يا ريتني اتولدت يوم 6 إبريل

[se_ Elsyed]

بصراحة كل ما باتابع أخبار الشباب دول .. باحس بالغيرة ...

الغيرة من حماسهم وحبهم لبلدهم ..

وبأغبطهم على كده وأتمنى إني أكون ربع واحد منهم

وبالتأكيد لو كنت في مصر كنت لن اتوانى إني أنضم لمثل هؤلاء الشباب .. لأن التجربة الحزبية في مصر أثبتت فشلها الذريع بالإضافة إلى إنها أعطت شرعية لنظام مبارك الديكتاتوري .. وكملت الصورة القبيحة اللي رسمها على مدار 30 سنة .. وأعطت أنطباع إن هناك منافسة حزبية قوية متثملة في 22 حزب ... كل حزب فيهم مالوش شعبية حتى في بيته

والقطنه ما بتكدبش ...

فأجعص حزب فيهم ما بيفوزش بكرسي أو أتنين في إي إنتخابات برلمانية .... وتقريباً 95 % منهم ما بيحصلوش على اصوات اصلاً لأن بيتهيألي لو سألت مثلاً زوجة رئيس حزب السلام الديمقراطي .. كمثال يعني

والسلام السلام السلام .. رابعة والعاشر والطيران ( باحب أنا النداءات دي بتاعت سواقين الميكروباص )

بالتأكيد الست مش هاتعرف لانها مش عارفه زوجها بيتشغل إيه أساساً .. هو بيخرج كل يوم الصبح وبيرجع الساعة أتنين الضهر

وقس على ذلك الباقي كلهم ما عدا الوفد والغد ... على أساس إن الغد أيمن نور عمل شو حلو ... والوفد عايشين على الاطلال وشي الله يا سيد يا بدوي

إذا فالوضع الطبيعي .. أصبح الشارع المصري يُعبر عن نفسه في حركات مثل كفاية ... اللي بصراحة هي من قصت شريط الحركات الوطنية المحترمة سنة 2004 ثم توالت بعد ذلك عدة حركات منها شباب 6 إبريل والجمعية الوطنية للتغيير

لكن عاجبني حركة شباب 6 إبرايل لأن كلهم شباب جامعي صغير في السن .. وبالتالي لا يسعون إلى أي مناصب ... ويتواجدون في الشارع بقوة وفي مناسبات عديدة ...

وها هم يُخطون خطوة كنت أتمناها من زمان .. وهي الوصول إلى رجل الشارع بالـ " ديليفري " توصيل الطلبات للمنازل يعني

يعني بدل ما أستنى الناس تيجي أعرفهم أنا مين وعاوز إيه وإيه هي حقوقهم وإيه هي أهداف الحركة وإيه المطلوب من الناس

لا أبتدوا ينزول الشارع ويوزعوا أستمارات طلب التغيير ..

تغيير النظام العتيق

تغيير شخص لازق في الكرسي من 30 سنة ...

أقسم بالله أنا عندي 38 سنة لكن عندما أنظر لهذا النظام الأستاتيكي أشعر كأن الثمانية جت مكان التلاته وإني بقيت عندي 83 ..... قد سن الريس بالظبط ودفعه واحده مع بعض في جماعة فؤاد الأول

شيء يُصيبك بالقرف والغثيان .. لأن سُنة الكون هي التغيير والديناميكية ...

لكن ده اللي بنبات فيه بنصبح فيه ...

وياريت على كده ... ده الثبات ساعات بيبقى مطلوب وحلو ..

لكن لما يكون الثبات ده على شكل قهقرة للخلف بسرعة الصاروخ بتبقى مصيبة ...

وهو ما يحدث وهو ما نصرخ به من 10 سنوات تقريباً .. عندما أستفاق الشعب المصري من وهم الخداع بتاع الخطط الخمسية وتوشكى والبنية الأساسية الرهيبة اللي هاتخلي الشوارع زي الحرير والميه بقت صافية والصرف الصحي بقى زي الفل والتليفونات رخصية وكتيرة والشوارع نضيففففففففففففففه

فوقنا وصحينا كأن واحد دلق علينا دش ميه متلجه في عز الشتا ... على إن ده كان كله كان وهم وإن المركب بتغرق يا قبطان

أتاري القبطان كان باع المركب أساساً بالركاب بأطواق النجاة .... وغرقنا بالفعل

قبل ما أكمل كلامي ...

هما الجماعة اللي بيراقبونا بتوع أمن الدولة دول .. أيوه أنت يا سيدي إنت ... ومش باخاف غير من اللي خالقني ... والواحد يُفضل يموت بكرامه ويقابل ربنا يقول له أنا عملت اللي عليه وصرخت في وش الظلم وقلت له حرام عليك ..

الجماعة دول .. إنتو مش مصريين زيينا برضوا ؟ .. مش هاقول مسلمين أو مسيحيين لأن كلنا مصريين ومصيرنا واحد ... أنتو بقى شايفين البلد إزاي ؟ يعني عايشين إنتو والناس اللي حواليكو زي الفل وفي امان وفي صحة كويسة وبتشموا هوا نضيف والقاشية معدن وإحنا اللي جواسيس متمردين وبنتبطر على النعمه وغاويين فق ؟

يا ريت تجاوبوا الإجابه اللي هاتجوبوها يوم القيامة أمام الله ... لأن ساعتها لا هايبقى معاك بهاء الدين ابو شقه .. ولا أمال عثمان ولا فريد الديب عشان يدافع عنك ويقول ده بريء يا رب وإن كان في خطأ في الأجراءات لذا نلتمس له البراءه ودخول الجنة ...

نكمل كلامنا ..

شباب 6 إبريل يا جماعة إبتدوا يوزعوا منشورات على البيوت للتوقيع على مطالب التغيير للدكتور البرادعي ...

مش عشان البرادعي يترشح ... لأ أنا متأكد إن الراجل مش بيسعى لكده لأن لا هو محتاج منصب .. ولا سنه حتى يسمح له بإنه يخطط لعشرين سنة جايه لنفسه وبرستيجه وما إلى ذلك

الراجل بيتكلم زينا ... ومطالبة هي الحد الأدنى اللي لازم يتوفر في أي شعب محترم ... انتخابات نزيهة .. مراقبة للأنتخابات .. ألغاء الحكم المتعسف الديكتاتوري المُسمى قانون الطواريء

ما هذا العبث وما هذا اللي مش عارف أسميه إيه

ده أدنى إيمان بالله بيحتم عليك تعامل الناس على إنهم بشر

وأدنى إيمان بالله بيقول لك لما تقبض على واحد عرفه يا أخي تهمته إيه ... ولما ترميه في معتقل حاكمه الأول وقول له إنت هاتتسجن قد كده ..

لكن تسمع من الجماعة الأحرار المحترمين بتوع بدو سينا اللي افرجوا عنهم الأسبوع الماضي بعد أن فاض بهم الكيل وركلوا مؤخرة وزارة الداخلية الحاكم الفعلي للبلد وهددوهم بان ما فيش واحد من الداخلية هايعيش في سينا إذا لما يتم الأفراج عن المعتقلين .. تسمع منهم الكلام .. تصاب بالشيب والعجز المبكر

يعني إيه واحد بقى له 9 سنين مرمي في المعتقل بدون تهمة وبدون محاكمة بحجة إنه خطر على الأمن وإنه معتقل عشان رأيه اللي بيقوله ؟

يعني إيه واحد يتاخد من بيته وزوجته اللي متزوجها بقى له شهر أو أتنين ويتنفي في الواحات ؟

يعني أهله لما يعرفوا طريقه ويحبوا يزوروه عليهم أن يخططوا للزيارة قبلها بشهور

يعني إه تُفرج عن عشرات المعتلقين في ثواني من غير ما يعرفوا هما أتاخدوا في إيه وليه أُفرج عنهم دلوقت ؟

أي نظام هذا ؟

وأي قوانين أمتد منها ظلمه هذا ؟

ده أسرائيل ما بتعملش كده

أقسم بالله ما بتعمل كده ولما بتلفق للواحد تهمة بيبقى معروف فترة إعتقاله وسبب إعتقاله الملفق

أما دول .. شيل .. أبعت ... أخفي .... خلاص خلصت

يا جماعة المشي جنب الحيط سياسة أثتت فشلها لانهم باعوا الحيطه خلاص ...

يا جماعة تربيت العيال في أمان ومن غير مشاكل أثبتت فشلها لأن العيال جالها سرطان وفشل كلوي وبقوا يموتوا في حوادث السيارات والقطارات

يا جماعة السلبية لأ تأتي بخير ... ونظام جحا اللي الفساد كان بعيد عن .... وظن إنه عايش في امان وإن كده تمام والدنيا حلوه ... لحد ما صحي لقى الفساد راكبه من ساسه لراسه لأن الطوفان لن يستثني أحد

يا جماعة في إنتخابات كمان شهرين بالظبط وتحديداً في أكتوبر .. لو ما فكرناش إحنا عاوزين إيه منها وإزاي نعبر عن نفسنا فيها ... يبقى هاييجي نواب حرامية تاني يسرقوا البلد تاني ويفصلوا قوانين للتوريث تاني

أي بشر هؤلاء من يتاجرون بامراض الناس ويستولولن هم واسيادهم على 6 مليار جنيه في سنة بحجة علاج الفقراء وهما شفطوا الفلوس وخرجوها بأسماء ناس ميتين أو موظفين حكومة وراح الوزار وكبار المسئولين يزرعوا شعر ويعملوا عمليات تجميل في الخارج على حسابنا .. وناس تاني أعرفها بتموت عشان 5 الاف جنيه مالقوهاش عشان ياخد حقنة ولا يتعمل له عملية .. ويوم ما يروح يتعالج يلاقي مزبلة مش مستشفى ... كان نفسي يشوف مره الريس قصدي يعني منظر مستشفى في محاظفة الزقازق المجاري واصله فيها لحد متر في أنحاء المستشفى وفي غرفة العمليات والناس متعايشة مع الوضع ورايحين جايين او يخطف رجله ويتخفى كده ويروح مستشفى الدمرداش .. أهو من قصر للعروبة لحد العباسية حوالي ربع ساعة ... ويشوف المنظر على الطبيعة ...

أي رئيس جمهورية هذا أو رئيس حكومة من يختار وزير صحه معروف إنه من أكبار رجال البيزنس في المجال الطبي وعنده مستشفيات دار الفؤاد ومعامل " مصر للأشعة " والعديد من المرافق الطبية الخمس نجوم واللي معظم قرارت التأمين الصحي الي بمليارات دي طالعه على مستشفياته وفلوس داخله له من غير حساب ومن غير ما يطلع هو لفة شاش أو قطن حتى ؟

ما هذه البلد التي تركنا لهم حتى اكلوا فيها الأخضر واليابس وتركوا الأجيال القادمة بدون غطاء وبدون موارد ..

ان خلصت كلامي ... وياريت أسمع رأيكم

ده موقع حركة شباب 6 إبريل

http://shabab6april.wordpress.com/about/

منشورات "دليفرى" أمام المنازل للتوقيع على بيان التغيير

الأربعاء، 21 يوليو 2010 - 14:21

كتبت نورا فخرى

"عزيزى المواطن.. لا تخف إذا وجدت العديد من البيانات أمام منزلك تدعوك للمشاركة السياسية"، فتلك هى المنشورات الـ"دليفرى" لحركة شباب 6 إبريل التى تستهدف جمع توقيعات على بيان التغيير "معاً سنغير" ذى المطالب السبعة التى أطلقها الدكتور محمد البرادعى المدير السابق للوكالة الدولية للطاقة الذرية.

تأتى المنشورات الـ"دليفرى" فى إطار الشق الميدانى للحملة التى أطلقتها حركة شباب 6 إبريل مساء أمس تحت اسم "مصرنا حقنا.. بلدنا ومش هنسيبها" لحشد الشباب المصرى نحو عملية التغيير، وتوعيته بأهمية مشاركته السياسية، بجانب جمع التوقيعات على بيان التغيير ذى المطالب السبعة.

وتركز حملة "مصرنا حقنا" على توعية الشباب بـ5 قضايا محورية تتضمن مساوئ قانون الطوارئ، ومدى ضرورة تعديل الدستور الحالى فى مواده(76) و(77) و(88)، وضرورة وجود حد أدنى من مطالب نزاهة الانتخابات بعد التوعية بالآثار السلبية للانتخابات المزورة، ومع يرتبط بها من أهمية استخراج البطاقات الانتخابية، بجانب الربط بين المطالب السياسية بالاقتصادية، سعياً لإيقاظ روح الإيجابية لدى الشباب.

وأكد أحمد ماهر المنسق العام لحركة 6 إبريل، أن الحملة تنقسم إلى شقين الأول إليكترونى عبر "الفيس بوك" و"التويتر" وغيرها من الوسائل الحديثة، أما الثانية تتمثل فى الحملات الميدانية بالمناطق الشعبية والتى تستهدف التوعية المباشرة للشباب بأهمية المطالب السبعة للتغيير مع توزيع البيانات والمنشورات "الدليفرى" على المنازل، ونشر "البوسترات" والبيانات الصغيرة والكتابات والرسوم والمعارض "الخاطفة".

ويأتى الجزء الثانى من حملة 6 إبريل، كما يؤكد منسقها العام مع شهر رمضان لتستهدف المواطنين فى الخيم الرمضانية وإقامة الأمسيات الشعرية وحفلات السحور والإفطار، بجانب المؤتمر الذى ستعقده الحركة بهدف الوصول لموقف موحد للقوى السياسية من انتخابات الشعب القادمة 2010، سواء بالمقاطعة أو خوضها معا تحت مظلة "مرشحى التغيير" دون مصنفات سياسية.

[محمود حازم]

مفيش فايده

ولا حد هيسمعك كل سنه وانت طيب bv:-

[jamalpody]

انت من الاحرار .................يا علي

صدقني يا س س مفيش فايده ذي ما قالك حازم وانا اساسا اصبحت اشك في اي نواية حسنة صادرة ممن يطالب بالتغيير فالتغيير لمجرد التغيير لا طائل منه ولن يؤدي الي شي والعراق اكبر شاهد علي ذلك فقبل التغيير لابد من التخطيط ............التخطيط سياسيا اقتصاديا صحيا ................الخ

بدون التخطيط العلمي لن يفلح التغيير العشوائي ايه الفايدة اني اغير سائق السيارة في حين ان السيارة نفسها بدون موتور

التخطيط ثم التخطيط ثم التخطيط وقديما قالوا الفشل في التخطيط هو تخطيط للفشل

[Mr MAGED]

ليه يا جماعة بتقولوا مافيش فايدة !!!!

أكيد الاعتقاد ده هو السبب في اللي وصلنا ليه الوقتي

وأكيد هو ده اللي الحكومة بتسعي ليه واتحقق

انها تنزع أي ذرة أمل في النفوس ... انه تزرع فينا الوهن والضعف

اننا مهما عملنا برضه هيفضل مافيش فايدة!!!! هوا ده اللي هما عايزينه بالظبط

أكيد فيه فايدة وفيه أمل ... وما ضاع حق وراءه مطالب

المفروض اننا نعمل اللي علينا ونسعي وأكيد النتيجة هتيجي علي قدر العمل

" انا لا نضيع أجر من أحسن عملا " الكهف 30 ، " ان الله لا يغير ما بقوم حتي يغيروا ما بأنفسهم " الرعد 11

انا فعلا باحيي كل الشباب دول علي مجهودهم وحبهم لبلدهم .. واتمني فعلا لو اني كنت موجود معاهم

ومن غير شعارات ولا مزايدات ... لسة فيه أمل طول ما فيه شباب بيحبوا مصر

[se_ Elsyed]

أتفق معك يا انفيستور

تخيل كده الحزب الفاشي لو أنفق مليارات الدولارات في التوجيه الإعلامي وبرمجة عقول الناس عشان يوصلهم إنهم يرددوا جُملة " مافيش فايدة "

كان الموضوع إتكلف وقت وفلوس .. صح ؟

لكن اهو من غير ما يصرف ومن غير ما يتعب ... الرسالة وصلت للناس وأستوعبوها وأمنوا بها .... واهو زي ما احنا شايفين .. سلمنا رقابينا للجزار أستعداداً للذبح .. بدون مقاومة ..

والله ساعات لما بندبح في العيد الكبير وباحضر الدبح .. بالاقي الخروف بيقاوم وينطح ويرفص ويعمل اي منظر

لكن إحنا بكل بساطة بنقول للجزار .. أتوكل على الله وسمي يا عم حلال الله وأكبر .. اصل ما فيش فايدة

عشان كده أي حد بيقول ما فيش فايدة ويقاوم بأي شكل من الأشكال ... يبقى مش من حقه يشتكي من حاجه أو يقول " اي " حتى

فوتكم بألف فايدة

[ابو محمد بن مصطفي]

لو بطلنا نحلم هنفيص

اكيد في مليون امل مش امل واحد

اهم حاجة احنا منسكتش لازم نحلم بان بكره اكيد احلي من النهارده

والتغيير اذا مكنش دلوقتي يبقي في اولادنا بس اهم حاجة منسكتش

[محمود حازم]

هو انتوا فهمتونى غلط انا مش يأس وبسعى للتغير حتى فى سلوكياتى بس

احنا عايزين كتير عشان نتعلم التغير فى السلطة وهما مش مدينا فرصة

وانا شايف حتى لو السلطه اتنقلت بجد احنا مش هنعرف نختار بس بعد دورتين تلاته هنتعلم

فلازم يسبونا نتعلم لأن ده امر واقع ان اى حد لازم يتعلم الاول واوقات بيكون التمن غالى

بس مفيش مفر والا هنفضل محلك سر

[abdulmuttaleb]

سي السيد باشا،

مساء الأنوار:)

ما أتفق فيه مع حضرتك هو أن شباب السادس من إبريل وغيرهم، هم شباب لديهم حماس شديد وغيرة وطنية لا ينكرها إلا جاحد

لكن، هل أسلوبهم أو حتى منطقهم هو الصحيح؟

أنت تتحدث عن شباب من مشارب وخلفيات مختلفة لا خبرة لهم لا بالسياسة ولا بالإدارة، ولو قابلت أيا منهم لن تجده قد قرأ كتابين على بعض في تاريخ مصر أو السياسة الدولية أو حتى مذكرات لوزير خارجية

فكرة التجربة الحزبية وفشلها حسب قول حضرتك، فده راجع لأن الأحزاب يقوم عليها أشخاص لديهم مصالح ومهام أخرى، فهم رجال أعمال أو محامون أو أصحاب شركات، أو رؤساء مجالس إدارات جمعيات خيرية تتلقى دعما سخيا من الداخل والخارج، ولا أتصور أن صحيحا أن الدولة هي التي تتعمد إضعافهم مثلا أو شيء من هذا القبيل والدليل على ده ضمن أدلة كثيرة الثلاث فيديوهات التالية لثلاثة وزراء من العيار التقيل مع شباب حزب تحت التأسيس:

http://www.youtube.com/watch?v=HxnKIrwEVhA

http://www.youtube.com/watch?v=uh-IjGQzZP0

فيما يخص الحركات الاحتجاجية، كان نفسي تشوف مفردات دخل أي من قادتها الملهمين، فقط أقول لك إن قضايا رأي عام كان يحضر لها عشرات المحامين متضامنين مثل إثبات الحضور والحصول على بدل محترم بالدولار من جمعية حقوق أو وكالة حقوق إنسان عن حضور الجلسة، والموضوع فيه سبوبة كبيرة أوي، وأنا هنا لا أشكك في نزاهة أحد، ولكن صدقني الموضوع أشبه بدكاكين كله بيسترزق منها، وهذا هو سبب فقدان التأثير، لأن كل واحد منهم بيرجع نهاية اليوم عايز واسطة لتعيين ابنته أو ابنه، بل إن هجمات صحفية كانت تتم على وزراء للحصول على مكاسب مالية أو عينية (قطعة أرض مثلا أو علاج على نفقة الدولة)، ومش عايز أقوللك أسماء علشان ما تتخضش

الغريب أن هؤلاء يقدسهم أشخاص محترمون مثل حضرتك، بينما التحقير والتهوين يكون من نصيب من بذلوا جهدا للنهوض بهذه الدولة التي كان 60% من سكانها لديهم ثلاجات في بيوتهم في مطلع الثمانينيات، والتي قفز عدد المكيفات فيها من بضعة مئات آلاف إلى ملايين، والتي قفز فيها استيعاب الطاقة الكهربائية لأضعاف أضعاف إنتاج السد العالي

لا ينكر أننا لسنا في أفضل حالاتنا كدولة، لكن بالنسبة للإمكانيات فالحمد لله الوضع لا بأس به، وبدلا من لوم حسني مبارك، عايزك تشوف تصرفات الناس والأفراد علشان تعرف إن مفتش الأوقاف بيطلب رشوة من إمام المسجد أو إكرامية دورية، وأرجوك متقولليش الرواتب قليلة، فطول عمر المدرس مثلا راتبه متوسط من أيام جدي وجدك، وفيه دراسة دعا إليها وزير التنمية الإدارية لدراسة التغيرات على منظومة قيم المجتمع المصري

بالنسبة للطوارئ حضرتك ليه لا تسأل السؤال الرئيسي: هي ليه الدولة ضد الإخوان؟ هل لأنها ضد الإسلام مثلا؟ طيب ده ضابط أمن الدولة تلاقي اسمه مثلا أحمد رأفت أو عمر، ليه ما تسألش نفسك السؤال ده؟ لو حضرتك سألت السؤال ده وربطته بالطوارئ ح تلاقي إننا مجتمع عاطفي يمكن بإعلان أو خبر في جورنال الشعب يهيج ضد أي حاجة، وذلك ناتج عن ارتفاع نسبة الأمية، وأبسط مثال النسبة الهبلة (أنا آسف) من الشعب اللي كانت أسعار العقارات بتتضاعف عليها بحجة أن سعر الحديد، رغم أن الحديد كمكون من المباني ليس كبيرا، فحتى لو تضاعف لن يؤدي لتضاعف سعر بيع العقار.

عايز مثال آخر؟

اسأل سائقي التاكسي كم نسبة استهلاك البنزين من أجرتهم، يعني لو هو بياخد في مشوار عشرة جنيهات من نقطة ألف لنقطة باء، اسأل ثمانين في المائة من سائقي التاكسي وستجد أنهم لا يعرفون هذه المعلومة.

حادثة خالد سعيد رحمه الله، محدش في الشعب يوحد الله يسأل اشمعنى ح يعذبوا الشاب ده، وليه الفيديو المزعوم لضباط القسم اللي آل ايه اتقتل علشانه ليه الفيديو ده وصل لخالد ده تحديدا؟ وليه لو وصله لم يسلمه للنيابة أو التفتيش بتاع الداخلية مثلا؟ أنا حضرتك لا أدافع عن قتل أو تعذيب إنسان وحرمة الدم أعظم من حرمة الكعبة، لكن فقط أنا أتساءل بصوت مرتفع، مثلما أتساءل في حادثة محامي طنطا التي تم تصعيدها لتلافي سحب الثقة من المجلس وخرج آلاف المحامين (أنا آسف كالبلهاء) زاعقين صارخين شاتمين للقضاة متهجمين على السلم العام في مشاجرة تحدث في كل نيابة ومحكمة ويتم التصرف معها بشكل عقلاني، الشعب المصري (في عمومه) ليس سهلا أن يحكم، وطبائع الناس في هذا الزمن تتطلب اليقظة والحزم.

وبعدين حضرتك بتكلمني عن ديمقراطية، هو فيه ديمقراطية داخل الشركات وبين المواطنين أنفسهم؟ ادخل داخل البيوت وشوف كمية المشكلات لدرجة تكوين محكمة اسمها محكمة الأسرة انت متخيل حضرتك لدرجة ايه الجبروت اللي وصلت إليه تصرفات المواطنين العاديين مع بعضهم البعض، لدرجة أن الضابط بيعمل حساب للبلطجي لأن النهاردة البلطجي ممكن يعور نفسه ويقول الضابط عذبني وتلاقي البلطجي يصرخ إنه عايز حقوق الإنسان.

وبعدين حاجة غريبة حضرتك تلاحظها، يقوللك ايه: الكويس في البلد دي يمشي، تقوللـه اديني مثال، يقوللك الجنزوري وعمرو موسى. الجنزوري الدولة اختارته ليبتعث للخارج والرجل تدرج محافظا فوزيرا فرئيسا للوزراء، فهل كانت هذه المنظومة فاسدة سيئة لمجرد أن الرجل خرج من الوزارة؟ يعني لم تعجبكم المنظومة التي اختارته ابتداء للسفر على نفقة الدولة ثم عينته محافظا ثم وزيرا فرئيسا للوزراء؟ وأما عمرو موسى فالرجل مكث وزيرا للخارجية في عهد الرئيس مبارك لعشر سنوات كاملة، فهل كان النظام سيئا لمجرد أنه قال شكرا لرجل شهد له الجميع بالكفاءة كوزير لمدة عشر سنوات كاملة.

في مصر يا سيد بيه وحضرتك واضح تخصصك إدارة أو محاسبة، من المهم تمتع المسؤول القيادي بالقدرة على خلق موارد جديدة إما للدولة أو للإدارة التي يرأسها وموظفيها أو الجمهور المتعامل معها، سواء كان عمدة قرية أم مدير مدرسة أم محافظا أم سفيرا أم رئيس هيئة أم وزيرا.

قرأت عن وزير الإسكان الأسبق م.حسب الـله الكفراوي أنّ تجار الإسمنت رغبوا في زيادة سعر الطن فاستدعاهم إلى مكتبه وحين دخلوا عليه قابلهم في منتصف المكتب وبعد أن أوجز لهم إجراءات تصنيع الإسمنت ومتوسط أرباحه حذرهم من رفع السعر منهيا المقابلة على الواقف.

أما اللواء بحري توفيق أبوجندية رئيس هيئة ميناء الإسكندرية فقد نشر عنه في أكتوبر 2007م قوله أثناء لقاء مع أعضاء جمعية الأعمال الفرنسية أنّ رصيفا خصص لشركة حديد عز بإيجار ثابت باستثناءٍ من وزير النقل ورئيس مجلس الوزراء، فما كان من رئيس هيئة الميناء إلا إلغاء التخصيص وطرح الرصيف لمزايدة علنية فازت بها نفس الشركة ولكنها الآن تدفع زيادة 10ملايين جنيه سنويا استفيد منها لتطوير المرفق.

مصر حلوة بضباط الجيش والمهندسين والذين تفرض عليهم طبيعة عملهم أن يتفوقوا على أنفسهم في تعظيم الاستفادة من الموارد المتاحة. وهي بالطبع حلوة بكل مسؤول يزيد من إيرادات الدولة ويخدم مؤسسته وعملاءها.

أخيرا، مصر بخير، ولو فيها بس عشرة زي حضرتك بيخدموا الآخرين بتفان وإخلاص لكانت أفضل كثيرا مما هي عليه، لذلك أرجوك أن تفكر في كيفية استنساخ نسخ متعاونة من البشر أمثال حضرتك يعملون بصمت دون شكوى أو تكبر، وحينئذ ستكون الدنيا أفضل كثيرا.

تم تعديل 7 أغسطس 2010 بواسطة abdulmuttaleb

[abdulmuttaleb]

http://www.youtube.com/watch?v=TGHj4EIaLTk

[se_ Elsyed]

أختلف معك يا أستاذ عبد المطلب خصوصاً في النقطة دي

لكن، هل أسلوبهم أو حتى منطقهم هو الصحيح؟

أنت تتحدث عن شباب من مشارب وخلفيات مختلفة لا خبرة لهم لا بالسياسة ولا بالإدارة، ولو قابلت أيا منهم لن تجده قد قرأ كتابين على بعض في تاريخ مصر أو السياسة الدولية أو حتى مذكرات لوزير خارجية

مش شرط عشان أحب بلدي إن أبقى الجبرتي وأتخصص في التاريخ أو أقرأ كل يوم كتاب ..

فالحب والغيرة على الوطن شيء فطري مش محتاج فلسفة ولا تعقيد أو اقول لما أكون نفسي وأكبر واقرأ تاريخ هابقى أحب بلدي وأخرج أقول لأ للظلم والجبروت

بل على العكس ... أنا سمعت شباب من دول وهما بيتكلموا .. بصراحة إتكسفت من نفسي ..

إتكسفت من نفسي لأني حاسس إني على البر وكبيري قوي باتكلم وأكتب .. وفي الأمان إلى حد ما

لكن لما تيجي لمرحلة التضحية بالنفس ..تبقى هي دي الرجولة وهو ده الحب الذي يجب أن يكون

واظن إن في أي إحتجاج من دول أبسط حاجه ممكن تحصل للواحد إنهم يعتقلوه ويتبهدل لما يقول بس .. ده إن ما أنضربش عليه نار ومات ...

[محمد عبدالعزيز]

طيب اسأل نفسك انت كمان يا أستاذ عبدالمطلب ليه كل العيوب اللى ذكرتها فى الشعب المصرى أصبحت موجودة رغم إنك بتحكى عن نماذج مشرفة زمان وأكيد كل واحد فينا يقدر يحكى عن الكثير من النماذج المشرفة فى حرب أكتوبر مثلاً, وغيرها من المواقف العصيبة اللى مرت على الشعب المصرى؟

مين المسؤول عن الانحدار الشديد ده فى مستوى الأخلاق والمهنية والتعليم والصحة... إلخ؟

لو مش الرئيس وأعوانه اللى هو بيختارهم واحد واحد؟ يبقى من المسؤول من وجهة نظرك؟

ولو الرئيس وأعوانه مش مسؤولين ليه مش بيحلوا مشكلة واحدة حتى على الأقل من مشاكل الشعب المصرى من جذورها؟

ليه سايبين المشاكل تتفاقم لغاية ماتبقى أزمات وكوارث؟

ولو هما مش المفروض يحلوا المشاكل دى... ليه يبقى الرئيس رئيس والوزير وزير؟