ممكن معلومات عن المعيشة في الدمام

[مانشي]

السلام عليكم ورحمة الله وبركاته

أنا جالي عقد عمل في السعودية في حي الراكة - الدمام وكنت عايز اي معلومات عن تكاليف المعيشة وايجار غرفة عزاب بتكلف كام وأي معلومات ممكن تفدني

وجزاكم الله خيرا

[خالد التهامى]

الاخ العزيز

بعد التحية

اولا مدينة الدمام تقع فى المنطقة الشرقية بالسعودية على الخليج العربى فى الصيف الان درجة الحرارة عالية جدا مع الرطوبة العالية

ثانيا حى الراكة يقع على طريق الدمام الخبر السريع وهى منطقة هادئة نوعا ما بينك وبين شاطئ البحر 5 دقائق وويمكنك من ايجاد سكن عزابى فى حدود 5000 الاف بالسنة

غرفة مشتركة مع اخرين

ولو تريد اى معلومات لاتترد فانا هنا فى مدينة الخبر بينى وبين الراكة 10 دقائق

[مانشي]

جزاك الله خيرا أخي العزيز

ممكن بس توضح لي متوسط تكاليف المعيشة وللعلم انا مدخن

وبالنسبة للسكن حضرتك تقصد كلنا هنعيش في حجرة واحدة ولا تقصد شقة بها كذا حجرة ولكل واحد حجرة خاصة بيه (ولو في الحالة ديه هتكلف كام شهريا)

معلش انا بتعبك معايا

تم تعديل 27 يوليو 2010 بواسطة مانشي

[nightmare]

بص يا أ. مانشي

الدمام انا عشت فيها اكثر من سنة كاملة , وهيا مدينة رائعة بصراحة ونظيفة وصغيرة وبجوار الخبر ( درة الخليج ) .

مشكلتها الوحيدة في الرطوبة العالية جداً واللى بتكون على مدار اكثر من 6 شهور في السنة.

بالنسبة للسكن ما اعرفش بصراحة لان السكن كان على حساب الشركة بس اقل زميل لى كان عامل استقدام لزوجته كان واخد شقة غرفة وصالة وحمام ومطبخ بحوالى 12 الف ريال وكانت الايجارات حسب ما الزملاء بيتكلموا قدامى بتبدأ من 14 وانتا طالع .. الكلام ده من سنتين

بالنسبة لسكن العازب فاعتقد زي ما الأستاذ خالد تهامي قالك عمرها ما هتقل عن 400 او 500 في الشهر يعني من 5000 الى 6000 ريال في السنة.

اما تكاليف المعيشة ففيه موضوع هنا في المنتدي بيتكلم عنها بالتفصيل , لكن ملخص المعيشة في الدمام لن تقل تكاليف الأكل والشرب فقط عن 500 ريال وده العادي يعني هتتغدي كبسة او علبة سلمون او شوية مكرونة وسمك وهتتعشي فول او طعمية او بيض وبطاطس.

ضيف كمان 100 ريال نثريات .. يعني عصاير مثلاً وصابون ومسحوق غسيل.

ضيف كمان من قيمة مكالمات الهاتف والانترنت ودي بترجع ليك انتا يعني ممكن من 50 الى 250 في الشهر . شوف انتا هتتكلم كام مرة في الاسبوع وخاطب وهتقضيها حب طول الليل والا عازب زي حالاتى وهيا مرة في الاسبوع هتكلم الاهل وبس تتطمن عليهم.

ضيف كمان سجايرك يا حلو ودي بتبدأ من 150 ريال الى 250 ريال حسب النوع اللى انتا بتشربه يعني ال ام ب 5 ريال مالبورو ب 7 دانهيل ب 8.. فشوف هتشرب ايه وربنا يهديك ويهدينى ونبطلها ان شاء الله.

اضيفلك مصاريف الخروج والفسح اللى بتبقي على اقل تقدير مرة في الاسبوع , وما اتكلمناش صحيح عن مصاريف المواصلات ده على اساس ان الشركة بتعتك هتوفر المواصلات او هتديك بدل مواصلات, ما اتكلمناش ان حضرتك ممكن في شهر يعجبك تي شيرت معين او بنطلون او قميص او لمؤاخذه كوتشي او جزمة محترمة ممكن تشتريها.

يعني يا أ. مانشي .. متوسط كده 500 اكل وشرب+100 اتصالات ودي اقل حاجة على فكرة+100نثريات+150 سجاير ودي وسط+100 خروجات او لو هتشتري قطعة واحدة (تي شيرت او قميص او بنطلون فقط ).

يعني من الآخر من 850 الى 1000 هتعيش يدوبك على حافة المتوسط.

وأرجو انى أكون أفدتك

تم تعديل 28 يوليو 2010 بواسطة nightmare

[مانشي]

متشكر جدا على ردك

بس سكن العزاب بيكون ازاي

شقة وكل واحد ليه حجرة ولا كله في حجرة واحدة

معلش ان مش فاهم النقطة دي

تم تعديل 28 يوليو 2010 بواسطة مانشي

[خالد التهامى]

الاخ العزيز/ مانشى

دى تكلفة غرفة مستقلة لوحدك ولكن لوجبيت احد معاك فى الغرفة يبقى اقسم على اثنين

[nightmare]

أ. خالد جاوبك , وممكن تشوف الأخ اللى في المشاركة دي وتبعتله تستفسر منه يمكن لسه فيه مكان معاه ويبقي وفرت علي نفسك عناء البحث عن سكن

http://www.egyptiantalks.org/invb/index.php?showtopic=94048

[مانشي]

الواحد مش عارف يقولكم ايه أنا متشكر جدا

وأتمنى من الله ان يكون زملائي في العمل مثلكم

وان شاء الله لما اوصل الدمام يسعدني ويشرفني ان نتقابل ونتعارف

وجزاكم الله خيرا

تم تعديل 28 يوليو 2010 بواسطة مانشي