استفسار عن عمل المرأة بجدة

[mnectarj]

السلام عليكم جميعا

انا عضوة جديدة بالمنتدى وسعيدة بقبولى فيه

مش عاوزة اطول عليكم بالمقدمات

انا تصفحت مواضيع المنتدى القديمة وملقتش حاجة عن العمل فى مجال الترجمة بالسعودية.

انا زوجى سافر جدة للعمل كمحاسب وانا عاوزة اعرف هل فى امكانية لعمل المرأة فى جدة كمترجمة .

اشكركم مقدما :)

[hOuSsAm]

انا مش عارف بس جدة من المدن اللى بيتوفر فيها عمل المراة كتير

اللى اقدر اساعدك بيه تصفحى المواقع دى بيبقى فيه وظايف كتيرة فى الخليج

موقع بيت http://www.bayt.com/en/saudi-arabia/

وده موقع شغلانتى http://shoghlanty.moheet.com/

اتمنى لكى التوفيق

[mekkawy]

سلام عليكم

الفاضلة mnectarj

أحب أبشرك إن شغل الترجمة في السعودية كتييييييييير و مربح جداً و همن أصلاً ولاد لذينة أقل ورقة بتترجم بـ 50 ريال خاصة المكاتب المعتمدة و اللي بتترجم شهادات و كدة

و لأن البيئة معظمها مغتربين و كلهم شغالين و ليهم عيال في مدارس فأي ورقة أي كانت بتحتاج ترجمة و كمان جدة سوقها أكبر لوجود الميناء و الحركة التجارية و ده كمان مستلزم ترجمة أكتر و أكتر

و طبعاً بم إن حضرتك هتشتغلي فري لانس فالموضوع بيتم كالآتي

بتدخلي على الصفحات الصفراء السعودية و تجيبي لستة بأسماء مكاتب الترجمة في منطقة و هاتك يا تليفونات و إنك فري لانسر و عاوزة تشتغلي معاهم .. في اللي هيقولك مش محتاجين و أكترهم هيقولك أوكيه و منهم هيقولك تعالي المكتب .. لو عندك مقدرة تروحي و ده هيكون احسن عشان تعرفي بس نظام شغلهم ماشي ازاي و بعدين تقعدي تترجمي من البيت .. لو مش هتروحي خالص المكتب ولا مرة بأي حال من الأحوال هتلاقي بردو مكاتب تشغلك من البيت لكن الفرص هتقل .. هو كله من البيت و لكن في مكاتب لازم تروحي تعملي زي اختبار كدة .. مش اختبار .. لكن عشان تعرفي نظام ترجمتهم للشهادات و الحاجات دي

في سكة تانية باة جميللللة و سهلة و مربحة جداً .. الأبحاث و ترجمات الطلبة .. هنا الطلبة لا بيترجموا ولا بيبحثوا ولا بيعملوا أي حاجة و الموضوع أسهل ما يمكن و دي بتكون تعامل مباشر بينك و بين الطالبات عن طريق النت أو المنتديات النسائية و ما أكثرها هنا .. و لما بتخلصي ليهم القطعة بتقابليهم بيها أو بييجوا ياخدوها منك

الأصل إنك تضربي في الاسعار عشان يفكروا إنك جامدة مووت في الترجمة و شغلك مالوش مثيل .. المكاتب هتقولك الورقة من 15-20 ريال و اللي يقولك 10 سيبك منه في ألف غيره و مش كتير هيقولك 20 أغلبهم 15 .. و إن كنت أفضل نسبة 40 - 60 مثلاً .. بتكون أضمنلك و أربحلك

بس خلي بال حضرتك .. جايلك منافس كمان كام يوم كدة في جدة B) .. اللي هو مكاوي .. سي موا يعني .. لأني كنت شغال هنا في الرياض و ناقل على جدة إن شاء الله

ع جنب ...

إزيك يا حووووس .. واحشني مووووووت يا شاويش عطية :lol:

مكاوى .. ترانس

[MZohairy]

انا حعمل اعلانات في جده اغرق بيهم السوق و اقول فيها اني مترجم محترف عربي فرنسي انجليزي و حترجم الورقه الفولسكاب باتنين ريال بس و اضربلكم السوق

:closedeyes:

[mekkawy]

انا حعمل اعلانات في جده اغرق بيهم السوق و اقول فيها اني مترجم محترف عربي فرنسي انجليزي و حترجم الورقه الفولسكاب باتنين ريال بس و اضربلكم السوق

:closedeyes:

ليه بس كدة يا شقيق

عندك الرياض فجرها براحتك و اديني سايهالك يا باشا تحرق السوق و تولع فيه كمان :lol:

بس بالله عليك أشيخ .. بلاش جدة .. مش إنت قولت قبل كدة خلي الشعب ياكل عيش .. سيبنا ناكل عيش و مش هننساك أبداً مهمن حصل و مهمن جرى

bv:-

[MZohairy]

ماشي يا باشا

انا امسك الترجمه في الرياض و عرر و سكاكا و انت امسك شروره و الدوادمي و وادي الدواسر و تبوك

و الأخت صاحبة الموضوع تاخد نجران و الباحه و حفر الباطن

:closedeyes:

[عنبو]

يعنى علشان انا ساكت ومش عاوز اتكلم وكل شويه اقول اسمى هيجى فى الليله مافيش حد جاب اسمى

طيب انا هعمل ترجمة الورقه من هندى الى عربى والعكس ب ريال ونص

وترجمه من مصرى الى سعودى والعكس ب ريال بس

وترجمه من انجليزى مصرى الى انجليزى هندى ب نص ريال

تحياتى

عنبو عبيد

[yasser moustafa]

طيب بما ان انا لسه فى مصر

فانا هاترجم الورقة من عربى قاهرى الى عربى صعيدى بجنيه واحد بس

ومن عربى صعيدى الى عربى قاهرى بعشرة جنيه

ويبقى قفلنا سوق الترجمة فى السعودية والقاهرة ووجه قبلى كمان

لكم جميعا تحياتى

[mnectarj]

شكرا على سرعة الرد والمساعدة :)

[mnectarj]

مرسى مسيو مكاوى, على فكرة انا شغلى برضو كان بيسافر من مصر على الرياض لأنى بترجم كتب لمكتبة جرير , يعنى هتلاقى منافس ليك فى جدة انشاء الله بعد كام شهر :)

[mekkawy]

مرسى مسيو مكاوى, على فكرة انا شغلى برضو كان بيسافر من مصر على الرياض لأنى بترجم كتب لمكتبة جرير , يعنى هتلاقى منافس ليك فى جدة انشاء الله بعد كام شهر :)

ما شاء الله ما شاء الله

مكتبة جرير حتة واحدة .. طب مفيش بأة كتابين لأخوكي الصغنن يترجمهم و يطلع بأي سبوبة كدة أحسن العيشة في جدة غالية ناااار

بأتكلم جد .. عاوز أستغل حضرتك :) و لو في فرصة أترجم فري لانس مع العملاء بتوعك لو الشغل فايض يعني .. أكون سعيد

لأني لسة بادئ أشوف الموضوع في الرياض و أول م الأمور مشيت اتنقلت جدة فلسة إن شاء الله هأبدأ أشوف النظام ايه في جدة .. لكن أهم حاجة عندي فري لانس لأني عندي شغلي اللي بدوام كامل الحمد لله و مش عاوزه يتأثر

مكاوى .. استغلاااااااال

[mnectarj]

والله يا استاذ مكاوى_ترانس_استغلااااااال هحاول معاهم, المشكلة انى حاليا فى أجازة وضع بس والله هعمل جهدى عشان الحقلك كتاب من المجموعة الجديدة اللى هتبعتها جرير بس خللى بالك ستاندرد الترجمة عندنا عالىىىىىىىىىىى جداااااااا smk: