لقـــــــــــاء فى شارع الثـــــــــــــــورة

[ابو محمد بن مصطفي]

لقاء فى شارع الثورة

بقلم بلال فضل 29/ 7/ 2010

■ المذيعة: مساء الخير عزيزى المواطن.. تحب حضرتك تشترك معانا فى البرنامج؟

ـ المواطن: على حسب الاشتراك بكام؟

■ آه ده شكله عسل وهيتعبنا.. يا فندم أنا قصدى تشترك معانا برأيك.

ـ والله يافندم أنا لو كان عندى رأى أحب أحتفظ بيه لنفسى.

■ حضرتك مكبر الموضوع ليه.. ده برنامج إذاعى بنحتفل فيه بذكرى الثورة.

ـ يا فرج الله.. هى الثورة قامت أخيراً؟.. والله ماحد قال لى.

■ لا حول الله يارب.. عزيزى المواطن إحنا بنتكلم عن ثورة يوليو بتاعة الزعيم جمال عبدالناصر.

ـ أيوه عارفه.. جمال عبدالناصر مبارك.. شاب أمير وربنا هينصره علينا إن شاء الله.

■ لا مش هينفع كده خالص.. شوفوا لنا مواطن تانى والنبى.. عشان اليوم المجيد ده يعدى.

المعد: باقولك إيه يا هانم.. ده المواطن المتاح دلوقتى.. مشى حالك بيه لحد ما نلاقى غيره.

ـ يا فندم حضرتك متعصبة ليه.. أنا باهزر معاكى.. حد ما يعرفش ثورة يوليو.. مش دى اللى ثورة أطلقها جمال.. وإحنا حفرنا القنال وبعدين حررناه وبنفكر نبيعه دلوقتى.. أنا راكب معاكى فى البرنامج.. اتفضلى.

■ الصبر من عندك يا رب.. حضرتك ممكن نبتدى نسجل بس أستسمحك الإجابة تبقى على قد السؤال.

ـ والنبى البرنامج ده هيبقى عسل.. إنتى بس شوطى وربنا هيكرمنا.

■ المذيعة: أعزائى المشاهدين كل عام وأنتم بخير.. فى هذا اليوم المجيد نزلنا إلى شارع الثورة لننقل فرحة المواطنين بهذا اليوم التاريخى الذى غير وجه مصر.. التقينا بأحد المواطنين وسألناه عن رأيه فى مبادئ ثورة يوليو؟

ـ هى ثورة يوليو عندها مبادئ. والله ماكنت أعرف.

■ أيوه يا فندم ثورة يوليو عندها ست مبادئ.

ـ يا عينى.. ده الواحد مننا بيبقى عنده مبدأ بيطلع عينه فى الزمن ده وهى عندها ستة.. الله يكون فى عونها.

■ إيه اللى حصل للناس بس يا رب. يا سيد يا محترم مبادئ يعنى أهداف.

ـ والله.. يعنى الثورة عندها ست أهداف زى الأهلى كده.. وجابتهم فى مين؟

■ ماهو ده السؤال يا فندم؟ فى رأيك كابن من أبناء مصر بعد مرور 58 عاماً على الثورة ما الذى تحقق من أهداف ثورة يوليو؟

ـ إنتى مش بتقولى إنها جابت ست أهداف خلاص.

■ يا بنى آدم إفهم الثورات غير الماتشات.. الثورة بتيجى بأهداف وبعد كده بتحققها. فهمت؟

ـ أيوه فهمت.. يعنى فى الماتش بنلعب عشان نحط الهدف.. فى الثورة بنحط الهدف وبعد كده بنلعب فيه.. والنبى ماتتنرفزى يا ست هانم.. أصل أنا والله أول مرة أسمع حكاية أهداف الثورة دى.. حضرتك قولى لى الهدف وأنا أعلق لك عليه بعون الله.

■ معقول برضه.. بص يا سيدى أول هدف من أهداف الثورة القضاء على الاستعمار وأعوانه، إيه رأى حضرتك فى هذا الهدف؟

ـ أرجوكى اعذرينى أنا ما احبش أجيب سيرة الاستعمار.

■ ليه إن شاء الله؟

ـ عشان أعوانه هيزعلوا.. وزعلهم أوحش من زعل الاستعمار ذات نفسه.

■ إنت غريب قوى على فكرة.. بلاش الاستعمار.. عندك مثلا من أهم أهداف الثورة كان القضاء على الاحتكار وسيطرة رأس المال على الحكم.

ـ من فضلك أنا وافقت أسجل على أساس إن ده برنامج تاريخى.. ومش هتجيبوا سيرة أحمد باشا عز وحديد عز.. أنا عندى عيال وعايز أعالجهم.

■ إيه علاقة أحمد باشا عز وحديده بالموضوع يا أخينا.

ـ مش بتقولى احتكار.. عايزه تخلينى أقول الكلام اللى بيقولوه عليه بتوع المعارضة إنه محتكر الحديد عشان هو صاحب جمال مبارك وأمين تنظيم الحزب الوطنى.. بصى بقى أنا شاكك فيكو بصراحة.. انتو من قناة إيه.. معاكو كارنيهات.

■ ييه ده هيقلب دماغنا.. بلاش يا سيدى الهدف ده.. خلينا فى هدف غيره.. عندك مثلا هدف القضاء على الإقطاع.

ـ حضرتك بتتكلمى عن الثورة الفرنساوية ولا ثورة يوليو.. ممكن تورينى كده الورقة اللى بتقرى منها.

■ من فضلك ممكن تعلق على الهدف وانت ساكت.

ـ إزاى يعنى.. أعلق وأنا ساكت إزاى؟

■ قصدى تتكلم فى صلب الموضوع.

ـ ما هو معلهش يا ست هانم.. إنتى عماله تقولى لى قضاء على الإقطاع وتحقيق العدالة الاجتماعية بين طبقات الشعب.. إنتى مش عايشه معانا فى البلد.. أنا حاسس إنك بتتبلى على ثورة يوليو وبتلزّقى لها أهداف من وراها.. أصل يعنى لو ثورة يوليو كانت بتهدف للكلام ده ماكانتش هتقعد 55 سنة من غير ما تحققه.

■ طب خلاص خلاص أنا هاختار لك هدف تانى وقول تعليقك بأدب لو سمحت.. وبلاش ألفاظ تلزّقى وتتبلِّى والكلام ده.. تهدف ثورة يوليو إلى إقامة حياة دستورية وديمقراطية سليمة.. حضرتك بتضحك ليه؟

ـ أصلى افتكرت إنها سليمة سليمة.. فاكره لما الكافر فى فيلم فجر الإسلام قال شلت يدى وبعدين ضحك عليهم وقال إنها سليمة سليمة.. آه ياكفرة.. إنها سليمة قال.

■ طيب نكتفى بهذا القدر مع المواطن الكريم لكى نتيح الفرصة لعشرات المواطنين الذين يتسابقون خلف الكاميرا على إبداء رأيهم فى أهداف ثورة يوليو. كفاية كده أنا مش مكملة مع الراجل ده.. أبقى ست مش كويسة ويا رب أتنقل القناة التامنة لو كملت معاه.

ـ المعد: طيب خلاص هدى نفسك يا هانم.. هنمشيه.. بس إنتى إهدى والنبى.

■ إيه ده.. مش ممكن.. ده لسه واقف هنا.. إنت يا أخينا ما تتوكل على الله وتمشى من هنا.. ما خلصنا التسجيل.. إنت واقف هنا ليه؟

ـ مستنى إعادة «الأهداف».

(حوارية كتبتها قبل سنوات ونشرتها فى كتابى السكان «الأصليين» لمصر.. أهديها إلى كل أصدقائى الذين أغضبهم ما كتبته عن ثورة يوليو لكى يهدأ غضبهم قليلاً).

المصري اليوم

الكلام بالاحمر عجبني .....

حد ممكن يقولي ايه الاهداف التي لم تزل صامدة حتي الان امام طوفان الاستهبال اللي احنا فيه

طبعا اهداف الثورة لم تحقق جميها ايام قيام الثورة ذاتها

محدش يفتكر اني ناصري انا لا ناصري وثورجي انا بمشي بعيد عن الحيط شوية ....

علي شان المشي اليومين دول جنب الحيط بيسبب مشاكل ....

ممكن تقع عليلك قصرية زرع من البلكونة ..... حد يكب عليك ماية اي كان نوعها

الثورة انتهت مع وفاة عبد الناصر ......

وتحول النظام الاقتصادي للبلد من النظام القائم علي الدولة الي الاقتصاد الحر المفتوح السداح مداح

كمان انا مش اشتراكي ولا اقطاعي بس الواحد بيصعب عليه ان دول ركبت الافيال نزلت من علي الافيال وركبت الاقتصاد العالمي

واحنا بالسبعتلاف سنة والبلد مزالت منهوبة

[جسار]

ياه ياعم بلال هو أنت لسه فاكر الثورة وأهدافها

ده أنت قلبك أسود بجد ، يا عم قول يا باسط ، الثورة أو حركة الضباط قامت فى يوليو 52 هذا

صحيح والشعب فرح بيها ده برضه صحيح ، وعملت أنجازات كبيرة فى مصر ومنها على ما أذكر :

1-تقليص أو تحديد ملكية الاراضى الزراعية على عدة مراحل متتالية حتى وصلت الى 50 فدان

ولكن وكالعادة ولاننا مصريون ورثة الحضارات باع الباشوات الاراضى للأقارب والنظار والخولى

والكلاف والخدامين بيع صورى حتى تتضح الصورة فيما بعد ، وأتضحت بعد ما مسك السادات الحكم

ورفعوا قضايا وبعضهم كسبها ، والاخرون قعدوا يدوروا على اللى باعوا لهم كده وكده لقيوهم

ضربوا طناش على الارض وكل أقطاع وأنت طيب .

2- القضاء على الاستعمار ده تم فعلا ، فالقوات البريطانية بعد معاهدة الجلاء أتمت أنسحابها

فى 56 وعادت مرة ثانية بعد شهرين لبورسعيد ثم أنسحبت بعد صمود مصر لمدة شهر فأعطت فرصة

للتدخل الروسى ثم الامريكى للانذار والضغط وأنسحبت القوات البريطانية مرة أخرى ومعها فرنسا

وأسرائيل ، ولكن السؤال المطروح لماذا أنسحبت القوات البريطانية فى المرة الاولى وعلى الاخص

أن الجيش المصرى آنذاك لم يكن فى أستطاعته الصمود أمام قوات الاحتلال وهنالك سببان لذلك

-اولا : تم تنظيم المقاومة المسلحة الشعبية لضرب قوات الاحتلال فى مدن القناة أبتداءا من 51

وأستثمرتها ونمتها الثورة بعد ذلك وأمدتها بالسلاح والافراد والتغطية السياسيةوالامنية

وكانت ضربات المقاومة مؤلمة وتسبب الصداع للاحتلال والخسائر فى الافراد والعتاد .

- ثانيا: وهو السبب الاهم ، وهو أن كل المستعمرات البريطانية والميراث الاستعمارى لتلك

الامبراطورية قد آل بالفعل للولايات المتحدة الامريكية فى أعقاب الحرب العالمية

الثانية بسبب الديون المتراكمة على لندن لصالح واشنطن وأيضا لضغط الامريكان على

الانجليز لسرعة الحصول على ممتلكات الامبراطورية بالذات فى الشرق الاوسط حيث البترول

وهذا يفسر كل القرارات والتحركات الامريكية فيما بعد ، ومنها معارضة العدوان الثلاثى

على مصر فى 56 ، ومساندتها لأسرائيل فيما بعد ،ومرت الايام والسنون ، ووضعنا أنفسنا

رهنا فى قبضة الاستعمار الجديد بمزاجنا ووقعنا معه وثيقة الاستسلام فى كامب ديفيد

ولابد لنا أن نقول الحقيقة فى هذا الموضوع ، مصر كغيرها من دول المنطقة كان مصيرها

محدد بعد الحرب العالمية الثانية وهو الخضوع للهيمنة الامريكية ، وعندما قامت الثورة

لم يعطها الامريكان حق تقديرها وأستخفوا بها ، وبالتالى وفى ظل الحرب الباردة لجأ

النظام فى مصر للسوفييت لمساندتهم ضد العدو الاسرائيلى والذى يهدد كيان النظام الجديد

ومن هنا بدأت معاداة الامريكان وأستمرت حتى حرب 73 ، اذن فكل تلك الفترة من العداء

والمقاومة لم تكن سوى جملة أعتراضية فى كتابة تاريخ المنطقة وتاريخ مصر .