# يا شعب يا مفتري حرام عليكم اللي بتعملوه في الحكومة ده #

[Abu Reem]

كل سنة وانتم طيبين جميعا

- كل سنة وانت طيب يا بيه ....هذه العبارة التي تسمعها من البائع هذه الايام عندما تسأله ....هو السعر زاد لبه انا لسه شاري نفس ( السلعة ) منذ ايام وكانت ارخص ،،، فتسمع هذه العبارة ..رمضان يابيه وكل عام وانت بخير

- والله احنا شعب جبار وطيب ولا ينفع معانا امراض ولا مياه تجيب الفشل الكلوي ولا مدارس بها 80 تلميذ في الفصل ، ولا شوارع زحمة ومليانة تراب وتلوث وضوضاء وجميع انواع الميكروبات ،،، ولا نافع معانا حروب ولا استفذاذ على حدودنا ، ولا نافع معانا غرق عبارات ولا حرائق وحوادث قطارات ، ولا نافع معنا بيوت بتقع ، ولا نافع معانا غلاء بنزين ولا ازمة بوتجاز ، ، ولا مياه ملوثة ، ولا دم ملوث ،

- مش نافع معانا حاجة خالص ومنذ سنوات عديدة كنا بنقول مش ناقص الا الهواء ندفع عليه فاتورة زي التليفونات والكهرباء ، ولما كان ذلك مستحيلا....تم ابتكار السحابة الملوثة التي تغطي سماء القاهرة الكبرى ، علشان نشم دخان ونختنق طالما احنا شعب مفتري وجبار ولا ندفع فلوس على الهواء الذي نستنشقه ببلاش ( ببلاش يا جببارة ) يعني هو الهواء ده من عند ابونا ولا ورثناه عن امنا....ومع ذلك......لم يفلح معنا هذا ايضا ومرت سنوات وسنوات....وآل ايه مش عارفبن ايه حل مشكلة السحابة السودة...

- طيب يعني ايه تاني فاضل علشان الشعب الرزل ده يزهق ويقرر الانتحار...مازال ابليس يفكر ويهرش في دماغه يبحث عن فكرة اخرى او مصيبة اخرى يضع فيها الشعب المصري كي يقرر الانتحار ولكنه عجز...فلا توجد مصيبة واحدة في العالم لم تحدث في مصر ولو مرض ولا وباء لم يحدث في مصر ....

- ايه يعني فاتورة كهرباء تجيلك ب 140 او 150 جنيه وده العادي يعني في الصيف

- وايه يعني فواتير الهاتف والمياه والغاز

- ايه يعني ( الفرخة ب 30 جنيه )

- ايه يعني كيلو اللبن ب 6 و 7 جنيه وزجاجة البيسبي وزجاجة الزيت أغلى من مثيلتها في السعودية وقطر والامارات

- ايه يعني العشر بيضات ب 7 جنيه

- ايه يعني لو قررت تكون محترم واخذت تاكسي في مشوار واحد ذهاب فقط تدفع 25 او 30 جنيه

-يه المشكلة لمايكون هناك قرار غبي بقطع الكهرباء عن مناطق القاهرة بالتتابع لفترات مختلفة وفي اوقات غير معلنةه

- ايه المشكلة يعني علشان نوفر شوية كهرباء نقطع التيار فجأة ومفيش مشكلة في واحد راكب اسانسير يفضل محبوس نصف ساعة لحد ما الكهرباء تيجي

- ولا ايه المشكلة لما المكيفات تتحرق ما في ستين داهية المهم الناس توصل لمرحلة شد الشعر و تقرر الانتحار

- لكن المشكلة ان احنا شعب فراعنة ولاد....ستين..... مفيش فايدة فينا ابدا لما لقينا اللحمة غليت وقررنا الاتجاه للبروتين النباتي مثل الفول ، وارتفعت اسعار الفول ايضا بجنون ..ولا في فايدة ..شعب عديم الاحساس ,,,,ونطلع لسانا للحكومة ونقولهم والله لو....قررتم ان كل مواطن ينزل من بيتهم ياخذ على قفاه قبل الذهاب لمشواره مع دفع 10 جنيه للعسكري القائم على عملية الضرب على القفا ( دمغة وضريبة ضرب على القفا ) وقلنا والله لو عملتم اكثر من كده مفيش فايدة ....عايشين ومبسوطين ,,,,وكل ما يهمنا هو جدو هيلعب للاهلي ولا الزمالك ، واهم حاجة ان الاهلي يفوز بكل البطولات الموجودة في الكون ، وان كل ما نتمناه ان الله لا يحرمنا من الأغاني الرائعة التي نسمعها في الميكروباصات والتكسيات من روائع سعد الصغير ، ولا يحرمنا من مشاهدة غادة عبد الرازق ومن قنوات المسلسلات والأغاني ، ومن الموبايل الذي لا نستطيع الحياة بدونه والمصيبة ان احنا بنفتري على بعض ونغلي الاسعار على بعض في حاجات كتير لمجرد الجشع يعني برده هناك عيب فينا بصرف النظر عن الحكومة ، مش باقول لكم شعب مفتري ....

حتى لما لقيناكم بتطلعوا همومكم في موقع محاورات المصريين ومبسوطين قولنا ننكد عليكم ونعمل لكم واجهة جديدة للمنتدى وتصميم سخيف ومنعنا عنكم البانر المتحرك ، واقعد ياعم دور على المواضيع الجديدة وعلى اخر المشاركات ، ولخبطنا لكم الدنيا ( قال ايه تطوير ومسيرك تتعود زي ما تعودت على السحابة السودا)

ما علينا

(((( وسؤال الحلقة كيف يعيش موظفي الحكومة برواتب متوسطها 500 الى 600 جنيه في ظل اسعار سلع أغلى من أي دولة خليجية ))) واللي عاوز امثلة لهذه الاسعار....يتصل علي 0900 على هذه الصفحة وسأجيبه عليها

تم تعديل 9 أغسطس 2010 بواسطة Abu Reem

[pocy]

اخى الفاضل تعبت نفسيا من كلامك بعد ان كنت ساخد قرار فى القريب العاجل وهو الرجوع الى وطنى الحبيب مصر لعده اسباب كتير افاجى بكلام حضرتك اللى يخلى الواحد يراجع نفسه عشرين الف مره قبل ما ييرجع مصر

وكل اللى اقدر اقوله حسبي الله ونعم الوكيل واللى عند ربنا مبيروحش بجد كلامك تعبنى ماديا ومعنويا ومن وجه اخرى

وبجد لى عوده بس بعد ما اهدى شويه ن الكلام اللى قريته

سلام مؤقت

[شريف مان]

دا العااااادى

ابتسم انت فى مصر

:ninja:

تم تعديل 9 أغسطس 2010 بواسطة شريف مان

[جسار]

يقال والعهدة على الراوى أن هذا السؤال طرح على مجموعة

من الخبراء الاجانب فى بداية الثمانينات بعد أن أتوا الى مصر لدراسة أحوال سكانها ونمط معيشتهم

وقد أصابتهم الفهشة عندما علموا بمتوسط دخل الاسر الفقيرة والمتوسطة فى مصر وتدنيه عن كل خطوط

الفقر العالمية والكونية ، ولكن أنماط الاستهلاك والمعيشة والدروس الخصوصية لاتدل مطلقا على فقر

وضنك هذه الطبقات المسحوقة ، ويقال أيضا على سبيل الضحك أن الكومبيوتر بتاعهم أتحرق ، لما حاولوا

الحصول على أجابة لهذه الاسئلة ، ومنها كيف لموظفة مؤهلها متوسط وتقبض راتبا بعد خدمة 30 سنة فى

الحكومة حوالى 700 جنيه شاملا الحوافز ، أن تصرف 650 جنيه دروس خصوصية على واحد من أبنائها الاربعة

اللى برضه فى التعليم وبرضه بياخدوا دروس بس أقل شوية من أخوهم اللى فى الثانوية العامة،أنا عن

نفسى بأفكر فى أجابة هذا السؤال من ثلاثة عقود مضت ، وأخيرا أهتديت أو كما أعتقد لحل هذا اللغز

أولا : لابد لنا كمثقفين أو كما ندعى ، أن نعلم ماهى خصوصية الشعب المصرى مقارنة بغيره عن بقية

شعوب المنطقة على الاقل ، نحن نتاج مؤثرات حضارية متراكمة ومختزنة داخل الوعى الشعبى الجموعى

من أيام أجدادنا الفراعنة وماتلاهم من فرس وأغريق (300 عام ) ورومان (700 عام ) وعرب ومماليك ،

وأتراك ( حوالى 400 عام ) وحملة فرنسية (3 اعوام ) وأنجليز (70 عام ) ، كل هذه التداخلات أثرت

وتركت شيئا فى الوعى المصرى ، والاهم بالنسبة للفلاح المصرى ليس جنسية أو نوع السلطة الحاكمة

بل هو ما ستأخذه تلك السلطة من محصوله وغلاله ومواشيه ومقدار الاتاوة أو الضريبة التى سيقدمها

للسادة الحكام فى العاصمة المركزية( منف ، الفسطاط ، القطائع ، القاهرة ) ، ولذا تسلح الفلاح

بذخيرة من الخبرات التاريخيةمدعمة بالامثال والحكم الشعبية والحكايات والاساطير ، وكل هذا يلهمه

ويزوده بالوسائل التى تجعله يأمن شر السلطة وتتيح له كيفية الالتفاف والدوران حول القرارات

والاوامر والقوانين التى هى دائما ضد مصلحته هو وأبناؤه وأقرانه من سكان القرى ، ولذا نجد مايسمى

بطباع الفلاحين : اللؤم والخبث والمداراة والخوف من الحسد والفصال والتقشف فى المعيشة ..الخ

ولكن لن تسمع عن ثورات الفلاحين الا فيما ندر ... نحن لدينا خاصية فريدة الا وهى عدم المواجهة

أو التصدى ، هل رأيت مجموعة من البشر يتظاهرون فى مصر ضد أى قانون يمس حياتهم أو ضد أى نوع من

الضرائب والاتاوات التى تفرضها السلطات المتعاقبة والاجابة لأ بالطبع ، لاننا نملك الحل السحرى

المختزن بداخلنا الموروث ، وهو خلى السلطة تعمل اللى هى عايزاه وأحنا نعمل اللى أحناعايزينه

وذلك دون مواجهة وضرب وأعتقالات وغيره ، يعنى ممنوع المبانى على الارض الزراعية ، يقوم الفلاح ببناء

زريبة للمواشى داخل الغيط بتاعه ، ويبنها بطوب ومن غير أسمنت وتمر الايام ويصبح وجودها طبيعى للكل

ثم يأتى ليلا ويبنيها من الداخل دورا واحدا وعندما يحرر ضده محضر للبناء فى أرض زراعية يقوم رامى

شوية تراب على المبانى لتظهر وكأنها مبانى قديمة وينتظر الانتخابات وبتوع الحزب الوطنى يلغوا الغرامة

أو يتم تخفيضها، وكذلك يتم فى الاحياء الشعبية ، الواحد اللى عايز يهد بيته القديم يرح يجيب حتة خيمة

أو ستارة من بتاع الفراشة ، وجواها يهد ويبنى من جديد ومن الاساس من تحت البيت علشان مايطلعش تراخيص

هدد او تراخيص مبانى ، .... يعنى خلاصته عارفين القرد والقرداتى آهو أحنا عاملين زى كده.

ثانيا : بالنسبة لواجهة أعباء المعيشة أوجد المصريون أختراع أسمه الجمعيات وتأخذ أشكالا عديدة منها

جمعيات لجهاز وزواج الاولاد ، وجمعيات أقل للدروس الخصوصية ، وأقل للمصايف ...الخ

كما أن الفساد والافساد أستشرى فى البلاد ومفيش مانع من تلقى بعض الرشاوى وربنا غفور رحيم وهو

أعلم بالحال وبعدين دى مش رشوة ده رزق أولادنابعتوا لنا ربنا وأحنا ما قلناش ليهم أدونا فلوس

وبعدين أحنا لو عاملناهم بالقوانين واللوائح كان أتخرب بيتهم .... وهكذا من عشرات المبررات

والفتاوى لتمرير هذا الشئ داخل ضمائرنا علشان تهدى وتستريح ونقدر نكمل حياتنا بدون تأنيب للضمير

كما توجد لدينا بعض من أشكال الرحمة والتآخى والتكافل الاجتماعى مازالت موجودة وأن كانت لاتغطى

أحتياجات الفقراء بشكل كافى الا أن وجودها يدل على أنه مازال الخير موجودا فى أمة الاسلام والسلام .

[Abu Reem]

اخى الفاضل تعبت نفسيا من كلامك بعد ان كنت ساخد قرار فى القريب العاجل وهو الرجوع الى وطنى الحبيب مصر لعده اسباب كتير افاجى بكلام حضرتك اللى يخلى الواحد يراجع نفسه عشرين الف مره قبل ما ييرجع مصر

وكل اللى اقدر اقوله حسبي الله ونعم الوكيل واللى عند ربنا مبيروحش بجد كلامك تعبنى ماديا ومعنويا ومن وجه اخرى

وبجد لى عوده بس بعد ما اهدى شويه ن الكلام اللى قريته

سلام مؤقت

معلش يا اختي الفاضلة ،،،

أعمل ايه بس ، أنا اللي عايش فترة طويلة في الخليج لما بنزل اجازة ، باتفاجأ بالأسعار ، وبعمل الف حساب قبل لما اشتري حاجة ، مع اني ميسور الحال ولله الحمد ،،

وبيبقى نفسي امشي في الشارع أخذ الغلابة في حضني واوزع كل الفلوس اللي معايا عليهم ،،،

ومع هذا الغلاء الفظيع...عادي جدا كما قال أخونا شريف مان في مداخلته السابقة ، ولا كأن فيه حاجة ،

ايه يعني اللحمة بقت ب 60 جنية الكيلو....مفيش مشكلة .....نفسي اعرف الناس بتطبع الفلوس في البيت ....

والشوارع تجدي كل السائقين مستعجلين وبانبهر وانا باشوف كيف ان السيارات تكاد لا تترك مسافة لشعرة بين كل سيارة والاخرى والغريب لا تجدي اي حوادث احتكاك بين السيارات .....فعلا شعب جبار....

سامحيني ان كان كلامي ضايقك ، بس اوعي تفكري الان في النزول النهائي لمصر....معلش استحملي شوية لحد ما تفرج..

والغريب ان ( قارورة المياه الكبيرة ) ب 20 جنيه يعني اغلى من اي بلد في الخليج..والأرز والزيت واللحم والدجاج ....طيب ازاي

تكون السلع هنا اغلى من مثيلاتها في دول الخليج والناس هنا مرتباتها اقل بكثير....نفس اعرف إزاي....

- البلد عاوزة تتغسل ونصف أحياء مصر عاوز يتنسف نسف

- والمدهش الاعلانات في مصر عن الجمعات السكنية والكمباوندز ، والشاليهات اللي معظمها في الصحراء واقل شقة بنصف مليون ،،، والغريب تسألي عن شقة يقول لك مفيش الا شقتين واحدة ارضي والتانية في الدور الاخير مش عارف ايه الحكاية دي وكأنهم متفقين...متى بيعت هذه الشقق رغم ان الاعلان لسه نازل واول مرة تسمعى عن هذا المشروع ، ومع ذلك تجدي كل الشقق مباعة؟؟؟ عجائب .....

فعلا شعب جبار....مع هذا الغلاء تجدي الكل بيسأل عن الاراضي والشقق واحدث انواع الموبايل....طب ازاي بس ؟؟؟؟؟

تم تعديل 9 أغسطس 2010 بواسطة Abu Reem

[ozoozo]

تصحيح بالنسبه للفرخه ام 30 جنيه

الفرخه المشويه دلوقتي وصلت من 50 الي 60 جنيه

ماكانش ممكن اتصور انحنا نوصل لعصر الفرخه فيه بخمسين جنيه ........يانهار فوحلوقي :blink:

والكيلووصل 25 جنيه يعني فرخه بيضاء اتنين كيلوا من اللي بياكلوها الغلابه عشان يشموا ريحه الزفر بقت بخمسين جنيه

تم تعديل 9 أغسطس 2010 بواسطة ozoozo

[Abu Reem]

كما أن الفساد والافساد أستشرى فى البلاد ومفيش مانع من تلقى بعض الرشاوى وربنا غفور رحيم وهو

أعلم بالحال وبعدين دى مش رشوة ده رزق أولادنابعتوا لنا ربنا وأحنا ما قلناش ليهم أدونا فلوس

وبعدين أحنا لو عاملناهم بالقوانين واللوائح كان أتخرب بيتهم .... وهكذا من عشرات المبررات

والفتاوى لتمرير هذا الشئ داخل ضمائرنا علشان تهدى وتستريح ونقدر نكمل حياتنا بدون تأنيب للضمير

اقتبست من كلامك هذا الجزء اخي ( جسار) وبالفعل هناك تحايلات كثيرة وأهم شيء ذكرته انت موضوع الرشاوي

الناس عادي جدا ...الموظف من دول تلاقيه اول ما يسمع الاذان يجري يصلي ، وبعدين يرجع لشغله وتلاقي عادي جدا لما يمشي مصلحة من يدفع له الرشوة او الشاي اولا ويترك الباقين...

او التاجر اللي عارف انه بيبيع الاغذية المغشوشة او المستوردة من جهات الله اعلم بيها وعارف انها زبالة الاطعمة ومع ذلك أهم حاجة عنده يبيع ومش مهم من غشنا فليس منا.

- من فينا لو حب يبيع سيارته مثلا سيحرص على ذكر كل عيوبها للمشتري ، كلنا نشترك في هذا الخطأ ولما نبيع شيء نقول عنه انه زي الفل وليس فيه اي شيء وهو مليء بالعيوب...والحجة الجاهزة ..هو احنا اللي هنصلح الكون...

.....كلنا نأكل الحرام بطريقة او بأخرى....أو خليني اقول 90 % منا يأكل الحرام...وهو لايدري ..والامثلة كثيرة..المدرس والطبيب والموظف الذي يعمل في مصلحة تتعامل مع الجماهير والتاجر والمحامي...والصنايعي...معظمنا يأكل الحرام...وهو لايدري..واستطيع ضرب امثلة...لكل هؤلاء...وابسط مثال المدرس الذي لا يهتم بجميع التلاميد كما يهتم بالتلميذ الذي يأخذ درس....

وكفاية كده دلوقتي......

[Abu Reem]

---مكرر

تم تعديل 9 أغسطس 2010 بواسطة Abu Reem

[Howayda Ismail]

طبعا كل ده لازم يحصل واكثر من كده دى سياسة دولة لانها تركت السوق مفتوحة وشالت ايدها من كل حاجة من اول رفض

تسعيرة جبرية على الاسعار او مراقبة الاسواق او محاكمة محتكرى المواد الغذائية اللى بيتسببوا فى هذا الغلاء

لى الاطعمة الفاسدة المنتشرة الى لحوم الديدان الغير صالحة للاستهلاك الادمى والسبب معروف عشان الشعب يظل يلهث

وراء لقمة عيشه ومايقدرش يفكر فى حاجة تانية غير سد جوعه وجوع اولاده معناه ايه ان الدولة تتخلى عن الشعب فى

توفير سلع ضرورية للمواطن باسعار معقولة حتى سلع الفقراء طالهم العجز فى شراءها مثل العدس والفول حتى المش

بقى ب20 جنيه الكيلو الحزن انك مش عاجز تشترى بالاسعار دى لكن الحزن انك مش قادر تشترى من نظرة اللى حواليك

ازاى يجيلك قلب تجيب فاكهة وناس مش قادرة تشترى كيلو خضار واقفة جنبك والله ساعات باشترى وانا خجلانة

وزى ماحضرتك بتقول بتبقى عاوز توزع الفلوس اللى معاك على الناس لكن للاسف الناس العفيفة بترفض تاخد اى فلوس

او اى مساعدة فى حين ناس تانية مهنتها التسول بتمد ايدها رغم انك لو فتشتها حتلاقى معاها اكتر منك.

سلبية المحليات والتموين اللى انشغلوا بالرشاوى هى السبب فى جشع التجار لو فى محاسبة وسجن ومنع احتكار

وتخزين السلع حتى لو وصل الامر لاحكام عسكرية وطوارئ لان ده شئ اصبح يمس امن البلدالميزان حيتعدل

ويتمكن المواطن الغلبان يعيش والغنى يبقى فى امان لكننننننننننن فتش عن السبببببببب!

[ابو محمد بن مصطفي]

اشتباكات بين الأمن والمواطنين فى طوابير «شنطة رمضان» بالدقهلية.. وسقوط 18 مصاباً بسبب الحر والزحام

تزاحم نحو 6 آلاف مواطن داخل وخارج استاد المنصورة، منذ صباح أمس، فى انتظار تسلم شنطة رمضان التى توزعها المحافظة على المحتاجين، وسقط نحو 10 أشخاص مغشياً عليهم من شدة الحرارة، بينما أصيب 5 آخرون بسحجات وكدمات نتيجة التدافع والزحام، ونقلت سيارات الإسعاف 3 سيدات ورجلاً إلى مستشفى المنصورة الدولى لتلقى العلاج إثر إصابتهم بهبوط حاد فى الدورة الدموية،

وفى السياق نفسه نشبت اشتباكات بين الأمن والمواطنين أثناء محاولة التنظيم ومنع المواطنين من اختراق البوابات، وقال شهود عيان إن أحد أفراد قوات الأمن تعدى على المواطنين بالضرب لمنعهم من دخول الاستاد.

وقالت أم محمد السيد، من المستحقات للشنط: «الحكومة بتذلنا كل سنة، ونقف من الساعة 6 صباحاً حتى 5 عصراً فى عز الحر علشان ناخد شنطة رمضان وكل اللى فيها «كيس سكر وكيس أرز وكيس مكرونة وزجاجة زيت وكيلو بلح ونصف كيلو زبيب». وقال محمد الوكيل: «الحكومة كانت الأول بتوزع الشنط دى على مكاتب الشؤون الاجتماعية فى كل مركز ونروح ناخدها منها بكرامتنا لكن منذ 3 سنوات قامت المحافظة بتجميع التوزيع فى الاستاد علشان ناخد جزء من حقوقنا عندها».

وقالت علياء سليمان: «أنا أرملة وعندى 4 أولاد وأحصل على معاش من الشؤون الاجتماعية حوالى 100 جنيه وواقفة من الساعة 6 الصبح علشان آخد الشنطة أفرح بيها العيال لأنى ماباقدرش أشترى حاجات رمضان ولولا أهل الخير كنا شحتنا»، وفى محاولة لمنع الزحام أمر اللواء سمير سلام، محافظ الدقهلية، بفتح بوابات الاستاد لجميع المواطنين للدخول وانتظار موعد التوزيع الذى بدأ فى الثانية عشرة ظهراً.

المصري اليوم

هذا هو حال الشعب مع الحكومة النظيفية ربنا يلطف بينا.

اما عن فلتان الاسعار في مصر فأنت مطالب بدفع اي زيادة تحدث في اي سلعة من جيبك حتي لو لم تكن تستعمل السلعة التي رفع سعرها

فمثلا انا مش مدخن والحمد لله .... لما الحكومة تيجي ترفع اسعار السجاير تلاقي اسعار الفاكهة والخضار تزيد وتسأل الباشا البياع

يقولك اييييييييييييييييييه انت مش عايش في الدنيا السجاير غليت .... لا ياسيدي انا عايش في الاخرة.

طبعا سمعنا عن ازمة القمح الروسي ورئيس الفاو قال ان اسعار القمح لن تتأثر عالميا

والحكومة تقول ان المخزون يكفي اربعة اشهر

طب والله العظيم الدقيق امبارح زاد نصف جنية في الكليو ......وحسبنا الله ونعم الوكيل

[شريف مان]

اكتر حاجة تجنن فى البلد دى

لما يزودوا الضرائب على شركات الاسمنت او الحديد او السجائر

تلاقى تانى يوم اسعار منتجات الشركات دى زادت

يعنى المفروض الشركة هيا اللى تدفع الضرائب

لا دا احنا اللى ندفع الضرائب

ابتسم انت فى مصر

[Howayda Ismail]

اكتر حاجة تجنن فى البلد دى

لما يزودوا الضرائب على شركات الاسمنت او الحديد او السجائر

تلاقى تانى يوم اسعار منتجات الشركات دى زادت

يعنى المفروض الشركة هيا اللى تدفع الضرائب

لا دا احنا اللى ندفع الضرائب

ابتسم انت فى مصر

لان للاسف معظم الشركات دى شركات استثمار او خصخصة يعنى هدفها من الاول الربح ثم الربح ثم الربح

والدولة بتشجع الاستثمار يعنى مثلا شركات الاسمنت اتباعت باقل من ثمن المعارض والاراضى المملوكة

للشركة وثانيا اعفاء ضريبى لعدة سنوات و كهرباء وطاقة مدعومة تشجيعا للاستثمار والخيبة التقيلة المادة الخام

اللى بيخدوها ببلاش من المحاجر اللى خدوها كادوه فوق البيعة وطبعا لايوجد سقف اسعار عندنا ومنع تفعيل

قانون الاحتكار وتفعيل قانون الاغراق لمنع الاستيراد جعل اصحاب هذه الشركات خصوصا حديدعز واجانب الاسمنت

يتحكموا فى الاسواق والاسعار واى ضريبة تتحمل على المنتج وليس الشركة وبالتالى المواطن الغلبان يتحمل

الضريبة والمليارات تتكدس وتتهرب على الخارج ولاعزاء للشعب

[doha]

بوسي وابو ريم على وجه الخصوص وكل المتابعين على وجه العموم ..

الصورة في مصر قاتمه وسوداء بس مش للدرجه دي ابدا .. سوداء زي ليل ظلام آه لكن ممكن السهر فيه وممكن تحمله وممكن تخيل وجود فجر قد يظهر بعده..

عادي جدا..

انا في مصر بقالي كام شهر .. رجعت نهائي طبعا .. شايفه كل الاسعار الي بتقولوا عليها دي وشايفه الفرق مابين هنا وهناك بس في نفس الوقت مش خايفه اوي كده زيكم ولا مرعوبه من الحال زي مابيحصل لكل العائدين او بمعنى ادق من يفكرون بالعوده ..

الفكرة ببساطه ان الناس في الخليج استثناء من القاعده المطبقة على كل البشر وهي على قدر ماتعمل على قدر ماتكسب على قدر ماتستمتع . في الخليج طبيعي جدا انك تلاقي واحد مبيعملش حاجه ودخله عالي جدا بما يمكنه من اقتناء كل الرفاهيات سواء كان محتاجها فعلا او شاريها لمجرد انها تباع .. في العالم كله مفيش الكلام ده .. امريكا واوروبا وكندا وغيرها كلهم عايشين مرفهين عشان بيشتغلوا بجد .. ولو بصيتم لنمط حياة اي واحد غربي هتلاقي ملابسه الطبيعيه هي الجينز والتيشيرت واكله العادي محسوب بالملعقة مفيش حاجه اسمها ضيف يجي فجاه وتتعمل له مائده او ركوب تاكسي والميترو موجود .. الدنيا في العالم كله منظمه وكل واحد عارف يجيب فلوسه ازاي ويصرفها فين .. الا في الخليج ..

للاسف الشديد احنا ـ تربية الخليج ـ ومن يعمل فيه بقاله فترة تعودنا على الوضع العكسي وهو ان كل الرفاهيات لازم تشترى وكلها لازم يتم تجربته وان الكل يستحق ان يعيش في بحبوحه مثل الكل . طبعا لما بنيجي مصر بننصدم بمنطق الاشياء الي لم نتعود عليه وهو طالما ان الشعب المصري لايعمل ولا ينتج فطبيعي جدا ان تكون دي عيشته .. على فكره في ناس في مصر شغاله 12 ساعه في اليوم وفي بيشتغلوا اكتر .. وفي من الناس دي نسبه مش بطاله ابدا بتكسب كويس اوي وبيحوشوا ويشتروا عقارات كمان .. في ناس في مصر لا طلعت برا ولا تغربت ولا ورثت ولا باعت ومع ذلك بتشتري عربيات وبتدخل عيالها مدارس خاصه وجامعات كمان .. وفي ناس تانيه مش لاقيه شغل او بتشتغل انها متشتغلش دول طبيعي جدا ان دخلهم ميكفيش اي حاجه في اي حاجه لانهم اصلا بياخذوا الدخل ده وهم مبيعملوش حاجه ..

عادي ..

في ناس كتير عايشه في مصر كويس وممكن جدا اي مغترب يرجع ويعيش كويس زي الناس دي ماهي عايشه ..

بالمناسبة في حياتي كلها لم اركب اوتوبيس نقل جماعي في مصر غير مرتين اتنين وكانوا في الاسكندرية .. من شهر قررت اني ابطل تاكسيات ( ام اثنين جنيه ) واركب ميكروباص .. اكتشفت ان سعر الميكروباص 35 قرش بس وساعات 30 كمان .. يعني المشوار رايح جاي بعد ماكان بيكلفني من اربعه الى خمسة جنيه اصبح يادوب جنيه الا ربع .. اكتشفت ان الميكروباص مفيهوش مشكلة قاعده على كرسي مرتاحه الناس بتوسع لي وبتراعي تماما لو الي راكبه دي ست او راجل فمفيش تلاصق ولا زحام ولا شيء .. بعد ماكنت بركب سيارة خاصه وتاكسيات اصبحت بركب ميكروباصات ومش حاسه بجد باي فرق .. بجد وانا راكبه الميكروباص بستمتع بقيادته المتهورة وبستنشق هواء مصر المنعش ( الي بجد منعش مش بتريقة او استهبال ) بحمد ربنا وبقول بلدنا حلوة بس احنا الي حظنا وحش ..

لما بقالي فترة بركب ميكروباص بقيت بستغرب نفسي اوي انا زمان كنت بركب تاكسيات ليه وفي ميكروباص بيروح ويجي من قدام البيت ؟؟ مئات الجنيهات كنت بصرفها كل شهر وكان ممكن جدا توفيرها وتلاقيني طول الفترة دي كنت مستغربة ياترى الناس في مصر عايشه ازاي .. ومقضيها رواتبها الصغيره كييف ؟

لما تعيش في مصر هتعرف توفر توفير اهل مصر ..

ده من جهة ومن جهة ثانية فالاسعار مرتفعه واحنا هنا مطحونين بس خلي بالك احنا مبنشتغلش واحد على عشرة من الي كنا بنشتغله في السعوديه ولا بنشوف واحد على خمسين من البهدلة والطحن الي كنا بنشوفها هناك فكرامه ان دخلنا مش بيقدر بنفس النسب ..

احنا في مصر .. لسه عايشين .. ولسه باذن الله هنعيش .. حتى اشعار آخر ..

[Abu Reem]

بوسي وابو ريم على وجه الخصوص وكل المتابعين على وجه العموم ..

الصورة في مصر قاتمه وسوداء بس مش للدرجه دي ابدا .. سوداء زي ليل ظلام آه لكن ممكن السهر فيه وممكن تحمله وممكن تخيل وجود فجر قد يظهر بعده..

عادي جدا..

انا في مصر بقالي كام شهر .. رجعت نهائي طبعا .. شايفه كل الاسعار الي بتقولوا عليها دي وشايفه الفرق مابين هنا وهناك بس في نفس الوقت مش خايفه اوي كده زيكم ولا مرعوبه من الحال زي مابيحصل لكل العائدين او بمعنى ادق من يفكرون بالعوده ..

في ناس كتير عايشه في مصر كويس وممكن جدا اي مغترب يرجع ويعيش كويس زي الناس دي ماهي عايشه ..

لما تعيش في مصر هتعرف توفر توفير اهل مصر ..

ده من جهة ومن جهة ثانية فالاسعار مرتفعه واحنا هنا مطحونين بس خلي بالك احنا مبنشتغلش واحد على عشرة من الي كنا بنشتغله في السعوديه ولا بنشوف واحد على خمسين من البهدلة والطحن الي كنا بنشوفها هناك فكرامه ان دخلنا مش بيقدر بنفس النسب ..

احنا في مصر .. لسه عايشين .. ولسه باذن الله هنعيش .. حتى اشعار آخر ..

عارفة يامدام ضحى ايه الفرق بين اللي انا كتبته وبين اللي انت كتبتيه ...الفرق هو اني لا اقيس الحالة في مصر بناءا على وضعي انا واحساسي انا ، انما أقيس الاوضاع بناءا على الطبقة الفقيرة العريضة التي تملا شوارع مصر....

طبعا لا اختلف معك في ان من ينزل من الخليج سيتأقلم وقد يجد السعادة في بعض الاشياء التي افتقدها كالاستمتاع بركوب الميكروباص ولكن يامادام ضحى هناك فرق كبير في الأتي:

- من يركب الميكروباص بصفة يومية لذهابة الى عمله والرجوع منه في اوقات الذروة وفي الحر وبين من يركبه في مشاوير غير منتظمة وبصفة يومية وايضا الفرق بين من يكون خياره الوحيد هو الميكروباص وبين من يملك خيار اخر...هذا اذا كان الميكروباص يدخل كل الشوارع.

- فرق كبير بين انني اعيش عيشة الناس البسطاء وأنا أمنت مستقبلي بعد سنين عديدة اقضيها في الغربة وبين من يعيش هذه العيشة مضطرا ولا بديل عنها.

- أيضا فرق كبير بين من يعيش في هذا الغلاء وهذا الزحام وهذه المشاكل اليومية وهو في بداية حياته مطالب بشراءشقة للزواج وتجهيزها وتأثيثها في ظل هذه المرتبات وبين من اختصر الطريق في الغربة وما يحوشه في سنة قد لا يتسطيع تحويشة من في الداخل.

- طبعا هناك ملايين تعيش مرتاحة وتأخذ مرتبات جيدة ويشترون الأراضي والشقق وهم يعملون داخل مصر ولكن الاغلبية لا يعيشون هذه الحياة ...وكما تعلمي ان الطبقة المتوسط وهي الاكثر اتساعا في مصر تلاشت تقريبا وهي الأغلبية التي أتكل عنها.

- كيف تتغلبين يا مدام ضحى وانت داخل مصر على مشكلة الهواء الملوث والسحابة السوداء التي تستمر اكثر من شهر وتؤثر علينا جميعا ،، كيف ترين ان هذا الامر يمكن التغلب عليه والسعادة في وجوده ، وايضا المياه الملوثة والشوارع المليئة بالزبالة واظنك لو قارنت نظافة الشوارع من 20 سنة مثلا وبين الان لوجدت ان الوضع اصبح مزري.

- كيف يمكن ان استمتع وانا اخاف أن يوقفني شرطي لاي سبب من الاسباب اوضابط مرور ولا اخشى من اي تجاوز كما يحدث دائما

- حضرتك كيف تشعرين بالسعادة وانت تعرفي وتدركي ان نسبة المعدومين اصبحت رهيبة واظن بعض الاخوة هنا وضعوا صور للفقراء الذين يتم توزيع شنطة رمضان عليهم في ملعب للكرة ووصل عددهم بالالاف وذلك في منطقة واحدة فقط...

كيف اشعر بالسعادة وسط كل هذه الاشياء....أما لو نظرت الى نفسي او معيشتي الخاصة بصفة شخصية فقد اشعر بأن المسألة بسيطة كما رأيتها حضرتك....

معلش يا مدام ضحى أنا عارف انك دائما لا تحبي التشاؤم وتحاولي دائما النظر للامور ببساطة وهذا شيء جيد جدا ، وكلامي هذا ليس انتقاد لكلامك...لكن والله أنا اشعر بالخوف والرعب...رغم اني ولله الحمد ،، لا أخاف ابدا من المسائل المادية ولكن....بأشفق كثيرا على أهل مصر

....

تم تعديل 9 أغسطس 2010 بواسطة Abu Reem

[HanaaOsama]

من الحاجات الي غليت السنه ديه كمان غير اللحمه و الفراخ

هي الفاكهه

مش عارفه ايه الي حصل عشان الاسعار تبقي اكتر من الضعف عن الصيف الي فات

التين ب 8 جنيه و ب 10 جنيه

الكمثري ب 10 جنيه

العنب العادي الاصفر او الاحمر ب 7 جنيه و ممكن يوصل ل 10 جنيه

الجوافه ب 5 جنيه

البرقوق ب 15 جنيه

الاسعار ديه من سوق عادي مش محل فكاهاني نضيف

حاجه غريبه جدا

امبارح جبت 3 انواع فاكهه ب 70 جنيه !

[Abu Reem]

مش عارفه ايه الي حصل عشان الاسعار تبقي اكتر من الضعف عن الصيف الي فات

التين ب 8 جنيه و ب 10 جنيه

الكمثري ب 10 جنيه

العنب العادي الاصفر او الاحمر ب 7 جنيه و ممكن يوصل ل 10 جنيه

الجوافه ب 5 جنيه

البرقوق ب 15 جنيه

ما هو السؤال اللي محيرني ، ازاي لو واحد مرتبه 600 ج مثلا ازاي يقدر يكمل الشهر بهذا المبلغ وهذا وضع ناس كتير جدا في مصر مع ان هناك الكثير ايضا يعيشون بأقل من هذا المبلغ

- وطبعا لو موظف عادي ياخذ مثل هذا المرتب كيف يعيش مع العلم ان هناك على الاقل 200 ج فواتير مختلفة هيدفعها وعلى الاقل 100 ج مواصلات لو بيركب اتوبيسات وميكروباصات

ازاي بقى يعيش بالباقي...