ونشوف الي بيرجعوا من 10-12 سنة دراسة في أمريكا من السعوديين

3-كمان مش مترابطين وباقي الجنسيات بتشوف ده وبتعتبره وصمة عار

لازم نترابط شوية ومانخافش من بعض ، وكل واحد يعرف ان ماحدش هاياخد رزقه ، والمحساب يبطل يخاف من المحامي انه هياخد مكانه (ايه الهطل ده)

4-انا اتعاملت مع ناس مصريين (نيران صديقة يعني ) وبيكرهوا المصريين ههههههه مش عايز باقي الجنسيات تكرهنا ؟

لازم بتاع الدقهلية يحترم ويحب بتاع الشرقية وبتاع الفيوم مايقلش علي بتاع القاهرة فرفور والخيابة دي ماتصحش

حتة علي جنب ( البنغالة دول ايه ؟ شياطين ؟ ايه ده ؟؟؟؟؟؟ أوف ) دول أسوأ ناس اتعاملت معاهم هنا !

[mekkawy]

أقول ببساطة إن إحنا كمصريين ثم كعرب كلنا ثم كمسلمين و أمة كاملة نسينا الآية دي

(إن أكرمكم عند الله أتقاكم)

بس خلاص

مكاوى

تم تعديل 2 يوليو 2010 بواسطة mekkawy

[herohero]

نحب بعض اولا وثانيا واخيرا

قبل مانقول الناس بتحبنا ولا بتكرهنا بجد ده اكبر مشكلة على الاقل نظهر الحب ده ظاهريا نفسي يجي اليوم ونلاقي مثلا مكان كده المصريين مسيطرين عليه وواكلين المكان

عارف ان فنياوعمليا مش ده الصح لكن الاساس هو الناحيه العملية لكن ما اقصده اننا بجد نبقى بنحابي ع بعض ونساعد بعض زي جنسيات كتيرة الشوام والفلبينيين والهنود

عارف انهم بينهم وبين بعضهم مش بيحبوا بعض عادي انما ادامنا بيحبوا بعض

ساعتها لما نحب بعض هنصدر الحب ده للي حوالينا

[Howayda Ismail]

احسن تعليق سمعته كان من الشاعر الكبير عبد الرحمن الابنودى الذى قال فيه ان الانسان المصرى كان فاكهة العرب لكن

الان لم يعد كذلك فلماذا ؟!

فى رأى ان ماحدث من خلل فى سلوكيات المصريين عما سبق هو السبب الرئيسى فى تغيير وجهة نظر الاخرين اتجاهنا

ولايجب ان ننكر ان الحكومة هى المسئول الاول لحدوث هذا الخلل الناتج عن التغيرات السياسية والاقتصادية والاجتماعية.

فالخلل ناتج من بيئة يملؤها الفساد والرشوة وزيادة بطالة فذلك اثر فى تفكير المصرى واصابه بخيبة امل فى الحصول على تعليم

جيد وفرصة عمل جيدة فاصبحت الفهلوة سمة اساسية فى بعض الشخصيات واصبح انا وما بعدى الطوفان نمط حياة

فلن يضر ان يرشو ليأخذ وظيفة الاخر رغم عدم جدارته للحصول على هذه الوظيفة ولايمنع ان يرتقى بوشاية عن زميله

وشيئا فشيئا ضلت المحبة طريقها بين المصريين لان المصرى لم يعد يراعى شعور اخيه لم يعد يؤثره على نفسه تخلى عن

مد يد العون له وكل تلك السلوكيات السلبية لم تخف على الاخرين ممن نعمل لديهم ففقدنا شئ من احترامهم لنا

وربما تحول عدم الاحترام هذا الى كراهية خاصة بعد اكتسابنا عادات غربية سيئة اثرت فى توجهاتنا فى الحياة .

ولكى نمحو تلك الصورة البغيضة من اذهان الاخرين يجب علينا البدء فى اصلاح علاقتنا اولا داخل اسرتنا ومع الجيران

وفى الشارع وفى محيط العمل وفى داخل الدولة ككل وبالتالى سينعكس ذلك كله على علاقتنا خارج حدود الوطن

وستعود الالفة بين المصرى والمصرى وبين المصرى والعربى ويسترجع المصرى مكانته فى قلوب الاشقاء .

[MrBambinoDent]

أنا شايف ان زي ما احنا كمصريين مسؤلين عن الوضع دة

الا ان الاعلام عامة له يد كبيرة في القضية دي

و باختصار كل واحد يحاول يكون مثال جيد لما يمثله سواء بلد أو دين أو أي شئ

و الباقي مش دورنا ... لكن لما يكون شركة فيها 50 مصري منهم 40 واحد كويس جدا و 5 نص نص و 5 وحشين أكيد الصورة العامة هتكون كويسة و الوحش هيتعامل هو بس انه وحش و مش هيأثر علي باقي المصريين

دة مجرد رأي

تم تعديل 3 يوليو 2010 بواسطة MrBambinoDent

[the consultant]

الموضوع موضوع فرد , و مينفعش نقول احنا مكروهين بس منكرش ان اي جنسية ليها انطباع أول و كلكو عارفين و مش محتاج افصل ايه الانطباع اللي بتديه كل جنسية. بس على سبيل المثال كنت زمان بقلق و انا بتعامل مع الاجانب خصوصا الالمان و بفترض دايما انهم عباقرة :rolleyes: و ده طبعا كان بيأثر في حجتي و كلامي بس مع الوقت اكتشفت ان عادي جدا فيهم ناس تفكيرهم أقل من الطبيعي بل و أكثر و نفس الكلام في الجنسيات الاخرى الامريكان مثلا فيهم هبل كتير (بمعنى الكلمة ) لا و دكاترة في القانون بس مخ ما في و تسأله في موضوع يجاوب في موضوع تاني تماما . عشان كدة اتعلمت اني مبصش على الجنسية ابص على الفرد.

النقطة التانية عمري ما اتباهى بسبع الاف سنة حضارة و النيل رواه و المصري جدع بطبعة و شغل شيرين عبد الوهاب ده ، لانه في نظري خيابة انك تتباهى بقدرات اشخاص تانية حتى لو كانو مصريين طيب ماهو في مصريين حرامية و مصريين واطيين (مش جدعان و لا نيلة) و في مصرييين أغبية مش كل المصريين عباقرة بالفطرة.

يبقى الخلاصة ان لا مجال للحديث أو التباهي بالجنسية لان كل جنسية فيها حلوها و فيها زبالتها.(سوري في التعبير)

و انا كالعادة مع كلام مكاوي و بكرر إن " رابطة الاسلام تعلو على رابطة الجنسية" على فكرة ده كلام فقه و درسناه في الشريعة. المفروض اننا مسلمين مصريين و مش مصريين مسلمين.

[sarmar]

اولا ياعم حساب انت نازل غوص فى طبق البطيخ النتلج فى مصر مع الاهل والاحباب ومأنتخ نفسك ماشى ياعم بس ياترى الناس فى مصر من جوة اخلاقهم مع بعض عاملة اية ؟؟ لاننا لوطلبنا من الناس انها لاتكرهنا فيجب اولا اننا نحارب او ننزع الكراهية من انفسنا لانفسنا

انا متاكد ياستاذ حسام انك انت مرايتى او اى حد اتعامل معاة هو مرايتى يعكس طريقة تعاملى معة ان كانت خير فيعاملنى بخير وان كانت غير ذلك فسوف تكون ردة فعلة لكن المشكلة فينا اننا بنفترض وهما ان الناس كلها عارفة عاداتنا وتقالدنا والتى تؤثر فينا بشدة ومخالفتها تعتبر كبيرة من الكبائرفى حين انك ممكن تلاقيها عند بعض الاخوة الغير مصريين انها ليست كبيرة

اتذكر اننى كنت اعمل فى وظيفة اشرافية فى بدايات عملى بالسعودية وكان من ضمن الناس الذى اشرف عليهم مجموعة من الفلبيين فى ذات مرة خرجت من مكتبى ورجعت بعد انتهاء الدوام فوجدت المسؤول عليهم والذى ياخذ اورامر العمل منى وجدتة يجلس على مكتبى ورافع قدمية على المكتب ورايح فى النوم

كبرت فى دماغى ازاى ينام على مكتبى وانا رئيسة فى العمل وروحت عامل نفسى مدير بحق وحقيقى وخصمت لة 3 أيام من راتبة

وذهب غاضبا من هذا الاجراء الى المدير العام بريطانى الجنسية

اجتمع بى المدير وكان لبقا مؤدبا محترما جدا اجتمع بى بعد ان سمع منة على انفراد وذكرنى بان عند انتهاء الدوام تنتهى الصفة الوظيفية بعد ان امتص غضبى وعلى قدر انة المدير العام ولة جميع الصلاحيات فى الغاء اى عقوبة الا انة طلب منى بكل زوق ان اتنازل عن قرارى فى معاقبة الفلبينى واوضح لى بكل يسر وسهولة ان استمرار العمل ودوام تميزة وجودتة للعملاء منبعها هذا الفلينى وماهو معروف عنهم من دقة فى العمل وجودة واحترام المكان واحترامهم لانفسهم

هذا الحوار الذى لخصتة لكم انما يدل على تمسكنا بعادات نراها صح فى حين عند غيرنا غلط وهنا يحدث الصدام او سوء الفهم او كراهية الناس من المصريين ولكن على الجانب الاخر تعلمت من مديرى اشياء كثيرة كانت تعبر عن صفات وعادات اراها جيدة جدا والمثال على ذلك الحرص الشديد جدا لدرجة الموت على الوفاء بالامانة والوفاء بالموعد وعدم الكذب والاخلاص فى العمل كصفة اساسية من التكوين الزاتى وليست مكتسبة او مفتعلة لاسباب معينة

اذا حاولنا نطور انفسنا والتحلى بهذة الصفات فلن نحتاج او نسال هو صحيح المصريين مكروهين ؟؟

وقد قال خير الانام محمد رسول الله صلى الله علية وسلم ( انما بعثت لاتمم مكارم الاخلاق ) صدقت ياسيدى يارسول الله

[مهندس ابو يوسف]

ان اكرمكم عند الله اتقاكم - صدق الله العظيم -

ان الله لاينظر الى صوركم ولا لاجسادكم وانما ينظر لاعمالكم - معنى حديث شريف-

كما تفضل اخوتى في المنتدى بشرح اسباب كره الناس لنا

اضيف شيئا مهما

لنضع ذلك جانبا ونبدا بتغير صورتنا الى الاحسن

هم اخذوا فكرتهم دي ازاي

اكيد احتكوا بناس للاسف تسيء الى سمعتنا

ناس ملهاش كرامه عندها القرش اهم حاجه ايا كان طريقه - فهلوه او عمل -

للاسف احنا في الغربه مش كويسين مع بعضنا دائما ننظر لبعض

حتى اصحاب المهنه الواحده غالبا لايحدث بينهم تعاون وكل واحد متربص للاخر حاسس انه اخذ جزء من رزقه

مايعرفوش ان الارزاق بيد الله يقسمها كيفما شاء

فاحنا لوبدانا من عندنا ننصح كل رجل او امراه تصرف تصرفا لايليق بمصريتنا ولاباسلامنا ونصبر ونكرر اكيد هيستجيب في يوم من الايام وربنا يهديه

- من ادام طرق الباب لابد ان يفتح-

ان الانسان لياثر الناس بحسن خلقه

فكتيرا من الناس اسلموا لما رأوا وسمعوا عن صفات رسولنا الحبيب

فكذلك لابد ان نكون نحن نقطه بدايه لتغير الفكره السوداء اللي واخدينها عننا

( ان الله لايغير ما بقوم حتى يغيروا مابانفسهم )

فنصيحتى لابد من البدء بانفسنا ثم محيطنا في العمل في المنزل في الشارع .....الخ

تقبلوا تحياتي

المهندس ابو يوسف

[kareemabdou]

الاسبوع اللى فات كنت بصلح موبيل فى شارع فلسطين (اللى فى جدة)

الراجل بدا حوار معايا وبدا يتعرف انت عايش فين فى جدة ومنين وكلمته عن المنصورة وازاى هى مدينة تاريخية وولادة للعلماء زى فاروق الباز والشعراوى و الدكتور محمد غنيم وانيس منصور و محمد حسين هيكل وجاد الحق شيخ الازهر ونصر الدين طوبار وغيرهم كتير وانها حالية تعتبر اكبر مدينة طبية وفيها اكبر المراكز على مستوى الشرق الاوسط وحكيتله على المواقف التاريخية ليها وموقعها الجميل

المهم

جه دوره وقولتله انت منين يا معلم؟

قالى لو انت عرفت هتكرهنى اوى ................. :sad:

دماغى يروح ويودى ........ وافكار غريبة وعايز اقوله ايه ياعم هو انت اسرائيلى؟؟؟؟؟؟ بس هو عربى

متقول يعم انت منين وخلصنى متخليش الشيطان يلعب فى دماغى :ninja:

قالى انا من غزة

كنت عايز اخلع اللى فى رجلى واديله فوق دماغه .................. انت يابن ستين فى سبعين هكرهك ليه

صدرت له الوش البلاستيك وقولته بجد ببقى هاكرهك ليه؟

اعد يقول فى كلام كتير وان المشكلة مش فى اسرائيل دى المشكلة فى مبارك واعد يلف ويدور وحوارات مفهمتش منها حاجة الا حاجة واحدة ................ انه معندوش اسباب عشان يكرهنى بيها هو بيكهرنى كدة وخلاص

دى مش اول مرة اقابل النموذج ده ............. انا شفته كذا مرة ................ واظن ان فيه اخوة هنا شافوه

بعيد عن الحوار ده هو احنا فعلا مكروهين من بقيت الدول العربية

طيب ايه الاسباب؟

طب لو عايزين نعالج ....... هل فيه علاج يرجع العلاقة والثقة بينا وبينهم تانى زى الاول؟

انا حاسس ان الناس دى كانت حاطة المصرى فى مقام عالى اوى .............. وفجاة المقام ده اتكسر؟

كتير بحس ان البساط اتسحب اوى من تحتينا وده باين من العلاقات الدبلوماسية بين مصر وباقى الدول العربية وواضح كمان من قلة العمالة المصرية فى باقى الدول العربية ومحاولتهم تقليل وضع العمالة المصرية؟

انا يا جماعة بدور على حلول حقيقة مش عايز حد يدخل يشتم فى حكومتنا ولا يشتم فى دول عربية تانية

عايز حلول احس بيها ان المصرى والفلسطين والقطرى والجزايرى بيحبوا بعض وبيخافوا على مصلحة بعض ويتعاملوا على اساس ان القضية واحدة ..................... وان الدم عمره مهيبقى مية

بجد مش عايزين نركز عالمشاكل ................ عايزين حلول لان الواحد بدا يكره فى نفسه

استاز حسام تسمحلى اقولك انك شاغل دماغك بحوارات ملهاش لازمة فكك ياعم يحبونا و لا يكرهونا مش حتفرق كتير

[Howayda Ismail]

بغض النظر عن انهم يحبونا او يكرهونا يجب ان نعترف بالخلل الذى اصاب سلوكياتنا نحن المصريين والاهم ان

نحاول اصلاحه فيما بيننا قبل ان تتقطع اوصالنا ونفقد هويتنا اكتر من كده

[kitkat]

بغض النظر عن انهم يحبونا او يكرهونا يجب ان نعترف بالخلل الذى اصاب سلوكياتنا نحن المصريين والاهم ان

نحاول اصلاحه فيما بيننا قبل ان تتقطع اوصالنا ونفقد هويتنا اكتر من كده

صح لسانك !!!!!!!!

الاعتراف بالحق فضيلة وخصوصا لو كان المنتدي كله مصريين لكن تعملي فيها مصطفي كامل وتشتغل نفسك قبل ماتشتغلنا

.......

يبقي عيب عليك \عملتها قبلك علي رأي فريد شوقي :ninja: