جمال .... مصر

[se_ Elsyed]

لسه راجع من مصر أمس .. وأتضايقت جداً من سوري يعني .. حالة الدعارة السياسية التي يمارسها النظام بمنتهى الفجور لفرض جمال مبارك علينا كرئيس خلفاً لوالده الذي بلغ من العُمر أرذلة ... وبالتالي أنتشرت كثير من الملصقات في الشوارع تحت شعار " جمال مصر "

بصراحة .. مش لاقي كلام أقوله غير " إيه القذارة والنتانه دي " ؟

أيوه جمال مبارك مصري ومن حقه يترشح ...

لكن يترشح في ظروف محترمة .. مش ظروف متقيفه له ومتظبطه على مقاسه ...

ودايماً بأضرب مثل بسباق عربيات عديم التكافؤ

ونلاقي واحد داخل السباق بفيراري والدولة والدنيا كلها بتسانده وجايبه له عربية 10 الاف سي سي وسكستين فالف ومش رشه دواخل ولا عامله سمكره ولا دوكو ..

وهما هما نفس بطانة السوء جايبين توك توك للمتسابق المنافس وبيقولوا له " شد حيلك يا بطل وورينا الهمه في السباق "

وبالرغم من تبرئة الحزب الواطي لنفسه من تلك الحملة وقال : وكتاب الله ما احنا اللي عملنا كده ....

فإن متحدثين عن إختراع خزعبلي إسمه "الائتلاف الشعبي لدعم جمال مبارك"صرح إنه إئتلاف لا ينتمي لأي حزب ... وهو مدفوع من نفسه فقط ومن منطلق حبه لمصر وحبه للسيد جمال مبارك قائد الثورة .. وأعلنوا عن إستمرار تأييدهم للأخ قائد ثورة المراجيح " جيمي العجيب " حتى لو خاض الأنتخابات ضد والده ..

هههههههههههههههه

على أساس إن مبارك ربنا يطول في عُمره هايترشح عن الحزب الوطني ..

أما جمال فهايترشح عن حزب وداد جلبي يابوي ... راح أجول للطير سلامات وكدهوت ..

أنا عن نفسي أعلنتها من زمان .... إذا حدث لا قدر الله وكلنا سكتنا على تلك المهزلة وجاء جمال إلى الحكم ... فسأكون أول الخارجين عن نظام الدولة .. وساتحول إلى لص رسمي ... مش هاسرق حد مواطن يعني لا سمح الله .. لكن هاسرق أي حاجه متعلقه بالدولة .. كهربا بقى ميه ممتلكات عامه اللي يقع تحت إيدي ويخص الحكومة مش هاتردد إني أسرقه وهاخلي أولادي يعملوا كده ... ولو ربنا سألني يوم القيامة سُأُجيبى بان هذا كان ردي على سرقة بلد بأكملها وإن ولي الأمر الذي يجب أن يُطاع هو ولي الأمر المحترم الذي يخاف الله ويخاف على شعبه مش اللي جت له على الجاهز وورث العزبة عن أبوه ....

[se_ Elsyed]

الأفظع من ده كله بقى .. موضوع " عاش الملك .. مات الملك ... واللي يتجوز أمي أقول له إنت عمي وعم اللي جابوني "

مش هانخلص إحنا من مبارك مصر ... ومصر لمبارك ومن قبلة السادات وعبد الناصر وربط كل نتفوفه في البلد بأسمهم حتى غطيان بلاعات المجاري بيسموها على إسمهم ؟..

يقوم يطلع لنا " جمال مصر " ؟

إيه في إيه ؟ وإمتى هانتعلم الأحترام شويه ... لا عُمرنا سمعنا عن فرنسا شارل ديجول ... ولا أنجلترا مارجريت تاتشر ... ولا أمريكا أوباما ...

اووووووووووووف ... دي بقت حاجه تقرف والنظام كله بقى عاوز ييجي على المحارة ويتفور ونبدأ ن أول وجديد

[Amr Radwan]

انا لما شوفت العنوان .. قلت يا سلام حد حط عنوان بيتكلم فيه عن جمال و حلاوة مصر و اكيد فيه صور حلوة عن المناظر الطبيعية في مصر

و اخش الاقي صورة جمال .. مصر

هي صورة جمال مبارك ..

طبعا اتخضيت و لكن رجعت تاني و قلت .. اية المشكلة الاول اللعب كان مستخبي دلوقتي اللعب علي المكشوف

الحسنة الوحيدة اللي عملها جمال انه وحد او بيوحد جبهات المعارضة ضده و ده كان من المستحيل فيما سبق

الان صدقوني انا مرعووووووووووووووب من ان حسني يموت لان مصر هتبقا مهزلة

الحزن الوطني هيتمسك بجمال كوريث شرعي للوالد

و الاحزاب المعارضة كل هائم علي وجهه و يتخبط في المشاكل الداخلية

و الاخوان مغضوب عليهم و ناس كتيرة خايفه منهم في حالة انهم يمسكوا الحكم

و الان في خضم الهياج الشعبي من كل حاجة سيكون الوضع صعب جدا في حالة ان مصر تكون بدون رئيس

[doha]

مع اني مش هدي صوتي لجمال لو حدث وترشح الا اني بقولها لكم وبكرا تفتكروا ..

اقل السيناريوهات سوءا هو تولي جمال مبارك الرئاسة والكارثة ستكون اذا لم يتولاها . .

وعلى فكره غالبا هو ده اي هيحصل .. مظنش انه هيبقى ريس ..

[engmido]

كده الموضوع دخل فى الجد....كان الاول كل ما يسالو جمال هل ناوى تترشح فى الانتخابات 2011

كان يرد ويقول ان ده مش وارد خالص

وانى دخلت امانة السياسات بمجهود فردى وان الرئيس حى يرزق

وان البطانة الصالحة عايشة وكاتمة على نفسنا ..عاااااااااادى

ولكن بعد ما شفت الصورة كده دخلنا فى الجد وشكرااااااااا

ربنا يستر مش عارفين البلد رايحة على فين

[Howayda Ismail]

لسه راجع من مصر أمس.......

انا لسة راجعة من اكتئاب حوادث المرور مش ناقصة اكتائب سياسى

الخلاصة

سألوا الريس عن رأيه فى التغيير؟

قال التغيير سنة الحياة

قالوا له وسيادتك مش هتتغير؟

قال انا فرض مش سنة

يعنى مافيش فايدة

[Howayda Ismail]

انا لما شوفت العنوان .. قلت يا سلام حد حط عنوان بيتكلم فيه عن جمال و حلاوة مصر و اكيد فيه صور حلوة عن المناظر الطبيعية في مصر

و اخش الاقي صورة جمال .. مصر

هي صورة جمال مبارك ..

انا كنت فاكرة برضه كده كان المفروض قال مصر جمال

[se_ Elsyed]

مصر جميله بالفعل ... وحاجه مبهره ..

وشوفت ده من أنطباعات زملائنا العرب هنا اللي بيحرصوا إنها يزوروها كل عام .. وبالصدفة قابلت بعضهم راجعين معايا على نفس الطيارة ..

ومصر هي الباقية ..أما هؤلاء الظالمون فمصيرهم إلى مزبلة التاريخ

لكن عشان مصر تبقى أجمل .. لازم كلنا نبقى إيجابيين وقلبنا عليها .. وكل واحد يقدم لها اللي يُمليه عليه ضميره ..

[the consultant]

الكارثة الحقيقية مش إن جمال يمسك ولا لا أكبر مهزلة حاصلة في مصر إن جدوووو راااااااح الأهلي .......أنا مش مصدق عدم المصداقية و الابتعاد عن الشفافية المتفشي في مصر و بعدين زي ماقال الريس منتخب مصر كويس يبقى أكيد كويس ، يعني هو الريس حيكدب ليه ! مزنوق في قرشين يعني . بس طالما جدووو راح الاهلي يبقى اي حاجة ممكن تحصل في مصر بعد كدة حتى لو مصر اتقسمت شمال و جنوب و جمال مبارك يمسك الشمال و علاء مبارك مسك الجنوب لحد ما فريدة الحفيدة تكبر و تعمل إنقلاب و توحد القطرين و تبقى إسمها فريدة مبارك موحدة القطرين

سعيدة مبارك برضه

[hOuSsAm]

كان زمان بنشوف صورة مبارك لواحده وتحته اسمه واسم الشركة اللى صارفة عاليافطة

لما نزلت الاجازة وكنت فى احدى المحافظات لاقيت صورة مبارك وجمال ومكتوب كلنا واحد

ربنا يسترها لان بجد الوضع بيسوق والغليان بدا يفور

الا يسيادة المستشار هو ايه علاقة جدو بمبارك وجمال بالاهلى؟

[the consultant]

الا يسيادة المستشار هو ايه علاقة جدو بمبارك وجمال بالاهلى؟

والله يا استاذ حسام معرفش ايه العلاقة بس أنا حسيت إن هو ده التعليق المناسب . لان الحكاية قلبت استخفاف بأسلوب يشل و خصوصا الراجل اللي جابوه بتاع حملة "إنبي يا جمال رشح نفسك" ده اللي اسمه مجدي و بعدين ايمن نور عمل حملة مضاده سماها "مصر كبيرة عليك " يعني جيمي لارج و مصر دبل إكس ،هي كلها بأت شلل في شلل و أنا بصراحة تعبت من الشلل

بس كدة هي دي الحكاية لكن أرجع و اقول إن الايدولوجية و احدة و هي الهطل العقلي يسيطر على الحراك السياسي

.

[Mr MAGED]

يا جمالك يا سين سين ... ايه العناوين اللي تشد دي

انا أكيد مش من انصار التشاؤم ولا من حزب مافيش فايدة

أكيد فيه فايدة وأكيد فيه أمل

بس قوللي مين في الساحة ينفع !!!

هل انت مقتنع بالبرادعي انه يكون رئيس جمهورية وهو السبب في وكسة العراق !!

هل انت شايف انها متظبطة علي أيمن نور !!!

هل الأخوان هما الحل !!!

انا شايف ان كل مشكلة جمال ... انه ابن ابوه

بس خلاص

[aimen]

يا جمالك يا سين سين ... ايه العناوين اللي تشد دي

انا أكيد مش من انصار التشاؤم ولا من حزب مافيش فايدة

أكيد فيه فايدة وأكيد فيه أمل

بس قوللي مين في الساحة ينفع !!!

هل انت مقتنع بالبرادعي انه يكون رئيس جمهورية وهو السبب في وكسة العراق !!

هل انت شايف انها متظبطة علي أيمن نور !!!

هل الأخوان هما الحل !!!

انا شايف ان كل مشكلة جمال ... انه ابن ابوه

بس خلاص

لنفترض جدلا ان البرادعى هو سبب وكسة العراق

لكن مين السبب فى وكستنا احنا

تقدر تقولى

وبعدنا هو احنا تركة من اب لأبن

احنا مش اقل من اى دولة فى العالم

اصلا سى جمال ايه اللى فيه سوى انه ابن ابوه

ايه الإنجازات اللى عملها

البرادعى مش عاوز يكون رئيس الراجل بينادى بالتغيير

ولا احنا حنفضل طول عمرنا كده واحد بيسلمنا لواحد

[Mr MAGED]

يا جمالك يا سين سين ... ايه العناوين اللي تشد دي

انا أكيد مش من انصار التشاؤم ولا من حزب مافيش فايدة

أكيد فيه فايدة وأكيد فيه أمل

بس قوللي مين في الساحة ينفع !!!

هل انت مقتنع بالبرادعي انه يكون رئيس جمهورية وهو السبب في وكسة العراق !!

هل انت شايف انها متظبطة علي أيمن نور !!!

هل الأخوان هما الحل !!!

انا شايف ان كل مشكلة جمال ... انه ابن ابوه

بس خلاص

لنفترض جدلا ان البرادعى هو سبب وكسة العراق

لكن مين السبب فى وكستنا احنا

تقدر تقولى

وبعدنا هو احنا تركة من اب لأبن

احنا مش اقل من اى دولة فى العالم

اصلا سى جمال ايه اللى فيه سوى انه ابن ابوه

ايه الإنجازات اللى عملها

البرادعى مش عاوز يكون رئيس الراجل بينادى بالتغيير

ولا احنا حنفضل طول عمرنا كده واحد بيسلمنا لواحد

استاذ أيمن

أنا أكيد مقصدتش كده ... انا شخصيا ً مش مقتنع بأي واحد فيهم بما فيهم جمال

بس فين الخيارات !! .. فين الأحزاب القوية اللي ممكن تحارب وتمسك الحكم وتطور البلد

كل الاحزاب دي .. أول ما جمال يمسك الحكم هيجروا يقدموا فروض الطاعة ويهنوا ويباركوا

فين المناخ السياسي اللي يسمح بوجود كفاءة مستقلة يتلم الشعب حواليها وينتخبها

احنا أو أنا شخصيا ً مش باتكلم عن ما هو المفروض ان يكون

لأن لو المفروض أن يكون ده حصل .. مصر هتدخل في متاهة لأننا مش مؤهلين ليها في الوقت الحالي

لأكن ايه المناسب لظروف البلد وايه اللي ممكن ينفعها

بس خلاص

[herohero]

للاسف جمال مبارك هو أحسن الوحشين بجد لان للاسف الشديد مصر حاليا بتعاني حاله من التخبط الغريبة وشيئ من الغموض يعني كان منصب الرئيس شيئ غامض

على فكرة جمال مبارك كشخص مش سيئ ع فكرة انا سمعته لسه النهارده ف برنامج ع الفضائية المصرية وشاب كلمه بمنتهى الوضوح والولد حسيت انه محرج يتكلم وجمال طلب منه الكلام وقالها له بصراحه انهم بيظبطوك عشان تمسك والفساد بتاع العلاج باجر بالعكس جمال مبارك كان بيتكلم معاه بمنتهى الوضوح وبالعكسالولد قاله افتكر انك ف يوم هتقف ادام ربنا وهتتحاسب ادام ربنا

وكان جمال مبارك مبتسم يعني بصراحه هو احسن بكتير من الوشوش اياها بتاعت كمال الشاذلي وصفوت الشريف

انا لو اتعملت انخابات حرة ونزيهة وكل واحد يعرض برنامجه الانتخابي جمال مبارك وغيره وساعتها لو كسب جمال مبارك باختيار الشعب وبمنتهى النزاهة فمرحبا بجمال مبارك او غيره

اما فرض فلا والف لا ومازلت بقول جمال مبارك يمكن مشكلته بجد انه ابن حسني مبارك

لكن افكاره مش وحشه لكن ينزل انتخابات نزيهة وكل واحد ببرنامجه الانتخابي ساعتها نختار بقناعتنا

القصه اكبر من كده يمسك جمال بس يعدلي فترة الرئاسة

يمسك ان شاء واحد يجيبوه من الهند مش مشكلة بس استحمله 4 سنين ويقلب

ده اللي عاوزه الدستور يتعدل ويبقى حاجه تليق بمصر

اللي مليانه كفاءات يسود العدل وتكافؤ الفرص ساعتها اي حد يحكم مش مشكلة

[New]

دي أول مداخله لي من زمان لأن الموضوع ده ما يتسكتش عليه. ربنا يعلم اني لا بحب جمال و لا أبو جمال ... و أحب أقول للناس اللي بتقول أن جمال أحسن من غيره إن جمال حيمشي زي أبوه ... يعني إستمرار هبوط مكانة مصر و تراجع دورها و تقلص وزنها عربيا و إقليميا و دوليا . و ده بسبب إن الشله الحاكمه مش فاضيين للسياسة دول فاضيين لأعمال السلب و النهب المنهجي لاموال الدولة و إستنزاف مصادرها لمصالحهم الخاصة و بس. المصريين بقوا خايفين من أي تغيير حتى في حياتهم أو حياة اولادهم ... مصر أصبحت دولة توريث ... دكتور الجامعه ابنه معيد و حيبقي دكتور .. الممثل ابنه ممثل ... حتى البواب ... لغاية ما بقي عادي عند ناس تبعا لنظريه التوريث ... اشمعنى جمال!!

فيه مقوله "إن لم تتطور ستنقرض" فان لم نتطور في تفكرنا السياسي كمصريين فمصر ستنقرض

[Ahmed Anwer]

الناس اللي بتقول أين البديل ؟؟؟؟

ممكن يجاوبوا علي سؤال واحد بس ،،،،

مين السبب في إن مفيش بديل ؟؟؟

أكيد النظام الفاسد اللي مش هقول ربي بدائل و كوادر

لأ مسمحشي بيها اساسا

يبقي النظام كله في الزبالة ممنوش فايدة مش يقرفنا و هوا حي و يتحكم فينا و هوا ميت

عيب عليكم الكلام اللي بتقولوه ده ،،

ده كلام النظام هوا عاوز يوصل للنقطة دي ،،، مفيش بديل فأرضوا بقه بأسوأ السيئين

و جمال مبارك أيه ده اللي ليه فكر أو ليه شخصية نطمع إنها تكون كويسة ؟؟؟

ده أبوه رحمة عنه

[herohero]

الناس اللي بتقول أين البديل ؟؟؟؟

ممكن يجاوبوا علي سؤال واحد بس ،،،،

مين السبب في إن مفيش بديل ؟؟؟

أكيد النظام الفاسد اللي مش هقول ربي بدائل و كوادر

لأ مسمحشي بيها اساسا

يبقي النظام كله في الزبالة ممنوش فايدة مش يقرفنا و هوا حي و يتحكم فينا و هوا ميت

عيب عليكم الكلام اللي بتقولوه ده ،،

ده كلام النظام هوا عاوز يوصل للنقطة دي ،،، مفيش بديل فأرضوا بقه بأسوأ السيئين

و جمال مبارك أيه ده اللي ليه فكر أو ليه شخصية نطمع إنها تكون كويسة ؟؟؟

ده أبوه رحمة عنه

سيدي زمان لما كنا بنتلكمونقول ياناس فوقوا فكروا اتكلموا ف السياسة يقولك امشي جنب الحيط وادي النتيجه

انا بقول ان مفيش بدائل وده للاسف لانه نظام فاسد وفاشل لكن ايه الوضع

جمال مبارك مازلت ااكد ليس بالسوء لكنه ليس البديل المناسب لكن

حد يقولي ف ظل الفاسد والعقم وانا اسف ان اقول ان هذا النظام الفاسد اعقم البلد والنتيجه مانراه

طيب نفكر بصوت عالي ايه المتاح حاليا

الاخوان مانعرفشاي برنامج انتخابي لهم

البرادعي ماعندوش برنامج واضح

ايمن نور كذلك

طب حد يقزلي ايه السيناريو المتوفر هقولكم فوضى عارمة فاكرين المشهد بتاع فيلم خالد يوسف

للاسف هيحصل هتلاقوا الناس تدبح ف بعضوسرقة

وللاسف انتشار جرائم القتل الغريبة بتبين اننا قربنا بجد

يبقى مين اللي متاح يجي جمال مارك بس بشروط الدستور يتعدل ويجي يحكم 4 سنين بكملة القرف بتاع ابوه لكن ف خلالها الاحزاب تتحرك ويبدا لها نشاط

اما مانعيشه فهو حاله عجيبة من الغموض والتخبط

[شريف مان]

يا جماعة دا أمر واقع

جمال حبيب الملايين بعد ابوه معشوق الجماهير

بمزاجنا غصب عننا هوا اللى جاى

يبقى نريح دماغنا ونسيب البلد دى بلا عودة

يا نعمل ثورة بس ماتعملوش حسابى معاكم

تم تعديل 3 أغسطس 2010 بواسطة شريف مان

[se_ Elsyed]

أعتقد إن صوتنا بيوصل بطريقة ما

بصوا الموضوع ده على موقع مصراوي الساعة السابعة والنصف مساء اليوم

الوطنية للتغيير: (أوقفوا قلة الأدب التي يمارسها أنصار جمال مبارك)

احفظ الخبراطبعأضف تعليق ارسل8/3/2010 7:30:00 PM

تقرير - مصطفى مخلوف

"أوقفوا قلة الأدب التي يمارسها أنصار جمال مبارك، الذين يصورونه عبر البوسترات فى الشوارع أنه مرشح شعبي".

نداء أطلقه الدكتور حسن نافعة، استاذ العلوم السياسية، والقيادي بالجمعية الوطنية للتغيير، مشيرًا إلى تصريحات سابقة لقيادي في الحزب الوطني أن من يفكر في الترشح أمام الرئيس مبارك تبقى قلة ادب، وتساءل نافعة لماذا لا يحاكم أعضاء حملة جمال مبارك بتهمة قلة الادب؟

كان أمين الإعلام بالحزب الوطني الحاكم، الدكتور علي الديم هلال صرح خلال لقاءه بطلبة الجامعات المصرية قبل أسبوع، بأن الحديث عن مرشح الحزب للرئاسة فى وجود الرئيس حسنى مبارك بمثابة قلة أدب.

الجمعية الوطنية للتغيير عقدت الثلاثاء، مؤتمرًا صحفيًا، بمقر حزب الجبهة الديمقراطية، بشأن اعتقال أجهزة الأمن لـ 15 من نشطاء الجمعية، بمدينة الإسكندرية، على خلفية توزيع وتعليق ملصقات تدعو المواطنين للتوقيع على مطالب الإصلاح السياسي التي يدعو إليها المطالبين بالديمقراطية في مصر .

إسلاميون وليبراليون وشيوعيون ومستقلون، حضروا المؤتمر، مؤكدين على إدانتهم التامة لاعتقال أي عضو يعمل في مجال التوقيعات علي مطالب الدستور السبعة.

نافعة شدّد على رفضه لجميع صور التعدي على حريات المصريين، وقال : "نحن نثق فى قدرة الشعب على التغيير ونطالب الحكومة بالافراج عن الشباب، ولن تتوقف حركة التغيير إلا بإحداث تغيّرات ديمقراطية ونظام ديمقراطي".

وأشار القيادي بالجمعية الوطنية للتغيير إلى اختراق الحكومة لقانون الطوارئ وتعديلاته التي اقدمت عليها بنفسها، باعتقالها شباب من الشارع لم يوزعوا المخدرات أو يقومون بأعمال إرهابية - حسب قول نافعة-.

وقارن نافعة بين موقف الدولة مع شباب الجمعية الوطنية والشباب الذي يلصق بوسترات تأييد لترشيح جمال مبارك وقال :" لماذا يسعي جمال مبارك لتدشين حملة بالرغم أن لدية حزب من الممكن أن يعلن عن ترشيحه، ولماذا يعتقل شباب الجمعية بالرغم ان مطالبهم مطالب عامة وليست شخصية.

يشار إلى أن الفترة السابقة شهدت انتشار بوسترات تطالب جمال مبارك بالترشح للانتخابات الرئاسية المقبلة، وحملت عنوان الإئتلاف الشعبي المصري لدعم جمال مبارك.

بيد أن تلك الحملة، واجهت حملة أخرى، أطلقها أيمن نور زعيم حزب الغد، مطلقًا عليها "مصر كبيرة عليك".

نور، في كلمته بالمؤتمر رفض ما أسماه السلوك الأمني المجنون ضد المعارضة، مشيرًا إلى واقعة اعتقال الأمن لصاحب محل فراشة في مدينة الفيوم، لتأجيره معدات الفراشة لصالح مؤتمر للجمعية الوطنية، حتى عند عرضه على النيابة لم توجه له أي اتهام ولم تعط له حقه أو تعويض - حسب رواية نور-.

"النظام دون أن يعرف يثري حركة التغيير بالشباب، عندما يعتقلهم أو يحتجزهم لأنهم يخرجوا أكثر إصرارا على مطالبهم أكثر من أي وقت مضي"، هكذا قيّم نور الموقف الامني وتعامله مه نشطاء الشباب.

فيما قال المستشار محمود الخضيرى، المسئول عن القسم القانوني بالجمعية، إن الممارسات الأمنية، لن تخيف إلا من يريد أن يخاف، قائلاً "نحن لا نخشى أحد طالما نسعى للتغيير ونحن أصحاب حق".

الخضيري لم يكتف بذلك في كلمته؛ حيث دعا المصريين للخروج والتظاهر الجمعة المقبلة من كل المساجد ودور العبادة تحت شعار واحد وهو:"نعم للتغير..نعم للمطالب السبعة.. لا للتوريث".

الإعلامي حمدي قنديل الذي أدار المؤتمر الصحفي، أكد أن الجمعية تتعامل مع أعضائها باعتبارهم طالبوا تغيير، ولا تضع في الاعتبار الانتماء السياسي لأي عضو.

الإخوان المسلمون جاءت مشاركتهم في المؤتمر، من خلال النائب في مجلس الشعب، محمد البلتاجي، الذي أكد على استمرارهم في المطالبة بالتغيير، ورفض النظام، مؤكدًا أن هناك من يستعد للتضحية، داعيًا كافة القوى السياسة الوطنية وشبابها للنزول للشارع للمطالبة بالتغيير.