الطريق إلى الهاوية

[Abouhemeed]

بسم الله الرحمن الرحيم

دعوة على العشاء و جاتني

من واحد صاحبي و ما هوش صاحبي

معرفة شغل كده على الماشي

حبني لوجه الله و مخباشي

محبه من غير أي غرض

و لا طلب مني و لا إقترض

بس حس إني ممكن أعترض

و السلفة ممكن تترفض

قلت أروح حد على إيده ضرب

ليعزمني على أكله و شرب و طرب

أشوف دنيا الناس فيها حسب

فلوسهم يا تركب يا تتركب

بس لازم أكون شاطر و حويط

لا أوعد بشيء يورطني غويط

لأحسن يكون فاكرني عبيط

أنا في الشغل سليم بدون تفريط

رحت المكان اللي اتفقنا عليه

مطعم فخيم في فندق إنما إيه

و ناس كبارة كتير قاعدين فيه

شافني داخل بعتلي واحد بيه

قال الباشا هناك مستنيك

أتفضل معايا راح أوديك

لقيته قاعد زي الديك

و فراخ كتير قاعدين حواليه

أقصد ستات زي القشدة

تشوفهم تجري في جتتك شطه

غزلان كلهم غير مراتي بطة

إسفوخس عليكي يا بنت الإيه

قال أقعد شرفت يا بيه ..

تحب بقى تشرب إيه ؟

سوسو ... الراجل مكسوف عودينا عليه

و سوسو ما صدقت و الواجب قامت بيه

و نستني أكلت و شربت إيه

حتى كل الورق اللي مضتني عليه !!

أبو حميد المصري ‏30‏‏/‏05‏‏/‏2004‏

[Abouhemeed]

حد يعرف سوسو ؟؟ :)

[Abouhemeed]

عاوزين سوسو ... عاوزين سوسو ... :)

[ragab2]

حلوة

يا أبو حميد

الله ينور

[Abouhemeed]

شكرا يا أستاذ رجب

دائما تشجعني

يظهر إنك قارئي الوحيد

و حقيقة هذا يشرفني

[kfaya]

حلوة يا أبو حميد ..... :)

سوسو مضيتك على اية ؟؟؟؟؟

يا ترى فاكر ؟؟؟؟؟

[Abouhemeed]

لو كنت فاكرسوسو مضتني على إيه كنت قلت !