هي كلمة "عانس"....مين اخترعها...!!!!

[se_ Elsyed]

pharm

سبب عنوسه البنات اهليهم وهما دلوقت البنت مش عاوز تتعب نفسها عاوز تبقا اميرة وعندها قصر مش شقة وكمان احدث فرش فيها واجهزة وخدامة فلبينية

يا راجل حرام عليك .. بقى أحنا لسه بنتكلم على التابوهات

تقوم داخل رازعنا تابوه في وشنا وفاتحه عشر غرز كمان

مين قال لك إن الكل بيفكر في شقة في مارينا او شالية في مدينة نصر مع مايكرويف خمسه حصان ؟

أبداً ما بقاش يحصل .. بل بالعكس ... تسمع كتير جداً دلوقت عن الإكتفاء بدبلة خطوبة واحده للبنت .. ودبلة فضة بخمسة جيني للولد وعدى يا ليله

كما إن بصراحة موضوع الإيجار الجديد بالرغم مما فيه من مساويء اهمها الشعور الدائم بعدم الأستقرار والامان لإن العقد بيقى محدود المدة وغالباً بيبقى 3 سنين ..

إلا إنه حل مشاكل ناس كتير جداً والشباب في أول حياته ما بيبقاش حِمل تمليك أو حتى إيجار بمقدم ما بيقلش عن 50 الف ...

اما العفش فالموضوع برضوا أختلف ... يعني زمان اللي كان يتجوز من غير سفره كان ممكن يتسحل من باب الشعرية لحد ميدان التحرير ويتعلق في الفسقية اللي في النص ...

دلوقت الشباب الصغير وأنا منهم دماغه ما بقتش في الحاجات دي .. وما فيش أحسن من إفرش يا عم عالأرض وخلي البساط أحمدي ..

لان السفره جت وقعدت لحد ما حمضت وما فيش حتى حد معدي من الشارع جه حط عليها ساندوتش فول وأكله عشان يزفرها

لأ لأ ... أنا مش معاك إن البنت هي السبب أو أهلها هما السبب ... وقليل قوي لما تلاقي أهل البنت هما سبب تعاستها عشان بيشتددوا في مطالبهم المادية ... لإن بالعقل كده هما بيبصوا على إنهم هايبقوا مذنبين في حقها لو فاتها السن المناسب للجواز وفضلت قاعده عندهم

لكمن كل هذا لا يُعطينا الحق في الكروته وأول واحد يدق الباب نقول له شيل يابا الله يبارك لك !!!

أو إحنا كأهل البنت ما نسألش حتى عن حاجات بديهية كالسكن والأثاث وكده ونطمن .... وكله ده أوقات كتيره بيبقى

Minimum requirement

ولا عشان أبقى متساهل أبقى شايف بنتي في خطر ومنتظرها بهدله ما حصلتش وأقول لأ لأ أنا راجل فليكسابل ولارج خالص وإذهبي إلى الجحيم يا بنتي وربنا يسعدك ؟!!!!

[لماضة مصرية جدا]

فعلا يا جماعه الستات لا يمكن يطيقوا بعض ابدااااااااااااااااااااااااااااااااا ممكن يكون اصحاب اه ممكن يكونوا ام وبنت اه لكن يكون اتنين فى بيت واحد مش ممكن

سبب عنوسه البنات اهليهم وهما دلوقت البنت مش عاوز تتعب نفسها عاوز تبقا اميرة وعندها قصر مش شقة وكمان احدث فرش فيها واجهزة وخدامة فلبينية

على الفاضى اللى اخدت كليه فاكرة نفسها انها الخريجة الوحيدة وان اهلها صرفوا عليها وان اللى جاى متقدم لها درس مجانا منحة من الحكومة

يقدر حد يقولى بعد دا كله مين يتجوز ويقعد قدام ناس تقعد تتشرط عليه بالمنظر دا ؟؟؟؟؟؟؟

بسبب المهازل دى البنات بتعنس او كمان فيه مهم اللى بينحرف وتبقا يا بلحة يا مقمعه نفس الشى الشباب بينحرف مفيش حاجة اسمها يتفرج على فضائيات

يختاروا يبطلوا يتحشروا فى حياة الشباب هما مالهم اتجوزت ولا طلقت ولا خلفت ولا لا مجتمع مريض

السلام عليكم و رحمة الله و بركاته

استاذنا الفاضل

حضرتك انبارح كنت ضد المسمي نفسه....النهاردة حضرتك بتستخدمه و بشكل اكثر قسوة....يا تري انهي الاتجاهين بيعبر عن وجهة نظر حضرتك

مداخلة حضرتك في مجملها بتفكرني بتوبيك كان فتحه زميل لنا هنا في المنتدي اسمه "ازمة العته الاجتماعي" و فيه توبيك برضه تاني بتاع "مش هتجوز من غير النيش" حاجة زي كده....و اتكلم باستفاضة عن طقم الكوبايات و النيش و القايمة و الحاجات الكتير اللي للاسف بتبقي في واقعنا و بنشوف انها بتبوظ الجوازة

و رايي الشخصي......احنا مش عايزين نعترف من البداية ان الجوازة اصلا كانت بايظة

عشان مختارناش صح.....بس حبينا نجيبها ان لازم الطرف التاني مادي....او بيهتم بالقايمة و الشكليات علي حساب الرجولة

اللي بيختار صح و من بيت صح.......عمره ما بيتكلم في الحاجات دي

وقفة كده مع النفس.....و هتلاقي قبل ما بنحاسب الناس نحاسب نفسنا

اصل المجتمع اللي بتقول عليه حضرتك ده مريض...ده انا و حضرتك و اختي و اخويا و ابويا و امي....يعني مش ناس تانية منعرفهاش

و دي وجهة نظر

تحياتي

ع جنب بقي

انا بحب اوي فيلم " يا بلحة يا حلوة يا مقمعة".......فيلم عميق جدا....بس مالوش دعوة بفكرة المسمي اللي بنتكلم فيه و خاصة في وقتنا دلوقتي

و لا ايه راي حضرتك؟؟؟؟

[لماضة مصرية جدا]

Minimum requirement

السلام عليكم و رحمة الله و بركاته

استاذي الفاضل سين سين

مقدرشي اعلق علي ايتوها تنتوفة كلمة في كلام حضرتك لانك فعلا جبت من الاخر

حوارنا في حد ذاته...هو نوع من التوعية.....و الرفض لنمط ما

بس خلينا ناخد خطوة اوسع شوية

لما بنربي ولادنا.....يا تري بنربيهم ازاي.....انهم يبقي في السيف ساير و يبقي عندهم المينمم ريكوايرمنت...عشان يلاقوا ليهم مكان في المجتمع

و لا بنقولهم تمردوا.....و اكسروا القالب.....بس هنربيهم برضه ازاي انهم يتحملوا نتيجة قناعاتهم و اختياراتهم.....يمكن اللي تتشاف انها ضد التيار مثلا

و لا يفكروا يروحوا مكان تاني

و لا بنربيهم ازاي...!!!

يمكن تكون دي سكة مثلا

اما الجيل اللي مترباش.....(قصدي يعني ملحقشي جرعة التفكير دي من البداية)....

فاديه اهه قاعد يعافر....

يا اما بيحارب طواحين الهوا....

يا اما بيدور علي بلد تانية.....

يا اما هتبقي آخرته قالب.....

او الارجح...انه صنع عالم خاص به...مفرداته....مقتنع بها حد اليقين

تحياتي

محدش عارف

[se_ Elsyed]

ما خدتش بالي من الجُملة دي

بسبب المهازل دى البنات بتعنس او كمان فيه مهم اللى بينحرف وتبقا يا بلحة يا مقمعه

لأ يا فارم .... ده شيء في منتهى القسوة .. لإننا بنتكلم عن مشاكل إجتماعية ممكن نكون إحنا جزء منها ... :lol:

----------------

لما بنربي ولادنا.....يا تري بنربيهم ازاي.....انهم يبقي في السيف ساير و يبقي عندهم المينمم ريكوايرمنت...عشان يلاقوا ليهم مكان في المجتمع

و لا بنقولهم تمردوا.....و اكسروا القالب.....بس هنربيهم برضه ازاي انهم يتحملوا نتيجة قناعاتهم و اختياراتهم.....يمكن اللي تتشاف انها ضد التيار مثلا

شوفي يا ريهام

لو الإنسان حط في دماغه إنه متعلم ومثقف ومن الجيل الجديد الكول وبالتالي بابا وماما بقوا دقه قديمة .. ورأيي هو وبس اللي صح لإنه آب تو ديت ..

يبقى كده على رأي أخواننا الشوام " هايفوت في الحيط "

لأن في أمور كتيره في حياتنا ومنها امور الزواج بيبقى لازم يتبص لها من جميع الجوانب مش من الجانب العاطفي فقط

إنتي عارفه في أمثال شعبة بنقولها .. مثلاً زي " قبل ما تناسب حاسب .. وأختار لأبنك خال "

دي حقيقة ... وحقيقة لا يُمكن أن نتجاهلها أيضاً

أنا كولد مش هاروح أخد بنت من أهلها وأفصلها عنهم تماماً ... وأهلها لو مش كويسين فبالتأكيد ده شيء هايمسني ويمس أولادي كمان اللي دول اخوالهم وجدهم وجدتهم

شوفي بقى موقف الولد والبنت ... تلاقي الشعارات العاطفية طلعت من نوعية " عش العصفورة يكفينا ولقمة صغنونه تكفينا "

لإن العش واللقمة دي لو في ظروف محيطه صعبه ... فالعش هايبقى سجن واللقمه هاتبقى مرُه ومش بعيد يبقى فيها سم

التمرد يا ماما مش هدف في حد ذاته ....

لأ التمرد بيكون على ما هو تقليدي جدد وممكن يتجدد للأفضل والأحسن وبطريقة تدريجية غير صادمه ويا سلام لو كانت مدروسة

مين بقى بيحدد كده وإمتى وهل يا ترى صح ولا لأ ؟

ده موضوع كبير لكن في امور بديهيه خلينا نقول كده زي موضوع مثلاً قالب المصطلحات اللي بنتكلم فيه ده .. أو موضوع الفضولية المميته المنتشرة كثيراً في مجتمعنا واحياناً نمارسها نحن بدون أن نشعر ..

[Pharm]

انا مش مع اللقب خالص يا لماضة بس صدقينى الاهالى يفقعوا المرارة السليمة والبنات دلوقت لو لقيت البنت عدلة تلاقى اهلها زفت ولو عاندت معاهم

وقالت اخده يقولها احنا نعرف مصلحتك اكتر منك ويقعدوا يحطوا عقد الدنيا على الولد

اللى عاوز اقوله انى بكره القب دا بس احنا اللى بنصنعه بجهلنا وطلابتنا وتزمتنا ليه دلوقت نسبة الانحراف اعلى فى شباب ؟؟؟؟ عشان مفيش جواز والغرائز مكبوته لما

بتنفجر فى وجه المجتمع وفى الاخر يقولوا الله يرحم ويرحم ويبقوا هما سبب المصايب كلها

وصدقينى يا لماضة انا بتكلم من واقع حياة وقصص معاشة يعنى هقوالك سبب فشكلة جوازة بسيط جداااااااااااااااااااااااا واحد شاف واحدة وكله تمام والعملية كلها وقفت

لما مامتها عرفت ان الشقة فى الرابع ومفيش اسانسير يالهوىىىىىىىىىىىىى ازاى مفيش اسانسير لازم تركب اسانسير يقولها يا طنط هركبه على حسابى يعنى

تقوله ابداااا لازم اسانسير الواد قال روحت لسكان العمارة قالولى احنا مش هنركب دى عمارة جديدة وكلها 6 ادوار وفى الدور 8 شقق ومحدش عاوز اسانسير

رجع لحماته قالتله ماليش دعوة قالها خلاص غورى فى داهية واتفشكلت الجوازة

قصة تانية عشان موضوع العفشة والسيد ميقوليش انهم بيرضوا باى حاجة واحد صاحبى راجع من كندا قال اتجوز بنت بلادى المهم شافوله واحد كويسة طبعا اول

ما قال كندا افتكروا كم الفلوس اللى معاها بقا وبدولار كمان قالوا احنا عاوزين راجل ومش عارفين هنقدر ازاى على فراق بنتنا والحبشتكنات اللى انتوا عارفينها

قالوا شبكة قالى ماشى وقاعه قال تمام قالوا وكمان تجيب شقة وعفشة وتفرشهم هنا فى مصر وفى منطقة كذا قالهم لا انا اجيب ليه وافرش هنا واسيبهم ومشى وانا

هروح هناك افرش شقة تانى كدا حرام قالوا لالالالالا

الواد راجع كاره بنت بلاده وسافر واتجوز واحدة دكتورة هنا اصلها سورى وشوفوا انتوا بقا الجمال السورى ومبسووط وفرحه كان الشهر اللى فات وكانت معاه واحدة بواحدة

واهلها فارحنين وطيرين بيه لانه راجل شرقى مش اجنبى

ولو تحبوا قصص كتير موجودة لتعنت الاهل وطلباتهم اللى تكرهك فى الجواز وسيرته

انا فاكر برضه مرة يا لماضة شوفت الفيلم دا ومش فاكر منه غير موقف البلطلة وهى بترمى نفسها من فوق الكوبرى ههههههههههههههه

سامحونى انا مش بتحامل على حد لانى عايش مشكلة البحث عن عروسة ههههههههههههههه وشكلى كدا اختار الصالح وابقا عازب احسن

[hanzalah]

الافاضل

الظروف تغيرت بشكل متسارع جدا في الدنيا كلها وليس في مصر فقط

فافرزت لينا انماط سلوك او مواقف جديدة علينا .. لم نكتب الاجابات على كل اسئلة بعد

لأن اغلب الاسئلة من خارج المنهج .. اقصد غير متعودين عليها ..

مثال ..

مين عنده استعداد يزوج بنته لعريس جاي اجازه (زي فيلم جاي ف السريع)

طب مين مستعده تاخد عريس بالمواصفات دي !!

تعرفه اسبوع ثم تصبح زوجته !!

وعلى الجانب الآخر

مين مستعد ياخد عروسه جاوزت الثلاثين في حين ان الاختيار من السن الاصغر متاح !!

وفي الحاليتن لا يعرف دي ولا دي .. بس في فترة الخطوبة هيعرف ..

طب الشاب المقبل على الزواج .. ممكن يكون عنده اربعين سنة ولم يتزوج .. فهل سيجد كثيرات يقبلن به ..

طب بشكل عملي براجماتي بحت ..

مين مستعد يتزوج من على النت

طب يتزوج من ترشيح اخته او امه

طب يتزوج جواز صالونات .. و عزومه في فرح او في بيت واحد صاحبي

مين بيرفض - من الرجال - الزواج إلا من اسرة يعرفها جيدا

طب نسبة الرجل الاول كام الى نسبة الرجل الثاني

اخواني

اخواتي

دي كانت مجرد صورة مقربة .. مكبرة .. مصفحة .. من الميكروسكوب الفضائي .. لمخ العبد لله ..

والى حلقة قادمة

مصطفى محود

:lol:

متزوج ... بالصدفة !!

[shiko]

...عزيزى س س (صاحب المشاعر الانسانية ):blush2:

لماضة ....(صاحبة الحواربلا نهاية ....)

انساتى ....سادتى .....

يشرفنى ان اعلنها صراحة ....

انا ....

ع.....ا...ن......س

ماتيجى نفسر كلمة عانس

ع ....عزيمة

ا......انسانة

ن.....نتمنى لها ان تكون

س.....سعيدة

ايوة انا عانس ....بس موش مكسوفة من الكلمة ولا متضايقة ...

عانس موش سكينة محطوطة على رقابتى ...وبتدبح فية .....

انا مرنت نفسى ...اسمعها ..وكمان ارددها بين الناس من غير ما اخجل ....

تعالوا نواجه بيها اصحاب الشفاه الممصوصة ...

طب وايه ياعنى ....

ما المعوق مثلا بيسمع ..كلمة عاجز او معوق او ذو احتياجات ...طول النهار

المطلقة بتسمع ديفورسد....او منفصلة ....

المدام بتسمع الحاجة او الست ....او حتى الهانم ....

الانسة ...ممكن تمرن نفسها تسمع عانس ....

نسمعها بلا قلب يرتجف من الخوف ....بلا خجل ....

عانس موش مجرد...حروف التقت لتكون حالة اجتماعية ...

عانس موش جرح ...ولا اهانة ....

من الاخر عانس ....موش شتيمة ....

صدقونى

تعالوا نواجه المجتمع بالكلمة ...على انها موش حاجة تكسف ...

حاجة ماتجرحش ...جربى تسمعيها وتبتسمى ....

تعالوا نطلق ...حملة انا عانس ...انا انسان ...

أو خليها عانس بلا خجل ....

تيمكن ييجى اليوم اللى نطالب بحقوق المواطنة لكل عانس على ارض ذلك الوطن الذكورى...

ذلك الوطن العربى الذى وضع قالب انثوى للعنوسة ...

وولحديث بقية

==================================================

من كواليس العنوسة

طب بس شوفيه (وش واحدة جاية عريس هربان من الحرب )

موش تشدى حيلك ..بقى علشان نفرح بيكى ؟؟(وش واحدة الشماتة طاقة من عنيها )

انتى موش متجوزة ليه ...؟؟اشوفلك عريس ؟؟(وش واحد بيستهبل)

ياختى بلا هم ....انتى كده اريح (وش واحدة مضروبة بنية )

تم تعديل 14 يوليو 2010 بواسطة shiko