العشم القاتل وسيف الحياء

[se_ Elsyed]

أنا عارف إن دي مش مشكلتي لوحدي وإنها مشكلة جيل بحاله :)

وهي سيف الحياء والعشم الزائد من الأخرين .. خصوصاً لو أقرب الأقربين ... وعشان إنت مؤدب ومش بجح وعينك قوية ... يبقى أضمن يا معلم إنك هاتاخد على قفاك للصبح .. ولما تتكلم وتقول أي حرام كفايه جتتي أتهرت .... تتلام ويتزعل منك ...

أختي مدام ذهبية فين ؟ :lol: .. أصلها كتبت نفس الموضوع عن نفس المشكلة بس كانت جزئية واحده بتاعت الشقة اللي في بيت العيلة واللي متدبسة فيها ومش عارف تتصرف إزاي ؟ ..

أنا لسه أصلي متخانق مع أختي الصغيرة في التليفون دلوقت وأنفعلت عليها مع إنها مالهاش ذنب ... وذنبها الوحيد إن ربنا ميسر لها الرزق وعايشه عيشه مرتاحه .. عشان كده أنا وهي بقينا حزب المغضوب عليهم في العيلة .. واللي المفروض نضحي على طول الخط .. واللي المفروض نتغاضى عن حقنا وينتزع منا إنتزاعاً .... لإننا على حسب رأيهم " مش محتاجين "

على سبيل المثال لا الحصر ....

- مِلكي مش عارف أتصرف فيه ... عندي شقتين مقفولين في بيت العيلة موضبهم توضيب محترم ومش عايش فيهم .. وعلى الأقل الشقة الكبيرة بالذات ممكن تجيب لي 1000 ج شهرياً إيجار جديد .. ومع ذلك مش عارف أأجرها عشان أخويا عاوز يفتحها على شقته دوبلكس .. يعني يخرمها ويضمها على شقته .. ويا أخويا بحق ربنا .. ولو طلبتها في أي وقت خدها ... ههههههههههههه .... عند أم مشمش إن شاء الله .. لكن تجيب لنا مستأجر من بره لأ والف لأ ... ملحوظه : " عندنا شقتين في البيت متأجرين لأغراب " .... ده على هامش المؤتمر يعني ...

- عندي كمان شقة في الدور الأرضي وكل أخواتي عارفين كده لان كان فيها مستأجر زمان وأخواتي قالوا لي شوف هو عاوز كام وأدفع وله تبقى شقتك عشان إنت اللي خلصتها ... وبالفعل دفعت له وخرج ووضبت الشقة من الالف إلى الياء لأن الساكن كان قافلها وبقت خرابه والدهان وقع والبلاط قدم وكانت حالتها زبالة ... فقولت أركنها وممكن أعمل فيها مشروع مشغل أو أي حاجه تشغل الناس وتساعدهم بس لما أفضى لها ... الكلام ده يمكن من 5 سنوات .. أُفاجأ إن أخويا جاب العمال اللي شغالين عنده في المحلات بتاعته وسكنهم فيها بإيجار بيدفعوه له لأنهم لو سكنوا بره هايدفعوا طبعاً .... وطظ فيه أنا ... وكتاب الله من غير ما يستأذني حتى ..

- حتى حدود ربنا أستغفر الله العظيم بيتم الإعتداء عليها ..... أُمي الغالية أخدت ورثها من سنة والكل أتفرق علي الجميع بما يرضي الله وأكثر ... إلا أولاد البطه السودا اللي هما انا واختي بحجة إننا " مش محتاجين " .... طب سوري والبنات اللي متجوزين وكل واحده عندها ضرفه في البيت بيصرف عليها وما شاء الله مش محتاجين هما كمان وربنا يزيدهم وعندهم ما يكفيهم وزيادة .... إيه ؟ نصرف على رجاله كمان المفروض دورهم في الحياة إنهم يصرفوا على بيوتهم وإلا ما كانوش إتجوزوا من أساسه وأنا اساساً عارف ظروفهم وإنهم بالفعل مش محتاجين ؟

- إخواتي الصبيان الاتنين ... كل شويه فلوس سلف يا سين سين وأقسم بالله هاترجع لك في أقرب فرصة عشان في سبوبة قدامي بأخلص فيها وفيها مكسب حلو وأول ما تتم .. فلوسك هاترجع لك وفوقيها بوسه .. حاضر من عيني يا معلم أتفضل .... وتروح الأيام وتيجي الأيام والسبوبة تخلص وأعرف المكسب ورأس المال كام ويدخلوا في سبابيب تانيه .. وأنا أساساً مش شريك وعارف كده ولي الفلوس السلف بس ..... وووووووووووووووووتعيش إنت يا حاج ... فلوس إيه هو أنت محتاج ؟ مانت شغال بره والأشيه معدن معاك ؟...

- زتونة الموضوع بقى ... أنا شريك 50 % بالظبط في أول صالون حلاقة أخويا فتحه وماشي زي الفل وأنا شايف كل حاجه وعارف كل حاجه .. والكلام ده من 13 سنة .... هههههههههههه حتى الأن بأخد بفلوسي حلاقه .. بانزل أحلق شعر ودقن كل سنة مره... بنصيبي هههههههه وما أخدتش ولا مليم حتى الان ... وأسمع من بره إن نصيبي من الدخل بيروح مصاريف لوالدتي .. مع إن مبدأ الأزدواج الضريبي ممنوع دولياً .. يعني مانا بابعت مصاريف للوالده من غير ما حد يتكلم وهي مش محتاجه والحمد لله عشان معاش الوالد وإيجار الشقتين اللي في البيت اللي بيكفوها وزيادة ... لكن الظاهر إني لازم أشيل الليلة لوحدي ....

ولما تعرف إن حد بيستلف منك أساساً مش عشان محتاج .. لكن عشان يعمل مصلحة ويعلي ويكبر ويسمن .... مش حاجه تقهر دي ؟ ... طب أنا مالي أهلي ؟ طب يا سيدي ربنا يكرمك .. طب هات حقي بقى ؟

يييييييييييييه .. هو أنت محتاج ؟

وعشان حد ييجي يحرجك ويكون قريبك - مش اخويا بصراحه - يقول لك : حاضر حاضر ... طب أكتب لك وصل أمانة بفلوسك عشان تضمن حقك وتطمن إني هارجع الفلوس وماحدش ضامن الحياه من الموت ؟

ومع إن ده حق ربنا ... ومعروف إن أطول أيه في القرآن وكلها تفاصيل هي أية الدين - القرض يعني - وربنا قال ورهان مقبوضة .. او كتابة القرض ده ويكون في شهود كمان على الكتابة دي ...

ومع ذلك الواحد بيُغلب العاطفة على الأشياء الرسمية .. وبيقول كله عند ربنا ... يعني سيادتك لو ما رجعتش الفلوس في الميعاد المتفق عليه - وده الطبيعي على فكره - هارفع عليك قضية وأسجنك .... وأيتم عيالك اللي أنا أبقى خالهم او عمهم أو قريب بشكل عام من الدرجة الأولى ؟

وبرضوا طالما بتسكت وبتفوت .. ماحدش بيقابل ده بالمعروف والأحسان ويقول كتر خيره .. لأ يطنش ويقول بركه يا جامع إنه ما طلبهمش ونام يا عم عن حق الناس ....

على الجانب الأخر والله إتعاملت مع زملاء وأصدقاء دراسة .. والله العظيم زي السيف .. وأبقى عارف ظروفه وأعذره وأقوله أبداً مش هاخد حاجه إلا لما الظروف تتحسن أبقى ردهم ومنهم واحد من 4 شهور خلاني راجع من رحلة عمل قصيرة في مصر وقال لي هاقابلك في المطار عشان أبعت فلوس لواحد صاحبي في السعودية محتاجهم قوي ... ولقيته جاي جري وبيديني ظرف مقفول .. وقال لي معليش عشان مستعجل هابعت لك التفاصيل في إس أم أس لما توصل وأقول لك تقابل الشخص ده إزاي .. ووصلت بالفعل وأستنى إنه يبعت . ما فيش ... روحت متصل بيه .. يقوم قايل لي " دي فلوسك اللي كنت واخدهم منك وكتر ألف خيرك وأنا ما رضيتش أقول لك كده في مصر لأني كنت عارف ردك هايكون إيه " .

معليش صدعت دماغكم لكن والله العظيم دمي فاير النهاردة وعاوز اضرب أي حد ...

وأنا عارف إن الموضوع ده هايتحول إلى حائط مبكى .

عشان كده كل واحد هاييجي يبكي ويعرض مشكلته هنا .. هاخد منه 50 يورو .. آه إشمعنى أنا ابقى الحيطه المايلة وكل الناس بتستغلني ؟

[pocy]

الله يكون بعونك اخى الفاضل والكل هذا الرجل

وبصراحه كنت ناويه اكتب اكتر واكتر بس لقيت الموضوع فيه 50 يورو واختك مزنوقه ههههههههههههههههههههههه

فقلت بلاش احسن وكان الله فى عون العبد طالما العبد فى عون اخيه

وسبق ان كتبت ماذا تفعل لو كنت الزوجه ؟ وكان موضوع مشابهه تقريبا بس من ناحيه المدام مش من ناحيه الزوج وربنا يبعد عن المستلفين بلا عوده الفلوس المسلوفه هههههههههههههههههههه

وبجد امشي قانونى من البدايه لاي شئ هترتاح ويرتاح ضميرك لانه فى البدايه مش مالك لوحدك دا مال اولادك كمان لان الوقت اللى انت بتشتغل فيه ومش قاعد معاهم فيه ده وبعيد عنهم مينفعش تجمعه وتديه لاى حد اى حد ان كان الا اذاكام محتاج او مسكين وهتاخد عليه ثواب غير كده يبقي حرام عليك نفسك اللى تعبت وهتحاسب عليها حرام عليك صحتك وحرام عليك بيتك واولادك

وربنا ييسرلك امورك يارب اللهم امين واحنا على اعتاب رمضان واعتقد ان ده الوقت اللى تقدر تجيب حقك بسهوله فيه لان الواحد دايما بيبغي رضا ربنا بالذات فى هذا الشهر الفضيل

وكفايه بقي كده علشان انا عارفه انى مش هسلم من البقين اللى قلتهم

وان شاء الله هدعيلك بس هات ال50 يورور اللى عليك ههههههههههه

[المهندسه]

استاذ سين سين حسه بالاسى فى كلامك و طبعا عندك حق

هى الدنيا حصل فيها ايه اتقلب حالها الغريب حنين علينا و القريب بيعض فينا اخواتنا بيطمعوا فينا ليه

على فكره ده حال كل البيشتغل بره زى حالاتنا فعلا بدون استثناء بيقولوا نفس الكلمه علينا دول مش محتاجين فاكرينا بنلم راتبنا فى شوال و طبعا مش عارفين بنتعب قد ايه

والمصيبه مش لما اغراب يقولو كده فى داهيه المشكله لما يكونوا الاخوات الهما سند و حب حقيقى بدون مصلحه و سكن لينا بعد عناء سنه فى الغربه دول المفروض هما البيخلونا ننزل بلدنا كل سنه علشان نشوفهم ونتلم كلنالما يبقو هما سبب فى الظلم والهم يبقى الواحد ينزل بلده ليه و لمين

كل الممكن اقولو انك لو خدت موقف دلوقت هتكون طبعا انت الغلطان فى نظرهم والدنيا هتتقلب مش هتقعد عليك طبعا بس لما انت

من 13 سنه شريك فى المحل و ما بتاخدش حاجه بتوافق بعد كده ليه على السلف و ماتكلمتش ليه من زمان و عرفت حقك ايه و حق

اخوك ايه ده شرع الله؟؟؟اولا خد قرار انك مش هيضحك عليك تانى حط حدود براحه خالص بأى حجج عندك اقساط فمصاريفك كتير انت و

اولادك اى حجه تخليهم يفهمو شويه انك بتتضايق وللاون انا عارفه انه صعب لانهم اخوات مش غرب

لكن حاول اما حقوقك الفاتت حاول براحه تاخدها بعد ما تهدى شويه ماتفكرش وانت متعصب لانك اكيد هتاخد قرار متسرع لانك لو

احتديت عليهم اولا هتكون انت الغلطان و كمان الدنيا هتقوم وهتخسروا بعض فعلا و ده انت مش هتقدر تستحمله و حياتك هتكون فى

نظرك جحيم لو زعلت مع حد من اخواتك وده واضح بين سطورك ..حاول بهدوء تاخد حقك ولو ماعرفتش احتسب الحق ده عند ربنا و هيعوضك لكن اياك تقاطع حد فيهم

اياك وقطيعه الرحم(لايدخل الجنه قاطع رحم)

وربنا يهديلك الحال مع اخواتك يارب

ياريت تعمل تحويل با50 يورو ده حق الله احنا مش اتفقنا على كده من الاول هههههههههه واضحك وافرح وفرح العيال ولادك ذنبهم

ايه وفرح نفسك ده رمضان بعد يوم يا راجل استقبله وانت فرحان وخليها على الله ونعم بالله خير عون

تم تعديل 9 أغسطس 2010 بواسطة المهندسه

[شريف مان]

طيب ياعم سين سين ماانت على قلبك قد كده wst::

ايه يعنى شقين وللا محل وللا بتاع

ولا انت تروح الخليج تعببى بالشوال لوحدك

مش تشوف الغلابة بردوا ولا ايه

mfb:

[Diab]

بجد حاجة تحير

تعب السنين ومستقبل للأولاد VS صلة الرحم ورضا الأم

شوف الورقة دي انا الصبح علقتها علي مكتبي

الوصايا العشر في سورة الإسراء

الأيه 26

-وَآتِ ذَا الْقُرْبَى حَقَّهُ وَالْمِسْكِينَ وَابْنَ السَّبِيلِ وَلاَ تُبَذِّرْ تَبْذِيراً [الإسراء 26]

(وآت) أعط (ذا القربى) القرابة (حقه) من البر والصلة (والمسكين وابن السبيل ولا تبذر تبذيرا) بالإنفاق في غير طاعة الله

بص فيها جايز يكون فيها رد علي سؤالك لأنك أنت أدري بظروفك وربنا يكرمك

[الغريب]

لو بالنسبة للأصدقاء كنت هاقول مشي الأمور مييري زي ما أمرنا ربنا عز وجل

أنما لو على الأهل فنصيحتي يا أخي متحرقش أعصابك وأحتسب الأمور دي كلها وربنا أكيد بيعوضك وهيعوضك وأنت أكتر واحد عارف كدة، أنما لو كان مثلا حد من أخواتك طلب مساعدة وأموره متيسرة فمن رأيي أنك تحاول تخلع منه بصنعة لطافة طالما هو مش محتاج والسلفة دي هتبقى زيادة بحر

معلش يا سين سين ربنا يجعله في ميزان حسناتك ويرزقك الإحتساب ويعوضك خير عن اللي فات ، أنما اللي جاي لازم يكون بحساب :wub:

[Howayda Ismail]

انا اسفة انى اقول لحضرتك ان الوالدين لهم دخل كبير فى الموضوع ده خصوصا الام لما تحابى واحد على حساب التانى

لو الكبير تقولك اول فرحتى وله معزة خاصة ولو الصغير يبقى اخر العنقود والحيلة وتلاقى اللى فى النص وقع قضاء وقدر

حتى على اختلاف الترتيب الام لها ابناء متميزون وده بيسبب احقاد بين اولادها بتبدى بسيب لعبتك لاخوك لحد ادى اخوك

ده غلبان واللى يحزن لما تاخد منك وتفرق عليهم وده السبب انك بتدفع المصروفات مرتين

المشكلة ان الاخرون بيخادوا جواز مرور ان ده حق مكتسب او ضريبة لازم تدفعها اجبارى حتى لو امكانياتك اقل منهم

الانسان لايولد طماع ولكن احنا البشر اللى بنقوى فيه النزعة دى مش حضرتك بس اللى عندك المشكلة بيوت كتيرة فيها

مآسى لكن احمد ربنا انها جت على الفلوس وبس والغيرة والحقد والطمع ماوصلوش لاكتر من كده

حاول تكلم والدتك تتوسط بينكم فى رد حقوقك وفك شراكة المحل لانك فى الاخر خسران وبتترك لاولادك بعد عمر طويل سلسلة من

المشاكل وحقوق منهوبة ولو فشلت المحاولات احمد ربنا على الصحة واولادك وربنا يعوضك خير عنها ان شاء الله

عاوزة انبه حضرتك ان الشقق دى لازم يكون معاك ورق ملكية مش سماعى انها ملكك لان مشاكل الموضوع ده كتيرة جدا

[nightmare]

والله يا سى السيد , كإنك بتحكي معاناة الواحد من ساعة ما اتخرج لغاية دلوقتى , من ساعة ما اتخرجت وانا الكبير بقي والمسئول عن كل حاجة ومفيش حد بيرحم هات هات هات , لدرجة انى زهقت وكرهت حاجة اسمها الفلوس, وللأسف مع كل ده ما تلاقيش حد بيفكر فيك وكإنك مجرد لا مؤاخذة ثور في الساقية وبتلف علشان تجيب الفلوس وخلاص , القصة طويلة جداً وكل يوم فيها جديد.

لكن برجع واقول "قدر الله وما شاء فعل" والواحد ما يعرفش الخير فين .. وبر الوالدين ودعواتهم تسوي كنوز الدنيا وما فيها .. ومهما حصل دول أهلى وهنعمل ايه وقدرنا كده .. وربنا يعوض الواحد خير ان شاء الله.

[herohero]

مادام مسافر برة انسى القاعده العامة نحط فلوس ع فلوس وانتوا مش محتاجين

ده قاعده من طفولتي وانا بسمعها واقاربنا واكلين فلوس والدي وغيره وع فكرة كله بيبقى طمعان والمبرر انك بره ومش محتاج وبيستغل كسوفك واحراجك اللي يستلف وما يسدش وده الطبيعي ويكون مستلف لتجارة مش لمرض او لحاجه شديدة عارف الاصدقاء ممتازين اما الاقارب للاسف الشديد طمعانين جدا

سيدي من ضمن الضرائب اللي بندفعها للاسف العلاقات الاجتماعيه اللي بيكون الفلوس محورها ده نتيجه الغربة معاهم فلوس اكتر منك لكن انت بره فيبقى بتغرف عارف لو زمان ماشي كان الخليج يفرق اما دلوقتي مقلب بس تقول ايه

فياسيدي استحمل واحتسب عند ربنا وريح اعصابك

[doha]

ياااه ياسين ياسين .. قطعت قلبي والله انت دور واختك الي ملهاش ذهب دورين..

بس اقولك ايه .. تلك سنة الحياه .. وفعلا الحمد لله لو ربنا مديلنا ومش محتاجين الامر لله من قبل ومن بعد مضطرين نضحي .. الناس في مصر لها منطق غريب واحنا عشان نقدر نتقبله مضطرين نقنع نفسنا بمناطق اخرى اكثر غرابة زي مش يمكن ربنا موسع علينا لهذا السبب فحسب او مش يمكن فعلا احنا مش محتاجين والناس دي محتاجه بجد ..

الي يغيظك الي بيقول عليك مش محتاج ده غالبا بيكون ( صنايعي وكسيب ) او ( موظف براتب محترم ) وممكن الاثنين في بعض ومش بعيد ابدا يكون مليونير ومع ذلك طالما انت بتقبض بالعمله الصعبه يبقى حالتك ميسرة وحالتهم هم الي صعبه ولو كان ايرادهم اضعاف !!

على كل حال في الامور الي زي دي انت اصبر خاصه والوالده ربنا يديلها الصحه موجوده وهي اكيد شايفه الي بيحصل وحتى لو مقالتش ان ده ظلم او وقفت جنبكم هي اكيد من داخلها هتبقى راضيه عنكم انتم بالذات الجماعه الي بتصرف وسايبه اخواتها براحتهم .. رضاها عنكم انتم الاثنين يساوي كنوز الدنيا .. ايوه صحيح جاوز الظالمين المدى بس طالما انت بتعامل ربنا وسايب لهم كل ده بر وصلة رحم ( عندك المحاكم والقضايا لو مش عاجبك الوضع والشيء الوحيد الي مانعك بكل تاكيد هي الاخوة وصلة الرحم ) طالما كده فتاكد ان ربنا هيعوضك من ناحية تانيه ممكن متخطرش لك على بال ..

احسن حل لما يكون للواحد قرايب بالشكل ده انه ميقطعش علاقته معاهم ابدا ولكن ( يصفي تعاملاته ) يعني من البدايه شراكتك معاهم كانت غلط في غلط بس خلاص معادش ينفع تتراجع فانت من هنا ورايح اي استثمارات خليها برا ومتشاركش معاهم حتى لو كان الربح مضمون مية في المية لانك بكل اسف مش هطول من المية دي حاجه .. مهما يحاولوا يغروك مستقبلا بمشاركتهم ارفض نهائيا ولكن بحجج منطقية مقنعه دون ذكر الحقيقة ابدا وهي انهم غير اهل لشراكتك انت بالذات ..

واخيرا ياريت تطيب خاطر اختك بكلمتين حتى لو انت مش مقتنع بيهم من داخلك لان مهما كان انت الراجل واكيد لو لقيتك مطمئن هي هتطمئن على اطمئنانك اما لو لقيتك محتار او اسقط في يدك ومش عارف تاخذ حقك منهم ازاي فاكيد هي هتتعب نفسيا اكتر منك كونها بالتاكيد الاضعف من بينكم .. شد من ازرها وقولها عادي وانا متكتك لهم ومصيرنا هناخذ حقنا والكلام ده وقولها برضه من جهة ثانيه معليش غلابه ومحتاجين مهما كان العيشه في مصر .. الخ .. قولها كلمتين حلوين لانها اكيد محتاجاهم منك انت بالذات ..

ملاحظة اخيره .. قرات مرة قصة في بريد الاهرام لواحد مهضوم ـ زي حالاتنا ـ اخوه الاكبر استغل طيبته وليس غناه او ماشابه وراح مقسم الارض الميراث بينهم بحيث يعطيه اقل الارض جوده وسعرا .. هو اخذ نصيبه راضي وسكت ومرت السنين والارض الزراعيه دي بالذات دخلت كردون وتحولت لارض مباني بالملايين .. على فكره الاخ الكبير جاء بعد كده عاوز نصيبه فيها تاني .. الشاهد في القصة ان ممكن اي واحد فينا يتعرض لظلم من اقاربه لكن الاكيد ان ربنا بيبقى شايف وربنا بيعرف يعوضنا ازاي ..

[rewsha]

md2:

ممكن بقى اقول انا حاجه مختلفه؟

مهو كُل اللي دخلوا هنا عمالين يواسوا في الحاج سي السيد .انا بقى هاغير

اصلي اتعودت اني دايما ......اكون مختلفه :ninja: .

ايه راْيكم بقى لو كان العكس هوه اللي بيحصل ؟؟؟؟؟؟

ده بس علشان ابين ان لكل قاعده ...شواذ wst::

طب لو اللي مسافر بره مالا يقل عن 20 سنه .وبيصرف بهبل ومابيحوشش ولا قرش .ولما يرجع يلاقي اللي جوه البلد ربنا كرمه وعمله قرشين وربنا عالم بيه عملهم ازاي

يقول يقر عليه ويقول له ...ياعم روح ده انت عملت اللي انا ما قدرتش اعمله وانا مسافر بره :blink:

ايه راْيكم بقى؟؟؟؟؟؟؟؟؟

والله ده حصل معانا ...بدون الدخول في تفاصيل

لكن لو جبت عربيه جديده ...يقولوا مهو معاه اهو وجاب عربيه زيروا ولو جددت حاجه في شقتك .يقولوا اهو ادي الدليل معاهم على قلبهم قد كده .ولو شافوك بتحاسب في مصاريفك ...يقولوا عليك............................................بخيل

واخر صيحه بقى

وانا متاْكده ان ماحدش هايصدقها.او ان مش اي حد اللي هايصدقها

ان اللي مسافر بره .لما بينزل اجازه بيصرف اللي معاه ويستلف من اللي قاعد جوه md2:

بس الشهاده لله ....بيسد اللي عليه بعد سنه كده

ايه راْ]ك بقى يا س س

علشان تحمد ربنا على اللي انت فيه

يعني الطبيعي .ان اللي بره بيسلف اللي جوه

لكن العكس هوه اللي يحصل :blink: عمرك شوفت كده؟؟؟؟

[Morial]

انا كنت فاكراها مشكلتي انا لوحدي

طلع ليا زملاء ما شاء الله

المشكلة الاكبر بقي لما الواحد يكون بطبعه حنين وكريم ومعطاء مع اخواته

لاء وكمان بيبديهم علي نفسه

هحكيلك موقف يا سين سين من مئات المواقف

تخيل لو واحدة اشترت 8 اساور دهب

ووزعتهم كالتالي

تلاتة لأختها فلانه وتلاته لأختها علانه

واتنين ليها

بعدكام يوم

تيجي دي تقولها ماتديني واحدة كمان علشان يبقوا اربعة علي بعض

والتانية تقولها وانا كمان اديني التانية وابقي هاتيلك غيرهم

تقوم المسكينه اللي بتحب اخواتها وعايزة تفرحهم تديهم الاسورتين

وتروح تشتري لنفسها اساور فالصو اكسسوار

وهما يشوفوهم وعارفين انهم فالصو

يقوموا يقولوا ايه؟

اللـــــــــــــــــــــــــــــــــــــــــــه دول تحفة

ممكن تسلفيهوملنا نعيد بيهم ونبقي نرجعهوملك تاني بعد العيد؟

ولما ازعل واقول ده طمع

وان كان حبيبك عسل ماتلهطوش كله

يزعلوا ويلووا بوزهم

والست الوالده تتقمص

وتقولهم قدامي

كل واحدة فيكم ترجع لها اللي جابتهولها

ورجعولها الهدايا اللي جابتها لولادكم كمان

والله العظيم حاجة تخلي الواحد يستخسر فيهم العما

وهو ده اللي انا قولتهولهم

والعيب فيا مش فيهم

انا اللي عايزة الحجر

علي فكرة محدش فيهم رجع حاجة

تم تعديل 9 أغسطس 2010 بواسطة Morial

[HanaaOsama]

طبعا القصص ديه مكرره كتير جدا جدا و شوفتها كتير و حاجات اكتر من كدا كمان

لكن الحق احق ان يتبع ( من الاول )

السلف يكون للمحتاج مش عشان يزود دخله

او يكون للي معروف انه هيرد اول ما تتوفر عنده الفلوس

غير كدا يبقي مفيش و ممعاييش و الاحوال اتغيرت و عندي اقساط ..........

الديون تتكتب و ده مش عيب و ده امر من ربنا

الهدايا و المصرووفات البسيطه للاخوات و الاهل تعمل ألفه و محبه فعلا

لكن الهديه مش شقه ولا محل ولا ورث ولا دهب و كمان بسيف الحياء من غير رضا

كل ده حق الاولاد و بصراحه من غير ما حد يزعل

في كل القصصص المشابهه الي شفتها مبللومش غير الانسان الي عمل في نفسه كدا من الاول

و لو جه يصحح في الاخر مش هيعرف و هتبقي قطيعه و مشاكل و قطع رحم

[shiko]

لاتكن لين فتعصر ولا صلب فتكسر

الوسطية خير الامور ...كن وسطى فى ما تملك ...

عارف ان اول حاجة جت فى زهنى ايه ؟؟

اوف لنا الكيل وتصدق علينا ...

...موش عارفة ليه ...حابة نبص على قصة سيدنا يوسف وتصرفه مع اخواته لما زاروه فى مصر ...

ماقلش ..اخواتى حبايبى ..وامى وابويا ..واعطى لهم من باب صلة الرحم ...

ادالهم بس بحساب ...انت كمان ماتجيش على حساب مستقبل ولادك ..ولا بيتك ...

ربنا يسمحك بقى علشان حرقت دمى .,,,اكتر ماهو محروق ...

ال50 يورو تحت الدواسة اللى على باب المنتدى ...

[se_ Elsyed]

حتى أنتو كمان ؟؟؟؟؟؟؟

يعني قلت 30 مادخلة * 50 يورو = 1500 يورو وأعدي وأودع الفقر ...

لقيت كل واحد داخل يقول لي إيدك على الأوبيج

إنت القوي على كل قوي يارب

[dongol]

احنا اللي نفوسنا اتغيرت من ساعة ماسافرنا مع ان الناس في مصر حالتهم أغلب من الغلب و ماحدش فيهم باصص لنا في لقمة عيشنا زي ما احنا متخيلين

انا نفسي كل واحد مننا يتخيل ان هو اللي قاعد جوه مصر و اخوه او أخته هو اللي سافر

كان هيبقي ايه الوضع ساعتها

كان أكيد برضه هيعمل نفس اللي اخوه بيعمله دلوقتي بدعوي ان العيشة بقت صعبه في مصر و انه مش ملاحق علي المصاريف

يا جماعة يا ريت قبل ما نقول حقي و حقك خصوصا بين الاخوات يا ريت نفتكر الناس دي تعبت معانا قد ايه قبل ما نسافر و ازاي كانوا بيعاملونا كويس و كان اللي في جيبهم كأنه في جيبنا بالظبط

دنجل

[عنبو]

احنا اللي نفوسنا اتغيرت من ساعة ماسافرنا مع ان الناس في مصر حالتهم أغلب من الغلب و ماحدش فيهم باصص لنا في لقمة عيشنا زي ما احنا متخيلين

انا نفسي كل واحد مننا يتخيل ان هو اللي قاعد جوه مصر و اخوه او أخته هو اللي سافر

كان هيبقي ايه الوضع ساعتها

كان أكيد برضه هيعمل نفس اللي اخوه بيعمله دلوقتي بدعوي ان العيشة بقت صعبه في مصر و انه مش ملاحق علي المصاريف

يا جماعة يا ريت قبل ما نقول حقي و حقك خصوصا بين الاخوات يا ريت نفتكر الناس دي تعبت معانا قد ايه قبل ما نسافر و ازاي كانوا بيعاملونا كويس و كان اللي في جيبهم كأنه في جيبنا بالظبط

دنجل

استاذ دنقل كلام حضرتك يكون صح لما يكون اللى مسافر مقصر فيهم لكن متوصلش ان واحد يطمع فيا وياخد حقى بدون ما يقولى بحجة انى مسافر حتى لو محتاج لان ده اساسا حرام

او يستغل انى بتحرج ويستلف منى فلوس ومش يسددها وفيه حديث فى الموضوع ده ما اخذ بحد الحياء

انا هقولك على ظروف انا مريت بيها

والدى الله يرحمه كان فى بداية حياته كان كويس جداً بالنسبه لباقى اقاربنا

وكنا الحمد لله بنعاملهم تمام قووووى وده بشمهادتهم هما مش كلامنا يعنى

جم هم سافروا وربنا فتح عليهم من وسع بجد وصاروا من اثرياء القوم زى لما بيقولوا

جينا احنا بقى حصل درب فى حياتنا وفضل الدرب ينزل ينزل ينزل لحد لما خلاص بقينا عايشين على مرتبات الحكومه

طبعا اقاربنا دول والله على ما اقول شهيد كانوا بيعزموا على والدى بفلوس كتير قووووى

وواحد فيهم لما كان والدى تعبان جاب 100 الف جنيه وحطهم قدام والدى وقاله خدهم ومش عاوزهم خالص

والدى مرضيش ياخدهم

وكان بيتحايل على والدى انه يطلب اى حاجه والدى كان رافض تماما

ويقوله طالما ربنا سترها ملهاش لازمه وكفابه بس كلامك ده

وفيه برده واحد قريبنا تانى ده بقى كان على النقيض تماما وده يمكن اكتر واحد والدى ساعده فى بداياته

وكان ميرضاش يجى يزور والدى علشان ميعزمش عليه بفلوس

على العموم انا ممكن ادى اللى قدامى كل اللى معايا بس ميكنش لا فيها استغلال ولا رخاصه

تحياتى

عنبو

ورمضان كريم

[se_ Elsyed]

دنجل باشا صباح الفل

لو راجعت كلامي تاني هاتلاقيني ما ذكرتش خالص إني مسافر بره أو جوه ...

عارف الدليل على كلامي إيه ؟ ...

أخويا الصغير هنا معايا برضوا ...

لكن عشان عينه قويه وبيطالب بحقه أول باول .. ماحدش بيقول له إنت مسافر بره ولا مسافر جوه ...

[dongol]

عنبو

أستاذ دنجل ايه بس مفيش داعي للألقاب

الطمع طبعاً وحش جدا ومفيش اي حد يمكن يقبله علي نفسه ولا ولاده لكن انا كل اللي بقوله ان الاخوات مفيش بينهم فرق خصوصا اذا كان اللي بياخدوه مني ده مش هيأثر علي اللي معايا

نقطة من بحر يعني زي ما بيقولوا بس في نفس الوقت اللي بياخدوه ده هيكون سبب ان الموده تزيد بين الاخوات

و في الاخر الموضوع يرجع ليه انا لو حاسس ان الموضوع دخل في سكة طمع ممكن قوي اقول لا انا عندي التزامات

لكن اسيب الموضوع عايم و في الاخر اقول الناس طمعانه فيه اهو ده بقي يبقي سلبيه

اخويا سين سين صباح الخير يا سيدي

اخوك اللي مسافر معاك بياخد حقه زي ما بتقول

يبقي العيب في مين فيك و لا في الناس اللي في مصر

[الاسكندرنى]

السلام عليكم

و كل عام و انتم بخير

بعد كام بلنصات عندك فى الموضوع ده اقولك على حاجه

لو نزلت مصر عامل فيها مفلس ,,,, يقولوا عليك شوف الخايب النايب بيدلع بره و بيلعب بديله

ولو نزلت مصر مليان و بتشترى شقه و بتشارك فى تاكسى

تلاقى الكل حواره معاك ما تسلفنى و نكبر كلنا مع بعض

المهم انت يا كده يا كده

حتبقى وحش و ذئبا كاسر

فماتكسرش دماغك واقفل باب الخزنة بالضبهو المفتاح

وشكرا