المنتظريين مقابلات كيبيك 9-2010

[المتنبى]

محمد كيبيك أنا باعت في شهر 5 2010 و وصل بعدها ب4 أيام على فيديكس والفايل نمبر بعدها ب 29 يوم تقريبا

[المتنبى]

في واحد يا جماعة فايل نمبر شهر ابريل 2010 جاله مقابلته في سوريا 8/2 من الكويت

ربنا يستر على اللي من مصر

أنا خايف جدا من موضوع سفر سوريا ده

أجازة من الشغل و مصاريف تانية

أدعولنا

[fizo]

مساء الخير على كل الموجودين اللى فى المنتدى الجميل ده

بجد الله ينور على روح المحبة اللى موجودة فى المنتدى واحب اعرفكو بنفسى انا فيزو من اسكندرية محاسب مقدم من نص شهر 6 تقريبا واستلمت الفيل نمبر على اخر 7 تقريبا برده واحب اشارك معاكو فى المنتى الجميل ده

[HANYVERY]

مساء الخير

أطيب أمنياتى مع نهاية عام 2010 وبداية عام جديد 2011

وتمنياتى لجميع المنتظرين المقابلات بالنجاح

كنت عاوز أسأل لو حد يعرف رابط كويس لكتاب يساعد فى حفظ كلمات الفرنساوى

وأيضا ال grameer ولو أمكن كتاب باشريل PDF يكون كويس

أشكركم

الاخ العزيز اللينك ده هتلاقى فيه حاجات حلوه قوى http://dvd4arab.maktoob.com/showthread.php?t=1306466

بس الكتاب اللى انت عايزهBescherelle مش بيفتح PDF لازم تحمل برنامج DjVu DOCUMENT عشان تقدر تفتحه

ربنا معاك

[kareemabdou]

بونجور يا اهل كيبيك

سرد المقابلة كريم عبدو ديسمبر ‏2010‏‏-‏12‏‏-‏14‏

سن تحت 35

تعليم ليسانس اداب مفيش درجات زياده

اعزب

اولا شديت الرحال من بلاد الشمس التى لا تغيب عن ارضها ابدا الى بلاد الشمس التى لا تظهر ابد

وده كان يوم السبت الموافق الموافق 12-12 -‏2010‏‏‏

من محطة قطار اسوان

الى محطة قطار الاسكندرية الجميلة

بمجرد وصولى الى الاسكندرية كانت لهجة الترحيب شديدة شوية

امطار غزيرة و ثلوج شديده فى عز الظهر و كان هذا بالنسبه لى شىء غريب و ممتع فى نفس الوقت لانى مش متعود على الالعاب المائية فى اسوان بس من الواضح ان اهل البلد مكنوش مبسوطين بالالعاب المائية

لقيت خناقة كبيرة اتنين مع سواق تاكس و انا لسه بقول يا هادى من باب المحطة المهم كنت متضطر لانى اسرع علشان هدومى مكانتش ملائمة للجو الغير معتاد ده وكالعادة اتصل بيا صحابى الاسكندرانية و سمعونى الموشح بتاع كل سفرية انى فقر ودايما الجو بيقلب بمجرد وصولى هناك والصراحة ده حيقيقى ومش عارفله تفسير لغاية دلوقتى طبعا لو فى الشتا امطار و ثلوج و لو فى الصيف موجات حاره و انا ايه و لا ياثر فيا ابدا الكلام ده ولا يحرك ساكن ومازلت متفائل من اسكندرية لانها بجد بلد جميله و يا بخت اهلها بيها

المهم وصلت الفندق ورفضت رفضا تاما انى انزل عند حد من قرايبى او انزل فى شقتنا اللى فى لوران لان الفندق قريب جدا من السنتر بينى و بين السنتر حوالى دقيقة واحده مشى

بصراحة الفندق ممكن نقول عليه انه غير ادامى بالمرة

بس كان فيه ميزتين مهمين جدا جدا

الاول طبعا قربه الشديد من السنتر و دى مش مبالغه ده بجد دقيقة واحده مشى وهو اقرب فندق حتى الان للسنتر

الميزه التانية ان الناس اللى شغالين فى الفندق قمة فى الاخلاق و قمة فى الطيبة بجد غلبوا اهل اسوان فى الطيبة و السماحة و الاكثر من كده انهم قمة فى الامانه

لدرجة انى كنت بسيب اللاب توب و كل فلوسى فى الاوضه و ارجع

الاقى كل حاجة زى مهيا و الاوضه مترتبة و نضيفه لانى بصراحة انا مهمل فى حاجتى بشكل كبير انا عبارة عن مثال سىء للشاب العازب ايام (سوده مستنياكى منى يا كندا)

المهم ان الايام اللى قبل المقابلة هى اصعب ايام ممكن تمر بيها فى حياتك بس بمجرد انك تعمل المقابلة حتحس ان كان مبالغ فيها جدا

ممكن الصبح اكون حاسس انى حنجح بسبة 100% و بعدها بساعة واحده

احس انى مش نافع و انى مرفوض مرفوض

المهم الحالة اللى استقريت عليها صباح الامتحان انى ساقط ساقط و ان مقابلتى حتكون مع ميلانى على حسب الاشاعة المنتشرة ان مسيو بول مسافر و مش موجود ياستمرار فى السنتر

وانا طبعا مبسبش حقى ابدا انا داخل على اساس انى حتخانق مع ميلانى لانى متعبش سنه كامله واهرى نفسى مذاكره و اتطحن وفى الاخر فوت علينا السنه اللى جاية

ليله الامتحان مجنيش نوم واحنا لسه فى اول يوم كانت عبارة عن اسود ليلة مريت فيها بحياتى شباب من شباب اسكندرية الهايفين كانوا بيهزروا مع بعض فى الشارع و بيقلدوا اصوات الكلاب و القطط سمعت النا الاصوات دى جانى فزع وروحت فقت على طول و فضلت قاعد من غير نوم من 5،1 بليل لغاية معاد المقابلة وانا القلق و قلة النوم حيموتونى لانى قبلها كنت سامع كلمتين من شخص دمرونى نفسيا الشخص ده قالى ايه قبل الامتحان بأقل من 15 ساعة قالى انت حافظ مش فاهم

علشان كده يا جماعة انا بنصحكم ان قبل الامتحان مش اقل من 10 ايام ممتتعاملوش مع اى حد ليه علاقة بموضوع الهجرة

المهم كل اللى كان بيدور فى دماغى انى ساقط و ازاى انى اخرج باقل الخساير يعنى لو اتقالى انت مش مقبول احاول انى اساوم على تى سى اف

ولو قالتلى عايزه تى سى اف احاول اساوم على النجاح بدونها

لكن ارادة ربنا فوق كل شىء و دعواتكم كانت وصلانى و كنت حاسس بيها جدا

المهم من كتر السهر و الانتظار فى الفندق مليت قولت اروح السنتر و افضل قاعد هناك لغاية مربنا يسهلها روحوت قبل معادى بساعة الا ربع

وصلت ولقيت بنتين حلوين من كتاكيت اسكندرية عمرهم ميتعداش 23 سنه

و بعد خمس دقايق يدخل علينا واحد شيك جدا و لابس حته بدله فعلا باين انها مصروف عليها وانها بنت اجانب مش زى بدلتى اللى كان باين عليها قسوة الزمان وشقاء البلد نده على واحده منهم و اخدت ورقها وراحت معاه

وسألت زميلتها اللى هى المفروض انها عملت المقابلة من سنه

عن مسيو بول وبصراحة كانت ودوده جدا و قعدت تهدينى جدا وقالتلى انى مخفش ومقلقش من اى حاجة بجد ربنا يباركلها و يديها عريس اسمر و طويل

المهم بعد شوية دخل واحد و مراته كان معادهم فى نفس معادى وقعدوا معانا فى غرفة الانتظار الراجل بصراحة كان بيحاول انه يكون ظريف بس للاسف كان فاشل جدا و كتر خير مراته بجد كتر الف خيرها و ربنا يعنها على الابتلاء العظيم ده

بعد حوالى 10 دقايق جت ميلانى الجبارة وطلت علينا بطلتها البهية اللى يشوفها يقول عليها انها فرنساوية على طول طويله جميله رفيعه و عنيها زرقة

بس الحلو ميكملش عبارة عن جهاز مخابرات متحرك جت و سالت على الراجل وجوزها اللى لسه داخلين علشان يعملوا المقابلة وقعده تبص فى وش الاتنين بطريقة غريبة بس اللى استنتجته انها بتحاول تتأكد انهم هما اللى فى الصور اللى معاها و لا لأ واخدتهم وراحت بيهم على غرفة المقابلات او الاعدام المسمى واحد

بس بجد ميلانى دى عملت فيا جميل مش حنساه طول حياتى انها خلصتنى من الراجل الذيذ ده لانى شوية وكنت حمشى و اسيب السنتر بسببه

وبعد حوالى ربع ساعة لقيت البنت اللى كانت بتعمل المقابلة طايرة من الفرحة و صحبتها بتباركلها وعامله تشكر فى مسيو بول وتقول وتعيد

واخدوا بعضهم و مشيوا

وقعد لوحدى فى غرفة الانتظار و انا بدعى انه يكون مسيو بول لانى مش مستحمل

المهم بعد ربع ساعه دخل مسيو بول وسال كريم ابدوا ورحت قلت وى مسيو وقعد يقولى بوغ كوغ موغ طبعا انا اللى استنتجته انه بيقولى تعالى ورايا علشان المقابله هو وشه مكنش بيضحك اوى بس كان واضح عليه انه طيب ودخلنا غرفة المقابله و سلمت على المترجمة اللى هى كانت شبه بنت خالتى بدرجة غريبه وقالتى اتفضل اقعد وروحت سايب الكرسى اللى قالى عليه وقعدت على الكرسى التانى كعادتى لما بتوتر بعمل حاجات غريبه

وراح قايل الكلام اللى بيقلوه بالفرنساوى المترجة وراه بترجملى عربى

وانا عمال اهز فى راسى زى اللعب اللى بيحطوها فى تابلوهات العربيات و تقعد تتهز مع المطبات المهم خلصوا المقدمة و قالى احنا حنتكلم مع بعض فرناوى علشان نقيم مستواك

الباسبور سيلفو بليه

لا فولا مسيو

وقالى انت ساكن فى نفس العنوان ده

قلتله ايوه مع علتك قولتله اه بس مش كلهم و ذكرتله مين وراح الحديث اخد جانب تانى خالص غير متوقع اتفتح موضوع المشكله انه شخصى و مينفعش انى احكيه بس بجد سألنى عن حاجات اقرب الناس ليا ممكن متحسش بيها و اللى قال ان الاجانب دول باردين ومعندهمش احساس طلع غلطان ومبيفهمش حاجة لانى فعلا حسيت انه تعاطف معايا جدا و اتاكدت انى ناجح

راح بعدها سألنى عن التامينات الاجتماعية ورتهاله مبصش فيها دقيقة و ادهالى و المترجمة ترجمتله كل المكتوب فيه بسرعة شديده ورجع يكتب على اللاب توب سألنى عن شهادة الكلية وريتهاله و بسرعه المترجمة ترجمتها و سالنى عن الشهاده الكرتون اديتهاله المهم انه مكنش بيسأل عن اى معلومات فى الورق مجرد يبص فيه وريرجع يدهونى

تانى

سالنى انت عايز تسافر ليه

طبعا كنت حافظ اكتر من سبب طبعا انتو عارفين الاسباب اللى كلنا بنحفظها اللى فى كل الورق واللى مع كل الناس

ونصيحة تانى حاول تكون الاسباب حقيقية انت اللى كاتبها و يا سلام لو كانت بنفس اسلوبك يبقى كده تمام التمام

قولته انى عايز اسافر لانى بحب الثقافة الفرنسية و الحياة على الطريقة الفرنسيةبس حسيت انه سمع الكلام ده كتير رحت مغير على السبب الحقيقى للسفر ان مفيش شغل فى تخصصى كتير و انى حتى لو لقيت شغل المرتب مش حيكفى ليوم 10 فى الشهر راح قايلى ازاى مفيش شغل فى مصر كل دى اطفال و مش حتلاقى شغل فى مجال التدريس روحت قولتله ان الشغل مش ثابت و ان التدريس خارج المدرسه غير قانونى طبعا اقصد الدروس الخصوصية راح قايلى ان المرتب بتاع المدرس كان قولتله انه بين 300 جنية ل 450 جنية مصرى بالنسبه للسنه الاولى و اعتقد انه اقتنع بكلامى

بس الللى عايز اقولهلكم انه راجل عسل و كان دايما بياخد الكلام من على لسانى او يعيد صياغته تانى و كانه بيقولى متخفش انا عايزك تتكلم

مقابلتى كانت حوالى 35 دقيقة بالتمام و الكمال نصها كتابه على اللاب توب و النص التانى مقسوم على تلاته بينى و بينه و بين المترجمة

بعدها قالى انت كلمنى عن اسوان بالانجليزى

بس بجد فى الحته دى انا احتقرت نفسى جدا تخيلوا واحد معاه ليسانس اداب انجليزى و طول النهار و الليل بتكلم مع الزباين فى الشغل انجليزى و مش عارف اقول اربع جمل عن المزارات السياحية فى اسوان بس هو بصراحة قالى متقلقش انا متفهم ده بجد الفرنساوى ده غريب ده بيمسح مسح

ورجعنا تانى للفرنسيه و سألنى اتعلمت الفرنسيه فين

وقولتله الجمله المشهورة بتاعة ابو سمرة الله يمسية بالخير

انا اتعلمت فى الثانوى و ان درجاتى كانت حلوه جدا فيه بص حضرتك شهادة الثانوية العامة

راح بصلى كده بابتسامه خفيفه و كأنه عايز يقولى انت بتعمل ايه انا يبنى حنجحك كده كده

و سالنى بعد كده عن معادلتى وكان يقصد الجزء الخاص بمزاولة المهنه وريتله الايميل اللى بعته لوزارة التربية و التعليم هناك وخطوات الحصول على رخصة مزاولت المهنه

بعدها مضانى على ورقة بتقول انى عارف ان معادلة التدريس صعبة و كده

وقالى انت مضيت على ورقة الفالير دى كبيك وورقة حساب البنك وانا مش بعمل حاجة غير بهز فى راسى و خلاص

وقالى مبروك فوزت اكسبتيه و المترجمة كل كلمة بترجمه بصراحه انا مصدقتش مع انى كنت حاسس انه حينجحنى وروحت وقفت زى الشاطر وسلمت عليه وقولتله ثانك يو راح بصيصلى حتة بصه روحت قاعد على طول وقعد يكلمنى و يقولى انت ممكن تتعلم فرنساوى فى مصر و احنا حنديك تمن الكورس بس فى مراكز معتمده فى مصر و انى بعد شهر من دلوقتى اقدر اتابع كورس لتعليم الفرنساوى على النت على موقع معين ليهم

وانى دلوقتى انا بقيت زى زيه وراح قايم وفتحلى الباب وانا لميت كراكيبى و قمت مشيت و لغاية دلوقتى مش مصدق اللى حصل

ا

[محمد كيبيك]

الف مبروك يا كريم و عقبال لما تحصل حسام يوسف انت بتقول انك عازب يا ترى كتبت اد اية فى الاقرار المالى

[منتال]

كنت كاتب مستوى كام يا كريم في اللغه الفرنسية

[veto]

ياريت اعرف عنوان وزارة التربية والتعليم؟؟؟؟؟؟؟؟؟؟؟؟؟؟؟؟؟؟؟؟؟؟

[Saint Laurent]

Karim..

Congratulations..I am so happy for you. :)

I really enjoyed the way you narrate your interview :)

Congratulations..we Rabena yekhamel lel akher 3ala kheir :)

[د بطوط]

الف مبروووووووووووووووووووووووووووووووووووووووووووووووووووووووك يا كريم عقبال الفيزا

احلى نهايه لاحلى ليسته ربنا معاك فى بقيت المشوار و ابقى ادعيلنا

[mikymano]

:clappingrose:الف الف مبروك يا كريم وعقبال الفيزا و عايز اشكرك علي طريقتك المضحكه في سرد المقابله بس ليا استفسار

كنت كاتب مستوي كام E , و مستوي كام F

و لو سمحت عايز اعرف عنوان وزاره التربيه و التعليم في كيبيك الي انت راسلتهم لان المدام عندي نفس التخصص بتاعك:):)

[veto]

[size="7"]يا ريت يا mikymano .انا عايز اعرف معلومات عن تربية انجليزى

e. mail النقابة ؟وكيفية تصريح العمل.......................

الف مبروك يا كريمممممممممممممممممممممممممممممممممممممممممم

[Mina Adly]

الف مليون مبروك يا كريم ... بصراحة طريقة جميلة جدا لسرد المقابلة.. ربنا يكون معاك فى الميديكال و الفيزا

[محمد كيبيك]

مساء الخير على كل الموجودين اللى فى المنتدى الجميل ده

بجد الله ينور على روح المحبة اللى موجودة فى المنتدى واحب اعرفكو بنفسى انا فيزو من اسكندرية محاسب مقدم من نص شهر 6 تقريبا واستلمت الفيل نمبر على اخر 7 تقريبا برده واحب اشارك معاكو فى المنتى الجميل ده

اهلا و سهلا بيك يا اخ فيزو منور المحاورات ممكن تقولى على تاريخ الفايل نمبر بتاعك كان امتى بالضبط لان الفايل نمبر بتاعى كان بتاريخ 4 اغسطس الماضى فممكن انا و انت تكون مقابلاتنا قريبة من بعض و يا ترى انت جالك جواب ويتنج ولا لا

[maklool]

[2011

1-فريند 11/2009

2-جرجس رفعت 1/2010

3-هاني دلت 1/2010

4-هاني فري 3/2010

5-ماريان 3/2010

6-فيتو 3/2010

7-مينا عدلي 4/2010

8-سانت لورينت 4/2010

9-فيلومينا 4/2010

10-ميكي مانو 4/2010

11-مستر بيكو 4/2010

12-د\بطوط 6/2010

13-محمد كيبك 7/2010

14-انفوايير 7/2010

15-محمد عاطف 8/2010

ربنا معاكو كلكم ونسمع عنكم كل خير انا معاكم بردة علشان انا اللي هعملكم لستة مواعييد المقابلة

ممكن تضيفونى معاكوأنا أسمى مايكل تاريخ ارسال الفايل6 / 6 /2010 والفايل نمبر كان 12/7/2010

تم تعديل 17 ديسمبر 2010 بواسطة maklool

[fizo]

مساء الخير على كل الموجودين اللى فى المنتدى الجميل ده

بجد الله ينور على روح المحبة اللى موجودة فى المنتدى واحب اعرفكو بنفسى انا فيزو من اسكندرية محاسب مقدم من نص شهر 6 تقريبا واستلمت الفيل نمبر على اخر 7 تقريبا برده واحب اشارك معاكو فى المنتى الجميل ده

اهلا و سهلا بيك يا اخ فيزو منور المحاورات ممكن تقولى على تاريخ الفايل نمبر بتاعك كان امتى بالضبط لان الفايل نمبر بتاعى كان بتاريخ 4 اغسطس الماضى فممكن انا و انت تكون مقابلاتنا قريبة من بعض و يا ترى انت جالك جواب ويتنج ولا لا

[fizo]

هو الجواب يا استاذ محمد جالى بالظبط بتاريخ 4 /8 بس تاريخ فتح الملف 20/7 زى ما هو مكتوب فى الجواب ولسة لحد دلوقتى ماجانيش وييتنج ......وربنا يوفق الجميع

تم تعديل 17 ديسمبر 2010 بواسطة fizo

[DrEhab]

وقالى مبروك فوزت اكسبتيه و المترجمة كل كلمة بترجمه بصراحه انا مصدقتش مع انى كنت حاسس انه حينجحنى وروحت وقفت زى الشاطر وسلمت عليه وقولتله ثانك يو راح بصيصلى حتة بصه روحت قاعد على طول وقعد يكلمنى و يقولى انت ممكن تتعلم فرنساوى فى مصر و احنا حنديك تمن الكورس بس فى مراكز معتمده فى مصر و انى بعد شهر من دلوقتى اقدر اتابع كورس لتعليم الفرنساوى على النت على موقع معين ليهم

وانى دلوقتى انا بقيت زى زيه وراح قايم وفتحلى الباب وانا لميت كراكيبى و قمت مشيت و لغاية دلوقتى مش مصدق اللى حصل

عسلللللللل يا كريم من احلى المقابلات اللى قريتها فى حياتى .... الف مبروك يا جميل

[amirmorkos]

مبرووووووووووووووووووووك لأهل أسوان,

مبرووووووووووووووووووووووك يا كريم.

[mr beko]

الف الف مبروك ياكريم

عقبال باقي المشوار

الواحد لما قراء كلامك حس انه لسة في امل فينا

:wavinghappy:

تم تعديل 18 ديسمبر 2010 بواسطة mr beko