صباح الخير يا مصر " للطيران "

[se_ Elsyed]

من حوالي أسبوعين إنضم إلينا مهندس مصري يأتي إلى السعودية لأول مرة .. فانا من باب التوفير قولت له إحجز التذكرة من عندك ولما تيجي ندفع لك الفلوس " فيها فرق اكتر من 500 جنية " المهم الولد بكل طيبه عمل كده وراح حجز عن طريق مصر للطيران " القاهرة - الرياض " وهذه الرحلة عادة تاخذ حد أقصى ساعتين ونص ... وبعثت له سواق الشركة ينتظره ويجيبه على الفندق وقولت له لما توصلوا الفندق كلمني عشان اجي أسلم عليه .. وانا أساساً ماكنتش رايح أسلم عليه ولا حاجة لأن حمايا كان باعتلي معاه حلاوة المولد وعسل نحل فقولت اعملها بجميلة ( نوع من الإستغلال السيء للمنصب jmb-) )

فالمهم وصل وروحت له الفندق لقيت الولد مفرهد وشكله كأنه طالع من خناقة فقولت له إيه يابني انت جاي من مصر مشي ولا إيه .. ففضل يسب في مصر للطيران وأصحابها واللي شار عليه الشورة دي .. فقولت له ليه .. عيب عليك كده إحنا لازم نشجع المنتج الوطني ..

اتاري البهوات بتوع مصر للطيران في رحلة يوم الخميس والقادمة للرياض .. بيعدوا على الإسكندرية ينزلوا ناس ويحملوا نقلة من هناك جايه الرياض .. وطبعاً الركاب بتوع القاهرة يفضلوا متخشبين داخل الطيارة زي ماهما بغض النظر عن الوقت المستغرق في التنزيل والتحميل وبدون إن حد يكلف خاطره ويُخبر المواشي اللي هما الركاب أنهم هايحودوا على إسكندرية وإن ده بيستغرق لا يقل عن 3 ساعات ...

أنا عن نفسي شفت بعيني معاملتهم السنة اللي فاتت لما الشيطان وزني لأول مرة وقولت أجرب مصر للطيران وحرمت بعدها .... عقليات متخشبة من اول مكتب الحجز هنا الذي لا يعترف بشيء إسمه حجز بالتليفون او بالإسم بل يجب عليك ان تشتري التذكرة ويا ويلك لو غيرت ميعاد سفرك او مجرد التفكير في إلغاء الحجز وإعادة التذكرة فلك الويل والثبور وعظائم الأمور .. لدرجة إني حجزت رحلة داخلية في مصر من هنا ودفعت 3 أضعاف التذكر عشان أريح دماغي ... لكن لما جيت أغير في المواعيد من مكتبهم اللي في روكسي .. أدبوني بصراحة وخلوني أقول حقي برقبتي ...

يُتبع

[أسد]

اتاري البهوات بتوع مصر للطيران في رحلة يوم الخميس والقادمة للرياض .. بيعدوا على الإسكندرية ينزلوا ناس ويحملوا نقلة من هناك جايه الرياض .. وطبعاً الركاب بتوع القاهرة يفضلوا متخشبين داخل الطيارة زي ماهما بغض النظر عن الوقت المستغرق في التنزيل والتحميل وبدون إن حد يكلف خاطره ويُخبر المواشي اللي هما الركاب أنهم هايحودوا على إسكندرية وإن ده بيستغرق لا يقل عن 3 ساعات ...

رحلة يوم الخميس من زمان وهي القاهرة / الإسكندية / الرياض ...

والعودة الرياض / الإسكندرية / القاهرة

وواضح وانت بتاخد التذكرة ان زمن الرحلة بيكون حوالي 5 ساعات ...

هذه الرحلة مجدولة ونظامية من عدة سنوات ...

زطبعاً هي منظمة بالشكل ده لخدمة أهالي إسكندرية

وهذا طبيعي ... فليس كل المصريين من سكان القاهرة ...

أما نظام الحجز على مصر للطيران .. فهو بالفعل نظام بدائي ومتخلف جداً ... إذا نم عن شئ فهو ينم عن مستوى عقلية المسئولين عن قطاع الطيران في مصر وتخلفهم ...

وهذا لا يمنع أن الخطوط السعودية بدأت تطبق غرامات على من يغير أو يلغي موعد سفره بعد الحجز .. أعتقد أنهم بدأوا في تطبيقه من شهر مايو 2004 ، ولكني لا أعرف تفاصيله..

[ragab2]

السمة الغالبة فى مصر

أن المهملين هم الذين يترقوا

وهم أصحاب الربط والعقد

وهم أصحاب القرار

وهم المخربون فى البلد

[se_ Elsyed]

رحلة يوم الخميس من زمان وهي القاهرة / الإسكندية / الرياض ...

والعودة الرياض / الإسكندرية / القاهرة

وواضح وانت بتاخد التذكرة ان زمن الرحلة بيكون حوالي 5 ساعات ...

هذه الرحلة مجدولة ونظامية من عدة سنوات ...

وهل حضرتك مصر للطيران بتفترض إن كل البشر عارفين المعلومات دي وسافروا قبل كده ولفوا الدنيا طول وعرض ... وليه ما يكلفوش نفسهم ويكتبوا مسار الرحلة في التذكرة ؟

وهذا لا يمنع أن الخطوط السعودية بدأت تطبق غرامات على من يغير أو يلغي موعد سفره بعد الحجز .. أعتقد أنهم بدأوا في تطبيقه من شهر مايو 2004 ، ولكني لا أعرف تفاصيله..

ليس صحيحاً فمن ضمن مجموعة شركاتنا لدينا وكالة حجز طيران وكل يوم أغير وأبدل في الحجوزات وانا قاعد بالتليفون ... ومش انا بس ولكن هذا هو النظام المتبع في السعودية كلها .

المهم اكملكم موضوعي ... لما نزلت مصر قولت أغير ميعاد رحلتي داخل مصر وأسرق كمان 3 أيام من الشغل وأأخر عودتي شوية وبالفعل ذهبت لمكتب مصر للطيران بميدان روكسي في الفترة المسائية وتقريباً كل الموجودين على الكاونتر ستات ... وكلهم بلا إستثناء غضب ربنا على وشهم وكل واحده مضروب 100 شوز على دماغها وبتعامل الناس بمنتهى القرف ... فكان حظي إن قدامي مجموعة من الشباب الكويتيين وكان لديهم إستفسارات فالمهم الموظفة شطفتهم واديت لهم درس في الأخلاق لمجرد ان ولد منهم تجرأ وبعد ما وصل للباب رجع تاني يستفسر عن حاجة فقالت له إنه لازم يحجز دور تاني ويقف ساعة ولا حاجة وبعدين يسأل !!!!!

جه دوري بقى فقفلتها في وشي وإن جميع الخطوط الداخلية مليانة طب يا ستي دوري هنا ولا هنا ... إنسى ...

جينا بقى على ثالثة الأسافي ... تجرات وقولتلها عايز أغير ميعاد العودة فتفضلت علي ولقت مكان فاضي وقولت لها لو سمحتي إديني برنت أوت واخذت موقف دفاعي وخبيت وشي زي الملاكمين لأن معالمها إتغيرت وكان واضح إنها هاتتحول وتقوم ضرباني بوكس في الكشافات .. فقالت لي ماينفعش روح هات جواز سفرك .. قولت لها حضرتك انا ما باشيلش جواز سفري وانا في مصر لأن الدكتور محذرني من حمل الأثقال عشان مايجيليش فتاق ... يمين شمال قالت لي انا عدلته في الجهاز أما البرنت فلازم تجيب الجواز ... فمشيت بخيبة أمل وماروحتش تاني أحسن تقتلني وكمان ماعنديش وقت أضيعه في مشاوير عبيطة زي دي ..

جه اليوم الموعود للسفر .. ومن عاداتي السيئة بإني لا أستطيع الإنتظار في المطار وبأحب أروح والطيارة تكون عل الرن واي ... يقوم امين الشرطة باصص في الجواز وفي التذكرة وفيها التاريخ القديم ويقول لي إيه ده يا سيد ؟.. دي بتاريخ قديم فقولت له يا معالي باشا ما انا عدلت الحجز وممكن تدخل معايا للكاونتر وهما هايلاقوا التعديل على الجهاز .. قال لي أسف .. إستنى على جنب لحد ما يوصل مندوب مصر للطيران ويحل لك المشكلة دي ... كل ده وخلاص فاضل نص ساعة على الإقلاع .... وفضلت ملطوع ووالله العظيم منظري كان عامل زي التلميذ اللي متذنب ووشه في الحيط لحد فين وفين لما شرف البيه بتاع مصر للمراجيح ودخلت جوه و كان فاضل دقايق قليلة على الإقلاع وجه واحد كبير منهم وقال أقفل الكاونتر وروح إنت وهو الطيارة هاتطلع خلاص وانا اتحايل عليهم عشان أسافر لأن الشغل إتصلوا بي ومحتاجين لي ... والحمد لله إستجابوا لطلبي ومنحوني هذه الفرصة .... أفلام عبيطة ونظام متخلف غبي ...

وسبق ان حكيت إن زوج اختي حصل معاه نفس السيناريو ده بالظبط أثناء اجازته اللي كنا مظبطينها مع بعض السنة اللي فاتت.. فعشان يشجع المنتج الوطني حجز من الدنمارك على خطوط مصر للطيران ... والشيطان وزوا في مصر وراح يعدل الحجز في مكتبهم بميدان الاوبرا على ما أعتقد يقوم الموظف لما يشوف جوازت سفره وعائلته الاوروبية يقول له عايزين 200 جنيه يا سيد .. فقال له ليه ؟ قال له تأكيد الحجز بـ 50 ج للجواز وعشان خاطرك هانعمل لك خصم وناخد منك 140 ج على الـ 4 جوازات... فرفض ان يدفع لأنه مصري مش هندي وكل جريمته ان جواز سفره اوروبي .. فقال له ممكن تروح المكتب الرئيسي اعتقد في شارع الألفي .. فدخل لمدير المكتب وحكى له على اللي حصل هناك يقوم الرجل يقول له بالحرف الواحد .. دول موظفين حرامية ولاد كلب ... لا مؤخذه على الكلمة " وتأكيد او تغيير الحجز في مكاتبنا مجاناً ....... لا تعليق.

[Modest]

يبقى لمصر للطيران ميزة هامة جداً تميزها عن الخطوط السعودية (لإن الكلام هنا عن السفر بين مصر و السعودية) و هو التسامح في الوزن إلى حوالي الضعف (و اللي عايش في السعودية عارف الهدايا و هو نازل أجازة بتوزن قد إيه jmb-) ) .. و لا أدري هل هذا يحدث على حساب سلامة الرحلة أم لا لكني أعتقد أنهم لا يجرؤا على تخطي إجمالي الوزن المسموح على الطائرة. ;)

عندي نصيحة هايلة لك يا س س

إنت بدل ما توجع قلبك مع مكاتب مصر للطيران اللي في القاهرة .. إنت روح مكتب الاسماعيلية أو بورسعيد مثلاً هاتلاقيهم قاعدين فاضيين نسبياً و هاتلاقي نفسك سافرت و اتفسحت و أكلت سمك و خلَّصت موضوع التذكرة في وقت أقل من وقت نزولك وسط القاهرة yaw:

تم تعديل 31 مايو 2004 بواسطة Modest

[سقراط المصري]

لي مواقف مع مصر للطيران ابسطها ان انا استخدمت تليفوناتهم لفرع المانيا من على النت.

بدأت اتصل بأحد التليفونات فردت علي الانسر ماشين بالالماني بنفس الترتيب الاتي:

هنا ابراهيم ابو خليل( اسم افتراضي)

سيب رسالتك لعد الصفاره.

..

طبعاً انا ارتبكت جدا وقفلت السماعه بدون ترك رساله .....ليه

لاني متعود ان اسمع مثلاً صباح الخير او اول جمله تكون :

هنا فرع مصر للطيران

انا لم اعرف هل ابراهيم ابو خليل هي نمره منزل ولا دكان بقاله ولا هو موظف مصر للطيران.

واذا كان الباشا ابو خليل مفكر نفسه اسم علم مثلاً فمن ابسط الامور انه يشير في رسالته الصوتيه لاي هويه لمصر للطيران، ولا هي كان شركه ابوه.

والي مواقف اخري.

سقراط

[Cleo]

على فكرة نظام الطيارات اللى بالنفر، و اتنين روما... اتنين روما و التى تفاجئ الكثير من الركاب و لا تكون هذه الرحلات مجدولة على التذكر، تتبعها الكثير من شركات الطيران و خاصة بعد ارتفاع تكاليف السفر و إفلاس الكثير من شركات الطيران نتيجة أحداث 11/9... و لقد ذقت منها الأمرين على طيران إيبريا الإسبانى حيث أن هذه الرحلات المفاجئة أدت إلى أن "تفوتنى" الطيارة فى إحدى الوصلات...

و العادى فى طيران إيبريا مثلا أن تتأخر حوالى ساعة على الأقل (أختى و زوجها و معهما ثلاثة أطفال تأخروا 13 ساعة على إيبريا...!!) و لم نتلق منهم أبدا كلمة اعتذار....!!!! (إجمالى رحلاتى على إيبريا داخل و خارج إسبانيا حوالى 6 رحلات كلهم بترانزيت غير مجول و تأخير فى القيام على الأقل ساعة) ..!!!

و كانت مرة واحدة التى سافرت فيها على مصر للطيران القاهرة باريس - القاهرة...

ففى الرحلة الأولى القاهرة باريس قامت الطائر ة فى ميعادها المحدد و تلقينا خدمة ممتازة.. و لكن فى رحلة باريس القاهرة تأخرنا ساعة... و تم إخطارنا فى مطار أورلى بذلك و تم صرف مشروب لكل راكب فى المطار على سبيل الاعتذار...

أيهم أحسن؟؟ مصر للطيران ولا إيبريا ؟؟

[أسد]

إقتباس 

وهذا لا يمنع أن الخطوط السعودية بدأت تطبق غرامات على من يغير أو يلغي موعد سفره بعد الحجز .. أعتقد أنهم بدأوا في تطبيقه من شهر مايو 2004 ، ولكني لا أعرف تفاصيله.. 

ليس صحيحاً فمن ضمن مجموعة شركاتنا لدينا وكالة حجز طيران وكل يوم أغير وأبدل في الحجوزات وانا قاعد بالتليفون ... ومش انا بس ولكن هذا هو النظام المتبع في السعودية كلها .

الخبر صحيح 100% ، ولكني لا أعرف تفاصيله بالضبط ، وهل هو يطبق على الراكب أم على مكتب الحجز.

أما عن الحجز عن طريق التليفون فممكن لمصر للطيران أيضاً ولكنه بقيود معقدة وهي شرط شراء التذكرة قبل فترة طويلة أثناء فترة الذروة.

أما الخطوط السعودية فالحجز عليها أيسر مئات المرات ، فيمكنك أيضاً الحجز عن طريق الإنترنت من الموقع www.saudiairlines.com وهي خدمة جيدة.

وفي موسم أجازات الصيف البعض يفضل مصر للطيران علشان الوزن المضاعف المسموح به. وعلى من يختار ذلك أن يوافق على السلبيات الأخرى.

ما علينا .. بالتأكيد .. ومما لا شك فيه أن مصر للطيران فيها الكثير والعديد من السلبيات ...

ولكن أسوأ ما في مصر للطيران من وجهة نظري ، هو أنه يجب عليك تأكيد الحجز عند العودة أو إذا كنت مواصل في كل محطة أو بلد. وبدون ذلك يعتبر حجزك غير مؤكد ، وقد يلغى.

[Farah]

ولكن أسوأ ما في مصر للطيران من وجهة نظري ، هو أنه يجب عليك تأكيد الحجز عند العودة أو إذا كنت مواصل في كل محطة أو بلد. وبدون ذلك يعتبر حجزك غير مؤكد ، وقد يلغى.

ومش كده وبس دا انت ممكن تكون مأكد الحجز وموضب الشنط

وبقدرة قادر تروح المطار يقوللولك مفيش مكان تعالي بكره

اه والله دا حصلي اخر مره ودي من مده لاني من مقاطعي مصر للطيران

كمان الخدمه داخل الطائره المضيفات كل مره تقدملك كوب ماء كأنها اشتريته من مالها

لو حصل وسألت اي سؤال كأنك دوشت الذات الملكيه

بالرغم ان ده غلط وانا عارفه لكن وصلت لقرار من زمان

لو مفيش تذاكر الا علي مصر للطيران بالغي السفر

[se_ Elsyed]

يبقى لمصر للطيران ميزة هامة جداً تميزها عن الخطوط السعودية (لإن الكلام هنا عن السفر بين مصر و السعودية) و هو التسامح في الوزن إلى حوالي الضعف (و اللي عايش في السعودية عارف الهدايا و هو نازل أجازة بتوزن قد إيه  jmb-) )

إنت بتتكلم عن مين يا موديست يا حبيبي ... والله العظيم العكس هو الصحيح من خلال تجربتي مرة ووالدتي سافرت عليها مرة وزملائي لما بأوصلهم ..

طب خد عندك القصة دي ... من 3 سنوات والدتي إتصلت وقالت لي يا س س يا ولدي أهل النجع بيسلموا عليك وبيجلولك المقشة البلح اللي عندنا باظت وإبعت لنا واحده توماتيكي .. فبالصدفة صديق عزيز لي نازل قومت شاري المكنسة وباعتها معاه وموصله المطار ببلاش كمان ( يا بلاش ) وكان مسافر على إيه ... برافو عليك على مصر للمراجيح .. والأقيلك موظف الكاونتر إنتفض وإلا يحمل له وزن 10 ك زيادة .. يا عم يهديك يرضيك وهات راسك أحلقهالك قصدي أبوسها .. أبداً روحت قولت له إنت متغاظ من المكنسة .. صح ؟ وروحت واخدها تاني ولقيت واحد ذوق جداً واقف معاه شنطة يد فقط وقال لي هات المكنسة وأنا أسلمها لصديقك في مطار القاهرة .. صاحبك بتاع الكاونتر شاف كده وإتجنن وفضل يحذره إن ممكن يكون فيها متفجرات أو حشيش أو على الأقل شارينها بالتقسيط وعليها كمبيلات .. والتاني راح أفحمه وقال له ان مسئول مسئولية كاملة.

يحكي لي صديق أول أمس بإنه سافر على مصر للمراجيح والرحلة إتاخرت 6 ساعات ماحدش عبر أشكالهم وقال لهم كلمة حلوه تبل ريقهم ...

وسافر مرة بعدها على الخطوط السعودية والرحلة إتأخرت ساعتين فقط فضلوا يعتذروا للركاب وقدموا لهم وجبات وعصير إحساساً بالذنب ... وده حصل معايا برضوا

المسألة ليست في فرق إمكانيات ولكنها مسألة ذوق وناس بتتعلم إزاي تعامل البشر ...

من الطرائف والنوادر التى جعلتني أضحك من اعماق معاميقي .. إن من حوالي سنة كده قرأت إن الحكومة التايلندية تناشد مواطنيها بزيادة عدد إبتسامتهم نتيجة لملاحظتها إن عدد السياح إنخفض ... فكل مواطن مطلوب منه بالصلاة عالنبي تارجت وقدره عد 15 إبتسامة من القلب وعدد 5 إبتسامة صفره .

[فــيــروز]

الحقيقه انا لم اركب طيران خارجى بتاتا jmb-)

لكن احدى صديقاتى كانت سافرت على مصر للطيران من قبل و قالت جمله لا ازال غير قادره على تخيل حدوثها yaw:

هى قالت و العهده على الراوى ان المضيفات ما ان تتحرك الطائره و تقلع يتحررن من الاحذيه الرسميه اللى طالعين بيها الطياره و يلبسوا شباشب !! ;)

[الفهلوي]

متضايقين علشان 3 ساعات .امال العبد لله يعمل ايه الى قعد 24 ساعة بجد 24 ساعة فى مطار ابوظبى .ياجماعة المفرض يسموها طرائف وغرائب مش مصر للطيران .

ومقلقوش على الى بيحصل على سير استقبال الحقائب وعلى الزحمة المميته عليه .فى الاخر اقول عليه العوض ومنه العوض

[kokowawa1979]

الإخوة الأفاضل هنعيد ونزيد نرجع نقول القط يموت في خناقه !!

صحيح كل موظفين مصر للطيران بلا استثناء بيعملولهم كشف هيئة في الرخامة والغلاسة وبالمرة الغتاتة واللي بيعدي يعينوه ده طبعا بعد وجود واسطة قوية داخل مصر للطيران !!

ليه باقول القط يموت في خناقه لإن مصر للطيران بتعمل فينا البدع لكن داخل كل واحد فينا حب الانتماء وبالتالي يقوم بتشجيع مصر للطيران على الرغم مما يفعله فراعنة الموظفين فينا إلا أننا نعود ونقول بلدنا أولى بفلوسنا .

وقد قمت بالتعامل مع شركات طيران ثلاثة :

الأولى مصر للطيران بالطبع وهي المفضله لى ولأسرتي على الرغم من مساوئها العديدة بحكم الانتماء

الثانية هي إير فرانس والتي اضطررت للسفر عليها لعدم وجود حجز على مصر للطيران في وقت من الأوقات وهي السفرية الوحيدة التي مازالت في ذاكرتي حتى الآن لدقتها المتناهية في الذهاب والعودة صدقوني بالدقيقة 9.30 يعني 9,30 علاوة على تفاني طاقم الخدمة في خدمتك والإبتسامة التي تعلوا وجوههم باستمرار مش تكشيرة على وجه المضيفة ماتعرفش منها ده قفاها واللا وشها !!!

الثالثة وهي طيران الإمارات وهي نفس الفرنسية تماما

وبالطبع أسوأهم مصر للطيران بلا شك إلا أنني أقوم بالحجز لي ولعائلتي عليها حينما يتم تخييري من الشركة التي أعمل بها أي شركة طيران أرغب في السفر عليها حيث أن جميع تذاكر السفر يتحمل قيمتها الشركة فأبادر على الفور مصر للطيران فتبادر مسئولة العلاقات بضحكة رنانة وتقول : غنت مش قلت السنة اللي فاتت مش هتسافر على مصر للطيران مرة تلنية فأرد عليها : مانا باقولك كدة كل سنة لكن يظل ارتباطنا بمصر للطيران ارتباط انتماء للوطن .

وكل رحلة وانتم طيبين

[ماجد]

أخوانى :

سوف أحكى لكم عن تجربتى مع عدد من الخطوط الجويه:

الخطوط السعوديه Saudia:

مواعيد دقيقه - معامله عنصريه للركاب - طعام فاخر - هبوط قاسى

الخطوط المصريه Egypt air:

مواعيد غير دقيقه - اختيار سيئ للعناصر البشريه - طعام متوسط - هبوط رائع

اذكر ان سائحه انجليزيه قالت عن المضيفة الشمطاء ذات الماكياج الصارخ انها هى الساحره الشريره

الخطوط الهولنديه KLM:

مواعيد دقيقه - معامله عنصريه للركاب - طعام متوسط - هبوط متوسط

الخطوط الانجليزيه British Airways:

مواعيد دقيقه- معامله ممتازه - طعام سيئ - هبوط متوسط

الخطوط الفرنسيه Air France:

مواعيد دقيقه- معامله متوسطه- طعام متوسط - هبوط متوسط

الخطوط السنغافوريه Air Singapor:

مواعيد دقيقه- معامله ممتازه - طعام ممتاز- هبوط متوسط

و انا ارشح الأخيره لكى تحتل المرتبه الأولى عن كل ما سبق

و بالنسبه لتقييم نوعية الهبوط فالهبوط القاسى يكون هبوطا صحيحا جدا بالنسبة للطيار و سيئ جدا بالنسبة للركاب و العكس صحيح

تم تعديل 28 يونيو 2004 بواسطة ماجد

[فــيــروز]

و بالنسبه لتقييم نوعية الهبوط فالهبوط القاسى يكون هبوطا صحيحا جدا بالنسبة للطيار و سيئ جدا بالنسبة للركاب و العكس صحيح

أنا فعلا كنت هاسال عن تقييم الهبوط !! :rolleyes:

خاصة انى كنت حين اسمع ان الركاب يثنون على روعة الهبوط مع مصر للطيران مافهمش يعنى ازاى الواحد يعرف ده هبوط حلو ولا وحش !! :lol:

بيحس بايه يعنى !! :D

كذلك ما المقصود بالمعامله العنصريه !!

تم تعديل 28 يونيو 2004 بواسطة فــيــروز

[kokowawa1979]

فيروز كتبت :

الركاب يثنون على روعة الهبوط مع مصر للطيران

فعلا طيارين مصر للطيران يتميزون بالكفاءة العالية في عملية الهبوط حيث أنه عند بداية ملامسة العجلات لأرض المطار لاتشعرين بأن الطائرة قد هبطت بسلام حيث هناك بعض الطيارين بالشركات الأخرى يجعلك تشعرين بان زلزال أو عاصفة قوية ضربت الطائرة فتشعرين برجه عنيفه واهتزازات حتى وقوف الطائرة تماما بينما طياري مصر للطيران يسيطرون تماما على المكابح ولهذا تشعرين بمجرد هبوط الطائرة وملامسة العجلات الأرض وكأن الطائرة قد رست على الأرض تماما

أما أمنا الغولة المضيفة فحدث عنها ولا حرج وبصراحة التعامل مع المضيفين الرجال أرحم بكتير من التعامل مع الجنس الغير لطيف في كل شيئ ومضيفي مصر للطيران يتميزون بأدب جم فعلا على العكس من المضيفات اللاتي يتميزن بالعجرفة ويتناسين أنهن دخلن مصر للطيران بواسطة وليس بمجهودهن !!

[فــيــروز]

حيث هناك بعض الطيارين بالشركات الأخرى يجعلك تشعرين بان زلزال أو عاصفة قوية ضربت الطائرة فتشعرين برجه عنيفه واهتزازات

دى حاجه مخيفه فعلا :rolleyes:

خصوصا فى ظل حوادث الطيران التى تكاثرت مؤخرا :D

المضيفات اللاتي يتميزن بالعجرفة ويتناسين أنهن دخلن مصر للطيران بواسطة وليس بمجهودهن !!

طيب ما ده سبب كافى جدا -بالنسبة لهم- للعجرفه :lol:

[أسد]

فيروز كتبت :

إقتباس 

الركاب يثنون على روعة الهبوط مع مصر للطيران 

فعلا طيارين مصر للطيران يتميزون بالكفاءة العالية في عملية الهبوط حيث أنه عند بداية ملامسة العجلات لأرض المطار لاتشعرين بأن الطائرة قد هبطت بسلام حيث هناك بعض الطيارين بالشركات الأخرى يجعلك تشعرين بان زلزال أو عاصفة قوية ضربت الطائرة فتشعرين برجه عنيفه واهتزازات حتى وقوف الطائرة تماما بينما طياري مصر للطيران يسيطرون تماما على المكابح ولهذا تشعرين بمجرد هبوط الطائرة وملامسة العجلات الأرض وكأن الطائرة قد رست على الأرض تماما

أركب مصر للطيران كثيراً جداً .. وقد أشرت إلى ذلك في مواضيع سابقة ..

عند الهبوط .. يجلس معظم المضيفون والمضيفات في مؤخرة الطائرة .. وعند الهبوط بالضبط .. يبدأ المضيفون في التصفيق بحماس .. وذاتياً ولا إرادياً .. يصفق أغلب ركاب الطائرة .. مما يوحي بأن الطيار قام بعمل رائع ..

وإستثنائي ..

وقد أثار فضولي هذا الموضوع .. وفي أحد الرحلات .. كان المقعد المجاور لي خالياً .. وجلس فيه أحد المضيفين .. (طبعاً هذا مخالف للقواعد والتعليمات والنظم في الشركات الأخرى) .. وتجاذبت معه أطراف الحديث .. وسألته عن هذا الأمر .. فقال لي أن موضوع التصفيق هذا يتلقون تعليمات بأن يفعلوا ذلك .. علشان الترويج لمصر للطيران..

والحقيقة .. أنه ليست هناك سمة محددة لهبوط الطائرة المصرية على ارض المطار .. أحياناً كويسة وأحياناً سيئة ...

وكذلك باقي خطوط الطيران ...

[فــيــروز]

عند الهبوط .. يجلس معظم المضيفون والمضيفات في مؤخرة الطائرة .. وعند الهبوط بالضبط .. يبدأ المضيفون في التصفيق بحماس .. وذاتياً ولا إرادياً .. يصفق أغلب ركاب الطائرة .. مما يوحي بأن الطيار قام بعمل رائع ..

:lol:

يا ولاد الذين !! :D

مش ممكن والله اللى المصريين فيه يا رب :rolleyes:

ده نظام سقفه للنبى بتاع فيلم 30 يوم فى السجن !!

:lol: :lol:

[ماجد]

أختى الفاضله

عملية الهبوط تبدأ من مسافة بعيده قبل الوصول للمطار و لا تختلف فى اجراءتها من طيار لآخر سوى فى الجزء الأخير منها و هى تسمى Touch down او ملامسة الممر - ترجمه ضعيفه- المهم هناك هبوط آلى أو هبوط اعمى و هبوط يدوى و الأول يستلزم تجهيزات بالمطار و الطائره و معظم المطارات الكبيرة و الطائرات الحديثه مزوده بها و تقوم الطائره باجراءات الهبوط تحت مراقبة الطيار و هى تقوم بهبوط عنيف حسب تعريف الركاب ولكنه يتيح للطيار توقف آمن باستخدام كامل طول الممر و النوع الثانى من الهبوط يستخدم حواس الآنسان للقيام بملامسة الممر بشكل تدريجى جدا بحيث يكون هبوط ناعم و لكنه يستهلك جزءا كبيرا من الممر فى هذه العمليه يضطره لاستخدام الفرامل وعكس المحركات بشكل اكبر من النوع الأول و هذا نوع من الأستعراض الخطر و الممقوت

gt: rs: lo::

أرجو أن اكون قد اجبت على استفسارك