هاني سرور براءة ... أومال مين المتهم ... أنا ؟

[se_ Elsyed]

من المرات القليلة اللي أجد دموعي تنزل بشكل لا إرادي وأنا أتابع قضية معينه كانت واضحة للعيان وكل أركان الجريمة الكاملة متوفره فيها وفي الاخر تطلع هههههههه فشنك

يعني قضية هشام طلعت مصطفى ممكن يلكلكوها ويقولوا إنهم لقوا بصمات المدعو إلكس اللي عاوزين يلزقوها له في مسرح الجريمة

لكن قضية هايدلينا كل الأركان موجودة .. مصنع أكياس دم ... أكياس دم ملوثة ... مصابين بالجملة من جراء ذلك ... يبقى فاضل إيه تاني ؟

تصدقوا بالله ... صدفة نادرة الحدوث .... لسه من 5 دقايق متفرج على فيلم إسمه " الكبار " تقريباً بقى له عدة أيام في السنيما .. لكن لقيت نسخة أقرب للدي في دي وفي منتهى النقاء للفيلم ..... قصة محترمه وفيلم رائع لعمرو سعد وخالد الصاوي ومحمود عبد المغني .... بيتكلم عن قضايا شبيهه بقضية هاني سرور بتاع هايدلينا

أنا عاوز أسأل سؤال لريسنا اللي هايقف قدام ربنا في يوم الحساب ..

إزاي تكون رئيسة اللجنة التشريعية المطالبة بأحترام القانون وأصدار التشريعات وأيضاً محاسبة اعضاء البرلمان الذين يخرجون عن القانون .. الست المزورة الشايبه العايبة أمال عثمان .. هي هي نفسها تكون محامية أولى من ضمن صف المحامين اللي بتترافع عن أعضاء برلمان متورطين حتى أنوفهم في قضايا فساد زي هاني سرور وهشام طلعت ...

إزاي تيجي دي ؟

إزاي يبقى القاضي هو محامي عن المتهم في نفس الوقت ؟

بيحصل فين الكلام ده في العالم ؟؟؟؟؟؟؟؟؟؟ظ

أسدلت محكمة النقض الستار نهائيا على قضية أكياس الدم الفاسد المتهم فيها الدكتور هانى سرور رئيس شركة هايدلينا للمستحضرات الطبية وشقيقته "نيرفانا" بأن أصدر المستشار إبراهيم عبد المطلب حكما قضائيا صباح اليوم السبت بنقض حكم حبس سرور ونيرفانا 3 سنوات وبراءتهما من الاتهامات المنسوبة إليهما.

يأتى هذا الحكم بعد تفجير القضية بـ3 سنوات وسط انشغال الرأى العام بكل كبيرة وصغيرة من تفاصيل القضية التى بدأت بتحقيقات مكثفة فى نيابة الأموال العامة العليا انتهت بإحالة سرور إلى محكمة الجنايات وتحديدا إلى دائرة المستشار أحمد عزت العشماوى المشهور بأحكامه الرادعة فى قضايا الفساد.

وصول أوراق القضية إلى المستشار العشماوى أعطى ارتياحا نسبيا لقطاع عريض من الشعب المصرى بأن سرور سيلقى حكما رادعا ولن يشفع له كونه عضوا بمجلس الشعب أو وكيلا للجنة الاقتصادية أو تربطه علاقات بشخصيات نافذة فى الدولة، ومع أولى جلسات المحاكمة أمر العشماوى بحبس هانى سرور احتياطيا كما أمر باستدعاء الدكتور حاتم الجبلى وزير الصحة للإدلاء بشهادته فى القضية وهو ما اعتبر مؤشرا وقتها بارتفاع درجة حرارة القضية.

خمس جلسات ساخنة رأسها عشماوى وسط تكثيف إعلامى لكن ما حدث بعد ذلك لم يكن فى الحسبان وهو غياب العشماوى عن الجلسة السادسة بتاريخ 13 يناير 2008، حيث فوجئ جميع الحاضرين فى قاعة محكمة جنايات جنوب القاهرة بحضور عضو اليمين مترئسًا الجلسة وانتداب قاض آخر لاستكمال هيئة المحكمة، وهنا بدأ الهمس يسود داخل القاعة والجميع يردد سؤالا واحدا "لماذا غاب العشماوى.. إيه اللى حصل؟

الأخبار تناقلت من داخل القاعة إلى خارجها ثم إلى وسائل الإعلام وفى اليوم التالى انتشر الخبر اليقين وهو أن المستشار العشماوى تنحى عن القضية لكن الهمس ما زال موجودا خاصة أن الجميع لم يعلموا أسباب التنحى، وهل جاء عن إرادة شخصية أم بضغط من جهات عليا.

ساعات قليلة وانتشر خبر آخر مفاده أن المستشار العشماوى يرقد على الفراش بمستشفى السلام بحى المهندسين فى غيبوبة شبه تامة، ولم يتوقف الحديث عن غيبوبة العشماوى وأسبابها فى ذلك الوقت تحديدا خاصة أن سجله الصحى خالٍ من أى أمراض على الإطلاق.

خروج عشماوى من المستشفى لم يكن ليعود يجلس على كرسى العدالة ويحكم بين الناس مرة ثانية، إنما لينتقل إلى الدار الآخرة وتحديدا فى 14 مارس 2008 لتتفجر الشائعات حول وجود شبهات جنائية وراء وفاة العشماوى والربط بينها وقضية هانى سرور بالتزامن مع قرار خطير لأسرة العشماوى بعدم تشريح جثته لأسباب لا تريد الكشف عنها.

رحيل العشماوى لم ينه الجدل الدائر حول القضية،

بل زاد اللغط حولها خاصة أن فى ذكرى أربعين وفاته، طلبت أسرة العشماوى من "صحيفة الأهرام" نشر نعى مكتوب فيه الآيه القرآنية "ولكم فى القصاص حياة يا أولى الألباب" كأنها رسالة إلى مجهول لا يعلمه سوى أسرة العشماوى.

أول حكم فى القضية صدر فى 15 أبريل 2008 بعد 30 يوما تقريبا من وفاة العشماوى وقضى ببراءة جميع المتهمين فى القضية من الاتهامات المنسوبة إليهم إلا أن نيابة الأموال العامة العليا طعنت على الحكم وقبلت محكمة النقض الطعن وتم نظر القضية من جديد أمام دائرة المستشار محمدى قنصوة وبعد مرافعات طويلة امتدت لما يقرب من 20 ساعة لكبار محامى مصر وعلى رأسهم المستشار بهاء أبو شقة ونجله الدكتور محمد والدكتور عبد الرؤوف مهدى والدكتورة آمال عثمان، قضى المستشار قنصوة بحبس المتهمين لفترات مختلفة تتراوح من 3 إلى 5 سنوات وقدم دفاع سرور طعنا على الحكم أمام محكمة النقض والتى قضت اليوم بقبول الطعن وبراءة سرور من الاتهامات المنسوبة إليه.

الجديد فى حكم اليوم كما يقول المستشار بهاء أبو شقة رئيس هيئة الدفاع عن سرور أن محكمة النقض قضت بنقض الحكم الصادر بحق هانى سرور وبرأته من الاتهامات المنسوبة إليه وفقا لتشريع قانونى جديد يطبق لأول مرة فى محكمة النقض المصرية بعد تعديله فى 2007.

وأوضح أبو شقة أنه من المعتاد فى محكمة النقض فى مثل تلك القضايا أن تقضى بنقض الحكم وتحديد جلسة لنظر القضية، أما بعد تعديل المادة 39 من القانون رقم 57 لسنة 1959 أصبح من حق محكمة النقض أن تقضى بنقض الحكم وتعديل العقوبات أو نقض الحكم وبراءة المتهم من الاتهامات المنسوبة إليه.

وفى الحالة الأولى وهى نقض الحكم وتعديل العقوبات فقد تمت تطبيقها فى قضية تسريب امتحانات المنيا، أما الحالة الثانية، وهى نقض الحكم وبراءة المتهم فتم تطبيقها للمرة الأولى فى قضية هانى سرور.

[se_ Elsyed]

فيلم الكبار ... بطولة هاني سرور وامال عثمان ونخبة من اللصوص

[herohero]

انت لسه دموعك بتنزل الواحد عنيه نشفت هتبكي ع ايه ولا ايه الواحد وصل لمرحله التبلد خلاص من كتر السواد والمآسي بفكر بجد ابقى متابع مخلص لمزيكا وميلودي وسيبك بقى ادي الواحد قاعد ة ولماتعك عادي هتعك عليا وع الكل وزي زي بقية الناس الدنيا تولع عادي

ياه سي السيد انت لسه عندك دموع بجد زعلتني هتدمع ع ايه ولا ايه

فعلا فيلم الكبار من الافلام الظريفه والواحد بيتبسط لما نلاقي افلام كده مش العبط بتاع اللمبي 16 جيجا كينجستون والهبل ده

عموما ياريت تبقى تاخد بالك من اغنيه الكبار بتاعت محمد محي

وياسلام كمان من اغنية احمد سعد لحظة ميلاد ف فيلم الديلر

http://www.youtube.com/watch?v=h4F82QSCH7k

http://www.youtube.com/watch?v=JnpjXpUwA4E

[مغتربة]

لالا فى فيلم احلى من فيلم الكبار

فيلم واحد من الناس

حقيقى كان كريم عبد العزيز مقنع اوى فيه

بس اتضح ان تمثيله فى الحقيقه اكثر اقناعا

دا انا سمعت انه نادر ندر انه يستقبل حماه على باب السجن

واجب برضه و لا ايه

[se_ Elsyed]

طب حد يفهمني

يعني كده لما طلع براءة .. معنى كده إكياس الدم زي الفل وإن الناس هي اللي كانت ملوثة من جوه وإن حتى المُتبرع ...

تخيلوا

حتى المتبرع كان بيتعرض لأرتفاع ضغط الدم وكان ممكن يحصل له انفجار في الدماغ لان الأكياس غير مطابقة للمواصفات وبتشفط الدم منه بمعدل أعلى من الطبيعي

يعني اتصور إن المتلقي ممكان يصاب بفيروسات او ما إلى ذلك

لكن حتى اللي عاوز يعمل خير بيخلوه يفكر ألف مره قبل ما يعمل كده ويقول لك لا يا عم أحسن افيص

-----------

مش فاهم الحته دي يا مغتربه

دا انا سمعت انه نادر ندر انه يستقبل حماه على باب السجن

مين حماه ؟؟؟

اوعي يكون مناسب مبارك ؟

مبارك ما عندوش بنات .. ما عندناش رئيس بيخلف بنات .. كله صبيان عشان التوريث وكده

[aimen]

سى السيد انت متعرفش ان حما كريم عبدالعزيز هو هانى سرور

[herohero]

انا وكنت سامع و العهدة ع الرواي ان في فرح كريم عبد العزيز هاني سرور كان جايب لبنته ورد بس 250 الف ياعيني ع النسايب اهو ده الحماة ولا بلاش

يابختك بحماك

[se_ Elsyed]

انا وكنت سامع و العهدة ع الرواي ان في فرح كريم عبد العزيز هاني سرور كان جايب لبنته ورد بس 250 الف ياعيني ع النسايب اهو ده الحماة ولا بلاش

يابختك بحماك

وكتاب الله ده لو حمايا لأغُزه

طب يديني 500 ج بس وأشتغل جنايني عنده وعند بنته وأزرع له ورد وفُل وخبيزه كمان

ربع مليون جنيه ورد .. ليه ورد أثري من اللي زرعه حسين رياض في فيلم رد قلبي ؟

[ابو محمد بن مصطفي]

واحد شريك فتحي سرور وعضو مجلس شعب وحمي كريم عبد العزيز ومعاه في القضية جوز اخت وزير الصحة الجبلي

عايزينه يتسجن فشر ... علي جسس الشعب كله ... ولا ليله واحدة

[جسار]

والله أنا نفسى أتصدت ، والواحد بدأ يقلق على نفسه ، أنا كنت مقاطع الجرائد

وماعرفتش أن المستشار العشماوى مات الا دلوقت رحمه الله ، وطبعا مفيش دليل مادى على شبهة

جنائية ولكن الظروف والقرائن المحيطة بتلك القضية تؤدى الى مثل هذا الاستنتاج المريع

وكأنها رسالة موجهة للجميع ومفادها يا أما تنفذوا اللى بنقولكم عليه ياأما .....

آديكم شايفين ، يعنى طيب وبعدين الواحد الغلبان وزيى ملايين حيعمل أيه فى جو المافيا

ده أذا كان رجل محترم وله مكانة فى المجتمع بين القضاة والكتاب والمفكرين مشهود له

بالنزاهة والطهارة أتعمل فيه كده ، يبقى فاضل أيه للمسحوقين أمثالنا

للمرء طريقان فى الحياة أما أن يكون مطرقة أو أن يكون سندان والافضل أن يكون مطرقة .

[herohero]

ماقولنا شوفوا فيلم الكبار واسمعوا اغنيه محمد محي فيه

وساعتها مش هتستعجبوا من اي شيئ

ماتعرفوش حظهم غريب المستشارين دول

المستشار اللي كان طلع حكم ارض مدينتي وان عقدها باطل ماااااااااااااااات ف حادثة

ومستشار اكياس الدم الفاسده مااااااااااااات

ربنا يرحمهم ويرزقنا بقضاه مخلصين ومحقين زيهم

[Amr Radwan]

احتفالات الوطني لا تتوقف

لا تعليق

فى مطعم فاخر بالمهندسين..

بالصور.. قيادات ونواب الوطنى يحتفلون ببراءة هانى سرور

الأربعاء، 4 أغسطس 2010 - 19:04

احتفال النواب ببراءة سرور

أقام نائب الزاوية الحمراء والشرابية إيهاب العمدة حفل عشاء فاخر بمناسبة حصول الدكتور هانى سرور عضو مجلس الشعب السابق وصاحب شركة هايدلينا للمستحضرات الطبية، على البراءة من تهمة التلاعب فى أكياس الدم، وذلك فى مطعم "بلكونة" بالمهندسين الذى تمتلكه الإعلامية بسمة وهبى.

حضر الحفل عبد العزيز مصطفى وكيل مجلس الشعب والدكتور شريف والى أمين الحزب الوطنى بالجيزة، والدكتور شيرين أحمد فؤاد وكيل لجنة الصحة ومصطفى السلاب وكيل اللجنة الاقتصادية ومصطفى الكتاتنى وكيل لجنة الصحة والحسينى أبو قمر وكيل لجنة الشباب وعلاء مكادى نائب المنيا وأحمد عبد القادر نائب كفر الشيخ وعثمان الدساوى نائب الغربية وعلى عطوة نائب جنوب سيناء ود.محمد عبد العال نائب مصر القديمة وفتحى جليد نائب المنيل والنائب عمر هريدى أمين صندوق النقابة العامة للمحامين ومن حزب الوفد النائب طارق سباق والنائب علاء عبد المنعم.

بدأ الحفل بكلمة ألقاها النائب عمر هريدى تغزل فيها بشخص الدكتور هانى سرور، طالبه فيه بالظهور الإعلامى والسياسى من جديد، ثم توالت كلمات النواب فى ذات السياق وكان آخر المتحدثين وكيل مجلس الشعب.

وفى النهاية شكر الدكتور هانى سرور الجميع على هذه المشاعر الرقيقة وعجز عن إكمال كلمته، عندما تحجرت الدموع فى عينيه.

تناول الحضور العشاء الفاخر وسط الحوارات وبعض القفشات عن السجن وذكريات الحبس وانتهى الحفل فى الساعة الثالثة من صباح اليوم التالى وسط أجواء مليئة بالحب والمشاعر المتبادلة بين الحضور وتواعد الجميع على اللقاء القريب فى سهرات رمضان.

http://elyoum7.com/N...?NewsID=262313

كتب دندراوى الهوارى ـ تصوير محمد صبحى

تم تعديل 8 أغسطس 2010 بواسطة Amr Radwan

[doha]

على فكره موت القضاة شيء عادي جدا وممكن اوي تكون صدفة .. ناس اعرفهم كان عندهم قضية مصيرية وكانوا مظلومين فيها بس معندهمش دليل واملاكهم كانت هتروح منهم وفي جلسة الحكم القاضي الله يرحمه مات لوحده موته ربنا قبلها يمكن بيوم او اثنين وعلى هذا تاجلت القضية وتغير القاضي والدنيا كلها بقت حاجه تانية خالص ..

ساعات بجد بيكون القدر اقوى من اي حبكه سينمائية ممكن حد يتخيلها ..

القضايا عاده بتاخذ وقت طويل جدا في التداول ومجال التقاضي اصلا كله ضغط وشد اعصاب وعشان كده وارد جدا ان الناس تموت فيها واي حد له قضية تستاهل وقعدت سنين يراجع نفسه كده هيلاقي اما القاضي مات او المحامي او حتى واحد من الخبراء ده لو مكانش احد الخصمين او كلاهما . . دي طبيعه التقاضي في مصر ..

ممكن جدا يكون العشماوي واحد من مئات والاف الناس الي لها علاقه بالقضايا وبتموت موته ربنا بدون اي شبهات ..

ده لو كان مات لوحده اما لو الحكايه فيها شبهة جنائية زي مالخبر بيقول فبجد بجد ياريت .. احنا مش عاوزين دليل على فساد كتير من المسؤولين في مصر وان البعض ايده طايلة لدرجه تفوق الخيال احيانا .. بس الي محتاجينه فعلا ان يكون في نماذج زي العشماوي الي لو صح الخبر فهو مات متمسك بقضيته ومتمسك بقول الحق برغم علمه التام بان خصمه قادر عليه .. لو صح ماذكر وبما اني مسمعتش عن العشماوي قبل كده ـ اعترف بجهلي ـ فاعتقد والله اعلم ان في ملايين عشماوي عايشين مابينا والقضة دي وان كانت دليل مكرر على الفساد فهي دليل من جهة تانيه على ان بجد في لسه في المصريين امل ..

ممكن تعتقدوا اني متفائلة بس فكروا فيها هتلاقوا ان كلامي صحيح ..