محجبة ولكن!؟

[بنت شعنونة]

ما عرفتش احط الموضوع دا فين

( خلاص خلي عنك إنتي يا شنشن .. نقلناه إلى المناقشات العامة .... أونكل س س )

اعز صديقات عمري فرحها قرب "عقبالكم جميعا"

وعاوزة احضر فرحها

رحت فصلت طقم محترم جدا وامووووور خالص ومحترم

وبجد عاجبني اوي

عشان احضر الفرح بيه

ووصلت للمشكلة المعتادة

الطرحة " الحجاب" cbyb:

ومش عارفا اعمل ايه

ناس قرايبنا من انصار شيلي الطرحة يا امي دا يوم مفترج

لعل وعسى :P

لكن انا مش عاوزة

حد يعرف طريقة امورة وحلوة البس بيها طرحة تنفع في مناسبة

عشان انا غلبت واكتأبت ;)

تم تعديل 3 يونيو 2004 بواسطة se_ Elsyed

[Lighthouse]

:blink: :huh:

انا لااري اي تعارض بين ارتداء الحجاب والاناقة والظهور بمظهر جيد ولا اعرف صراحة ماهي ماهية النصيحة بخلع الحجاب عند حضور اي مناسبة خاصة :P

فإذا كانت النصيحة موجهة لك بخلع الحجاب لانك ستحضري فرح صديقتك ;)

فياتري ماهي النصيحة المقدمة للعروسة نفسها :D

يمكنك ان ترتدي الحجاب كما ترتديه في الاحوال العادية وتأكدي انه سيكون جميل .

ولكن ولن اقول لك كلام كثير

حرااااااااااااام ان تخلعيه والا ستكوني كمن لم ترتديه

وربنا يهدي اصحاب النصائح اياها دي :huh:

[Seafood]

لكن انا مش عاوزة

برافو عليكي ..

أنا مش عايز أعقدك ..

لكن ..

لازم تحطي في بالك القاعدة الذهبية دي ..

" ما فيش خير ممكن ييجي من ورا معصية "

يعني لعل وعسى دي .. إللي ها تيجي بمخالفة .. بلاها أحسن ..

وسيبك من فتاوي .. " جرايبنا " .. دي .. :P

تم تعديل 2 يونيو 2004 بواسطة Seafood

[بنت شعنونة]

لايت

العروسة شالت الحجاب "بأمر" من العريس على فكرة :D

سي فود

صدقني انا سببي الرئيسي الكلمة اللي انت قلتها دي فعلا

الواحد مش ناقص ;) :P

[Lighthouse]

لايت

العروسة شالت الحجاب "بأمر" من العريس على فكرة :blink:

وده عريس ايه ده بقى معلش يعني :huh:

" لاطاعة لمخلوق في معصية الخالق "

واذا كان " يأمرها " بمعصية الله فكيف قبلت به اصلا :huh:

عرسان آخر زمن

طيب والعريس و " أمر " عروسته تخلع الحجاب ... انت بقى ينصحوكي تخلعيه ليه ;)

علشان العروسة ماتبقاش خلعته لوحدها ويبقى خلع جماعي ولا ايه :P

حاجة تحزن :D

[Farah]

بصي انا عندي المشكله دي

كل اللي حواليه بيدفعوني اني اقلع الحجاب

لو لبست بونيه يقولوا اني شكلي مش حلو

لو لبست ايشارب يقولوا مكبرك طب ان حااعمل ايه ماهوانا فعلا كبرت عن الاول معنتش نغه وانا مش حاسه ان شكلي مختلف عن الايشارب كثير

عشان كده ولا كأني سمعاهم اللي عاوز يعترض يعترض

اعملي اللي انتي تحسي انك صح

البسي ايشارب ماشي مع الفستان والوان متناسقه وصدقيني مش حتفرق

اهم حاجه انك تكوني مقتنعه بنفسك وبشكلك

[souda]

مش عارف ليه العروسة فى اغلب الافراح بتشيل الحجاب لأ وكمان بعض المعازيم مع ان المفروض انها متحجبة عن اقتناع وعارفة ان الحجاب ده فى كل وقت مش نقول معلش دى ليلة واحدة فى العمر.

وكمان انا باستغرب من العريس اللى يسمح لعروسته بخلع الحجاب فى الفرح-وساعات هو اللى بيطلب كده- وياسلام واقف فرحان بعروسته وهى مدياها رقص ولا اجدعها رقاصة فى كباريه وهى لابسه فستان مبين اكتر ما هو مخبى .....

بلاوى كتير بتحصل فى الافراح وده لأنها ليلة فى العمر وعديها....حاجة غريبة. ;)

الغريب اكتر... حاجة افتكرها ...

كانت اختى بتحكيلى عن واحدة صاحبيتها ربنا هداها وكانت عايزة تتحجب واللى كانت معارضة وبشدة للأسف كانت امها ...وده لأنها خايفة عليها لأحسن الحجاب يأثر على سرعة جوازها :D

مع ان الشباب دلوقتى بيفضلوا المحجبة. :P

انا شايف أنك تروحى الفرح بالحجاب ...

[hamo90]

حد يعرف طريقة امورة وحلوة البس بيها طرحة تنفع في مناسبة

عشان انا غلبت واكتأبت ;)

بصي يا ستي بناء غلي خبرتي في مجال العبايات الحريمي والطرح والايشاربات - لانه مجال عملي-

قابلت الموقف ده كتير تيجي الزبونة عايزة تنقي طرحة للفرح وهي بتقدم رجل وتأخر رجل

عايزة تشتري بس صديقاتها قالوا لها لا ده فرح ويوم عيد وكل الكلام ده

بس أحنا طبعا بنقنع الزبونة أنها تشتري طرحة ليه؟

اولا "- عشلن حرام تخلع الحجاب " لاطاعة لمخلوق في معصية الخالق"

ثانيا :- في بعض أنواع الطرح الي احنا بنسميها سواريه مخصصة للمناسبات السعيدة وبيكون شكلها شيك جدا ومحترمة و محتشمة جدا

يعني مفيش أي مشكلة

وربنا يتمم بخير

HAMO

:P

[disappointed]

أولا من الناحية الدينيّة لا يصح خلع الحجاب , و أنا أرى أن خلع الحجاب بعد إرتدائه - ولو لليلة و احدة- لا يروق لى أكثر من عدم إرتداء الحجاب من الأساس لأنه قد يشير إلى عدم إرتداء الحجاب عن قناعة (نزولا على رغبة الجماهير - المجتمع و العائلة يعنى-)... و إن كان الأمر حرّية شخصيّة فى النهاية

من ناحية أخرى....أنا مش عارف ليه فيه ربط بين الحجاب و عدم الأناقة؟؟؟

الأناقة مزيج من الهندام العام و تناسق الألوان (سواء بأسلوب الهارمونى أو الكونتراست) و إختيار ما يلائم شكل الوجه و تركيبة الجسم

يعنى مثلاً لو واحد أسمر قوى لبس أشيك قميص بس لونه زاعق و زاهى مش حيليق عليه زى لو واحد أبيض لبس نفس القميص... ولو واحدة تخينة قوى لبست حاجه مخطّطة بالعرض مش حتبقى لايقة عليها تماما زى لو واحد طويل أو نحيف قوى لبس حاجه مخططة بالطول .... واللى رقبته قصيرة و ملظلظة ما يروحش يلبس قميص ياقته رفيّعه و صغيّرة.... وهكذا

من حوالى 3 أسابيع حضرت مع زوجتى فرح أختها.... زوجتى و أختها العروسة و أختها الثانية كلّهن محجّبات و كانوا آخر شياكة (إيه المشكلة يعنى؟؟؟؟)

الغريب بقى إن غطاء الرأس بيبقى شيك موووووووت لمّا بيوت الأزياء العالميّة تطلق الموضة بتاعة الإيشاربات فى الشتاء و الخريف (الأوروبيات فضلوا 5 سنين فى الستينيّات عايشين فى هوجة موضة الإيشاربات ...... و أشهر نجمات السينما و الفن بل و نساء المجتمع الراقى كن يرتدينه - و أشهرهن جريس كيلى أميرة موناكوالتى كانت مولعة بالإيشاربات-)....و بعدين ما الإيشارب كان يجنّن على نادية لطفى فى فيلم النظارة السوداء... الظاهر إنه ساعتها بس الإيشارب أو غطاء الرأس بيبقى "ترى شيك" و "آلا مود".... حأقول إيه بس.... ما هو أصل "المود" علينا حق :P

ما علينا......

الحل العملى هو التوجّه إلى المحلاّت المتخصصة فى الإيشاربات حيث ستجدين هناك تشكيلات مهولة و لا نهاية لها من الإيشاربات (سواء السواريه أو إيشاربات المناسبات الأقل أهمّية أو إيشاربات الخروج بالنهار للعمل أو الجامعة)... و أغلبها فى غاية الشياكة و كل ما عليك عمله هو أن تستقرّى على الفستان حتّى تختارى له ما يناسبه

يوجد بالمناسبة محل على أعلى مستوى مختص بالإيشاربات و لايبيع شيئ غيرها فى مدينة نصر (أغلبها مستورد - تركى بالذات-) , إسم المحل "نيو ماسيز" و هو على نفس صف دار الدفاع الجوى و بعده بــ100 أو 200 متر (بعد معرض السيارات و محل الديكور و الزهور الملاصق للدار)...... أنا رحته مع زوجتى و أختها و قعدنا فيه أكثر من نصف ساعة لم أشعر بها من كثرة إنبهارى و إعجابى بشياكة التشكيلة الموجودة به (الواحد لولا الملامة كان حسدكم على إنكم ممكن تتحجّبوا و تلبسوا الإيشاربات الشيك دى ;) )

تم تعديل 3 يونيو 2004 بواسطة disappointed

[Guest Mohd Gramoun]

أقبل رجل إلى إبراهيم بن أدهم .. فقال : يا شيخ .. إن نفسي .. تدفعني إلى المعاصي .. فعظني موعظة ..

فقال له إبراهيم : إذا دعتك نفسك إلى معصية الله فاعصه .. ولا بأس عليك ..ولكن لي إليك خمسة شروط ..

قال الرجل : هاتها

قال إبراهيم : إذا أردت أن تعصي الله فاختبئ في مكان لا يراك الله فيه ..

فقال الرجل : سبحان الله ..كيف أختفي عنه ..وهو لا تخفى عليه خافية..

فقال إبراهيم : سبحان الله .. أما تستحي أن تعصي الله وهو يراك .. فسكت.. ثم قال : زدني ..

فقال إبراهيم : إذا أردت أن تعصي الله .. فلا تعصه فوق أرضه ..

فقال الرجل : سبحان الله .. وأين أذهب .. وكل ما في الكون له ..

فقال إبراهيم : أما تستحي أن تعصي الله .. وتسكن فوق أرضه ؟

قال الرجل : زدني..

فقال إبراهيم : إذا أردت أن تعصي الله .. فلا تأكل من رزقه ..

فقال الرجل : سبحان الله .. وكيف أعيش .. وكل النعم من عنده ..

فقال إبراهيم : أما تستحي أن تعصي الله .. وهو يطعمك ويسقيك .. ويحفظ عليك قوتك ؟

قال الرجل : زدني..

فقال إبراهيم : فإذا عصيت الله .. ثم جاءتك الملائكة لتسوقك إلى النار ..فلا تذهب معهم ..

فقال الرجل : سبحان الله .. وهل لي قوة عليهم .. إنما يسوقونني سوقاً

فقال إبراهيم : فإذا قرأت ذنوبك في صحيفتك .. فأنكر أن تكون فعلتها ..

فقال الرجل : سبحان الله .. فأين الكرام الكاتبون .. والملائكة الحافظون ..والشهود الناطقون ..

ثم بكى الرجل .. ومضى .. وهو يقول : أين الكرام الكاتبون .. والملائكة الحافظون .. والشهود الناطقون ..

[بنت شعنونة]

يا جماعا المشكلة مش في الطرحة

المشكلة في الرببببببططططططة

ما تلحقني يا هاااامو وتقولي اربطها ازاي

والله يخليك بلاش الربطة الأسبانش اللي فقعوا مرارتي بيها دي

عشان انا ضد اني اغطي شعري واسيب رقبتي منووووورة كدا

انا عاوزة طريقة ربطة تغطي الراس والرقبة بشكل شيك وما يبقاش شكلي ام في الخمسسسسسسين من العمر

[se_ Elsyed]

هناك حديث للرسول الكريم معناه يقول إن من ترك معصية مخافة لله .. بدله الله خير منها ...

يعني لو واحده عايزه تخلع الحجاب عشان تستلقط لها عريس كويس في فرح او مناسبة ما .. يبقى ربنا ممكن يوقعها في واحد شرير يخليها تطلع من هدومها مش من الحجاب بس ..

والعكس صحيح .. لو تمسكت بحشمتها وحجابها مخافة لله .. فربنا هايجازيها خير عن هذا ...

وانا عمري في حياتي سواء أيام الشقاوة والشباب او بعد التقاعد والزواج ما سمعت أي شاب بيتمنى إنه يرتبط بإنسانه مش محجبة او يقول انا نفسي أشوف البنت على طبيعتها من غير حجاب ومتزوقه وحاجات من دي .

ولكن من يتحدث بهذا هو الشيطان بعينه .

وإيه الزمن اللي احنا فيه ده ؟.. ما الفتاة أو المراة المسلمة تلبس زي ما هي عايزه لكن عليها ان تراعي الشروط الإسلامية في لبسها بألا يشف او يصف ... إلخ أو يكون ثياب شُهرة عشان الناس تشاور عليها وتقول إيه الجمال ده .

[Lighthouse]

يا جماعا المشكلة مش في الطرحة

المشكلة في الرببببببططططططة

ما تلحقني يا هاااامو وتقولي اربطها ازاي

والله يخليك بلاش الربطة الأسبانش اللي فقعوا مرارتي بيها دي

عشان انا ضد اني اغطي شعري واسيب رقبتي منووووورة كدا

انا عاوزة طريقة ربطة تغطي الراس والرقبة بشكل شيك وما يبقاش شكلي ام في الخمسسسسسسين من العمر

مش عارفة ياشانا

هو انت قبل كده ماكنتيش بتحضري مناسبات خالص :blink:

محيرة نفسك بالربطة ليه !!!

بالمناسبة محلات الايشاربات وماأكثرها فيها بنات شاطرين جدا ممكن يوروكي كذا طريقة لربط الايشارب وتجربيها وتشوفيها تليق عليكي ولا لا

توكلي على الله وخللى الامور بسيطة ح تلاقي المناسبة مرت اسهل من السهولة

تم تعديل 3 يونيو 2004 بواسطة Lighthouse

[ابو يوسف]

و الله يا جماعة أنا شفت النهاردة برنامج على الجزيرة عن المسلمات الفرنسيات و ازاى بيعانوا بسبب موضوع الحجاب و بتعاملوا كأنهم منبوذون او عندهم مرض معدى !!! حاجة تقطع القلب !!

وهما مصرين على لبس الحجاب ..

خسروا اهاليهم و مدارسهم و اصدقائهم .. و كسبوا رضا الله عز و جل

الحمد لله ان عندنا واحد بيقول اقلعوا الحجاب قصاد 1000 بيقولوا اوعوا تقلعوا الحجاب !!!

أما عن شكل الحجاب .. خاصةً فى المناسبات ...

ففيه طرح آخر شياكة

و ربنا يهدى الجميع

[بنت شعنونة]

لايت

انا فعلا عمري ما حضرت مناسبة وكنت مهتمة اني ابان فيها امورة

يعني ديتها بنطلون عادي وبلوزة عادية واي طرحة والسلام وكله تمام

عموما

انا اكتأبت خلاص

اففففف

[بنت شعنونة]

طب حد عنده موقع على النت لأشكال ربطات حجاب؟

[Lighthouse]

لايت

انا فعلا عمري ما حضرت مناسبة وكنت مهتمة اني ابان فيها امورة

يعني ديتها بنطلون عادي وبلوزة عادية واي طرحة والسلام وكله تمام

عموما

انا اكتأبت خلاص

اففففف

ليه بس يابنتي الاكتئاب

مااحنا عايشين وبنروح شغلنا كل يوم وبنلبس كويس

صحيح اللبس للشغل مش زي المناسبات

ولكن برضه

الانيق انيق mfb:

اسمعي كلامي وانزلي جنينة مول ولا اي مول محترم كده ح تلاقي محلات الايشاربات كتيرة وفيها تشكيلات جبارة .

من كترها ح تحتاري في الاختيار

بس الاهم انك تاخدي اللبس اللى ح تلبسيه في الفرح علشان تختاري الايشارب المناسب له على الطبيعة .

انا باعمل كده ولسه عايشة عادي :blink:

[Farah]

اخر مره كنت في مصر كان فيه انواع ايشاربات تجنن

الانواع اللي انا بأستخدمها حاليا الطويله المستطيله وناعمه

لما بتلفيها مبتكنش ثقيله وكمان بتقدري تتحكمي فيها وجزء منها بيكون مرمي الي الوراء والاخر الي الامام

وزي ماقالت لايت اسألي الناس اللي بيبيعوا الايشاربات وحاولي تختاري الالوان المتناسقه

[hamo90]

ايوه أنا اهوه

هحاول أحطلك بعض أشكال لف الطرحة( امرنا لله)

ولسه هأجيب أشكال تانية أن شاء الله

hamo

[Farah]