قلبى بيوجعنى

[Farida]

انا مدمنه جريده الأهرام و عارفه انها صحيفه حكوميه يعنى بوق دعايه للحكومه و بطلت صحف المعارضه لأنى فعلا كنت بأكتئب لما أقراها و كنت من عبطى بأقول أكيد الحكومه مش حا تاخد باللى مكتوب فيها لأنها معارضه ......لكن دلوقتى قلبى بيوجعنى لما أقرأ الأهرام ....طب ما فيش حد بستعنى يرد على اللى بيكتبوه كمان فى الأهرام يبقوا حا يستعنوا يردوا على اللى فى المحاورات مثلا .... العناد و الطناش هما السمه المشتركه دلوقتى خد عندك :

يوم الأثنين بيكتب لبيب السباعى صفحة التعليم و الراجل بقاله 4 شهور بيتكلم عن عودة السنه السادسه اللى اتلغت قبل كده على ايد فتحى سرور لأسباب اقتصاديه و تعليميه و بترجع تانى لنفس الأسباب مع التغير اقتصاديا للأسوأ ....وزير التعليم أخد رأى 1500 أسرة فى عودة السنه السادسه كلهم وافقوا (شوف ازاى الحكومه بتاخد رأى الناس أهو) الأهرام عملت استطلاه رأى و جالها 60000 مش موافقين (و لا الهوا)....فيه ازمة فى توفير الأعتمادات من كتب و فصول تقوم الحكومه تزود الضرايب على الطيران و التليفونات و (السجاير لأ) علشان توفر مبلغ و للصدفه يطلع هو هو نفس المبلغ المطلوب لعودة سنه سادسه ....

يوم الخميس سكينه فؤاد بقالها بتهاتى يجيلها خمس سنين عن التخريب المتعمد فى ساستنا الزراعيه و تفضيلنا زراعة الفراوله عن القمح ..... و الفراخ اللى بتاكل الميته و المخلفات الدم و ال**** و الثروة السمكيه اللى اتلفت عن عمد... و الست اتهمت الوزير بأنه جاسوس و انه متعمد يخرب الأراضى الزراعيه و المشاريع الجاده و انه بينفذ سياسه اعدائنا من اصابتنا بأمراض الفشل الكلوى و السرطان بفضل المبيدات و غيرها ومع كل هذا ....ما حدش احترم الصحيفه و رد و لا قال ولا حقق ...

و مجلس الشعب اللى المفروض يعرض هذه القضايا مالوش لازمه و نصه وزرا و امس ابطلوا عضويه نائب ينتمى للأخوان لأن كان فيه مشكله اجراءات فى دائرته مع ان فيه حالات زيه و هم ساكتين عليها

قلبى وجعنى حتى صحف الحكومه ما حدش مستعنى يقرا و لا يرد و لا يحقق فيها ..... فيه كمية عناد رهيبه زى ما يكونوا قاصدين يوجعوا قلوبنا و يقولوا هم بيكتبوا و انتم بتقروا و تفضفضوا و احنا حا نعمل اللى عايزين نعمله بالعند فيكم و موتوا بغيظكم و الناس بقى عندها حالة شلل عام و ترهل و قرف و عجز بيفكرونى بفيلم "النوم فى العسل " الناس بعد الضرايب ما زادت و لسه حا تزيد و بعد ما صحتها باظت و لسه حا تبوظ و كمية الضغط الرهيب اللى بيمارس علينا .... حا تفوق امتى و ان فاقت حا تنضرب و مش حا تلاقى اللى يساندها و يدافع عندها ,,,

تم تعديل 31 مايو 2004 بواسطة Farida

[فــيــروز]

الحل هو التطوع .. و عدم قراءة اى نوع من الجرائد و الاكتفاء بمجلة ميكى :blink:<!--emo&lo::--><!--endemo-->

ما اعنيه بالتطوع ان يشترك الانسان فى اى عمل تطوعى يشعره هو على الاقل انه يؤدى دورا ايجابيا نحو مجتمعه .. وان يقلل من رقعة الظلام التى تتسع شيئا فشيئا لتسود كل شئ .. لا ينبغى ان نكتفى بدور المثقفين الذين يصلحون المجتمع بايد نظيفه -من بعيد لبعيد يعنى- واعتقد تشيكوف كان بيقول ان العمل اليدوى فى بعض الاحيان يكون افضل كثيرا من الاعمال الذهنيه رغم انه اشهر مؤلفى القصص القصيره !!

تم تعديل 31 مايو 2004 بواسطة فــيــروز

[ragab2]

عندك حق

ياحاجة فريدة

الحال فى مصر لا يبشر بخير ويسير من سيئ لأسوأ

لا فيه خطة ولا سياسة ولا أهداف وهى ماشية لوحدها

يوم بيوم

وربنا يستر