وماذا بعد نتيجة مكتب جامكا غير لائق طبيا

[ابن مالك]

اخوانى المصريين بالخارج والداخل ماذا يفعل بنا مكتب جامكا والمستشفيات احل احكى موضوعى وارجو من كل من يقراءه الافادة

عملت تحاليل وزارة الصحة ونجحت والحمد لله لا عندى فيرس ولا شىء خطير حمدت ربنا وجريت على جامكا اللى حولنى لمستشفى اسمها الشروق

روحت عملت كل اللى قالولى عليه وفى ميعاد استلام النتائج قالوا اسفين الاشعة طلعت مش وضاحة ممكن نعملها تانى

يعنى لاتصلوا ولا قلولى المهم روحت عملت اشعة تانى وقلت كل تاخيرة وفيها خير ماشى لحد كدا كويس

وفى المعاد الذى تم تحديدة روحت واستلمت التقارير وقالولى افتحه فى السفارة

وانا ذاهب للسفارة حسيت انى نفسى اشوف النتيجة وانا عارف انى الحمد لله كويس اكتشف انهم كتبين غير لائق طبيا بسبب مشكلة فى الرئة

رجعت المستشفى وطبعا مفيش حد بيسمع ولاحد بيفيدك سيبينك لاشوية موظفين ولاهما دكاترا ولا بيفهموا حاجة

المهم اخير قابلت دكتور وورانى الاشعة وورانى نقطة فى حجم راس الدبوس لونها ابيض فى الرئة قولت انا مش فاهم حاجة قالى دى اسمها عتامة ودى السفارة قالت اللى ذى كده نديله غير لائق

قلت والحل قال تعمل اسعة مقطعية عملت المقطعية ويوم النتيجة روحت هناك لاقيت البنت الموظفة بتقولى الاشعة اكدت الاولى مش هنغير النتيجة هى غير لايق

المهم قابلت الدكتور علشان اعرف راس الدبوس دى ايه

قالى التقريربيقولى ان دى نتيجة التهاب رئوى وانت صغير ومفيش اى تاريح مرضى قولت جميل يعنى انا سليم طيب اعمل ايه قالى انا متعاطف معاك بس مش عارف انت كدا غير لايق روحت جماكا يمكن الاقى عندهم الحل قالولى المستشفى احنا منعرفكش ارجع للمستشفى يشوفوا لك حل والمستشفى قالتلى هى دى نتيجتنا

طيب انا اعمل ايه واروح فين علشان احل مشكلتى بالله عليكم اى يحد يقرا الموضوع يحاول يفيدنى انا حاسس انى ضايع دانا حتى مش بشرب سيجارة اروح فين واجا منين وقول يامين انا بس بقول يارب

[Morial]

ونعم بالله

شوف يا أستاذ مالك

انت ترمي كل الاشاعات والتحاليل اللي عملتها عندهم وعوضك علي الله في اللي لهفوه منك

وتطلع دوغري علي مستشفي الصفا

في المهندسين برده وقريبه من المخروبه اللي اسمها الشروق

وهي لا شروق ولا يحزنون

دي ضلمة كحل

الله لا يكسبهم البُعدا

الا هو ايه مكتب جامكا ده؟

تم تعديل 10 أغسطس 2010 بواسطة Morial

[ابن مالك]

مكتب جامكا دا مكتب بيحول الى المستشفيات لعمل التخاليل المطلوبة للسفر ولا يمكن ان يسافر اى شخص دون تحويل المكتب لمستشفى بعينه ولا تستطيع سيادتك الذهاب للمستشفى بدون ذلك التحويل دى اجراءات جديدة من 1/7/2010

[ابن مالك]

ارجوكوا دلونى ماذا اففعل فرصتى فى السفر هتضيع

[nightmare]

مكتب جامكا ده من زمان .. هوه اللى حولنى علشان الكشف الطبي .. والكلام ده من 2007.

وربنا ييسرلك الحال . ما جربتش تعمل نفسك مش واخد بالك وتروح للمكتب تانى يحولك لأي مستشفي أخري غير الشروق دي , انا كشفت في الصفا اللى في المهندسين .. زي الفل مع انى مدخن.

حاول كده .. وربنا يوقفلك ولاد الحلال . ولو ليك نصيب ورزق في السفر هتسافر , ولو مفيش ما تزعلش ولا تضايق نفسك لاننا ما نعرفش الخير فين. ربنا يوفقك

[عنبو]

فعلا جرب كده روح تانى على جامكا يمكن ربنا ييسيرلك الحال وتتوزع على اى مستشفى تانى

[رعد]

الاخ الفاضل

روح لجمكا تاني واطلب منهم تحويلك علي الصفا او النيل بدراوي بس الصفا احسن وهما هيوافقوا متقلقش ومتعرفش حد قصة الشروق

وربنا معاك وابقي طمنا

انا مش فاهم الناس دي اية

بيعقدوها للي عاوز يسافر ويسيبها لهم لية؟؟

هو انت هتسافر تشتغل طيار ولا كابتن بحري ولا هتدخل كلية الشرطة؟ لازم يفهموا ويسهلوها للناس دا بنجلاديش بتعمل فيش مضروب للمجرمين وتشحنهم علي الخليج من مبدا كدة كدة هما بعاد عن المجتمع وبيجيبوا عملة صعبة انما عندنا ................ لا تعليق

يعني لو الدكتور المحترم لقي حاجة وجاب اشعة قديمة وسفرك كفيلك هيقول له الصفقة اللي جت طلعت مضروبة؟؟

حلية يروح الكلية الحربية والشرطة ويشوف اللي بينجحوا

عرفة ان فية واحد مات وهو بيجري في الكلية الحربية وعرفوا بعد كدة ان كان عندة القلب

وربنا معاك ويوفقك

[DIA ELDIN]

الاخ العزيز ابن مالك

كل عام وانت بخير وربنا ييسر لك الحال

انا مش عاوز احبطك بس الحقيقة طالما انك كشف قبل كدا حتى لو قطعت كل الاوراق اللي معاك وغيرت جواز السفر ورحت من الاول تاني لجامكا فهما هيعرفوا انك كشفت قبل كدا ومن زيادة تعنتهم انهم هيحولوك على المستشفى نفسها اللي عملت فيها الكشف اول مرة

حاول تاني مع الشروق لان هيا اللي معاها الحل اولا واخيرا

وربنايوفقك

[المخنوق دائما]

يااااااااااااااااااااه فكرتنى بأيام الكشف الطبى وتصريح التجنيد وتصريح العمل

الخلاصة بالنسبه لمشكلتك

الحل الأول: تروح مكتب جامكا وتحاول انهم يوزعوك على مستشفى تانية

الحل الثانى: تشوف الفنى بتاع الأشعة فى مستشفى الشروق وتديله اللى فية النصيب عشان يظبتك وتخلى أى حد من اصحابك يعمل الأشعة مكانك

الحل الثالث:تحاول تتكلم مع الدكتور بالمنطق تقوله يعنى انا لو عندى مرض ومش معدى ولا مؤثر على صحتى العامة هل ده سبب كافى إنه يمنعنى من السفر؟؟

وهو لو محترم ممكن يمشى الأمور

وبالتوفيق،،،،

[خالد شحاته]

الاخ الفاضل

السلام عليكم ورحمة الله وبركاته

روح المكتب الا التوكيل عليه واعرض عليه مبلغ 3500 جنيه وهو يعمل لك التاشيره وانت مكتبوب فيها غير لائق من المستشفي اهم شي انك ناحج في الفيرس ومش تتعب نفسك وتريح بالك من الهم ده

[aboueyad alex]

الاخ خالد عاوزين نعرف بس إشمعنا 3500 جنيه للمعلومة ؟؟؟؟

[mogacomedy]

الاخ ابن مالك انا نفس حالتك تماما ولكن مع اختلاف السبب وهوه كسور قديمة عندى التئمت من 3 سنين وانا مهندس يعنى لا هاشيل ولا هاحط

فى هناك دكتور الجراحة اسمه سليمان واضح اوى انه دكتور مرتشى وحرامى وبيعمل كدا مع الناس اللى كانوا بيعانوا حتى ولو من اقل حاجة علشان يقبض منهم انا عن نفسى عملتلوا محضر ودعمته بالمستندات من وزارة الصحة وهاخرب بيته ان شاء الله هوه والمسئول عنه والشروق المخروبة دى كلها اصلا دول بيقولوا انها بتاعت تاجر مخدرات ومتخفى ورا المستشفى دى

وكل المخدرات بتتداول فيها

[خالد شحاته]

الاخ خالد عاوزين نعرف بس إشمعنا 3500 جنيه للمعلومة ؟؟؟؟

الاخ الفاضل

للاسف لان ده السعر الا ماشي لان في المستشفيات الخاصه اي مشكله بيدفع الشخص المبلغ ده لاي مندوب في شركه وبيطلع التاشيره

[ابن مالك]

ياهههههههههههههههههههههههه

انا متشكر جدا من كل الاخوة اللى حاسين بمشكلتى

انا فعلا حاسس ان المستشفى دى فيها حاجة غلط وخصوصا الدكتور سليمان ده يقعد يقولك انا فعلا متعاطف معاك ومش عارف اعمل ايه وحاولت ادفع من ورا بس المشكلة ان التقرير طلع وانا بلغت عنهم فى المكان المسئول عن المستشفيات الخاصة وشكوى مع شكوى يمكن الناس فى البلد تتحرك

دا انا اتصلت بالشركة اللى انا مسافر لهم وقلتلهم قال هو انا عايزك تحارب ايه ده وبعت خطاب بيقول انه موافق على انى اكون تعبان وبخاول مع السفارة ولو ربنا اراض اطفش من البلد هبلغكم على طول وعايز اسئل سئوال مش بيوفروا لنا خياة كريمة ومش عايزينا ندور عليها فى مكان تانى

عايز بس اطمن على الاخ موجا كوميدى عملت ايه فى فرصة السفر

[mogacomedy]

الاخ العزيز ابن مالك انا بعت النهاردة التقرير الطبى ولسه مش عارف هاخد التاشيرة ولا لاء بس يا ريت انت برده تطمنا عليك انت عملت ايه مستنى ردك وبالتوفيق ان شاء الله انا نفسى واللهى تسافر وربنا يوفقك بره البلد دى طالما انت مخنوق منها اوى كدا بالتوفيق ان شاء الله

[ابن مالك]

انا كمان ارسلت التقرير بحالة غير لائق على امل ان يستطيع الكفيل استخراج التاشيرة على ان الموضوع غير مؤثر على رائيه انا مش عايزك تخش الحرب

[mogacomedy]

الاخ العزيز ابن مالك / احب اطمنك انا اخدت التاشيرة الحمد لله من بعد ما بعتلهم نتيجة التحاليل الطبية بيومين تقريباَ لقيتهم بعتينهالى على الايميل يا ربن انت كمان تكون اخدت التاشيرة وحسبى الله ونعم الوكيل فى بتوع مستشفى الشروق ربنا مش هايسبهم ان شاء الله على اللى عملوه فى الواحد

بالتوفيق لك ان شاء الله

[ابن مالك]

انا عد على الميعاد ارسالها اسبوع تقريبا ربنا يسهل وسوف اتصل لكى اطمئن يا ام اه او لا

وربنا يوفقك ياخ موجة وان شاء الله اذا ربنا ارد نتقابل فى السلطنة قريبا

[ابن مالك]

الاخ العزيز موجا كوميدى عايز اطمن انت عملت ايه وايه موضوع التاشيرة الزيارة دى لان الناس قالولى مش هينفع ناخد التاشيرة خالص طالما مكتوب فيها غير لائق يريت تقولى ما سيتم معك بعد ذلك

[mogacomedy]

يا ريت تكون قريت ردى فى موضوع سلطنة عمان يا ابن مالك

وحاول تعرف انت اخدت غير لائق طبيا ليه وهل السبب هايمنعك انك تؤدى شغلك لانى مش عارف هوه شغلك ايه يا ريت ترد عليا