الضنا غاااااااااااااااااااااالى اوى........ واللى بيروح مبيرجعش

[hOuSsAm]

كتير بيحصل وانت قاعد عالبلاج تحت الشمسية ومستمتع بموج البحر تلاقى واحدة ست بتجرى محدش شاف ابنى صغير وعنده 3 سنين وكان لابس مايوه اسمر

وتلاقيها يعينى واخده الشط رايح جاى ويمكن بالخمس ست سعات ومش لاقية ابنها وقلبها يعينى هيتفتر ويتقطع

مش كدة وبس انت بتلاقى اكتر من اسرة بتدور على اطفالها فى وسط الزحام

فى مرة كنت لسه داخل ساحة الحرم المكى ومن ناحية باب الملك فهد والاقى يعينى طفل طالع من الباب مفزوع وبيعيط .... ابويا..... ابويا ومتجه نحية طريق ابراهيم الخليل وان حد يقدر يوقفه ابدا......... الواد مفزوع وخايف من كل الناس ...... وتحس انه ضاع خلاص ومحدش عارف يساعده والواد بيجرى فى كل الاتجاهات..... ومش بيستجيب لاى حد...... وطبعا معظم الناس وانا منهم انشغل بحاله

مرة تالتة فى نص رمضان وليلة الجمعة وطبعا الافاضل اللى راحوا الحرم فى رمضان بيبقوا عارفين صحن الحرم مابين العشا والفجر بيبقى شكله ايه (يمكن اكتر من الحج)

راجل محرم وشايل ابنه واعد يلف ويعيط (ايه ياعم مالك) قال مراتى وابنى ضاعوا منى (كنا ساعتها الساعة 3 ونص الفجر تقريبا) طيب اهدى كدة وباذن الله هنلاقيهم قال انا بدور عليهم بقالى 4 سعات ولكن بدون جدوى....... طيب معاهم موبيل....... لاء .......... اصلا هما مكنوش من اهل مكة.....طيب سالت الحرس..... سالتهم اكتر من مرة ومحدش عارف يساعدنى....... ومظنش ان حد هيساعده...... الله اعلم حصله ايه

وعشان احنا لازم نتعلم من اخطاء الاخرين ........ فحسيت انه مهم جدا ان يبقى فيه اجراءات للخروجات بحيث يبقى عندنا حل لاى مشكلة

دى بعض افكارى

1- ممكن نجيب اسويرة او سلسلة ونسجل عليها كل بيانات الوالد من اسمه وعنوانه ورقم تليفونه بالعربى والانجليزى ونلفها على معصم الطفل او حوالين رقابته

او ممكن لو كارت بسيط للوالد ويتعلق بدبوس فى هدوم الطفل

2- ممكن تعمل ختم (اكلاشيه) فيه كل التفاصيل بردوا وتختم بيه على ايد الطفل لو انت خايف ان لو حاجة متعلقة فى ايده تضيع

3- دايما لما نروح مكان جديد سواء مصيف او حرم نعرف خريطة المكان وايه الخدمات المتاحة يعنى لو اتسرقت او ضاع طفلى ايه الحل اروح لمين اوكلم مين

اعرف مثلا انه عالشواطئ فيه مكاتب استتعلامات وامن الشاطئ...... فى الحرم بردوا والمولات الكبيرة فى حجات زى دى........ وكمان نعرف مداخل ومخارج المكان يعنى مثلا الطفل تاه فى الحرم يبقى هنتجمع عند الاشارة الخضرا بتاعة الحجر الاسود........ عالبلاج طيب هنتجمع عند الكافتريا الفلانية........ فى مجمع التحرير يبقى هنتجمع عند مكتب مش عارف مين......... فى هيبر بندة يبقى هنتجمع عند صندوق البطاطس

4- مهم جدا وبالذات لو الطفل واعى يعنى من 3 سنوات فاكثر انك تعلمه لما يقع فى مشكلة ازاى يتصرف...... يمعنى ان الطفل فجاة مش لاقى والده طب يعمل ايه اول حاجة يهدى....... تانى حاجة ممكن تتفقوا على مكان تتقبلوا فيه لو تهتوا عن بعض (اذكر ان والدى وانا صغير جدا لما كنا بنروح المصيف قبل منعمل اى حاجة يعرفنى ايه اقرب المحلات للبلاج اللى نزلنا فيه واسمائها كمان يعرفنى ارقام اقرب برجين انقاذ للشمسية........ دايما بناخد لون شمسية مميز وليكن ازرق ولو مش مميز نعمل فيه اى علامة تميزه.... دايما فيه سين بينى وبين والدى ان عنينا على بعض كل فترة ...... زى متقول كدة بنتحسس بعض)طيب لو تهت فعلا عن المكان مكنتش بقلق لانى عارف ان هتصرف....... يعنى مكان الشمسية كان معروف ولو حتى الدنيا اسودت هوقف تاكسى واوصل لعنوان البيت مهو كمان معرفنى ازاى اوصل للبيت)

5- مهم جدا انك تعرف الواد ميسمعش كلام اى حد ومش اى واحد يقوله تعالى اوديك لبباك تروح معاه وخلاص الا لو كان حد معتمد (يعنى ظابط شرطة مثلا) (لان انتشرت اوى سرقة الاطفال ومن ثم اعضائهم)

6- مهم جدا ان الطفل يبقى حافظ اسمه بالكامل وعنوانه ورقم تليفون بباه ومامته

7- تجنبوا دايما الاماكن المزدحمة يعنى لو رحت شاطئ اختار مكان هادى ولو رحت الحرم ومعاك اطفال لما تطوف فى اطراف الصحن عشان الزحمة او تطوف فى الدور التانى ولو معاك اكتر من طفل ريح دماغك وجيب عجلة وحطهم عليها....... كمان بيبقى فيه اوقات شديدة الزحام واوقات معقولة

الحجات دى مهمة جدا....... وفعلا كتير مش بيعرفوا اهميتها الا لما بيغقوا فى المشكلة ........ عشان كدة دى احتياطات بنعملها....فيه علم اسمه علم ادارة الازمات

اظن كمان ان فيه افكار كتيرة للموضوع ده....... عشان كدة بفتح باب النقاش واى افكار جديدة ممكن تفيد الناس

ولو حد فعلا ليه تجارب فى قصة ضياع الابناء ياريت يحكيها عشان نتعلم

تحياتى للجميع

[لماضة مصرية جدا]

السلام عليكم و رحمة الله و بركاته

ايه ده بس يا استاذ حسام.....ده انت نزلت علينا بفيلم المولد....و ايه عمال تطلع من قصة....لجناية....الله يسامحك :blink:

بس هو في القصص اللي حضرتك بتقول عليها دي

هي فين مسئولية الام او الاب....انا متخيلشي يبقي حد معاه طفل صغير...و عينه متبقاش عليه....ده احنا بنبقي في نادي...و مقفول....و لو العيلين غادرو منطقة الزحلايق....بيبقي الواحد هيتجنن

مش عارفة انا اعصابي باظت من التوبيك دوت...مش قادرة اتخيلها الصراحة...مع اني اصلا استاذة توهان (عندي سوابق توهة في الحرم و انا سني حوالي 3 سنين....و محدش يسالني كنت برجع ازاي زي القرش الممسوح لاهلي....معرفشي ازاي....لاني اللي بفتكره ان لما حد كان بيسالني اسمي....كنت بقول اسم دلع كده ماما كانت بتناديني بيه...و لغاية 3 ابتدائي و انت متخيلة ان ده اسمي... wst:: )

ربنا يحافظ علي ولادنا...اللي في علم الغيب....وولادنا اللي بنشوفهم بيكبروا حوالينا دلوقتي

[hOuSsAm]

هي فين مسئولية الام او الاب

المسئولية موجودة بس لاى سبب من الاسباب الحجات دى بتحصل اما للزحام الشديد او شقاوة الاطفال او ارهاق الاب والام....... وكمان موضوع التوهان ده بيحصل فى لحظة

وانتى جربتيه قبل كدة من 20 سنة ....... لو قارنا بين الحرم من 20 سنة ودلوقتى الوضع مختلف تماما والاعداد تضاعفت ولسه الوضع هيختلف مع التوسعات الجديدة

الفكرة عشان منقعش فى الغلط لازم نحط احتياطتنا ونتعلم من اخطاء الغير

تحياتى

[pocy]

اخى الفاضل الموضوع اللى اثرته ده مهم جدا وده انا شوفته مع ناس اعرفهم وبجد كان موضوع موجع للقلب جدا وانا بدور معاهم فى مول كبير اكبر بمراحل من سيتى ستار فى مصر تخيل بقي هتلاقي البيبي ازاى بس ربنا يسر الامر ان الطفل كان معاه مسدس لعبه بيعمل نور وصوت fire fire

وكنا سامعين الصوت بس مش عارفين فين وخصوصا انه كان بيجري ويلعب بيه بس عرفنا كل حراس المبنى وكلهم شافوه وفى الاخر واحد شافه وقاله اقف هنا واعمل صوت بالمسدس ولما ثبت الولد مكانه وقعد يعمل صوت لاقيناه وبجد امه كانت هتتجنن عليه وبدور وهى بتعيط انا ساعتها مكنش عمر لسه جه للدني بس اتعظت وخصوص انى تهت وانا صغيره ولسه فاكره الاحساس ده وكنت عند عمتى وحته معرفهاش بس فى الاخر الراجل بتاع الجامع كان شافنى مع بابا وكان عارف بابا وجوز عمتى فودانى للبيت بس والله لسه فاكره الموقف ده وكنت تقريبا 6 او 7 سنين

[الغريب]

سبحان الله الموضوع ده شوفته يا حسام مرتين في العمرة السابقة

بنت صغير تاهت من أهلها في المدينة المنورة وحظهم أن الباص كان خلاص ماشي علشان يروحوا مكة تخيل بقى الذنقة وأنهم كلهم بملابس الإحرام والجو كان حر جدا بالمدينة وساعة ظهرية والبنت تاهت كمان في وسط الفنادق بالمدينة يعني الموضوع كان صعب جدا بس ربنا يسرلهم الأمر ولقيوها

والموقف التاني لشبين فلسطينيين كانوا معانا في الفوج وأمهم تاهت منهم في الحرم المدني بردو بس هما بصراحة كانوا غلطانين لأن أمهم ست كبيرة وهما أعتمدوا أنها تروح على الباص لوحدها وطبعا تاهت وقعدنا كلنا ندور عليها لحد الشرطة الحمدلله ما سعدتنا ولقيناها وده طبعا لأنها كبيرة وفاهمة وراحت على الشرطة على طول أنما المشكلة في الأولاد الصغيرين فعلا..

بس فعلا الموضوع مهم جدا وبالذات في مصر في ظل إختطاف الأولاد وموضوع سرقة الأعضاء والكلام ده ، بس طبعا مش عاوز أخوف حد لأن كله بتقدير الله وربنا هو الحافظ.

أحب أضيف للإقتراحات بتعتك الآتي :

1- رقية الأهل والأولاد قبل النزول كما كان يفعل النبي مع الحسن والحسين فيرقيهم بقوله "أعيذكما بكلمات الله التامة من كل شيطان وهامة ومن كل عين لامة"

2-دوما لابد أن نتعلم ونعلم أولادنا الهدوء والتركيز في مثل هذه المواقف.

[مصري أصيل]

أستاذ حسام

الموضوع اللي حضرتك بتتكلم فيه مهم جداً جداً و انا من يومين لما شفت موضوعك بدأت أحفظ أولادي الصغيرين رقم تليفوني لأي ظرف ممكن يحصل و ان كان الموضوع بالنسبة لأننا مقيمين بره مصر أكتر أمان عن الموجودين في مصر و موضوع سرقة الاطفال مش موجود هنا بس بالتأكيد ممكن الطفل يتوه في اي لحظه و خصوصاً ان المولات هنا كبيره و لو الولد تاه بصعوبه جداً لما هتلاقيه تاني.

بس من النقط اللي احب أأكد عليها بالأضافه للنقط اللي حضرتك اتكلمت فيها هي في حالة حدوث هذا لا قدر الله محاولة السيطره علي النفس و عدم انفلات الاعصاب بشكل مبالغ فيه لأن ده هيزود المشكله.

في مره كنا في صالة العاب في احد المولات و وطفل من الاطفال تاه و لقينا امه بتصوت و مافيش حد عارف يهديها ابداً و سابت كل حاجه و مسكت في المسؤول عن اللعبه اللي كان ابنها بيلعب فيها و كلنا كنا بنخلصه من ايدها بطلوع الروح و كنت بأسألها الولد لابس ايه عشان ندور معاكي و هيه طبعا خارج السيطره و مش بتعمل اي حاجه غير انها تصرخ و تعيط بهستيريا و احنا كلنا بنحاول نساعدها بس هيه مش مديانا الفرصه لكده . و الحمد لله كان معاها واحده من اقاربها و طبعا عارفه الولد و فضلت تدور عليه لغاية ما رجعت بيه ... طيب لو ما كانتش الست دي موجوده معاها و جالها حالة الانهيار دي كان الموقف هيكون ازاي .

فا مسألة التحكم في الاعصاب مهمة جداً و التصرف السريع لمحاولة ايجاد الطفل و تبليغ الامن ان وجد.

المشكله كمان ان الطفل لما بيتوه عن اهله بيضطرب و مافيش حد بيقدر ياخد منه معلومه صحيحه ممكن تفيد في العثور علي اهله فالمفروض الاهل هما اللي يبقوا هاديين الي حد ما

تقبل تحياتي

تم تعديل 29 يوليو 2010 بواسطة مصري أصيل

[rewsha]

طبعااُحيي حضرتك على اثارة الموضوع ده يا استاذ حسام .لان للاسف ناس كتير جدا مش بتاخد بالهامن النقاط اللي المفروض ينبهو اولادهم ليها لو لاقدر الله تاهو عنهم

ولما بيحصل الموقف ..كُله بيبقى تايه ...الطفل تايها ....وحتى لو بيعرف يتكلم احيانا بيقعد يعيط من الخوف لدرجة ان لو حد حب يساعده مش بيعرف ياخد منه اي معلومه

والام تايهه عن اللي مفروض تعمله وعماله تعيط ومش بتفكر تعمل ايه وممكن كمان

من قلة تركيزها تنسى لون لبس طفلها ايه

انا اول حاجه باركز عليها لما نيجي خارجين ...اني اوصي بناتي بان لو حصل وحد تاه عن التاني ...اهم حاجه هيه الهدوء .علشان نعرف نفكر

وكمان الواحد لو رايح مكان وعارف انه زحمه يحاول يلبس طفله لون مميز وواضح

يعني مره كنا في النادي والبنت بتلعب في الالعاب وفجاْه تاهت من قدام عيني ...اول حاجه عملتها اني بقيت اقول هيه لابسه لون كذا

وفعلا لون التي شيرت بتاعها هوه اللي كشف مكانها ..لانها عملت حتت حركه

(كان نادي الشرطه ولازق فيه نادي الاطباء)والفرق بينهم سور حديد

الانسه المبجله ..عدت من بين الحديد لانه كان واسع وراحت على النادي اللي جنبنا

الكلام ده كان في احدى المصايف

لكن المشكله كانت ان نادي الشرطه حاطت الالعاب في مكان ونادي الاطباء اللي لازق فيه حاطت الالعاب في حدوده لكن لازقه في نفس منطقه العاب نادي الشرطه والفرق بينهم سورحديد

البنت بقى الالعاب زغللت عينها وعدت من النادي ده ...للتاني علشان تلعب في الالعاب التانيه

وزي ماقولت لون التي شيرت بتاعها المميز والفاقع هوه اللي اظهرها لي وهيه طالعه على الزُحليقه في العاب النادي المُجاور

وهيه ولاعلى بالها ...هيه بتلعب ...وانا دايخه عليها

تم تعديل 29 يوليو 2010 بواسطة rewsha