مصر هاتبقى فاضيه عليه

[se_ Elsyed]

والله العظيم ما بأهزر

أنا حاسس إني في مره هارجع مصر مش هالاقي حد في مصر ..

من كُتر ضحايا حوادث الطرق اليومية

يا جدعان الكوته دلوقت عدت العشرين قتيل يومياً على غيار الريق

والغريبة بقى إن والعياذ بالله منظر العربيات بعد الحادثة بتفكرك بالمكونات الأوليه للعربية .. كل حته في ناحية ومافيش حتتين جنب بعض

شوفوا كده الحادثة بتاعت أمبارح

والنهاردة برضوا اتوبيس هيئة تدريس جامعة الفيوم وكانوا الدكاترة فيه جرار زراعي

واتوبيس لبس في جرار النهاردة برضوا في بورسعيد .. نفس الجرار الزراعي الفاخر ... تخيلوا ؟

الصورة دي من المنيا أمبارح .. أنا بيتهيألي المنياويين دول ماسكين ديل قطه سودا .. واللي بيفلت منهم من الموت في القطر .. بيموت في ميكروباص وهو مروح بيتهم

إيه في إيه ؟

هما شرطة المرور سافروا بره وبقى أي حد يعمل أي حاجه عالطريق ؟

والله من أول أمبارح وكل ما أفتح موقع الأقي الناس بتقول " رامي مات "

رامي مين يا جماعة ؟

طلع واد لبناني صغير من اللي بيشتركوا ف برنامج ستار أكاديمي ... واحد صاحبة في نفس البرنامج مصري .. عزمه في مصر يومين .. صاحبنا ساق عربية صاحبه وطاير بها على كوبري 6 اكتوبر - أموت وأعرف إزاي ده الناس بتمشي فوق بعض هي والعربيات في تلاحم عجيب - وجنبه صاحبة المصري اللي أسمه محمود .. تروح العملية خارجه عن السيطرة يروح ناطط الجزيرة الوسطى ولابس في عربية في المعاكس راجل ومراته غلابه في عربيتهم وماشيين في طريقهم .. ما حطوش منطق .. ماتوا الله يرحمهم . والواد رامي ده كمان مات في الحال .. ومحمود ما بقاش نافع طبله ولا طار وفي حاله حرجة بالإنعاش

لقى شخصان مصرعهما وأصيب 22 آخرين فى 3 حوادث متفرقة بالمنيا.

تلقى اللواء محسن مراد، مدير أمن المنيا، بلاغا من مأمور مركز شرطة بنى مزار عن انقلاب سيارة رقم 12419 أجرة سوهاج شمال البهنسا بحوالى 6 كيلو مترات.

أسفر الحادث عن مصرع كل من عربى عبد المعز حسن (28 سنة)، وصابر متولى محمد هريدى (63 عاماً)، بينما أصيب 5 أشخاص آخرين بكدمات وجروح.

كما شهد الطريق الصحراوى الشرقى انقلاب سيارة رقم 43635 ربع نقل المنيا عند مدخل قرية السريرية، وأسفر الحادث عن إصابة 12 شخصاً بكسور وكدمات.

وأصيب 5 أشخاص آخرين فى تصادم سيارة رقم 45829 ربع نقل المنيا مع سيارة رقم 9863، وقد تم نقل الجثث والمصابين إلى المستشفيات العامة وتولت النيابة التحقيق.

لحد دلوقت ولا كأن حد واخد باله .. ولا بيان من الداخلية يقول يا سواقين عيب اختشوا

زي ما قلت خايف أصحى مالقيش المصريين

[se_ Elsyed]

كل الل فات ده كان أمبارح

تابع نتيجة يوم الجمعة

طنطا من عند السيد البدوي .. 5 ماتوا غير المصابين

سوهاج بلد المواويل

المنيا .. والعدد في اللمون

أسيوط ... 5 برضوا .. في فعل فاضح في الطريق العام .. عربيتين بيحضنوا بعض قدام الناس وعناق وقبلات حاره

الأسماعيلة .... ضحايا بالهيل ...بس ما فيش صور

أسكندرية صحراوي

أسكندرية كمان وكمان في نفس اليوم

أسماعيلية 20 مره واحده ... ما فيش صور

أنا تعبت

كل ده في يومين وما أستطعت فقط أن أحصره ... جمعه وسبت بس ... يرضي ربنا ده ؟

[hOuSsAm]

يباشا المشكلة مش فى المرور بس

لازم الناس كمان تشيل مسئولية

ماهو اللى بيحصل ده مش سواقة

عصبية وجنون وتهور ومفيش زوق ولا اخلاق السواقة اللى عارفنها

الطرق اه ضيقة وكلها مطبات وزفت

بس النتشات واللهوجة فى السواقة دى مش اسلوب كويس

مش عارف اقولك ايه بس المنظومة بقت زفت اوى

يعنى الموضوع كبير جدا وطويل اوى وكله بايع القضية من اول الزبون اللى بيركب المكروباص لحد وزير المواصلات

وكله بيقول انا ومن بعدى الطوفان

[se_ Elsyed]

حسام .. لو رجعت للكُتب والمراجع اللي ألفتها ( عازف مكتبة مدبولي الصغير ؟ طب عارف بتاع العصير اللي جنبها ؟ ما تشربش من عنده عشان عصيره زعازيع )

هاتلاقيني دايماً بأقول إن الإنسان .. كائن همجي بطبعه ... ولا يتم تقويم سلوكه إلا بالثواب والعقاب

وكانت الاديان نفسها تبقى مجرد تعليمات وحض على الإخلاق الحميده .. وما كانش يبقى في جنه ونار .. وما كانش يبقى في سجن ...

هاديلك مثل صغير .. تعالى على مدينة جديدة .. وقول يا جماعة عاوزين نقرا الفاتحة ونخلي مدينتنا دي زي بلد المحبوب .. بلد ما تعرفش الكُره ولا الحقد ولا الغل وما فيهاش يوسف بطرس غالي .. بس كل واحد يحلف إنه هايلتزم ويبني بما يُرضي الله

إيه اللي هايحصل ؟

هاتلاقي كل واحد جاب سكينة وعاوز ياخد قيراطين من ارض جاره غصم وأقتدار ...

وواحد تاني تلاقيه جايب قلاب رمله وألفين طوب وبيبني في قلب الشارع

ليه ؟

عشان ما فيش قوانين مُنظمة للموضوع .... والاهم من القوانين هو تطبيقها بحذافيرها بدون استثناء

ده يا حبيب قلبي هو اللي بيحصل عندنا

شنط أسعاف

ومثلث مرور متوازي الأضلاع

وطفاية سجاير أو طفاية حريق مش فارقه

ولجنة واقفه في نص الكوبري مش إشكال بيقلبوا الناس وياخدوا ممتلكاتهم وفلوسهم ويمشوهم ملط ... ملط يا حسام .. ملط

هو ده المرور عندنا

يبقى في ظل الإنفلات ده ... تتوقع شكل اللوحة النهائية تكون إزاي ؟

أنا عن نفسي لا أُنكر إني بأشارك في بعض المعجنه دي لما بانزل ... ... حتى لو غصب عني ... مانا لا شايف لوحة تحديد سرعة ... ولا تخطيط ولا اليو تيرن بيتعمل فين ومنين وإزاي ... ولا شايف إتجاه الشارع الجانبي بالذات وده عكسي ولا طوالي ولا سمبوكسات ..

وأجي داخل شارع عمومي يا مؤمن ... عمومي .. الاقي في نص الشارع ناس بتشاور لي . إرجع عليك لعنة الفلاح .. من فلاح إبن فلاح ( وش يوسف وهبي ) .. أسأل : ماذا دهاكم أيها قوم ؟ أصبأتم بدين أباءكم وأتبعتم ملة محمد ( وش عدلي كاسب أبو حواجب عاملها ضفاير في فيلم ملاكي قريش ) ؟ يقول لك في فرح النهاردة وناصبين شادر وممنوع المرور ... لوووووووووووووووولي .. بأنزل أنقط وارقص طبعاً .. ما هي المجاملات دي مطلوبة يا حبيبي ...

إذن أعمل قوانين ..... وطبقها كويس ... وهاتلاقي الكل ماشي زي الألف اللي عليها همزه من تحت ..

وإلا ( يعني otherwise ) ما ترجعش وتلوم الهمجية في سلوك الشارع لدينا .. لإن الناس مش هاتخترع قوانين لنفسها تمشي عليها .. واشيل لوحه أنا إرشادية وأقول هاحدد سرعتي ... وأقلل سمنتي وأظبط أكلتي

[Howayda Ismail]

شئ بسيط بيحصل والحكومة عرفاه كويس قوى معظم سائقى النقل الثقيل والتريلات والميكروباص يتعاطون

مواد منبهة ان لم تكن مخدرات لانه بيطبق دور واتنين وبيسافر لمحافظات نائية لازم يبقى صاحى 28 ساعة فى 24

ساعة بالاضافة لعدم احساسه بتقدير المسافات والسرعة اللى بيسوق بها والنتيجة الحوادث المتكررة وعشرات الضحايا

فى الحادثة الواحدة هنا العامل البشرى هو الاساس لان معظم الطرق خاصة الصحرواى والزراعى تطورت فى الفترة الاخيرة

بصورة ملحوظة ولان الفساد والرشوة هما الاصل عندنا السواقين بيجددوا الرخص من غير كشف ولاتحليل عن وجود

مواد مخدرة فى دمهم من عدمه لكن لو الغى رخصة كل سائق متعاطى وطبق قانون تجاوز السرعة من غير كوسة

ستقل الحوداث ونمنع ولو قليل من نزيف الاسفلت ده

[ابو محمد بن مصطفي]

اسباب حوادث المرور المصرية كما وردت في تذكرة داود

1 - الحشيش سائقي النقل بيضربوا انفاس وده اساسي في الشغلانه دي .

2 - الطرق وتخطيطها فمثلا الوصلة من بني سويف والمنيا الطريق الزراعي علي مر السنين شهدت موت الالاف .....

لو عملنا احصائية عن عدد القتلي في الحوادث لهذه المنطقة لكانت كافية باقالة رئيس دولة مش وزير مواصلات

3 - عدم الرقابة علي الطرق

4 - عدم اقتناع سائقي الميكروباز والنقل بان الطرق انشأت من اجل الجميع وليس لهم فقط فسواق النقل او الميكروباز بيسستم العربية

علي ان الطريق فاضي ومفيش حد قدامة واللي يحصلني يكسرني

قانون المرور الهدف الاساسي منه هو تحصيل (سرقة ) المصريين

ملحوظة علي جنب

كنت زمان لما اقرأ في كنت التاريخ ان المماليك كانوا عملين فرده او ايتاوه او ضريبة علي الحمير اللي بتمشي في الشوارع كنت بستعجب

شيل كدا الحمير وحط سيارات او عربيات هتلاقي بقي الشعب رجع تاني يعيش عصر المماليك

[Morial]

إيه السوداوية دي

مشاكل المرور موجودة في كل حته في الدنيا

بس احنا اللي بنحب نجلد ذواتنا ونضخم اي مشكلة وكأن العالم خالي من المشاكل واحنا بس اللي بنعاني

ياريت تخدوا فكرة عن حجم الكوارث المرورية في بلد ذي الهند مثلا او السعودية وانتوا تعرفوا اننا في نعيم

ومصر هتفضل غالية عليا

تم تعديل 11 يوليو 2010 بواسطة Morial

[Howayda Ismail]

إيه السوداوية دي

مشاكل المرور موجودة في كل حته في الدنيا

بس احنا اللي بنحب نجلد ذواتنا ونضخم اي مشكلة وكأن العالم خالي من المشاكل واحنا بس اللي بنعاني

ياريت تخدوا فكرة عن حجم الكوارث المرورية في بلد ذي الهند مثلا او السعودية وانتوا تعرفوا اننا في نعيم

ومصر هتفضل غالية عليا

طبيعة السعودية الجبلية وكثرة المنحدرات فى الطرق السبب الرئيسى فى وقوع الحوادث .

والهند الكثافة السكانية العالية سبب فى ظهور اعداد كثيرة فى الحوادث .

لكن احنا الحوادث عندنا بتكون فى طرق ممهدة لذلك السرعة الجنونية وعدم الانتباه اضافة لعدم الكشف على السائقين

وراء الحوادث

[sarmar]

الفاضل سى السيد هناك مثل يقول وهو تأييد لكلامك ان من امن العقوية أساء الادب ولا يخفى على الاخوة الافاضل معنى هذا المثل وقبل لن نحلل اسباب هذة الكوارث والخسائر البشرية والمادية فان العنصر الرئيسى فيها هو الانسان وهو فى نفس الوقت الجانى والمجنى علية ولاول ما يخالط بصرك فى اكبر شريحة تعتبر ضحية هو الميكروباص ولعلكم تعلمون ان معظم هذة النعوش الطائرة ملك لاحد اباطرة الطرق او رئيسة او اقاربة وعلى رايك هما يقلبوانا ويصادروا ممتلكاتنا لصالحهم وهذة الفئة من السواقين التى تعمل على هذة السيارات لا تحمل رخصة قيادة اصلا بل اننى اجذم بان اكثر من نصف قائدى السيارات ليس لديهم رخصة قيادة الامر الاخر ضياع هيبة رجل المرور او رجل الشرطة فى الشارع المصرى لقد ضاع واصبح الحاضر الغائب

امور كثيرة تسبب هذة الكوارث تتحمل الدولة نسبة لاتقل عن 60%اهمال وسوء تخطيط وعدم صيانة الطرق ووضع ارشادات كافية وفى مكان واضخ فى الليل قبل النهار والباقى على السائقين من اهمال ورعونة وقلة زوق وقلة فن وانعدام الاخلاق

[أسد]

شوف ...

أنا في مصر اليوميندول

المشكلة مش في المرور

المشكلة الحقيقية في الناس

شئ مش ممكن

منتهى الاستهتار والاستهانة بحياة الناس

ناهيك عن إن فيه ناس كتير جداً ما بتعرفش تسوق فعلاً وبتسوق عربيات وبتسافر بيها

هذا بالإضافة إلى سوء حالة السيارات

وانهيار تام لأحوال الطرق في مصر ..

كل يوم أسوأ من اللي قبله

[ذهبية]

طيب ما كلنا عارفين الاسباب كويس بس الحل اية

انا شايفة الوعى بالذات فى الاعلام لة دور كبير جداااااااااا

يعنى زى ما بيعملوا اعلانات كدة عن تنظيم الاسرة و المشاركة فى الانتخابات و ختان البنت تكون فية توعية عن حوادث الطرق

2- يجيبوا برامج و صور عن حجم الدمار و الخسائر البشرية و المادية عن الحوادث دى

3- يكون فية دوريات مرورية و نقظ تفنيش على الطرق الخطرة و اللى بيكتر فيها الحوادث

4- ترخيص السيارة اللى بيطلع بالواسطة و الرشاوى لازم يكون فية اكتر من امتحان فعلى وعملى قبل تسليمة فى يد اى سائق

5-

يحرم اى سائق ارتكب اى مخالفة من السواقة الا بعد فترة معينة مش يعمل المخالفة من هنا و ينطلق فى الطريق

يكمل بقية مهمتة فى تدمير ارواح البشر

6- اى سيارة مخالفة لمواصفات الامان يتم سحب الترخيص منها فورااا

7-

[hOuSsAm]

شوف ...

أنا في مصر اليوميندول

المشكلة مش في المرور

المشكلة الحقيقية في الناس

شئ مش ممكن

منتهى الاستهتار والاستهانة بحياة الناس

ناهيك عن إن فيه ناس كتير جداً ما بتعرفش تسوق فعلاً وبتسوق عربيات وبتسافر بيها

هذا بالإضافة إلى سوء حالة السيارات

وانهيار تام لأحوال الطرق في مصر ..

كل يوم أسوأ من اللي قبله

هو ده نفس الكلام اللى انا قلته وشفته الايام دى فى مصر

بس سى السيد بيقول ان لابد من وضع قوانين رادعة لظبط همجية الناس اللى عندها استهتار دى

انا معاك ومعاه............... محنا محتاجين قانون ينظم وافراد يطبقوا القانون دول

ومحتاجين بردوا سواقين يتعلموا القوانين اللى هتتطبق عليهم

فيه حاجة كمان

الناس مش طايقة بعضها

يعنى كل واحد ماسك السكينة للتانى

مش معقولة كل يوم اشوف شكلة بين اتنين سواقين وشتيمة وقلة ادب

وكمية تلاكسات عربيات غير عادية................ عالفاضية والمليانة

واللى بيلاقى فرصة انه يستخف بعقل واحد تانى بيستخف بدون نقاش............. كله عايز يركب فوق كله

[herohero]

يا جماعه لاتقلقوا البلد مش هتفضى ولا حاجه مش عارف محسسني ان ده شيئ جديد البلد طول عمرها كده ومن زمان والامور زي الفل وماشية ماتقلقوش

يا اخ حسام طول عمرها الناس كده ع الاقل احنا وعينا ع الناس كده مش عارف محسسني ان مصر اتغيرت

بالعكس فيه تغيرات ف كثير من الاحيان للاحسن مكنش فيه زمان طرق عدلة دلوقتي ع الاقل فيه تحسن نسبي

العيب ف سلوكيات الناس

زمان وانا صغير كان مكتوب ف الشوارع ف الكويت

القياده فن وذوق وأخلاق

ياترى هل في حد من قائدينا في مصر يعرف كده هو ده السبب

فماتقلقش ياحسام مصر طول عمرها كده وماتخافش عليها انت بس عشان بتقارن ودايما اللي بيتعب هو اللي بيقارن او شاف اما اللي ماشافش هيكون مرتاح والدليل

شوف الناس اللي ف مصر متكيفين عادي جدا ماتقلقش ع مصر ، مصر مش هتفضى ويجعله عامر

[Morial]

شوفتوا أول ما بتنزلوا مصر أجازات مش بتشوفوا غير عيوبها ومشاكلها

في حين أن اللي بيحب بجد مش بيشوف غير المميزات لأن ذي ما بيقولوا مراية الحب عميا

عموما أنتوا محسسني أنكم جايين من كوكب تاني

ومتفاجئين بالشارع المصري

لاء والادهي من كده عنوان الموضوع اللي سببلي إحباط

يا سيد سين سين

مصر هتفضل غاليه عليا

والبلد مش هتقع

[اغابي]

الموضوع كله عدم التزام بالقوانين وعدم تطبيق غرامات

احنا مش بنقول ان بس مصر اللى فيها حوادث . . بصراحة حوادث الكويت مفيش رحمة فيها نظرا للقيادة الجنونية ووجود حارة فى كل طريق - مسموح فيها بالسرعة

ومع ذلك برضوه ارجع واقول فى قانون الكل ملتزم بيه . .

لكن حوادث مصر بقت زيادة . . بقت فوق الوصف . . مش علشان عددنا اكبر فمعرضين للحوادث بشكل كبير . . لكن علشان عدم سلامة الطرق وعدم تطبيق القوانين

و المخالفات بشكل رادع وحتمى . . كل يوم خبر جديد فى كل الصحف العربية عن حوادث جديدة فى مصر . . فعلا افضل مصطلح كان يا س س .. هو نزيف الاسفلت ..

يعنى حادث حصل من يومين بشع ومات 16 شخص وكمان فى نفس اليوم حادث الشاب البنانى وهو نجم برنامج ستار اكاديمي . .

وما لقاش يموت فى دولة فى العالم غير فى مصر وبرضوه حادث وكمان العربية اللى عمل معاها الحادث كان فيها اسرة مصرية وكلهم ماتو برضوه ..

و اليكم الخبر وصورة العربية بعد الحادث كان شكلها ايه . .

لبنان تحوّل «أستار اكاديمي الى حزن» ... على رامي الشمالي

شيَّع اليوم بمشاركة زملائه المفجوعين والمنهارين

| بيروت - |

بقي لبنان امس تحت وقع «الفاجعة» التي حلّت عليه مع إعلان مصرع نجمه الشاب رامي الشمالي في حادث سير مروّع في مصر بينما كان يقود سيارة وبجانبه زميله في برنامج «ستار أكاديمي 7» المصري محمود شكري الذي نجا بأعجوبة رغم جروحه الخطرة.

ولبنان، الذي تحوّل «أكاديمية حزن»، يشيّع اليوم رامي، ابن الـ23 عاماً الذي عاد ليل امس الى وطنه في نعشٍ انطفأ معه النجم الواعد في عمر مبكّر بعدما سرقه الموت من أحلامه التي «ذبلت» سريعاً.

وشخصت الانظار طوال يوم امس على منزل رامي في السهيلة (كسروان) الذي تحوّل «مستودع دموع» واستقبل محبيه الذين لم يصدّقوا انه رحل بـ «لمح البصر».

غالبية زملائه في «ستار أكاديمي» فُجعوا بخبر وفاته وإصابة شكري بجروح بالغة، وقد تقاطروا الى منزل ذويه بحال انهيار. فالفائز باللقب لهذا الموسم ناصيف زيتون قصد السهيلة وهو في وضع صعب جداً، وكذلك الأمر بالنسبة الى رحمة الموجودة في لبنان والتي حالها كحال زملاء رامي اللبنانيين رايان، الين وجاك.

واشارت معلومات الى ان المشترك الاردني محمد رمضان ألغى حفلاته الغنائية المتفق عليها حالياً من هول الصدمة، كذلك «ميرال» التي اصيبت بانهيار عصبي جراء سماعها الخبر مثلها مثل المشترك الكويتي «عبدالعزيز» المقرب من رامي.

حتى محمود شكري الذي يرقد في المستشفى وسط معلومات عن انه اصيب بتشوهات عديدة في وجهه وجسمه خصوصا في الجهة اليمنى المصابة اصابات بالغة جدا، يستفيق بعدما خضع لعمليات جراحية عدة كل نصف ساعة ليسأل عن صديقه رامي الا ان اهله لم يخبروه الحقيقة «المُرة» بعد.

ومع رحيل رامي (الابن البكر لعائلة من ثلاثة اشقاء ووالدة بعدما فقد والده قبل اعوام)، يستذكر زملاء له في «اكاديمية النجوم» التي خرج منها في الحلقة ما قبل الاخيرة، احد صفوف المسرح مع الاستاذ ميشال جبر عندما أخبر رامي عن حلم لا ينفكّ يراوده خلال النوم ويكون فيه عائدا من احدى السهرات الليلية داخل سيارة مع رفاقه وسط الظلام الدامس وفي وجهه انوار قوية جدا فيبدأ بالنزول من دون ان يعرف الى أين. ويبدو ان هذا «الكابوس» صار حقيقة على كوبري 6 اكتوبر.

وكان تم تداول بيان صادر عن الأجهزة الأمنية المصرية حول الحادث، جاء فيه انها تلقت بلاغا بحدوث التصادم - أعلى الكوبري في الاتجاه إلى مدينة نصر أعلى ميدان العباسية - بين السيارة ملاكي جيزة بقيادة رامي كميل الشمالي (23 عاماً لبناني الجنسية)، وبرفقته محمود أحمد شكري (مصري الجنسية)، والسيارة الملاكي بقيادة كمال سعد زغلول (62 عاماً بالمعاش)، وبرفقته زوجته راوية محمد عبدالله (60 عاماً ربة منزل) وزوجة نجله أمنية صلاح الدين صبري (27 عاماً ربة منزل)، ما أسفر عن وقوع هؤلاء ضحايا.

صورة لرامي نجم استار اكاديمي - نشرها محبوه على موقع «فايسبوك» وأسفلها صورة عن السيارة التي كان بداخلها مع محمود شكري

[se_ Elsyed]

يا جماعة في فرق بين حوادث طرق بتحصل عشان التهور والسرعة الزائدة عشان العربيات حديثه والطرق بتساعد .. زي السعودية بالذات

وبين حوادث نتيجة التهور الناتج عن الإهمال والعجن وعدم الرقابة وكل واحد معاه حاجه بأربع عجلات وساعات تلاته زي التوك توك بس اهم حاجه بتمشي وماحدش بيقولوا إنت رايح فين ..

يا بتوع السعودية .... مين شاف قبل كده تريلا أو عربية نقل ماشية أكتر من 70 ك وفي غير اقصى اليمين ؟

عشان كده إحنا بنكتب عشان ننبه ... مش عشان بنرى الجانب الأسود فقط .. لأن الأرقام اليومية هي اللي بتتكلم مش إحنا

والله مره بأسأل سواق تاكس أعرفه ...بأقول له إنت رايح أسكندرية تصيف ؟ بمنتهى العفوية

بيقول لي لأ ... ليه ؟

قلت له أومال شايل الكاوتش الجواني ده ليه فوق الشبكة .. أنا بأشوف ناس بتنزل به البحر ههههههههه عوامه يعني

قال لي لأ جواني إيه .. ده كاوتش عادي يا بيه .. بس رايح أخططه ؟

يا نهار إسود ومنيل

أقسم بالله الكاوتش ممسوووووووووووووووووووووووووووووووووح وصلاحيته منتهية من سنيتن مثلاُ وبقى شاكل الجواني بتاع زمان قبل التيوبليس .. فيرمي أمه إزاي ؟

لأ يروح لبتاع كاوتش يخططه من تاني ويركبه ويمشي به

الفرامل بقى تمسك فيه أو هو يبقى له درجة ثبات على الأرض ... الحاجات دي كماليات مش مهم يا عم الحاج ...

كمان لما ننادي بوجود شرطة إسمها " شرطة المرور " و " أمن الطرق " يبقى كده بنبالغ

يعني فين البلد اللي كل يوم فيها 20 أو 25 بيموتوا دي ؟

مش قادر أسكت قبل ما أقدم طبق اليوم

لقيت أمس الأحد أسرة كاملة مصرعها فى حادث تصادم سيارتين بطريق الواحات، وتم نقل المتوفين إلى المستشفى وتحرير المحضر اللازم، وأخطرت النيابة للتحقيق.

لقى شخصان مصرعهما وأصيب 11 آخرين فى حودث مرورية بالمنيا.

مش قلت لكم المنيا بالذات قربوا يخلصوا ...

بدون مبالغة يومياً حوادث مميته ... وولا حياة لمن تنادي .. واللوا د/ أحمد ضياء الدين أكبر بوء شوفته في الداخلية وهو محافظ المنيا حالياً .. ولا كأنه موجود

مصرع شخص وإصابة 10 فى حوادث سير بالشرقية

[لماضة مصرية جدا]

مش قلت لكم المنيا بالذات قربوا يخلصوا ...

السلام عليكم و رحمة الله و بركاته

مين بينادي علي بتوع المنيا

استاذي سين عين...فين

ما احنا موجودين أهه و ميت فل و اربعتاشر...(اينعم انا مش هونيك دلوكيتي....بس نحب نطمنكم ع شعب عروس الصعيد)

هو انا بس لاحظت حاجة.....هو السواقين بيشربوا حاجة عشان تخليهم ميبربشوش و هما سايقين!!!

آخر مرة السواق اللي موصلنا مع انه معرفة قديمة.....بس لاحظت ان عم الحاج لازق في الدريكسيون و مغمضشي عينه.....هو اينعم باصص ع الطريق....بس و الله العظيم تحس انه ميت....نكلمه عشان يصحصح.....نلاقيه ساكت...نديله شاندوشت......الراجل مبيتحركشي....هو مصبوب ع الكورسي و لابد في الدريكسيون

كان هاين عليا ااقوله يا عم الحاج اتفضل قوم نام و احنا هنفرش ع الطريق الصحراوي......الراجل محطش منطق....

و لما وصلنا كان متهيالي....انه هينزل واخد شكل الكورسي و برضه ماسك في الدريكسيون

السؤال...ليه مش فيه اختبارات ع الطريق زي اللي بيكشفوا بيها علي اللي شاربين خمرة....و اذا السواق حسوا انه مبلبع حاجة.....يوقفوه...او يسحبوا الرخصة

ع فكرة عم الحاج السواق مكنشي شترب منكر.....بس اللي عرفته منه انه كان واخد دوا عشان السكر و الضغط....(هو اللي قالي كده لما اتصلت اطمن عليه)

[لماضة مصرية جدا]

شوفتوا أول ما بتنزلوا مصر أجازات مش بتشوفوا غير عيوبها ومشاكلها

في حين أن اللي بيحب بجد مش بيشوف غير المميزات لأن ذي ما بيقولوا مراية الحب عميا

عموما أنتوا محسسني أنكم جايين من كوكب تاني

ومتفاجئين بالشارع المصري

لاء والادهي من كده عنوان الموضوع اللي سببلي إحباط

يا سيد سين سين

مصر هتفضل غاليه عليا

والبلد مش هتقع

السلام عليكم و رحمة الله و بركاته

مش عارفة ليه لما قريت المداخلة دي....افتكرت جملة حضرتك كنتي قولتيها في توبيك باين عن التوك التوك

بس الجملة دي مش قادرة انساها

"أبوس رجلك يا كندا.....خديني"

هو فيه ايه

اصل فيه حاجات كده مش قادرة افهمها.... ;) :blink:

تحياتي

[se_ Elsyed]

هو السواقين بيشربوا حاجة عشان تخليهم ميبربشوش و هما سايقين!!!

أه بيشربوا عرقسوس

يا بنتي روحي ذاكري ليك كلمة في موضوع هل المخدرات بتخدر صحيح ولا كده وكده ؟

داهو

مزاءءءءء الغيررررررررررر

السؤال...ليه مش فيه اختبارات ع الطريق زي اللي بيكشفوا بيها علي اللي شاربين خمرة....و اذا السواق حسوا انه مبلبع حاجة.....يوقفوه...او يسحبوا الرخصة

طب أسمعى النكته البايخه دي .... دي حقيقة على فكره

واحد أشرى تلات جوافيفات - جمع جوافه يعني -

جيه بياكل أول واحده لقاها بايظه

تاني واحده لقاها بايظه

راح طافي النور وواكل التالته زي ما هي

حصل يا فندم وبدأوها عندنا السنة اللي فاتت في الشرقية وفي بداية التجربة الدنماركية لقوا إن أكتر من 50 % من سواقين النقل مدمنين مخدرات وخصوصاً الأفيون ..

راحوا طافيين النور وواكلين التالته

[مغتربة]

اسوء ما فى حوادث المرور هو استهتار الاخرين

المشكله ان اى انسان ماشى فى الطريق بعربيته مش مسئول عن سلامه نفسه و الى معاه فى العربيه بس لا

انما كمان مسئول عن سلامه الناس الى ماشيه جنبيه فى الطريق

يعنى مثلا فى حادثه رامى ايه ذنب الاسره التانيه الى جايه فى طريقها عادى جدا و ماشيه مظبوط

ان عارفه ان كل شيىء قدر

لكن ربنا برضه بيقولنا ناخد بالاسباب

يعنى شخص مسافر لدوله اول مره يروحها لا عارف نظمها و لا متعود على السواقه فيها يروح هو الى سايق العربيه و كمان بسرعه زايده

الاستهتار عند الناس وصل لمستويات غريبه

يا اخى انت مش هامك نفسك مش مشكله لكن الناس البريئه الى بتتاخد فى الرجليين دى ذنبها ايه

كتير بيخدوها باستهانه و قول يا باسط و يا سيدى احنا ماشيين فى حمى ربنا و خليها على البركه يا عم خليها على الله

و الى اخره من القاموس المستفذ دا