مكسوفه وانا بطلب الطلب ده

[pocy]

بصوا يا جماعه انا مش عملت محشي قبل كده وبصراحه باكله عند حسنى الناس اللى فى الكويت اكيد عارفينه او اتعزم عليه او لما انزل مصر غير كده استحاله اعمله وفى مره فكرت انى اعمل محشي سبحان الله جبت ممبار وحشيته واجاراكم الله كان واسع المنبار اد ايه وانا عماله احشي واكمل حشي واقول هو مش بيخلص ليه هههههههههههههههههههههههه

المهم انا عايزه طريقه عمل محشي ورق العنب من طقطق لسلامو عليكووووووووووووووووو

وياريت بالتفصيل الممل

شاكرين حسن تعاملكم

[عادل أبوزيد]

من أجل موضوعك هذا تم إضافة خاصية البحث يإستخدام جوجول ... لا أعرف مدى كفائتها و يمكنك تجربتها.

ما سبق كان إستهلالا لابد منه

إستخدمت خاصية البحث فى القمة اليسرى للصفحة و كتبت "محشى ورق العنب" و ظهرت لى قائمة إخترت منها هذا الرابط لوصفة للفاضل بندق أفندى

http://www.egyptiantalks.org/invb/index.php?showtopic=60523&view=findpost&p=370804

و لهواة المطبخ إنتظروا مفاجأة كبرى ربما فى رمضان

[عادل أبوزيد]

الببحث عن طريق جوجول يبدو أن فيه مشكلة ...... مبدئيا إستخدمى البحث العادى

[se_ Elsyed]

يا نهارك أبيض يا نورا .. قصدي يا بوسي

بقى مصرية وما بتعرفش تعمل محشي ؟

ده أنتي كده تقفيل تايواني بقى

بُصي .. طريقة سهله جداً للمبتدئين بنعملها لهم في كي جي وان محاشي ... حاولي تجيبي أقلام جاف فاضيه وتلفي حواليها الرز وتحطيه في الحله وزو زو زو .... تبقى محشي

أو تقطفي ورق الكرومب وترصيه راق كرومب وراق رز .. راق كرومب وراق رز ... وبعد ما يستوي تقطعيه بالطول .... وكذلك ورق العنب أستخدمي نفس التكنيك ...

أو بُصي ..... أحشي بومبار بس أكتبي على الحله من بره " هنا محشي ورق عنب .. وصلي عالحبيب قلبك يطيب "

مع تحيات الشيف سونسون

[اغابي]

خضتيني يا ام عمر ووقعتى قلبي

بس ايه العنوان جاااااااامد

:blink: mfb:

ولا ..... يهمك يبقى معانا بندق افندى شيف الشيفات كلهم و بذات نفسيه

bv:-

وندور على اللى يدينا طريقة ورق العنب

ذاكرى كويس يا بشمهندسة بوسي

وانا معاكى

فى انتظار مفاجات شهر رمضان الكريم

وكل عام وانتم بخير

اغابي

[engmido]

يا سلام يا س س

ده انت شركتها خالص

[pocy]

بصراحه استاذي الفاضل /عادل

انا جربت البحث في جوجل وفعلا لقيت فيه مشكله معرفش ليه بس لما جربت البحث فى مواضيع المنتدى forums

جابلي حاجات كتير والاسف مش ليها علاقه بالموضوع بس انا شوفت اللنك بتاع الاخ الفاضل استاذ بندق وجزاك الله كل الخير فعلا

والواحد من غير المحاورات مش عارف هيعمل ايه

وجزاك الله مره اخرى اخى الفاضل

[pocy]

يا نهارك أبيض يا نورا .. قصدي يا بوسي

بقى مصرية وما بتعرفش تعمل محشي ؟

ده أنتي كده تقفيل تايواني بقى

بُصي .. طريقة سهله جداً للمبتدئين بنعملها لهم في كي جي وان محاشي ... حاولي تجيبي أقلام جاف فاضيه وتلفي حواليها الرز وتحطيه في الحله وزو زو زو .... تبقى محشي

أو تقطفي ورق الكرومب وترصيه راق كرومب وراق رز .. راق كرومب وراق رز ... وبعد ما يستوي تقطعيه بالطول .... وكذلك ورق العنب أستخدمي نفس التكنيك ...

أو بُصي ..... أحشي بومبار بس أكتبي على الحله من بره " هنا محشي ورق عنب .. وصلي عالحبيب قلبك يطيب "

مع تحيات الشيف سونسون

الله يسمحك فطست على روحى من الضحك من كلامك والله ولولا انى جربته اعمله قبل كده وشوفت ناس بتعمله كنت ممكن اصدق بس اللى بتقول عليه ده الرقاق شوفت انا شاطره ازاى هههههههههههههههه بس بدل الرز لحمه مفرومه ههههههههههههههه

جزاك الله خيرا اخى الفاضل

خضتيني يا ام عمر ووقعتى قلبي

بس ايه العنوان جاااااااامد

:blink: mfb:

ولا ..... يهمك يبقى معانا بندق افندى شيف الشيفات كلهم و بذات نفسيه

bv:-

وندور على اللى يدينا طريقة ورق العنب

ذاكرى كويس يا بشمهندسة بوسي

وانا معاكى

فى انتظار مفاجات شهر رمضان الكريم

وكل عام وانتم بخير

اغابي

وانا كمان يا اغابي منتظره معاكى اكلات رمضان نفسي كل يوم يكون فى اكله مصريه من اللى هى وكده متخلوناش نفكر هنعمل ايه فطار النهارده

وبال نسبه للعنوان انا فعلا كنت مكسوفه وانا بطلب ازاى اعمل ئالمحشي لانى عارفه عمايله رخمه وبتاخد وقت

بس والله طلع طعمه جميل جدا النهارده الا مش عايزه طبق على الماشي

[المهندسه]

انتى بتتكلمى بجد يا بوسى عاوزه طريقه المحشى على العموم انا هكتبهولك بس اوعى تاكلى اللابتوب وراه

كل انواع المحاشى هى نفس الخلطه الهقولهالك

لو انتم اسره صغيره 3 افراد مثلا

كوب و نص رز مغسول جيدا حطيه على جنب لحين اما تخلصى اللصلصه

فى الحله لعمل الصلصه معلقتين سمنه مع معلقتين زيت و حمرى بصلتين متوسطين ماتحمريهمش اوى علشان ما يمرروش و يفقدوا طعمهم يعنى 5 دقائق فقط على نار متوسطه و بعد كده

ضيفى عدد 3 طماطم عصير طبعا مع (معلقه ملح ...فلفل اسود او ابيض..بهارات مشكله...سنه قرفه بسيطه ونعناع و ده حسب الرغبه)

بعد ما تتسبك الخلطه اقفلى الناروسيبيها تهدى 10 دقائق و ضيفى الرز و الخضره(شبت و بقدونس و كسبره)حوالى كوب كده اصل مش هقدر اقولك قد ايه من الحزمه لانى ماشوفتش

حزمه الخضره قد ايه عندكوا فى الكويت

دوقى الخلطه و لو محتاجه تذودى اى توابل حطى

اما بقه لورق العنب فطبعا فى دول الخليج منتشر الورق المعلب فى برطمانات مش زى مصر اخضر و حجمه صغير

بالنسبه للمقادير السابقه هتخدى لفتين من الورق (بيبقى البرطمان فى 4 لفات)

اغسليه جيد جداااا جداااا علشان تشيلى الماده الحافظه و كمان بيبقى الورق ناشف و جامد شويه بيبقى محتاج يطرى شويه حطيه فى مياه مغليه على النار حوالى 5 دقائق

ثم انشليه و حطيه فى مصفى

وابتدى لف ورق العنب دايما الورق المعلب ده بيبقى كبير محتاج يقسم بالطول الى نصفين

حطى مقدار بسيط من الرز ولفى مع الاهتمام بغلق الجوانب كويس

رصى ورق العنب فى الحله بس متلزقيهوش اوى فى بعض علشان الشوربه تتخلله جيدا و يستوى

بعد ما تخلصى زودى 2كوب شوربه (لغايه لما الشوربه تعدى وش الورق بحوالى عقله اصبع

حطيه على نار عاليه لمده 10 دقائق (او لغايه ما المياه الفوق وش الورق تتشرب)

و بعدين وطى جدااااعليه يعنى يستوى على نار شمعه بسيط جدا لمده تقريبا تلت ساعه بس حاسبى اوعى تكون المياه لا قليله علشان مايستويش و لا كتيره علشان ما يعجنش

على فكره ممكن تحضرى كميه كبيره مقسمه فى اكياس على قد الطبخه من الصلصه بتاعه المحشى و اليوم العاوزه تعملى محشى يادوب تغسلى الرز و احشى على طول

مع تحيات مهندسه المطبخ

مش عاوزه تصقيف علشان بتكسف

بألف هنا و لو ماعرفتيش ابعتلك من الرياض للكويت حله من عنيا

تم تعديل 6 أغسطس 2010 بواسطة المهندسه

[عنبو]

هو الموضوع بسيط قوى وسهل جدا

حضرك الاول هتجيبى ورق العنب وهتشيلى منه العنب الباقى يعنى لان تعرف المحشى ورق العنب الكويس من الوحش من الحته دى

ان الكويس ميكنش فيه عنب

وبعدين تعملى ايه

تجيبى حله كبير وتمليها مياه من عند اغابى وتجيبى باكو شاى لبتون

وتحطى الحله على النار وتحطى بقى ورق العنب وباكو الشاى سويا فى الحله وتسيبهم بقى لحد لما تغلى واول لما تغلى تشيلى

الحله من على النار وبعدين بقى

تصفيه وتغسليه كويس قوى بمه وكلور

طبعا انا شايف واحد قصير واقف بعيد وبيسأل بيقول ايه فايدة باكو الشاى

هقوله باكو الشاى ده علشان يعمل لون للمحشى يعنى

طيب خلظ المحشى بقى اللى المفروض هنحشى بيها

دى سهله جدا هتيجى شوية رز على بصل متقطع على بهرات بقى اللى انتى بتحبيها واى حاجه عاوزه تتخلصى منها حطيها فى الخلطه دى

وبعدين تعملى زى سين سين لما اقلك

راق ورق عنب مع راق خلطه

وهكذا بس فيه بقى حاجه فنيه هو مقلش عليها

ان تقطيع المحشى بيكون قبل لما يستوى وده الفرق بينه وبين الرقاق

تحياتى

اولاد عنبو للمحاشى

[doha]

هو طبعا مقدرش ابدا ازود حاجه بعد البروفيسور عنبي الي على راي اخوانا العرب كفى ووفى لدرجه اني صدقت الطريقة ..

بس مش معقول داخله طالعه على التوبيك ( خاصة بعد كاشف الرقم الي حطوه تحت ) ومقولش حاجه ..

بالنسبة لي تخصصي المحاشي .. دي من المعالم الاثرية لبيتنا معروف ان الي بعمله هو ده بس الي يقال عليه محشي ..بس تعرفي ايه المشكلة يابوسي .. كل الانواع دي تشمل الكرنب والكوسى والباذنجان والفلفل الاخضر وكل حاجه ممكن تنحشي ماعدا .. ايوه الجمل الي جيتي فيه .. ورق العنب .. للاسف بحب احشيه جدا عشان بيبقى منظم وشكله حلو بس مليش في حشوته ولا تسويته يعني عملته قبل كده مرتين وكان ( عادي ) يعني محسش ان هي دي الاكلة الي افتخر بيها او انقل طريقتها للاجيال الجايه ..

ماسبق كان استهلالا لابد منه ..

يبقى انتي لو عاوزه اشرح لك طريقة اي محشي ـ ماعدا ورق العنب ـ اشري بس ..

نيجي بقى للي عليه العين والنية ..

لو دورتي على طريقته في النت هتتلخبطي لاني سبق ودخلت القصة دي من سنين طويلة .. تابعت الطريقة في النت والكتب وبرامج الطبخ واكتشفت اخيرا ان ورق العنب بينطبخ بطريقتين مختلفتين .. عند المصريين بيطبخوه زي اي محشي بنفس الخلطه ويتسوى بشوربة. . طبعا من وجهة نظري ده مش محشي ورق عنب .. ده محشي يتاكل كوجبة لكن محشي ورق العنب الاصل فيه انه ( مزه ) يعني حاجه كده لفتح الشهية مش طبق رئيسي او مكمل ..

الطريقة التانيه هي طريقة الشوام ودول بيعتبروه زي ماقلت مقبلات على مايبدوا فبيطبخ بحشوة تانيه مختلفة شويه عن المحشي العادي والاهم انه بيتسوى بمية وزيت زيتون وليمون .. بس .. مفيش شوربة ..

لما تيجي تعمل محشي ورق عنب راعي الآتي..

طبعا هتحشي من الجزء الخشن والناعم يبقى برا .. يعني تفردي الورقة بحيث العروق البارزه تبقى قدامك وحطي عليها الحشوة ـ على العروق ـ ولفي على كده .

في كل انواع المحشي سواء كرنب او ورق عنب او حتى خس ( متكبسيش ) المحشي جامد بحيث تضغطي الحشوة جواه .. خلي الورقة واسعه بعض الشيء على محتوياتها عشان تديلها فرصة تنفش ..

اياكي وتقطيع البصل وخضروات المحشي في الفود بروسيسور لازم تقطيع يدوي .. كمان البصل لازم يبقى قطعه كبيرة نوعا عشان لما يستوي يدبل فيدي فرصة للرز ينفش مكانه ..

اعملي المحشي الاول في طبق بعدين رصيه في الحلة عشان تختاري حلة مناسبة للكمية .. لماترصيه خلي بينه فراغات بسيطه متكبسيش الحلة اوي عشان برضه زي ماقلت يدي فرصة يستوي كويس ..

كل مايطول المحشي على نار هادية كل مايبقى احسن .. اعرف وحده كانت بتتركه 3 ساعات ..

السر في محشي ورق العنب ( المزازه ) فطبيعي نحط له ليمون وكمان مرة جربت وصفة له بالتمر الهندي والله طلع حلو .. واساسي انك بتحطي ( اعناق ) الاوراق في قاع الحلة قبل ماترصي ورق العنب فوقها لان الاعناق دي بتدي مزازه اكتر ..

وياريت متنسيش تقولي لنا على تجربتك وملاحظاتك على محشي ورق العنب الي شجعتيني اعمل منه اليومين الجايين بقالي يمكن سنتين تلاته معملتوش .. بس هو فين اصلا ورق عنب دلوقت ؟

[المهندسه]

و لا رد هو انا فهمت الموضوع غلط و لا ايه

[بندق أفندى]

محشى ورق عنب وصفة مدامية