تهيؤات تسبح فى فضاء اللامعنى ..

[Folana]

السلام عليكم ورحمة الله...

نعم يا سلوى...هى عودة الروح..

وأقول معك لكل فئات الشعب المحتشدة الأن فى ميدان التحرير وفى كل ميادين مصر فى جميع محافظتها وقراها ونجوعها ، لقد صبرتم طويلاً ولقد أمهلتم رأس النظام الفاسد أكثر مما ينبغى وإستسلمتم للخوف والذلة والمسكنة التى فرضها عليكم ، حتى أصبح العالم كله يعجب لخنوعكم ومهانتكم ، وحتى ظن البعض أن روح الشعب قد ماتت ،وأغرى صمتكم هذا الطاغية وعصابته بكم ، فأخذ يستمرىء إهانتم وإحتقاركم وسلبكم أبسط مقدرات الحياة الأدمية ، ولكنكم أثبتم أن الشعب المصرى العظيم لم يمت ، وإن روحه قد عادت إليه من جديد ، وأن المارد خرج من القمقم الذى حبسه فيه النظام الفاسد المستبد ...

وبعودة الروح ، عادث ثورة 19 من جديد والتى سجلها المفكر المصرى توفيق الحكيم فى روايته الخالدة " عودة الروح" ، فالتاريخ يعيد نفس واذا كان الشعب المصرى قد ثار فى ثورة 19 ضد الاستعمار الاجنبى ، فها هو يثور من جديد ضد الاستعمار الداخلى وهو أحط انواع الاستعمار .

ويا شباب مصر الفتىّ ، إصبروا وصابروا ورابطوا لعلكم تفلحون...لعلكم تنتصرون..وسوف تنتصرون بإذن الله

"أن تنصروا الله ينصركم ويثبت أقدامكم"...

آن الاوان لاستعادة ثراوتنا المنهوبة ، وللحساب والانتقام ..واذكركم مرة اخرى بما قاله ابو القاسم الشابى

اذا الشعب يوما أراد الحياة

فلابد أن يستجيب القدر

ولابد لليل أن ينجلى

ولابد للقيد ان ينكسر

وبقول أمير الشعراء أحمد شوقى :

وللحريـــةِ الحـــمراءِ بـــابٌ .. بكـــلِّ يَـــدٍ مُضَرَّجَــةٍ يُــدَقُّ

وولأم كل شهيد اقول لا وقت لإجترار الأحزان ...وليرحم الله شهدائنا ويسكنهم أعلى درجات الجنان...

(وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ * فَرِحِينَ بِمَا آتَاهُمُ اللَّهُ مِنْ فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِمْ مِنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ * يَسْتَبْشِرُونَ بِنِعْمَةٍ مِنَ اللَّهِ وَفَضْلٍ وَأَنَّ اللَّهَ لَا يُضِيعُ أَجْرَ الْمُؤْمِنِينَ )

[Salwa]

ونقول مع فتفوتة السكر .....آمين يارب العالمين..

ونقول معاها ومع مصرية متغربة ومع فولانة ..ومع الدنيا كلها .نورتونا ...اخيرااا ممكن نفرح من غير ما نحس ان الفرح ده شئ عابر حايحصل ف حالة وقتية وخلاص .

صح...الصبر والمثابرة ...هم صابروا وثابروا وكان الله معهم ومعنا .

يد الله مع الجماعة ..

الرسول صلى الله عليه وسلم أمرنا بلزوم الجماعة

فقال" عليكم بالجماعة فإن يد الله مع الجماعة "

وقال : "عليكم بالجماعة وإياكم والفرقة "

يارب اجعلنا جميعا يدا واحدة ولا تفرقنا .

اللهم انصرنا واحفظ شعب مصر.. :give_rose:

مبارك شعب مصر..

مبارك شعب مصر..

[Salwa]

انا خايفة .

انا فعلا خايفة ...بحاول اقنع نفسى من الصبح ان عندى وهم ..بس مفيش فايدة مش بقتنع ابداااا

اول امبارح قالولى ان الشباب السهران مسكوا اتنين حرامية الساعة واحدة بعد منتصف الليل ف سيدى جابر على الترام . بعد ما حاول اتنين حرامية يسرقوا البنك ( اظن اسمه المعمارى ) وياعينى قتلوا الحارس ..( الحرامية يعنى قتلوا الحارس ) ..يعنى قريب من البنك معسكر التجنيد ف سيدى جابر ..ايه الجرأة دى ؟؟؟

برضه حاولوا يسرقوا البنك ف جليم وكان فيه ستة من الحرامية والناس مسكوا اربعة وبرضه سلموهم للجيش ..اتنين هربوا .

الله؟؟

الله؟؟؟

مفيش امان ف الشارع ...برضه ف سيدى جابر اتنين حرامية اتخانقوا مع بعض وقتلوا بعض بالسنج والسيوف ..

اصبحت الأخبار مرعبة ..

عرفت انهاردة من اخواتى ان كل اقسام اسكندرية ولعوها ماعدا قسم محرم بك وعلشان كدة حطوا قدامه دبابة ..

كل الأقسام اتحرقت ...كوووووول الاسلحة اتسرقت فعلا ..فعلا ...دى مش اشاعة ..( يانهار ملهوش لون فاتح )

اخدوا ظابط تبع قسم الرمل من بين زوجته واولاده ودبحوه ف الشارع ...

مش فاهمة ...

مش قادرة استوعب اللى بيحصل ...

طيب مين اللى بيعمل كدة ؟؟

دى مش ثورة رعاع......دى مش ثورة جياع......دى ثورة بيضاء راح فيها ضحايا .

التخريب اللى حصل ...حصل لأنهم سربوا وحوشهم على الشعب ..

سربوا فئة مسجونة ..مسجل خطر ...تجار مخدرات...من لديه احكام جنائية ..

تم تسريبهم...انتقام.

الكل عارف انه انتقام....الكل عارف ايه اللى حصل بالظبط حتى لو الحقائق لم توضح للآن...

هو قال كلمة واحدة بدون شعور ...الجيش خاننى ....هو اعتبر عدم حماية الجيش ( لهم او لعساكره ) ..خيانة ..كان عايز الجيش هو كمان يدخل يطحن الناس ...(( غباء ولا انسانية وافترا ))

كانت صدمة ...حس ان نهايته قربت ....سرب كلابه ....اعطى اوامر بتسريب وحوشه ..

حتى يشغل الناس ...حتى يعلم الجميع انها فوضى ...أنه كان الحاكم بأمره (( هذا ال عدو ظالم...وليس...حبيب عادلى ) ...

ياترى حايقدروا يلموا كل دول ؟؟؟

فيه ناس قالت ست الآف...فيه ناس قالت اربعة ...بس انا سمعت من ناس اثق بكلمتهم ..

ان مجموع من تم تسريبهم من كل سجون مصر ...مية وخمسين الف ..( منهم معتقلين سياسيين)..

شئ يوجع بجد..

شئ يؤلم بجد..

الم يكفيهم ما فعلوه فى هذا الشعب ؟؟؟

مواد مسرطنة ...حرق قطارات...غرق عبارات ...فيروس سى كبد وبائى ...فشل كلوى ...سرطان منتشر انتشار النار فى الهشيم..ماء ملوث ...خضراوات ملوثة وتروى بماء المجارى ...دم ملوث وقضايا غريبة .

تشجيع الشباب على تناول المخدرات وتغييبهم عن حقائق معيشتهم الغير آدمية ..اضطرار اغلب فئات الشعب على القبول بمعيشة تصل الى حد الكفاف ..تحجيم اى انسان يفكر ف الاعتراض ...بناء السجون وهدم الانسان كبشر ..

تعليم يؤدى الى الجهل والغباء ...اعلام موجه فقط للمعاقين فكريا وميزانية ضخمة للتفخيم فى نفس الاصنام التى يعبدونها ...وغيره وغيره وغيره..

الا يكفيهم كل ما فعلوه فى هذا الشعب ؟؟؟

ويكون الجزاء ..........تسريب الكلاب ...تنهش ما تبقى من عظامستظل سنوات تصبر حتى يكسوها اللحم؟؟

انا خايفة على الشباب ...,خايفة على الشرطة والناس الشرفاء ...خايفة من اللى بيحصل ومحدش يقوللى مبيحصلش حاجة لأنه بيحصل فعلا ...وفيه شهود عيان على كل ده...ده جزء من كل ...وقليل من كثير ...

خطف شنط ..تهديد بمطاوى ....مهازل يعنى مهازل وف احسن شوارع اسكندرية .

هو فيه ايه؟؟

اصبح كل واحد عادى ماشى بمطوة ؟؟؟ بيهدد بسيف؟؟؟ مفيش قانون؟؟؟ مفيش حد بيحمى الناس دى ؟؟؟

اقصد مفيش حد بيخافوا منه الحرامية دول ؟؟؟

انا فهمت دلوقت ...وجع البعض وقلقهم..

وانا ف عز الفرحة كان بيتهيألى انهم .. ((قلقانين علشان ده شئ مش منتظر ..ان السجون تتفتح )) ..

قلقانين من ثورة الجياع واعتداءهم على من يظنون انهم ( منعمين )...وهم ف الحقيقة مجرد طبقة متوسطة مستورة يعنى ..لكنهم يعيشون على الجهة الاخرى(( او الضفة الأخرى )) ..من الحى .

اتهيألى انهم حايلموهم تانى ..

ياترى ممكن اضحك على نفسى واقول ...مش حايحصل حاجة ؟؟ كلها شهر بالكتير وكل حاجة ترجع احسن من الأول ؟؟؟ياترى عندى شكوك ف غير محلها ؟؟ بس دى مش شكوك ....دى حقائق.

الشارع بقى مرعب .

الشارع مبقاش فيه امان .

دى حقيقة ..

ياريت يطلع قانون ضد كل من يحمل سلاح ابيض او سيوف ..ياريت .

يارب استرها معانا .

يارب كمل فرحتنا على خير .

احنا استحملنا كتيررر قوى قوى ..

انا فهمت دلوقت ...

فهمت ليه الناس مش بتطلب لهم الرحمة لما بتسمع انهم (( مرضى )) ...لأن الناس حست فعلا فعلا بالظلم ...حست بيه ف كل حياتها ..

انا فهمته مرة زماااان...

فهمته ...فهمت يعنى ايه ظلم ؟؟

لما كنت ماسكة ف ايدى ..ايد طفل صغير بينى وبينه سنة .

انظر بخوف الى مقبرتين شامختين وكأنهما تنظران الينا ...

اقترب هو من واحدة يرقد داخلها جسد والده..

وكتب على رخام المقبرة عبارة بحروف مبعثرة يعلم ان ..

عمه سوف يراها فى ايام قادمة .

ارحموا من فى الأرض يرحمكم من فى السماء ..

ويوم ...ندم العم..وبكى ..وترك جزء كبير من ثروته لأبن اخيه .

لم يقربها ...لم يأخذ منها اى شئ ...تبرع بالثروة كلها .

وقال كلمة واحدة ...

ليرحمه ربه...اما انا ؟؟

فلا استطيع النسيان .

لم اعد احتاجه...,لا يحتاج رحمتى ودعائى ..,لا احتاج ماله ..

كنت احتاج مالى ...واليوم ؟؟ احتاج فقط لحماية ربى وساعدى ..

الشعب ده صابر قوى ...,اصيل قوى ...

وقال كلمته ....ليذهب الظالم بلا رجعة وليذهب معه كل الظالمين .

يارب استرها معانا ومع اهالينا يارب العالمين.

قل لَنْ يُصِيبَنَا إِلا مَا كَتَبَ اللَّهُ لَنَا...( التوبة ) .

..صدق الله العظيم

[SoSo R]

حاجة رخمة فعلا..

ماهو تعريف الرخامة؟؟ ان تكون محاط بكل الناس الرخمة..ام ان تكون الحياة هى اصلا رخمة ام الأثنين معا

ولا نقول وداعا للترفيه؟؟

ولا اصلا ما فيش حاجة اسمها ترفيه و ده وهم بنضحك يه على روحنا

طيب بمناسبة الرخامة يعنى...حد يقولى احل الموضوع ده ازاى..

عايزة اكتب قصة مهمة قوى...قصة حياتى و مشوارى عشان اسيبه لبناتى من بعدى...

ومعايا قلم رصاص واحد فقط لا غير...ومش هاقدر اجيب غيره..

بحب الرصاص عن الحبر عشان باحس انه حقيقى...اصلى و قديم او يمكن عشان ممكن امسح كلمة كتبتها واصلحها ولو ان الحقيقة ان اللى اتكتب عمره ما بيتصلح تانى

كل ما اكتب سطر بالقلم ده يتقصف..

ابريه تانى...

و ارجع اكتب بالراحة و حذر شديد..و اقول ...هابقى اكثر حرص المرة دى..اكتب سطرين بدل سطر و برضه يتقصف..

مش عارفة اخلص القصة...ولسه فاضل كتير عشان يتكتب...والقلم قرب يخلص خلاص..

ماعنديش غيره ومش هاقدر اجيب غيره...

إيه الحل؟؟؟؟

أستسل و اكتب اللى اقدر عليه لحد ما ينتهى و خلاص و ابقى عملت اللى عليا؟!!

ولا اوقف كتابة و استسلم من دلوقت و اوفر على نفسى مجهود الكتابة و البرى...بس كدة هابقى خذلت بناتى بجد و سبتهم من غير اى حاجة يسترشدوا بيها فى المستقبل...

حد فاهم حاجة!!!

ولا هى عشان تهيؤات؟!!!

[لماضة مصرية جدا]

السلام عليكم و رحمة الله و بركاته

إيه ده أن آديلي كتير فعلا غايبة عن المكان الاثير جدا للقلب

معقول فاتتني كل مساحات القرب جدا ده

لحظات الدعاء

و اوقات اليقين....ان هناك شيئا ما سيبقي

و تتأكد داخلنا أن ما ىمنا به كان صوابا

و ما راودنا حلما يوما...لم نكن فقط الحالمون....البعض يحلم و من شدة تصديقه للحلم لا ينفصل عن واقعه و يفضل يعاند لغاية ما يلاقي مكان للحلم علي ارض الواقع

سعيدة جدا جدا ب...."عودة الروح"....مش هتكلم عن الرواية اللي اخدت قرار من ساعيتن بالظبط اني لازم اقراها و اعيش تفاصيلها و بسرعة

بس لاني كنت بقرا كتاب اسمه...."المؤمن الصادق" بيحكي إزاي نخلي وهج الروح دي اللي في يوم بتصحي الناس من حالة الجمود

الكتاب مالوش اي طابع ديني....هو بيخلي الواحد يسأل نفسه لاي مدي انت مؤمن.....مصدق....روحك اللي جواك

يا تري يا ماما سلوي....بنقدر نقرب من ارواحنا و نسمعها

يا تري بنقدر نصدق احلامنا

يا تري لما الحلم في مصر بقي حقيقة و بجد....يا تري الحلم هيتولد صافي و هيفضل صافي

يا تري الروح هتفضل في حالة وهج.....المشوار لسه طويل

يا تري....و كل سؤال فيهم...مش بيزاحم عشان يلاقي اجابة....هو بس احساسي ان احنا لازم نتبت في احلي ما فينا

روحنا....اللي بتقدر تحلم

و تصدق احلامها

عودة الروح

ولادتها

وهجها

هنقدر يا ماما سلوي

مساحضرتك......افتقاد...جدا جدا

مسا حضرتك.....مساحات بنحس فيها فعلا بعودة الروح

[لماضة مصرية جدا]

حاجة رخمة فعلا..

ماهو تعريف الرخامة؟؟ ان تكون محاط بكل الناس الرخمة..ام ان تكون الحياة هى اصلا رخمة ام الأثنين معا

ولا نقول وداعا للترفيه؟؟

ولا اصلا ما فيش حاجة اسمها ترفيه و ده وهم بنضحك يه على روحنا

طيب بمناسبة الرخامة يعنى...حد يقولى احل الموضوع ده ازاى..

عايزة اكتب قصة مهمة قوى...قصة حياتى و مشوارى عشان اسيبه لبناتى من بعدى...

ومعايا قلم رصاص واحد فقط لا غير...ومش هاقدر اجيب غيره..

بحب الرصاص عن الحبر عشان باحس انه حقيقى...اصلى و قديم او يمكن عشان ممكن امسح كلمة كتبتها واصلحها ولو ان الحقيقة ان اللى اتكتب عمره ما بيتصلح تانى

كل ما اكتب سطر بالقلم ده يتقصف..

ابريه تانى...

و ارجع اكتب بالراحة و حذر شديد..و اقول ...هابقى اكثر حرص المرة دى..اكتب سطرين بدل سطر و برضه يتقصف..

مش عارفة اخلص القصة...ولسه فاضل كتير عشان يتكتب...والقلم قرب يخلص خلاص..

ماعنديش غيره ومش هاقدر اجيب غيره...

إيه الحل؟؟؟؟

أستسل و اكتب اللى اقدر عليه لحد ما ينتهى و خلاص و ابقى عملت اللى عليا؟!!

ولا اوقف كتابة و استسلم من دلوقت و اوفر على نفسى مجهود الكتابة و البرى...بس كدة هابقى خذلت بناتى بجد و سبتهم من غير اى حاجة يسترشدوا بيها فى المستقبل...

حد فاهم حاجة!!!

ولا هى عشان تهيؤات؟!!!

بعد اذن حضرتك يا ماما سلوي....اصلي قريت اخيرا عودة ل.."سوسوراني"....هضطر أزق كتف

عارفة يا سيسو....طالما ابتديتي تسألي عن "معني الرخامة"....يبقي احب ابشرك انتي خلاص عديتي :P

عارفة يا سيسو....فيه ناس مبتعرفشي تعيش من غير ما يكون لكل حاجة بتعملها معني

يعني مبينفعشي تعمل حاجة كده و السلام....مينفعشي تبقي روبوت آلي بس بملامح بني آدم

و عشان كده بتفضل تعبانة طول حياتها

كل حاجة....حتي لو كانت صغيرة اوي بتبقي بتدرو ليها ان يكون وراها معني ....و معني انساني كمان يصحي الروح جواها

متهيالي انتي كده يا سيسو

و اصلا طبعا انا كده...و بعاني...و بتكيف...و معنديش اي نية اتغير الحقيقة....مش هعرفني لو عملت كده

بس اللي اقدر اقول عليه

افتحي شبابيك قلبك علي مساحات اكبر من تصرفات عفوية....مش متخططة....مش مترتبة اوي

عايزة تكتبي....اكتبي لما تحسي ان اصلا فيه حاجة مستفزياكي

عايزة تشخبطي...شخبطي

عايزة تسيبي لبناتك حاجة....طب ليه مش تسجليلهم صوتك....افكارك....كنت زمان بتخيل ان لو عندي كائن صغير كده واخد ملامحي.....سجله صوتي....من قبل ا بيتولد....لاني اصلا بحكيل حاجات كتير من قبل ما يعرف انا مين

اعملي حاجات مجنونة....صغنتتة.....هتلاقي حتي الحاجات الرخمة...حتي الاشخاص القتمين اوي....ممكن بقي فيه فرصة لمرورهم العابر دون ان يسيبوا في النفس ضيق

هقولك علي حاجة و مش تضحكي....و لا اقولك

اضحكي.....من قلبك

اضحكي بصوت عااااااااااااااااااااالي

بصدق ان الضحكة بصوت عالي....بتعاند اي "رخامة ممكن تبقي جوانا"

بعمل ايه

بجيب البوم الصور بتاعي انا و اخواتي....و نقعد علي الارض....و هاتك يا ضحك...مش ع الصورة....لكن علي الحكاية اللي لسة فاكرينها....احنا بس...مش حد تاني

اضحكي بقي

و هسمع صوتك.....حتي لو في قارة تانية

مساااااكي راحة بال

و ضحكة تنور قلبك

[Salwa]

يامرحبا يامرحيا ..

سوسو رانى ؟؟ ولماضة ؟؟؟

كدة بقى انا ممكن اطمئن انى بتصرف صح . ما هو دايما لما بنعيش فى شوية التهيؤات دى ونلاقى حد جه ..وقعد جنبنا ...ده بيشجعنا اكثر على الفضفضة بقى ف كل التهيؤات التى تسبح فى فضاءاللامعنى ..(( المعنى ..علشان لماضة متزعلش ))..

ممكن قبل ما استطرد ف الحديث ..افضفض شوية؟ .

طبعاا...كما هو واضح لاأنكر انى اصبحت حقيقة مبلبلة الفكر واشعر بمشاعر كثيرة جدااا لارابط بينها ولا استطيع تصنيفها .

غضب وغضب وغضب مم يحدث ...غضب مصحوب بفرحة ..( شئ غريب اليس كذلك؟؟ ...قلق وغيظ ورغم توقعنا ان الفساد استشرى الا ان مفاجأة الاكتشافات المؤسفة المتوالية تصيبنى يوميا بشئ يشبه الغثيان وكأننا كنا نعيش فى كهوف مظلمة ولا ندرى من أمر ما يحدث تحت الشمس شيئا..

و...

طبيعة البشر و تشبثهم فى البقاء...تجعلهم يقاومون كل القوى المعاكسة لحياة طبيعية جميلة وذات جوده عالية ....وابسط شئ وأقل ما يفعلون .ان يتفاءلوا بعض الوقت ..وليكن التفاؤل ساكنا ركنا دائما فى نفس كل منا .

فى المداخلة التالية ....سوف اضع لكم فيديو قصير جداااا.

يعبر عن امتنان شخص ...انسان عادى ...عاش لمدة ثلاث سنوات فى مدينة برشلونة .

وعند الرحيل قرر ان يرد الجميل بطريقته .اشترى ثلاث تذاكر ووضعها فى رسالة واطلقها فى سماء برشلونة بواسطة بالونات ..

والشئ الجميل جداااا.

ان احد الاشخاص ممن وجدوا رسالة منهم ...اطلق بالونات كثيرة بنفس الطريقة وعمم الفكرة ...و...تراسلوا بينهم ..

هذا الشخص اسمه لوكاس ..

سوف اترجم لكم رسالته ...ومن الممكن قراءتها ايضا بالأنجليزية ..

الى اللقاء ... :clappingrose:

[Salwa]

اهلا.

انت لاتعرفنى .

وانا ايضا لااعرفك.

ولكن هذا لايهم.

المهم هو .

انى كنت سعيد وسعيد جدا

فى خلال الثلاث سنوات التى عشتها .

فى برشلونة .

والطريقة التى وجدتها كى اشكر هذه المدينة .

هى ان اطلق بالونات كثيرة .

تحمل تذاكر لرؤية اوبرا فى التياترو .

وبهذا اكون قد توصلت الى ان .

اشخاصا مثلك من الممكن ان يقضوا وقتا ممتعا تماما .

كما قضيت انا مرات كثيرة لاتعد

فى هذه المدينة الرائعة

اؤمن بعالم اكثر ايثارا

حيث يرى الناس ( أقل ) سرتهم .(((هذا تعبير دارج ..دائما يقال هذا انسان لايرى ابعد من سرته ..بمعنى انه لايلتفت للآخرين ولايهتم الا بنفسه )))

وحيث يقلقون اكثر من اجل سعادة الجميع

وليس فقط من اجل اهاليهم ومعارفهم.

عالم به كثير من الصداقات والاحترام

من الممكن ان يبدأ اليوم

لو كل منا اعطى شيئا بدون انتظار اى مقابل

اتمنى ان تستمتع بهديتك

الى اللقاء دائما

لوكاس .

http://www.youtube.com/watch?v=zEpo4gExLT8&feature=pyv&ad=9108258938&kw=barcelona

[لماضة مصرية جدا]

من الممكن ان يبدأ اليوم

لو كل منا اعطى شيئا بدون انتظار اى مقابل

السلام عليكم و رحمة الله و بركاته

طيب هو حضرتك متأكدة أن مافيش مقابل يعني؟؟؟

فيه يا ماما مقابل....بس مش المقابل اللي ممكن الناس التانية تموت نفسها عليه

المقابل انك تحس انك رميت حجر في بركة كانت راكدة....و راح الحجر لامس وش الميه و صنع دواير فضلت تكبر....و دايرة تسلم دايرة لغاية ما وصلت المية للارض العطشانة

مش يمكن المقابل....ان البالونة....تعدي فوق ناس كان نفسهم في فرحة تخش القلب....وقضوا الليل بيدعوا بيها....هما ما كانوش بيدعوا بحاجة محددة....بس هما اتعودوا انهم يدعوا و السما تفتح ابوابها بالماء المنهمر

مش يمكن العطاء.....ان الدنيا تلف و في يوم من الايام.....تلاقي حد يقولك.....انتي الي عملتي....."البالونة"...دي

لوكاس حقيقي.....و عطاؤه حقيقي.....و المقابل بتاعه لن يسعد به سوي الحالمون

عارفة يا ماما مرة شفت فيلم اسمه ....Pay it forward

عن طفل صغير طلب منه مدرسه اللي كان وشه مشوه بس روحه كانت سليمة.....حرة....نقية....طلب منهم في المدرسة ان كل واحد يفكر في فكرة تكون مشروع الدراسة و عنوانها ازاي تغير العالم

الاطفال اللذيذين كل واحد عمل اختراع....اللي في تدوير القمامة و اللي في انه يشتري كتب و يحطها في المكتبة

الولد الصغير دوت فكر في ايه بقي

كتب جملة من 3 كلمات

Pay it fwd

"it"....كانت عمل خير يعمله الولد الصغير ده....لشخص واحد ميعرفوش....و لما الشخص ده يحب يردله الجميل يطلب منه الولد انه يعمل عمل خير تاني ل 3 اشخاص ميعرفهمش الشخص ده

الفيلم كله.....عن الدايرة اللي ابتدت تكبر....و تكبر....و تكبر....و حياة الناس اللي اتغيرت....لما رجع ليهم ايمانهم....ان فيه ايد تانية....ممكن تقف جنبهم...و من غير "مقابل"...بالمعني اللي عرفوه

الولد اللي كتب 3 كلمات........قدر يغير العالم

يمكن هو مش موجود....بس ال3 كلمات لسه موجودين في ذاكرة كل اللي خلي الدايرة تكبر

رغيت كتير

سامحيني

بس حبيت اقولك.....حضرتك بتكتبي حروف....علي السبورة في مدرسة المحاورات

و صدقيني يا ماما.....الدايرة بتكبر....و هتكبر

و الكون كله هيتغير

انا مؤمنة بده

مصدقاه

و بفتش عليه كل يوم...مش راح استناه يجيني...راح الاقيه بعيني انا

صباح حضرتك.....مساكي.....دواير....ايمان....تشحن بطاريتنا.....بكل اليقين ان التغيير هيحصل...و هيحصل للاحسن

في امان الله

[Salwa]

صباح الخير ياريهام.

رد متأخر كالعادة ..بس اللى بيحصل ان ساعات الاقى نفسى مش قادرة اجاوب على كل الكلام الحلو اللى طالع من قلب الناس الحلوة غير..بابتسامة.

والناس الحلوة اللى عارفانى كويس ....فاهمة كدة .

بيحلالى ارد بعدها ..بحاجة حلوة كمان...كلمة او حكاية عن تجربة مثلا؟؟

تعالى نكمل كل كلامنا وحكايتنا ف مداخلة منفصلة لوحدها...نحكى ..ونضحك...ويمكن نستفيد فعلا من بعض ..

تعالى بس معايا :clappingrose: :clappingrose:

[Salwa]

صباح الخير..

صباح الخير..

صباح الخير.

يعنى ايه صباح الخير؟؟

يعنى اليوم بدأ وخليك متفائل...وان شاء الله كل شئ حايكون خير..

الصراحة يعنى الجو العام لايبشر بأى خير...

طيب ياترى الكلام ده حقيقى ؟؟

بالتأكيد حقيقى ...الوضع كارثى فعلا وكنا فاكرين ان اللى حصل عندنا يوم 25 يناير شئ رائع متوهج ....خللا حتى الناس اللى ف طرف الكرة الأرضية تصحى..

اتارى الوهج ده أول ما ما حرق حرقنا..

بس ده مكانش مجرد وهج...ده كان نور ..

طيب..

طيب يعنى ايه؟؟

ده انتوا فعلا فراعنة..ومن نسل فراعنة ..وخلينا بقى نفرح باللى انجزناه ونفوق ونبدأ الاصلاح ...انتوا مش حاسين فعلا باللى عملتوه؟؟؟ انتوا اول دولة تسقط رئيس الدولة بكل حاشيته ومريديه وتدخلهم السجون ؟؟...انتوا أول شعب يطلع منه تمانية مليون يطالبوا بمطلب واحد...هو فيه كدة ؟؟

انتوا غيرتوا التاريخ...وبتغيروا حتى الجغرافيا..

تعبنا وصوتنا اتنبح من القول ...وعنينا وجعتنا من كثرة قراءة تحليلات الوضع الحالى من عرب وأجانب ...عنينا مين؟؟؟قصدى دماغنا...وكمان مخنا مبقاش مستوعب كم التناقضات ف الكلام....انتوا مستخسرين ف نفسكم النجاح؟؟ صعبان عليكم ومش مصدقين انكم وصلتوا ف أقل من أربع شهور للى الناس بتوصل له ف سنين؟؟

أمس قرأت مداخلة ...لانسان محترم هنا...تقريبا مداخلة من سنة 2009..رد وقال وبيرد ف موضوع انجازات مبارك ..كان رده ان كل انجازات الرئيس...مترو الأنفاق ..

طيب...

نفس هذا الشخص دلوقت ...هنا...بيقول ...المتهم برئ حتى تثبت ادانته وهو معملش حاجة ..,..و...بلاش تفكروا ف الانتقام..و...حتى النساء هنا ؟؟؟ بتشمتوا فيهم.....ف الرئيس وزوجته ؟؟؟.....ونحاول نقول ان مفيش شماتة لكنه عدل....ده القصاص ...و...يجيب لك احاديث عن الرسول تم فهمها بطريقة خاطئة..

نرجع لموضوعنا...

ماحنا هنا بندردش ونفضفض...

البلطجية ...

البلطجية خربوا كل شئ...

البلطجية دول عبارة عن...صراصير.....(( معذرة للتشبيه ...بس احنا دايما بنقول انهم عبارة عن فئران وسهل نجعلهم يدخلوا الجحور ..بس المرة دى حانقول تشبيه آخر ..برضه بدل ما نقول زواحف نقول حشرات ))

ازاى حانقضى على البلطجية ...والأمن يستتب ...؟؟؟

ناس قالت...الشرطة عارفاهم بالأسم..يقدروا يجيبوهم لكنهم مش عاوزين..

وناس قالت....رجال الأعمال اللى برة هما اللى بيعملوا ويخططوا كل ده..

وناس قالت....رجال الأعمال اللى محبوسين بيخططوا من جوة الحبس ...

والحل...

كيف سيتم القضاء على ...البلطجية ..قصدى الصراصير...

و...

نكمل ف المداخلة التالية ... :clappingrose: :clappingrose:

[ذهبية]

صباح الخير يا ماما سلوى

كيف سيتم القضاء على ...البلطجية ..قصدى الصراصير...

دة سؤال حضرتك

اى حاجة فى الدنيا لازم تكون ليها فعل و المقابل رد الفعل

اى خير لازم كيون لية مقابل من الشر

الى صفة لازم يكون فية عكسها

فية طويل لازم يكون فية قصير فية بخيل لازم يكون فية كريم دى سمة الكون

فية ثورة لازم يكون فية مضاد للثورة

كلة حسب مصلحتة فية المصلحة النبيلة اللى لها اهداف حميدة وفية مصلحة انانية اللى ليها ليها اهداف خبيبثة

طبيعى الى بيحصل دة جدااا ومش مستغربة منة دة

و اعتقد انة ياخد وقتة و هيخف تدريجيا لوحدة

ازاى نقضى على البلطجة

لو وحدنا هدفنا

احنا انتصرنا على مبارك و نظامة

لما الشعب اتوحد فى كلمة واحدة لابد من اسقاطك النظام الاتحاد قوة

كل اطياف الشعب اتحدوا على هدف واحد

لما نوحد هدفنا او الاغلبية مننا تقول ان دة هدفنا

صدقينى محدش هيقدر يقف قدمنا

[Salwa]

كيف يتم خداع الصراصير.؟؟

لقد استطعنا فعلا خداع الصراصير...

عندى بيت ...مش مهجور ...لكن ممكن نقول انه مهجور برضه.

بيت نضيف جدااا وف منطقة نضيفة جدااا ..وكل شئ تمام...مفيش اى شئ يقول ان البيت ده ممكن يدخله صرصار واحد.

مفيش أى منفذ...للصراصير..

كل شئ محكم...ابواب وشبابيك...

مفيش اى طعام ممكن يشد انتباه اى صرصار....ببساطة..لأن مفيش حد عايش ف البيت ..

ومع ذلك؟؟؟

كلما ذهب الأهل لمتابعة تنظيف البيت من آن لآخر ....يفاجئوا بالصراصير حتى لو كانت بنسبة ضئيلة جداا.

أمس ..

حدثتنى اختى وهى تتعجب وفى حالة ذهول فعلا ...

ماذا حدث ف بيتكم؟؟؟

دخلنا وفوجئنا بكمية صراصير (( لابأس بها )) ...ميتة ..

كيف استطعتوا القضاء على الصراصير ..رغم انكم مش هنا؟؟؟ ولكم سنوات لم تدخلوا هذا البيت ؟؟..ولا نحن حضرنا منذ سنتين ؟؟؟

احضرى لنا هنا من نفس المبيد الذى استعملتوه....لنستعمله فى بيت الساحل الشمالى ..

ضحكت...

ضحكت جامد...

مبيد من الخارج؟؟ اى خارج؟؟؟ مبيد مستورد؟؟؟

لالالالا يااختى الحبيبة ...

لقد تم القضاء على حشرات الداخل...بمبيد من الداخل ...

لايفل الحديد الا الحديد...

التطعيم من نفس نوع المرض...

لقد تم خداعهم بطريقة بسيطة للغاية ...

لقد وضعت لهم السم على قطعة السكر ...لالالالالا ....لم يحدث ...لقد خدعناهم بصوت الموسيقى ..

ايضا لم يحدث.

لقد تم اولا .....جذبهم للرائحة الجميلة..ثم...هم بهذه لطريقة ذهبوا الى حتفهم..

هو مجرد..اسبراى ....رائحته تشبه رائحة المعطر المنزلى ...

اذن..

كيف تم القضاء عليهم؟؟ الخوف ان يعودوا مرة اخرى ؟؟

ههههههههه

هذه المرة لن يحدث ...

اتعلمين لماذا؟؟؟

عندما اكتشفت منذ سنوات ...انى اجد يوميا...صرصارين .((هههههههه)) فعلا صرصارين فقط..لكن؟؟؟وياللغرابة ..بصفة يومية وكأن هذا مكانهم ..

وبحثت كثيرا ولم ادرى ..من اين يدخلوا ؟؟ لدرجة انى شككت..ربما بيدخلوا وانا افتح باب البيت؟؟

وذهبت ف يوم الى الصيدلية ..وقلت للصيدلى..انا جربت العجينة بالبوريك اللى حضرتك عطيتهالنا قبل كدة ؟؟ وكانت ممتازة ...لكنى اريد شيئا يقضى نهائيا على هذه الحشرات المزعجة ..بحيث اننا لانضطر دائما كلما اتينا لأعادة نفس الطقوس ؟؟

ضحك الصيدلى وقال ...

ف الحقيقة يوجد منتج مصرى جيد جدااا ويقضى نهائيا عليهم..لدرجة انهم لايعودوا لنفس المكان ابداااا...اذا استشعروا ان الرائحة لازالت قائمة او موجودة بطريقة او بأخرى ..

و...

اشتريت الاسبراى ...وف آخر ساعة لى ف البيت ...رشيت كل العلبة ... الرائحة كانت فعلا حاتقتلنى ...حسيت بصدرى يضيق وتقريبا شعرت باختناق وجريت على البلكونة ..اخذت نفس عميق ..و..قفلت البيت ومشيت ..

ماذا حدث؟؟؟

كيف تم القضاء على الصراصير؟؟ ومن اين اتت كل المجموعة اللى وجدوها ....منتحرة ؟؟؟

ببساطة ...

جذبتهم الرائحة...نادوا اصحابهم...لم يعلموا انها مصيدة ...!!!

والباقى ؟؟؟ من كانوا فى الانتظار ؟؟

لازالت تجذبهم الرائحة ..وبهذه لطريقة ..(( هههههه)) بدون ان اشعر أنا...

قضيت على كل ..حشرات المنطقة ...

(( وضحت الفكرة ؟؟ ))...

انا بس كان بيزور بيتنا....صرصارين.

بمحاولتنا القضاء عليهم...قضينا على كل ما كان يعكر صفو...الجيران ...والحبايب.

والعلاج كان....مصرى صميم.

والمنتج كان...مصرى صميم...

واحنا؟؟ وثقنا فقط ف صدق ابن بلدنا .

بس خلاص...

و...صباح الخير.. :clappingrose: :clappingrose:

[لماضة مصرية جدا]

السلام عليكم و رحمة الله و بركاته

ايه الجمال دوت

حقيقي انا حاسة اني متاخرة اوي

بس الحقيقة انا جاية علشان افضفض في حاجة و بعدين مقدرتش اقاوم اني اتامل اوي في حكاية

الصراصير

و المبيد اللي جاي من الداخل

فكرتني يا ماما سلوي بتشبيه كان قاله دكتور مصطفي محمود مرة عن الصراصير ازاي انها كائنات طفيلية و بتعيش بالقرب من معذرة البلاعة

و قارنها بالنحلة....او النملة

هما الثلاتة بينتموا للحشرات كلن كل حشرة منهم ربنا خلقها بطريقة مبدعة جدا و كأنه سبحانه بيدينا درس نتامل فيه

يا تري فيه في حياتنا بني آدمين سلوكياتهم....معذرة في اللفظ تشبه الصراصير...و يا تري اي المبيد اللي ينفع معاهم

اكيد مش راح نسد البلاعة.....لكن هنحتاج نطور دفاعاتنا و نكتشف كل شوية المبيد الداخلي اللي يقدر يخليهم علي الاقل يعزلوا ل "بلاعة" تانية

طب انا لخبطت القصة كده و لا ايه

بس حبيت اوي التشبيه بتاع حضرتك...و ربطته بتحليل دكتور مصطفي محمود

متغبيش تاني عن فضاءاك يا ماما سلوي

حياتي ع المنتدي بتحلي بالطيران فيه

طب في

[لماضة مصرية جدا]

السلام عليكم و رحمة الله و بركاته

هسرح مع حضرتك كده في حيوان بحبه اوي

بتحبي الاحصنة يا ماما سلوي

انا بعشقها جدا

اينعم انا اجبن من اني اركب حصان...(الحق يتقال يعني)

بس بحب اتامل فيه اوي

شفتي الحصان اللي بيجري بكل عزمه في البرية يا ماما سلوي

بيبقي عنيف

بيبقي قوي

بيبقي من غير لجام

بتحسي ان الكون ده كله براح ليه

امممممم

طب شفتي بقي الحصان بتاع السيرك

ايون اللي بيعملوله بالطو او بردعة حمرا و يلبسوه طرطور احمر و يطلبوا منه اني ينط فوق حاجة اصلا ميجيش عند ركبته و الناس تسقف من حواله

بس انا متاكدة انه مبقاش حصان....بقي حاجة كده بلاستيك اخترعناها علشان تبسطنا احنا...مع انها ممكن جدا بتكون بتقتل الحصان ببطء

عارفة يا ماما سلوي

انا شايفة نفسي فين

في الحصان الاولاني

غير مروض

و بقيت اخاف

مش مني

لاني عارفة لجامي فين و عارفة فين راح اجري و فين راح انط

بس بقيت اخاف لما بسمع من اقرب الناس ليا

انتي بقيتي متمردة

و لما تتقالي.....الضلع الاعوج

يعني ايه بقي الضلع الاعوج

مش يمكن الضلع الاعوج اتعوج كدهوت علشان يبني بيه ضلع تاني

هو يعني لازم تبقي كل الضلوع مستقيمة...يعني هنبني حيطة...احنا بنبني بني آدم...يعني ليه ثنيات و انحناءات لازم ضلوعه جزء منها يكون اعوج

ايه المشكلة يعني

هتصدقيني لو قولت لحضرتك....حاولت اكون حصان السيرك...بتاع هلي هوب و جلا جلا

معرفتش

و معرفتنيش

بحب المعافرة

و بحب البراح

و بكره القفص حتي لو كان مجرد فكرة مش حقيقة

بيقولولي الدنيا كلها سيرك

و العبي دورك جوه السيرك.....المهم خليكي دايما جواه...و بلاش تطلعي بره الخيمة

مش قادرة اصدق اني ممكن الاقي لنفسي دور جوه السيرك

و متهيالي لو روحت

يبقي دوري الوحيد اني افتح كل اقفاص الحيوانات و اخرجها من اقفاصها

و بنفس المبدأ بحاول اخرج اللي حوايلا من اقفاصهم

من افكراهم

من قوالبهم

من المنطقة الامنة جدا و الكهوف اللي متطمنين انهم جواها هيبقوا بعيد عن الخطر

و بتنعاد عليا نفس الحكاية

انتي حصان بري

يمكن ياماما سلوي ده حقيقي

مش زعلانة

بس ابتديت اقتنع ان كل حد فينا في الدنيا عنده الاختيار انه يا يبقي حصان سيرك...يا يبقي حصان لمؤاخذة حنطور يا يبقي حصان بري

يمكن كل حد فينا شايف انه كده احسن و المهم انه يكون كده مبسوط

بس نفسي الناس

تسيب اللي اختار انه يكون الاول و لا التاني و لا التالت....تسيبه في حاله......محدش يحط حد في قفص من افكاره و يربطنا بلجام واحد

انا اخترت

و بدافع عن اختياري

و يمكن انا غلط

بس بتعلم

اعتبريها فضفضة

او تهيؤات

او مساحة لاكتشاف حتة جوايا مع حضرتك

مساكي....صباحك.....براح الكون بحاله

[Salwa]

حبيبة قلبى ريهام اللمضة قوى
صباح سعيد رائق ان شاء الله.
صباح معطر بكل روائح الكون الصافى .
شئ طبيعى ياريهام ان يكون هذا هو شعورك .
كل واحد فينا بييجى له وقت وتحصل عنده حالة تمرد على كل القوالب اللى عايزين يحطوه فيها ..(( بيقولبوه )) والمشكلة ان الناس اللى بترسم لنا حياتنا على اساس ان هو ده الصح..!!
لما بنكبر بنكتشف ان حياتهم مكانتش صح..حياتهم كانت عبارة عن ثوب فضفاض به ثقوب كثيرة ...ممكن نقول مكانتش صح قوى .( مش بتكلم من الناحية الأخلاقية نهائيا يعنى ) ...انا اتحدث عن مفاهيم.
واحنا صغيرين او ف سن معينة بيتهيألنا .( فيه جزء من تفكيرنا بيخلينا نوافق حتى على اللى احنا جوانا رافضينه)..ان ده عرف او تقاليد ولازم نمشى عليها.
ليه بتحبى تفكرى اننا الأقرب لطباع ....الخيل؟؟
لأن دى الحقيقة ...
التمرد والاباء والشموخ ...,والحرية .
الخيل جاء ذكرها ف القرآن الكريم اكثر من مرة وتحدث عنها الشعراء وغيره وغيره..
طيب مسألتيش نفسك ليه؟؟
لأن على مر السنين كان للخيول تأثير ف حياة الانسان..
المدنية مخليتناش ننسى ان الحصان فعلا هو أحب الحيوانات لنا ..
منظره وهو طاير وهو حر ..
حصان السيرك بيحسسك ( وانتى كبيرة ) ناحيته بالشفقة .
حصان السيرك بيحسسك ( وانتى صغيرة ) أنه قوى ورائع وحتى بيعرف يرقص...قوى وخفيف ف نفس الوقت .
بتختلف المفاهيم ...حتى لو ظل الاعجاب قائما..
هل هو أصح ان نتمرد؟؟..........طبعااااااااا
من وقت لآخر مهم جداااا ........رفض مالايرضينا.
خصوصا لما بتمر السنين.
فيه مشكلة ....علينا الاختيار .
ياترى مفروض نرضى اللى حوالينا والا نرضى نفسنا ؟؟؟
وهل لو ارضيناهم ( شوية )...ده حايكفيهم؟؟أم حايطلبوا دايما المزيد لحد ما نبقى ف ايديهم زى عجينة الصلصال يشكلونا زى ماهم عاوزين؟؟
تعالى نكمل فضفضة ...
فضفضة رائقة جدااا بلون السما الصافية وواضحة وضوح النهار اللى بدأ يظهر على استحياء ..
عشت العمر كله...كله يعنى كله ...يعنى كله كله كله كله.
متخذة لنفسى ( رداء ) لم اصنعه انا ..ولكنى وجدته يدثرنى .
...رداء اصبح جزء من تكوينى ..اصبح جلدى ..يحمينى او هذا ما كنت اتخيل انه يحدث ...!!!!
((( البنت العاقلة الحنونة اللى تعرف الأصول واللى ميفوتهاش واجب واللى مش ممكن تنسى اى فرد ف الاسرة ( اللى عمالة تكبر ) وتنعى هم الكبير قبل الصغير.))..عشت لهم جميعا.على الأقل معنويا ...عشت كما ارادوا لى ان اعيش ...حتى وانا على البعد .
ومرت ايام وشهور وسنين ...بكل ما تحمله ( لى انا فقط وليس لهم ) من افراح واتراح ..
لم أكن احكى لهم اى شئ مؤلم .(( ده برضه جزء من الرداء ))
وجاءت ايام...مفروض انها لى .
انا بطلة هذا اليوم..
انا (( أنتظر حادث سعيد ))...انا من عشت على تقاليدكم ومشيت على صراطكم المستقيم ولم احيد قيد انملة ...ونفذت اوامركم حتى وانتم لاترونى ..
انا اليوم....بطلة الفيلم .
هيا...هنئونى
ابقوا بجانبى ..
انتم ( تملكون ) باستطاعتكم ان تكونوا بجانبى ...ان اردتم.
هيهات...
هيهات...
حدثتهم...فوجئت بهم ...يجرجرونى (( نعم اقصد هذا التعبير لأنه فعلا تعبير دقيق))...الى ساحتهم.
لاتنسى...
بعد اسبوع عيد ميلاد اختك..ابقى اتصلى هنيها ولو انك مش بتنسى التواريخ..
أأ..أصل...أأأ...بعد بكرة ..أأ((( ده انا بحاول اتكلم واشرح الظروف واقول انا فرحانة وفاضل يومين تقريبا .)))..و....بلابلابلابلابلابلابلابلابلا..
..طيب سلام.
وف اليوم الموعود...
وبكل (( ضعف ))....وفى المساء .
رفعت انا ..(( انا )) سماعة التليفون ..
الحمدلله.. ...انا بس حبيت اقولكم ...الله يبارك فيكم..
ههههههههههه
و...
فكيت البوصلة ....فكيت بوصلة حياتى ..
مش لازم دايما يابوصلتى الحبيبة تتجهى ناحية الشرق ..
خليكى ناحية الغرب ..ولما تحبى تروحى الشرق ابقى ...ديرى الدفة
الله؟؟
انتوا عودتونا على شئ ....ونسيتوا ان ابسط شئ انكم يجب ان تسيروا انتم اولا على منهجكم ...ثم تطلبوا منا الطاعة ..اليس كذلك؟؟
ام انكم مع مرور الايام والسنين ...تواكلتم؟؟
استسهلتم؟؟
كنتم بتقولوا .....انتم صغار ..نحن كبار ..عليكم الطاعة.
ونفذنا الأوامر .
والآن؟؟
مطلوب منا ونحن كبار .....ان نفعل مع ( ذريتكم وهم صغار ) ماكنا نفعله معكم؟؟؟
شئ غريب...
وعندما نعترض ( بطريقة لبقة وعلى استحياء ) تأتى الاجابة ..
انتم كبار ..,وهم صغار ...المفروض الكبير يسأل على الصغير..
الله؟؟
الله؟؟؟
من الصعب ارضاء الجميع.....دائما.
من الصعب ومن المستحيل ان نشعر بالسعادة ونحن نؤدى طقوس موضوعة سابقا فى مواقف معينة لاتمت لنا بأى صلة ...ولأناس يختلفون عنا .
لهذا...
قررت ان افعل فقط ما آراه يرضينى ولايضير غيرى .
قررت ان اسأل...عندما اريد السؤال ..( لايجبرنى أحد ولا اتمسك بأى قيود ( اقصد تقاليد او اصول )..أهى على فقط وليست على غيرى ؟؟
وماذا سيقولون؟؟وماذا سيفعلون ؟؟؟وعيب وميصحش ؟؟
هو عيب عليا ومش عيب عليهم؟؟؟
هو انا فقط صلة رحم..وهم صلة بنكرياس ؟؟؟
و..
الشئ الجميل جداااا.
انى فوجئت بهم....يسألون..
يستفسرون..
كيف حالك؟؟
قلقتينا عليكى ...يارب تكونوا بخير ..
سألوا واهتموا بكل حب ..
سألوا...بدون ان اظهر اى اعتراض ..او ( امتعاض )...احتج.
ويومها علمت انى ( انا ) من كنت امهد لهم كل طريق سهل .
أى..
عندما قررت ان اعيش ...وأن احب نفسى اولا ...وهذا هو الطبيعى .
ولندع الايثار جانبا...
احلوت حياتى واصبح لها طعم جديد.
واصبحت ( أسأل ويسألوا ) أعرف..ان الحياة دائما.
هات وخد.
وانى مش لازم....امشى دايما على الطريق اللى رسمه غيرى .
ممكن اغير الطرق ...وسوف اصل الى نفس الهدف.
احيا حياتى انا.
:clappingrose:

[Salwa]

للأسف الشديد جدا.

كل اللى بيحصل ف الشارع ده من تهريج خلاص حاينتهى .

اللى فات ده كان كوم واللى جاى كوم تانى لوحده...خلاص.

الشرطة والجيش مسكوا البلد.

ده الكلام اللى اتقال لى ....بالأمس ...(( واصابنى بالحيرة )).

قبل كدة كنت فاهمة معنى جملة (( يظهر انى اغنى خارج السرب )) بطريقة واضحة على الأقل ليا...بطريقة مفهومة ...يعنى اللى بفكر فيه أنا.... غيرى او باقى المجموعة مش بتفكر فيه .

دلوقت ؟؟؟

يظهر مطلوب منى اغير حتى المفاهيم اللى اتربيت عليها ..

دلوقت لو انا ..(( غنيت برة السرب )) سهل اتهامى بالخيانة..

سهل اتبهدل بعد العمر ده كله؟؟؟

سهل يتقال عليا.....مخربة ؟؟

طيب...

صحيت النهاردة وانا بس ف دماغى كلمة واحدة عمالة ترن..

الانقياد الأعمى ...

الأنقياد الأعمى..

هل حقيقى زى ما بيقولوا .........ان الشعب انقاد لفئة مأجورة ؟؟

هل حقيقى ان الشعب انقاد لفئة اثرت عليه وعلى مشاعره من الناحية الدينية ؟؟؟

هل حقيقى ان الشعب انقاد........لأنه ببساطة اتعود...ينقاد؟؟

يعنى ايه؟؟؟

طيب والخوف ؟؟ ......هل الشعب فجأة تعلم كيف ينزع الخوف ؟؟؟او أنه ببساطة ايضا أنقاد ونسى الخوف ؟؟

طيب...

ويعنى ايه ...بقيادة؟؟؟...يعنى (( حد)) او (( مجموعة )) مسكوا عصايا وبدءوا يوجهوا (( القطيع )) نحو جهة معينة ؟؟؟

ام انها عصا...مايسترو ...يساعد باقى الفرقة او المجموعة على اصدار نغمات متناسقة بلا اى نشاز؟؟

فيه قيادة...و....قيادة...

فيه..انقياد..وانقياد..

طيب والطوارئ؟؟؟

فيه طوارئ واسعافات اولية سريعة او بطيئة ؟؟؟.فيه...

وفيه طوارئ .يعنى مضطر بقى ادبحك لأن دى حالة طارئة ...انت شخص مريض ورامى نفسك ف وسط الطريق وفيه سيارات كتيررر لازم تمر ..

لا فى حد ينقذك ولا انت عاوز تيجى على نفسك وتقوم ولا اى شئ ..

الحل؟؟

نخلص منك...

دى حالة طوارئ...

لالالالالالالا

الحل ...الأمثل يعنى .

سهل جدااا وواضح جدااا ...من زمان.

وكأن شيئا لم يكن...وبراءة الاطفال فى عينيه ..

مش احنا اللى مش بنعرف نحكم..(( كقادة )) لالالالالالالالالا...ده انتم شعب ممش بيعرف يتحكم...مش عايز يتحكم...

مش راضى يتحكم...

الأول كنا بنقول ......دول عايزيننا كلنا نسيب لهم البلد ونمشى (( ومش حايلاقوا حد يحكموه )).

دلوقت بنقول .....

للأسف ....لقد نمى راس آخر للأفعى ..(( وهل تنمو رأس )) ..؟؟

وهل يقطع رأس ويظل حيا؟؟ وهل تم فعلا قطع الرأس ؟؟ هل تم قطع الذيل حتى ؟؟؟

لقد تم...تنويم الشعب .

فيه حرامى غسيل ...وفيه حرامى بنوك...وفيه نصابين عالميين..

واحد..,,,برداء مهترئ.

وواحد ببدلة انيقة ولسان معسول واكراميات من تحت لتحت..

وواحد...( وهو الأذكى ) بوعود وخطب رنانة ووجه صارم وبشوش فى نفس الوقت ..

وآهو كله ضحك على الناس .

والحل ؟؟؟......(( انتى مش بتزهقى وكل شوية تقولى الحل الحل الحل الحل ؟؟؟؟))..

الحل كانوا اقترحوه زماااان..ومعملوش بيه..

لالالالالا

عملوا بيه شوية صغننين.........ونسيوا ..

الحل هو.....

الاتحاد والنظام والعمل ..

كلنا نبقى ايد واحدة..

ننظم نفسنا صح ونعرف اولوياتنا ..

ونعمل ...نعمل لنعيش صح الصح..

وربنا معانا جميعا..

[Howayda Ismail]

الاتحاد والنظام والعمل

كلنا نبقى ايد واحدة..

ننظم نفسنا صح ونعرف اولوياتنا ..

ونعمل ...نعمل لنعيش صح الصح..

وربنا معانا جميعا..

مش لو الناس عاوزة تتغير فعلا وتعمل اللى عليها

مفيش مصلحة دلوقت او اوراق عاوزة تخليصها الا بالواسطة او الرشوة

الصورة اصبحت اشد قتامة من الاول اصبحوا يعطلوا مصالح الناس

مش عاوزين يشتغلوا محملين الثورة اسباب تقاعسهم

متمشيش فى حتة الا متلاقى ناس تسب ع الثورة واللى جه من وراها وان حال البلد وقف

الناس مش فاهمة ان العيب فينا احنا وفى اخلاقنا وسلوكياتنا

للاسف كتير منا واخد على نظام القطيع ومش عاوز يتغير

واخدين على الهش بالعصاية يمين وشمال

مش عاوزين يعترفوا اانا نقدر نتحمل مسئولية قرراتنا ووتكون امورنا بادينا

امتى بقى نحس بتغيير حقيقى فى كل حاجة واولها نفوس البشر

[Salwa]

الاتحاد والنظام والعمل

كلنا نبقى ايد واحدة..

ننظم نفسنا صح ونعرف اولوياتنا ..

ونعمل ...نعمل لنعيش صح الصح..

وربنا معانا جميعا..

مش لو الناس عاوزة تتغير فعلا وتعمل اللى عليها

مفيش مصلحة دلوقت او اوراق عاوزة تخليصها الا بالواسطة او الرشوة

الصورة اصبحت اشد قتامة من الاول اصبحوا يعطلوا مصالح الناس

مش عاوزين يشتغلوا محملين الثورة اسباب تقاعسهم

متمشيش فى حتة الا متلاقى ناس تسب ع الثورة واللى جه من وراها وان حال البلد وقف

الناس مش فاهمة ان العيب فينا احنا وفى اخلاقنا وسلوكياتنا

للاسف كتير منا واخد على نظام القطيع ومش عاوز يتغير

واخدين على الهش بالعصاية يمين وشمال

مش عاوزين يعترفوا اانا نقدر نتحمل مسئولية قرراتنا ووتكون امورنا بادينا

امتى بقى نحس بتغيير حقيقى فى كل حاجة واولها نفوس البشر

مساء الرضا عزيزتى الغالية هند.

شوفى ياهند..

يمكن نكون بنحلم..يمكن ....لكن؟؟ مش ملاحظة ان بعض الأحلام اصبحت حقائق؟؟؟

اتحققت احلام كتيرررر.بس احنا كأننا تعبنا.

عملنا زى لعيبة الكرة المصريين (( بجدددد)).ممكن يلعبوا ماتش رائع بكل المقاييس وعالمى ..(( اول تايم ))...ويفرحوا ...

وفجأة ..

بدون اى مقدمات.تلاقيهم بيكتفوا بس باللى حققوه اول تايم ...بيكتفوا بالتعادل ...او بأنهم كسبوا واحد صفر...

بيعتمدوا على كدة ..

على النصر الأول ......وبس

مش بيعملوا بقى دفاع وهجوم ف نفس الوقت وده احسن تكتيك..

ده افضل تكتيك..

تعالى ناخد حاجة واحدة بس من الف حاجة عايزة تتصلح...

ايه اللى حصل ف منظومة التعليم مثلا ....تعالى نقارن بين هنا وهناك.

مجرد مقاربنة بسيطة ...

لازال الناس ( هنا ) يصرخون ويتظاهرون ( مش عجباهم منظومة التعليم )

لكن اللى حصل لايمكن مقارنته بما حصل او حدث فى مصر.

بنحاول نصلح الموجود...وف نفس الوقت ...بيتم التغيير الجذرى .

شوية شوية ...

بتطلع اجيال او براعم ......بطريقة جديدة تماماااااا

مثلا...

ابسط شئ ......نسيت نفسى ورايحة بكل الفرحة اسأل على حفيدى ...هو امبارح دخل اولى ابتدائى وهو اصغر طفل ف فصله لأنه مواليد ديسمبر ...

اولى ابتدائى ؟؟؟.....مفيش حاجة دلوقت اسمها اولى ابتدائى ....قصدك (( اولى ...أولية )) ...خلاص مبقاش فيه ابتدائى لحد سنة سبعة .بفى فيه اولى لحد سنة خامسة ...ثم..اربع سنوات ثانوى ...ثم...سنتين تحضيرية للجامعة ..

الله؟؟

مفيش حاجة اسمها دروس ف البيت وتحطيم اعصاب للطفل ..

مفيش ومفيش ومفيش ......وف نفس الوقت .فيه ترفيه للطفل وفيه انواع من الرياضة حسب جسده وحسب صحته.

حسب ميول كل طفل......مفيش اجبار ..

فيه تشجيع للمواهب ...

ومع ذلك....

فيه اضراب .فيه مظاهرات ...فيه اعتراض دائم..

الناس دايما عايزة الأفضل ولا تكتفى بالموجود او بما تم تجديده..

محدش بيقف ساكت ف مكانه..

حاولى لو ف يوم عندك وقت فاضى .......تتفرجى على المواضيع القديمة هنا ف المحاورات ..

جربى ...

حاتلاقى حاجات ....حاتلاقى مواضيع...حاتكتشفى حلول لكل شئ..

حاتعرفى ان فعلا فعلا فعلا فعلا .....فيه ناس كتيرررررررر هنا وضعت وقالت آراء وحلول لكل مشاكلنا .

ومحدش بيسمع..

محدش بيشوف ..

والشئ العجيببببببببببببب فعلا ...اننا ف وقت من الأوقات اكتشفنا ان الجرائد الرسمية بتشوف اللى بنكتبه..

الله؟؟؟

الله؟؟؟

طيب محدش اتصرف ليه؟؟؟محدش حاول يصلح ليه؟؟؟

بلاش نظام..........هد حمامك القديم (( على رأى الاعلان )) ...لكن؟؟

تعالى نعمل بالمثل اللى بيقول .........

جمز بالجميز على ما يجيلك التين.

يعنى لو ف خلال العشر سنوات فقط .......او الحداشر سنة اللى من عمر المحاورات ...فيه حد اهتم.

كانت حاجات كتير اتغيرت .

وبلاش نقول المحاورات بسسسسسسسس

الصراحة كل المصريين على النت كانوا بيصرخوا ....

لأن ف الحياة الحقيقية .......كان اللى يتكلم ...بيخرسوه ( آسفة للتعبير ) .لكن الخوف كان يكبل الجميع..

اللى عمله الأولاد دول ......الثورة الجميلة جداااااااا اللى حصلت ف خمسة وعشرين يناير ....شئ رائع.

شئ رائع فعلا ..

شئ اكثر من رائع ......كسروا حاجز الخوف ..

صرخوا صرخة...هزت جبال الصمت.

وصرخت جبال من البشر وراهم..

ايه اللى حصل؟؟؟؟؟؟؟؟؟؟؟؟؟

فات التايم الأول .........وانتهز حكم المباراة (( الله اعلم بقى مرتشى والا تبع الفريق التانى )) .

وقالك.....فاول .

والتايم التانى .......آهو بيضيع....بيضيعوا الوقت .

تفتكرى حايلحقوا يحرزوا هدف ؟؟؟

هدف التعادل حتى ؟؟؟

والا هدف النصر؟؟؟

هند....

مش عارفة كتبتلك ايه؟؟ لكنها مواضيع شخصية وفضفضة شخصية ..

و..

ربنا معانا....ربنا معانا ومع الشباب النقى اللى جزء كبير منهم ضحى بروحه علشان احنا نعيش صح.

خلينا نربى البراعم صح....بكرة حايكبروا صح.

وصدقينى .....واضح ان فيه كتيرر صح .

ويارب الباقى يتعدى منهم ويبقى زيهم.... :clappingrose: :clappingrose:

[Salwa]

مساء الخيرات .

احببت ان تشاركونى لحظة احساس رائعة عند رؤيتى لهذا الفيديو .

الحديث يطول عن .....الجوع ف العالم والمشاركة والتكافل .وهل هى مشكلة الدول الغنية ام ديكتاتورية حكام الدول الفقيرة ؟؟

يوجد ثلاثة ونصف مليون طفل يموتون سنويا جوعا ف العالم.

لنتعلم من تكافل الاطفال وبراءتهم .

الاطفال هم رجال ونساء المستقبل .

الطفل الذى يولد فى بيئة سليمة صحيا ونفسيا واخلاقيا قادر على تغيير العالم من حوله

وغيره وغيره ...

لنا عودة ان شاء الله .

http://www.youtube.com/watch?v=m3yqr5h2SLo&feature=related