العرقســــــــوس .. شِفا وخمير

[se_ Elsyed]

بمناسبة شهر رمضان بقى والعرقسوس والزبادي والفول وكده ...

عاوز أتكلم عن مشروبي الأول والمُفضل " العرقسوس " مش في رمضان بس .. لكن في أي وقت ...

مش عايز بقى حد يقول لي يااااااي .. ويعععععععع .. ده كفايه ريحته . أنا ميش باخيبو يا أونكل ..

ما بتحبش العرق سوس يبقى ما تدخلش الموضوع داهوت وتقطم فينا وروح الموضوع اللي جنبنا بيقدم هناك كابوشتينو وميلك تشيك ..

وأنا باعترف يا أخواننا إني مدمن عرقسوس .... باموووت فيه ... وبصراحة حاجتين دايماً تلاقيهم عندي لما تفتح التلاجه .. 1- الملوخية ... 2- العرقسوس

باحب العرقسوس عشان الواحد يبعد شوية عن المشروبات الصناعية والغازية أو الأخرى المحتويه على الكافيين ..

ولو إني دي سكة وديكيها سكة تانية ...

لكن في حياتنا اليومية الكافيين شر لابد منه .. والإعتدال حلو برضوا .. ومافيش مانع من فنجانيين قهوة في اليوم على شوبين شاي على جردلين نسكافيه .. مش بأقول لكم الإعتدال حلو

---------

ندخل في المفيد عشان تسلوا صيامكم

دي قدرة العرق سوس على الطريقة السورية

ودول ولاد بلدي والبلدي يوكل

تخيلوا بقى شكله كده وهو لسه نبات ؟

- والعرقسوس نبات ومشروب معروف من قديم الأزل وبيُزرع في الأراضي البرية المحيطة بدول البحر الأبيض المتوسط وخاصة سوريا ومصر وأوروبا ... وأستخدمه الفراعنة في علاج أمراض الكبد والمعدة .. وكمان في تخفيف حدة مرارة الدواء .. عشان سبحان الله هو في سكر طبيعي يعني

المعلومة اللي عرفتها أثناء ما كنت باعد للموضوع ده إنهم وجدوا بعض جذور لنبات العرقسوس في مقبرة الملك العظيم توت عنخ أمون ..... المعلم كان كييف .... الظاهر إني حفيد من أحفاده لأني طالع باحب العرقسوس زيه .... يا حبيبي يا جدو توت ...

وكمان الأطباء العرب عرفوه وأستخدموه وكتبوا عنه ..

بصوا إبن سينا كاتب إيه

ويقول عنه ابن سينا في كتابه القانون " إن عصارته تنفع في الجروح وهو يلين قصبة الرئة وينقيها وينفع الرئة والحلق وينقي الصوت ويسكن العطش وينفع في التهاب المعدة والأمعاء وحرقة البول "

وقال عنه ابن البيطار "

أنفع ما في نبات العرقسوس عصارة أصله وطعم هذه العصارة حلو كحلاوة الأصل مع قبض فيها يسير ولذلك صارت تنفع الخشونة الحادثة في المريء والمثانة وهي تصلح لخشونة قصبة الرئة إذا وضعت تحت اللسان وامتص ماؤها وإذا شربت وافقت التهاب المعدة والأمعاء وأوجاع الصدر وما فيه والكبد والمثانة ووجع الكلى وإذا امتصت قطعت العطش وإذا مضغت وابتلع ماؤها تنفع المعدة والأمعاء كما ينفع كل أمراض الصدر والسعال ويطري ويخرج البلغم ويحل الربـو وأوجاع الكبد والطحال وحرقة البول ويدر الطمث ويعالج البواسير ويصلح الفضلات كلها

من فوائد العرقسوس بقى :

1- يساعد على شفاء قرحة المعدة خلال عدة أشهر.

2- يساعد على ترميم الكبد لإحتوائه على معادن مختلفة.

3- يدر البول.

4- يشفي السعال المزمن باستعماله كثيفا أو محلولاً بالماء الساخن، و لذا يفضل أستعماله ساخناً للوقاية من الرشح و السعال و أثار البرد.

5- يفتح الشهية باستعماله أثناء الطعام .

6- يسهل الهضم باستعماله بعد الطعام .

7- أفضل شراب مرطب للمصابين بمرض السكر لخلوه تماماً من السكر العادي .

8- منشط عام للجسم و مروق للدم

. 9- يفيد في شفاء الروماتيزم لأحتوائه على عناصر فعالة .

10-يحتوي على الكثير من أملاح البوتاسيوم والكالسيوم وهرمونات جنسية ومواد صابونية .

ينصح بعدم الاكثار من شرب العرقسوس للمصابين بارتفاع الضغط

[se_ Elsyed]

قبل ما ينتشر العرقسوس الجاهز بتاع اليومين دول اللي الواحد بينقعه في المياه ويشرب منه على طول بعد ساعه أو أقل كمان ..

لسه فاكر زمان والدي وهو كل يوم بيتفنن في عمايل العرقسوس ..

حاكم الرجالة عندنا في مصر متخصصين في حاجتين في رمضان

1- السلطة

2- العرقسوس

لأن مافيش راجل بيدخل المطبخ عشان ما يعكش الدنيا ويقلب المواعين ( الستات بيقولوا كده علينا دايماً ) ...

السلطة ... والدي كان واخد دكتوراه فيها وعليه اسرار وطريقة في عمايلها تخليك تستعجب وتسيب كل حاجه وتاكل سلطة بس .... الله يرحمه ويحسن إليه ..

العرقسوس .... كانت عملية مرهقة بجد في إعداده ..... فالعرقسوس نبات يُستخدم جذورة بس ...

وبتبقى كده

لكن بيُتطحن ويبقى بودرة خشنه .. لكن مش ناعم زي القرفه مثلاً ..

المهم .. الوالد أنا لسه فاكر كان بيعمل إيه ... بيجيب شوية عرقسوس ... ويحطهم في قطعة شاش قماش .. وينقعهم في قليل من الماء من بالليل مع معلقه من مسحون " بيكربونات الصوديوم " عشان يعطي رغوة وطعم ... ييجي بقى قبل الفطار ويجيب مياه ساقعه .. ويقعد يسكب الماء على الشاشة المحتوية على العرقسوس في إناء ... وياخد المياه دي ويسكب على الشاشة في إناء أخر ... ويكرر العملية دي عدة مرات لحد ما المشروب يبقى لونه غامق ويمتص كل الطعم واللون اللي في مسحوق العرقسوس ويبقى صافي ...

ولتقديم العرقسوس في كاسات .. طقوس خاصة ... مش أدلق في الكوباية وبس ... لأ .. ده أنت لازم ترفع الأناء لفوق " الشفشق يعني " وتدلق في الكوباية عشان يعمل رغاوي في الكوب ... ولازم طبعاً يبقى متلججججججججججججج

دلوقت بقى العملية بقت سهلة .. والعرقسوس بقى جاهز في علب وبيتباع في السوبر ماركت وبداخل العلبة كوب معين عشان تضع فيه المسحوق وتنقعه في الشفشق وولا بيتصفى وولا بتضع على البيكربونات ... واشرب وخلاص .. لكن لذيذ برضوا

ولو إن ناس كتير في مصر مازالت محتفظه بالطقوس دي وبتجيب العرقسوس بتاع زمان وتعمل خطلة المزاج دي بنفسها ..

[hOuSsAm]

يا سلام عليك

فكرتنى بالايام الحلوة وابويا لما كان يجهز العرقسوس قبل الفطار بالشكل والكيفية اللى انت بتقول عليهم وهو متمزج اوى :)

انا بصراحة مكنتش بحبه ولا اشربه ............ بس بعد مقرات كلامك الحلو ده عنه باذن الله فى اول اجازة هخليهم يعملولى تانك طوله 3 متر واوصل خراطيم منه لبقى عالطول:)

اهو اعوض السنين اللى فاتت اللى محاولتش اجربه الا مرة واحدة كان طعمة وحش اوى........... يااااااى ايه البتاع اللى بتشربوه ده

صوما مقبولا وافطارا شهيا باذن الله

[اليوم السابع]

طبعا جيل الايام دى ما يعرفش المشروبات المندثرة دي

بس هو فعلا يبل الريق

كل سنة وانت طيب

[se_ Elsyed]

يا سلام عليك

فكرتنى بالايام الحلوة وابويا لما كان يجهز العرقسوس قبل الفطار بالشكل والكيفية اللى انت بتقول عليهم وهو متمزج اوى :)

انا بصراحة مكنتش بحبه ولا اشربه ............ بس بعد مقرات كلامك الحلو ده عنه باذن الله فى اول اجازة هخليهم يعملولى تانك طوله 3 متر واوصل خراطيم منه لبقى عالطول:)

اهو اعوض السنين اللى فاتت اللى محاولتش اجربه الا مرة واحدة كان طعمة وحش اوى........... يااااااى ايه البتاع اللى بتشربوه ده

صوما مقبولا وافطارا شهيا باذن الله

إنت لسه هاتستني ؟

قوم حالاً روح العُثيم وجيب علبة عرقسوس " رمزي " نوع سوري بس مكتسح الأسواق ... وطريقة عمله سهله قوي .... وسقع واسقيني يا فرج الله

------------

طبعا جيل الايام دى ما يعرفش المشروبات المندثرة دي

بس هو فعلا يبل الريق

كل سنة وانت طيب

كان على أيامنا في حلويات بتتبتاع بطعم العرقسوس أو كانوا بيسموها " رُبسوس "

وأنت طيب يا ريس ...

[Diab]

حد يعرف بيتباع فين في جدة

:blush2:

[hOuSsAm]

كان على أيامنا في حلويات بتتبتاع بطعم العرقسوس أو كانوا بيسموها " رُبسوس "

وأنت طيب يا ريس

الربسوس ده لما نزلت الاجازة دخت عليها فى كل البقالات والمينى ماركت وحتى السوبر وملقتش منها خالص

وحتى هنا فى السعودية مش لاقيه خالص

لاقيته فين ياعم.................. لاقيته فى راس البر........ واشتريت الواحدة بجنيه بعد مكنت بشتريها بعشر قروش.... كانت ايام:)

انا مفيش عندى العثيم فى جدة........ تنفع بندة؟

بس خلى بالك ملييش فى الكيس ابو شاش ده والبل والنقع والقصص دى......... انا تبع جيل التيك اواى يعنى سريع سريع وبلاش تضييع وقت

[مصري أصيل]

العرقسوس ده فيه حاجه غريبه جداً و هيه ان اللي بيحبه بيحبه قوي قوي قوي و اللي بيكرهه بيكرهه قوي قوي قوي مش عارف بجد معاداله صعبة الفهم . طيب اللي بيحبوه و منهم حضرتك مستطعمينه و حبينه و ده معناه ان طعمه حلو و لذيذ و اللي بيكرهوه و منهم أنا الموضوع بالنسبه لهم ممكن توصل انه هيموت من العطش احسن و ما يشربهوش - بجد الموضوع ده محيرني و نفسي الاقي ليه تفسير و نفسي أجربه مره تانيه يمكن نبقي اصحاب بس المشكله اني مش قادر انسي التجربه الأولي لما واحد عزم عليا من اصحابي بيه و انا كنت مفكره خروب لأنه كان جانبه سوبيا و بعد ما أخذت شويه منه و عينك ما تشوف الا النور.

بس لا خلاف انه مفيد جداً صحياً و خصوصاً بعد الشرح اللي حضرتك اتفضلت بيه بس ازاي الواحد ممكن يتقبله وتتحول محاولة التقبل دي الي عشق للعرقسوس كما هو عند الكثيرين مش عارف و لا الموضوع مش كده و ان اللي استطعمه استطعمه من أول مره و اللي كرهه كرهه من اول مره بجد العرقسوس ده لغز لوحده.

[yasser moustafa]

انا ما زلت بحضره بنفس الطريقة اللى شرحها سى السيد

وانا طبعا من عشاقه وبحاول اعود اولادى عليه لفوائدة الكثيرة وكذلك للبعد قليلا عن المشروبات الغازية

[mekkawy]

الله عليك يا كبيرنا يا مهنينا و مشربنا و مشبعنا و مفطرنا

ايه يا باشا العطـــــش ده كله

طب ما زال سؤال أخونا دياب قائم

الواحد يجيب منين في جدة .. أنا بامووووت في العرق سوس .. و عاوز حاجتين بس مش أكتر عشان احس شوية إن فيه رمضان

عاوز أجيب بوظة و عرقسوس و عاوز أجيب فانوس للأوسة ؟؟

مكاوى

[ozoozo]

معرفش ليه بحس يطعم غريب ومختلف في العرقسوس السوري عن العرقسوس المصري

وبحس ان السوري بيجيب مغص مش عارف ليه ....وكنت بعاني منه رمضان اللي قات عشان كده استوعبت الدرس وهاجيب منه وانا جاي من مصر ان شاء الله

للاخوه اللي بيسألوا علي عرقسوس رمزي هاتلاقوه في بنده بس عند قسم العطاره مش علي الرفوف يعني حضرتك تسأل الراجل اللي واقف علي العطاره

[se_ Elsyed]

وانت مغمض .. اي مكان في تجمع مصريين لازم هاتلاقيه بيتباع ... كمان عند محلات العطار ممكن تجيبه سايب وتجيب بيكرونات الصوديوم وتحضروا في المعمل تحت درجة حرارة 150 على مقياس ريختر ..

واظن يا مكتر اماكن المصريين في جده

استوعبوا بقى الدرس بتاع النهاردة عشان بكره هانديها " تمر هندي "

تمررررررررر ولله الأمر

[HanaaOsama]

يا سلام العرق سوس الواحد بستني رمضان عشان العرق سوس

بس علي رأي استاذ " مصري اصيل " ان الي بيجبوه بيجبوه جدا و الي بيكرهوه بيكرهووه جدا و استحاله يستحملوا بق

و طريقه الشاش ديه هي الي لسه شغاله انا لسه مشفتش العرق سوس البودره ده هنا في مصر

[Rock]

كل سنة وانتم طيبين

انا لي سؤال ..هل لازم نغسل العرقسوس في شاشة قبل مايتنقع؟؟؟

انا شايف صراحة انة لازم يتغسل عشان بيبقي معروض في الهوا بس للاسف لما بغسلة بينزل كل لونة و بيبقي بعد كدة المنقوع باهت و طعمة مش قوي

[herohero]

ياسلام عليك يا سي السيد

انا لسه مجرب عرقسوس رمزي السوري كنت جايبه منالتميمي فوجئت بيه بس بصراحه سهل غير نظام اللي الوالده كانت بتعمله شاش وبيكربونات ونقع وحركات

العرقسوس بيقلل احساسك بالعطش فعلا

سؤال ع جنب ل سي السيد

السوبيا ايه نظامها

في ماما نورا ولا فيه سكك تانيه للسوبيا

[pink rose]

اولا كل سنة و انتم طيبين

ورمضان كريم

س س معلش سامحني مضطرة اقولك كلمة واحدة بس في هاذوها الموضوع المفيد

عرق سوس يييييييييععععععع

احب اقولك ما فيش احلى من الكركدية بالتمر الهندي

[Howayda Ismail]

انا لسة جاية من برة جرى على الثلاجة عشان عطشانة والاهم عشان العرقسوس مشروبى المفضل فوجئت بكلامكم عنه

والسبب فى حبى له والدى الله يرحمه كان خبير فى صنعه بطريقة الشاشة ومن صغرى وانا باحبه خصوصا انى اعتزلت

المياه الغازية اللى كنت مدمناها بشكل مرضى وماليش فى الشاى نهائى لكن ساعات قهوة او نسكافيه لكن

قليل افضل حاجة عندى العصائر الطبيعية اللى باعملها فى البيت بالاضافة لعصير القصب والخروب والتمر هندى

لكن زعيم كل ده العرقسوس لكن للا سف ولادى بيكرهوه ويموتوا فى الكنز والكولا والحاجات المضرة دى

صحيح اللى يحبه بيكون من اول مرة واللى بيكرهه برضه من اول مرة

كتر الف خيركم انكم رجعتونى لاحسن ايام مرت على مع اغلى انسان عندى الله يرحمه

وكل سنة وانتم طيبين

[ام محمد]

العرقسوس بالنسبة لي علاج بشربه على مضض لكن مستحيل يخلص من عندي طول السنة وانا بستعمل عرقسوس رمزي لعلاج الغدة الكظرية في ايام بيقل عندي افراز الكورتيزول وهو هرمون التوتر ويفرز من الغدة الكظرية (فوق كلوية )وكانوا الاطباء حيعطوني الكورتيزون طول العمر بس لما اسعملت العرقسوس اصبحت التحاليل للدم طبيعية ونسبة الكورتيزول رجعت طبيعية والحمد لله ومن يومها بشربه على فترات متقطعة وبنصح كل الناس يشربوه وبعدا معدتي تحسنت كمان كانت دايما تاتيني حرقة وحموضة وبفضل الله تحسنت كتير

[doha]

طول عمري وانا صغيره بكره العرقسوس .. وطول عمري احاول من سنة للثانية اذوقه خاصه لما كنت بشوف شغف ماما وبابا بشربه وكل مرة كنت بفشل اكتر من سابقتها في اني استسيغ ولو ( بق واحد منه ) .. الى ان جاء يوم

شربت شويه عرقسوس بس كان ساقع ومتلج .. محسيتش بحاجه وحشه .. شربت تاني .. ايه ده .. تالت .. ياسلاااام .. واتاريني كنت محرومه من الذ مشروب موجود في الدنيا ..

ومن يومها الى وقتنا هذا وانا مدمنة عرقسوس .. بحبه جدا جدا بشكل لايوصف بس اهم شيء طبعا يكون بارد جدا .. ومركز ..

طبيعي ان في ناس بتكره العرقسوس موت وطبيعي ان ناس تانيه تحبه موت .. ببساطه لان العرقسوس اصلا طعمه وحش بجد .. لكن الاحساس بالانتعاش الي بيسببه شرب العرقسوس احساس لا يقاوم وهو ده سبب عشق الناس للعرقسوس .. الترطيب وليس الطعم ..

من ذكرياتي عن العرقسوس اني كنت بشربه وانا حامل .. شربته مرة بشراهة عشان يرفع ضغطي الي بطبيعته منخفض جدا .. شربت كوبايه واثنين وثلاثه .. ومستمخية منه جدا .. وفجأه .. الاقي انفي بينزف بغزارة ودي كانت اول مرة تحصل لي في حياتي .. اتاريني رفعت الضغط لدرجه ماطق الدم من مناخيري .. عادي جدا

احلى مافي الموضوع اني كنت بحكي القصة دي لعمي كنادرة ففاجأني بنادرة اشد .. قالي ايه ده يابنتي .. بتشربي عرقسوس وانتي حامل . متعرفيش ان الفلاحين بتقول الحامل الي تشرب عرقسوس يطلع ابنها احول :blink:

ومن يومها ..بطلت عرقسوس في الحمل .. مع اني لا اؤمن بالخرافات بس الموضوع لا يحتمل المخاطرة ..

وبما اننا بنتكلم عن الضغط وسنينه .. ولما كان العرقسوس رافع طبيعي وفتاك للضغط .. فعكسه تماما هو الكركديه الي يعتبر خافض معتبر لارتفاع ضغط الدم ..

يلله ربنا مايرفع لحد فيكم ضغط ولا ينزله..

كوباية عرقسوس بقى عشان الدعوتين الحلوين دول ..

[hOuSsAm]

سؤال ع جنب ل سي السيد

السوبيا ايه نظامها

في ماما نورا ولا فيه سكك تانيه للسوبيا

بص يباشا

اللى اعرفه ان السوبيا مزيج بين جوز الهند واللبن..........

بس اللى اكتشفته من فترة صغيرة انه بيتباع فى اكياس بودرة تحطه عاللبن ويبقى سوبيا......... حاجة كدة زى التانج

بص هحاول ادورلك اسمه ايه وبيتباع فين واقولك عليه

لعلمك انا مدمن سوبيا........... وبحاول اتعالج...... بس الدكاترة قالوا مفيش فايدة