مايطلب من الزوجه والاولاد فى الاستقدام

[حنين حسن]

طبعا انا قريت فى المنتدى كل المطلوب فى الاستقدام لكن كل الشرح كان بخصوص الزوج وكنتم بتقولوا القليل عن ما يطلب من الزوجه والاولاد

دلوقتى انا عاوزا اعرف ايه بالظبط المطلوب منى من اوراق وتحاليل واجراءات

عمتا انا جهزت الجواز واضفت عليه ابنى الحمد لله وكمان صدقت شهاده ميلاده الكمبيوتر من الخارجيه ولسه حصدقها من القنصليه

بس عاوزا اعرف ايه تانى ناقص بعد ما اوثق شهاده ميلاده وجوزى يبعتلى الاستقدام انا حعمل ايه بالظبط علما بان زوجى بالسعوديه وانا مقيمه بالاسكندريه فياترى حضطر اسافر القاهره لعمل فيرس سى ولا ينفع اعمله هنا

فارجو منكم الشرح والتوضيح لكل ماهو مطلوب وبالتفصيل مع ذكر كافه العناويين بالتفصيل يعنى من الاخر عاوزا من الالف الى الياء مع ذكر مده كل اجراء

طبعا اشكركم على المساعده

[aboueyad alex]

الاخت الكريمة

بالنسبة للإستقدام ممكن حضرتك تبلغى زوجك وهو بيعمل الاستقدام يخليهم يبعتوه على الاسكندرية دى النقطة الاولى

ثانيا فى الاسكندرية يوجد كذا مكتب بجوار السفارة بيخلصوا اوراق حضرتك بكل سهولة دون السفر للقاهرة فى حالة وصول الاستقدام على مكتب الاسكندرية وهما

سعودى نت ده أمام مدرسة الجبرتى فى أول شارع فــؤاد رقم تليفونها 4975702

مكتبة الحى اللاتينى فى أول شارع البطالسة من ناحية الاستاد رقم تليفونها 3921717

بيقوموا بتسجيل النت لحضرتك والاولاد وتبدىء الخطوات التالية

بيكون تحليل الفيرس فى مستشفى الحميات اللى فى الحضرة

والكشف الطبى بيكون بمستشفى السلامة الجديدة اللى فى الشلالات أو مبرة العصافرة بالعصافرة

الأوراق المطلوبة منك هنا مش محتاجة توثيق وهى كالتالى

باسبور حضرتك( لو الاولاد عليه مافيش مشكلة ) وده ميزة وتوفير

صورة خلفية بيضاء لكل فرد

شهادة ميلاد الأولاد أصل اللى بيتسجل عليها التطعيمات من الخلف أو تطعيم سابين موجود فى مكتب صحة سموحة

قسيمة الزواج أصل

وطبعا تذكرة المراجعة ( ورقة الدعوة ) اللى زوجك يبعتهالك بالميل أو الفاكس

التكلفة تقريبا 260 شاملة رقم النت والتعقيب فقط دون مصروفات التحاليل والكشف لو الولاد ليهم باسبورات خاصة بيهم يبقى الباسبور لكل وطفل حوالى 200 جنيه فقط وده لأنهم مالهمش كشف ولا تحاليل

أرجو أكون ساعدتك وده من الخبرة المكتسبة لإنهاء إجراءت زوجتى

ملحوظة زوجك يفضل يكون واخد قسيمة الزواج وشهادات الميلاد موثقة خارجية وقنصلية سعودية لأنهم ساعات بيغلسوا فى طلب الأصول وتكون موثقة

ربنا يوفقكم ويجمع شملكم على خير

[حنين حسن]

مشكور اخى الكريم على هذه المعلومات اللى جت فى وقتها وانا كمان اتخذت اجراء ورحت اخلص شهاده ميلاد ابنى واصدقها من القنصليه ورحت مكتب الحى اللاتينى وكل كلمه حضرتك قولتها تمام وحضرتك افدتنى فى تكلفه التحاليل

انا ابنى لم يتم السنه ومع كل حاخد معايا وقت ماتوصلنى التاشيره من زوجى دفتر تطعيمات ابنى وحخلى زوجى يبعتلى تانى كل الاوراق الموثقه علشان ما ارجعش اوثق عقد الجواز مره اخرى

شكرا وبارك الله فيك

[aboueyad alex]

مشكور اخى الكريم على هذه المعلومات اللى جت فى وقتها وانا كمان اتخذت اجراء ورحت اخلص شهاده ميلاد ابنى واصدقها من القنصليه ورحت مكتب الحى اللاتينى وكل كلمه حضرتك قولتها تمام وحضرتك افدتنى فى تكلفه التحاليل

انا ابنى لم يتم السنه ومع كل حاخد معايا وقت ماتوصلنى التاشيره من زوجى دفتر تطعيمات ابنى وحخلى زوجى يبعتلى تانى كل الاوراق الموثقه علشان ما ارجعش اوثق عقد الجواز مره اخرى

شكرا وبارك الله فيك

الأخت الكريمة

الأوراق هنا فى الاسكندرية مش محتاجة تصديق حرام فلوس على الفاضى ومتخليش زوجك يبعتلك حاجة

لكن شهادة ميلاد الولد صدقيها بس عشان لما ربنا يكرمكم وتقدموله فى المدرسة لكن هنا فى الأسكندرية بدون تصديق خارجية ولا قنصلية متخليش حد يشتغلك ويقولك لازم يتصدقوا

دى نصيحة اللهم بلغت اللهم فشهد

[حنين حسن]

اشكرك والحمد لله سالت كمان فى مكتب الحى اللاتينى واكدلى كلامك عاوزا اترحم من اللف على استخراج الاوراق وتصديقها تعبت وانا الحمد لله كل اوراقى جاهزه دلوقتى

وشكرا على النصيحه