النــــــــــــــــــــــــــوم ... ممكن يكون مرض؟

[mekkawy]

سلام عليكم

دلوقتي يا جماعة عاوز أناقش معاكم موضوع مهم و حيوي و بجد مأثر في حياتي دلوقتي بشكل سلبي

أنا بأحب النووووووووووووم جداً

ممكن أضحي بأي حاجة في حياتي و أنام

ممكن أضحي بخروج .. أكل .. فسحة .. ماتش .. أي حاجة .. المهم أنام

المشكلة باة فين ؟؟؟

في حتتين

الحتة الأولى و الأهم مع أم العيال لأنها طبعاً أكثر المتضررين من الموضوع ده

الحتة التانية --------> الشغــــــــل

يومياً بأروح الشغل الساعة 9 أو 10 كدة .. و ساعات 11 :sad:

طب أعمل ايه ؟

و الله بأظبط منبهين و ساعات ثلاثة .. بأقوم أطفيهم و أرجع أنام .. محدش يقولي حط المنبه بعيد .. لو في غرفة تانية بأرجع أنام بردو .. أم سلمى بتصحيني أصحى و أطلع أروح أنام في أوضة تانية

بأحب النوم موووت .. لدرجة إني بانام و أنا سايق :blink:

طب بصوا .. آخر مرة كنت راجع من جدة بالعربية و كانت معايا الأوسة و مامتها و كانوا نايمين .. بعد 3 ساعات سواقة كدة ركنت في الطريق و نمت يجي ساعة ... صحيت المفروض أفوق بأة :rolleyes:

لأ .. كملت نوم و أنا سايق بأة و كنت هألبس ستين مرة و المشكلة إني كنت هأخبط الناس من ورا لأني ماشي بسرعة

بانزل من البيت شكلي وحـــــــــش لأني بأكون قايم مضروب بالبتاع و عاوز أنام

بأنام في الاجتماعات لأنها بتكون مملة و عنيا بتقعد تقفل

بانام في المكتب لما بأقعد كتير على الكرسي أو أعمل شغل على الكمبيوتر

عنيا بتغمض دلوقتي و أنا باكلمكم و بأبذل مجهود عشان أفتحها .. و الله بتكلم جد يا جماعة مش هزار

مع إني بأسهر بالليل مش أوي يعني بس عادي .. 1 و ساعات 2 .. بس أنا كدة حتى لما بأنام بدري مش موضوع سهر يعني

دي حكايتي و مشكلتي باختصار شديد

أنا عاوز لو حد عنده حلول يشاركني و كمان عاوز نفتح باب النقاش .. النوم في حياتكم بيمثل ايه؟

النوم مأثر عليك سلبي ولا إيجابي .. واخد مكانه صح ولا واخد أكتر من مكانه ولا أقل ولا ايه بالظبط؟

ايه أطرف و أخطر و أرخم المواقف اللي حصلتلك بسبب النووووووم

مساكم نووووووووم

مكاوى .. سليبنج أول زا تايم

[pocy]

هلا باخى الفاضل و النائم كثير مكاوى

اولا احب انوه ان النوم الكتير خطأ لكن ليه الله اعلم بس قريت على النت الكلام ده

أضرار النوم لساعات طويله

اسيبك انا بقي مع اللنك

[mekkawy]

أضرار النوم لساعات طويله

يالهوي يالهوي يالهوي

باة أنا جاي أسوط من الاضرار أصلاً و حضرتك مدياني لوكشة أضرار في وشي .. الحقيني ياما

حضرتك افتحي نفسي كدة بشوية فوايد للنوم مش أضرار

عامة مشكورة و ادعيلي أخف و أبى كويس

مكاوى .. سليبنج بيرد

[the consultant]

الحل بسيط جذريا و مش محتاج فحص و محص ، واضح إن حضرتك بدأت تعاني من الموضوع ده حديثا . و النوم الكتير أصله الهروب من شئ ممكن من زهٌق من تعب من الفلوس اللي عليك للديانة أو لشركة نقل العفش ، المهم إنك بتنام عشان متفكرش ، صح صح هاااااااااه صح يا حاج إنت نمت ولا إيه...... ;)

طيب إيه الحل بأه .....مش عارف لاني أنا كتير أوي بلجأللنوم صراحة لما بكون مكتئب . حقولك حاجة النشاط بيجيب نشاط و النوم بيجيب نوم مقولة سليمة . رووووح الجيم أو إلعب جمباز إعمل أي نشاااط غير عادي حتلاقي نفسك صحيت و بقيت زي الفل و بعدين فكر في سلمى اللي ليها عليك حق إنك تعد معاها كأب و تعد تقولها ياختي كميلة و تغنيلها أغنية التتر بتاع ماما سامية , بس بتون واحد فايق مش و إنت نايم

يالا تصبحوا علي خير

[hOuSsAm]

والله يامكاوى انا كنت لسه بسال السؤال ده لمديرى النهاردة....... مش عارف انت سمعتنى ولا ايه

بس انا مشكلتى مش زيك كدة....... المشكلة عندى انى سعات بيغمى عليا بنام مسافات طويلة اوى بتتكلم فى 15 او 16 ساعة

وعندى منبه سيكو ابن لذينة ممكن يصحى جارى اللى فى الدور السادس............ واخوك ولا الهوا

مش عارف ده ارهاق زيادة ولا اكل مش كويس ولا تفكير ولا ايه

اللى لاحظته انى لما نزلت مصر مش بنام الوقت ده كله....... بالعكس كنت بختصر فى سعات النوم عشان استغل وقتى

المشكلة كمان فى تانيب الضمير.......... ضميرى بيانبنى على سعات النوم الطويلة دى وبقول مش كان زمانك استغلتها فى حاجة مفيدة

ياريت لو حد عنده علاج او تفسير للحجات دى يقولنا ........... وان كنت ارجع التفسير للجو العام للسعودية والشقة الضيقة اللى انا عايش فيها

[mekkawy]

مستشارنا الغالي

و الله يا باشا بأقعد و باغنيلها و باعملها قرد

البت دماغها فيها حاجة يا عم :blink: .. بتنام كل يوم الساعة 5 الفجر و البدري بتاعها 4 .. و أنا ما بأقدرش على كدة wst::

مامتها يا عيني هي اللي مظلومة معاها .. بس أنا معاك أوي في إني الوخمة بتجيب وخمة و النوم بيجيب نوم .. أجيلك أنا بس و نتفق على جيم حلو كدة و ناخد أبو الأحساس معانا هو و أخونا انفستور و عنبو و نعمل فريق المحاوراتية الجميمة (بتوع الجيم يعني)

تصدق بالله .. لما كنت بأروح الجيم هنا في الرياض كنت نشيط جداً و حاسس إني يمامة طايرة في الهوا .. اه و الله

ينهار أبيض ع الكسل .. زبااااااالة

مكاوى ..

[Diab]

أقولك انا ايه الحكاية

الموضوع ده بيقي أفة للمقيمين في الخليج وبيزيد معاهم بالتدريج

يعني تلاقيك كنت بتنام قليل في مصر ولما جيت هنا النوم بدأ يزيد 10 دقايق في ربع ساعة وهكذا لحد ما بتلاقي نص اليوم عندك راح في النوم

الحل ايه

زود مجهودك

ألعب رياضة اه والله بجد

الرياضة بتحفز الجسم انه يكون stand by علي طول وبالتالي اقل حركة وانت نايم تلاقيك قايم من النوم فايق

جرب المشي ساعة يومياوقولي ايه النتيجة

تم تعديل 4 أغسطس 2010 بواسطة Diab

[Howayda Ismail]

انا كنت ناوية اقولك ان النوم الكتير فعلا هروب من ضغوطات الحياة واحيانا اكتئاب لكن سبقنى استاذ consultant

لان ده بيحصل معايا فعلا فترة حوادث المرور اللى شفتها فى التليفزيون وكملت بقراتها هنا و وصوت المقطورات اللى

خارجة من المينا 24 ساعة وفرامل كل شوية سببت لى حالة اكتئاب فظيعة كنت بنام حتى وانا باكل ودماغى كانت تقيلة

لكن لما كنت باخرج كنت بافوق وساعات يكون انخفاض ضغط الدم يسبب لى الحالة دى وبمجرد اكل حوادق يضبط عندى الضغط

لكن فى اسباب تانية للنوم منها الاكل الكتير وحاجة مش خطيرة بس احد اقربائى بيعانى حالة نوم مستديمة وكشف عرف ان

السبب ارتفاع نسبة الكليسترول ودهون على الكبد بيعمله كسل ويسبب حالة النوم دى والدهون دى طبيعية عند كل

الناس لكن لو زادت بتعمل كده

[الغريب]

زي ما بيقول دياب الموضوع مرتبط من وجهة نظري بالخليج ، وخد أسباب سليمة للموضوع ده :

1 - أغلب الوقت بيكون الجو مش مناسب أنك تخرج علشان كدة بتكسل وتفضل في البيت وبالتالي بتنام من مجهود العمل والأكل.

2- القعدة في البيت بعد الأكل مبيجيش وراها غير النوم ،، والكرش كمان.

3- المكيفات في الخليج سبب رئيسي للنوم.

4- الجو العام في الخليج غير مصر فبالتالي مبتستمتعش أنك تصحى وتنزل وتخرج بعد الشغل.

دي الأسباب ، أما نصيحتي فهي أني الحمدلله أنام من 6-8 ساعات فقط بحكم مواعيد عملي ، ومعنديش وقت كتير فاضي للنوم، ولما كان فيه وقت فاضي روحت على طول دار القرآن للحفظ علشان أستغله ، والله يا جماعة الناس اللي في الخليج بالذات هتسأل عن الوقت الفاضي الغير مستغل ده أمام الله ، لأن فيه وقت كتير ومفيش مشاغل زي ذيارة أهل وقعدة أصحاب وكلام من ده علشان كدة أشغل وقتك بحاجة مفيدة أي حاجة حفظ قرآن قراءة لعب جيم دورات سماع دروس أي حاجة تنميك..

ربنا يستعملنا ولا يستبدلنا

تم تعديل 4 أغسطس 2010 بواسطة الغريب

[المهندسه]

شوف ممكن فعلا العندك يكون نفسى زى ما الاخوه بيقولو او كسل مثلا بس برده خالى بالك ممكن يكون مرضى و انت مش واخد بالك (انا اه مهندسه بس مهتمه اوى بالطب واى دكتور يقع تحت ايدى بقرفه اسأله)

بمعنى يا سيدى ان ممكن يكون عندك خلل معين فى الغده الدرقيه و دى حاجه تافهه ما تتخضش و تتشائم منى ههههههه انا بتكلم بجد انا شوفت كتير اشتكو من حالتك وكانو واخدنها برده بهزار او بيقولو نفسى و اكتشفوا انه خلل بسيط فى افراز الغده الدرقيه وطبعا ده سهل معرفته بالتحاليل

يعنى بلاش نظلمك و نقول كسلان ولا بيهرب من شىء ممكن تكون يا عينى مريض mfb: بس لو طلع معندكش حاجه هتبقى ساعتها فعلا حاجه نفسيه زى ما الاخوه و تاخد لقب افضل كسلان فى المحاورات ورمزك يكون خخخخ اوعى تزعل انا بتضحك

على العموم زود الحب شويه لسلمى و انت هتروح من عينك النوم على رأى اغنيه يا سارق من عينى النوم بتاعة شاديه باين و الا ايه؟

تم تعديل 4 أغسطس 2010 بواسطة المهندسه

[اغابي]

...... ضميرى بيانبنى على سعات النوم الطويلة دى وبقول مش كان زمانك استغلتها فى حاجة مفيدة

ياريت لو حد عنده علاج او تفسير للحجات دى يقولنا .........

ضحكتنى يا حوسام

بجد ضميرك بيأنبك على النوم

النوم سلطان واحيانا النوم بيكون حل لمشاكل كتير مش لاقينلها حل

ازاى

تنام لو فى مشكلة جامد يعنى تتوكل على ربنا وتنام

وتصحى تلاقى بقدرة قادرة المشكلة اتحلت

بصراحة يا حسام اجمل حاجة النوم واللى ما يلاقيش دلع وما يدلعش

يبقى عاوز الضرب - اللى فى ايده فرصة للنوم ينام - بس برضوه يا مكاوى مش على حساب شغلك وبيتك وعيلتك

تحياتى للجميع

اغابي

[Simba]

انا مش عايز افتي

لكن اللي اسمعه ان كسل الكبد او ارتفاع مستوي الدهون في الجسم له تأثير كبير علي الحكاية دي فأعمل فحوصات وشوف

بالنسبة في الشغل الصبح بكون عايز انام بس خمس دقايق لو حصلت كده ونمت في الخباثة وطبعا بعد مقاومة شديدة مني واقعد اشرب في قهوة ونسكافيه .. بقوم فايق جدا وال خمس دقايق اللي نمت فيهم كاني نايم من سنة وبحس بنشاط وحيوية كبيرة

بس للاسف برضه الموضوع ده بيعمل مشاكل كتير يعني كان عندنا محاضرة في المستشفي والتكييف كان عالي اوي والمحاضرة مملة وانا سمعتها قبل كده كذا مرة وعملت مجهود كبير اوي اني عيني ما تغمضش بس مقدرتش وفقت علي ايد اللي جنبي بيصحيني بجد كنت محرج جدا جدا خصوصا ان المحاضرة كانت علي طاولة اجتماعات مش في قاعة يعني فضيحتي كانت بجلاجل يومها ومن يومها مخلي عندي مشروبات الطاقة دي في الشفل

لو حسيت اني هتزنق بشرب علبة منها بتقوم بالواجب

[doha]

طيب ماهو طبيعي لواحد نومه طبيعي انك لو نمت 1 او 2 بليل انك متصحاش قبل 1 او 2 الظهر ..

يعني كونك تجبر نفسك تصحى10 او 11 فانت كده بعكس ماتتصور .. انجزت . .

سهر بليل مع انه بيكون لذيذ وبيبقى سهل مش متعب الا انها ( بيهلك ) في الجسم وبيسحب من مخزون التنبه فيه وبالتالي بتحتاج بعده لمده نوم اكتر فيما لو كنت نايم مرتاح في موعد بدري .. بالظبط زي واحد عمال يجري ويبذل مجهود ده بيحتاج يرتاح مده قبل مايقدر يعمل شيء غير واحد ماشي براحته او راكب عربية تلاقيه يوصل شغله معندوش مشكلة يباشر اي عمل فورا ..

شرب الشاي كمان عمال على بطال ـ اكيد كييف شاي ـ والمنبهات عموما زي البيبسي او القهوة وحتى الكاكاو او اي حاجه فيها شوكلاته .. الحاجات دي كلها بتنبه المخ بزياده والتنبيه الزائد يحتاج لنوم زائد .. يعني جرب تشرب بالكتير كوب شاي كل يوم الصبح وممنوع نهائيا الشاي او اي منبهات من بعد العصر لضمان النوم المبكر ..

انت لو جربت ونمت كل يوم بعد العشاء على طول هتلاقي نفسك مش قادر تنام اكترمن ثمان تسع ساعات بالكتير خالص وهتقوم نشيط ومتيقظ بقية اليوم ..

طبعا كل ده على افتراض عدم وجود اي مشاكل صحيه زي مشاكل لا قدر الله في الغده او انزيمات الكبد ..

[yasser moustafa]

انا كان الذ طعم للنوم عندى هو ميعاد الصحيان للمدرسة

وكنت ها موت وانام خمس دقائق زيادة ... وبالتالى كنت اطلب من الوالدة ترجع تصحينى بعد خروج اخويا من الحمام

وحاليا اتبع طقوس للصحيان كالتالى

اضبط المنبه قبل ميعاد صحيانى بتلت ساعة ... عشان لما يضرب اصحى طة كمان خمس دقائق وانام خمس دقائق ممتعة جدا ثم يضرب المنبه مرة اخرى واكرر نفس الموضوع من 3 الى 4 مرات لحد ما اشبع نوم او ازهق من المنبه فاصحى وأمرى لله

وبالتالى ممكن فى حالتك لو عايز تصحى الساعة 7 يبقى تضبط المنبه على الساعة 6 ولما تصحة 6 ترجع تضبطة على 6.15 وهكذا وحتى الساعة 7 ها تكون زهقت وقمت فى منتهى الفوقان

تم تعديل 4 أغسطس 2010 بواسطة yasser moustafa

[Damo]

أنا كان عندي موضوع النوم ده في نيو زيلاند بس لما جينا كندا كل حاجة ماشية تمام .

في نيو زيلاند بقى كانت بتروح وتيجي مش مستمره يعني ايام محدشهك بشوف وشي عشان نايمة طول اليوم ولو خرجنا أنام منهم في العربية ولو في مواصلات أنام في السكه وتفوتني محطتي

زي ماالبعض قال كان ساعات بيبقى في حاجة مضايقني ومش قادرة أفكر فيها نفسي انساها ولو مؤقتا فبنام

ومن يومها مخلي عندي مشروبات الطاقة دي في الشفل

لو حسيت اني هتزنق بشرب علبة منها بتقوم بالواجب

أنا وصلت لنفس الناتجه دي برده خصوصا ايام الامتحانات كان لازم كل يوم اشربلي على الاقل واحد لو مش اتنين

ايه أطرف و أخطر و أرخم المواقف اللي حصلتلك بسبب النووووووم

مرة محاضرة كانت مملة جدااااااااا ومعظم الكلام عارفاه من قبل كده وراسي بقت تقيلة وبالعافية مش قادرة افتح عيني لحد ماراحت عليا نومة وصحيت على التصفيق لما المحاضرة خلصت.

[لماضة مصرية جدا]

السلام عليكم و رحمة الله و بركاته

أتصدق يا عكاوي انا عمالة اتاوب و انا بكتب في التوبيك اللي عامل زي ما بيكون بياخد الواحد و يحدفه ع النوم عدل

بص انا رايي الشخصي....انت شخص هايبر....يعني ايه....(ايون عدت عليك في مقرر ثانوية عامة...اصحي معايا يا عكاوي الله يرضي عنك)...يعني ايه هايبر بقي...يعني نشاطك العقلي مرتبط بنشاطك الجسدي....يعني طول ما انت بتبرم...او طالع و نازل او في حوارات مع الناس...فعمرك ما بتبقي في حالة النوم دي

لكن لما بتلاقي نفسك مش منهك جسديا....عقلك بيبتدي يريح...و بالتالي بتلاقي نفسك اسهل طريقة للترييح مع التكييف هو النوم

الحقيقة فعلا انا حاسة الموضوع ده مرتبط بالخليج جدا (ما عدا انا الحقيقة.... wst:: ...انا بنام في مصر في الامارات...في غانا....احب النوم زي عينيا....اصلي بقابل ناس حلوة في الحلم :) )

عشان كده انا مع كلام كل اخواتنا الافاضل اللي بينصحوك انك تعمل مجهود جسدي قبل النوم...تتمشي....تجيب صفحتين سمنة و تحط فيهم اسمنت و تفضل تشيلهم بعصاية الغلية...

الحاجة التانية...يمكن انت شايف نفسك بتنام كتير....بس يا تري بتنام كويس....اصل احيانا ناس ممكن و هي نايمة تلاقيها برضه عقلها مش مستريح....يعني مثلا بتفكر....او بتستدعي احداث حصلت طول اليوم....و عشان كده ممكن تلاقي نفسك بتنام كتير صحيح...لكن بتقوم من النوم و لا كانك نمت...فتبقي عايز تنام تاني

الحقيقة بقي....و دي الحتة اللي فيها المفيد....من ساعة ما انت ردمت ع الجاكوزك...بتاعك دوت...و انت حالتك اتدهورت خااااالص..(وش عيل رخم موووووت)

ع جنب بقي

حضرتك حدفت التوبيك...و روحت إخخخخخخ

مسااااك حلم حلو يا رب

[hOuSsAm]

من المواقف اللذيذة اللى حصلتلى بسبب النوم

وانا فى الكلية كان فيه محاضرة محاسبة شركات وانا لا كنت بحب المادة ولا الدكتور بس كنت بحضر عشان زملاتى كلهم حاضرين وملقتش حد اقعد معاه بره

فى نص المحاضرة كانت الساعة واحدة الضهر الدكتور قال انا هدى بريك 10 دقايق واللى عايز يخرج يخرج بس المهم اللى يقعد قدامى يكون فايق ومنتبه

ايه يا رجالة الحوار ماشى على ايه........... لاء ياعم الجو حر بره خلينا هنا اعدين فى المراوح

انا قولت يا واد يا حس انت منمتش امبارح كويس اهو منك تنام شوية عشان تكمل يومك فريش

وبالفعل استغرقت فى نوم عميق (واجمل نوم لما يبقى الدكتور صوته هادى ومسترسل فى الكلام)

واذا به الواد اللى جنبى ........ حسام قوم يا حسام قوم يبنى كلم

برفع راسى لاقيت المدرج كله عنيه عليا

والدكتور........ انت قلبتلى المدرج اوضة نوم........ طب تعالى

روحتله قالى ولا اقولك روح اقعد فى اخر المدرج بس متنمش

روحت اخر المدرج......... قالى ولا اقولك تعالى تانى...... اقعد فى البنش الاول

كنت عايز اروح ............ قولت بلاش ابو الاحاسيم اكبر من كدة بكتير

[mekkawy]

أقولك انا ايه الحكاية

الموضوع ده بيقي أفة للمقيمين في الخليج وبيزيد معاهم بالتدريج

ألعب رياضة اه والله بجد

الرياضة بتحفز الجسم انه يكون stand by علي طول وبالتالي اقل حركة وانت نايم تلاقيك قايم من النوم فايق

جرب المشي ساعة يومياوقولي ايه النتيجة

أخويا دياب

نعم الرأي .. فعلاً و الله لما كنت بأروح جيم كنت نشيط جداً و خفيف آخر حد و حاسس إني (طير في السمااااا) زي بتاع عم إيمان البحر ورنيش كدة بالظبط .. بس لسة عندي نفس أم المشكلة :sad:

لكن فى اسباب تانية للنوم منها الاكل الكتير وحاجة مش خطيرة بس احد اقربائى بيعانى حالة نوم مستديمة وكشف عرف ان

مس هند

هي غالباً حتة الأكل الكتير دي

لأني فعلاً طول ما أنا قاعد فاضي ... إيدي في بقى .. شيكولاتة بأة .. عصير .. بيرة .. أي حاجة و السلام .. بس أنا خلاص لازم أقف لنفسي وقفة محترمة و اديها بالمركوب عشان تتظبط

و الله على فكرة أنا مش من النوع اللي بيهرب نوهااااائي .. بالعكس .. أنا بأفكر و أنا نايم و ده اللي هنرجعله مع أختنا لماضة

1 - أغلب الوقت بيكون الجو مش مناسب أنك تخرج علشان كدة بتكسل وتفضل في البيت وبالتالي بتنام من مجهود العمل والأكل.

2- القعدة في البيت بعد الأكل مبيجيش وراها غير النوم ،، والكرش كمان.

3- المكيفات في الخليج سبب رئيسي للنوم.

4- الجو العام في الخليج غير مصر فبالتالي مبتستمتعش أنك تصحى وتنزل وتخرج بعد الشغل.

ربنا يستعملنا ولا يستبدلنا

أحبك و أنت مفنطني كدة يا أبو ملك (ملك أهو يا معلم :happy: ) واحد اتنين تلاتة .. و كل اللي انت قولته ده موجود .. دي الأسباب يااااااما يا ابا العمدة :blink:

بمعنى يا سيدى ان ممكن يكون عندك خلل معين فى الغده الدرقيه و دى حاجه تافهه ما تتخضش و تتشائم منى ههههههه انا بتكلم بجد انا شوفت كتير اشتكو من حالتك وكانو واخدنها برده بهزار او بيقولو نفسى و اكتشفوا انه خلل بسيط فى افراز الغده الدرقيه وطبعا ده سهل معرفته بالتحاليل

لا تعليق ... الحقيـــــــــــــني ياما .. انا طلعت مريض .. أقول لأمي أيه باة .. كشفت عند مهندسة ؟ :lol: و لقيت عندي غدة مرقية دي ؟؟

انا مش عايز افتي

لكن اللي اسمعه ان كسل الكبد او ارتفاع مستوي الدهون في الجسم له تأثير كبير علي الحكاية دي فأعمل فحوصات وشوف

سمبا باشا .. كلامك سليم و متفق مع المواقع .. همن شوية دهون ييجي كدة 24% من الجسم بس .. و حدث باة عن الاجتماعات ولا حرج .. بانام فيها للصبببببببح

طيب ماهو طبيعي لواحد نومه طبيعي انك لو نمت 1 او 2 بليل انك متصحاش قبل 1 او 2 الظهر ..

يعني كونك تجبر نفسك تصحى10 او 11 فانت كده بعكس ماتتصور .. انجزت . .

شرب الشاي كمان عمال على بطال ـ اكيد كييف شاي ـ والمنبهات عموما زي البيبسي او القهوة وحتى الكاكاو او اي حاجه فيها شوكلاته .. الحاجات دي كلها بتنبه المخ بزياده والتنبيه الزائد يحتاج لنوم زائد .. يعني جرب تشرب بالكتير كوب شاي كل يوم الصبح وممنوع نهائيا الشاي او اي منبهات من بعد العصر لضمان النوم المبكر ..

ربنا يفتح نفسك يا رب يا فاتحة نفسي و مطمناني و يا رب أشوفك دكتورة أد الدنيا .. هو ده الكلام اللي يرد الروح .. أنا فعلاً هأحاول أنام بدري و نم مبكراً تستيقظ مفكراً .. و على فكرة .. أنا بأكره الشااااااي .. ما بأشربوش أبداً و كنت حريقة نسكافيه و بطلته كذلك البيبسي مبطله من شهرين .. إنتوا خوفتوني يكون فعلاً خلل في وظائف أحد الأعضاء :sad:

انا كان الذ طعم للنوم عندى هو ميعاد الصحيان للمدرسة

وكنت ها موت وانام خمس دقائق زيادة ... وبالتالى كنت اطلب من الوالدة ترجع تصحينى بعد خروج اخويا من الحمام

ياسر باشا

أنا المدرسة دي مش فاكرها أصلاً من كتر ما كنت بانام فيها .. مش قبل ما أروح لأ .. و أنا هناك .. و في ثانوي كان محجوزلي دكة في آخر الفصل معروف إن دي بتاعت أحمد عشان ينام .. و أي مدرس يسأل أو يحاول يصحيني يقولوله تعبان يا أستاذ .. و أصحى كدة ع الحصة التالتة او ع الفسحة .. أتفسح و أرجع أخدلي حصتين و الأخيرة في البليادرو .. ايـــــه أيام

أنا كان عندي موضوع النوم ده في نيو زيلاند بس لما جينا كندا كل حاجة ماشية تمام .

مرة محاضرة كانت مملة جدااااااااا ومعظم الكلام عارفاه من قبل كده وراسي بقت تقيلة وبالعافية مش قادرة افتح عيني لحد ماراحت عليا نومة وصحيت على التصفيق لما المحاضرة خلصت.

هو المرض ده وصل كندا و نيوزلاند كمان .. إنا لله وإنا إليه راجعون

و الله يا مس دامو فعلاً لا زلت مش لاقي حل .. إنما المحاضرات ما كنتش بأنام فيها الصراحة لأني ما كنتش بأحضرها :)

مكاوى ... نوووووووووم

[Simba]

سمبا باشا .. كلامك سليم و متفق مع المواقع

معقول متفق مع المواقع كلها :lol:

يا تري ترتيبي كام بقي ف شريط اليكسا smk:

[Guest ممكن مرضي]

طبيعي الهم بيهرب 

وطبيعي عدم الانتظام في توقيتات النوم بيبهدل 

وطبيعة الأكل وخصوصا عطارة جوزة الطيب 

وأخيرا هناك كسل كبدي وله تحليل وعلاج 

وهناك قصور في الغده الدرقيه ولها تحليل وعلاج 

وأدوية البرد بتعمل خلل في ساعات النوم 

وأخيرا  تقاوي البصل بصل وتقاوي الكسل كسل وتقاوي النوم نوم وتقاوي النشاط نشاط 

نسق ما سبق وأستيقظ علي ما تحب وغير طبيعة يومك