إنذار من الأعضاء للإدارة

[Cleo]

عزيزى الأدفيزور..

أشكرك على مجاملتك الرقيقة..

و لكن محاورات المصريين غير أنه كان ينبوع ثقافة و نافذة تجعلنا نتطلع على الكثير من المعلومات، فهو أيضا متنفسا لنا مما نعانيه جميعا من كبت فى حياتنا العامة..

يعنى محاورات المصريين هو بيتنا اللى بنرتاح فيه من عناء الحياة... مش ممكنا نشوفه "بينهار" من غير ما نحاول نعمل حاجة..

أرجو مرة أخرى ألا أكون قد تسببت فى إحراج أى فرد..

[nora]

أعتذر اذا كنت قد أخطأت ولكن ارجوا ان لا يتم حذف شيء حتى يعرف الجميع سبب بعدي واسمع الآراء

ما تزعليش مني يا نورا .. فطالما إحنا بنتكلم بصراحة ..يبقى لازم نقول كل اللي في نفسنا ...

- فسبب بُعدك عن المكان ليس هو موضوع تفرع الموضوعات او الأفيهات زي ما أنت سمتيها .. وعلى فكرة الكلام مش ليكي إنت لوحدك ولكن لكثير من الزملاء الأفاضل ومنهم اخونا تايجر اللي دخل قال كلمتين ومشي ... فيا سادة انا اعتبر هذه سلبية بل بالعكس أقصى درجات السلبية . لماذا ؟

- الإجابة : إذا كنت إنت بتحب هذا المكان وتريد ان تكون مشاركاً فيه فلماذا لا تقول رأيك في أي وقت ولماذا لا تُبدي ملاحظاتك ؟ ام اننا أدمنا كلمة أنا ماليش دعوة وخليني جنب الحيط وخلي غيري هو اللي يتكلم ويصلح .

- لا ننكر إن أي مجتمع في الدنيا به أخطاء .. وبالنسبة لمجتمعنا هذا فهو ليس حِكر على أحد سواء المشرفين او طقم الإدارة ومثلما قال اخونا داروين إن المسئولية إذا لم تكن تنبع من اعضاء هذا المجتمع نفسه فلا امل في الإصلاح .

- وإذا كان أي شخص فينا ينظر لنفسه على انه عُملة جيدة ولكنه كسول وسلبي .. فلا يلومن إلا نفسه عندما يستيقظ يوماً من ثباته العميق ليرى بإن العملة الرديئة هي التى أصبحت تطفو على السطح وتُسلط عليها الأضواء .

- حاجة أخيرة : لو أي زميل او زميلة جه في أي موضوع لقى فيه تشعب وتهريج وكلام من ده وكتب كلمتين بس " من فضلكم يا جماعة لو سمحتم نرجو الإلتزام وعدم الخوض في مواضيع فرعية ؟ " فهل سيتم تعليق المشانق له ام سيعتبره البعض تعدي على سلطة الإدارة والمشرفين ؟ بالعكس هذا منتهى الإيجابية والتعاون فلا تتوقعوا من إدارة المــنتدى إنها تعين 1000 مشرف عشان يمشوا ورا الـ 1000 عضو عشان يشوفوا بيكتبوا إيه وبيقولوا إيه في كل موضوع...

- حاجة بعد الاخيرة معليش إستحملوني : بصوا كده على حاجة إسمها باب شئون المحاورات أو أي موضوع يتعلق بتطوير المحاورات وانا هاسيب لكم التعليق على كمية المداخلات الـــــــــمهولة التي ستجدونها لطرح الأفكار الجادة والتي تساعد الإدارة في تأدية عملها !!!! فأحياناً تبلغ هذه المداخلات من كثرتها وجديتها بإنك ماتلقيش حد عدى حتى وكلف نفسه إنه يُلقى نظرة على الكلام اللي بيتقال عشان محاورات المصريين يفضل مستمر ويجمعنا .

كلامي هذا ليس هجوماً على أي شخص بعينه أو لأني مشرف او منسق لأني أحترم الجميع وكلهم لهم كل الحب والإحترام ولكنني أردت أن أقول من خلال الرغي الكتير ده بإننا قبل ان نلوم غيرنا لابد ان نلوم انفسنا أولاً إذا كنا مقصريين وسلبيين أو زي ما بيقول أ/ عادل أبو زيد متفرجين وليس مواطنين .

س س انا مش سلبية انا كتبت وقلت اني نبهة لكن محدش اداني اي اهتمام وبيتم تجاهل كلامي بشكل مستفز زي ميكون الرد انت ده مش مكانك وبلاقي دايما بيتم تجاهلي وكتبت الكلام ده قبل كده في موضوع منفصل وبرضوا نفس الشيء قولي بأه انا ممكن اقول اية rs:

هل همسك في خناق الناس علشان اخد انذارات h):

انا قلت الكلمة الحسنة ومشيت :blink:

الحاجة الأخيره اني دايما في كل شيء كنت بحس اني غريبة مش منكم وده بسبب التعامل الي بحسة ان اي جديد يدخل يفتح موضوع يبدأ بيه وتبص فجأة تلاقي الموضوع اتحول الي دعابة بينهم وبين بعض ونسيوا صاحب الموضوع واصل الموضوع بس وروح بص وانت تصدق :angry:

وشكرا تاني يا كيلوا انك شجعتيني :huh:

[Cleo]

الحاجة الأخيره اني دايما في كل شيء كنت بحس اني غريبة مش منكم وده بسبب التعامل الي بحسة ان اي جديد يدخل يفتح موضوع يبدأ بيه وتبص فجأة تلاقي الموضوع اتحول الي دعابة بينهم وبين بعض ونسيوا صاحب الموضوع

هو ده يا نورا.... تحسى إن مكانك فى أى موضوع على كرسى الجمهور... تتفرجى و بس...

[se_ Elsyed]

س س انا مش سلبية انا كتبت وقلت اني نبهة لكن محدش اداني اي اهتمام وبيتم تجاهل كلامي بشكل مستفز زي ميكون الرد انت ده مش مكانك وبلاقي دايما بيتم تجاهلي وكتبت الكلام ده قبل كده في موضوع منفصل وبرضوا نفس الشيء قولي بأه انا ممكن اقول اية  rs:

هل همسك في خناق الناس علشان اخد انذارات  h):

انا قلت الكلمة الحسنة ومشيت  :angry:

الحاجة الأخيره اني دايما في كل شيء كنت بحس اني غريبة مش منكم وده بسبب التعامل الي بحسة

أهو ده الظلم بعينه .. طب أحكموا انتوا يا ناس .. بقى نورا بتاعت القطط بتحس إنها غريبة ومافيش حد بيرد عليها ؟ طب روحي شوفي الموضوع بتاع المنيا كده ... وراجعي نفسك .

[se_ Elsyed]

هو ده يا نورا.... تحسى إن مكانك فى أى موضوع على كرسى الجمهور... تتفرجى و بس...

طب بسيطة جداً ... بصي يا كليو كده إنتي ونورا على تاريخ إلتحاقكم بالــمنتدى ..... هاتلاقيكم أقدم من يمكن 70 % من الناس اللي موجودة .. يبقى تفتكروا ليه عندكوا إحساس إنكم متفرجين ؟ او إن الناس بتتجاهلكم ؟ هل تتوقعوا إن فيه ناس معينة عاملين تربيطات او فيه بينهم علاقة قرابة فمابيحبوش حد يدخل بينهم ؟

أنا سايب لكم الإجابة ..

وعلى فكرة ممكن يكون واحد من مؤسسي محاورات المصريين ويكتب موضوع ما ومايلاقيش عليها أي رد !!!! فهل هذا يُنقص من مجهوده او إن الناس مطنشاه او إن موضوعه تافه ؟

بالعكس مش شرط يكون ده بيحصل ... إحنا بنكتب هنا من اجل الكتابة نفسه والناس بقى ترد او ماتردش مش هي دي المشكلة ...

لكن انا رأيي شخصياً إن ماحدش يتوقع إنه يدخل محاورات المصريين كل 6 شهور يكتبله موضوع وبالتالي يتوقع سيل منهمر من الردود ... لن ممكن يكون عدد كبير جداً من الموجودين مايعرفهوش بسبب إنهم إنضموا حديثاً في غيابه .

[amir]

عزيزى الأدفيزور...

فبعد أن كان منتدى محاورات المصريين صالون ثقافى رائع على الإنترنت، يضم خلاصة أفكار و آراء نخبة من المثقفين من أجيال مختلفة و طبقات و حتى بلاد مختلفة على اعتبار أن منا المهاجر و المغترب و حتى غير المصرى،.. أشعر أن - عفوا - تحول محاورات المصريين مؤخرا إلى ساحة للدردشة و القافية و "الأحاديث الجانبية" كما كان يسميها أساتذتنا فى المدرسة،  أكثر منها ساحة للفكر و النقاش و التنوير...

تحول محاورات المصريين مؤخرا إلى ساحة للدردشة و القافية و "الأحاديث الجان

أتفق تماماً مع الأعزاء ... كليو ... وهشام عبد الوهاب ... ولايت هاوس الأخت كيلو أتفق معك في كل شيء

عزيزى داروين..

ما تزعليش مني يا نورا

هو ده يا نورا

س س انا مش سلبية

حاجه غريبه ان احنا نشتكى من حاجه احنا كلنا بنعملها

ما سبق كان مقتطفات من حوارنا هنا فى شئون المحاورات , و من الطبيعى عندما يوجه لى شخص سؤال أو جمله معينه أن ارد عليه بالاسم و ان يعلق هو على ما قلته , و لا يعتيبر هذا " تشات " كما يظن البعض , و انما هو نوع من الحوار على حسب ما تعودنا فى كلامنا مع اصدقائنا فى الحياه العامه

و طبعا ليس من المعقول أو المنطقى ان يكون حوارنا كله حول السياسه و الثقافه و نرفض اى تعليق خوفا أن يكون ذلك حوار شخصى بين عضوين , مع اننى لاحظت ترحيب بمعظم الاعضاء الجدد حتى لا يشعروا بالغربه معنا و بيننا , و لكنهم سرعان ما يختفوا ليظهر غيرهم ليتم الترحيب بهم و هكذا , حتى أن هناك من خاف من الترحيب بالاعضاء الجدد لأنهم يهربون بعد اول ترحيب !

هـذه هى طبيعة المحاورات , انت تتكلم و انا ارد عليك و ليس حوار من طرف واحد .

و أتفق مع باقى الزملاء فى أن معظم الآعضاء يعرفون تماما متى يجب التوقف عن الهزار و التحول الى الكلام الجاد و متى يستطيع أن يلقى بقفشه أو نكته و لمين ... بلاش الحساسيه دى من فضلكم

[Salwa]

طيب انا لى ييجى اربعة مواضيع محدش رد فيهم ...فى باب الاسرة لوحده ...وغيره ايضا .

مش مشكلة ....

لكنى اعرف ان الأغلبية يقرءوا المواضيع ويمكن مشكلة الوقت تجعل الاكثرية تفضل القراءة عن الكتابة .

اما مسألة الخروج عن الموضوع الأصلى ..فاللى بيحصل انه فى بعض الاحيان يتم انذارالعضو لو خرج عن قواعد الكتابة فى المحاورات فقط ....لكن غير كدة .!!!

وكل على نفسه بصير ...

يعنى بالله عليكم ازاى تقول لعضو ......ايه اللى بتعمله ده ؟؟؟ كدة عيب ...او تقول ...بلاش تهريج وسخرية بعقولنا ..مثلا يعنى .

وساعات تلاقى اللى بيستظرف وداخل جديد وكأنه عاوز يعمل .....مجرد دوشة .ويمشى ..

ثم كيف تكون المراقبة ؟؟؟....مفروض كل واحد يراقب اللى بيكتبه ...منتديات تضييع الوقت كثيرة .

ولو تلاحظوا تلاقوا .ان فيه ناس تدخل تستظرف ولما تلاقى المكان ../ حتى الترفيه فيه محترم /...من نفسهم بيمشوا ..بيتخنقوا ..

يعنى هو مش داء مستعصى ...

يانورا ده انتى وجودك مهم جدا .وكنتى دائما حتى فى غيابك ...حاضرة .

ممكن تقولى لى مين ممكن يحل محل نورا القطة الجميلة الرقيقة .؟؟.......مفيش.....هى نورا وبس.

وبرضه الكلام لكليو ...كل عضو هنا له طابع خاص ...كل عضو عبارة عن ../جزء/..من هذا الصرح الجميل ..

ممكن تكتبوا ؟؟ ....بلاش الامتناع عن دخول المحاورات ...

من فضلكم ..

[Cleo]

عزيزتى ماما سلوى...

أنا إنما كنت أتحدث فقط عن "الخروج عن النص".. أما الضحك و السخرية فبدونها لا نكون مصريين..

أما أن يصبح الغاية من المشاركة هى الضحك، فأنا لا أظن أن هذا أمر صحى فى محاورات المصريين..

لقد بدأت هذا الموضوع فى رسالة خاصة للأدفيزور حتى أتجنب مضايقة الأخوة... كانت لدى رسالة معينة للإدارة و أعتقد أنها قد وصلت و بعض الأعضاء شاركنى إياها و بعضهم خالفنى الرأى..

أما عن نفسى فقد رفعت الأقلام و جفت الصحف..

أشكركم جميعا لاهتمامكم..

أختك كليو

تم تعديل 1 يونيو 2004 بواسطة Cleo

[kfaya]

بسم اللة الرحمن الرحيم .....

صحيح أنا لسةجديد هنا , لكنى أ حسست منذ الوهلة الاولى أنى فى بيتى بين أهلى و أخوتى .....

ان محاورات المصريين ليس ملك لاحد ...انة متنفسى و مبعث بسمتى و قادح زناد فكرى و مستنهض

لهمتى و مبدد ليئسى و عجزى .....

ان نقد الذات الساخن الدائر فى هذا العنوان , لهو أرقى أشكال الحوارات ..... كما و أن ثقافة

الاختلاف و الالتقاء , قيمة ليست مفتقدة فى محاورات المصريين ....

قلما تجد , ان لم يكن غير موجود , مثل تلك الكوكبة من السيدات و الانسات اللائى قمة فى

الثقافة , و الذكاء , و الوطنية , ... و طبعا خفة دم بلا حدود , و بلا هيافة .. من أمثلة أنا اجدع

بنت على النت .... و انا ست البنات ملكة الشات ....

طبعا هذا بجانب فطاحل و اساطين رجالات محاورات المصريين ملوك و اساتذة الحوار والثقافة و و العلم و

المصرية الخالصة , حتى أدب الرحلات تنهل منة هنا دون أن تشبع أو ترتوى .....

سوف نقتدى بكم , و نتبع خطاكم , و نتعلم منكم أردتم أو لم تريدوا ...

هذا الاختلاف فى الرؤى و المناظير , انة محاضرة فى فنون و أدب الحوار , أنا شخصيا

مستمتع بها أيما استمتاع .....

و كما قلت يوم تسجيلى هنا .. ممكن أدخل ... الان أقول .... مش خارج .....