مصايف بلدنا

[أحمد سيف]

الواحد لو حب يصيف في مصر دلوقتي يروح فين؟

ايه المصايف الكويسه وايه مميزات وعيوب كل واحد؟

يا ريت تكلمونا من واقع خبراتكم.

[shiko]

الساحل بكل القرى اللى عليه

مطروح

العجمى

السخنة ..(بس اتهيالى الدنيا هاتبقى حر شويتين )

الاسماعيلية - فايد-ابو سلطان

وطبعا الاختيار طبقا للجو اللى حضرتك تحب تتواجد فيه ...زحمة ولا هدؤ ...عائلى ولا اصحاب ...

اوتيل ولا شاليه ولا شقة ؟؟...مدة طويلة ولا قصيرة .....رخيص ولا غالى ...

يعنى فى الاول وفى الاخر ...عاوز تحدد اولوياتك ...وعلى الاساس ده تحدد

[HanaaOsama]

المصيف عاده بيبقي حسب ميول الشخص

يعني ناس عايزه مكان هادي جدا تستجم فيه

و ناس عايزه الزحمه و الحركه

و ناس عايزه الهوا و ريحه البحر و الرمله

و ناس مش بتحب الرمل و لا البحر ممكن مكان فيه حمامات سباحه و تغيير مش اكتر

تبتدي بالاقرب :-

العين السخنه : تنفع طبعا ليوم او اتنين لانها قريبه جدا ساعه و ربع مش اكتر

القري الي فيها في منها ممتاز و رائع و طبعا بحرها تحفه الميه صافيه و نظيفه و لا موج ولا حاجه

جو العين السخنه زي جو القاهره بالظبط مع اختلاف ان مفيش رطوبه يعني جاف

بس ميعتبرش الحر الي لا يطاق

وهي من الاماكن الي بالليل مفهاش مكان للتمشيه بره القريه الي الواحد فيها يعني مفهاش " بلد " زي مصايف كتير الا طبعا لو نزل السويس و ديه تعتبر بعيد

بس في بعض المطاعم المتفرقه علي الطريق

بعد كدا اسكندريه : اسكندريه هي الزحمه و الحركه باليل و الكورنيش لكن نزول بحر او حتي القاعده علي البحر صعب جدا

العجمي : بطاش - الهانوفيل - 6 اكتوبر ( شاطئ النخيل ):-

هاديه عن اسكندريه طبعا لكن البحر بقي وحش جدا في السنوات الي فاتت و فيه منتجعات بحمامات سباحه هاديه و لذيذه

شرم و الغردقه : مشكلتهم في الحر في الصيف

الساحل الشمالي : لسه مرحتوش

مرسي مطروح : البحر هناك تحفه بجد مفيش اي بحر شوفته بالنقاء ده لكن البلد عاديه

[Howayda Ismail]

الساحل الشمالى كله أكثر من رائع بداية من سيدى عبد الرحمن مرورا بجميع القرى السياحية حتى مطروح

ومطروح حاجة تانية خالص جميلة جدا وفيها قرية اندلسية وبها العاب مائية وبسين للاطفال وبحيرات

اسكندرية زحمة جدا والمياه فيها مش على قد كده

[Mr MAGED]

أستاذ أحمد

الساحل طبعا لا يعلي عليه ... بس صدقني هتلاقيه زحمة موت

ولو انت بتحب تستمتع زيي كده ... يعني عايز تستجم بجد وخاصة لو معاك العيلة

اطلع علي شرم

فيه قرية هناك اسمها هاوزا بيتش .. أول خليج نبق ... بجد تحفة ... كل حاجة فيها تجنن

ولو حبيت تتمشي بالليل وتطلع برة القرية أكيد هتقدر تروح خليج نعمة

أو اي كازينو من الموجودين هناك

جربها وهتدعيلي

صيف سعيد عليكو يا رب ... وخلينا احنا هنا فجدة

تحياتي

[Ahmed Anwer]

ما حدهش جاب ليه سيرة رأس سدر ؟؟؟

أهي دي بقه تجمع كل المميزات ،،،

هوا ، بحر تحفة ،،، قريبة جدا من القاهرة ،،، فنادق و قري بكل الأسعار و المستويات

هدوووووووء و يوم ما تبقي زحمة تبقي أفضي من أي شاطئ في مصر

يعيبها بس إنك هتنام من الساعة 9

مفيش فيها أي نوع من الفسح

لهواء السباحة و الهدوء و الإسترخاء فقط

[engmido]

مهما حصل اسكندرية زحمة جدااااااااا وخصوصا ايام الجمع والاحد

بس تفضل برده اسكندرية غير

يكفى انها كورنيش مش كورنيش جميلة ومتنزه جميل

لسه جاى من فندق هناك اسمه ايفو هورايزون جنب شيراتون المنتزه ....القعده هناك جميييييييلة