قولولي اللي عملته ده صح ولا غلط و حلال ولا حرام

[MZohairy]

كنت في أجازه لمدة شهر بقضيها في هامبورج بألمانيامع العائله

و قررنا نروح برا بالعربيه لأمستردام في هولندا نقضي يومين

المسافه بالعربيه حوالي 400 كيلو تقريبا

المهم

و احنا في امستردام دخلت محل نايك اللي بيبيع الملابس الرياضيه

و اشتريت جزمه رياضيه عجبتني و مفتحتش العلبه

رجعنا هامبورج و بعد يومين حبيت اجرب الجزمه

لقيت الفردتين شمال

:blink:

و طبعا ماكانش ممكن ابدا نرجع هولندا تاني عشان نرجع الجزمه لأسباب كتير

المهم جت لي فكره و نفذتها

روحت رايح لمحل نايك في هامبورج و اشتريت نفس الجزمه بالضبط (بعد ما اتأكدت انها سليمه ) و مفيهاش مشاكل

و رجعت البيت و شلت السليمه و حطيت مكانها الفردتين الشمال بتوع هولندا و روحت على المحل بتاع هامبورج و وريته انه باعلي الفردتين شمال

راح واخدهم و مرجعلي فلوسي

الخلاصه اني دفعت ثمن جزمه واحده و استلمت جزمه واحده

بس حملت خطأ محل هولندا لمحل المانيا

فهل انا كده غلطان؟

[ابو محمد بن مصطفي]

انت كده تبقي من الاحرار يا زوهيري

المصريين اهمه حيوية وعزم وهمه

والله اعلم.... انا شايف ان ده مش حرام ليه

لان المحل ببساطة هيرجع الفارغ قصدي الفردتين الشمال للمصنع....

لانه الخطأ حدث في قسم التعبئة وليس خطأك ولا خطأ الالمان و الهولندين انما خطأ المصنع

[se_ Elsyed]

غلط وستين غلط

مال عيشه بأم الخير

كان من الأولى عشان ضميرك يستريح إنك تسأل أي محل بيبيع نفس الماركة وتحكي له اللي حصل .. ولو قبل يبدلهم يبقى خير وبركه ... ولو ماقبلش يبقى عوضك الله يا أبو كمال

وإياك إياك نتقابل وتكون لابس المركوب ده

[Salwa]

صباح الخير يااستاذ زهيرى ..

شوف حضرتك ..

هو فعلا ف حالة بيع نفس الماركة ف محلات مخصوصة خصوصا ف اوروبا ..

سهل جدا انك تغير حاجة بحاجة بدون اى تعقيد .((ف احيان كتير بيرفضوا رد المبلغ ف حالة انك ترد البضاعة )) ..عموما بيكون مفيش تعقيد على اساس ان العملة واحدة وكله باليورو ..

فيه محلات ..كل بلد خاصة بنفسها ..

واحيانا فعلا ف نفس البلد كل محل خاص بنفسه ..( ف حالة الفرانكسيا مثلا ..الاسم والديكور واحد وحتى التعامل بشروطهم لكن كل واحد خاص بذاته )

ولكن؟؟

ف النهاية ........يعود كل ذلك على المصنع الاصلى ...وده فعلا ممكن يكون خطأ (( ف التعبئة وليس التصنيع )) بمعنى ؟؟

بالتأكيد ..ف محل آخر ....شخص آخر سوف يجد (( فردتين زى بعض ))

كان ممكن تصارحهم ببساطة..وحسب مفهوم من تتعامل معه ..(( ممكن يقدر موقفك وممكن يقول ..ملناش دعوة ))

حصل خير ...

بس متعملش كدة تانى ..

ونصيحة مهمة جداااا .........لما تشترى اى حاجة ..اى حاجة ...لابد تتأكد من صلاحيتها وتتأكد من التعبئة وتتأكد من كل شئ ..وان كانت ملابس تتأكد ان مفيهاش اى بقعة او اى قطع ولو بسيط ( اى ديفو يعنى )...و....حتى ان ذهبت لأى سفارة عربية (( تأخذ مثلا فيزا للحج او للعمرة ...ههههه...زى حالاتى مثلا )) ...تأكد ان الموظف كتب الاسم صح ..(( يعنى مثلا يعنى مثلا ....بدل ما يكتب ...عبد الحليم ...

كتب ....عادل حليم ..يعنى ترجم ترجمة فورية من اللاتينى للعربى ..ف مخه الضيق )) ..

وفعلا ....اكتشفناالخطأ ...تانى يوم كما حدث مع حضرتك ...لكن هذا كلفناتذكرة طائرة لمدريد وضياع يوم ..

فعلا يجب مراجعة كل شئ تفعله وهذاهوالصح ..

صباح الخير ... 

[لماضة مصرية جدا]

السلام عليكم و رحمة الله و بركاته

طب انا ممكن ااقول رايي المتواضع

هو انا حاسة بس الحاجة الغلط انك عملت القصة دي من غير ما تقول لبتوع المحل التاني....مش عارفة الافضل ان حضرتك كنت تروح للفرع اللي بيبع نفس الماركة و تحكيلهم الموضوع و كده و هما يقولولك

طب دلوقتي بقي....حضرتك جيت بالسلامة....و معاك العلبة....و معاك الشوز...طب ايه العمل

هو ينفع لو حد حس ان فيه حاجة ملخبطاه اوي....ينفع يطلع صدقة مثلا

ده رايي...مش عارفة

و حمد لله علي سلامة حضرتك

[Diab]

غلط يا أبو إياد

ليه لأتك كدة شككت البائع اللي في هامبروج في نفسه واتحسب عليه غلط مع انه مظلوم

ولاتزر وازرة وزر أخري

ايه ذنب غلطة بائع في هولندا تشيلها للمسكين بتاع هولندا

تم تعديل 21 يوليو 2010 بواسطة Diab

[mekkawy]

شوف يا زوهيري باي

أولاً مبروك ع النايكي و هي بيضا ولا سودا .. عشان تفرق ؟

إنت بكل بساطة كان يتوجب عليك توضحلهم الموقف .. أينعم هي مش هتفرق في حتة إن في الآخر الجيب واحد لكن زي ما قال أخونا دياب دي يمكن تتسجل غلطة ع الموظف .. و لما كنت توريهم اللي حصل بقسيمة الشرا غالباً يعني و عشان ده محل كبير بيحافظ على سمعته و الكستمر سيرفس فكانوا هيبدلوا الجزمة عادي جداً و لو همبكوا تطلب مدير الفرع او مدير خدمة العملاء و دول بيكونوا أكثر تفهماً من الموظفين و كانت هتتبدل بردو

لكن معلش عفا الله عما سلف و ربناي يباركلك و تدوبها في طاعة الله من مشي و رياضة

مكاوى

[أبو محمد]

للأسف .. أنا مش شايف إن فيه حد اتكلم عن مسؤولية المايسترو !!!!!!!

يعنى المايسترو بيتحمل جزء من المسؤولية لأنه خد الصندوق (عميانى) ومستبعد تماما احتمال إن يكون فيه خطأ .. إنت ما قرتش عن "Murphy's Law" يا مايسترو .. بيقول إيه بقى القانون ده :

"If it could happen, it will happen"

أو

"Anything that can go wrong, will go wrong"

أنا مع جميع الأخوات والأخوةاللى طالبوا بالشفافية .. أنا مع الشفافية وكمان مع تحمل المسؤولية

صحيح إن الموضوع ممكن يكون فى النهاية عائد للتعبئة فى المصنع .. بس ممكن يكون البائع اللى فى هامبورج كمان غلطان .. يعنى اتنين لهم نفس المقاس كانوا بيقيسوا نفس الموديل فى نفس الوقت .. والبائع أخطأ فى إعادة الأحذية إلى الصناديق .. ممكن ، أم غير غير ممكن ؟ "خليك فاكر قانون ميرفى" :)

وبما أنك حاطط الموضوع فى باب "موضوعات خفيفة" .. فأنا من رأيى ترجع هامبورج وتسأل على بيت البائع .. وتقف تحت البلكونة بتاعته ومعاك الجيتار وتغنيله "أنا لك على طول" .. أو حتى "شحات الغرام" :lol:

[se_ Elsyed]

عم أبو محمد حمد الله عالسلامه ... وحشتنا ... ممكن أبوسك ؟

قول له والنبي

إنت يا أستاذ زهيري تروح تحجز تذكرة .. القصيم - هامبورج - خميس مشيط

وتروح تحب على دماغ البياع وتقول له حقك عليه يا عم شفانشتيجر وأنا غلطان ..

[من بعيد]

وفى حل تانى

كان ممكن تبعت لهم فاكس مرفق به صوره من ايصال الدفع وتشرح لهم اللى حصل وتطالبهم بارسال نفس الموديل من الحذاء (طبعا بدون تهديد ولا وعيد)على عنوان اقامتك الدائمه وانا متاكد انهم كانوا تداركوا الخطأ وارسلوا لك على الفور نفس الحذاء وعلى الdhl وبدون مصاريف اضافيه

[من بعيد]

كان فى حل تانى انك تبعت للمحل اللى انت اشتريت منه الحذاء فى امستردام فاكس تشرح لهم الخطأ اللى حصل وتطلب منهم تغيير الحذاء وارساله على عنوان اقامتك الدائم وفى الحالات دى اداره المحل بتدارك الخطأ وبتبعت لك حذاء اخر وعلى الd h lوبدون مصاريف اضافيه

[rewsha]

ممكن اقول راْيي بصراحه po::

انا لو مكانك كنت... gsp_) ....كنت عملت زيما انت عملت كده :sofa:

صحيح كان ضميري هاياْنبني بعد كده ....بس طالما مافيش اضرار والموضوع هايتلم في الاخر ...احيانا الظروف بتحكم

[rewsha]

طبعا راْي جميع الاعضاء اللي غلطوك واقترحوا حلول تانيه عليك ....صح ...بس انا حطيت نفسي مكانك ظوالواحد ساعتها ممكن تفكيره مايهديهوش للحلول اللي اقترحوها عليك

يعني لو حضرتك كنت كتبت الموضوع ده قبل ما تتصرف التصرف اللي عملته كان يبقى كويس جدا وكنت هاتلاقي حلول واقتراحات تمشي عليها

لكن الواحد لما بيتفاجيْ كده اول حل بيجي على باله بيعمله

انا افتكرت موقف حصل معايا من سنتين لما قراْت الموضوع بتاع حضرتك ده

لقيت اعلان في الجرنال عن مُبرد الميه ...تلاجة ميه يعني ...سخن وبارد وكانت نازله بسعر مغري جدا وارخص من باقي الاعلانات ...وفعلا كلمتهم وجابو لي واحده ...وجيت اشغلها ,,لقيتها مش بتسقع الميه ...قمت اتصلت بيهم في الشركه ...فبعتوا لي غيرها ...وجيت اجربها ...لقيتها نفس القصه ...مش بتسقع الميه ...

المهم كلمتهم تاني ورد عليه واحد من عندهم وقال لي ....من الاخر الشُحنه كلها كده

وانا بصراحه اتقهرت ...وزعلت على الفلوس المدفوعه فيها ...وطبعا هنا في مصر ...مافيش حاجه اسمها ارجع البضاعه او حتى استبدلها

قمت متصله بيهم في الشركه من رقم تاني وطلبت منهم مُشتروات وبضاعه تانيه بنفس سعر الثلاجه واديتهم العنوان بتاعي

وبعد يوم جابوا لي البضاعه ...قمت حجزت المندوب بتاعهم عندي في الشقه بالبضاعه اللي جايبها (وكان معايا حمايا) وخليته يتصل بيهم في الشركه ويبلغهم اني مش راضيه اخليه يمشي بالبضاعه التانيه وعاوزه فلوسي بتاعت الثلاجه وفي ظرف ساعه كانوا باعتين لي مندوب تاني بالفلوس بتاعتي مقابل انهم ياخدوا البضاعه التنيه بتاعتهم والثلاجه الخسرانه اللي نصبوا عليه فيها

انا بكده تحايلت على الشركه وحجزت لهم بضاعتهم عندي مقابل انهم يرجعوا لي فلوسي وياخدوا ثلاجتهم البايظه

بس ماكانش قدامي حا غير كده ....لاننا في مصر

ولو كان قدامي حل تاني كنت عملته

اما بالنسبه لحضرتك بقى ...فاللي حصل حصل ...واستغفر ربنا والحمد لله انها مافيهاش اضرار جسيمه وقعت على حد

تحياتي

[Morial]

مسيو زوهيري

طبعا اللي عملته ده غلط هاندريد برسنت

والمفروض انك كنت استنهزتها فرصة ورفعت قضية علي الناس دول تطالب فيها بتعويض وقدرة دستة احذية علي الاقل من نفس النوع

تعويضا عن الأضرار المادية والمعنوية اللي اصابتك

يعني بالذمة حد يفرط في فرصة ذي دي

md2:

أما أنت راجل طيب بشاااااااااااااااااااااكل :closedeyes:

تم تعديل 21 يوليو 2010 بواسطة Morial

[أبو محمد]

عم أبو محمد حمد الله عالسلامه ... وحشتنا ... ممكن أبوسك ؟

قول له والنبي

إنت يا أستاذ زهيري تروح تحجز تذكرة .. القصيم - هامبورج - خميس مشيط

وتروح تحب على دماغ البياع وتقول له حقك عليه يا عم شفانشتيجر وأنا غلطان ..

الله يسلمك يابو الأسيان .. اللى كان مانعنى الشديد القوى والله .. بس دايما عالبال

تراهن إن اخوك زوهيرى دلوقت ضميره وجعه ومش بعيد يكون فى هامبورج بيقدم خطوة ويأخر خطوة قبل ما يقابل البياع ؟ .. أصل الألمان دول جنس آرى وانا عارفه .. خصوصا الواد "شيفيندايزر" ده.. وشه كشر وإيده طرشة md2:

[doha]

عن نفسي لو كنت مكانك كنت هروح التوكيل الاقرب لي وهشرح لهم القصة بالظبط واطلب منهم تبديلها وان رضي كان بها وان مرضيش هستعوض ربنا بس ساعتها مكنتش هشتري من عندهم تاني

بالمناسبة الموقف ده حصل لي زمان ايام الكلية .. ر حت اشتريت جزمه سواريه وغاليه وفيها كل المميزات من تكييف لفتحة سقف لكله ..

قستها في المحل وكما العاده هم دائما بيقيسوا لك الفرده اليمين . لقيتها تمام .. المهم اشتريت ورجعت البيت لاكتشف ان الراجل حط لي فرده مقاسي وفرده المقاس الاصغر..

رحت المحل تاني وطلبت تبديلها فرفض وقالي خلاص دي ( ممشي بيها ) يعني مخرمه كده من تحت فمينفعش ترجع لكن روحي لاي حد جزماتي يحطها لك في قالب فتوسع شويه !!!

المهم رسيت الحكايه اني اديتها هدية لواحده اعرفها مقاسها اصغر مني شويه وطارت بيها من الفرح . .

طبعا لو الحكايه دي حصلت اليومين دول كنت هعرف اخذ حقي منهم يمكن وقتها عشان كنت صغيره ( انضحك علي ) لكن فعلا ان مكانش الراجل يعطيك حقك بطيب نفس فاخذه بالطريقة الي حضرتك عملتها من وجهة نظري فيه حرمانية ..

على كل حال استفت قلبك ولو افتوك وانت اكيد عارف ان كان الي حصل ده صح او غلط ..

[MZohairy]

بنص وار يا جماعه

اشكركم يا اخواني الأعزاء على تشريفكم لي في هذا المواضوع العالي بتاع الجزمه المثليه (فردتين زي بعض يعني) و مش عارف اقولوكوا ايه غير ربنا ما يلويلكوا بوز ابدا و دايما في هناء و شراب مما تشتهون

فمن باتا قرير العين فاز فوزا عظيما

نخش في الموضوع

المشكله اللي نسيت اقولهالكم ان نسيبي المقيم في هامبورج و دليلنا هناك وضحلي ان المحلات هناك لا

يمكن ترجعلك بضاعه الا لما توريهم الفاتوره بتاعتهم

مما يعني اني لما اروح للمحل اللي في هامبورج اديله الجزمه الغلط و معاها فاتورة محل من

امستردام حيقولي ورينا عرض كتافك و ممكن تنتابه موجه من الضحك الهستيري على الصعيدي اللي جاي يرجعله جزمه اشتراها من بلد تانيه

و حيث اني كنت مسافر مصر تاني يوم و ماينفعش اروح هولندا تاني لضيق الوقت فإضطريت اعمل كده

بعد ما عرفت من مصدر مسئول بشركة نايك (السيد زكريا عزمي) ان المشاكل دي بتحصل كتير و بتسترجع فورا للشركه و لا يتحملها المحل ابدا

رأيكم زي ما هو لسه؟؟

:unsure: :unsure:

[عنبو]

انا عندى كويس قوى وهو ان زوهيرى يتبرع بالجزمه لواحد زى حالاتى وانا حالياَ عندى مشروع فى الحرم

وهوعدك مش هلبسها الا اثناء فترة الشغل وبكده تكون صدقه جاريه ورمضان كريم

rewsha

مرسلة الأمس, 08:45 PM

طبعا راْي جميع الاعضاء اللي غلطوك واقترحوا حلول تانيه عليك ....صح ...بس انا حطيت نفسي مكانك ظوالواحد ساعتها ممكن تفكيره مايهديهوش للحلول اللي اقترحوها عليك

يعني لو حضرتك كنت كتبت الموضوع ده قبل ما تتصرف التصرف اللي عملته كان يبقى كويس جدا وكنت هاتلاقي حلول واقتراحات تمشي عليها

لكن الواحد لما بيتفاجيْ كده اول حل بيجي على باله بيعمله

انا افتكرت موقف حصل معايا من سنتين لما قراْت الموضوع بتاع حضرتك ده

لقيت اعلان في الجرنال عن مُبرد الميه ...تلاجة ميه يعني ...سخن وبارد وكانت نازله بسعر مغري جدا وارخص من باقي الاعلانات ...وفعلا كلمتهم وجابو لي واحده ...وجيت اشغلها ,,لقيتها مش بتسقع الميه ...قمت اتصلت بيهم في الشركه ...فبعتوا لي غيرها ...وجيت اجربها ...لقيتها نفس القصه ...مش بتسقع الميه ...

المهم كلمتهم تاني ورد عليه واحد من عندهم وقال لي ....من الاخر الشُحنه كلها كده

وانا بصراحه اتقهرت ...وزعلت على الفلوس المدفوعه فيها ...وطبعا هنا في مصر ...مافيش حاجه اسمها ارجع البضاعه او حتى استبدلها

قمت متصله بيهم في الشركه من رقم تاني وطلبت منهم مُشتروات وبضاعه تانيه بنفس سعر الثلاجه واديتهم العنوان بتاعي

وبعد يوم جابوا لي البضاعه ...قمت حجزت المندوب بتاعهم عندي في الشقه بالبضاعه اللي جايبها (وكان معايا حمايا) وخليته يتصل بيهم في الشركه ويبلغهم اني مش راضيه اخليه يمشي بالبضاعه التانيه وعاوزه فلوسي بتاعت الثلاجه وفي ظرف ساعه كانوا باعتين لي مندوب تاني بالفلوس بتاعتي مقابل انهم ياخدوا البضاعه التنيه بتاعتهم والثلاجه الخسرانه اللي نصبوا عليه فيها

انا بكده تحايلت على الشركه وحجزت لهم بضاعتهم عندي مقابل انهم يرجعوا لي فلوسي وياخدوا ثلاجتهم البايظه

رجاله ولادك يا بلادنا رجاله ورجاله

[se_ Elsyed]

أناضحكت على الموقف اللي حكيته مدام روشه

وتخيلت الموقف وهما مكتفين الراجل وحابسينه في أوضة الفيران وبيتصلوا بالشركة يقولوا لهم إحنا بنكلمكم من الساحل الشمالي الأفغاني .. ولن تنعموا بالراحة مالم نسترد فلوسنا .. وهاندبح الراجل بتاعكم الرهينة ده إذا لم تصلنا الفلوس في ظرف 5 دقايق ..

وتخيلت لو صاحب الشركة عمل بأصله وقال لهم :هو مش عندكم أشبعوا بيه

[rewsha]

أناضحكت على الموقف اللي حكيته مدام روشه

وتخيلت الموقف وهما مكتفين الراجل وحابسينه في أوضة الفيران وبيتصلوا بالشركة يقولوا لهم إحنا بنكلمكم من الساحل الشمالي الأفغاني .. ولن تنعموا بالراحة مالم نسترد فلوسنا .. وهاندبح الراجل بتاعكم الرهينة ده إذا لم تصلنا الفلوس في ظرف 5 دقايق ..

وتخيلت لو صاحب الشركة عمل بأصله وقال لهم :هو مش عندكم أشبعوا بيه

والله يا اونكل سي السيد....انا قلت اهي مُحاوله والسلام ولو الفلوس رجعت يبقى خير وبركه

واللي اتضح ان المندوب اللي بيوصل الحاجه من الشركه للبيوت 000000(هههههه)باعهم هوه كمان ...ليه بقى؟

علشان هوه بيشتغل معاهم باُجرة التوصيل بس ...يعني بدون مرتب ...

يعني ياخد البضاعه من الشركه يوصلها للعنوان مقابل انه ياخد ال 20 جنيه بتوع التوصيا بس ...فلقيته بيقول لي خُدي البضاعه اهي كلها عادي واديني ال20 جنيه بتوع التوصيل بس ...وليكي عليه اني اتصل بيهم واسبك الموضوع معاكي واقول للشركه انكم حاجزيني بالبضاعه كرهن عندكم :lol:

وفعلا ده حصل

والحمد لله استرديت فلوسي ورجعت لهم حاجتهم كلها

ثم ان انا كان في بالي ان لو الشركه مارجعتش الفلوس بتاعت الثلاجه البايظه ..كنت هاخد بدالها البضاعه التانيه اللي انا طلبتها ...ببلاش

لاني كنت طالبه بضاعه بنفس سعر الثلاجه تقريبا ..بس كنت طالباها كلها اطقم حلل وحاجات من اللي مايكونش فيها احتمال لانها تكون بايظه (حاجات من غير موتور يعني) وبكده نبقى ...خالصين

وسمعني اغنيه خالصين لعمرو دياب