مبروك يا س س المتسوبيشى اللانسم

[Handicraft]

اخونا س س خلاص البلية لعبت معاه والأسهم اللى كان شاريها فى بورصة طوكيو ضربت وعدى محدش حيقدر يكلمه بعد كده والمفترى من جبروته اشترى عربية متسوبيشى لانسم، فاحنا بننتهز المناسبة دى ونبارك له وهات لفه يا عم.

وادى صورة العربية نزلت صورتها بالكاميرا من غير ما ياخد باله ومن غير البودى جارد اللى مشغلهم معاه ما يحسوا وقلت اخليكم تتفرجوا على س س الإقطاعى.

-----------

الصورة دى اخدتها وانا منبطح على الأرض والأقدام بتدوسنى

يلا ادى كمان بروفيل يا عم ولا تزعل

لأ والكنبه اللى ورا ممكن تشيلها وتمشى العربية صيفى

والمتور موتور ماكينة رى معدل حاجه كده معتبره.

ودى صورة بقى من الداخل نعرف منها مدى عشق الزميل س س للسيارات وخصوصا الزودة بثلاث عجلات وفرامل بسكلته.

تم تعديل 6 يونيو 2004 بواسطة Handicraft

[crossfield]

ما شاء الله

مبروك يا س س

ربنا يكفيك شرها.

[se_ Elsyed]

اهو نقك الدكر ده هو اللي جابنا ورا يا سي هاندي يا كرافت ، الصفقة فشلت ياخويا بس عندي محاولة تاني بكرة

وماقولتش ليه انت جيبت ايه يا مكار ؟

أخوكوا هاندي اشترى الاسبوع اللي فات " سيات كوردبا " في صفقة القرن ... مبروك يا مـــــــوس

[Cleo]

كده والمفترى من جبروته اشترى عربية متسوبيشى لانسم،

يا هاندى هاتفضحنا....

اسمها مكسوبيشى لانسوم.... ax:

مبروك يا س س .... أنا ممكن أتطوع و آجى أساعدمك فى سواقتها و انده بالحيانى "اتنين رمسيس... اتنين رمسيس" prt:

ربنا يباركلك فيها و يكفيك شر طريقها..

[الأفوكاتو]

الحقوا:

النائب العام يقول ل سى السيد, و ل سى هاندى:

من أين لكم هذا؟

[فــيــروز]

مبروك يا س.س. :angry:

عقبال النص نقل :angry: :angry:

[Handicraft]

cleo

يا هاندى هاتفضحنا....

اسمها مكسوبيشى لانسوم

آسف يا كليو انت عارفه انى ما افهمش فى الموديلات الحديثة ولآخر عربية اتعاملت معاها كانت العربية الحربية بتاعة أحمس.

س س

الصفقة فشلت ياخويا بس عندي محاولة تاني بكرة

يا سلام يا سلام كل ده علشان متدنيش لفه ماشى ان ما فسيتلك العجل التيوبلس بتاعها فى الخباثة.

وبعدين أنا اللى تاعب قلبى ونازل اشترى كاميرا مخصوص علشان اصور العربية واعمل مغامرات ولا جاك نورس علشان اقدر اتخطى الجموع وافوز بالصور وجاى تقوللى الصفقة فشلت ... مش قادر اقولك غير روح يا ابنى ربنا يفتحها فى وشك ويوفقك فى الصفقة بتاعتك ويجعلك فى كل خطوه صفقه.

الأفوكاتو

من أين لكم هذا؟

سيادة النائب العام ان المتهم س س الواقف أمامكم مذنب ومتلبس بابرام صفقة مع أطراف خافيه ومعروف عنه نزعاته العدوانية وتاريخه الدرامتيكى المليئ بالصفقات المريبة وانا شاهد عليه وكان فاهم انه لما يعزمنى عند ماما نورا ويشربنى عصير كوكتيل انه قدر يشترينى بس انا يا حضرة النائب العام شربت العصير وانا عامل انه اشترانى علشان البد فى الدره واقدر ابلغ عنه واجنب المجتمع شروره وواضح للجميع تفاصيل الصفقة الغامضة والمشبوهه التى يقوم بعقدها وانا وان كنت ادافع عنه الا انى اجد انه من مصلحته ان يعترف وانا اعترف عليه فا مفيش مشكلة انكم تحاكموه وتحكموا عليه بأقصى عقوبة.

وانا يا افندم العربية السيات بتاعتى ثمنها دافعه من الأرض اللى كنت وارثها عن جدى الرابع عشر واتضح ان فيها بير كحل وبعتها لشركة عالمية للتنقيب عن الذهب فيها بموجب عقد قانونى.

وشكرا

[se_ Elsyed]

إيه يا جدعان إنتوا محسسني إني هاشتري ميكروباز بالنفر ...

بس تصدقي بالله يا كليو أنا من أسباب دخولي الصفقة دي هو إنتي !!!... لأني مش قادر انسى الميكسوبيشي لانسوم اللي حكيتيلنا عليه ..

عامة شكراً لك من هنئنا .. بس ربنا يتمها على خير أحسن انا داخل في صراع شرس مع بعض تجار السوق لشراء تلك السيارة ...

عمنا الافوكاتو ..... هذا من فضل ربي .. والعين صابتني ورب العرش نجاني .... س س الشهير بعفريت الأسفلت .

فيروزه : مكانك محجوز في النص نقل .. شفتي العيال الي بيبقوا راكبين فوق نقلة الزلط أو الرمله والهوا عمال يطير فيهم طول الطريق .... خلي بالك منهم ... على فكرة المهنة دي إسمها " التباع "

بس بأمانة .. مش عارف هاندي المكار جاب الصور دي منين ؟ لأنها نفس التصميم حتى الجناح اللي ورا ده هو بعينه .... بس فين يا هاندو الخبطة اللي في الرفرف القدماني ؟....

الواحد هنا ياخوانا ممكن يغير العربية لا مؤخذه يعني زي تغييره للحذاء لسبب بسيط جداً وهو رخص ثمنها وسهولة البيع والشراء يعني لكم ان تتصوروا إن ممكن تشتري فولفو موديل اوائل التسعينات بما يعادل 1000 دولار ( 3750 ريال ) او تويوتا أواخر الثمانينات بحوالي 750 دولار ( في عربية تويوتا موديل حاجة وثمانين إتباعت قدامي يوم الجمعة اللي فاتت بـ 1500 ريال !!!!!! ) ، أما الأنواع الأوروبية زي السيات بتاعت هاندي كرافت كده او السكودا أو البيجو أو الفولفو... فدي في السعودية عامله زي يتيم الفرح اللي مالوش حد يسأل عنه وبتتباع برخص التراب مع إنها ممكن تكون موديل 2000 أو 2001 مثلاً .... لكن تأثير الثقافة والعادات بيبان هنا بقى حيث إن الناس أخدت على الياباني والأمريكي أو الأوروبي الفخم زي المرسيدس والبي أم ... والموديلات اللي غير دي بتبقى صعب تلاقي لها مكان في السوق وعايزه وكيل يجاهد على ما يعمل إسم للعربية .

[فــيــروز]

فيروزه : مكانك محجوز في النص نقل .. شفتي العيال الي بيبقوا راكبين فوق نقلة الزلط أو الرمله والهوا عمال يطير فيهم طول الطريق .... خلي بالك منهم ... على فكرة المهنة دي إسمها " التباع "

طيب تصدق بالله :angry:

انا طول عمرى باحسد الناس دول انهم بيقعدوا فى الطراوه :angry:

لو سمحت احجز لى مكان متميز اعرف ازقل الناس بالطوب منه كويس :angry:

[إبن مصر]

ممكن تشتري فولفو موديل اوائل التسعينات بما يعادل 1000 دولار ( 3750 ريال ) او تويوتا أواخر الثمانينات بحوالي 750 دولار ( في عربية تويوتا موديل حاجة وثمانين إتباعت قدامي يوم الجمعة اللي فاتت بـ 1500 ريال !!!!!! ) ، أما الأنواع الأوروبية زي السيات بتاعت هاندي كرافت كده او السكودا أو البيجو أو الفولفو... فدي في السعودية عامله زي يتيم الفرح اللي مالوش حد يسأل عنه وبتتباع برخص التراب مع إنها ممكن تكون موديل 2000 أو 2001 مثلاً

لاااااااااااااااااااااااا

لاااااااااااااااااااااااااااااااااا

لااااااااااااااااااااااااااااااااااااااااا

مش ممكن ..... :angry:

حرام عليكم!!!!!!!!!!!!

سى السيدددددددددددددد

750$

ليييييييييييييييييييييييييييييييييه

شقا عمرى :angry:

شقى عمرى رااااااااااح :angry:

هوندا 88 جايبها ب 42000جنيه

انزل يا سى السيد معايا فى الملاحه...

والملاحه

والملاحه

وحبيبتى ملو التراحه

حسره علينا يا حسره علينا ..

لولولولولولولوليييييييييييييييي ;)

انا سناء اخت القمر

بين العباد حسنى اشتهر

هوب هوب واحد اتنين

هوب هوب واحد اتنين

هوب هوب واحد اتنين

نيااااههههااااااااااا

[se_ Elsyed]

هوندا 88 جايبها ب 42000جنيه

انزل يا سى السيد معايا فى الملاحه...

طب إستنى قبل ما تنزل الملاحة وعشان تبقى موته بموته ..

والله العظيم يا إبن مصر يابني لو نزلت السوق بهوندا 88 زي بتاعتك دي ( عدم اللامؤخذه ) وكانت عروسة وبتلمع وبتتكلم لوحدها وجابت لك 1500 ريال ( 400 دولار ) يبقى تبوس إيدك وش وضهر ...

واحد صاحبي معاه هوندا 93 وعمال يدلل عليها وعايز فيها 7000 ريال ( 1800 دولار ) ماحدش معبره والكل عمال يبص له بإزدراء وإشمقناط ( ماحدش يسألني يعني إيه إشمئناط ؟ )

طب واحد يسألني ويقولي يا أسطى س س واللي معاه عربية زي دي ومش عارف يبيعها وماحدش عبروا يعمل إيه .. أقول له في منتهى البساطة بيروح إدارة المرور ويعمل حاجة إسمها إسقاط نمر .. يعني بيلغيها من الوجود وبيدفنها بنفسه .

تعرفوا يا جماعة انا لسه بأقول لهاندي كرافت إمبارح إني ساعات بأتخيل إن ملحق السيارات الصادر مع جريدة الاهرام يوم الجمعة اللي بيصدره مجانين ومقيمين في مستشفى العباسية ..

فأقرأ معايا كده لما يقولك معرض فلان الفلاني اللي فاتح جديد بيبيع بأرخص الأسعار وغنتهز الفرصة قبل ما يعقلك يا جدعان " هوندا سيفيك 2004 " بـ 180 ألف جنية ... وبخط نمنم صغير كاتب تحت والباقي على 12 شهر طب بالله عليك لما ادفع 180 ألف كاش في هوندا سيفيك يبقى إيه اللي فاضل ؟ فناقص يقلعوا الواحد البدلة او القميص اللي رايح به وبالمرة يلبسوه قميص الأكمام .

واحد تاني عامل إعلانفي الاهرام برضوا عن مرسيدس 93 .. وبسعر خرافي والراجل شكله بيمر بأزمة مالية وعايز يرميها رمي يا كبد أمه وطالب فيها 230 ألف جنية !!!!! :angry: شوفتوا الإفترا بتاع الخلق والإنسان لما يبقى متجبر ... أهي دي هنا لما يقف على راسه ويعمل شقلباظ تجيب له ما بين 12 إلى 20 ألف ريال وياخد المبلغ ده ويجري أحسن الشاري يعقل ويرجع في كلامه .....

إبن مصر إبن مصر إبن مـــــــــــــــــــــصر

بؤ بؤ بؤ بؤ بؤ

[إبن مصر]

[فــيــروز]

طب واحد يسألني ويقولي يا أسطى س س واللي معاه عربية زي دي ومش عارف يبيعها وماحدش عبروا يعمل إيه .. أقول له في منتهى البساطة بيروح إدارة المرور ويعمل حاجة إسمها إسقاط نمر .. يعني بيلغيها من الوجود وبيدفنها بنفسه .

طيب ليه؟ :angry:

هو ما ينفعش يفكها و يبيع قطع الغيار فرط زى ما بيعملوا فى مصر؟ :angry:

[se_ Elsyed]

طب واحد يسألني ويقولي يا أسطى س س واللي معاه عربية زي دي ومش عارف يبيعها وماحدش عبروا يعمل إيه .. أقول له في منتهى البساطة بيروح إدارة المرور ويعمل حاجة إسمها إسقاط نمر .. يعني بيلغيها من الوجود وبيدفنها بنفسه .

طيب ليه؟ :angry:

هو ما ينفعش يفكها و يبيع قطع الغيار فرط زى ما بيعملوا فى مصر؟ :angry:

طب أنا راضي ذمتك عربية تساوي 1500 ريال جمله .. يبقى لو إتباعت بالمفرط تساوي كام " بالمينص " ؟ وبعدين هنا مجتمع شغل وماحدش فاضي يقعد يفك الشكمان وعصاية الفتيس والبوجيهات وينزل يقف بيهم في وكالة البلح ويبيعهم على 10 و 5 ريال واللي مايشتري يتفرج ... فهو يدفنها ويخلص بدل ماتجيبلوا العار .

[إبن مصر]

منك لله!!!!

منك لله!!!!

[أسد]

أولاً .. مبروك يا سي السيد على السيارة ..

ولو إني أرشح لك كورولا إذا كنت حتشتري جديد ..

بخصوص أسعار السيارات المستعملة ..

السنة اللي فاتت .. (2003) بعت سيارتي (كيا كلاروس) موديل 1999 وكنت أنا المالك الأول لها .. وقد أشتريتها في عام 1999 بسعر 45000 ريال ..

بعد إستخدام 4 سنوات بعتها بسعر 12000 ريال فقط

علماً بأن عدادها كان 126000 فقط

فعلاً في السعودية السيارات القدية ليس لها قيمة مثل مصر ..

طبعاً العيب مش هنا .. العيب في مصر ...

[se_ Elsyed]

من س س إلى هـ ك

الصفقة فشلت .

حول

[Handicraft]

من هـ. ك.

إلى س س

متنقلقش الكوردبا تحت أمرك

وبخصوص الصور وثمن الكاميرا حابعتلك فاتورة بالحساب ده حاجه والصداقة البريئة حاجة تانيه بيزنيس از بيزنس.

يا عم انت برده اكبر من انك تكبر مكسوبيشى لانسم دى يركبها الولد اللى بيعملك القهوة انت مقامك اكبر من كده فطبعا اوعى تزعل ولا تشيل فى نفسك العربيات بتروحى وتيجى المهم اعصابك وبعدين دى كانت واخده خبطه فى الرفرف يعنى مهيضة الجناح وعلى رأى كابتن لطيف "خيرها فى غيرها".

[الأفوكاتو]

تم تسجيل جميع المراسلات بالصوت و الصورة,

ملف أمن الدولة رقم 99999

رقم الكود7

يلزم الكودالإضافى للدخول الى هذه الصفحة.

تعليمات نهائية:

ممنوع الإقتراب, التعامل عن البعد, الأغراض يشتبه فى إنضمامهم لجمعيات مشبوهة, تاكل البسيسة, و تشرب الخروب.

أغلق.

[فــيــروز]

أصله مارضيش بالنص نقل :lol: ما فيه منها ميتسوبيشى ولا لازم يعنى تبقى اربعه باب !! :lol: ابتدى ببابين وبعدها ربنا يفتح عليك بالاتنين اللى فاضلين !! clp::