المنتظريين مقابلات كيبيك 9-2010

[توتا عماد]

ازيك يا روك انت فين بقالك فترة مشعرفين ايه اخبارك يا ترى مقابلتك امتى ياريت تطمنا

[اغابي]

ازيك يا توتا انت خلاص مقابلتك 3\10

هانت ربنا معاكى هو التوبيك داه وشه حلو على الكل

ابقو طمنونى يا جماعة عليكم

فيش اخبار كمان عن جانو

جوو حد يعرف عمل ايه او امتى مقابلته

اغابي

:roseop:

[jonathan]

الف مبروك يا صموئيل و عقبال الفيدرال ...ممكن بردة تحكيلنا ليه اختك متوفقتش :sad: ؟؟

[harveyhanna]

شكرا ليكم يا جماع

الست راشيل دى بقى زى العسل و انا ما شفتش حد محترم و بيتكلم فرنساوى بالراااااااااااااحة كده

المهم انا رجعت و معايا الغالية

اما بالنسبة لاختى فلم توفق

تحياتى لكم جميعا

و كالعاده اللى عنده سؤال يتفضل على الخاص

بس فى الحقيقة المقابلة كانت عادية جدا و اهتمامها الاول و الاخير بعملك فقط

انا مدير مالى

تحياتى لكم و شكر خاص للدكتور إيهاب

شد حيلك يا دكتور عايزين نعمل توبيك جديد لتابعة الناس فى الفيدرال

الف مبروك يا صامويل و عقبال ماتيوس

تم تعديل 27 سبتمبر 2010 بواسطة harveyhanna

[harveyhanna]

صباح الفل

المقابلة

اولا طبعا انا و زوجتى روحنا سوريا من يوم الجمعة و مقابلتنا كانت الاحد

علشان نتأقلم على المكان زى ما الكل نصحونا و اول ما وصلنا دخلنا نمنا و صحينا بعد اربع ساعات

بصيت لمراتى و قولتلها ده لازم المكان هو الى يتأقلم علينا مش العكس

المهم روحنا السفارة قبل ميعادنا و قعدنا مستنيين و كان فيه اتنين بيمتحنوا سيدة فى الخمسينات و رجل اسمر طول بعرض

المهم لما جه دورنا كان الراجل الاسمر قالنا اتفضلوا دخلنا

طبعا الدباجة المعروفة و قالنا محدش يتكلم فى دور التانى

سألنى انت جيت ازاى قولتله بالطيارة

قالى الباسبورات اديته الباسبورات قالى انت ساكن فين فى الكويت قلتله قالى دى بعيد عن العاصمة قلتله لا الكويت بلد صغيرة

قالى داكور

قالى قسيمة الجواز اديتهالوا قراها

و بعدين قالى شهادة الكلية اديتهاله قعد يقلب فيها و هو بيقلب قالى انت اتعلمت فرنساوى ازاى

قلتله انا كنت فى ابتدائى فى مدرسة فرنساوى و كانت لغة اولى و اديته شهادة من المدرسة بص فيها و رجعها و هز راسه علشان اكمل قلتله درست كمان فى ثانوى و بعد ما سفرت كنت بدرس مع مدرس على الانترنت و كمان فى مواقع زى

France interactife , france2000 , le Qatar

و قلتله انى اشتريت كورسات المعهد الفرنسى من مصر و ذاكرتهم ووريته الكورسات قاللى هاتهم قلب فيهم شوية و رجعهم

قاللى معاك شهادة قلتله لا لان مفيش معهد ثقافى فى الكويت فدور على الجهاز عنده و هز دماغه

و فجأة فلب انجليزى و قالى انت ليه عايز تروح كيبيك و مش اى حته تانى

طبعا انى اقلب انجليزى كان دمار كلمة انجليزى و تلاتة فرنساوى مع انى بتكلم انجليزى حلو جدا

علشان انا مهنتى مش مطلوبة فى كندا لكن بالعكس مطلوبة جدا فى كيبيك و انا نفسى جدا جدا اشتغل فى مهنتى كطبيب بيطرى و للاسف فى مصر و الكويت المهنة ملهاش اى اهتمام و مرتباتها ضعيفة جدا

قالى و مين قالك انها مطلوبه فى كيبيك طلعتله ورق من امبلوا كيبيك الى بيثبت ده و قلتله دى كمان عروض عمل كطبيب بيطرى من كام يوم بس و دى عروض كمساعد طبيب بيطرى لغاية ما اخلص المعادلة

قاللى و المعادلة دى ازاى ؟ لسه هتكلم انجليزى صعبت عليه و قاللى فرنساوى رحت قلتله خطوات المعادلة

قالى هتعمل المعادلة فين

قولتله جامعة موريال كلية الطب البيطرى

قالى طيب و لو مالقتش كطبيب او مساعد هتعمل ايه قلتله هشتغل فى اى مجال لغايه ما اجد فرصة كويسة

قالى هتدور ازاى رحت قايله كل طرق البحث عن وظايف لغاية ما قلت جملة ( عناوين الشركات و المزارع ) قالى مزارع ؟؟؟؟؟؟؟؟؟؟

و مسك الابليكاشن و قلب فيه و قاللى انت هتستقر فين فى كيبيك قولتله كيبيك سيتى قاللى اه

بس اشمعنى قولتله علشان مجالى هناك اكتر من موريال و اسعار السكن اقل راح قاللى عرفت منين اسعار السكن ؟

رحت مطلع عروض سكن و قلتله من على النت و انا هحجز واحدة قبل ما اسافر اخدهم و قاللى اسعار الشقق كام يعنى ؟

قلتله من 450 لغايه 1200 دولار كندى لكن انا الاول هحجز شقه مش غاليه قاللى داكور

راح بصلى و قاللى انت تعرف فى كام ساكن فى كيبيك سيتى قلتله حوالى 800.000

قاللى و نسبة البطالة قلتله 8% قاللى فى كيبيك سيتى ؟

قلتله لا فى كل كيبيك قالى لأ انا عايز كيبيك سيتى

قلتله بصراحة معرفش ؟ قاللى داكور انت كدة خلصت مقابلتك و هبتدى مقابلة المدام

قالها سكنة فين قالتله الكويت قالها العنوان قالتهولوا

قالها شغاله فين قالتله

قالها فين الشهادة بتاعة الكلية اديتهالو

سكت و قالها دى المؤقتة راحت مطالعاله الدايمة ( الكرتونية ) بس مش مترجمة

قالها فين الترجمة قالتله ماترجمتهاش راح بصيلنا و قالينا اوه و راح قام صورها و تقريبا خلى حد يقرهاله

رجع قالها عندك كام سنة ؟ قالتله

قالنا اتوا كدة مقابلتكوا خلصت و دلوقتى هحسب الدرجات بتاعتكوا و هنعرف موقفكوا

قعد يحسب و بعدين قالنا انتوا مقبولين مبروك

Bienvenue au quebec

و طبعلنا السى اس كيو و شرحلنا كل جزء فيها و ازاى نقدم فيدرال

و فى الحقيقة كان راجل محترم و هادى و هو كان جد جدا فى المقابلة علشان ده شغله لكن فى الحقيقة انا احترمته جدا جدا لانه بعد ما خلص الشغل قعد يضحك معانا و هو بيطبع السى اس كيو و كأنه واحد تانى خالص و لأول مرة افهم عمليا يعنى ايه الشغل شغل و لازم الواحد يفصل بين شغله و طبيعته لانه هو فى الواقع بشوش جدا

و ده اول درس اتعلمناه قبل مانسافر يعنى ايه نشتغل بجد و بشوشين و اجتماعيين فى نفس الوقت

بدون اى مجاملة لاحد فى العمل

و بايين احنا لسة هنتعلم حاجات كتير قوى

و قالنا شدوا حيلكوا لما تروحوا هناك

و احنا كنا طايرين من الفرحة

عقبالكوا كلكم

و نصيحة اخوية للسة ماعملوش انترفيو هناك خليك صريح جدا حتى لو الى بتقوله مش حلو فى حقك هو هيحترمك

اعرف انت عايز ايه كويس و لما تقتنع بأهدافك هو هيحس ان ليك هدف

انا لا قلت رعاية صحية و لا تعليم طبعا دى كلها مزايا بس انا قلت الحقيقة انى عايز اروح علشان الاقى حد يقدر عملى

و كل واحد له اسبابه الخاصه الى حتى لو مادية هى بتفضل اسبابه و هو مش هيعترض لانك حر فى اهدافك

بس اهم حاجة يبقى ليك هدف بتحارب علشانه

و شكرا ليكوا كلكوا

الف مبروك يا دكتور رؤوف

[malekmalooka]

الفففففففففففففففففففففف مبروك دكتور رؤوف و دكتور سيد و صمؤيل ربنا يكملكم باقي المشوار على خير

[malekmalooka]

انا بجد بشكر كل الناس اللي باركتلي واللي شجعوني وربنا يكرموا اجمعين و تبقى برده كلنا في كيبيك مع بعض زي ما بدأنا كلنا من هنا مع بعض

[بيبو كندا]

الف مبرووووووووووووووووووووووك دكتور رؤوف

المقابلة بتاعتى

بالطبع تقريبا انا و المدام ما نمناش ليلة المقابلة

و السفارة تبعد عن بيتى حوالى ربع ساعة بالسيارة وكان معادى 9.30 صباحا

المهم من التوتر نزلت وصلت بنتى لبص المدرسة الساعة 6.45

و مش عارف اعمل ايه؟؟؟؟؟:rolleyes: قعدت اشرب قهوة و انا بترعش

و بقول يا واد اجمد انت يعنى هتكون احسن من اختك يعنى و موضوع عدم الموافقة على اختى خلى اعصابى زفت:sad: طبعا

المهم بتصل بمراتى و انا على القهوة اللى جنب البيت الساعة 7.25 لقيتها جاهزة على غير العادة انتم عارفين بقى الستات

المهم اتفقنا نتحرك و الوقت الزيادة فى مصلحتنا رحنا واخدين تاكسى للسفارة علشان ما فيش ركنة للعربية هناك و شاعتها هتكون نقمة مش نعمة يعنى هلوص بالعربية و مش هعرف اركنها

بمهم وصلنا السفارة و كانوا لسه بيمسحوا و بينضفوا لقيت منظرنا وحش قوى:blink: رحنا الكنيسة اللى جنب السفارة اهو نصلى يمكن ربنا يقف معانا

دخلنا السفارة حوالى 8.45 و كان اللى قبلنا جوة شايفين جزء منهم من الباب ايديهم و ما بيطلعوا الورق و مراتى عاملة كإنها داخلة امتحان ثانوية عامة معاها كشكول و عمالة تراجع و هى شايفة السكرتيرة و هى قاعدة ساكتة خالص

راحت مراتى قالت لى شكلهم كده شاطرينbv:- قوى فى الفرنساوى البنت المترجمة مش بتفتح بقها خاااااالص

و من ساعتها يابنى البنت ما بطلتش كلام و بعد حوالى 10 دقايق لقيت الرجل و مراتة خارجين و على وشهم غضب و مكشرين رحت قايل لها نقيتى mfb: على الناس ربنا يخرب بيتك

المهم دخنا و باسبوراتكم طلعت باسبورى لوحدى قالتلى كل العائلة:blush2: و انا عمال اترعش و بقول لنفسى من اولها طرش كده امال فى نص المقابلة هتعمل ايه

و سألتنى سوال عادى جدا من فاكرة طبعا بس قلبى كان هيفط منى يا ولدى ما كنتش عارف ارد :blink: و قلبى بيدق بغرابة شاورتلها و هى كانت متفهمة حولت اهدى نفسى شوية و بعدين ابتديت ارد واحدة واحدة

طلبت متى شهاداتى قدمتها لها و طلبت شهادات الميلاد المهم كل ما تطلب حاجة تتبعه بسؤال

ايه الورقة دى ايه الشهادة

و سألت عن الخبرات و شهادات التأمينات اللى كانت مشكة ليه بقى

انا شغال فى الشكرة الجديدة دى بقالى سنتين بس و الشركة القديمة 11 سنة و طبعا مكتب تأمينات القديمة مش عايز يدينى برنت و الجديدة ما يعرفش عن المده القديمة حاجة cr((: المهم عملت المستحيل و اخدت ورقة بضم المده الفديمة منهم و دى كانت الورقة الوحيدة اللى ممكن تثبت ال11 سنة دول كخبرة

المهم راحت داخلة على شغلك و بتعرف تعمل ايه المهم من هنا لهنا سألتى الموازنة دى بتتعمل ازاى

يا خبر اسود po:: ده علشان اشرحها بالعربى محتاج محاسب ذو خبرة افهمة بتتعمل ازاى فى كذا ساعه

اما بالفرنساوى بقى انا ماعرفهاش خالص رحت كلمه مش الشرق و كلمة ن الغرب و كام كلمة انجليزى المهم هى عمالة تهز دماغها كأنها فاهمة و انا مش فاهم انا بقول ايه

تعمل ايه بقا ربنا كان معايا لاقصى درجة

المهم اخبار المعادلة بتاعتك ايه قلتلها الموجود بالورق راحت قالت ده بس قلتلها ده المكتوب عندك فى الورق و كمان لازم امتحن امتحان فرنساوى فى مكتب كده عندكم اسمه كذا

طيب و عروض العمل تعرف عنها حاجة قلت لها طبعا و معايا الكتير قوى منها كمساعد محاسب و بعد كده بصت على حاجة فى النت و قالت لى انت بتعرف تعمل و تحلل الميزانيات

قلتلها طبعا راحت لفت و ابتسمت لاول مرة

و راحد متدورة على مراتى و سالتها على شغلها و دراستها و انتى بتعملى ايه و الدراسة دى بتحكى عن اية

و مراتى بترد و هى بتترعش كانها ورقة فى مهب الريح فقلت اساعدها بكلمة لقيت :big_boss: راشيل بتشاورلى انها هطلعنى برة رحت ساكت

و بعد كده قالت لى

vous etez ........

و خرجت برة الوضة و قالت شوية وو راجعه

يا بنت الحلال قولى بقى الواحد اعصابة ماتت

رجعت و قالت من النهاردة لازم تذاكروا فرنساوى كويس قوى و تخلوا الفرنساوى ده اهم حاجة فى حياتكم لحد السفر

ادونى بقى عشر دقايق علشان اطبع ال سى اس كيو

و بعد الموافقة البنت قعددت تتكلم عربى و بترجم كل اللى بتقولة راشيل مع انتى كنت فاهم

فقلت لمراتى اسف العيب مش فيكى و البنت هى اللى بتتكلم اخر المقابلة

و هييييييييييييييييييييه

اخيرا

ده كله بفضل ربنا و دكتور ايهاب لانه اول من اوصانا بالشغل و اللينكات المهمة قوى قوى اللى هو و ضعها هنا

يا جماعه مع راشيل الشغل ثم الشغل ثم الشغل

و على فكرة انا مش عايز اهبط من عزيمة المدرسين بس جهزوا عمل معادلة اخرى غير التدريس

لان الاجانب فرصة تشغيلهم كمدرسين صعب جدا هناك و المعادلة بتاعتهم صعبة جدا جدا

هى قالت لمراتى كده علشان هى مدرسة و قالت لها دورى على شغلانة تانية احسن لك

اما اختى فكانت سماعها للاسئلة صعب لانها كانت حافظه و مش فاهمة

ثانيا ما كانتش عارفة الورق اللى معاها كويس زى عروض العمل و سألتها فيهم و ما كانتش عارفة هو ده السبب الاساسى للرفض

اسف طولت عليكم

و انا تحت امر اى حد

شكرا ليكم مرة تانية و بالتوفيق لكل الناس اللى داخلة قريب

[medoo]

الف مبروك يا استاذ صموئيل بس لو سحمت

ممكن تواريخ ارسال الملف

[medoo]

الف مبروك اخي رؤوف

[بيبو كندا]

الف مبروك يا استاذ صموئيل بس لو سحمت

ممكن تواريخ ارسال الملف

الملف وصل سوريا 01/10/2009

رقم الفايل و فتح الملف 15/11/2009

المقابلة 27/09/2010

[amirmorkos]

مبروك للناس الحلوة و عقبال الحلوين الباقيين,

أمير,,,

[kareemabdou]

الف مبروك يا استاذ صموئيل بس لو سحمت

ممكن تواريخ ارسال الملف

الملف وصل سوريا 01/10/2009

رقم الفايل و فتح الملف 15/11/2009

المقابلة 27/09/2010

الف الف الف مبروك يا صموائيل

وربنا يجعلها فاتحة خير وقدم السعد عليك ان شاء الله

[Pharm]

الف الف مبروك لرؤوف وللحبيب صموئيل عدلى وكمان اختنا ملك ملوكة

وعقبالك يا توتا ومحمد كيبيك وكل ناس اللى منتظرة

بسرعه قدموا فيدرال واللى عاوز حاجة فى الورق انا تحت امركم

بالتوفيق للجميع

[medoo]

المقابلة بتاعتى

المهم اخبار المعادلة بتاعتك ايه قلتلها الموجود بالورق راحت قالت ده بس قلتلها ده المكتوب عندك فى الورق و كمان لازم امتحن امتحان فرنساوى فى مكتب كده عندكم اسمه كذا

طيب و عروض العمل تعرف عنها حاجة قلت لها طبعا و معايا الكتير قوى منها كمساعد محاسب و بعد كده بصت على حاجة فى النت و قالت لى انت بتعرف تعمل و تحلل الميزانيات

قلتلها طبعا راحت لفت و ابتسمت لاول مرة

اسف طولت عليكم

و انا تحت امر اى حد

شكرا ليكم مرة تانية و بالتوفيق لكل الناس اللى داخلة قريب

الف شكر يا استاذ صموئيل بس لو سمحت وووقت حضرتك يسمح تكتبلنا تفاصيل المعادلة بتاعة المحاسبين بالتفصيل

لان بصراحة حضرتك تقريبا المحاسب الوحيد اللي دخل مقابلة الفترة الحالي وانا بجد محتاجها جدا سامحني لو هتقل عليك

[raouf r]

الف مبروك اخي رؤوف

الله يبارك فيك يا ميدو و عقبالك ان شاء الله

و الف مبروك لصامويل

و عقبالك يا ماتيوس ان شاء الله

[johnror]

:winner: شدي حيلك يا توتي ربنا معاكي وانشالله تتوفقة يارب طمنيني عليكي

[sayedmido]

مبروك للجميع

و صموائيل

===================

طبعا هحكى لكم النمقابله

انا لسه واصل حالا من سوريا

=======================

لكن قبل اى حاجه احب اشكر اخى الحبيب والغالى جدا دكتور ==رؤووف == لان فضله كبير جدا وكان دايما معايا

تم تعديل 28 سبتمبر 2010 بواسطة sayedmido

[romany beshay]

الف مبروك للجميع على ال csq

مبروك لرؤوف

مبروك د/سيد

مبروك يا صموئسل

والله فرحت ليكم كتير من قلبى وعاوزين الباقى يشد حيله علشان نكمل كل اللستة

اسف على التاخير فى التهنئة بس والله النت فاصل عندى من 3 ايام وشكله هيطول شوية

دا انا حتى بكلمكم دلوقتى من سيبر بس قولت لازم نعمل الواجب

[raouf r]

مبروك للجميع

و صموائيل

===================

طبعا هحكى لكم النمقابله

انا لسه واصل حالا من سوريا

=======================

لكن قبل اى حاجه احب اشكر اخى الحبيب والغالى جدا دكتور ==رؤووف == لان فضله كبير جدا وكان دايما معايا

د/ سيد الف مبروك و حمداللة على السلامة

و ياعم والله انا ماعملت حاجة بجد انت راجل محترم و تستاهل كل خير

المهم طمنى حصل حاجة فى الشغل بسبب التأخير