الإحساس الأول في حياتنا

[se_ Elsyed]

بالتأكيد في حياة أي منا أحاسيس مختلفة ننسى بعضها او نتناسها ويظل الكثير منها في ذاكرتنا ، فدعونا نتحدث عن إحساس اول مره سواء نجاح او فشل او بين البنيين – مش عارف يعني إيه بصراحه - ، عندكوا س س مثلاً :

- إحساس اول مرتب في حياتي : وده كان فترة إعدادي حيث كنت أُصمم على العمل أثناء فترة الإجازة بالرغم من معارضة الوالد والوالدة .. ولسه فاكر إنه كان مبلغ 35 قرش في اليوم - شوفتوا السخرة والذل - وبالرغم من إنهم كانوا أقل من مصروفي إلا انه كان لهم طعم وذكريات خاصة ..... وطبعاً ماعملتش زي الأفلام العربي لما عبد الحميد حافظ جري على امه فردوس محمد وراح إدالها المرتب وهو بيبوس إيدها .. فأتذكر إني حوشتهم عشان ادخل السنيما .

- إحساس أو يوم في الدراسة : إسرح بينا بقى وقول إنك لسه فاكر أول يوم ؟!!!

لأ طبعاً ولا الهوا .

- إحساس أول مكافأة في حياتي : دي فاكرة بقى غصبِ عن التخين وكانت عبارة عن " قلم بيك " بتلاتة تعريفة من ناظر المدرسة عشان طلعت الأول في ثالثة إبتدائي في إمتحانات إحدى الشهور .. وجريت عشان أفرح بابا - الله يرحمه - فنظر إلي بكل عطف وحنان وبدل ما يقولي مبروك راح خابطني بقالب طوب على دماغي وقايل لي " المهم اخر السنة يا فالح " .

- إحساس اول يوم في الجامعة : كنت قرفان جداً لإنه مجتمع زحمه وماحدش يعرف حد ، غير ثانوي وإعدادي اللي كل المدرسة بتبقى عارفه بعضها وممكن العلاقة تمتد للمدارس المجاورة :blink: .

- إحساس أول مرة ادخل فيها قسم شرطة : كان عشان أبلغ إني إتسرقت وكنت حاسس إن أنا المجرم فروحت واخدها من قاصرها وموكل محامي يتابع الموضوع .

إحساس أول مرة اتجوز ( وأخر مرة ) : لحد دلوقت كل ما اتفرج على نفسي في شريط الفرح أحس إني كنت مخبوط بشومه على دماغي وفاقد الوعي .. وكل اللي فاكره لحد دلوقت إني كنت غايب عن الوعي ومش عارف إيه اللي بيحصل وإن خير اللهم ما اجعله خير إني كل شويه أقف وأسلم على ناس وإن في ناس كتيرة كانت عماله تبوسني ولا كأني في برنامج " كلام من دهب " ...

- أول مرة تحب يا قلبي : ده إحساس فزيع فزيع ويرتبط عندي بذكريات مأساويه ، فكنت قد قضيت اكثر من عام أخطط واتكتك ونتبادل النظرات العذرية الأفلاطونية مع من احب ولكن لضيق ذات اليد لم أستطع ان أقوم بخطوة إيجابية حيث إني كنت في اخر سنة بالجامعة وما إن إنتهيت من الدراسة حتى سافرت وفي اول إجازة بعد 4 شهور قررت التقدم حيث إني بقيت راجل وملو هدومي فأخذت احوم حوالين بيت الحبيب زي المراهق وكنت كالطفل الذي مازال يتعمل الكلام وعمال أسمع لنفسي 3 كلمات فقط " انا عايز أتقدملك " قال إيه عشان مانساش وما إن لمحتها تنزل من البيت – وشكلها شافتني في الخباثة – حتى سرت وراءها وهي كأنها ركبت موتور 128 في رجليها وانا وراها واعتقد إنه كان يوم مفترج عندهم لإنها كانت رايحة للجزار تشتري لحمه .. فقولت فال خير " الجواز واللحمه في المنام نُصره " وأقتربت منها وناديت عليها وأقسم بالله زي ما بقولكم كده .. لسه هانطق وأقول " أنا ... أأأأ " ما كملتش إلا وراحت واقعه على الأرض فأرتبكت ومابقتش عارف أعمل إيه فتخيلوا معايا المنظر واحد وواحده واقفين في نص الشارع وفجأه البنت وقعت وكأن حنش عضها ولكن سرعان ما أستجمعت قواي وتشبثت بحلم حياتي لألا يطير من بين يدي ... وروحت

واخد ديلي في سناني وجاري ... وفضلت هائم على وجهي ومش عايز أروح البيت وانا باسألأ نفسي أنا عملت كده ليه .. المهم إنها ماكنتش ماتت وشوفتها تاني في نفس اليوم فنظرت إلي ولسان حالها يقول " إنت عبيطه يالا ولا شكلك كده ؟ "

وبعدها بكام يوم إتصلوا بي في الشغل ورجعت من الاجازة ومن 8 او 9 سنين لم أراها ثانية ً

يُتبع

[عصام]

ما انت ذاكرتك زى الفل وزيادة ... يا معلم الكل وزيادة....! :blink:

إمال كنت بتخوفنا عليك ليه يا عم سيد ؟؟ :blink:

وكل شوية بس .... عينى عينى .. مش فاكر حاجة .. مش فاكر حاجة ...

ولا هو اللون الازرق اللى عامل شغل :blink: non::

[فــيــروز]

اول مره اسافر بره مصر non::

كان احساس غريب جدا .. كنت بابص للارض اللى بامشى عليها وكأنى متخيله انها هتكون مختلفه عن ارض مصر !!

اول مره ادخل الكليه

كنت هاطير من السعاده .. وكان اتحاد الطلبه عامل حفله للطلبه المستجدين "عرفت ان ده جر رجل عشان الناس ماتطفشش من الكليه بس بعد ايه" آه صحيح نسيت اقول انى فى الحفله فزت بجايزه عشان حليت سؤال مسابقه ثقافيه .. تخيلوا الجايزه كانت ايه؟ مثلث 30 60 و مثلث 45 :blink:

اول مره اقبض مرتب

هو كان اول و آخر مرتب من الشركه دى لانى مافضلتش معاهم غير شهر واحد وبعدين رميت لهم ورقتهم .. ورغم ان المرتب كان ناقص الا انى فرحت بيه جدا وكنت متخيله انى هاجيب بيه حاجات كتيييييييييييره

واخدت المرتب و رحت بيه الملاهى مع اخواتى و قرايبى و المجتمع و الناس

اول مره امسك موبيل fr1::

.. مش من زمان اوى يعنى من ييجى تلات سنين مثلا لانى كنت ولازلت امتعض منه

فضلت ابص للموبيل ومش عارفه اطلب الرقم ازاى !! فضلت اتامل فيه كتير وانا مش عارفه ده يتدخل له منين و فى الآخر طلبت مديرى فى الشغل عشان كان عنده زى الموبيل بتاعى و قلت له الحقنى انا مش عارفه اتعامل .. و الحمد لله ادانى الخريطه وبقيت دلوقت اتصل لوحدى

اول يوم اروح المدرسه :blink:

انا فعلا لسه فاكره اليوم ده ..

يمكن لانه يوم مميز جدا فى حياة اى انسان

كنت سعيده اوى .. رغم الاحساس بالوحشه طبعا خصوصا انك فى الوقت ده بتتحط جنب اى زميل و خلاص وانت مش عارف بختك هيقع فى مين

اول مره اعمل انترفيو

امى جت معايا .. ;) دلوقت كل ما افتكر الحكايه دى ابتسم و اقول ازاى حد يروح يقدم على شغل وياخد مامته معاه !! :blink: ولو ان اللجنه الممتحنه كانت مبسوطه منى وقالوا جمله مش عارفه دلوقت يا ترى كان لها علاقه بمجئ ماما معايا ولا لأ :D اظن كانوا بيتكلموا عن المرتب وانا قلت لهم مش مهم الفلوس ماما بتصرف عليا .. mfb: فقالوا هى اكيد فرحانه بيكى دلوقت لكن بعد كده الفلوس هتبقى مهمه ys): .. اما الواحد كان غرير بشكل "هى غرير ولا غر ولا ايه؟ :)

[se_ Elsyed]

هو إيه اللي صاب الناي النهاردة في باب المناقشات كل مادخل حته الاقي ألفاظ مكلكعة واخرتها ست فيروز تقولك " امتعض " و " غرير " .. بعد كده انا هامشي ومعايا مختار الصحاح والمورد والقاموس الصغير ده بتاع إلياس .

ما انت ذاكرتك زى الفل وزيادة ... يا معلم الكل وزيادة....! 

يا إسو ما أنا لحقت نفسي وبقيت اعمل تمارين تقوية الذاكرة يعني انط الحبل وأشيل حديد وكده يعني وأقعد أبص كل يوم على ماركة الثلاجة الـ 18 قدم اللي عندنا عشان أفضل فاكر الحاجت دي .

[فــيــروز]

اول مره ادخل على الانترنت mfb:

كان معايا واحده صديقتى هى اللى بتعلمنى الموضوع :P

وكنت طبعا مش فاهمه اى حاجه فى اى حاجه cr((: و الموضوع بالنسبه لى زى صندوق الدنيا و اتفرج يا سلام .. :o

لكن فاكره كويس ان البرنامج كان Netscape Navigator او Communicator مش فاكره جربت الاتنين بس اللوجو كان شكله عباره عن العجله اللى الربان بيمسكها عشان يتحكم فى سير السفينه .. هى دى الدفه ولا دى لها اسم تانى؟ واعتقد كان فيه فى اللوجو الخاص بال Navigator شكل السماء وفيها نجوم وحاجات بتقع من السما .. انا فضلت فتره طويله متحيزه بشده لكل برامج Netscape الخاصه بتصفح النت بسبب اللوجو ده .. كان عاجبنى بشده mfb:

تم تعديل 25 مايو 2004 بواسطة فــيــروز

[تلميذ]

اللوجو كان شكله عباره عن العجله اللى الربان بيمسكها عشان يتحكم فى سير السفينه .. هى دى الدفه ولا دى لها اسم تانى؟

أنا أعرف إن إســـمها الضـومـان. حــد يصحح ياجماعة لو كان الإسم غلط.

أما الدفة فتكون في المــاء تتحرك يمينا ويســـارا بناءا علي حركة الضومان لتوجية الســـفينة.

[kfaya]

دى انت نوتى مش تلميذ ............. مية مية ...... cr((:

[فــيــروز]

اول مره اسوق عربيه

الحقيقه علاقتى بقيادة السيارات مرت بمراحل مختلفه mfb:

اولها مرحلة التسخين .. كنت افرح بشبابى جدا اما يطلب منى انى اسخن العربيه واحس انه خلاص مش فاضل لى غير خطوه و اسوق العربيه بجد bk:

بعد كده كان موضوع تعلم القياده مؤجل نوعا ما بالنسبه لى .. يمكن لانى كنت حاسه انها حاجه سهله و بسيطه mc(: .. لغاية ما كنت مره مع احدى صديقاتى العزيزات وكانت متعلمه سواقه جديد و العربيه اتقلبت بينا .. mf(

الحمد لله لم يحدث لاى منا اى شئ لكنى خرجت من هذه الحادثه وانا رافضه تماما لفكرة انى اتعلم القياده اصلا .. mfb:

المهم نصحنى بعض الاصدقاء انى لابد ان اتعلم بعد الحادث على طول عشان مايبقاش عندى عقده .. المهم كانت اول مره اجرب اسوق و العربيه تمشى فعلا كنت مع والدتى وهى اللى كانت هتعلمنى .. الحقيقه امى ست غلبانه و طيبه يعنى حتى فى سواقتها تمشى على اليمين وبالراحه خالص و كده :)

المهم خرجنا عشان تعلمنى فى المنطقه المحيطه بالمنزل .. و كان فى الصباح الباكر و يادوب حطيت رجلى على البنزين و شلتها من على الدبرياج "مش عارفه بيتكتب كده ولا غلط" المهم العربيه جريت و كان قصادها حفره كبيييييييره عشان بيرموا اساسات عماره :P .. امى طبعا جالها هلع وانا شلت رجلى من على البنزين و طبعا العربيه وقفت

كلاكيت تانى مره .. قلنا نبتدى من تانى و نجرب ويادوب العربيه مشيت تاتا تاتا الاقى واحد بعربيه كارو عليها خضار "ماحنا كنا بدرى بقى يوم الجمعه" .. والاقى امى بتقول لى يا بنتى حاسبى الحمار دلوقت بالف جنيه "كان ساعتها من اربع سنين بالف جنيه" .. وانا اقول لها يعنى الحمار اهم منى :o !! وهى يا عينى حارت جوابا

المهم قررنا نسك على الموضوع وبلاها سواقه مالها التاكسيات cr((: .. انا الحقيقه ما صدقت اننا لغينا الموضوع لانى اتعلمت السواقه بعد كده بالاجبار لكن هذه قصه اخرى mc:

تم تعديل 25 مايو 2004 بواسطة فــيــروز

[فــيــروز]

شكرا على توضيح اسم العجله :P

الحقيقه انا افترضت ان هى دى الدفه لان الدفه هى ما يوجه السفينه و العجله دى بتوجه السفينه cr((:

[Farah]

احساس اول مرتب في حياتي

كان احساس مش عادي اول مره اشتغل كان بره مصر وكنت فرحانه جدا بالشغله وبالمرتب لانه في نظري ولصغر سني في هذا الوقت كان خيالي

من شروط الشغل في هذا الوقت كان لا يثبت الموظف الا بعد ستة اشهر المهم كل يوم قبض انتظر ان ااخد الشيك مفيش شيك

وانا مكسوفه اسأل

مرت ستة اشهر قلت يمكن عشان انا احتياطي ولكن ولا حس ولا خبر وبعدين بسأل واحده معي في الشغل هو المفروض انا اقبض بعد كام شهر من الوظيفه لقيتها وقعت علي الارض من الضحك

ازاي انا بقالي المده دي ولن اتكلم ولا اسأل

كان فيه غلطه في المرتب وضع في الكمبيوتر 0 بدل من مرتبي ولاني لم اسأل محدش خد باله

طبعا اخدت المرتب بتاع سبع اشهر كامل مره واحده وده شيك عمري ماانساه

[se_ Elsyed]

فيروز كتبت

وانا اقول لها يعنى الحمار اهم منى  !! وهى يا عينى حارت جوابا

طب الحمار وعارفينه لأنه واحد مننا ... لكن إيه دي " حارت جوابا " دي غير حارة برجوان .. ولا حارة الفقر حشمه ؟ أرجوكي إعطيني هذا الجواب .

فرح كتبت

مرت ستة اشهر قلت يمكن عشان انا احتياطي

ناس طيبين .. طيبين صحيح ... يعني ستة شهور بتشتغلي لله وللوطن ... ماعندكمكش حد من جرايبكم عايز يشتغل ؟ cr((:

[Farah]

ناس طيبين .. طيبين صحيح ... يعني ستة شهور بتشتغلي لله وللوطن ... ماعندكمكش حد من جرايبكم عايز يشتغل ؟

ياريته كان لله وللوطن ده كان لانكل سام

بس خلاص الكلام ده اوانه فات ده في الاول لما الدنيا كانت بتلتش في الواحد وكان بيكسف يقول اي

[بنت شعنونة]

اول مرتب..

كان احساس رووعة كان 150 جنيه وكنت حاسا اني دكتورة بجد بس مع وقف التنفيذ يعني :o

اول مرة اروح الكلية..

بابا جه معايا mf) وكنت عاملة زي العيال بتوع الحضانة

وزمايلي فاكرينهااااالي لحد دلوقيييييييييي fsh:: ان بابا جه معايا ودخلني المدرج عشان انا كنت مش فاهما حاجا في اي حاجا

لدرجة انه نقى اصصصغغغغغر واقصصصصر ولد في المدرج وقعدني جنبه ووصاه عليا كمان انه ما يسبنيش الا لما تخلص المحاضرة ويخرجني من المدرج لآني مش عارفا حاجا

بعد عشرة مع الولد دا عرفت ان بابا استشعر فيه علامات الأنوثة prt:

اول مرة اسوق العربية...

فاكرة كويس بابا كان معايا وكنت بتدرب جنب قسم شرطة على عربية بيجووو

وجيت الف "يو تيرن" من ناحية قسم الشرطة ما دريتش الا وانا بلبس في الحيطة بتاعت القسم والعسكري طالع يجري فاكرني ارهابية

ساعتها انا اتخضيييت جداااا

بس مش زي بابا اللي من لخبطتة ما عرفش ينزل من العربية وهوا عمال يقول كلالالالام كتييير ورا بعضه مش فكرة منه غير

الله يخرب بيتك هاتموتينااااا اجري العسكري ها يضربنا

:D

اول مرة اخد الرخصة

تحدي قوووووي جدا لآني الوحيدة اللي خدتها من غير كوسة اليوم دا وغظت شباااااااب كتيييييييييير ngh:

اول مرة اخد شهادة التخرج...

اف بقى.... لسا ها اشتغل!!!!

دا المشوار لسا بيبتدييييي

امال ها يخلص امتى!!!

افففف :o

اول مرة اركب جمل...

رقعت بالصوت ngh:

اول مرة امسك موبايل...

كنت متغاااظة من الناس الهاي فاي اللي شارياه ايام ما كان غالي جدااا

رحت اشتريت واحد لعبببة وطول ما انا برا امسكه شوية

واخليه يرن شوية

لحد ما خفيت الحمدلله واشتريت واحد حقيقي mfb:

اخر مرة اركب الطيارة..

كنت زعلانة جدااااا وقعدت اكل كل الأكل بتاع الطيارة عشان انا بحبببه اوووي

ولمييييييت كل الأكياس و المجلات عشان افتكر السفر تاني rs:

[linux]

أول يوم في المدرسة (حضانة)

تعرفت علي صديق عمري أحمد، و عملنا بلاوي في الحضانة و دلقنا صمغ على مرايلنا.

أول يوم في المدرسة (أبتدائي)

الجزمة الجديده و الخوف من الزحلقة و أخد هدر ع السلم. الشنطة الجديدة و ريحة ورنيش ماتفهم أهي ريحة معفنة و السلام.

أول يوم في الأجازة

جري ع البيت و لبس شورت و جري ع الشارع لأول ماتش كورة ف الأجازة.

أول حضور تغسيل ميت

ياااااه، أحنا أخرتنا كده ... واظبت ع الصلاه بعديها يجي لشهر.

أول مرة أسوق عربية

بيجو سبعة راكب و فتيس في الدركسيون، جنب سور الكلية الحربية.

أول مرة أسقط ف أمتحان السواقة

آه لو أشوف الظابط المعفن اللي قال للشاويش العرة يزق القمع الأخير عشان يسقطني! عالم زبالة ياجدع!

أول مرة أشتري علبة سجاير

يوم ما أستلمت البطاقة! كليوباترا عاده! خبيت العلبة في درج المكتب و أول أحساس أني بقيت واد منحل.

أول مرة أحس أني كبرت

يوم ماتوفت أم أعز أصدقائي و أترمي ف حضني.

أول مرة أحضر حفلة روك

بنك فلويد، لوس أنجليس كاليفورنيا. أتمزجت ليلتها قوي من الجيتارات السولو بتاعت الواد جلمور.

أول مرة أقبض مرتب

كان عن نصف شهر، 40 لحلوح بالتمام و الكمال. عزمت الشركة كلها على ببس.

أول مرة أسافر بره

فرنسا و أنجلترا. لا تعليق.

أول مرة أحس أني كيس جوافة

أنترفيو أمام لجنة معظمهم دكاترة جامعة، جاوبت علي معظم الأسئلة كويس، و كنت (و مازلت!!!) شاب يافع حدق. أيه برود اللجنة دي؟ بص رئيس اللجنة للبنت اللي جنبي و قالها: "مش أنتي برضة بنت **** بيه صاحب شركة *****؟". قالت له: "آيوه يا أونكل".

أول مرة أزور مكة و المدينة

شعور لا يوصف. اللهم ما شرفنا بالزيارة مرات و مرات.

أول مرة لساني يتلجم

أوكي، قاعد مع موظفة بالشركة في أمريكا. كنت لسه متعين مبآليش أسبوع. الست عايزة تزيل الجليد و تتعارف. الكلام جاب بعضه و أبتدت تحكيلى علي شقاوة بنتها اللي عندها سنتين، مش فاكر قالت أيه قمت سألتها و أنا مش مدي خوانة: "ياه ... ها ها ها ... طب و باباها بيعمل أيه؟". بصت لي بهدوء و ردت: "هي ماعندهاش بابا ... عندها أتنين ماما". كل الي جه علي بالي ساعتها: "ياولاد المعييز!!!"

- أول برنامج كومبيوتر أكتبه

سبحان الله و الحمد لله، علم الأنسان مالم يعلم

- أول مره أحس أني مكشوف عني الحجاب

أول مره أقابل حماتي، عرفت أن أنا و هي قصادنا صولات و جولات مقبلة. عجبت لك يازمن، دي تجيب دي؟!!

- أول مره أكره السلطه بجد

ماتش كورة ف الأستاد، مصر هاتلعب، قاطعين تذاكر، وواقفين قصاد الباب ... طيب ليه عساكر الأمن المركزي راكبين خيل و ماسكين شوم و جايين يضربونا؟ ليه؟

- أحساس بالغثيان

حقيقي الأحساس ده خاص لأنه يلازمني دائما و مش أول مرة وبس، أحساس بالتقيئ كل مرة أشوف بوش و عصابتة ع التلفزيون ... بجيب اللي ف بطني ... و ياسلام كمان لو الحلووف الأكبر شارون أبن xxx ظهر ع الشاشه ... تبقى كملت.

[لماضة مصرية جدا]

السلام عليكم و رحمة الله و بركاته

ارفع التوبيك و لا مرفعوش؟؟؟

افتكر اول احساس...و لا مفتكروش

اسيبكم ترغوا.....و لا احسن متجوش

ذاتس ذا كويستشن

توبيك كتير عجبني

برفعه....(صحتي راحت منكو علي فكرة....الا فيه بدل رفع في المنتدي ده للاعضاء اللي مناعتهم ضعيفة....كح...كح....كح)

لو تحبوا نشارك بعضنا احساس....اول مرة

سموا...و خشوا برجلكم اليمين

كان معكم

لماضة.....أفندي

موظف ارشيف سابق

كوبانية المية.....(وش واحد لابس طربوش بزر....و بيرش ميه قدام الدكان)...يا قوي

فوتكم بعافية

[لماضة مصرية جدا]

السلام عليكم و رحمة الله و بركاته

توكلنا علي الله

أول مرة أسافر فيها بره مصر....احساس كوكتيل....عبط الطفولة انك هتتفسح و كان كل يوم في الغربة هتركب فيه مراجيح و زحاليق...و خطفة في القلب لما وش اعز الناس بيغيب عنك في صالة المطار

اول مرة اخش جامع و اصلي فيه جنسيات مختلفة....مكناش عارفين نتفاهم في الاول....بس لما صلينا....حركاتنا واحدة....لغتنا واحدة...كان فيه احساس باقتراب غير عادي....بعد الصلاة...اديت نفسي فرصة اكبر اني اعيد محاولة الاكتشاف

اول مرة....أركب جمل.....فضلت ازعق ...و ازعق.....مبحبش اي احساس بعدم السيطرة...بس هو الجمل سبحان الله متممكن جدا جدا....بس تقريبا بعد ما نزلت انتحر....او انطرم

اول مرة....اقع من القطر....مخيف جدا جدا جدا....لحظة بتفرق بين الحياة و الموت....حطيت رجلي في القطر....و الرجل التانية لقيتها ع الرصيف....معرفشي عقلي اللولبي ازاي اوحالي اعمل كده ازاي....بس في لحظة...حسيت اني فعلا مت خلاص....و مش عايزة اقاوم...و مش قادرة ارفع الرجل التانية....لغاية ما فيه ايد اتمدت و شالتني م ع الارض شيل

اول مرة...اتكلم فيها انجليزي مع ناس افارقة....كنت خايفة كتير...و مبسوطة ان ربنا وفقني...اينعم افارقة و كلنا كنا بنطجن....بس احساس بالثقة بيملاني كل ما افتكره

أول مرة....اطلع في مسرح المدرسة....كان دور سنو وايت.....مكنتش خايفة....و حاسة اني فعلا سنو وايت....بس معرفتش امثل دور الميتة....لاني فضلت اضحك....حتي الامير اللي كان في وشي....ع ما اتذكر كان الواد عمرو....قعد يضحك....و تقريبا قفلوا علينا الستارة

أول مرة....اطلع رقم 8 ع الفصل في تانية اعدادي......فضلت اعيط.....احساس بالفشل غير عادي....مش عشان الاوائل و القصص دي....عشان بابا سالني طلعتي كام النهاردة.....روحت كذبت و قولتله ماخدتش الشهادة....اللي وجعني مش الترتيب....اللي وجعني التكذيب

أول مرة...اعرف ان "....." عندها سرطان و هتضيع مني....معرفتش اعيط....مع اني كنت عايزة .....صليت.....استوعبت الموضوع تقريبا بعديها....ب 6 شهور...و ابتديت ابكي....بس لوحدي بالليل

أول مرة....تتقالي كلمة "ماما".....مع اني لا ماما و لا يحزنون....احساس بيشيلك من ع الارض شيل.....حسيت اني فعلا مش عايزة حاجة في الدنيا....ممكن اموت بعدها و انا بضحك

أول مرة....و اخر مرة اقعد جنب ست بتسوق....(الركن الحريمي ميزعلشي مني).....احنا كنا هنلبس في لوري....و بعدين انا لسه شابة و امي عايزاني...احساس....بالتجمد.....انا مزعقتش....متكلمتش....انا اخدت نفس و معرفتش اطلعه تاني....و لغاية دلوقتي لسه مش فايقة من الصدمة....اصل اللوري...كان ناحيتي.....و ع الطريق السريع....لحظة غريبة.....بين عالمين غريبين...و السبب واحدة ست.... :lol: ...ما علينا...دي وجهة نظر

مساااكم حلاوة....اول قطفة

[shiko]

...مستنية اشوف احاسيسكم الاولى على اعتاب الحياة ...

[عبير يونس]

شفت الموضوع ده و الحقيقة قعدت افكر في اول احساس دي

ملقتش

:blink:

آه والله

مش عارفة

ازاي يعني؟؟

اصل انا دايما مندهشة

يعني مثلا لو باعمل نفس الشيء للمرة الألف هو نفس الاحساس

طب حأسهلها لكم شوية

مش بيقولوا احساس الأمومة لأول مرة بيختلف

انا عمرها ما حصلت معايا

يعني احساسي بآخر بيبي ميفرقش عن اول بيبي

و كل مرة حمل بيبقى كأنها أول مرة

احساس اول شغل

زي آخر شغل

كل مرة كأنها أول مرة

مش عارفة ده طبيعي و الا ايه :blink:

[shiko]

الاحساس الاول :

أول مرة ...اشوف الفرحة فى عنين امى ...لحظة تكريمى فى احدى المناسبات ..وطلعت على الستيج ...والناس قعدت تصقف ...اول مرة احس انى عرفت اعمل حاجة تفرح امى ....موش قادرة انسى النظرة اللى كانت فى عنيها

اول مرة ...اسافر فيها برة لوحدى ....شوفت كل الشوارع ضباب ....عشقت اللغة العربية لاول مرة ....كبرت حوالى 8 سنين قدام

أول مرة ابات بره قوضتى ...ماغمضتش عنية طول الليل وقى القجر لميت هدومى وفوريرة على بيتنا ....

أول ورشة عمل حضرتها فى بداية شغلى ....كلهم هنود ...كنت مذبهلة موش فاهمة ايتها حاجة ...كنت حاسة لن مكانى موش هنا مكانى الصح فى حجرة البواب ...

أول مرة اعمل مكرونة بالباشميل .... ...بابا ادانى خمسة جنيه مكافأة تشجيعية ...

اول مرة قعدت احسب مرتبى بعد 6 شهور من الشغل لاقيته 800 جنيه كنت هانهار ...ياااااااه ده انا كده ممكن اوصل ل1000ج مرة واحدة ...

أول مرة فارقت حد ...وفهمت معنى الفرقة كان فى وفاة جدنى

أول مرة احس بالظلم .... كنت قى المحكمة ....لاقيت مرارة رهيبة فى حلقى ....ولاقيت نفسى وسط حشر من المظلومين ايقنت ان طعم الظلم موش هايروح منى ...وفعلا لسة مارحش ...

أول لاب توب استلمته من شغلى ...احساس بالفخر ....مفخرةادام بابا وماما ...احساس احمد زويل لما استلم جايزة نويل .....

أول مرة اقص شعرى ...كنت فاكرة انهم ممكن يكتشفونى بدال ماما نجوى ....اصلى كنت مصممة اقصه قصة ماما نجوى

أول مويايل جبته كنت فى الجامعة كان سونى اريكسون ...شراكة مع اخويا ...هو يوم وانا يوم ...والرصيد بالنص برضه ..